Μπιάντιλομ 19 Μαΐου 1940 κο Αμιούν κο Λίβανος, ντα χάνικ μπρεσά πιο σοράν γκιλόμ μι φαμιλιάσαρ κι Τρίπολη. Μο ντατ ντα μι ντάι τζανένας ντα μανγκένας ι Ιεχωβά Ντεβλές. Μπαριαρντέ-αμέν με μπουτ αγάπη. Ισινάμας παντς πφραλά, τριν τσσαγιά ντα ντούι τσσαβέ, ντα με ισινόμας ο πιο χουρντό. Μι νταντέσκε ντα μι νταγιάκε, ο λοβέ να ισινέ ο πιο σημαντικός πράγμας. Ο πιο σημαντικός πράγμας αμαρέ ζωγιάτε ισινέ η Γραφή, ο συναθροίσεις ντα τι βοηθίνας ι γιαβερέν τι σικλιόν ι Ντεβλέσκε.

Τθεράας μπερεκέτι χρισμέ πφραλέν αμαρέ κχανγκιριάτε, αντρέ ανταλέντε ισινέ ο Μισέλ Αμπούντ, σο κερέλας ι μελέτη βιβλίου, σαρ βακέρντιβελας αζομάν. Σικλιλόας ι αλήθεια κι Νέα Υόρκη, ντα ισινέ ο πρώτος σο κερντάς έργος κο Λίβανος κο 1921. Ατσσιλό μι γκοντιάτε καζόμ μπουτ σεβάνελας ντα βοηθίνελας ντουέ τερνέ πφενίν σο νακχλέας ι Σχολή Γαλαάδ​—την Αν ντα την Γκουέν Μπίβορ, σο αβιλάμ λέντζαρ μπουτ λατσσέ αμαλά. Μπουτ μπρεσά πιο σοράν, χαιρισάλομ μπουτ κάνα αρακχλόμ την Αν κο Ηνωμένες Πολιτείες. Χάνικ βακίτι σοράν ανταλέσταρ, αρακχλόμ εμ την Γκουέν, σο παντρισάλιας τον Γουίλφρεντ Γκουτς ντα υπηρετίνελας κο Μπέθελ κο Λονδίνος.

Ισινάμας χάνικ Μάρτυρες κο Λίβανος κάνα ισινόμας χουρντό. Όμως, κεράας λάφι αντράλ  αμαρέ γκίσταρ οντουλένγκε σο τζανάας κατά Γραφή. Κεράας-λες ανταβά παρόλο σο τζάνας αμέντζαρ κόντρα μερικά παπάζια. Μερικά πράγματα σο αβιλέ-πες ναστί μπιστράβα-λεν.

Εκ ντιβές, κεράβας έργος μι πφενιάσαρ, σο βακερένα λάκε Σάνα, εκχέ πολυκατοικιάτε. Ξαφνικά, εκ παπάζι αβιλό ανγκλ’ αμέντε κο όροφος σο ισινάμας. Κάποιος πρέπει τι βακερντάας λέσκε τι αβέλ. Ο παπάζι αρχισάλο τι κερέλ μπέτι λάφι μι πφενιάκε, ταρτιντάς-λα κατά σκάλες ντα αντικάς μι πφεν ντινάς-πες. Αζομάν κάποιος λιντάς τηλέφωνος ι ασκερίν. Ο ασκέρια αβιλέ ντα κανονιντέ λατσσιμάσαρ τι βοηθίνελ εκ τζενό μι πφενιά. Ι παπαζίς γκερντέ-λες κο αστυνομικός τμήμας ντα αρακχλέ ότι τθερέλας πιστόλι οπρά-πέστε. Εκ ασκέρι πουτσλάς-λες: «Σο ισινάν τελικά; Παπάζι ή αρχηγός συμμοριάκο;»

