1. Σόσκε μπορίνασα τι βακεράς ότι ο Ιεχωβά μανγκέλα ι κάθε εκχές αμένταρ;

Ο ΙΕΧΩΒΑ ταρτιντάς πασέ πέστε ι κάθε εκχές αμένταρ. (Ιωάν. 6:​44) Σκεφτίνεν σο μανγκέλα τι βακερέλ ανταβά. Καζόμ ο Ιεχωβά ντικχέλας προσεκτικά ο γκιά σαρέ ι δισεκατομμύριε τζενένγκε κο ντουνιάς, ντικχλάς κάτι μπουτ σουκάρ τουμέντε​—εκ λατσσό γκι σο κα μπορίνελας τι μανγκέλ-λες. (1 Χρον. 28:9) Ο Ιεχωβά τζανέλα-τουμέν, αγαβέλα-τουμέν ντα μανγκέλα-τουμέν. Σο μπαρί ζορ λάσα ανταλέσταρ!

2. Σαρ σικαντάς ο Ιησούς ότι ο Ιεχωβά πφαμπόλα ι κάθε εκχέσκε αμένταρ;

² Ο Ιεχωβά πφαμπόλα μπουτ τουμένγκε, σαρ πφαμπόλα σαρέ τουμαρέ πφραλένγκε ντα πφενίνγκε. Για τι βοηθίνελ-αμέν τι αγαβάς-λες ανταβά, ο Ιησούς βακερντάς ότι ο Ιεχωβά ισί σαρ εκ τσομπάνης. Άμα εκ κατά 100 μπρακέ κα νασέλ κατά κοπάδι, σο κα κερέλ ο τσομπάνης; “Κα μουκχέλ ο 99 οπρέ κο βεσά ντα κα τζαλ τι ρόντελ οντουλέσκε σο νασλό”. Κάνα κα αρακχέλ-λες, να κα χολιάνελ λέσαρ, αλλά κα χαιρίνελ. Σο αγαβάσα ανταλέσταρ; Κάθε μπρακό ισί σημαντικός ι Ιεχωβάσκε. Ο Ιησούς βακερντάς: «Να μανγκέλα μο Ντατ σο ισί κο ουρανός τι χασάρντιβελ ούτε εκ τανό ανταλέ χουρντένταρ».​—Ματθ. 18:​12-14.

3. Σο κα ντικχάς ανταλέ μαθημάστε;

³ Σίγουρα να κα μανγκάας ποτές τι κεράς εκχέ πφραλές ή εκχέ πφενιά τι χασαρέλ πι ζορ. Σο μπορίνασα τι κεράς για μα τι ανάς ντουκχ κι γιαβερένγκο γκι; Ντα σο μπορίνασα τι κεράς άμα εκ τζενό κα ανέλ ντουκχ αμαρέ γκίστε; Ανταβά μάθημας κα απαντίνελ ανταλέ ερωτησιέντε. Πρώτα όμως για τι σικλιάς πιο μπουτ πράγματα “ανταλέ χουρντένγκε” σο διαβάνασα λένγκε κο Ματθαίος κεφάλαιος 18.

4. Κον ισί “ανταλά χουρντέ”;

⁴ “Ανταλά χουρντέ” ισί σαρέ ο μαθητές ι Ιησούσκε. Καζόμ-ντα μπρεσένγκε τι αβέν, ισί σαρ «χουρντέ» σόσκε μανγκένα τι σικλιόν κατά Ιησούς. (Ματθ. 18:3) Παρόλο σο μπαριλέ γιαβέρτουλους ντα τθερένα γιαβέρ κουλτούρα ντα χαρακτήρας, σαρέ σικαβένα πίστη κο Χριστός. Ντα βοβ μανγκέλα-λεν μπουτ.​—Ματθ. 18:6· Ιωάν. 1:12.

