Ανταλά εδάφια βακερένα εννιά Χριστιανικές ιδιότητες: «Ο καρπός ι πνευμάσκο ισί: αγάπη, χαρά, ειρήνη, υπομονή, λατσσιπέ, αγαθότητα, πίστη, πραότητα, εγκράτεια». Δεν πρέπει όμως τι αμντίνας ότι σάντε ανταλά ισί ο λατσσέ ιδιότητες σο βοηθίνελα-αμέν ο πνεύμας ι Ντεβλέσκο τι τθεράς.

Ντικχέν σο γραφιντάς ο απόστολος Παύλος κο γιαβερά εδάφια: «Ο πράγματα σο κερέλα ο σώμας . . . ισί: λουμνιπέ, μαγαριπέ, μπίλατζανε πράγματα, πίστη ψεύτικε ντεβλέντε, μπενγκαλέ πράγματα, ντουσμανλίκι, καβγκάς, ζήλια, πράγματα σο κερένα ο τζενέ κατά χολί, φασαρίες, διχόνοια, σο-ντα σικλιαριπέ τζάλα κόντρα κο Ντεβέλ, μίσος, ματίματα, γλέντια χωρίς όρια ντα γιαβερά ασακέ πράγματα». (Γαλ. 5:​19-21) Ο Παύλος κα μπορίνελας τι βακερέλ γιαβερά-ντα πράγματα σο ισί αντρέ κο «πράγματα σο κερέλα ο σώμας», σαρ οντουλά σο βακέρντιβενα κο εδάφιος Κολοσσαείς 3:5. Αντικάς, αφού βακερντάς εννιά λατσσέ ιδιότητες, βακερντάς: «Να υπαρχίντιβελα νόμος σο τζάλα κόντρα ασακέ πραγματέντε». Άρα, ο Παύλος να προσπαθίνελας τι τσσουβέλ σε εκ σειράς σαρέ ο λατσσέ ιδιότητες σο βοηθίνελα-αμέν ο πνεύμας ι Ντεβλέσκο τι τθεράς.

Ντικχάσα-λες ανταβά ξεκάθαρα κάνα συγκρίνασα ο λάφια ι Παυλόσκε οντουλέντζαρ σο γραφιντάς ι κχανγκιριάκε κι Έφεσος: «Αντρέ κο καρπός κι φωτέσκο ισί σο-ντα πράγμας ισί λατσσό, δίκαιος ντα μπαγιά». (Εφεσ. 5:8, 9) Βα, σο-ντα πράγμας ισί λατσσό ισί αντρέ «κο καρπός κι φωτέσκο» ντα τθερέλα τι κερέλ με το «καρπός ι πνευμάσκο».

Επίσης, ο Παύλος βακερντάς κο Τιμόθεος τι “μανγκέλ δικαιοσύνη, αφοσίωση κο Ντεβέλ, πίστη, αγάπη, υπομονή ντα πραότητα”​—σιοβ μπουτ λατσσέ ιδιότητες. (1 Τιμ. 6:​11) Σταρ ανταλένταρ (η πίστη, η αγάπη, η υπομονή ντα η πραότητα) ισί αντρέ “κο καρπός κι πνευμάσκο”. Όμως, ο Τιμόθεος κα χρειαζίντιβελας ι βοήθεια ι πνευμάσκι για τι τθερέλ ο γιαβερά-ντα ιδιότητες σο βακέρντιβενα: δικαιοσύνη ντα αφοσίωση κο Ντεβέλ.​—Ντικχέν Κολοσσαείς 3:​12· 2 Πέτρου 1:​5-7.

Άρα, ο εδάφια Γαλάτες 5:​22, 23 να βακερένα σαρέ ο ιδιότητες σο πρέπει τι τθερέν ο Χριστιανοί. Ο πνεύμας ι Ντεβλέσκο βοηθίνελα-αμέν τι τθεράς ο εννιά ιδιότητες σο ισί αντρέ “κο καρπός κι πνευμάσκο”. Ισί όμως γιαβερά-ντα ιδιότητες σο πρέπει τι τθεράς καζόμ αβάσα πιο ώριμοι Χριστιανοί ντα “ιριάσα ο νεβό χαρακτήρας σο κερντιλό αντικάς σαρ μανγκέλα ο Ντεβέλ με αληθινή δικαιοσύνη ντα αφοσίωση”.​—Εφεσ. 4:24.