1. Καλά λάφια σο ντένα σιγουριά βακερέλα ο Ιεχωβά κο τζενέ σο μετανιώνενα;

 ΠΑΡΟΛΟ σο ο Ιεχωβά ισί Οντουβά σο κερντάς-αμέν, Οντουβά σο τσσουβέλα αμένγκε νόμους ντα αμαρό Κριτής, ισί αμαρό λατσσό Ντατ-ντα. (Ψαλμ. 100:3· Ησ. 33:​22) Κάνα αμαρτίνασα κόντρα λέστε ντα μετανιώνασα μπαγιά, βοβ να τθερέλα σάντε ο δικαίωμας τι συγχωρίνελ-αμέν αλλά μανγκέλα-ντα τι κερέλ-λες ανταβά. (Ψαλμ. 86:5) Αντράλ κατά προφήτης Ησαΐας, ο Ιεχωβά βακερντάς μανγκιμάσαρ ακαλά λάφια σο ντένα σιγουριά: «Παρόλο σο ισί λολέ τουμαρέ αμαρτίες, κα αβέν παρνέ σαρ ο βιβ».​—Ησ. 1:18.

2. Σο πρέπει τι κεράς για τι τθεράς ειρήνη ι γιαβερέντζαρ;

² Επειδή ισινάμ ατελείς, σαρέ βακεράσα ντα κεράσα πράγματα σο προσβαλίνενα ι γιαβερέν. (Ιακ. 3:2) Αλλά ανταβά να μανγκέλα τι βακερέλ ότι ναστί αβάσα λατσσέ αμαλά λέντζαρ. Μπορίνασα, άμα κα σικλιάς τι συγχωρίνας. (Παρ. 17:9· 19:​11· Ματθ. 18:​21, 22) Κάνα ανάσα ντουκχ κο γκι ο εκ ι γιαβερέσκο χουρντέ πραγματέντζαρ, ο Ιεχωβά μανγκέλα τι συγχωρίνας. (Κολ. 3:​13) Τθεράσα σημαντικούς λόγους τι κεράς-λες ανταβά. Τζανάσα ότι ο Ιεχωβά συγχωρίνελα-αμέν «μπουτ» αντράλ πι γκίσταρ.​—Ησ. 55:7.

3. Σο κα ντικχάς ανταλέ μαθημάστε;

³ Ανταλέ μαθημάστε, κα ντικχάς σαρ μπορίνενα ο ατελείς τζενέ τι μοιάζεν κο Ιεχωβά σο συγχωρίνελα. Καλά αμαρτίες  πρέπει τι βακεράς κο πρεσβύτεροι; Σόσκε μανγκέλα ο Ιεχωβά τι συγχωρίνας ι γιαβερέν; Ντα σο σικλιάσα μερικέ πφραλένταρ ντα πφενίνταρ σο τσσιντιντέ μπουτ ντουκχ ιτιρί κατά αμαρτίες γιαβερέ τζενένγκε;

4. (α) Άμα εκ υπηρέτης ι Ιεχωβάσκο κερντάς μπαρί αμαρτία, σο πρέπει τι κερέλ; (β) Καγιά ισί η μπουτί ι πρεσβυτερόνγκι κάνα κερένα λάφι εκχέ τζενέσαρ σο κερντάς μπαρί αμαρτία;

⁴ Ο μπαρέ αμαρτίες πρέπει τι μουτθάντιβεν κο πρεσβύτεροι. Ασακέ αμαρτίες βακέρντιβενα κο εδάφια 1 Κορινθίους 6:9, 10. Ο μπαρέ αμαρτίες τζάνα μπουτ κόντρα κι Ντεβλέσκο νόμος. Άμα εκ Χριστιανός κερντάς εκ ασακί αμαρτία, πρέπει τι προσευχίντιβελ κο Ιεχωβά ντα τι κερέλ λάφι ι πρεσβυτερόντζαρ σο ισί κι κχανγκιρί. (Ψαλμ. 32:5· Ιακ. 5:​14) Καγιά ισί η μπουτί ι πρεσβυτερόνγκι; Σάντε ο Ιεχωβά τθερέλα ο δικαίωμας τι συγχωρίνελ ντιπ ο αμαρτίες, ντα κερέλα-λες ανταβά αντράλ κατά θυσία ι Ιησούσκι. * Ο Ιεχωβά όμως ντινάς κο πρεσβύτεροι ι ευθύνη τι ρόντεν κι Γραφή για τι ντικχέν άμα ο τζενό σο αμαρτιντάς μπορίνελα τι ατσσόλ κι κχανγκιρί. (1 Κορ. 5:​12) Εκ πράγμας σο κα κερέν ισί ότι κα προσπαθίνεν τι ντεν απαντήσεις ακαλέ ερωτησιέντε: Μανγκέλας ο τζενό τι κερέλ οντιά αμαρτία; Τθερέλας πι γκοντιάτε πο τζανγκλέ τι κερέλ ανταβά μπέτι πράγμας; Μήπως κερέλας οντιά αμαρτία μπουτ βακίτι; Ντα ο πο σημαντικός: Ισί πράγματα σο σικαβένα ότι μετανιωσάλο μπαγιά; Ισί πράγματα σο κερένα-αμέν τι αγαβάς ότι ο Ιεχωβά συγχωριντάς-λες;​—Πράξ. 3:19.