5. Σαρ νιωθίνελα ο Ιεχωβά κάνα εκ τζενό πληγώνελα εκχές λέσκε υπηρετόνταρ;

⁵ Σαρέ “ανταλά χουρντέ” τθερένα μπαρί αξία ι Ιεχωβάσκε. Για τι αγαβάς σαρ νιωθίνελα ο Ιεχωβά, τι σκεφτίνας σαρ νιωθίνασα αμέν ι χουρντένγκε. Τθερένα μπαρί αξία αμένγκε. Μανγκάσα τι αρακχαβάς-λεν σόσκε νανέ ζουρανέ ντα γκοντιαβέρ σαρ ο μπαρέ ντα να τζανένα μπουτ πράγματα. Ισί μπαγιά ότι να μπεϊντίνασα κάνα ντικχάσα εκχέ τζενές τι πληγώντιβελ ντα χολιάνασα κάνα οντουβά σο πληγώντιβελα ισί εκ χουρντό. Αντικάς ο Ιεχωβά-ντα μανγκέλα τι αρακχαβέλ-αμέν. Κάνα εκ τζενό πληγώνελα ατζέ-ντα εκχές λέσκε υπηρετόνταρ, να μπεϊντίνελα-λες ανταβά ντα χολιάνελα!​—Ησ. 63:9· Μάρκ. 9:42.

6. Σαρ ντικχέλα ο ντουνιάς ι Ιησούσκε μαθητέν σαρ βακερένα ο εδάφια 1 Κορινθίους 1:​26-29;

⁶ Καβά ισί εκ γιαβέρ λόγος σο βακεράσα ότι ο μαθητές ι Ιησούσκε ισί “χουρντέ”; Σκεφτίνεν: Καλά τζενέ ισί σημαντικά ι ντουνιάσκε; Ο χουλανέ, οντουλά σο τζανένα-λεν μπουτ τζενέ ντα οντουλά σο τθερένα εξουσία. Οκιά μπάνταρ, ο μαθητές ι Ιησούσκε ντικχίντιβενα “χουρντέ”, δηλαδή ότι να τθερένα αξία. (Διαβάνεν 1 Κορινθίους 1:​26-29) Αλλά ο Ιεχωβά να ντικχέλα-λεν αντικάς.

7. Σαρ μανγκέλα ο Ιεχωβά τι νιωθίνας αμαρέ πφραλένγκε ντα πφενίνγκε;

⁷ Ο Ιεχωβά μανγκέλα σαρέ πι υπηρετόν, είτε υπηρετίνενα-λες μπουτ μπρεσά είτε ισί νεβέ κι αλήθεια. Σαρέ αμαρέ πφραλά ντα πφενιά ισί σημαντικοί ι Ιεχωβάσκε, οτθάρ πρέπει τι αβέν σημαντικοί αμένγκε-ντα. Πρέπει “τι μανγκάς σαρέ ι πφραλέν”, όχι σάντε μερικέ πφραλέν. (1 Πέτρ. 2:​17) Πρέπει τι κεράς σο νακχέλα αμαρέ βαστένταρ για τι αρακχαβάς-λεν. Άμα αγαντάμ ότι πληγωντάμ ή προσβαλιντάμ εκχέ πφραλές ή εκχέ πφενιά, δεν πρέπει τι βακεράς ότι να ισινέ κάτι σημαντικός ντα ότι ο γιαβέρ τζενό πρέπει τι συγχωρίνελ-αμέν ντα τι μπιστρέλ οντουβά σο αβιλό-πες. Σόσκε όμως μπουτ τζενέ χολιάνενα εύκολα; Μερικοί, ιτιρί κατά τρόπος σο μπαριλέ, αμντίνενα ότι νανέ αζόμ σημαντικοί σαρ ο γιαβερά. Γιαβερά ισί νεβέ κι αλήθεια ντα να σικλιλέ ατζέκ ότι πρέπει τι συγχωρίνεν ι γιαβερέν κάνα κερένα λάθη. Σαρ-ντα τι αβέν ο πράγματα, πρέπει τι κεράς σο νακχέλα αμαρέ βαστένταρ για τι αρακχάς-λεν λέντζαρ. Οκιά μπάνταρ, εκ τζενό σο χολιάνελα εύκολα πρέπει τι προσπαθίνελ τι αλλάνελ. Αζομάν κα αβέλ χαρούμενος ντα κα τζαλ-λεν λατσσές ι γιαβερέντζαρ.

