ΣΑΡΕ πακιάσα ότι ο Ιεχωβά οδηγίνελα πι λαός ντα ντέλα-λες σο χρειαζίντιβελα για τι ατσσόλ πασέ λέστε ανταλέ “τελευταίε ντιβεσέντε”. (2 Τιμ. 3:1) Αλλά σαρέ χρειαζίντιβελα τι ντεν καν ι Ιεχωβάς. Μπορίνασα τι βακεράς ότι ισινάμ σαρ ο Ισραηλίτες κι έρημος, σο έπρεπε τι ασουνέν ο σάλπιγγες σο πφούντενας-λεν διάφορε τροπόντζαρ.

Ο Ιεχωβά βακερντάς κο Μωυσής τι κερέλ ντούι ασημένιες σάλπιγγες “για τι γκίντελ-λεν σαριλέν ντα για τι σικαβέλ λένγκε ότι πρέπει τι νασέν ο στρατόπεδα”. (Αριθ. 10:2) Ο ιερείς έπρεπε τι πφούντεν διαφορετικέ τροπόντζαρ ο σάλπιγγες για τι σικαβέν σο χρειαζίντιβελας τι κερέλ ο λαός. (Αριθ. 10:​3-8) Αντιβές, ο λαός ι Ντεβλέσκο λέλα οδηγίες διάφορε τροπόντζαρ. Ντικχέν τριν ανταλένταρ, σο ανένα αμαρέ γκοντιάτε ο σάλπιγγες κο πουρανέ μπρεσά. Ο λαός ι Ντεβλέσκο αντιβές γκιντίντιβελα μπαρέ τθανέντε, ο διορισμέ επίσκοποι λένα σικλιαριπέ ντα ο οδηγίες σο ισί σαρέ ι κχανγκιρίνγκε αλλάνενα.

Κάνα ο Ιεχωβά μανγκέλας τι «γκιντίντιβεν σαρέ» ανγκλάλ κι σκηνή της μαρτυρίας κατά ανατολική μπάνταρ, ο ιερείς πφούντενας ι ντουέ-ντα σαλπιγγέντζαρ. (Αριθ. 10:3) Σαρέ ο φάρες, σο χωρίντιβενας κο σταρ ντα τσσουβένας πουμαρέ στρατόπεδα ντονταλάι κατά σκηνή της μαρτυρίας, ασουνένας οντουλά σάλπιγγες. Κον τσσουβέλας πο στρατόπεδος πασέ κι είσοδος μάλλον ερεσέλας μπουτ σουγκό. Γιαβερά ισινέ πιο ντουρ ντα μπορεί τι χρειαζίντιβελας τι κερέν πιο μπουτ σαάτι ντα τι κχινιόν πιο μπουτ για τι ερεσέν. Σαρ-ντα τι αβένας ο πράγματα, ο Ιεχωβά μανγκέλας τι γκιντίντιβεν ντα τι βοηθίντιβεν σαρέ.

Αμέν αντιβές να γκιντίντιβασα εκχέ τθανέστε σαρ κι σκηνή της μαρτυρίας, αλλά βακέρντιβελα αμένγκε τι γκιντίντιβας τθανέντε ι Ντεβλέσκε λαόσαρ. Ανταλά τθανά ισί ο περιφερειακές συνελεύσεις ντα γιαβερά ειδικές εκδηλώσεις, σο οτθέ λάσα σημαντικές πληροφορίες ντα οδηγίες. Σαρό κο ντουνιάς, ο λαός ι Ντεβλέσκο απολαμβάνελα ο ίδιος πρόγραμμας. Οντουλά σο λένα ι πρόσκληση τι τζαν οτθέ τθερένα ι χαρά τι γκιντίντιβεν σαρ εκ ευτυχισμέ ομάδα. Μερικοί πρέπει τι κερέν μπαρό ντρομ. Αλλά κον λέλα ανταγιά πρόσκληση αγαβέλα ότι αξίνελα ανταβά σο κερέλα.

