1. Σόσκε πρέπει τι ντας καν κο λάφια κι Ιησούσκε;

ΚΙ ΠΡΟΦΗΤΕΙΑ ι τελευταίε ντιβεσένγκε, ο Ιησούς βακερντάς: «Τι προσοχίνεν τουμαρό νεαυτός, για μα τι κχινιόλ ποτές τουμαρό γκι κατά . . . ανησυχίες ι ζωγιάκε [ή γιαβέρτουλους «ανησυχίες για το αναγκαία», nwtsty​—σημείωση μελέτης]». (Λουκ. 21:​34) Πρέπει τι ντας καν ανταλέ λαφίντε. Σόσκε; Ακανά, ναστί νασάσα κατά προβλήματα σο ζορισκιαρένα σαρέ ι τζενέν.

2. Καλά προβλήματα ζορισκιαρένα αμαρέ πφραλέν ντα πφενίν;

² Μπάζιμα, μπορεί τι τθεράσα μπουτ προβλήματα σο ζορισκιαρένα-αμέν. Σκεφτίνεν ακαλά παραδείγματα. Εκ πφραλ, ο Τζον, * σο τθερέλα σκλήρυνση κατά πλάκας, χασαρντάς σαρί πι ζορ κάνα λέσκι ρομνί σο ισινέ παντριμέ λάσαρ 19 μπρεσά μουκχλάς-λες. Σοράν, λέσκε ντούι τσσαγιά τσσιναντέ τι υπηρετίνεν ι Ιεχωβάς. Εκ αντρόγυνος, ο Μπομπ ντα η Λίντα, τθερένας γιαβερά προβλήματα. Χασαρντέ ο ντούι-ντα πουμαρί μπουτί ντα σοράν πουμαρό κχερ. Ντα σικλιλέ ότι η Λίντα τθερέλας εκ πρόβλημας κι καρδιά σο μπορεί τι μουνταρέλας-λα ντα εκ γιαβέρ πφαρό νασφαλιπέ.

3. Καλέ πραγμάσκε ισινάμ σίγουροι σαρ βακερένα ο εδάφια Φιλιππησίους 4:6, 7;

³ Ισινάμ σίγουροι ότι, ο Ιεχωβά, αμαρό λατσσό Ντατ σο κερντάς-αμέν, αγαβέλα σαρ ισί τι τθεράς πφανγκό γκι. Μανγκέλα τι βοηθίνελ-αμέν κο προβλήματα σο νακχάσα. (Διαβάνεν Φιλιππησίους 4:6, 7) Ο Λάφι ι Ντεβλέσκο τθερέλα μπουτ παραδείγματα σο σικαβένα ο προβλήματα σο νακχένας λέσκε υπηρέτες. Ντα βακερέλα σαρ βοηθιντάς-λεν ο Ιεχωβά  κάνα τθερένας πφανγκό γκι. Για τι ντικχάς μερικά παραδείγματα.

4. Σο νακχλάς ο Ηλίας, ντα σαρ νιωθίνελας ι Ιεχωβάσκε;

⁴ Ο Ηλίας υπηρετιντάς ι Ιεχωβάς δύσκολε ντιβεσέντε ντα νακχλάς μπαρέ προβλήματα. Ο Αχαάβ, εκ βασιλιάς ι Ισραηλιτένγκο σο να ισινέ πιστός, παντρισάλο με την Ιεζάβελ, σο ισινέ μπουτ γκεραλί ντα ντέλας λατρεία κο Βάαλ. Ο Αχαάβ ντα η Ιεζάβελ κερντέ μπουτέ τζενέν τι ντεν λατρεία κο Βάαλ ντα μουνταρντέ μπουτέ προφητέν ι Ιεχωβάσκε. Ο Ηλίας νασλό λένγκε βαστένταρ. Ντα επειδή στηριντάς-πες κο Ιεχωβά, ατσσιλό τζουβντό κάνα πελίας μπαρί μποκχ. (1 Βασ. 17:​2-4, 14-16) Επίσης, ο Ηλίας στηριντάς-πες κο Ιεχωβά κάνα γκιλόας κόντρα κο προφήτες ντα κο τζενέ σο ντένας λατρεία κο Βάαλ. Βακερντάς κο Ισραηλίτες τι υπηρετίνεν ι Ιεχωβάς. (1 Βασ. 18:​21-24, 36-38) Ο Ηλίας ντικχλάς μπουτ φαρ ότι ο Ιεχωβά ισινέ πασέ λέστε οντουλέ δύσκολε ντιβεσέντε.