8. Καβά πράγμας σο πακιάνας ο τζενέ κο ντιβεσά κι Ιησούσκε επηρεάνελας λέσκε μαθητέν;

⁸ Σόσκε ο Ιησούς κερντάς λάφι “ανταλέ χουρντένγκε”; Λέσκε μαθητές πουτσλέας-λες: «Κον ισί ο πιο μπαρό κι Βασιλεία σο ισί κο ουρανός;» (Ματθ. 18:1) Μπουτ Ιουδαίοι κο ντιβεσά κι Ιησούσκε πακιάνας ότι, άμα εκ τζενό τθερέλας μπαρί θέση ντα εξουσία, ισινέ σημαντικός. Εκ σπουδαγμέ τζενό βακερέλα: «Ο πιο σημαντικός πράγμας ι τζενένγκε ισινέ τι τθερέν μπαρό ναβ, δόξα ντα σεβασμός κατά γιαβερά».

9. Σο έπρεπε τι κερέν ο μαθητές ι Ιησούσκε;

⁹ Ο Ιησούς τζανέλας ότι μπουτέ Ιουδαιόνγκε ο πιο σημαντικός πράγμας ισινέ τι αβέν πιο σημαντικοί κατά γιαβερά, οτθάρ λέσκε μαθητές έπρεπε τι προσπαθίνεν  μπουτ για τι αλλάνεν ο τρόπος σο σκεφτίνενας. Βακερντάς λένγκε: «Ο πιο μπαρό τουμένταρ τι αβέλ σαρ ο πιο χουρντό, ντα οντουβά σο κερέλα κουμάντος σαρ οντουβά σο υπηρετίνελα». (Λουκ. 22:​26) Ισινάμ σαρ “ο πιο χουρντέ” κάνα “πακιάσα ότι ο γιαβερά ισί πιο σημαντικοί αμένταρ”. (Φιλιπ. 2:3) Κάνα κεράσα-λες ανταβά, κα κεράς σο νακχέλα αμαρέ βαστένταρ για μα τι ανάς ντουκχ κο γκιά κι γιαβερένγκε.

10. Καγιά συμβουλή ι Παυλόσκι πρέπει τι σκεφτίνας λατσσές;

¹⁰ Σαρέ αμαρέ πφραλά ντα πφενιά ισί πιο λατσσέ αμένταρ μερικέ πραγματέντε. Μπορίνασα τι αγαβάς-λες ανταβά κάνα ντικχάσα λένγκε λατσσέ ιδιότητες. Πρέπει τι σκεφτίνας λατσσές ι συμβουλή σο ντινάς ο απόστολος Παύλος κο Κορινθίους: «Κον κερέλα-τουτ διαφορετικός κατά γιαβέρ; Καβά πράγμας οντουλένταρ σο τθερέσα να ντινέ-λες τούτε; Ντα άμα μπαγιά ντινέ-λες τούτε, σόσκε ισαρέσα-τουτ σαρ μα τι ντινέ-λες;» (1 Κορ. 4:7) Δεν πρέπει ποτές τι μανγκάς τι ισαρέν-αμέν ή τι πακιάς ότι ισινάμ πιο σημαντικοί κατά γιαβερά. Εκ πφραλ μπορεί τι κερέλα λατσσέ ομιλίες ή εκ πφεν μπορεί τι αρχίνελα εύκολα μελέτες. Η δόξα όμως πάντα πρέπει τι ντιντιόλ κο Ιεχωβά.

