1. Σο βακερντάς ο βασιλιάς Σολομών κο εδάφιος Εκκλησιαστής 7:20;

 Ο ΒΑΣΙΛΙΑΣ ΣΟΛΟΜΩΝ βακερντάς: «Να υπαρχίντιβελα δίκαιος τζενό κι πφουβ σο κερέλα πάντα ο λατσσιπέ ντα να αμαρτίνελα ποτές». (Εκκλ. 7:​20) Καζόμ μπαγιά ισί ανταβά! Σαρέ ισινάμ αμαρτωλοί. (1 Ιωάν. 1:8) Οτθάρ, σαρέ χρειαζίντιβασα ι συγχώρηση ι Ντεβλέσκι ντα ι τζενένγκι.

2. Σαρ νιωθίνενα κάνα συγχωρίνελα-τουμέν εκ λατσσό αμάλ;

² Μπέκιμ τι πφανγκλέν ο γκι τουμαρέ λατσσέ αμαλέσκο. Οτθάρ, για τι αρακχέν-λεν ντα τι αβέν πάλι λατσσέ αμαλά λέσαρ, μανγκλέν συγνώμη αντράλ τουμαρέ γκίσταρ. Σαρ νιωσάλεν κάνα τουμαρό αμάλ συγχωριντάς-τουμέν; Σίγουρα, λοκχιλό τουμαρό γκι ντα χαιρισάλεν μπουτ!

3. Σο κα ντικχάς ανταλέ μαθημάστε;

³ Μανγκάσα τι αβέλ ο Ιεχωβά αμαρό πο λατσσό Αμάλ, αλλά ισί φαρ σο αμαρέ λάφια ή οντουλά σο κεράσα πφανγκένα λέσκο γκι. Σόσκε μπορίνασα τι αβάς σίγουροι ότι ο Ιεχωβά μανγκέλα τι συγχωρίνελ-αμέν; Σόσκε βακεράσα ότι αμέν ναστί συγχωρίνασα σαρ ο Ιεχωβά; Ντα καλέ τζενέν συγχωρίνελα ο Ντεβέλ;

4. Σόσκε μπορίνασα τι αβάς σίγουροι ότι ο Ιεχωβά ισί έτοιμος τι συγχωρίνελ;

⁴ Ο Λάφι ι Ντεβλέσκο βακερέλα αμένγκε ότι ο Ιεχωβά ισί έτοιμος τι συγχωρίνελ. Κάνα ο Ιεχωβά σικαντάς-πες κο  βες Σινά ι Μωυσίσκε, βακερντάς αντράλ εκχέ αγγελόσταρ: «Ιεχωβά, Ιεχωβά, Ντεβέλ σο τζιτζίνελα ντα πφαμπόλα ι γιαβερένγκε, σο να χολιάνελα εύκολα, ντα ισί πφερντό αφοσιωμέ μανγκιπέ ντα αλήθεια, σο σικαβέλα αφοσιωμέ μανγκιπέ χιλιάδες τζενένγκε, σο συγχωρίνελα λάθη ντα αμαρτίες». (Έξοδ. 34:6, 7) Ο Ιεχωβά ισί λατσσό Ντεβέλ, τζιτζίνελα ι γιαβερένγκε ντα ισί πάντα έτοιμος τι συγχωρίνελ ι τζενέν σο μετανιώνενα.​—Νεεμ. 9:​17· Ψαλμ. 86:15.

5. Σαρέ οντουλά σο τζανέλα ο Ιεχωβά ι τζενένγκε, σο τσσίντενα-λες τι κερέλ σαρ βακερένα ο εδάφια Ψαλμός 103:​13, 14;

