1. Σόσκε ο υπηρέτες ι Ιεχωβάσκε μπορεί τι νιωθίνενα μπάζιμα κορκορέ;

Ο ΠΙΟ μπουτ αμένταρ μπάζιμα νιωθίνασα κορκορέ. Μερικοί νιωθίνενα αντικάς για χάνικ βακίτι, ενώ γιαβερά για πιο μπουτ. Μπορεί τι νιωθίνασα αντικάς ατζέ-ντα άμα ισινάμ μπουτέ τζενέντζαρ. Μερικοί δυσκολίντιβενα τι κερέν αμαλέν πουμαρέ νεβέ κχανγκιριάτε. Γιαβερά ισί μπουτ αγαπημέ πουμαρέ φαμιλιάσαρ ντα, κάνα νασένα ντουρ λάταρ, νιωθίνενα κορκορέ. Γιαβερά πάλι σικλιντίνενα μπουτ εκχέ αγαπημέ τζενέσκε σο χασαρντέ κο μεριπέ. Ντα μερικοί Χριστιανοί, πιο μπουτ οντουλά σο ισί νεβέ κι αλήθεια, νιωθίνενα κορκορέ κάνα λένγκι φαμιλί ντα λένγκε αμαλά σο να υπηρετίνενα ι Ιεχωβάς κερένα-λεν πέρα ή τζάνα λέντζαρ κόντρα.

2. Καλέ ερωτησιέντε κα απαντίνας;

² Ο Ιεχωβά τζανέλα-αμέν ντα αγαβέλα-αμέν μπουτ λατσσές. Κάνα νιωθίνασα κορκορέ, τζανέλα-λες μπουτ λατσσές ανταβά ντα μανγκέλα τι βοηθίνελ-αμέν. Σαρ βοηθίνελα-αμέν ο Ιεχωβά; Σαρ μπορίνασα τι βοηθίνας αμέν αμαρό νεαυτός; Ντα σαρ μπορίνασα τι βοηθίνας γιαβερέν αμαρέ κχανγκιριάτε σο νιωθίνενα κορκορέ; Για τι ντικχάς ο απαντήσεις.

3. Σαρ σικαντάς ο Ιεχωβά ότι πφαμπόλας ι Ηλιάσκε;

³ Ο Ιεχωβά πφαμπόλα μπουτ σαρέ πι υπηρετόνγκε. Ισί πασέ κο κάθε εκ αμένταρ ντα, κάνα ισινάμ στεναχωριμέ ή χασαρντάμ αμαρί ζορ, βοβ ντικχέλα-λες ανταβά. (Ψαλμ. 145:​18, 19) Για τι ντικχάς σαρ βοηθιντάς ο Ιεχωβά πι προφητής ι  Ηλιάς. Οντουβά πιστός τζενό τζουβντιόλας κάνα ο πράγματα ισινέ δύσκολα κο Ισραήλ. Μερικά τζενέ κο Ισραήλ, σο τθερένας μπαρί ζορ ντα να μανγκένας ι Ιεχωβάς, τζάνας μπαρί κόντρα οντουλέντζαρ σο υπηρετίνενας-λες ντα πιο μπουτ μανγκένας τι μουνταρέν ι Ηλιάς. (1 Βασ. 19:1, 2) Επίσης, ο Ηλίας μπορεί τι τσσουβέλας πι γκίστε σόσκε αμντίνελας ότι σάντε βοβ ατσσιλόας σαρέ κατά προφήτες σο υπηρετίνενας ι Ιεχωβάς. (1 Βασ. 19:​10) Ο Ντεβέλ ντικχλάς-λες ανταβά ντα να ατσσιλό πφαντέ βαστέντζαρ. Μπουτσσαντάς εκχέ αγγελός κο Ηλίας τι βακερέλ λέσκε ότι να ισινέ κορκορό αλλά ότι ισινέ γιαβερά-ντα Ισραηλίτες σο συνεχίνενας τι υπηρετίνεν ι Ιεχωβάς πιστά!​—1 Βασ. 19:5, 18.