11. Σο σικλιάσα κατά παραβολή ι Ιησούσκι εκχέ βασιλιάσκε ντα λέσκε δουλόσκε;

¹¹ Κάνα ο Ιησούς βακερντάς πι μαθητένγκε μα τι ανέν ντουκχ κο γκιά κι γιαβερένγκε, βακερντάς λένγκε εκ παραβολή εκχέ βασιλιάσκε ντα λέσκε δουλόσκε. Ο βασιλιάς λιντάς οπράλ κατά δούλος ο μπαρέ μπόρτζια σο ναστί κα ποκινέλας-λεν ποτές. Σοράν, οντουβά δούλος μανγκλάς ζορίσαρ εκχέ γιαβερέ δουλόσταρ τι ποκινέλ εκ μπόρτζι σο ισινέ μπουτ πιο χουρντό οντουλέσταρ σο τθερέλας βοβ. Κο τέλος, ο βασιλιάς τσσουντάς κι φυλακή οντουλέ πφιρνέ δουλός. Σο σικλιάσα ανταλέσταρ; Ο Ιησούς βακερντάς: «Αντικάς κα κερέλ τουμένγκε μο Ντατ σο ισί κο ουρανός άμα ο κάθε εκ τουμένταρ να συγχωρίνελα πι πφραλές αντράλ πι γκίσταρ».​—Ματθ. 18:​21-35.

12. Σαρ πληγώνασα ι γιαβερέν κάνα να μανγκάσα τι συγχωρίνας-λεν;

¹² Οντουβά δούλος κερντάς ζιάνι, όχι σάντε πέσκε, αλλά ι γιαβερένγκε-ντα. Πρώτον, κερντάς ζιάνι ι γιαβερέ δουλόσκε κάνα «βακερντάς τι τσσουβέν-λες κι φυλακή μέχρι τι ποκινέλ σαρέ οντουλά σο χρωστάνελας». Δεύτερον, πληγωντάς ι γιαβερέ δουλόν σο ντικχλέ σο κερντάας. Κάνα «ο γιαβερά δούλοι ντικχλέ σο αβιλό-πες, στεναχωρισάλε μπουτ». Αντικάς οντουλά σο κεράσα αμέν-ντα επηρεάνενα ι γιαβερέν. Άμα εκ τζενό κα αδικίνελ-αμέν ντα αμέν να κα συγχωρίνας-λεν, σο μπορεί τι αβέλ-πες; Πρώτον, πληγώνασα-λες σόσκε να μανγκάσα τι συγχωρίνας-λες, να ντάσα-λες σημασία ντα να σικαβάσα λέσκε αγάπη. Δεύτερον, κεράσα ι γιαβερέν-ντα κι κχανγκιρί τι νιωθίνεν μπέτι σόσκε ντικχένα ότι να τζάσα-λεν λατσσές οντουλέ τζενέσαρ.

13. Σο σικλιόνα οντουλένταρ σο νακχλάς εκ σκαπάνισσα;

¹³ Κάνα συγχωρίνασα αμαρέ πφραλέν ντα πφενίν κεράσα λατσσιπέ αμαρέ νεαυτόσκε ντα ι γιαβερένγκε. Εκ σκαπάνισσα, σο κα βακεράς λάκε Κρίσταλ, αγαντάς-λες ανταβά. Εκ πφεν κι κχανγκιρί ανέλας ντουκχ λάκε γκίστε. Η Κρίσταλ ντέλα-πες γκοντί: «Μπάζιμα, νιωθίναβας ότι λάκε λάφια ισινέ σαρ τσσουριά σο ντένας-μαν. Κάνα τζάας κο έργος, να μανγκάβας ούτε τι τσσουβάβ-μαν κο ίδιος αυτοκίνητος λάσαρ. Να κεράβας ο έργος αντράλ μι γκίσταρ ντα χασαρντόμ μι χαρά». Η Κρίσταλ πακιάλας ότι τθερέλας λόγους σο ισινέ στεναχωριμέ. Αλλά να ατσσικιαρντάς χολί λάκε ντα να σκεφτίνελας σάντε πι ντουκχ. Κερντάς ο συμβουλές σο αρακχλάς κο μάθημας «Να Συγχωρείτε  από την Καρδιά Σας» σο ισί κι Σκοπιά 15 Οκτωβρίου 1999. Συγχωριντάς πι πφενιά. Η Κρίσταλ βακερέλα: «Ακανά αγαβάβα ότι σαρέ μαράσα-αμέν τι ιριάς ο νεβό χαρακτήρας ντα ότι ο Ιεχωβά συγχωρίνελα-αμέν κάθε ντιβές αντράλ πι γκίσταρ. Νιωθίναβα σαρ τι νασλό εκ πφαριπέ οπρά-μάνταρ ντα ισινόμ πάλι χαρούμενη.