Κάτι γιαβέρ σο να κα μπιστράβ ισί κάνα νοικιαντάμ εκ λεωφορείος για τι τζας τι κεράς έργος σαρ κχανγκιρί σε εκ πόλη σο ισινέ ντουρ. Νακχάας μπουτ σουκάρ μέχρι σο ο παπάζι κι πόλη οντιά λιντάς αμπέρι σο κεράας ντα γκιντιντάς μπερεκέτι τζενέν. Βον αρχισάλε τι ντεν αμένγκε βίκος ντα τι φουρτίνεν αμένγκε μπαρά, μέχρι σο ντινέ μι νταντές. Ντάβα-μαν γκοντί σο ντικχλόμ λέσκο μούι αντρέ κο ρατά. Γκιλό κο λεωφορείος γιεκ μι νταγιάσαρ, ντα σαρέ αμέν γκιλάμ τι ντικχάς σαρ ισινέ. Όμως, ποτές να κα μπιστράβ σο βακερντάς μι ντάι καζόμ κοσέλας λέσκε ρατά: «Ιεχωβά, σε παρακαλώ, συγχώρινε-λεν. Να τζανένα σο κερένα».

Εκ γιαβέρ φαρ, γκιλάμ τι ντικχάς αμαρέ τζενέν κο Αμιούν. Μι παππούσκε κχερέστε, αβιλό εκ παπάζι σο ισινέ μητροπολίτης. Τζανέλας ότι μο ντατ ντα μι ντάι ισινέ Μάρτυρες ι Ιεχωβάσκε. Τσσουντάς κι γιακχ μαν, παρόλο σο ισινόμας σιοβέ μπρεσένγκο, ντα βακερντάς μάνγκε: «Τούι σόσκε να μπολντιλάν;» Βακερντόμ λέσκε ότι ισινόμας ατζέ χουρντό ντα ότι, για τι μπολντιάβ, έπρεπε τι σικλιάβ πιο μπουτ πράγματα ι Γραφιάκε ντα τι τθεράβ ζουρανί πίστη. Μι απάντηση να μπεϊντιντάς-λα ντα βακερντάς μι παππούσκε ότι να σικαντόμας λέσκε σεβασμός.

Ασακέ πράγματα αβένας-πες σπάνια. Ο πιο μπουτ τζενέ κο Λίβανος ισί λατσσέ ντα φιλόξενοι. Οτθάρ, κεράας μπουτ σουκάρ συζητήσεις ντα μελέτες κατά Γραφή.

Καζόμ τζάβας ατζέ σχολείος, εκ τερνό πφραλ κατά Βενεζουέλα αβιλό κο Λίβανος. Αβέλας κο συναθροίσεις αμαρέ κχανγκιριάτε ντα γνωρισάλο μι πφενιάσαρ σο βακερένα λάκε Γουάφα. Παντρισάλε ντα γκιλέ τι μπεσέν κι Βενεζουέλα. Κο γράμματα σο μπουτσσαβέλας αμένγκε, η Γουάφα μολίνελας μι νταντές τι τζας τι μπεσάς κι Βενεζουέλα επειδή σικλιντίνελας αμένγκε μπουτ. Τελικά κερντάμ λάκο γκι!

Ερεσλάμ κι Βενεζουέλα κο 1953 ντα μπεσλάμ κο Καράκας, πασέ κο προεδρικός μέγαρος. Σαρ χουρντό, μπεϊντίναβας σο ντικχάβας ι προεδρός τι νακχέλ πι πααλίς αμαξίσαρ. Αλλά μι νταντέσκε ντα μι νταγιάκε να ισινέ εύκολος τι σικλιόν τι τζουβντιόν οτθέ. Σαρέ ο πράγματα ισινέ νεβέ: ο τθεμ, η τσσιπ, η κουλτούρα, ο χαμπέ ντα ο καιρός. Μόλις  αρχισάλε τι σικλιόν, αβιλό-πες κάτι σο να μπεκλεντίναας-λες.

Μο ντατ αρχισάλο μα τι νιωθίνελ λατσσές. Ανταβά αβιλό αμένγκε παράξενος επειδή πάντα ισινέ ζουρανό ντα λατσσές. Ποτές να νασφάλιλοας. Σοράν, όμως σικλιλάμ ότι τθερέλας καρκίνος κο πάγκρεας ντα κερντάς εγχείρηση. Δυστυχώς, εκ εβδομάδα σοράν μουλό.