Σο αβέλα-πες όμως ι ομιλόντζαρ σο ισί ντουρ σαρέ ανταλέ μπαρέ τθανένταρ σο γκιντίντιβασα; Χάρη κι τεχνολογία σο τθεράσα αντιβές, μπουτ λένταρ μπορίνενα τι βοηθίντιβεν κατά ίδιος πρόγραμμας ντα τι νιωθίνεν ότι ισί βον-ντα οτθέ. Για παράδειγμας, σε εκ επίσκεψη κατά κεντρικά γραφεία, ο γραφείος τμήματος κο Μπενίν κανονιντάς τι ντικχέν ο πρόγραμμας κο Αρλίτ σο ισί κο Νίγηρας, εκ πόλη κι έρημος Σαχάρα. Γκιντισάλε οτθέ 21 πφραλά, πφενιά ντα τζενέ σο μανγκένας τι σικλιόν πιο μπουτ ι Ντεβλέσκε.  Παρόλο σο μπεσένας εκχέ τθανέστε μπουτ ντουρ, νιωθίνενας ότι ισινέ γιεκ ι 44.131 τζενέντζαρ σο γκιντισάλε. Εκ πφραλ γραφιντάς: «Ευχαριστίνασα-τουμέν αντράλ αμαρέ γκίσταρ σο ντικχλάμ αμέν-ντα ο πρόγραμμας. Ανταβά σικαντάς αμένγκε εκ φαρ ατζέ καζόμ μπουτ μανγκένα-αμέν».

Κάνα ο Ισραηλίτες πφούντενας σάντε ι εκ σάλπιγγα, «αζομάν σάντε ο αρχηγοί, ο σορέ ι χιλιαδένγκε» έπρεπε τι τζαν κι σκηνή της συνάντησης. (Αριθ. 10:4) Οτθέ μπορίνενας τι λεν πληροφορίες ντα σικλιαριπέ κατά Μωυσής. Ανταβά βοηθίνελας-λεν τι ντεν πέρα ο ευθύνες σο τθερένας πουμαρέ φαρέντε. Άμα ισινάνας εκ ανταλέ αρχηγόνταρ, να κα κερέας σο νακχέλα τι βαστένταρ για τι τζας οτθέ;

Αντιβές, ο πρεσβύτεροι νανέ «αρχηγοί» ούτε συμπεριφερίντιβενα μπέτι κο μπρακέ κι Ντεβλέσκε σο τθερένα ι ευθύνη τι αρακχαβέν. (1 Πέτρ. 5:​1-3) Σίγουρα όμως κερένα ο πιο λατσσό για τι αρακχαβέν ι μπρακέν. Οτθάρ, ασουνένα αντράλ πουμαρέ γκίσταρ κάνα βακέρντιβελα λένγκε τι λεν πιο μπουτ σικλιαριπέ, σαρ για παράδειγμας κι Σχολή Διακονίας της Βασιλείας. Καζόμ αβένα-πες ανταλά μαθήματα, ο πρεσβύτεροι σικλιόνα σαρ τι κερέν κουμάντος πιο λατσσές ο πράγματα σο τθερένα τι κερέν ι κχανγκιριάσαρ. Ανταβά βοηθίνελα σαριλέν τι αβέν πιο πασέ κο Ιεχωβά. Ατζέ-ντα άμα να νακχλέν ασακέ σχολές, μάλλον βοηθίντιβενα οντουλένταρ σο νακχλέ-λεν.

Μπάζιμα, ο Ισραηλίτες ιερείς κάνα πφούντενας ο σάλπιγγες αλλάνενας ρυθμός. Ανταβά σικαβέλας ότι ο Ιεχωβά μανγκέλας τι νασέλ σαστό ο στρατόπεδος. (Αριθ. 10:5, 6) Κάνα νασέλας ο στρατόπεδος, κερένας-λες ανταβά εκχέ μπουτ οργανωμέ τροπόσαρ, αλλά ανταβά μανγκέλας μπουτ μπουτί. Μερικοί μπορεί μπάζιμα μα τι μανγκένας τι τζαν γιαβερτθέ. Σόσκε;

