1. Σαρ νιωθίνελα ο Ιεχωβά κάνα σώντιβελα εκ τανό λέσκε μπρακένταρ;

ΣΑΡ ντικχλάμ κο γιαβέρ μάθημας, ο Ιεχωβά βακερέλα ότι ισί σαρ εκ λατσσό τσομπάνης σο φροντίνελα πι κάθε μπρακές. Επίσης, ρόντελα τι αρακχέλ οντουλές σο τσσιναντάς τι υπηρετίνελ-λες. Ο Ιεχωβά βακερντάς κο Ισραηλίτες σο μουκχλέας-λες: «Βουρτίνεν μάντε, ντα με κα βουρτίναβ τουμέντε». Τζανάσα ότι συνεχίνελα τι νιωθίνελ αντικάς σόσκε βακερέλα: «Να αλλάναβα». (Μαλ. 3:6, 7) Ο Ιησούς βακερντάς ότι ο Ιεχωβά ντα ο άγγελοι χαιρίνενα μπουτ κάνα ατζέ-ντα εκ υπηρέτης Λέσκο σο τσσιναντάας τι υπηρετίνελ-λες βουρτίνελα Λέστε.​—Λουκ. 15:​10, 32.

2. Σο κα ντικχάς ανταλέ μαθημάστε;

² Κα ντικχάς τριν παραβολές ι Ιησούσκε σο σικαβένα σαρ μπορίνενα τι βοηθίντιβεν οντουλά σο τσσιναντέ τι υπηρετίνεν ι Ιεχωβάς. Κα βακεράς συγκεκριμέ ιδιότητες σο χρειαζίντιβασα για τι βοηθίνας ι μπρακέν σο ισί χασαρντέ τι βουρτίνεν λέστε. Επίσης, κα ντικχάς σόσκε αξίνελα τι βοηθίνας οντουλέν σο ισί μπίζουρανε.

3, 4. Σόσκε ροντιντάς αζόμ λατσσές για τι αρακχέλ πι ντραμάς η τζουβέλ σο βακερένα ο εδάφια Λουκάς 15:​8-10;

³ Πρέπει τι προσπαθίνας μπουτ για τι αρακχάς οντουλέν σο μανγκένα τι βουρτίνεν κο Ιεχωβά. Σε εκ παραβολή σο ισί κο Ευαγγέλιος κι Λουκάσκο, ο Ιησούς βακερέλα σαρ ρόντελα εκ τζουβέλ τι αρακχέλ κάτι πολύτιμος σο χασάρντιλο​—εκ ντραμάς. Ανταγιά παραβολή σικαβέλα αμένγκε καζόμ σημαντικός ισί τι ρόντας.​—Διαβάνεν Λουκάς 15:​8-10.

⁴ Ο Ιησούς βακερέλα σαρ νιωθίνελα εκ τζουβέλ κάνα αρακχέλα εκ πολύτιμη ντραμάς σο χασάρντιλι. Κο ντιβεσά κι Ιησούσκε, κάνα εκ τζουβέλ κο Ισραήλ παντρίνελας, λάκι ντάι μπορεί τι ντέλας-λα ντες ντραμάς. Μπορεί ανταγιά ντραμάς τι αβέλας σημαντική ανταλέ τζουβλιάκε σόσκε ισινέ εκ τανί κατά ντες ντραμάς σο ντινάας-λα λάκι ντάι. Η τζουβέλ αμντίνελα ότι η ντραμάς πελί τελέ. Οτθάρ, πφαμπαρέλα ο λυχνάρι ντα ρόντελα ντονταλάι, αλλά τίποτα. Μπορεί λάκο λυχνάρι μα τι νικαβέλας μπουτ φως για τι αρακχέλ ι χουρντί ασημένια ντραμάς. Τελικά,  σουλαβέλα λατσσές σαρό ο κχερ. Οτθέ, σαρέ οντουλέντε σο γκιντιντάς ι σουλαμνιάσαρ, ντικχέλα πι πολύτιμη ντραμάς σο λέλα-πες κατά σάφκι σο νικαβέλα ο λυχνάρι. Σο μπαρό πφαριπέ νασλό οπρά-λάταρ! Ντέλα βίκος πι αμαλινέν ντα πι γειτονισσέν για τι βακερέλ λένγκε ο λατσσέ αμπέρια.

