1. Σόσκε ο Ιεχωβά μοιασκιαρέλα πο νεαυτός εκχέ νταγιάσαρ;

«ΜΠΟΡΙΝΕΛΑ εκ τζουβέλ τι μπιστρέλ πι τσσαβές σο ντέλα-λες πι τθουντέσταρ;» Ο Ιεχωβά κερντάς ανταγιά ερώτηση κο ντιβεσά σο τζουβντιόλας ο Ησαΐας. «Ατζέ-ντα άμα οντουλά τζουβλιά μπισταρντέ, με ποτές να κα μπιστράβ-τουτ», βακερντάς ο Ντεβέλ πι λαόσκε. (Ησ. 49:​15) Ο Ιεχωβά να μοιασκιαρέλα μπουτ φαρ πο νεαυτός εκχέ νταγιάσαρ. Αλλά αντατθέ κερντάς-λες. Ο Ιεχωβά βακερντάς ο παράδειγμας ι νταγιάκο πι τσσαβέσαρ για τι σικαβέλ καζόμ μπουτ μανγκέλα πι υπηρετόν. Ο πιο μπουτ νταγιά νιωθίνενα σαρ η Χασμίν, εκ πφεν σο βακερέλα: «Κάνα ντέσα τσουτσί τι τσσαβές, τθερέσα λέσαρ εκ ξεχωριστή σχέση σο ατσσικιαρέλα για πάντα».

2. Σαρ νιωθίνελα ο Ιεχωβά κάνα ντικχέλα εκχές πι τσσαβένταρ τι τσσιναβέλ κατά κχανγκιρί;

² Κάνα ατζέ-ντα εκ τσσαβό ι Ιεχωβάσκο τσσιναβέλα τι τζαλ κο έργος, βοβ ντικχέλα-λες. Σκεφτίνεν καζόμ πρέπει τι ντουκχάλα κάνα ντικχέλα κάθε μπρες ότι χιλιάδες υπηρέτες λέσκε τσσιναβένα τι τζαν κο έργος ή γιαβέρτουλους αβένα αδρανείς *.

3. Σο μανγκέλα ο Ιεχωβά;

³ Μπουτ ανταλέ πφραλένταρ ντα πφενίνταρ βουρτίνενα κι κχανγκιρί, σο μπεσέλα λένγκε σαρ σαρ! Ο Ιεχωβά μανγκέλα τι βουρτίνεν, ντα ανταβά μανγκάσα αμέν-ντα. (1 Πέτρ. 2:​25) Σαρ κα βοηθίνας-λεν; Πριν τι απαντίνας, κα αβέλας λατσσό τι τζανάς σόσκε μερικοί τσσιναβένα τι τζαν κο συναθροίσεις ντα κο έργος.

4. Σαρ επηρεάνελα μερικέ τζενέν λένγκι μπουτί;

⁴ Μερικοί μουκχένα ι μπουτί τι αβέλ ο πιο σημαντικός πράγμας λένγκε ζωγιάτε. «Μουκχάβας ι μπουτί τι λελ σαρό μο σαάτι ντα μι ζορ», βακερέλα ο Χουνγκ, * εκ πφραλ σο τζουβντιόλα κι Νοτιοανατολική Ασία. «Κερντόμας εκ μπουτ μπαρό λάθος. Σκεφτιντόμας ότι άμα κα τθεράβας πιο μπουτ λοβέ, κα μπορίναβας τι υπηρετίναβ πιο λατσσές ι Ιεχωβάς. Οτθάρ, κεράβας μπουτ σαάτια μπουτί. Κι αρχή χασαράβας μπερεκέτι συναθροίσεις μέχρι σο τσσιναντόμ ντιπ τι τζαβ. Ντικχίντιβελα ότι ο ντουνιάς ισί κερντό για τι λελ χάνικ χάνικ ι τζενέν κατά Ντεβέλ».