Ισινέ τζενέ σο μπορεί τι αμντίνενας ότι ασούντιβελας μπουτ φαρ ντα οτθέ σο να μπεκλεντίνενας η σάλπιγγα σο σικαβέλας λένγκε ότι έπρεπε τι νασέν. «Γιαβερά φαρ ο σύννεφος ατσσόλας σάντε αρατιαρέλα μέχρι κο ντίσιπε». Γιαβερά φορές πάλι, από αζομάν σο μπεσένας εκχέ τθανέστε μέχρι αζομάν σο νασένας νακχένας είτε «ντούι ντιβεσά είτε εκ μάσεκ ή ατζέ πιο μπουτ». (Αριθ. 9:​21, 22) Καζόμ φαρ νασλό τελικά ο στρατόπεδος; Ο 33 κεφάλαιος κο Αριθμοί βακερέλα περίπου 40 τθανά σο μπεσλέ ο Ισραηλίτες.

Μπάζιμα, μερικοί μπορεί τι αρακχένας εκ τθαν βουτσσαλιάσαρ. Ανταβά κα αβέλας μπουτ λατσσό αντρέ κι «μπαρί ντα νταρανικανί έρημος». (Δευτ. 1:​19) Οτθάρ, κάποιος κα μπορίνελας τι περέλ κο πειρασμός τι σκεφτίνελ ότι άμα κα νασένας κα αβένας χειρότερα ο πράγματα.

Κάνα ο φάρες αρχίνενας τι νασέν, κάποιοι μπορεί τι δυσκολίντιβενας τι μπεσέν τι αβέλ λένγκι σειράς. Σαρέ ασουνένας ι σάλπιγγα σο αλλάνελας ρυθμός, αλλά ναστί αβέλας-πες τι νασέν κι ίδια στιγμή. Κάνα πφούντελας αντικάς η σάλπιγγα μανγκέλας τι βακερέλ ότι έπρεπε τι νασέν ο φάρες σο τθερένας πουμαρό στρατόπεδος κάρινγκ κι ανατολή, συγκεκριμέ ο φάρες Ιούδας, Ισσάχαρ ντα Ζαβουλών. (Αριθ. 2:​3-7· 10:5, 6) Σοράν, ο ιερείς πφούντενας ι σάλπιγγα ασακέ τροπόσαρ δεύτερη φαρ για τι σικαβέν λένγκε ότι έπρεπε τι νασέλ η τρίφυλη υποδιαίρεση σο τθερέλας πο στρατόπεδος κάρινγκ κο νότος. Ο ιερείς συνεχίνενας ανταλέ τροπόσαρ μέχρι τι νασέλ σαρό ο στρατόπεδος.

Μπορεί τουμένγκε-ντα τι αβέλας δύσκολος τι δεχτίνεν εκ αλλαγή κι οργάνωση. Μπορεί τι νιωσάλεν ότι να τζανένας σο τι κερέν κάνα αβιλέ-πες μπερεκέτι αλλαγές οτθέ σο να μπεκλεντίνενας λένγκε. Ή μπορεί τι μπεϊντίνενας μερικά πράγματα ντα κα μανγκένας μα τι αλλάνενας. Καβά-ντα τι αβέλας ο λόγος, μπορεί τι νιωσάλεν ότι δοκιμάντιβελας τουμαρί υπομονή, ντα χρειαζίντιβελας χρόνος για τι δεχτίνεν-λα. Όμως, άμα προσπαθίνασα τι ασουνάς αντικάς σαρ τζανάσα ότι πρέπει τι κεράς, μάλλον κα ντικχάς ότι ο Ντεβέλ ευλογίνελα-αμέν.

Κο μπρεσά κι Μωυσίσκε, ο Ιεχωβά οδηγίνελας εκατομμύριε μουρσέν, τζουβλίν ντα χουρντέν αντράλ κατά έρημος. Άμα να κα αρακχαβέλας-λεν ντα να κα οδηγίνελας-λεν, να κα ντένας-λεν πέρα. Αντιβές, ο Ιεχωβά οδηγίνελα-αμέν ανταλέ τελευταίε ντιβεσέντε σο ισί επικίνδυνα. Βοηθίνελα τι αβάς πασέ λέστε ντα τι συνεχίνας τι κεράς αμαρί πίστη ζουρανί! Οντουλέσκε τι αβάς αποφασισμέ τι ασουνάς ι σάλπιγγα σαρ ασουνένας ο Ισραηλίτες!