5. Σόσκε μπορεί τι αβέλ δύσκολος τι αρακχάς οντουλέν σο τσσιναντέ τι τζαν κο συναθροίσεις ντα κο έργος;

⁵ Σαρ ντικχάσα κατά παραβολή ι Ιησούσκι, πρέπει τι προσπαθίνας για τι αρακχάς κάτι σο χασάρντιλο. Αντικάς, μπορεί τι χρειαζίντιβελα τι προσπαθίνας μπουτ για τι αρακχάς οντουλέν-ντα σο τσσιναντέ τι τζαν κο συναθροίσεις ντα κο έργος. Μπορεί τι νακχλέ μπρεσά από αζομάν σο τσσιναντέ τι κερέν παρέα αμέντζαρ. Μπορεί ατζέ-ντα τι γκιλέ εκχέ τθανέστε σο οτθέ ο πφραλά να τζανένα-λεν. Αλλά ακανά σο κεράσα λάφι, μερικοί λένταρ σίγουρα μανγκένα σαρ σαρ τι βουρτίνεν κο Ιεχωβά. Μανγκένα τι υπηρετίνεν ι Ιεχωβάς γιεκ πουμαρέ πφραλέντζαρ ντα πφενίντζαρ, αλλά χρειαζίντιβενα αμαρί βοήθεια.

6. Σαρ μπορίνενα σαρέ κι κχανγκιρί τι βοηθίνεν κο ροντιπέ οντουλένγκο σο τσσιναντέ τι τζαν κο συναθροίσεις ντα κο έργος;

⁶ Κον μπορίνελα τι βοηθίνελ κο ροντιπέ οντουλένγκο σο τσσιναντέ τι τζαν κο συναθροίσεις ντα κο έργος; Σαρέ​—λένγκε τζενέ, ο πρεσβύτεροι, ο σκαπανείς, ντα σαρέ ο γιαβερά πφραλά—​μπορίνασα τι βοηθίνας για τι αρακχάς-λεν. Μήπως εκ αμάλ ή εκ τουμαρέ τζενένταρ τσσιναντάς τι τζαλ κο συναθροίσεις ντα κο έργος; Μήπως ντικχλέν εκχέ ασακέ τζενές κο έργος κχερ κχερέστε ή κο σταντ; Βακερέν λέσκε ότι, άμα μανγκέλα τι τζαν λέσκε, κα χαιρίνεν τι ντεν λέσκο τηλέφωνος ή τι βακερέν κατέ μπεσέλα κο πρεσβύτεροι τουμαρέ κχανγκιριάτε.

7. Σο σικλιόνα κατά λάφια εκχέ πρεσβυτερόσκε σο βακερένα λέσκε Τόμας;

⁷ Σο μπορίνενα τι κερέν ο πρεσβύτεροι για τι αρακχέν οντουλέν σο μανγκένα τι βουρτίνεν κο Ιεχωβά; Ντικχέν σο βακερντάς εκ πρεσβύτερος, ο Τόμας, * σο τζουβντιόλα κι Ισπανία ντα βοηθιντάς πιο μπουτ από 40 Μαρτυρέν τι βουρτίνεν κι κχανγκιρί. Ο Τόμας βακερέλα: «Πρώτα, πουτσάβα διάφορε πφραλέν ντα πφενίν άμα τζανένα κάι μπεσένα ασακέ τζενέ ακανά. Ή πουτσάβα-λεν άμα ντένα-πες γκοντί εκχέ τζενές σο τσσιναντάς τι αβέλ κο συναθροίσεις. Ο πιο μπουτ κι κχανγκιρί μανγκένα μπουτ τι βοηθίνεν σόσκε νιωθίνενα ότι αντικάς ρόντενα βον-ντα. Σοράν, κάνα τζάβα τι ντικχάβ ι πφραλέν ή ι πφενίν σο τσσιναντέ τι τζαν κο συναθροίσεις ντα κο έργος, πουτσάβα-λεν λένγκε τσσαβένγκε ντα γιαβερένγκε λένγκε τζενένταρ. Μερικοί ανγκλέ ανένας πουμαρέ τσσαβέν-ντα κο συναθροίσεις, ντα οντουλά τσσαβέ μπορεί τι ισινέ ευαγγελιζόμενοι αζομάν. Μπορίνενα βον-ντα τι βοηθίντιβεν τι βουρτίνεν κο Ιεχωβά».