5. Σαρ επηρεαντέ εκχέ πφενιά ο προβλήματα σο τθερέλας παλάλ γιαβερέστε;

⁵ Μερικέ πφραλέν ντα πφενίν τασαβένα-λεν ο προβλήματα. Η Αν κατά Βρετανία τθερέλα παντζέ τσσαβέν. «Εκ τανό μι τσσαβένταρ μπιάντιλο εκχέ νασφαλιμάσαρ», βακερέλα βόι. «Σοράν, μι τσσάι χαλάς αποκοπή ντα εκ γιαβέρ μι τσσαβένταρ αρχισάλο τι τθερέλ εκ πφαρό νασφαλιπέ. Ισινόμας αζόμ στεναχωριμέ σο τσσιναντόμ τι τζαβ κο συναθροίσεις ντα κο έργος. Κο τέλος, αβιλόμ αδρανής». Πφαμπάσα μπουτ ι τζενένγκε, σαρ ισί η Αν ντα λάκι φαμιλί, σο τθερένα ασακέ δυσκολίες!

6. Σαρ κα μπορίνελας εκ τζενό τι τσσιναβέλ κατά λαός ι Ιεχωβάσκο άμα να κερέλα οντουβά σο βακερέλα ο εδάφιος Κολοσσαείς 3:13;

⁶ Διαβάνεν Κολοσσαείς 3:​13. Μερικοί υπηρέτες ι Ιεχωβάσκε χολιασάλε εκχέ πφραλέσκε κι κχανγκιρί. Ο απόστολος Παύλος αγαντάς ότι μπάζιμα μπορεί τι υπαρχίντιβελα λόγος για τι “τθεράς παράπονος” εκχέ πφραλέσκε ή πφενιάκε. Μπορεί ατζέ-ντα τι αδικιντέ-αμέν. Άμα να κα τθεράς αμαρί γκοντί, κα μπορίναας τι ατσσικιαράς χολί. Η χολί μπορεί τι κερέλ εκχέ τζενές τι τσσιναβέλ κατά λαός ι Ιεχωβάσκο. Ντικχέν σο αβιλό-πες κο Πάμπλο, εκχέ πφραλέσκε κι Νότια Αμερική. Κάποιος βακερντάς ψέματα ότι ο Πάμπλο κερντάς κάτι γκεραλό, ντα αντικάς, χασαρντάς εκ προνόμιος σο τθερέλας κι κχανγκιρί. Σο κερντάς; Βοβ βακερέλα: «Χολιασάλομ ντα χάνικ χάνικ τσσιναντόμ κατά κχανγκιρί».

7. Σο μπορεί τι αβέλ-πες εκχέ τζενέσκε σο χάνα-λες ο τύψεις;

⁷ Άμα εκ πφραλ κερντάας εκ μπαρί αμαρτία, μπορεί τι χάνα-λες ο τύψεις ατζέκ ατζέκ ντα μπορεί τι νιωθίνελα ότι να αξίνελα τι μανγκέλ-λες ο Ντεβέλ. Ατζέ-ντα άμα μετανιωσάλο ντα σικάντιλο λέσκε έλεος, μπορεί τι νιωθίνελα ότι δεν πρέπει τι αβέλ αντρέ κο λαός κι Ντεβλέσκο. Εκ πφραλ, ο Φρανσίσκο, νιωθίνελας ντιπ αντικάς. «Λιντόμ διόρθωση επειδή κερντόμ λουμνιπέ», βακερέλα. «Παρόλο σο κι αρχή τζάβας κο συναθροίσεις, ισινόμας μπουτ στεναχωριμέ ντα νιωθίναβας ότι να αξίναβα τι αβάβ αντρέ κο λαός κι Ιεχωβάσκο. Χάνας-μαν ο τύψεις ντα ισινόμας σίγουρος ότι ο Ιεχωβά να συγχωριντάς-μαν. Κο τέλος, τσσιναντόμ τι τζαβ κο συναθροίσεις». Σαρ νιωθίνενα ι πφραλένγκε ντα ι πφενίνγκε σο νακχένα ασακέ δυσκολίες; Πφαμπόνα λένγκε; Ντα ο πιο σημαντικός, σαρ νιωθίνελα ο Ιεχωβά λένγκε;

8. Μπιστρέλα ο Ιεχωβά οντουλέν σο υπηρετίνενας-λες; Εξηγίνεν.