14. Καβά πρόβλημας ντικχίντιβελα ότι τθερέλας ο απόστολος Πέτρος σαρ βακερένα ο εδάφια Ματθαίος 18:​21, 22, ντα σο σικλιόνα οντουλένταρ σο βακερντάς λέσκε ο Ιησούς;

¹⁴ Τζανάσα ότι πρέπει τι συγχωρίνας. Ανταβά ισί ο σωστός. Αλλά μπορεί τι αβέλ αμένγκε δύσκολος τι κεράς-λες ανταβά. Μπάζιμα ι απόστολε Πετρόσκε-ντα ισινέ δύσκολος ανταβά. (Διαβάνεν Ματθαίος 18:​21, 22) Σο κα βοηθίνελ-αμέν; Πρώτον, τι σκεφτίνας καζόμ φαρ συγχωριντάς-αμέν ο Ιεχωβά. (Ματθ. 18:​32, 33) Παρόλο σο να αξίνασα-λες, βοβ συγχωρίνελα-αμέν αντράλ πι γκίσταρ. (Ψαλμ. 103:​8-10) Όμως, «αμέν-ντα τθεράσα ι υποχρέωση τι μανγκάς ο εκ ι γιαβερές». Οτθάρ, ναστί τραμπίνασα άμα κα συγχωρίνας ή όχι. Πρέπει τι συγχωρίνας αμαρέ πφραλέν ντα πφενίν. (1 Ιωάν. 4:​11) Δεύτερον, τι σκεφτίνας σο αβέλα-πες κάνα συγχωρίνασα. Βοηθίνασα ι τζενές σο αδικιντάς-αμέν, ανάσα ι ειρήνη κι κχανγκιρί, ατσσάσα λατσσέ αμαλά ι Ιεχωβάσαρ ντα νασέλα εκ πφαριπέ οπρ’ αμένταρ. (2 Κορ. 2:7· Κολ. 3:​14) Κάτι γιαβέρ σο μπορίνασα τι κεράς, ισί τι προσευχίντιβας κο Ιεχωβά σο μανγκέλα αμένταρ τι συγχωρίνας. Μα μουκχέν ι Μπενγκές τι χαλαβέλ ι λατσσί φιλία σο τθερένα τουμαρέ πφραλέντζαρ ντα πφενίντζαρ. (Εφεσ. 4:​26, 27) Μανγκάσα ι Ιεχωβάσκι βοήθεια για μα τι περάς κι παγίδα κι Μπενγκέσκι.

15. Σο μπορίνενα τι κερέν άμα στεναχωρίνενα-τουμέν οντουλά σο κερέλα εκ πφραλ ή εκ πφεν σαρ βακερέλα ο εδάφιος Κολοσσαείς 3:13;