Ναστί βακεράβα λαφίντζαρ οντουλά σο νιωθίναβας. Ισινόμας σάντε 13 μπρεσένγκο. Ποτές να μπεκλεντίναας ότι κα μερέλ αμαρό ντατ, ντα νιωσάλαμ ότι ποτές να κα αβάας πάλι χαρούμενοι. Μι ντάι ναστί δεχτίνελας ότι λάκο ρομ μουλόας. Αγαντάμ όμως ότι η ζωή συνεχίνελα, ντα ι Ιεχωβάσκε βοηθειάσαρ μπορισάλαμ τι νταϊντίνας. Κάνα τελειωσάλομ ο σχολείος 16 μπρεσένγκο κο Καράκας, μανγκάβας αντράλ μι γκίσταρ τι κεράβ κάτι με-ντα για τι βοηθίναβ μι φαμιλί.

Μι πφεν η Σάνα παντρισάλιας τον Ρουμπέν Αραούχο, σο νακχλόας ι Σχολή Γαλαάδ ντα βουρτισάλοας κι Βενεζουέλα. Γκιλέ τι μπεσέν κι Νέα Υόρκη. Κάνα αποφασιντάμ σαρ φαμιλί ότι κα τζάβας κο πανεπιστήμιος, σκεφτιντάμ ότι κα μπορίναβας τι σπουδάναβ κι Νέα Υόρκη για τι τθεράβ κάπου τι μπεσάβ. Μι πφεν ντα μο τζαμουτρό βοηθιντέ-μαν τι κεράβ μι φιλία ι Ιεχωβάσαρ πιο ζουρανί. Επίσης, αμαρέ κχανγκιριάτε κο Μπρούκλιν, σο κερένας λάφι ισπανικά, τθεράας μπουτέ πφραλέν ντα πφενίν σο ισινέ μπρεσά κι αλήθεια. Ντούι ανταλένταρ σο γνωριντόμ λατσσές ντα εκτιμιντόμ ισινέ ο Μίλτον Χένσελ ντα ο Φρέντερικ Φρανς, σο υπηρετίνενας κο Μπέθελ κο Μπρούκλιν.

Καζόμ τελειώναβας ο πρώτος μπρες κο πανεπιστήμιος, αρχισάλομ τι σκεφτίναβ σο κα κεράβας μι ζωγιάσαρ. Διαβαντόμας ντα σκεφτιντόμας μερικά μαθήματα ι Σκοπιάκε σο βακερένας ι Χριστιανόνγκε σο μανγκένας τι κερέν πράγματα κι Ιεχωβάσκι υπηρεσία. Ντικχάβας καζόμ ευτυχισμέ ισινέ ο σκαπανείς ντα ο Μπεθελίτες αμαρέ κχανγκιριάτε ντα μανγκάβας με-ντα τι αβάβ σαρ λέντε. Αλλά να ισινόμας ατζέ μπολντό. Μπουτ σουγκό αγαντόμ καζόμ σημαντικός ισινέ τι νταβ μο λάφι τι τζουβντιάβ ι Ιεχωβάσκε. Κερντόμ-λες ανταβά, ντα σοράν 30 Μαρτίου 1957 μπολντιλόμ.

Αφού μπολντιλόμ, σκεφτιντόμ τι αβάβ σκαπανέας. Μανγκάβας μπουτ τι αβάβ σκαπανέας, αλλά αγαβάβας ότι να κα αβέλας εύκολος. Σαρ κα κεράβας εμ ο σκαπανικός εμ τι τζαβ κο πανεπιστήμιος; Κεράβας λάφι μι φαμιλιάσαρ αντράλ κατά γράμματα σο μπουτσσαβάας ο εκ ι γιαβερέσκε ντα βακεράβας λένγκε ότι μανγκάβας τι τσσιναβάβ ο πανεπιστήμιος, τι βουρτίναβ κι Βενεζουέλα ντα τι αβάβ σκαπανέας.

Βουρτισάλομ κο Καράκας κο Ιούνιος 1957. Όμως, ντικχάβας ότι μι φαμιλί ντέλας-λεν πέρα δύσκολα. Έπρεπε τι κερέλ μπουτί ατζέκ εκ τζενό αμαρέ φαμιλιάταρ. Σαρ κα μπορίναβας τι βοηθίναβ με; Αρακχλόμ εκ μπουτί κι τράπεζα, αλλά μανγκάβας αζόμ μπουτ τι κεράβ σκαπανικός. Ανταβά ισινέ ο λόγος σο αβιλόμας-ντα. Αποφασιντόμ τι κεράβ ο  ντούι-ντα. Για μπουτ μπρεσά, κεράβας μπουτί μπερεκέτι σαάτια αλλά κεράβας ο σκαπανικός-ντα. Παρόλο σο τθεράβας μπουτ πράγματα τι κεράβ, ισινόμας μπουτ χαρούμενος!