⁸ Ο Ιεχωβά να μπιστρέλα οντουλέν σο υπηρετίνενας-λες αλλά τσσιναντέ για χάνικ. Ούτε μπιστρέλα σαρέ ο λατσσέ πράγματα σο κερντέ λέσκε. (Εβρ. 6:​10) Ο προφήτης Ησαΐας γραφιντάς εκ μπουτ λατσσό παράδειγμας για τι σικαβέλ σαρ πφαμπόλα ο Ιεχωβά πι λαόσκε: «Σαρ τσομπάνης κα αρακχαβέλ πο κοπάδι. Πι μουσιάσαρ κα γκίντελ ι μπρακέν, ντα πι αγκαλιάτε κα ασταρέλ-λεν». (Ησ. 40:​11) Σαρ νιωθίνελα ο Μπαρό Τσομπάνης, ο Ιεχωβά, κάνα εκ λέσκε  υπηρετόνταρ τσσιναβέλα τι υπηρετίνελ-λες; Ο Ιησούς σικαντάς σαρ νιωθίνελα ο Ιεχωβά κάνα πουτσλάς πι μαθητέν: «Σο πακιάνα; Άμα εκ τζενό τθερέλα 100 μπρακέν ντα εκ τανό λένταρ νασλό, να κα μουκχέλ ο 99 οπρέ κο βεσά ντα να κα τζαλ τι ρόντελ οντουλέσκε σο νασλό; Ντα άμα κα αρακχέλ-λες, τι αβέν σίγουροι ότι χαιρίνελα πιο μπουτ λέσκε παρά ι 99 μπρακένγκε σο να νασλέ».​—Ματθ. 18:​12, 13.

9. Σο κερένας πουμαρέ μπρακένγκε ο λατσσέ τσομπάνια κο πουρανέ μπρεσά; (Ντικχ ι φωτογραφία κι ανγκλαϊνί σελίδα)

⁹ Σόσκε μπορίνασα τι βακεράς ότι ο Ιεχωβά ισί σαρ εκ τσομπάνης; Σόσκε ο λατσσό τσομπάνης κο πουρανέ μπρεσά πφαμπόλας μπουτ πι μπρακένγκε. Ο Δαβίδ, για παράδειγμας, τσσουντάς-λεν εκχέ λιονταρίσαρ ντα εκχέ αρκουδάσαρ για τι αρακχαβέλ πο κοπάδι. (1 Σαμ. 17:​34, 35) Ο λατσσό τσομπάνης σίγουρα κα ντικχέλας άμα νασλόας ατζέ-ντα εκ τανό μπρακό. (Ιωάν. 10:3, 14) Εκ ασακό τσομπάνης κα μουκχέλας πι 99 μπρακέν κι μαντρίν για τι αβέν αρακχαντέ ή κα μουκχέλας γιαβερέ τσομπανίν για τι αρακχαβέν-λεν λέσκε ντα βοβ κα τζάλας τι ρόντελ οντουλέσκε σο χασάρντιλοας. Ο Ιησούς βακερντάς ανταβά παράδειγμας για τι σικλιαρέλ-αμέν εκ σημαντική αλήθεια: «Να μανγκέλα μο Ντατ σο ισί κο ουρανός τι χασάρντιβελ ούτε εκ τανό ανταλέ χουρντένταρ».​—Ματθ. 18:14.