4. Καζόμ μπουτ πφαμπόλα ο Ιεχωβά πι υπηρετόνγκε σο λένγκι φαμιλί ντα λένγκε αμαλά τσσιναντέ τι βοηθίνεν-λεν σαρ σικαβένα ο εδάφια Μάρκος 10:​29, 30;

⁴ Ο Ιεχωβά τζανέλα ότι μερικοί αμένταρ πρέπει τι μουκχάς μπουτ πράγματα κάνα τραμπίνασα τι υπηρετίνας-λες. Για παράδειγμας, αμαρί φαμιλί ντα αμαρέ αμαλά σο νανέ κι αλήθεια μπορεί τι τσσιναντέ τι βοηθίνεν-αμέν. Επειδή μπορεί τι ανησυχίνελας χάνικ, ο απόστολος Πέτρος πουτσλάς εκ φαρ ι Ιησούς: «Αμέν μουκχλάμ-λεν σαρέ ντα αβιλάμ παλά-τούτε. Ακανά, σο κα αβέλ-πες αμέντζαρ;» (Ματθ. 19:​27) Ο Ιησούς βακερντάς πι μαθητένγκε ότι η κχανγκιρί κα αβέλας σαρ φαμιλί λένγκε. (Διαβάνεν Μάρκος 10:​29, 30) Ντα ο Ιεχωβά, αμαρό Ντατ, ντέλα πο λάφι ότι κα βοηθίνελ σαρέ οντουλέν σο μανγκένα τι υπηρετίνεν-λες. (Ψαλμ. 9:​10) Ντικχέν μερικά πράγματα σο μπορίνενα τι κερέν για τι λεν ι βοήθεια ι Ιεχωβάσκι κάνα νιωθίνενα κορκορέ.

5. Σόσκε ισί λατσσό τι σκεφτίνεν σαρ βοηθίνελα-τουμέν ο Ιεχωβά;

⁵ Σκεφτίνεν σαρ βοηθίνελα-τουμέν ο Ιεχωβά. (Ψαλμ. 55:​22) Ανταβά κα βοηθίνελ-τουμέν τι ντικχέν ότι να ισινέν κορκορέ. Εκ μπίπαντριμε πφεν, η Κάρολ, * σο καέκ λάκε τζενένταρ νανέ κι αλήθεια, βακερέλα: «Κάνα σκεφτίναβα σαρ βοηθιντάς-μαν ο Ιεχωβά τι νταϊντίναβ ο δοκιμασίες, νιωθίναβα μπαγιά ότι να ισινόμ κορκορί. Ντα ανταβά κερέλα-μαν τι αβάβ σίγουρη ότι ο Ιεχωβά πάντα κα αβέλ πασέ μάντε».

6. Σαρ μπορίνενα τι ντεν ζορ ο εδάφια 1 Πέτρου 5:9, 10 οντουλέν σο νιωθίνενα κορκορέ;

 ⁶ Σκεφτίνεν σαρ βοηθίνελα ο Ιεχωβά ι πφραλέν ντα ι πφενίν σο νιωθίνενα κορκορέ. (Διαβάνεν 1 Πέτρου 5:9, 10) Ο Χιρόσι, εκ πφραλ σο μπουτ μπρεσά ισί κορκορό κι αλήθεια, βακερέλα: «Κι κχανγκιρί ισί εύκολος τι αγαβές ότι σαρέ τθερένα προβλήματα. Τζανάσα ότι σαρέ κεράσα σο νακχέλα αμαρέ βαστένταρ για τι υπηρετίνας ι Ιεχωβάς ντα ανταβά ντέλα ζορ ι κάθε εκχές αμένταρ σο ισινάμ κορκορέ κι αλήθεια».

7. Σαρ βοηθίντιβενα τουμέν κατά προσευχή;

⁷ Ατσσικιαρέν εκ λατσσό πνευματικός πρόγραμμας. Πρέπει τι πουτρέν τουμαρό γκι κο Ιεχωβά. (1 Πέτρ. 5:7) Η Μάσιελ, εκ τερνί πφεν σο νιωθίνελα κορκορί επειδή καέκ λάκε φαμιλιάταρ να υπηρετίνελα ι Ιεχωβάς, βακερέλα: «Εκ κατά πιο σημαντικά πράγματα σο βοηθιντάς-μαν κάνα νιωθίναβας κορκορί ισινέ ο προσευχές σο κεράβας αντράλ μι γκίσταρ κο Ιεχωβά. Βοβ μπαγιά ισινέ σαρ Ντατ μάνγκε, ντα προσευχίντιβαβας λέστε μπουτ φαρ αντρέ κο ντιβές για τι βακεράβ λέσκε σο τθεράβας αντρέ μι γκίστε».