5, 6. Σαρ νιωθίνελας ο Ηλίας σαρ βακερένα ο εδάφια 1 Βασιλέων 19:​1-4, ντα σαρ σικαντάς ο Ιεχωβά ότι μανγκέλας-λες;

⁵ Διαβάνεν 1 Βασιλέων 19:​1-4. Όμως, ο Ηλίας νταρασάλο κάνα η βασίλισσα Ιεζάβελ βακερντάς ότι κα μουνταρέλας-λες. Οτθάρ, νασλό τθαβντιμάσαρ κι Βηρ-σαβεέ. Χασαρντάς αζόμ μπουτ πι ζορ σο «μανγκέλας τι μερέλ». Σόσκε νιωθίνελας αντικάς; Ο Ηλίας ισινέ ατελής τζενό «σο τθερέλας αισθήματα σαρ αμαρέ». (Ιακ. 5:​17) Πφανγκιλόας λέσκο γκι ντα τσσιντιλόας-πες  μπουτ, οτθάρ νιωθίνελας ότι χασαρντάας σαρί πι ζορ. Μπορεί τι πακιάλας ότι ο προσπάθειες σο κερέλας για τι σικλιαρέλ ι τζενέν ι Ιεχωβάσκε γκιλέας χαμέ, ότι τίποτα να λατσσάρντιλοας κο Ισραήλ ντα ότι σάντε βοβ συνεχίνελας τι υπηρετίνελ ι Ιεχωβάς. (1 Βασ. 18:3, 4, 13· 19:​10, 14) Αμέν μπορεί μα τι αγαβάσα σόσκε νιωθίνελας αντικάς ανταβά πιστός προφήτης. Αλλά ο Ιεχωβά αγαβέλας.

⁶ Ο Ιεχωβά να κερντάς λάφια κο Ηλίας σο πουταρντάς λέσκε πο γκι. Αλλά βοηθιντάς-λες τι αρακχέλ πάλι πι ζορ. (1 Βασ. 19:​5-7) Πιο σοράν, ο Ιεχωβά διορθωντάς λατσσιμάσαρ ο τρόπος σο σκεφτίνελας ο Ηλίας κάνα σικαντάς λέσκε πι μπαρί ζορ. Βακερντάς λέσκε ότι κο Ισραήλ ισινέ 7.000 τζενέ σο να μανγκλέ τι ντεν λατρεία κο Βάαλ. (1 Βασ. 19:​11-18) Αντικάς, ο Ιεχωβά σικαντάς κο Ηλίας ότι μανγκέλας-λες.

7. Σο σικαβέλα αμένγκε ο τρόπος σο βοηθιντάς ο Ιεχωβά ι Ηλιάς;

⁷ Μήπως τθερένα πφανγκό γκι; Καζόμ μπουτ λοκχιόλα αμαρό γκι σο τζανάσα ότι ο Ιεχωβά αγαβέλας ο αισθήματα ι Ηλιάσκε! Ανταβά σικαβέλα αμένγκε ότι ο Ιεχωβά σίγουρα αγαβέλα σαρ ισί τι μαράς-αμέν ι προβληματέντζαρ ντα τι τθεράς πφανγκό γκι. Τζανέλα σο ναστί κεράσα, ντα τζανέλα ατζέ-ντα σο σκεφτίνασα ντα σο νιωθίνασα. (Ψαλμ. 103:​14· 139:3, 4) Άμα κα στηρίντιβας κο Ιεχωβά σαρ ο Ηλίας, βοβ κα βοηθίνελ-αμέν τι νταϊντίνας κάνα τθεράσα πφανγκό γκι.​—Ψαλμ. 55:22.