5. Καλά λατσσίματα ανέλα η μπουτί ι πρεσβυτερόνγκι;

⁵ Κάνα ο πρεσβύτεροι κερένα λάφι ι τζενέσαρ σο κερντάς μπαρί αμαρτία, οντουβά σο μανγκένα ισί τι λεν ατθέ κι πφουβ ι ίδια απόφαση σο λιντιλί κο ουρανός. (Ματθ. 18:​18) Σο λατσσιπέ ανέλα ι κχανγκιριάκε η μπουτί ι πρεσβυτερόνγκι; Κερέλα τι αβέλ αρακχαντί η κχανγκιρί σόσκε παλντίντιβενα λάταρ ο τζενέ σο να μετανιωσάλε ντα σο κα μπορίνενας τι κερέν ζιάνι κο πολύτιμα μπρακέ κι Ιεχωβάσκε. (1 Κορ. 5:6, 7, 11-13· Τίτο 3:​10, 11) Ντα μπορεί τι βοηθίνελ ι τζενές τι μετανιώνελ ντα τι ντικχέλ λατσσιπέ κατά Ιεχωβάσκι συγχώρηση. (Λουκ. 5:​32) Ο πρεσβύτεροι προσευχίντιβενα ι τζενέσκε ντα μανγκένα κατά Ιεχωβά τι βοηθίνελ-λες τι αβέλ πάλι λατσσό αμάλ λέσκο.​—Ιακ. 5:15.

6. Άμα εκ τζενό χαλάς αποκοπή, αβέλα-πες τι συγχωρίντιβελ; Εξηγίνεν.

⁶ Σο αβέλα-πες άμα ο τζενό να μετανιωσάλο κάνα ο πρεσβύτεροι κερντέ λάφι λέσαρ; Κα χαλ αποκοπή. Άμα γκιλό κόντρα κο νόμος κι τθεμέσκο, ο πρεσβύτεροι να κα αρακχαβέν-λες κατά προβλήματα σο μπέκιμ τι τθερέλ. Ο Ιεχωβά μουκχέλα ο κυβερνήσεις τι δικάνεν ντα τι τιμωρίνεν σαρέ οντουλέν σο τζάνα κόντρα κο νόμος​—είτε μετανιωσάλε είτε όχι. (Ρωμ. 13:4) Άμα πο σοράν ο τζενό κα αγαβέλ-πες, κα μετανιώνελ μπαγιά ντα κα αλλάνελ, ο Ιεχωβά κα μανγκέλ τι συγχωρίνελ-λες. (Λουκ. 15:​17-24) Κα κερέλ-λες ανταβά ατζέ-ντα άμα λέσκε αμαρτίες ισινέ μπουτ μπαρέ.​—2 Χρον. 33:9, 12, 13· 1 Τιμ. 1:15.

7. Σο μανγκέλα τι βακερέλ τι συγχωρίνας εκχέ τζενές σο αμαρτιντάς κόντρα αμέντε;

⁷ Καζόμ λοκχιόλα αμαρό γκι σο τζανάσα ότι να χρειαζίντιβελα τι αποφασίνας αμέν άμα κα συγχωρίνελ ο Ιεχωβά εκχέ τζενές! Όμως, τθεράσα τι λας εκ απόφαση. Καγιά ισί ανταγιά; Ισί φαρ σο εκ τζενό κερέλα αμαρτία κόντρα αμέντε, μπέκιμ εκ μπαρί αμαρτία, αλλά σοράν μανγκέλα συγνώμη, μανγκέλα τι συγχωρίνας-λες. Γιαβερά φαρ, μπέκιμ μα τι κερέλ-λες ανταβά. Αλλά ατζέ-ντα αζομάν, μπορίνασα τι τραμπίνας τι συγχωρίνας ανταλέ τζενές, δηλαδή τι αποφασίνας τι νασκιαράς ι χολί σο  τθεράσα λέσκε. Ισί μπαγιά ότι για τι κεράς-λες ανταβά, πρέπει τι νακχέλ βακίτι ντα τι μαράς-αμέν, ντα ατζέ πο μπουτ άμα τθεράσα μπαρί ντουκχ. Η Σκοπιά 15 Σεπτεμβρίου 1994, βακερέλα: «Κάνα συγχωρίνασα εκχέ τζενές σο αμαρτιντάς, ανταβά να μανγκέλα τι βακερέλ ότι να ντικχάσα ι αμαρτία. Ο Χριστιανός σο συγχωρίνελα ντέλα μπέσα ι Ιεχωβάσκε ντα μουκχέλα-λες ανταβά λέσκε βαστέντε. Βοβ ισί ο δίκαιος Κριτής σαρό κο σύμπαν, ντα βοβ κα ανέλ δικαιοσύνη κο σωστός βακίτι». Σόσκε βακερέλα αμένγκε ο Ιεχωβά τι συγχωρίνας ντα τι μουκχάς ι δικαιοσύνη λέσκε βαστέντε;