8. Σαρ βοηθίντιβενα τουμέν κάνα διαβάνενα ο Λάφι ι Ντεβλέσκο ντα σκεφτίνενα-λες λατσσές;

⁸ Τι διαβάνεν ο Λάφι ι Ντεβλέσκο κάθε ντιβές ντα τι σκεφτίνεν ιστορίες σο σικαβένα καζόμ μπουτ μανγκέλα-τουμέν ο Ιεχωβά. Η Μπιάνκα, εκ πφεν σο ασουνέλα συνέχεια πι φαμιλιάταρ λάφια σο κερένα-λα τι χασαρέλ πι ζορ, βακερέλα: «Βοηθίνελα-μαν μπουτ τι διαβάναβ ντα τι σκεφτίναβ λατσσές ιστορίες ι Γραφιάκε ντα ιστορίες πφραλένγκε ντα πφενίνγκε σο νακχλέ κάτι ασακό». Μερικοί Χριστιανοί σικλιόνα αβριάλ εδάφια σο λοκχιαρένα λένγκο γκι, σαρ ισί ο Ψαλμός 27:​10 ντα ο Ησαΐας 41:​10. Γιαβερά ντικχλέ ότι, κάνα ασουνένα ηχογραφήσεις αμαρέ ιστοτοπόσταρ, να νιωθίνενα ντιπ κορκορέ.

9. Σαρ βοηθίντιβενα τουμέν κατά συναθροίσεις;

⁹ Κερέν σο νακχέλα τουμαρέ βαστένταρ για μα τι χασαρέν καέκ συνάθροιση. Οντουλά σο κα ασουνέν κα ντεν-τουμέν ζορ ντα επίσης κα σικλιόν πιο λατσσές ι πφραλέν ντα ι πφενίν κι κχανγκιρί. (Εβρ. 10:​24, 25) Η Μάσιελ βακερέλα: «Παρόλο σο ισινόμας μπουτ λατζανί, αποφασιντόμας μα τι χασαράβ καέκ συνάθροιση ντα τι νταβ απάντηση κάθε φαρ. Ανταβά βοηθιντάς-μαν τι νιωθίναβ πασέ κο πφραλά ντα κο πφενιά κι κχανγκιρί».

10. Σόσκε ισί σημαντικός τι αβάς αμαλά πιστέ Χριστιανόντζαρ;

¹⁰ Τι αβέν αμαλά πιστέ Χριστιανόντζαρ. Τι αβέν αμαλά πφραλέντζαρ κι κχανγκιρί σο μπορίνενα τι σικλιόν λένταρ, είτε ισί πιο μπαρέ ή πιο χουρντέ είτε τθερένα γιαβέρ κουλτούρα τουμένταρ. Η Αγία Γραφή ανέλα αμαρέ γκοντιάτε ότι η σοφία “ισί κο  πφουρέ”. (Ιώβ 12:​12) Αλλά ο πιο μπαρέ-ντα μπορίνενα τι σικλιόν μπουτ πράγματα τερνέ πφραλένταρ σο ισί πιστοί. Ο Δαβίδ ισινέ μπουτ πιο τερνό κατά Ιωνάθαν, αλλά ανταβά να τσσιναντάς-λεν τι αβέν λατσσέ αμαλά. (1 Σαμ. 18:1) Βοηθίνενας ο εκ ι γιαβερές τι υπηρετίνεν ι Ιεχωβάς παρόλο σο τθερένας μπαρέ δυσκολίες. (1 Σαμ. 23:​16-18) «Ο πφραλά ντα ο πφενιά μπορίνενα τι αβέν μπαγιά σαρ νταντά, νταγιά ή πφραλά αμένγκε», βακερέλα η Ιρίνα, εκ πφεν σο καέκ λάκε φαμιλιάταρ μέχρι ακανά νανέ Μάρτυρας ι Ιεχωβάσκο. «Ο Ιεχωβά μπορίνελα τι χρησιμοποιήνελ-λεν για τι βοηθίνελ-αμέν κάνα τθεράσα-λες ανάγκη».