8. Σαρ κα βοηθίνελ-τουμέν ο Ιεχωβά κάνα τθερένα πφανγκό γκι;

⁸ Κάνα τθερένα πφανγκό γκι μπορεί τι σκεφτίνενα ότι ο πράγματα να κα τζαν πιο λατσσές ντα αντικάς τι χασαρέν τουμαρί ζορ. Άμα κα αβέλ-πες ανταβά, τι ντεν-τουμέν γκοντί ότι ο Ιεχωβά κα βοηθίνελ-τουμέν. Σαρ; Βακερέλα τουμένγκε τι πουτρέν λέσκε τουμαρό γκι. Ντα κα απαντίνελ κάνα κα ντεν-λες βίκος τι βοηθίνελ-τουμέν. (Ψαλμ. 5:3· 1 Πέτρ. 5:7) Οτθάρ, τι προσευχίντιβεν συνέχεια κο Ιεχωβά τουμαρέ προβληματένγκε. Παρόλο σο να κα κερέλ τουμέντζαρ λάφι σαρ κερέλας κο Ηλίας, κα κερέλ τουμέντζαρ λάφι αντράλ πι Λαφίσταρ, κατά Αγία Γραφή, ντα αντράλ κατά οργάνωση. Ο ιστορίες ι Γραφιάκε κα λοκχιαρέν-τουμέν ντα κα κερέν-τουμέν τι μπεκλεντίνεν λατσσέ ντιβεσένγκε. Επίσης, κα ενθαρρύνεν-τουμέν ο πφραλά ντα ο πφενιά.​—Ρωμ. 15:4· Εβρ. 10:​24, 25.

9. Σαρ μπορεί τι βοηθίνελ-αμέν εκ λατσσό αμάλ;

⁹ Ο Ιεχωβά βακερντάς κο Ηλίας τι ντελ κο Ελισαιέ χάνικ κατά μπουτιά σο κερέλας. Αντικάς, ντινάς κο Ηλίας εκχέ λατσσέ αμαλές σο κα ντέλας-λες ζορ κάνα τθερέλας πφανγκό γκι. Αμέν-ντα κάνα πουτράσα αμαρό γκι εκχέ λατσσέ αμαλέσκε, βοβ μπορεί τι ντελ-αμέν ζορ. (2 Βασ. 2:2· Παρ. 17:​17) Άμα νιωθίνενα ότι να τθερένα καεκχές για τι πουτρέν τουμαρό γκι, προσευχίντιβεν κο Ιεχωβά τι βοηθίνελ-τουμέν τι αρακχέν εκχέ πφραλές ή εκχέ πφενιά σο κα ντελ-τουμέν ζορ.

10. Σαρ κερένα-αμέν οντουλά σο νακχλάς ο Ηλίας τι μπεκλεντίνας ότι ο Ιεχωβά κα βοηθίνελ-αμέν τι νταϊντίνας, ντα σαρ κα βοηθίνεν-αμέν ο εδάφια Ησαΐας 40:​28, 29;

¹⁰ Ο Ιεχωβά βοηθιντάς ι Ηλιάς τι νταϊντίνελ κάνα τθερέλας πφανγκό γκι ντα τι υπηρετίνελ πιστά μπουτ μπρεσά. Οντουλά σο νακχλάς ο Ηλίας κερένα-αμέν τι μπεκλεντίνας ότι ο Ιεχωβά κα βοηθίνελ-αμέν τι νταϊντίνας. Ισί φαρ σο ο προβλήματα ζορισκιαρένα-αμέν αζόμ μπουτ σο ισί σαρ τι χασαρντάμ σαρί ι ζορ σο τθεράας αμαρέ σωμάστε ντα αμαρέ γκίστε. Άμα όμως στηρίντιβασα κο Ιεχωβά, βοβ κα ντελ-αμέν ι ζορ σο χρειαζίντιβασα για μα τι τσσιναβάς τι υπηρετίνας-λες.​—Διαβάνεν Ησαΐας 40:​28, 29.

11-13. Σαρ επηρεασάλε τριν υπηρέτες ι Ντεβλέσκε επειδή τθερένας πφανγκό γκι;

¹¹ Γιαβερά-ντα τζενέ σο σικλιάσα λένγκε κι Γραφή τθερένας πφανγκό γκι. Για παράδειγμας, η Άννα λατζάλας σο ναστί κερέλας τσσαβέν ντα η γιαβέρ ρομνί λάκε ρομέσκι να τζιτζίνελας λάκε ντα πρασάλας-λα. (1 Σαμ. 1:2, 6) Η μπαρί ντουκχ σο τθερέλας αντρέ πέστε κερέλας-λα τι ροβέλ ντα μα τι ντελ λάκο γκι τι χαλ.​—1 Σαμ. 1:7, 10.