Μι χαρά αβιλί ατζέ πιο μπαρί κάνα γνωριντόμ ντα παντρισάλομ ι Σιλβιάσαρ, εκχέ σουκάρ Γερμανιδάσαρ σο μανγκέλας μπουτ ι Ιεχωβάς. Αβιλίας κι Βενεζουέλα πι νταντέσαρ ντα πι νταγιάσαρ. Κερντάμ ντουέ τσσαβέν, τον Μισέλ (Μάικ) ντα τη Σαμίρα. Επίσης, αρακχαβάβας μι νταγιά, σο αβιλί τι μπεσέλ αμέντζαρ. Παρόλο σο έπρεπε τι τσσιναβάβ ο σκαπανικός, επειδή τθεράβας μπουτ πράγματα τι κεράβ, συνεχίναβας τι κεράβ έργος αντράλ μι γκίσταρ. Η Σίλβια ντα με κεράας βοηθητικός σκαπανικός κάνα μπορίναας αντρέ κο διακοπές.

Ο τσσαβέ τζάνας ατζέ σχολείος κάνα αβιλό-πες οντουβά σο βακερντόμ τουμένγκε κι αρχή ανταλέ θεμάσκο. Πρέπει τι βακεράβ ότι μι ζωή ισινέ μπουτ άνετη, ντα σαρέ οντουλά σο κερένας μπουτί κο τράπεζες σεβάνενας-μαν. Όμως, οντουβά σο μανγκάβας πιο μπουτ σαριλένταρ ισινέ τι ντικχέν-μαν ο γιαβερά σαρ υπηρέτης ι Ιεχωβάσκο. Ο σκέψεις σο κερντόμ οντουβά ντιβές συνεχίνενας τι αβέν αντρέ μι γκοντιάτε. Οτθάρ, μπεσλόμ μι ρομνιάσαρ ντα κερντάμ λάφι αμαρέ λοβένγκε. Άμα κα νασάβας κατά τράπεζα σο κεράβας μπουτί, κα ποκινένας-μαν μπουτ λατσσές επειδή κεράβας μπουτ μπρεσά μπουτί οτθέ. Αφού να τθεράας μπόρτζια, σκεφτιντάμ, ότι άμα κα κεράας αμαρί ζωή πιο απλή, οντουλά λοβέ κα ερεσένας-αμέν για μπουτ βακίτι.

Ανταγιά απόφαση να ισινέ εύκολη, αλλά μι αγαπημέ ρομνί ντα μι ντάι ισινέ πασέ μάντε. Ετοιμάναβας-μαν τι αρχίναβ πάλι ο σκαπανικός. Ισινόμας μπουτ χαρούμενος! Σαρέ ντικχίντιβενας λατσσέ. Αλλά κα αβέλας αμένγκε κάτι σο να μπεκλεντίναας-λες.

Εκ ντιβές, ο γιατρός βακερντάς αμένγκε ότι η Σίλβια ισινέ κχαμνί. Σο σουκάρ έκπληξη ισινέ ανταγιά! Ισινάμας μπουτ χαρούμενοι. Οκιά μπάνταρ όμως, σκεφτίναβας ι σημαντική απόφαση σο λιντόμας τι αβάβ σκαπανέας. Σο κα αβέλας-πες όμως με το σκαπανικός; Μπεσάας σαρ σαρ τι μπιάντιβελ ο μαξίμι. Αλλά σκεφτίναβας άμα κα μπορίναβας τι αβάβ σκαπανέας.

Αφού κερντάμ λάφι για το στόχους σο τθεράσα, αποφασιντόμ τι αβάβ σκαπανέας. Αμαρό τσσαβό ο Γκαμπριέλ μπιάντιλο κο Απρίλιος 1985. Με νασλόμ κατά μπουτί σο κεράβας κι τράπεζα ντα αρχισάλομ ο τακτικός σκαπανικός κο Ιούνιος κο 1985. Πιο σοράν, ντιντιλό-μαν ο προνόμιος τι υπηρετίναβ κι Επιτροπή του  Τμήματος. Αλλά ο γραφείος τμήματος να ισινέ κο Καράκας, οπότε έπρεπε τι τζαβ ντα τι αβάβ ντούι ή τριν ντιβεσά αντρέ κι εβδομάδα ντα τι κεράβ 80 χιλιόμετρα περίπου.