11. Σο πρέπει τι κερέν για τι τθερέν λατσσέ αμαλέν;

¹¹ Μπορεί μα τι αβέλ εύκολος τι κερέν νεβέ αμαλέν, ντα πιο μπουτ άμα ισινέν λατζανέ. Η Ράτνα, εκ λατζανί πφεν σο σικλιλί ι αλήθεια παρόλο σο τζάνας λάσαρ κόντρα, βακερέλα: «Έπρεπε τι αγαβάβ ότι τθεράβας ανάγκη ι βοήθεια ι πφραλένγκι ντα ι πφενίνγκι κι κχανγκιρί». Μπορεί τι ισί δύσκολος τι πουτρέν τουμαρό γκι εκχέ γιαβερέσκε, αλλά άμα κα κερέν-λες ανταβά, κα αβέν λατσσέ αμαλά λέσαρ. Τουμαρέ αμαλά μανγκένα τι ντεν-τουμέν ζορ ντα τι βοηθίνεν-τουμέν, αλλά πρέπει τι βακερέν λένγκε σαρ τι κερέν-λες ανταβά.

12. Σαρ κα βοηθίνελ-τουμέν ο έργος τι κερέν λατσσέ αμαλέν;

¹² Εκ μπουτ λατσσό τρόπος για τι κερέν αμαλέν ισί τι νικιόν κο έργος ι πφραλέντζαρ ντα ι πφενίντζαρ. Η Κάρολ βακερέλα: «Κερντόμ μπουτέ λατσσέ αμαλινέν επειδή κεράβας ι πφενίντζαρ έργος ντα γιαβερά πράγματα κι υπηρεσία κι Ιεχωβάσκι. Ο Ιεχωβά βοηθιντάς-μαν σαρέ ανταλά μπρεσά ανταλέ αμαλινέντζαρ». Αξίνελα τι κεράς ο πιο λατσσό για τι αβάς αμαλά πιστέ Χριστιανόντζαρ. Ο Ιεχωβά χρησιμοποιήνελα ασακέ αμαλέν για τι ντελ-τουμέν ζορ κάνα ισινέν μπίζουρανε, σαρ για παράδειγμας κάνα νιωθίνενα κορκορέ.​—Παρ. 17:17.

13. Καγιά ευθύνη τθερένα σαρέ κι κχανγκιρί;

¹³ Σαρέ κι κχανγκιρί τθερένα ι ευθύνη τι υπαρχίντιβελ ειρήνη ντα αγάπη, ντα αντικάς καέκ μα τι νιωθίνελ ντιπ κορκορό. (Ιωάν. 13:​35) Οντουλά σο κεράσα ντα βακεράσα μπορίνενα τι ντεν μπαρί ζορ ι γιαβερέν! Ντικχέν σο βακερντάς εκ πφεν: «Κάνα σικλιλόμ ι αλήθεια, η κχανγκιρί αβιλί μι φαμιλί. Να κα μπορίναβας τι αβάβ Μάρτυρας ι Ιεχωβάσκι άμα να τθεράβας λένγκι βοήθεια». Σαρ μπορίνενα τι βοηθίνεν οντουλέν σο ισί κορκορέ κι αλήθεια τι νιωθίνεν ότι ο πφραλά ντα ο πφενιά κι κχανγκιρί μανγκένα-λεν;

14. Σαρ μπορίνασα τι αβάς λατσσέ αμαλά ι νεβέ τζενέντζαρ;