⁵ Ο Ιεχωβά κερντάς-αμέν, οτθάρ τζανέλα σαρέ ο πράγματα σο τθερένα τι κερέν αμέντζαρ. Ατσσάσα πουταρντέ μόσαρ κάνα σκεφτίνασα ότι ο Ιεχωβά τζανέλα-λεν σαρέ ι κάθε τζενέσκε οπράλ κι πφουβ. (Ψαλμ. 139:​15-17) Ντικχέλα σαρέ ο μπέτι πράγματα σο τθεράσα αντρ’ αμέντε οτθάρ μπερί σο μπιάντιλαμ. Ντα τζανέλα σαρέ ο πράγματα σο τζουβντιλάμ ντα σο κερντέ-αμέν τι αβάς ο τζενέ σο ισινάμ ακανά. Σαρέ οντουλά σο τζανέλα ο Ιεχωβά ι τζενένγκε, σο τσσίντενα-λες τι κερέλ; Τσσίντενα-λες τι τζιτζίνελ αμένγκε.​—Ψαλμ. 78:​39· διαβάνεν Ψαλμός 103:​13, 14.

6. Σαρ σικαντάς ο Ιεχωβά ότι μανγκέλα τι συγχωρίνελ-αμέν;

⁶ Ο Ιεχωβά σικαντάς ότι μανγκέλα τι συγχωρίνελ-αμέν. Αγαβέλα ότι, ιτιρί οντουλένταρ σο κερντάς ο πρώτος τζενό, ο Αδάμ, πελί οπρ’ αμέντε η αρμάν ι αμαρτιάκι ντα ι μεριμάσκι. (Ρωμ. 5:​12) Ναστί κεράσα τίποτα για τι νασκιαράς ανταγιά αρμάν αμένταρ ή εκχέ γιαβερέ τζενέσταρ. (Ψαλμ. 49:​7-9) Αλλά αμαρό λατσσό Ντεβέλ πφαμπιλό αμένγκε ντα κανονιντάς τι νασκιαρέλ-λα οπρ’ αμένταρ. Σαρ κερντάς-λες ανταβά; Ο εδάφιος Ιωάννης 3:​16 σικαβέλα ότι ο Ιεχωβά μπουτσσαντάς πι μοναδικέ Τσσαβές τι μερέλ αμένγκε. (Ματθ. 20:​28· Ρωμ. 5:​19) Ο Ιησούς μουλό αντίς αμένγκε για τι λελ ανταγιά αρμάν κατά τζενέ σο πακιάνα λέστε. (Εβρ. 2:9) Καζόμ ντουκχάλας ο Ιεχωβά σο ντικχέλας πι αγαπημέ Τσσαβές τι τσσίντελ μπουτ ντα τι μερέλ πφερντό λατζ! Σίγουρα, ο Ιεχωβά να κα μουκχέλας τι μερέλ λέσκο Τσσαβό άμα να μανγκέλας τι συγχωρίνελ-αμέν.

7. Καλά ισί μερικά παραδείγματα τζενένγκε σο ο Ιεχωβά συγχωριντάς αντράλ πι γκίσταρ;

⁷ Η Γραφή ισί πφερντί παραδείγματα τζενένγκε σο ο Ιεχωβά συγχωριντάς αντράλ πι  γκίσταρ. (Εφεσ. 4:​32) Κον αβέλα τουμαρέ γκοντιάτε; Μπέκιμ ο βασιλιάς Μανασσής. Οντουβά γκεραλό τζενό κερντάς μπουτ μπαρέ αμαρτίες κόντρα κο Ιεχωβά. Ντινάς λατρεία ψεύτικε ντεβλέν ντα βακερντάς γιαβερένγκε-ντα τι κερέν-λες ανταβά. Μουνταρντάς πι τσσαβέν για τι ντελ-λεν σαρ θυσία γιαβερέ ντεβλέντε. Ατζέ-ντα τσσουντάς εκ άγαλμας ψεύτικε ντεβλέσκο κο άγιος ναός κι Ιεχωβάσκο. Η Γραφή βακερέλα ότι ο Μανασσής «κερντάς μπαρό γκεραλιπέ κι Ιεχωβάσκε γιακχά για τι ανέλ λατζ λέσκε ναβέστε». (2 Χρον. 33:​2-7) Αλλά κάνα ο Μανασσής μετανιωσάλο μπαγιά, ο Ιεχωβά συγχωριντάς-λες αντράλ πι γκίσταρ. Ντα κερντάς-λες πάλι βασιλιάς. (2 Χρον. 33:​12, 13) Μπέκιμ αβέλα τουμαρέ γκοντιάτε ο βασιλιάς Δαβίδ-ντα, σο κερντάς μπαρέ αμαρτίες κόντρα κο Ιεχωβά, αντρέ ανταλέντε λουμνιπέ ντα μουνταριπέ. Αλλά κάνα μετανιωσάλο μπαγιά ντα μουτθαντάς πο λάθος, ο Ιεχωβά συγχωριντάς λες-ντα. (2 Σαμ. 12:9, 10, 13, 14) Βα, μπορίνασα τι αβάς σίγουροι ότι ο Ιεχωβά μανγκέλα τι συγχωρίνελ-αμέν. Ντα σαρ κα ντικχάς, καέκ τζενό ναστί συγχωρίνελα σαρ ο Ιεχωβά.