8. Κι παραβολή κι τσσαβέσκι σο χασάρντιλο, σο κερντάς ο ντατ πι τσσαβέσκε σο μετανιωσάλο σαρ διαβάνασα κο εδάφια Λουκάς 15:​17-24;

⁸ Καλά ιδιότητες πρέπει τι τθεράς για τι βοηθίνας οντουλέν σο μανγκένα τι βουρτίνεν κο Ιεχωβά; Ντικχέν σο μπορίνασα τι σικλιάς κατά παραβολή ι Ιησούσκι ι τσσαβέσκε σο νασλό πι κχερέσταρ. (Διαβάνεν Λουκάς 15:​17-24) Ο Ιησούς βακερέλα ότι ο τσσαβό αγαντάς ότι οντουβά σο κερντάας ισινέ ντινιλιπέ ντα αποφασιντάς τι βουρτίνελ. Λέσκο ντατ τθαβντισάλο τι ντικχέλ-λες ντα λιντάς-λες πι αγκαλιάτε, για τι σικαβέλ λέσκε ότι μανγκέλα-λες. Ο τσσαβό τθερέλας τύψεις ντα νιωθίνελας ότι να αξίνελας τι βακέρντιβελ τσσαβό οντουλέ τζενέσκο. Ο ντατ πφαμπιλό πι τσσαβέσκε, σο πουταρντάς λέσκε πο γκι. Σοράν, ο ντατ κερντάς μερικά πράγματα για τι σικαβέλ λέσκε ότι μανγκέλας-λες πάλι κχερέ, όχι σαρ δούλος, αλλά σαρ εκ τσσαβό σο μανγκένα-λες αντρέ κι φαμιλί. Για τι σικαβέλ-λες ανταβά, κερντάς εκ τραπέζι πι τσσαβέσκε σο μετανιωσάλο ντα ιριαντάς-λες λατσσέ σεΐντζαρ.

9. Καλά ιδιότητες πρέπει τι τθεράς για τι βοηθίνας οντουλέν σο τσσιναντέ τι τζαν κο έργος τι βουρτίνεν κο Ιεχωβά; (Ντικχέν ο πλαίσιος « Σαρ τι Βοηθίνεν Οντουλέν σο Μανγκένα τι Βουρτίνεν»)

 ⁹ Ο Ιεχωβά ισί σαρ ο ντατ κι παραβολή ανταγιά. Μανγκέλα ι πφραλέν ντα ι πφενίν σο τσσιναντέ τι τζαν κο έργος ντα μανγκέλα τι βουρτίνεν λέστε. Άμα κα αβάς σαρ ο Ιεχωβά, μπορίνασα τι βοηθίνας-λεν τι βουρτίνεν. Για τι αβέλ-πες ανταβά πρέπει τι τθεράς υπομονή, τι πφαμπάς λένγκε ντα τι σικαβάς ότι μανγκάσα-λεν. Σόσκε πρέπει τι σικαβάς ανταλά ιδιότητες, ντα σαρ κα κεράς-λες ανταβά;

10. Σόσκε πρέπει τι τθεράς υπομονή για τι βοηθίνας εκχέ τζενές τι βουρτίνελ κο Ιεχωβά;