¹⁴ Προσπαθίνεν τι σικαβέν οντουλένγκε σο ισί νεβέ ότι μανγκένα τι αβέν λένγκε αμαλά. Εκ πρώτος πράγμας σο μπορίνενα τι κερέν ισί τι καλωσορίνεν λατσσιμάσαρ ι νεβέ τζενέν κι κχανγκιρί. (Ρωμ. 15:7) Αλλά να ερεσέλα σάντε τι καλωσορίνας-λεν αντράλ αμαρέ γκίσταρ. Καζόμ τζάλα, μανγκάσα τι αβάς πιο λατσσέ αμαλά λέντζαρ. Οτθάρ, τι σικαβέν κο νεβέ τζενέ ότι μανγκένα-λεν ντα πφαμπόνα λένγκε. Χωρίς τι ανέν-λεν σε δύσκολη θέση, προσπαθίνεν τι αγαβέν σο νακχένα. Μερικοί μπορεί τι δυσκολίντιβενα τι βακερέν οντουλά σο τθερένα αντρέ πουμαρέ γκίστε, οτθάρ μα ζορισκιαρέν-λεν τι κερέν λάφι. Οκιά μπάνταρ, χωρίς τι ανέν-λεν σε δύσκολη θέση, κερέν λένγκε ερωτήσεις σο κα βοηθίνεν-λεν τι πουτρέν πουμαρό γκι ντα σοράν ασουνέν με υπομονή οντουλά σο κα βακερέν τουμένγκε. Για παράδειγμας, κα μπορίνενας τι πουτσέν-λεν σαρ σικλιλέ ι αλήθεια.

15. Σαρ μπορίνενα ο πφραλά σο ισί ζουρανέ πνευματικά τι βοηθίνεν γιαβερέν κι κχανγκιρί;

 ¹⁵ Σαριλένγκι πίστη κι κχανγκιρί αβέλα πιο ζουρανί κάνα οντουλά σο ισί ζουρανέ πνευματικά, ντα πιο μπουτ ο πρεσβύτεροι, σικαβένα ότι πφαμπόνα λένγκε. Η Μελίσα, σο ισινέ κι αλήθεια σάντε πι νταγιάσαρ, βακερέλα: «Εκτιμίναβα μπουτ ι πφραλέν σο ισί σαρ νταντά μάνγκε. Ντένα πουμαρέ σαατίσταρ ντα πφαμπόνα μάνγκε σαρέ ανταλά μπρεσά. Κάνα τθεράβα ανάγκη τι κεράβ λάφι, υπαρχίντιβελα εκ τζενό σο κα ασουνέλ-μαν». Ο Μαουρίσιο, εκ τερνό πφραλ σο νιωσάλο κορκορό κάνα ο πφραλ σο κερντάας-λες μελέτη νασλό κατά αλήθεια, βακερέλα: «Ο πρεσβύτεροι σικαντέ ότι πφαμπόνας μάνγκε ντα ανταβά βοηθιντάς-μαν μπουτ. Κερένας μάντζαρ λάφι, λένας-μαν πουμέντζαρ κο έργος, βακερένας μάνγκε σουκάρ σκέψεις σο αρακχλέας καζόμ σικλιαρένας-πες κατά Γραφή ντα κεράας μπουτ πράγματα γιεκ για τι νακχάς σουκάρ». Ακανά εμ η Μελίσα εμ ο Μαουρίσιο υπηρετίνενα κο Μπέθελ.

16, 17. Σο μπορίνασα τι κεράς για τι βοηθίνας ι γιαβερέν;

¹⁶ Κερέν κάτι για τι βοηθίνεν ι γιαβερέν. (Γαλ. 6:​10) «Μπουτ φαρ οντουβά σο χρειαζίντιβελα σάντε ισί τι κεράς κάτι λατσσό κο σωστός σαάτι», βακερέλα ο Λίο, σο ισί ιεραπόστολος εκχέ τθεμέστε ντουρ πι φαμιλιάταρ. «Ντάβα-μαν γκοντί εκ ντιβές σο ντινόμ τρακάρα μι αυτοκινητόσαρ. Κάνα γκιλόμ τελικά κχερέ, ισινόμας μπουτ αγχωμέ. Αλλά αζομάν εκ ζευγάρι καλιντάς-μαν πι κχερέστε για τι χας κάτι απλός. Να ντάβα-μαν γκοντί σο χαλάμ, ντάβα-μαν γκοντί όμως ότι ασουντέ-μαν λατσσιμάσαρ. Κο τέλος, νιωθίναβας μπουτ πιο λατσσές».