8. Σαρ συγχωρίνελα ο Ιεχωβά επειδή ισί ο πο λατσσό Κριτής;

⁸ Ο Ιεχωβά ισί «ο Κριτής σαρέ ι πφουβιάκο». (Γέν. 18:​25) Εκ λατσσό κριτής, ή γιαβέρτουλους δικαστής, χρειαζίντιβελα τι αγαβέλ ο νόμος μπουτ λατσσές. Ο Ιεχωβά αγαβέλα μπουτ λατσσές ο νόμους σόσκε νανέ σάντε αμαρό Κριτής, αλλά Οντουβά-ντα σο τσσουβέλα αμένγκε νόμους. (Ησ. 33:​22) Καέκ γιαβέρ να αγαβέλα αζόμ λατσσές σο ισί σωστός ντα σο νανέ σαρ ο Ιεχωβά. Σο γιαβέρ χρειαζίντιβελα τι κερέλ εκ λατσσό κριτής; Τι ρόντελ σαρέ ο πράγματα ντα σοράν τι νικαβέλ ι απόφαση. Ο Ιεχωβά ισί ο πο λατσσό Κριτής σόσκε κάθε φαρ τζανέλα σαρ ισί μπαγιά σαρέ ο πράγματα.

9. Καλά πράγματα ντικχέλα ο Ιεχωβά κάνα τραμπίνελα άμα κα συγχωρίνελ;

⁹ Ο Ιεχωβά νανέ σαρ ο τζενέ σόσκε βοβ αγαβέλα πάντα σαρ ισί μπαγιά σαρέ ο πράγματα. (Γέν. 18:​20, 21· Ψαλμ. 90:8) Να ατσσόλα σάντε οντουλέντε σο ντικχένα ή ασουνένα ο τζενέ. Αγαβέλα ντιπ λατσσές σαρ ο χαρακτήρας εκχέ τζενέσκο, ο τρόπος σο μπαριλό, ο τθαν σο τζουβντιόλα ντα οντουλά σο τθερέλα πι γκοντιάτε ή πι γκίστε επηρεάνενα σαρέ οντουλά σο κερέλα. Επίσης, ο Ιεχωβά ντικχέλα σο ισί αντρέ κο γκι. Αγαβέλα ντιπ λατσσές οντουλά σο μανγκέλα εκ τζενό ντα σο ισί οντουβά σο τσσίντελα-λες τι κερέλ κάτι. Τίποτα ναστί ατσσόλα γκεραντό κατά Ιεχωβά. (Εβρ. 4:​13) Άρα, κάνα ο Ιεχωβά συγχωρίνελα εκχέ τζενές, κερέλα-λες ανταβά σόσκε τζανέλα σαρ ισί μπαγιά σαρέ ο πράγματα.