¹⁰ Πρέπει τι τθεράς υπομονή σόσκε χρειαζίντιβελα χρόνος για τι βουρτίνελ εκ τζενό κο Ιεχωβά. Μπουτ τζενέ σο ανγκλέ τσσιναντέας τι τζαν κο συναθροίσεις ντα κο έργος βακερένα ότι βουρτισάλε αφού γκιλέ λένγκε μπουτ φαρ ο πρεσβύτεροι ντα γιαβερά τζενέ κατά κχανγκιρί. Η Νάνσι, κατά Νοτιοανατολική Ασία, γραφίνελα: «Εκ λατσσί αμαλίν κατά κχανγκιρί βοηθιντάς-μαν μπουτ. Μανγκέλας-μαν σαρ πι μπαρί πφεν. Ανέλας μι γκοντιάτε σο σουκάρ νακχάας. Ασουνέλας-μαν με υπομονή καζόμ πουτράβας λάκε μο γκι ντα να σακιντίνελας τι ντελ-μαν συμβουλή. Ισινέ αληθινή αμαλίν, έτοιμη τι βοηθίνελ κάνα-ντα τι αβέλ».

11. Σόσκε πρέπει τι πφαμπάς οντουλένγκε σο ισί στεναχωριμέ;

¹¹ Κάνα εκ τζενό ισί στεναχωριμέ, λέσκο γκι ισί ντινό, σαρ τι βακεράας, ντα ντουκχάλα. Κάνα σικαβάσα ότι πφαμπάσα λέσκε, ισί σαρ τι τσσουβάσα λέσκε ζουρανό φάρμακος. Ισί πφραλά ντα πφενιά σο τσσιναντέ τι τζαν κο συναθροίσεις ντα κο έργος σόσκε χολιασάλε εκχέ γιαβερέσκε κατά κχανγκιρί μπουτ μπρεσά πιο τζανγκλέ ντα τθερένα ατζέ χολί αντρέ πουμέντε. Ιτιρί ανταλέσταρ, να μανγκένα τι βουρτίνεν κο Ιεχωβά. Μερικοί μπορεί τι πακιάνα ότι αδικιντέ-λεν. Μπορεί τι τθερένα ανάγκη  εκχέ τζενές σο κα ασουνέλ-λεν ντα κα αγαβέλ σαρ νιωθίνενα. (Ιακ. 1:​19) Εκ πφεν, η Μαρία, σο ανγκλέ τσσιναντάας τι τζαλ κο συναθροίσεις ντα κο έργος βακερέλα: «Μανγκάβας εκχέ τζενές τι ασουνέλ-μαν, τι λοκχιαρέλ μο γκι ντα τι ντελ-μαν λατσσί συμβουλή».

12. Σαρ μοιάζελα σολέσαρ η αγάπη ι Ιεχωβάσκι;

¹² Η Γραφή βακερέλα ότι η αγάπη σο τθερέλα ο Ιεχωβά πι λαόσκε ισί σαρ εκ σολό. Σόσκε βακεράσα-λες ανταβά; Σκεφτίνεν ακαβά παράδειγμας: Βακερέν χάι ότι τασάντιβενα εκχέ φουρτουνιασμέ ντεριαβάτε ντα εκ τζενό φουρτίνελα τουμένγκε εκ σωσίβιος. Σίγουρα κα εκτιμίνεν ανταγιά βοήθεια σόσκε κα βοηθίνελ-τουμέν μα τι τασάντιβεν. Αλλά ο σωσίβιος να ερεσέλα για τι ατσσόν τζουβντέ. Ο πανί ισί παγωμέ, ντα να κα τζουβντιόν άμα να κα τσσουβέν-τουμέν κι βάρκα. Πρέπει κάποιος τι φουρτίνελ τουμένγκε εκ σολό ντα τι ταρτίνελ-τουμέν πασέ κι βάρκα. Ο Ιεχωβά βακερντάς ι Ισραηλιτένγκε σο τσσιναντέας τι υπηρετίνεν-λες: «Ι τζενένγκε σολέντζαρ ταρτίναβας-λεν πασέ μάντε, ι μανγκιμάσκε σολέντζαρ». (Ωσηέ 11:4) Ο Ντεβέλ τθερέλα αντιβές ο ίδια αισθήματα οντουλένγκε σο τσσιναντέ τι υπηρετίνεν-λες ντα τασάντιβενα κατά μπαρέ προβλήματα ντα κατά ανησυχίες. Μανγκέλα τι τζανέν ότι μανγκέλα-λεν ντα μανγκέλα τι ταρτίνελ-λεν πασέ πέστε. Ο Ιεχωβά μπορίνελα τι χρησιμοποιήνελ-τουμέν για τι σικαβέλ λένγκε πι αγάπη.