¹⁵ Σο αβέλα-πες όμως άμα εκ πφραλ ή εκ πφεν κερντάς κάτι σο στεναχωριντάς-τουμέν μπουτ; Σο πρέπει τι κερέν; Τι κερέν  σο νακχέλα τουμαρέ βαστένταρ για τι ατσσικιαρέν ι ειρήνη. Κερέν προσευχή κο Ιεχωβά αντράλ τουμαρέ γκίσταρ. Μανγκέν λέσταρ τι ευλογίνελ ι πφραλές σο προσβαλιντάς-τουμέν ντα τι βοηθίνελ-τουμέν τι ντικχέν λέσκε λατσσέ ιδιότητες​—ο ιδιότητες σο ο Ιεχωβά-ντα ντικχλάς λέστε.(Λουκ. 6:​28) Άμα ναστί μπιστρένα οντουβά σο κερντάς τουμένγκε τουμαρό πφραλ, αρακχέν εκ τρόπος για τι τζαν τι κερέν λέσαρ λάφι. Ισί λατσσό τι τθερέν πάντα τουμαρέ γκοντιάτε ότι ο πφραλ να κα κερέλας ποτές κάτι επίτηδες για τι ανέλ ντουκχ τουμαρέ γκίστε. (Ματθ. 5:​23, 24· 1 Κορ. 13:7) Κάνα κα κερέν λέσαρ λάφι, τι τθερέν-λες τουμαρέ γκοντιάτε ανταβά. Σο αβέλα-πες όμως άμα να μανγκέλα τι αρακχέν-λεν; «Τι νταϊντίνεν» τουμαρέ πφραλές. Μα τσσιναβέν τι κερέν υπομονή λέσαρ. (Διαβάνεν Κολοσσαείς 3:​13) Ντα ο πιο σημαντικός, ποτές μα ατσσικιαρέν χολί, σόσκε ανταβά κα κερέλας ζιάνι κι φιλία σο τθερένα ι Ιεχωβάσαρ. Μα μουκχέν τίποτα τι κερέλ-τουμέν τι χασαρέν τουμαρί πίστη. Αντικάς σικαβένα ότι μανγκένα ι Ιεχωβάς πιο μπουτ σαριλένταρ.​—Ψαλμ. 119:​165.

16. Σο πρέπει τι κερέλ ο κάθε εκ αμένταρ;

¹⁶ Ισί μπαρό προνόμιος αμένγκε τι υπηρετίνας ι Ιεχωβάς ενωμέ σαρ εκ «κοπάδι» σο τθερέλα “εκχέ τσομπανής”! (Ιωάν. 10:​16) Ο βιβλίος Οργανωμένοι για να Κάνουμε το Θέλημα του Ιεχωβά, κι σελίδα 165, βακερέλα: «Αφού μπεϊντίνενα τι αβέν ενωμέ τουμαρέ πφραλέντζαρ ντα πφενίντζαρ, πρέπει τι κερέν σο νακχέλα τουμαρέ βαστένταρ για τι ατσσόν ενωμέ». Οτθάρ, πρέπει τι «σικλιαράς αμαρό νεαυτός τι ντικχέλ ι πφραλέν ντα ι πφενίν αντικάς σαρ ντικχέλα-λεν ο Ιεχωβά». Ι Ιεχωβάσκε, ισινάμ σαρέ “χουρντέ” σο τθερένα μπουτ μπαρί αξία. Τουμέν ντικχένα τουμαρέ πφραλέν ντα πφενίν αντικάς; Ο Ιεχωβά ντικχέλα ντα εκτιμίνελα σαρέ οντουλά σο κερένα για τι βοηθίνεν-λεν ντα τι αρακχαβέν-λεν.​—Ματθ. 10:42.

17. Σο πρέπει τι αβάς αποφασισμέ τι κεράς;

¹⁷ Μανγκάσα αμαρέ πφραλέν ντα πφενίν. Οτθάρ, ισινάμ αποφασισμέ μα τι ανάς ντουκχ κο γκι αμαρέ πφραλένγκο. (Ρωμ. 14:​13) Πακιάσα ότι αμαρέ πφραλά ντα πφενιά ισί πιο σημαντικοί αμένταρ ντα μανγκάσα τι συγχωρίνας-λεν αντράλ αμαρέ γκίσταρ. Μα μουκχέν καεκχές τι κερέλ-τουμέν τι χασαρέν τουμαρί πίστη. Οκιά μπάνταρ, τι τραμπίνας «τι κεράς ο πράγματα σο ανένα ειρήνη ντα ντένα ζορ ι γιαβερέν».​—Ρωμ. 14:19.