10. Σόσκε βακεράσα ότι ο αποφάσεις ι Ιεχωβάσκε ισί πάντα δίκαιες; (Δευτερονόμιο 32:4)

¹⁰ Ο αποφάσεις ι Ιεχωβάσκε ισί πάντα δίκαιες. Να ξεχωρίνελα καεκχές. Να συγχωρίνελα εκχέ τζενές επειδή ισί σουκάρ, χουλανό, τθερέλα μπαρό ναβ ή τζανέλα τι κερέλ μπουτ πράγματα. (1 Σαμ. 16:7· Ιακ. 2:​1-4) Καέκ ναστί ζορισκιαρέλα ντα ναστί ποκινέλα ι Ιεχωβάς για τι κερέλ κάτι. (2 Χρον. 19:7) Να τιμωρίνελα εκχέ τζενές οπράλ κι χολί ντα να πφάντελα πο γιακχά ατζέ-ντα άμα αμαρτίνελα εκ τζενό σο μανγκέλα-λες μπουτ. (Έξοδ. 34:7) Σίγουρα, ο Ιεχωβά ισί ο πο λατσσό Κριτής σόσκε αγαβέλα σαρέ ο πράγματα ντα να ντικχέλα σάντε οντουλά σο ντικχίντιβενα.​—Διαβάνεν Δευτερονόμιο 32:4.

11. Σόσκε βακεράσα ότι καέκ να συγχωρίνελα σαρ ο Ιεχωβά;

¹¹ Ο τζενέ σο γραφιντέ ο Εβραϊκές Γραφές αγαβένας ότι καέκ να συγχωρίνελα σαρ ο Ιεχωβά. Μερικέ περιπτωσιέντε, χρησιμοποιηντέ  εκ εβραϊκός λάφι σο, σαρ βακερέλα εκ βιβλίος, «βακέρντιβελα σάντε για τι σικαβέλ ο τρόπος σο συγχωρίνελα ι αμαρτωλόν ο Ντεβέλ, ντα να βακέρντιβελα ποτές για τι σικαβέλ ο τρόπος σο συγχωρίνενα ο τζενέ, σο νανέ αζόμ λατσσό». Σάντε ο Ιεχωβά τθερέλα ο δικαίωμας τι συγχωρίνελ ντιπ εκχέ τζενές σο μετανιώνελα. Σο αβέλα-πες κάνα συγχωρίνελα-αμέν ο Ιεχωβά;

12, 13. (α) Σο λατσσίματα ντικχέλα εκ τζενό κάνα συγχωρίνελα-λες ο Ιεχωβά; (β) Καζόμ βακίτι ασταρένα ο λατσσίματα σο ανέλα η συγχώρηση ι Ιεχωβάσκι;

¹² Κάνα δεχτίνασα ότι ο Ιεχωβά συγχωριντάς-αμέν, τθεράσα «λατσσέ ντιβεσά», σο ανένα ειρήνη αμαρέ γκοντιάτε ντα πάκι συνείδηση. Ασακί συγχώρηση ναστί αβέλα τζενένταρ, αλλά πρέπει τι αβέλ «κατά Ιεχωβά». (Πράξ. 3:​19) Κάνα ο Ιεχωβά συγχωρίνελα-αμέν, μουκχέλα-αμέν τι αβάς πάλι λέσκε αμαλά ντα ισί σαρ μα τι αμαρτιντάμας ποτές.

¹³ Από αζομάν σο συγχωρίνελα-αμέν ο Ιεχωβά, να ανέλα ποτές πι γκοντιάτε οντιά αμαρτία ούτε τιμωρίνελα-αμέν πάλι λάκε. (Ησ. 43:​25· Ιερ. 31:​34) Ο Ιεχωβά τσσουβέλα αμαρέ αμαρτίες «καζόμ ντουρ ισί η ανατολή κατά δύση». * (Ψαλμ. 103:​12) Κάνα ανάσα αμαρέ γκοντιάτε καζόμ μπουτ συγχωρίνελα ο Ιεχωβά, πφερντιάσα εκτίμηση ντα σεβασμός λέσκε. (Ψαλμ. 130:4) Αλλά κας συγχωρίνελα ο Ιεχωβά;

14. Σο σικλιλάμ μέχρι ακανά;

¹⁴ Σαρ ντικχλάμ, για τι συγχωρίνελ, ο Ιεχωβά να ντικχέλα άμα εκ αμαρτία ισινέ μπαρί ή χουρντί. Σικλιλάμ ότι τζανέλα μπουτ πράγματα σόσκε βοβ κερντάς-αμέν, τσσουβέλα αμένγκε νόμους ντα ισί αμαρό Κριτής. Ντα χρησιμοποιήνελα οντουλά σο τζανέλα κάνα τραμπίνελα άμα κα συγχωρίνελ-αμέν. Καλά πράγματα σκεφτίνελα;