13. Βακερέν εκ εμπειρία σο σικαβέλα καζόμ ζουρανί ισί η αγάπη σο τθεράσα σαρ πφραλά.

¹³ Ισί σημαντικός τι βακεράς συνέχεια οντουλένγκε σο τσσιναντέ τι τζαν κο έργος ότι ο Ιεχωβά μανγκέλα-λεν ντα ότι μανγκάσα-λεν αμέν-ντα. Ο Πάμπλο, σο βακερντάς λέσκε ο γιαβέρ μάθημας, τσσιναντάας τι τζαλ κο συναθροίσεις ντα κο έργος πιο μπουτ από 30 μπρεσά. Βοβ βακερέλα: «Εκ ντιβές, σαρ νασάβας κχεράλ, αρακχλάς-μαν εκ μπουτ λατσσί πφουρί πφεν ντα κερντάς μάνγκε λάφι  με μπουτ αγάπη. Αρχισάλομ τι ροβάβ σαρ χουρντό μαξίμι. Βακερντόμ λάκε ότι μάλλον ο Ιεχωβά μπουτσσαντάας-λα. Οντιά στιγμή αποφασιντόμας τι βουρτίναβ κο Ιεχωβά».

14. Σο κερντάς ο τσομπάνης κι παραβολή κάνα αρακχλάς ι μπρακές σο χασάρντιλο σαρ βακερένα ο εδάφια Λουκάς 15:4, 5;

¹⁴ Οντουλά σο τσσιναντέ τι τζαν κο συναθροίσεις ντα κο έργος χρειαζίντιβενα αμαρί βοήθεια ντα αμαρί ζορ για μπουτ καιρός. Σαρ ο τσσαβό σο χασάρντιλο κι παραβολή κι Ιησούσκι, μπορεί τι τθερένα πφανγκό γκι. Ντα επειδή ισινέ κι Μπενγκέσκο ντουνιάς, μάλλον να τθερένα αζόμ λατσσί φιλία ι Ιεχωβάσαρ καζόμ τθερένας ανγκλέ. Πρέπει τι βοηθίνας-λεν τι κερέν πιο ζουρανί πουμαρί πίστη κο Ιεχωβά. Κι παραβολή κι μπρακέσκι σο χασάρντιλο, ο Ιησούς βακερέλα σαρ τσσουβέλα ο τσομπάνης ι μπρακές οπρά-πέστε ντα γκερέλα-λες παλάλ κο κοπάδι. Ντινάς σαάτι ντα ζορ για τι αρακχέλ-λες. Αλλά τζανέλα ότι ο μπρακό να τθερέλα ι ζορ τι βουρτίνελ κορκορό, οτθάρ πρέπει τι γκερέλ-λες βοβ παλάλ κο κοπάδι.​—Διαβάνεν Λουκάς 15:4, 5.

15. Σαρ μπορίνασα τι βοηθίνας ι μπίζουρανε τζενέν σο μανγκένα τι βουρτίνεν κο Ιεχωβά; (Ντικχέν ο πλαίσιος « Εκ Εργαλείος σο Τθερέλα Μπαρί Αξία»)