¹² Ο βασιλιάς Δαβίδ μπάζιμα τθερέλας πφανγκό γκι ντα οτθάρ χασαρέλας πι ζορ. Σκεφτίνεν σο προβλήματα νακχλάς. Τθερέλας μπαρέ τύψεις για το μπουτ λάθη σο κερντάας. (Ψαλμ. 40:​12) Λέσκο αγαπημέ τσσαβό ο Αβεσσαλώμ γκιλό λέσαρ κόντρα ντα σοράν μουλό. (2 Σαμ. 15:​13, 14· 18:​33) Επίσης, εκ κατά πιο λατσσέ αμαλά σο τθερέλας προδοντάς-λες. (2 Σαμ. 16:​23–17:2· Ψαλμ. 55:​12-14) Μπουτ ψαλμοί σο γραφιντάς ο Δαβίδ σικαβένα ότι χασαρντάας πι ζορ ντα ότι τθερέλας μπαρί εμπιστοσύνη κο Ιεχωβά.​—Ψαλμ. 38:​5-10· 94:​17-19.

¹³ Σοράν, εκ ψαλμωδός αρχισάλο τι ζηλίνελ ι πφιρνέ τζενέν. Βοβ μπορεί τι αστάρντιβελας κατά Λευίτης Ασάφ ντα υπηρετίνελας κο «εντυπωσιακός τθαν κι Ντεβλέσκο». Ανταβά ψαλμωδός τθερέλας πφανγκό γκι, οντουλέσκε να ισινέ ευτυχισμέ ντα να ερεσένας-λες οντουλά σο τθερέλας. Αρχισάλο μα τι αβέλ σίγουρος ατζέ-ντα για το ευλογίες σο αβένα κάνα υπηρετίνασα ι Ντεβλές.​—Ψαλμ. 73:​2-5, 7, 12-14, 16, 17, 21.

14, 15. Σο σικλιαρένα-αμέν τι κεράς ο τριν παραδείγματα κατά Γραφή για τι λας ι Ιεχωβάσκι βοήθεια;

¹⁴ Ανταλά τριν υπηρέτες ι Ιεχωβάσκε στηρίντιλε λέστε για βοήθεια. Πουταρντέ λέσκε πουμαρό γκι αντράλ κατά προσευχή. Βακερντέ λέσκε σόσκε τθερένας πφανγκό γκι. Ντα συνεχίνενας τι τζαν κο τθαν σο  ντιντιόλας λατρεία κο Ιεχωβά.​—1 Σαμ. 1:9, 10· Ψαλμ. 55:​22· 73:​17· 122:1.

¹⁵ Ο Ιεχωβά τζιτζισάλο ι κάθε εκχέσκε λένταρ. Η Άννα αρακχλάς ειρήνη πι γκοντιάτε. (1 Σαμ. 1:​18) Ο Δαβίδ γραφιντάς: «Μπουτ ισί ο προβλήματα σο τθερέλα ο δίκαιος, αλλά ο Ιεχωβά σώνελα-λες σαρέ ανταλένταρ». (Ψαλμ. 34:​19) Ντα ο ψαλμωδός πιο σοράν νιωσάλο ότι ο Ιεχωβά “ασταρέλας-λες λέσκε δεξί βαστέσταρ” κάνα ντέλας-λες συμβουλές σο σικαβένας ότι μανγκέλας-λες. Βοβ γκιλιαντάς: «Μάνγκε . . . ισί λατσσό τι πλησιάναβ ι Ντεβλές. Κο Ιεχωβά, κο πιο Μπαρό Κύριος, γκιλόμ τι αρακχαβέλ-μαν». (Ψαλμ. 73:​23, 24, 28) Σο σικλιάσα ανταλέ παραδειγματένταρ; Μπάζιμα, τθεράσα μπουτ μπαρέ προβλήματα ντα πφανγκιόλα αμαρό γκι. Μπορίνασα όμως τι νταϊντίνας άμα σκεφτίνασα λατσσές σαρ βοηθιντάς ο Ιεχωβά γιαβερέν, άμα στηρίντιβασα λέστε αντράλ κατά προσευχή ντα άμα ντάσα-λες καν σαρέ οντουλέντε σο μανγκέλα αμένταρ.​—Ψαλμ. 143:1, 4-8.