15. Καβά πράγμας σκεφτίνελα ο Ιεχωβά σαρ σικαβένα ο εδάφια Λουκάς 12:​47, 48;

¹⁵ Εκ πράγμας σο σκεφτίνελα ο Ιεχωβά ισί άμα ο τζενό τζανέλας ότι οντουβά σο κερντάς ισινέ λάθος. Ο Ιησούς σικαντάς-λες ξεκάθαρα ανταβά, σαρ ντικχίντιβελα κο εδάφια Λουκάς 12:​47, 48. (Διαβάνεν) Κάνα εκ τζενό τσσουβέλα πι γκοντιάτε τι κερέλ εκ γκεραλό πράγμας σο τζανέλα μπουτ λατσσές ότι ανέλα λατζ κο Ιεχωβά ντα κερέλα-λες, ανταβά ισί μπαρί αμαρτία. Εκ ασακό τζενό μπορεί μα τι συγχωρίντιβελ. (Μάρκ. 3:​29· Ιωάν. 9:​ 41) Αλλά ισί μπαγιά ότι μπάζιμα τζανάσα ότι οντουβά σο κερντάμ ισινέ λάθος. Άμα αβιλό-πες ανταβά, τθεράσα ελπίδα τι συγχωρίντιβας; Βα! Ντικχέν σο γιαβέρ σκεφτίνελα ο Ιεχωβά.

16. Σο μανγκέλα τι βακερέλ τι μετανιώνας, ντα σόσκε ανταβά ισί αζόμ σημαντικός για τι συγχωρίνελ-αμέν ο Ιεχωβά;

¹⁶ Κάτι γιαβέρ σο σκεφτίνελα ο Ιεχωβά ισί άμα ο τζενό μετανιωσάλο μπαγιά. Σο μανγκέλα τι βακερέλ ανταβά; «Μετανιώναβα» μανγκέλα τι βακερέλ «αλλάναβα γνώμη ή οντουλά σο τθεράβα μι γκοντιάτε». Ο τζενό σο μετανιώνελα στεναχωρίντιβελα μπουτ ι μπέτι πραγματένγκε σο κερντάς ή επειδή να κερντάς ο σωστά πράγματα σο έπρεπε τι κερέλ. Πφανγκιόλα λέσκο γκι, όχι σάντε ι λαθίνγκε σο κερντάς, αλλά σο μουκχλάς-ντα πι φιλία ι Ιεχωβάσαρ τι αβέλ μπίζουρανι ντα αντικάς τι γκερέλ-λες οντουλέ λαθίντε. Ντεν-τουμέν γκοντί ότι εμ ο Μανασσής εμ ο Δαβίδ κερντέ μπαρέ αμαρτίες, αλλά ο Ιεχωβά συγχωριντάς-λεν σόσκε μετανιωσάλε μπαγιά. (1 Βασ. 14:8) Βα, ο Ιεχωβά συγχωρίνελα εκχέ τζενές σάντε άμα ντικχλάς ότι μετανιωσάλο. Αλλά να ερεσέλα σάντε τι πφανγκιόλ αμαρό γκι ι γκεραλέ ντρομέσκε σο λιντάμ ή εκχέ αμαρτιάκε σο κερντάμ. Πρέπει τι μανγκάς αντράλ αμαρέ γκίσταρ τι αλλάνας. * Ντα ανταβά ισί εκ γιαβέρ πράγμας σο σκεφτίνελα ο Ιεχωβά.