¹⁵ Μπορεί τι χρειαζίντιβελα τι ντας αμαρέ σαατίσταρ ντα αμαρέ ζοριάταρ για τι βοηθίνας οντουλέν σο τσσιναντέ τι τζαν κο συναθροίσεις ντα κο έργος τι νακχαβέν εκ πρόβλημας σο δυσκολίνελα-λεν τι υπηρετίνεν ι Ιεχωβάς πάλι. Αλλά ι Ιεχωβάσκε πνευμάσαρ, λέσκε Λαφίσαρ ντα με το εκδόσεις σο ντιντιόνα αντράλ κατά κχανγκιρί, μπορίνασα τι βοηθίνας-λεν τι αβέν πάλι λατσσέ αμαλά ι Ιεχωβάσαρ. (Ρωμ. 15:1) Σαρ κα κεράς-λες ανταβά; Εκ έμπειρος πρεσβύτερος βακερέλα: «Ο πιο μπουτ οντουλένταρ σο τσσιναντέ τι τζαν κο συναθροίσεις ντα κο έργος πρέπει τι κερέν μελέτη αφού κα αποφασίνεν ότι μανγκένα  μπαγιά τι βουρτίνεν κο Ιεχωβά». * Οντουλέσκε, άμα κα μανγκέν τουμένταρ τι κερέν μελέτη εκχέ ασακέ τζενές, τι δεχτίνεν αντράλ τουμαρέ γκίσταρ ανταβά προνόμιος. Ανταβά πρεσβύτερος βακερέλα επίσης: «Ο ευαγγελιζόμενος σο κερέλα ι μελέτη πρέπει τι αβέλ λατσσό αμάλ, εκ πφραλ σο μπορίνελα ο τζενό σο τσσιναντάας τι τζαλ κο συναθροίσεις ντα κο έργος τι ντελ λέσκε μπέσα ντα τι πουτρέλ λέσκε πο γκι».

16. Σαρ τζανάσα ότι ο άγγελοι κα βοηθίνεν-αμέν;

¹⁶ Μπουτ εμπειρίες σικαβένα ότι ο άγγελοι ισί πασέ αμέντε για τι βοηθίνεν-αμέν τι αρακχάς οντουλέν σο τσσιναντέ τι τζαν κο συναθροίσεις ντα κο έργος ντα σο μανγκένα σαρ σαρ τι βουρτίνεν κο Ιεχωβά. (Αποκ. 14:6) Για παράδειγμας, ο Σίλβιο, κατά Ισημερινός, μολιντάς ι Ιεχωβάς τι μπουτσσαβέλ εκχέ τζενές τι βοηθίνελ-λες. Πριν ατζέ τι τελειώνελ πι προσευχή, μπασλό ο κουδούνι. Ντούι πρεσβύτεροι ισινέ λέσκε πορτάτε. Καζόμ ισινέ οτθέ, αρχισάλε χαράσαρ τι ντεν-λες ι βοήθεια σο χρειαζίντιβελας.

17. Σαρ κα νιωθίνας άμα κα βοηθίνας εκχέ τζενές οντουλένταρ σο τσσιναντέ τι τζαν κο συναθροίσεις ντα κο έργος;

¹⁷ Κα αρακχάς μπαρί χαρά άμα κα βοηθίνας οντουλέν σο τσσιναντέ τι τζαν κο συναθροίσεις ντα κο έργος τι βουρτίνεν κο Ιεχωβά. Ντικχέν σο βακερέλα ο Σαλβαδόρ, εκ σκαπανέας σο ντέλα μπαρί προσοχή οντουλέ τζενέντε: «Μερικές φορές, συγκινίντιβαβα αζόμ μπουτ σο ναστί ατσσικιαράβα μο δάκρυα. Χαιρίναβα μπουτ κάνα σκεφτίναβα ότι ο Ιεχωβά σωντάς εκχές πι μπρακένταρ κατά ντουνιάς ι Μπενγκέσκο ντα ότι τθεράβας ο προνόμιος τι συνεργαζίντιβαβ Λέσαρ ανταλέστε».​—Πράξ. 20:35.

18. Άμα τσσιναντέν τι τζαν κο έργος, καλέ πραγμάσκε μπορίνενα τι αβέν σίγουροι;

¹⁸ Άμα τσσιναντέν τι κερέν παρέα ι Ιεχωβάσκε λαόσαρ, τι αβέν σίγουροι ότι βοβ ατζέκ ατζέκ μανγκέλα-τουμέν. Μανγκέλα τι βουρτίνεν πασέ λέστε. Κα χρειαζίντιβελ τι κερέν μερικά πράγματα για τι βουρτίνεν. Αλλά σαρ ο ντατ κι παραβολή κι Ιησούσκι, αντικάς ο Ιεχωβά-ντα να μπιστρέλα-τουμέν ντα μπεκλεντίνελα τι βουρτίνεν λέστε, ντα κα δεχτίνελ-τουμέν χαράσαρ πι κχερέστε.