16, 17. (α) Σόσκε δεν πρέπει τι τσσίντας-αμέν ντουρ κατά Ιεχωβά ντα λέσκε λαόσταρ; (β) Σαρ μπορίνασα τι αρακχάς πάλι αμαρί ζορ;

¹⁶ Ανταλά τριν παραδείγματα ντένα-αμέν ατζέκ εκ μάθημας: Δεν πρέπει τι τσσίντας-αμέν ντουρ κατά Ιεχωβά ντα λέσκε λαόσταρ.  (Παρ. 18:1) Η Νάνσι, σο τθερέλας μπαρί ντουκχ αντρέ πέστε κάνα μουκχλάς-λα λάκο ρομ, βακερέλα: «Μπουτ ντιβεσά να μανγκάβας τι ντικχάβ καεκχές, να μανγκάβας τι κεράβ λάφι καεκχέσαρ. Αλλά καζόμ πιο μπουτ μπεσάβας κορκορί, αζόμ πιο στεναχωριμέ ισινόμας». Ο πράγματα αλλαξάλε κάνα η Νάνσι ρόντελας σαρ τι βοηθίνελ γιαβερέν σο τθερένας προβλήματα. Βόι βακερέλα: «Ασουνάβας λατσσές κάνα ο γιαβερά βακερένας μάνγκε πουμαρέ προβληματένγκε. Αγαντόμ ότι, καζόμ πιο μπουτ τζιτζίναβας λένγκε, αζόμ πιο χάνικ ντικχάβας μιρί ντουκχ».

¹⁷ Μπορίνασα τι αρακχάς πάλι αμαρί ζορ κάνα τζάσα κο συναθροίσεις. Κάνα ισινάμ οτθέ, μουκχάσα ατζέ πιο μπουτ ι Ιεχωβάς τι “βοηθίνελ ντα τι λοκχιαρέλ-αμέν”. (Ψαλμ. 86:​17) Οτθέ ντέλα-αμέν ζορ αντράλ πι άγιε πνευμάσταρ, πι Λαφίσταρ ντα πι λαόσταρ. Ο συναθροίσεις ντένα-αμέν ι ευκαιρία τι “ενθαρρύντιβας ο εκ κατά γιαβέρ”. (Ρωμ. 1:​11, 12) Εκ πφεν, η Σοφία, βακερέλα: «Ο Ιεχωβά ντα αμαρέ πφραλά ντα πφενιά βοηθιντέ-μαν τι νταϊντίναβ. Ο συναθροίσεις ισινέ μπουτ σημαντικές μάνγκε. Αγαντόμ ότι, καζόμ πιο μπουτ συμμετεχίναβα κο έργος ντα κο πράγματα σο κερέλα μι κχανγκιρί, αζόμ πιο μπουτ νταϊντίναβα κάνα τθεράβα πφανγκό γκι ντα ανησυχίναβα».

18. Άμα χασαράσα αμαρί ζορ, σο ντέλα-αμέν ο Ιεχωβά;

¹⁸ Κάνα χασαράσα αμαρί ζορ, τι ντας-αμέν γκοντί ότι ο Ιεχωβά, να ντέλα πο λάφι σάντε ότι κα λοκχιαρέλ αμαρό γκι κο ντιβεσά σο κα αβέν, αλλά βακερέλα ότι κα βοηθίνελ-αμέν τι νταϊντίνας ακανά. Κερέλα-αμέν εμ τι μανγκάς εμ τι μπορίνας τι αρακχάς πάλι αμαρί ζορ ντα αμαρό κουράγιος.​—Φιλιπ. 2:13.

19. Σο βακερένα αμένγκε ο εδάφια Ρωμαίους 8:​37-39;

¹⁹ Διαβάνεν Ρωμαίους 8:​37-39. Ο απόστολος Παύλος βακερέλα αμένγκε ότι τίποτα ναστί τσσιναβέλα-αμέν κατά Ντεβλέσκι αγάπη. Σαρ μπορίνασα τι βοηθίνας αμαρέ πφραλέν ντα πφενίν σο τθερένα πφανγκό γκι ντα προσπαθίνενα τι νταϊντίνεν; Κο γιαβέρ μάθημας κα ντικχάς σαρ μπορίνασα τι τζιτζίνας ασακέ πφραλένγκε ντα πφενίνγκε ντα τι αβάς πασέ λέντε σαρ ο Ιεχωβά.