17. Σο μανγκέλα τι βακερέλ τι αλλάνας, ντα σόσκε ανταβά ισί μπουτ σημαντικός για μα τι κεράς πάλι ο πουρανέ αμαρτίες; (Ησαΐας 55:7)

¹⁷ Κάτι γιαβέρ σο σκεφτίνελα ο Ιεχωβά ισί άμα ο τζενό αλλαξάλο. Γιαβερέ λαφίντζαρ, πρέπει τι μουκχέλ ο γκεραλό ντρομ ντα τι λελ ι Ιεχωβάσκο ντρομ. (Διαβάνεν Ησαΐας 55:7) Ο τζενό πρέπει τι αλλάνελ πι γκοντί για τι μουκχέλ ο σκέψεις ι Ιεχωβάσκε τι οδηγίνεν-λες. (Ρωμ. 12:2· Εφεσ. 4:​23) Πρέπει τι μανγκέλ σαρέ πι γκίσαρ τι μουκχέλ παλά-πέστε ο γκεραλέ σκέψεις ντα ο πράγματα σο κερέλας ανγκλέ. (Κολ. 3:​7-10) Σίγουρα, άμα μανγκάσα τι συγχωρίνελ-αμέν ο Ιεχωβά ντα τι καθαρίνελ-αμέν κατά αμαρτία, ισί μπουτ σημαντικός τι πακιάς κι θυσία κι Χριστόσκι. Ο Ιεχωβά κα συγχωρίνελ-αμέν αντράλ ανταλέ θυσιάταρ κάνα κα ντικχέλ ότι μαράσα-αμέν  μπαγιά τι αλλάνας οντουλά σο κεράσα.​—1 Ιωάν. 1:7.

18. Σο σικλιλάμ για τη συγχώρηση ι Ιεχωβάσκι;

¹⁸ Κα βακεράς χάνικ λαφίντζαρ μερικά πράγματα σο ντικχλάμ. Μπαγιά, καέκ να συγχωρίνελα σαρ ο Ιεχωβά. Σόσκε βακεράσα-λες ανταβά; Πρώτον, ισί πάντα έτοιμος τι συγχωρίνελ. Δεύτερον, τζανέλα σαρέ ο πράγματα αμένγκε. Τζανέλα ντιπ λατσσές αμαρό χαρακτήρας ντα σάντε βοβ μπορίνελα τι αγαβέλ άμα μετανιωσάλαμ μπαγιά. Ντα τρίτον, κάνα συγχωρίνελα-αμέν μπιστρέλα ντιπ ο πουρανέ. Οτθάρ, τθεράσα πάκι συνείδηση ντα λέσκι ευλογία.

19. Σόσκε μπορίνασα τι αβάς χαρούμενοι παρόλο σο ισινάμ ατελείς ντα αμαρτίνασα;

¹⁹ Σίγουρα, καζόμ ισινάμ ατελείς, να κα τσσιναβάς τι αμαρτίνας. Όμως, λοκχιαρένα αμαρό γκι ο λάφια σο ισί κι εγκυκλοπαίδεια Ενόραση στις Γραφές, Τόμος 2, σελίδα 320: «Ο Ιεχωβά τζιτζίνελα πι υπηρετόνγκε ντα αγαβέλα ότι ισί μπίζουρανε. Οτθάρ, βον να χρειαζίντιβελα τι τθερέν συνέχεια τύψεις ι λαθίνγκε σο κερένα ιτιρί κατά ατέλεια. (Ψλ 103:​8-14· 130:3) Άμα κερένα ο πο λατσσό για τι τζουβντιόν αντικάς σαρ μανγκέλα λένταρ ο Ντεβέλ, μπορίνενα τι αβέν χαρούμενοι. (Φλπ 4:​4-6· 1Ιω 3:​19-22)». Ανταλά λάφια ντένα-αμέν μπουτ ζορ!

20. Σο κα ντικχάς κο γιαβέρ μάθημας;

²⁰ Ισινάμ πφερντέ εκτίμηση ι Ιεχωβάσκε σόσκε ισί έτοιμος τι συγχωρίνελ-αμέν κάνα μετανιώνασα μπαγιά ι αμαρτιένγκε σο κερντάμ. Αλλά σαρ μπορίνασα τι συγχωρίνας σαρ ο Ιεχωβά; Σαρ μοιάζελα αμαρί συγχώρηση οντουλάσαρ σο ντέλα ο Ιεχωβά, ντα σαρ ισί διαφορετική; Σόσκε ισί σημαντικός τι αγαβάς ανταγιά διαφορά; Κα σικλιάς-λεν ανταλά κο γιαβέρ μάθημας.