Ο γραφείο τμήματος ισινέ κι πόλη Λα Βικτόρια. Οτθάρ, λιντάμ ι απόφαση σαρ φαμιλί τι τζας τι μπεσάς οτθέ για τι αβάς πιο πασέ κο Μπέθελ. Ισινέ εκ μπαρί απόφαση. Σο-ντα τι βακεράβ ισί χάνικ ανγκλάλ οντουλέντε σο νιωθίναβα μι φαμιλιάκε. Μι φαμιλί ισινέ μπαρί βοήθεια μάνγκε. Μι πφεν η Μπάχα βακερντάς αμένγκε ότι κα αρακχαβέλας βόι αμαρέ νταγιά. Ο Μάικ παντρισάλοας, αλλά η Σαμίρα ντα ο Γκαμπριέλ μπεσένας ατζέκ αμέντζαρ. Οπότε η απόφαση τι τζας τι μπεσάς κάπου γιαβερτθέ μανγκέλας τι βακερέλ ότι κα μουκχένας παλάλ πουμαρέ αμαλέν κο Καράκας. Επίσης, μι αγαπημέ Σίλβια έπρεπε τι σικλιόλ τι μπεσέλ εκχέ χουρντέ τθεμέστε. Ντα σαρέ έπρεπε τι σικλιάς τι τζουβντιάς εκχέ πιο χουρντέ κχερέστε. Βα, η απόφαση σο λιντάμ τι νασάς κατά Καράκας ντα τι τζας τι μπεσάς κι Λα Βικτόρια να ισινέ εύκολη απόφαση.

Όμως, ο πράγματα πάλι αλλαξάλε. Ο Γκαμπριέλ παντρισάλο ντα η Σαμίρα ισινέ έτοιμη τι τζουβντιόλ κορκορί. Κο 2007, η Σίλβια ντα με αβιλάμ Μπεθελίτες, εκ προνόμιος σο ισινάμ μπουτ χαρούμενοι σο τθεράσα-λες μέχρι αντιβές. Ο Μάικ, αμαρό μπαρό τσσαβό, ισί πρεσβύτερος ντα κερέλα ο σκαπανικός γιεκ πι ρομνιάσαρ, ι Μονικάσαρ. Ο Γκαμπριέλ ισί βοβ-ντα πρεσβύτερος ντα υπηρετίνελα κι Ιταλία πι ρομνιάσαρ, την Άμπρα. Η Σαμίρα, εκτός κατά σκαπανικός σο κερέλα, βοηθίνελα κο Μπέθελ-ντα κάποια ντιβεσά.

Βα, λιντόμ μπαρέ αποφάσεις μι ζωγιάτε. Αλλά να μετανιώναβα σαρέ οντουλένγκε σο τραμπιντόμ τι κεράβ. Πάλι ανταλά αποφάσεις κα λάβας. Ισινόμ πφερντό εκτίμηση σαρέ ι πραγματένγκε σο κερντόμ ι Ιεχωβάσκε. Καζόμ νακχένα ο μπρεσά, αγαντόμ καζόμ σημαντικός ισί τι ατσσικιαράβ ζουρανί μι φιλία ι Ιεχωβάσαρ. Είτε τθεράσα τι λας μπαρέ αποφάσεις είτε πιο χουρντέ αποφάσεις, ο Ιεχωβά μπορίνελα τι ντελ-αμέν ι “ειρήνη σο ισί πιο οπρέ σαρέ οντουλένταρ σο αγαβάσα”. (Φιλιπ. 4:6, 7) Η Σίλβια ντα με χαιρίνασα μπουτ σο ισινάμ κο Μπέθελ ντα νιωθίνασα ότι ο Ιεχωβά ευλογιντάς αμαρέ αποφάσεις, επειδή πάντα τσσουβάας-λες πρώτα αμαρέ ζωγιάτε.