10. Σο ντινάς πο λάφι τι κερέλ ο Ιεχωβά πι μπρακένγκε σο χασάρντιλε σαρ βακερένα ο εδάφια Ιεζεκιήλ 34:​11-16;

¹⁰ Ο Ιεχωβά μανγκέλα ι κάθε εκχές αμένταρ, εμ οντουλέ “χουρντέν” σο τσσιναντέ τι υπηρετίνεν-λες. Αντράλ κατά προφήτης Ιεζεκιήλ, ο Ντεβέλ ντινάς πο λάφι ότι κα ρόντελας πι μπρακένγκε σο χασάρντιλε ντα κα βοηθίνελας-λεν τι τθερέν πάλι εκ λατσσί φιλία λέσαρ. Ντα βακερντάς σο ακριβώς κα κερέλας για τι σώνελ-λεν, σαρέ οντουλά σο κα κερέλας εκ Ισραηλίτης τσομπάνης-ντα άμα κα νασέλας εκ λέσκε μπρακένταρ. (Διαβάνεν Ιεζεκιήλ 34:​11-16) Πρώτα, ο τσομπάνης κα ρόντελας ι μπρακέσκε, κάτι σο κα μανγκέλας μπουτ χρόνος ντα προσπάθεια.  Σοράν, κάνα κα αρακχέλας-λες, κα ανέλας-λες παλάλ κο κοπάδι. Ντα άμα ο μπρακό ισινέ ντινό ή μποκχαλό, ο τσομπάνης κα βοηθίνελας-λες, κα πφάντελας λέσκε πληγές, κα βάντελας-λες ντα κα τσσουβέλας-λες τι χαλ. Ο πρεσβύτεροι-ντα, σο ισί τσομπάνια “ι Ντεβλέσκε μπρακένγκε”, πρέπει τι κερέν ανταλά πράγματα για τι βοηθίνεν οντουλέν σο τσσιναντέ κατά κχανγκιρί. (1 Πέτρ. 5:2, 3) Ρόντενα ανταλέ τζενένγκε, βοηθίνενα-λεν τι βουρτίνεν κι κχανγκιρί ντα σικαβένα λένγκε αγάπη κάνα βοηθίνενα-λεν τι αβέν αμαλά ι Ιεχωβάσκε. *

11. Σο τζανέλας ο λατσσό τσομπάνης;

¹¹ Ο λατσσό τσομπάνης τζανέλας ότι ο μπρακέ μπορεί τι χασάρντιβεν. Ντα άμα εκ μπρακό νασέλας κατά κοπάδι, ο τσομπάνης να συμπεριφερίντιβελας λέσκε μπέτι τροπόσαρ. Ντικχέν ο παράδειγμας σο μουκχλάς ο Ιεχωβά κάνα βοηθιντάς μερικέ πι υπηρετόνταρ σο για χάνικ νασλέας πασέ λέσταρ.

12. Σαρ συμπεριφερισάλο ο Ιεχωβά κο Ιωνάς;

¹² Ο προφήτης Ιωνάς να ντινάς καν ι Ιεχωβάς ντα να γκιλό κι Νινευή. Όμως, ο Ιεχωβά να σιγκιαρντάς τι μουκχέλ-λες. Σαρ εκ λατσσό τσομπάνης, ο Ιεχωβά σωντάς-λες ντα βοηθιντάς-λες τι αρακχέλ ι ζορ σο χρειαζίντιβελας για τι τζαλ κι Νινευή. (Ιωνάς 2:7· 3:1, 2) Σοράν, ο Ντεβέλ χρησιμοποιηντάς εκ νεροκολοκυθιά για τι βοηθίνελ ι Ιωνάς τι αγαβέλ ι αξία ι κάθε τζενέσκι. (Ιωνάς 4:​10, 11) Σο σικλιάσα; Ο πρεσβύτεροι δεν πρέπει τι σιγκιαρέν τι βακερέν ότι να αξίνενα ο πφραλά σο τσσιναντέ τι τζαν κο έργος. Αλλά προσπαθίνενα τι αγαβέν σόσκε εκ μπρακό νασλό κατά κχανγκιρί. Ντα κάνα οντουβά μπρακό βουρτίνελα κο Ιεχωβά, ο πρεσβύτεροι συνεχίνενα τι σικαβέν λέσκε ότι μανγκένα-λες ντα πφαμπόνα λέσκε.