¹⁷ Σαρέ μπεϊντίνασα τι αβάς τθανέντε, σαρ ισί ο συνελεύσεις, για τι αβάς αμαρέ πφραλέντζαρ ντα τι κεράς λάφι ι ομιλιένγκε σο ασουντάμ. Η Κάρολ όμως βακερέλα: «Ο συνελεύσεις ισί μάνγκε μπουτ δύσκολες». Σόσκε; Βόι βακερέλα: «Παρόλο σο ισινόμ εκατοντάδες ή χιλιάδες πφραλέντζαρ ντα πφενίντζαρ, μπουτ φαρ βον ισί πουμαρέ φαμιλίντζαρ. Κάνα ντικχάβα-λεν, νιωθίναβα ότι ισινόμ ντιπ κορκορί». Γιαβερένγκε ισί μπουτ δύσκολος τι τζαν κι συνέλευση πρώτη φαρ σοράν κατά μεριπέ πουμαρέ ρομέσκο ή πουμαρέ ρομνιάκο. Τζανένα καεκχέ τζενές σο νακχέλα ασακέ δυσκολίες; Κα μπορίνενας τι βακερέν λέσκε  τι αβέλ τουμέντζαρ ντα τουμαρέ φαμιλιάσαρ ι γιαβέρ φαρ κι συνέλευση.

18. Σαρ κεράσα ο εδάφια 2 Κορινθίους 6:​11-13 κάνα σικαβάσα φιλοξενία;

¹⁸ Ντεν τουμαρέ σαατίσταρ κο γιαβερά. Κερέν ο πιο λατσσό σο μπορίνενα για τι ντεν τουμαρέ σαατίσταρ διαφορετικέ πφραλέντε ντα πφενίντε, ντα πιο μπουτ οντουλέντε σο νιωθίνενα κορκορέ. Μανγκάσα τι “κεράς τθαν αμαρέ γκίστε” ασακέ τζενένγκε. (Διαβάνεν 2 Κορινθίους 6:​11-13) «Ισινάμας μπουτ χαρούμενοι κάνα ο πφραλά ντα ο πφενιά καλίνενας-αμέν πουμαρέ κχερέντε ή λένας-αμέν παλά-πουμέντε κο εκδρομές σο κερένας», ντέλα-πες γκοντί η Μελίσα. Υπαρχίντιβελα καέκ τζενό τουμαρέ κχανγκιριάτε σο κα μπορίνενας τι σικαβέν λέσκε φιλοξενία;

19. Κάνα κα αβέλας πιο λατσσό τι ντας αμαρέ σαατίσταρ κο πφραλά ντα κο πφενιά;

¹⁹ Ισί φαρ σο αμαρέ πφραλά ντα πφενιά κα χαιρίνενας μπουτ άμα κα κεράας λέντζαρ παρέα. Μερικοί μπορεί τι δυσκολίντιβενα τι αβέν κο γιορτές πουμαρέ φαμιλιάσαρ σο νανέ κι αλήθεια. Γιαβερά μπορεί τι νιωθίνενα μπαρί ντουκχ συγκεκριμέ ντιβεσέντε, σαρ ισί ο ντιβές σο μουλό λένταρ εκ αγαπημέ τζενό. Κάνα ντάσα αμαρέ σαατίσταρ πφραλέντε ντα πφενίντε σο νακχένα ασακέ δυσκολίες, σικαβάσα λένγκε ότι “ενδιαφερίντιβασα μπαγιά”.​—Φιλιπ. 2:20.

20. Σαρ μπορίνενα ο λάφια ι Ιησούσκε κο εδάφια Ματθαίος 12:​48-50 τι βοηθίνεν-αμέν κάνα νιωθίνασα κορκορέ;

²⁰ Μπουτ πράγματα μπορεί τι κερέν εκχέ Χριστιανός τι νιωθίνελ μπάζιμα κορκορό. Δεν πρέπει όμως τι μπιστράς-αμέν ότι ο Ιεχωβά τζανέλα μπουτ λατσσές σαρ νιωθίνασα. Μπουτ φαρ ντέλα-αμέν οντουβά σο τθεράσα ανάγκη αντράλ κατά πφραλά ντα κατά πφενιά. (Διαβάνεν Ματθαίος 12:​48-50) Αμέν σικαβάσα κο Ιεχωβά ότι εκτιμίνασα ι κχανγκιρί κάνα κεράσα σο νακχέλα αμαρέ βαστένταρ για τι βοηθίνας ι πφραλέν ντα ι πφενίν. Σαρ-ντα τι νιωθίνασα μπάζιμα, να ισινάμ ποτές κορκορέ σόσκε ο Ιεχωβά ισί πάντα αμέντζαρ!