13. Σο σικλιάσα οντουλέσταρ σο κερντάς ο Ιεχωβά κο τζενό σο γραφιντάς ο Ψαλμός 73;

¹³ Οντουβά σο γραφιντάς ο Ψαλμός 73 χασαρντάς πι ζορ σόσκε ντικχέλας τι τζαν λατσσές ο πράγματα ι πφιρνέ τζενένγκε. Να ισινέ σίγουρος άμα αξίνελας τι κερέλ οντουβά σο μανγκέλα ο Ντεβέλ. (Ψαλμ. 73:​12, 13,  16) Σο κερντάς ο Ιεχωβά; Να βακερντάς ότι ισινέ γκεραλό τζενό. Μάλιστα, μουκχλάς τι γραφίντιβεν ο λάφια οντουλέ τζενέσκε κι Γραφή. Κο τέλος, ο ψαλμωδός αγαντάς ότι η λατσσί φιλία ι Ιεχωβάσαρ αξίνελα πιο μπουτ σαρέ κατά γιαβερά πράγματα ντα ντέλα πραγματική αξία κι ζωή. (Ψαλμ. 73:​23, 24, 26, 28) Σο σικλιάσα; Ο πρεσβύτεροι δεν πρέπει τι σιγκιαρέν τι κρίνεν οντουλέν σο νανέ σίγουροι άμα η υπηρεσία ι Ιεχωβάσκι ανέλα λατσσιπέ. Αντίς τι βακερέν ότι ισί γκεραλέ τζενέ, πρέπει τι προσπαθίνεν τι αγαβέν σόσκε κερένα λάφι ντα συμπεριφερίντιβενα αντικάς. Σάντε αντικάς κα μπορίνεν τι ντεν-λεν ζορ κατά Γραφή.

14. Σόσκε χρειαζίντιβελας βοήθεια ο Ηλίας, ντα σαρ βοηθιντάς-λες ο Ιεχωβά;

¹⁴ Ο προφήτης Ηλίας νασλό τθαβντιμάσαρ για τι γλιτώνελ κατά βασίλισσα Ιεζάβελ. (1 Βασ. 19:​1-3) Αμντίνελας ότι να ατσσιλό καέκ γιαβέρ προφήτης ι Ιεχωβάσκο ντα νιωθίνελας ότι λέσκο έργος γκιλόας χαμέ. Πφανγκιλόας αζόμ μπουτ λέσκο γκι σο μανγκέλας τι μερέλ. (1 Βασ. 19:4, 10) Αντίς τι βακερέλ ότι ισινέ γκεραλό τζενό, ο Ιεχωβά βακερντάς λέσκε ότι να ισινέ κορκορό, ότι μπορίνελας τι τθερέλ μπέσα κι Ντεβλέσκι ζορ ντα ότι τθερέλας τι κερέλ μπουτ μπουτί ατζέκ. Λατσσιμάσαρ ασουντάς ο ανησυχίες σο τθερέλας ο Ηλίας ντα ντινάς-λες νεβέ διορισμοί. (1 Βασ. 19:​11-16, 18) Σο σικλιάσα; Σαρέ, ντα πιο μπουτ ο πρεσβύτεροι, πρέπει τι σικαβάς λατσσιπέ ι Ιεχωβάσκε μπρακένγκε. Είτε εκ τζενό ισί χολιαμέ είτε νιωθίνελα ότι να αξίνελα ο έλεος ι Ιεχωβάσκο, ο πρεσβύτεροι κα ασουνέν-λες καζόμ πουτρέλα λένγκε πο γκι. Σοράν, κα προσπαθίνεν τι κερέν-λες τι αγαβέλ ότι ο Ιεχωβά μανγκέλα-λες.

15. Σαρ ντικχέλας ο Ιησούς πι Νταντέσκε μπρακέν, σαρ βακερέλα ο εδάφιος Ιωάννης 6:39;

¹⁵ Σαρ μανγκέλα ο Ιεχωβά τι νιωθίνας λέσκε μπρακένγκε σο χασάρντιλε; Ο Ιησούς μουκχλάς αμένγκε ο παράδειγμας. Τζανέλας ότι ι Ιεχωβάσκε ισί πολύτιμα σαρέ λέσκε μπρακέ, οτθάρ κερέλας σο νακχέλας λέσκε βαστένταρ για τι βοηθίνελ ι “μπρακέν σο ισινέ χασαρντέ κο λαός Ισραήλ” τι βουρτίνεν κο Ιεχωβά. (Ματθ. 15:​24· Λουκ. 19:9, 10) Επίσης, σαρ λατσσό τσομπάνης, ο Ιησούς κερντάς ο πιο λατσσό για μα τι χασαρέλ καεκχέ μπρακές ι Ιεχωβάσκο.​—Διαβάνεν Ιωάννης 6:39.

16, 17. Σαρ πρέπει τι ντικχέν ο πρεσβύτεροι ι βοήθεια σο πρέπει τι ντιντιόλ κο τζενέ σο τσσιναντέ τι υπηρετίνεν ι Ιεχωβάς; (Ντικχέν ο πλαίσιος « Σαρ Μπορεί τι Νιωθίνελα εκ Μπρακό σο Χασάρντιλο»)

¹⁶ Ο απόστολος Παύλος βακερντάς ι πρεσβυτερόνγκε σο ισινέ κι κχανγκιρί κι Έφεσος τι κερέν οντουβά σο κερντάς ο Ιησούς. «Πρέπει . . . τι βοηθίνεν οντουλέν σο νανέ ζουρανέ, ντα πρέπει τι ντεν-τουμέν γκοντί ο λάφια ι Κυριόσκε, ι Ιησούσκε, σο βακερντάς: “Ισί πιο ευτυχισμέ εκ τζενό κάνα ντέλα παρά κάνα λέλα”». (Πράξ. 20:​17, 35) Ανταβά εδάφιος σικαβέλα ότι ο πρεσβύτεροι τθερένα ι σημαντική ευθύνη τι αρακχαβέν ι Ιεχωβάσκε υπηρετόν. «Κάνα σκεφτίναβα καζόμ μπουτ πφαμπόλα ο Ιεχωβά πι μπρακένγκε σο χασάρντιλε, μανγκάβα τι κεράβ σο νακχέλα μι βαστένταρ για τι βοηθίναβ-λεν», βακερέλα ο Σαλβαδόρ, εκ πρεσβύτερος κι Ισπανία. «Σαρ πνευματικός τσομπάνης, ισινόμ σίγουρος ότι ο Ιεχωβά μανγκέλα τι αρακχαβάβ-λεν».

¹⁷ Σαρέ ο τζενέ σο βακέρντιβενα ανταλέ μαθημάστε ντα τσσιναντέ τι υπηρετίνεν ι Ιεχωβάς βοηθίντιλε τι βουρτίνεν πασέ λέστε. Ανταγιά στιγμή, υπαρχίντιβενα μπουτ ατζέ ασακέ τζενέ σο μανγκένα βον-ντα τι βουρτίνεν. Ο γιαβέρ μάθημας κα σικαβέλ σο τι κεράς για τι βοηθίνας-λεν τι βουρτίνεν κο Ιεχωβά.