8. Σαρ σικαβάσα εκτίμηση ι Ιεχωβάσκε σο τζιτζίνελα αμένγκε κάνα συγχωρίνασα;

⁸ Κάνα συγχωρίνασα, σικαβάσα εκτίμηση. Εκχέ παραβολιάτε, ο Ιησούς μοιασκιαρντάς ι Ιεχωβάς εκχέ βασιλιάσαρ. Οντουβά βασιλιάς σβηντάς ο μπουτ μπαρό μπόρτζι σο ναστί ποκινέλας λέσκο δούλος. Όμως, ο δούλος σο συγχωρισάλο να τζιτζισάλο εκχέ δουλόσκε σο μανγκέλας λέσκε μπουτ πο χάνικ λοβέ. (Ματθ. 18:​23-35) Σο μανγκέλας τι σικλιαρέλ-αμέν ο Ιησούς; Άμα τθεράσα μπαγιά εκτίμηση σο τζιτζίνελα μπουτ αμένγκε ο Ιεχωβά, κα μανγκάς τι συγχωρίνας ι γιαβερέν. (Ψαλμ. 103:9) Μπουτ μπρεσά πο τζανγκλέ, Η Σκοπιά βακερντάς: «Καζόμ-ντα φαρ τι συγχωρίνας ι τζενέν, ποτές ναστί κα συγχωρίνας ντα ναστί κα τζιτζίνας αζόμ μπουτ σαρ κερέλα-λες ανταβά ο Ντεβέλ αντράλ κατά Χριστός».

9. Κάσκε τζιτζίνελα ο Ιεχωβά; (Ματθαίος 6:​14, 15)

⁹ Οντουλά σο συγχωρίνενα κα συγχωρίντιβεν. Ο Ιεχωβά τζιτζίνελα οντουλένγκε σο τζιτζίνενα ι γιαβερένγκε. (Ματθ. 5:7· Ιακ. 2:​13) Ο Ιησούς σικαντάς-λες ανταβά μπουτ λατσσές κάνα σικλιαρντάς πι μαθητέν σαρ τι προσευχίντιβεν. (Διαβάνεν Ματθαίος 6:​14, 15) Μπουτ μπρεσά πο τζανγκλέ, ο Ιεχωβά-ντα σικαντάς-λες ανταβά κάνα κερντάς λάφι κο Ιώβ. Οντουβά πιστός τζενό ντουκχασάλο μπουτ κατά μπέτι λάφια σο βακερντάς λέσκε ο Ελιφάς, ο Βιλδάδ ντα ο Σωφάρ. Ο Ιεχωβά βακερντάς κο Ιώβ τι προσευχίντιβελ λένγκε. Κάνα ο Ιώβ κερντάς-λες ανταβά, ο Ιεχωβά ευλογιντάς-λες.​—Ιώβ 42:​8-10.

10. Σόσκε κερέλα ζιάνι η χολί; (Εφεσίους 4:​31, 32)

¹⁰ Οντουβά σο ασταρέλα χολί κερέλα ζιάνι πέσκε. Η χολί ισί σαρ εκ μπαρό πφαριπέ ντα ο Ιεχωβά μανγκέλα τι φουρτίνας-λες οπρ’ αμένταρ για τι λοκχιάς. (Διαβάνεν Εφεσίους 4:​31, 32) Βακερέλα αμένγκε: «Μουκχ ι χολί ντα ο νεύρα». (Ψαλμ. 37:8) Ισί γκοντιαβέρ τι ντας καν ανταλέ λαφίντε. Η χολί κερέλα ζιάνι αμαρέ σωμάστε ντα αμαρέ γκοντιάτε. (Παρ. 14:​30) Άμα ασταράσα χολί εκχέ τζενέσκε σο ντουκχαντάς αμαρό γκι, οντουβά τζενό να κα παθίνελ τίποτα, σαρ να κα παθίνελας άμα αμέν κα πιάας δηλητήριος. Αγαβάσα ότι, κάνα συγχωρίνασα ι γιαβερέν, κεράσα εκ δώρος αμαρέ νεαυτόσκε. (Παρ. 11:​17) Τθεράσα ειρήνη αμαρέ γκοντιάτε ντα αμαρέ γκίστε ντα μπορίνασα τι συνεχίνας τι υπηρετίνας ι Ιεχωβάς.

11. Ντινάς-αμέν ο Ιεχωβά ο δικαίωμας τι λας εκδίκηση; (Ρωμαίους 12:​19-21)

¹¹ Η εκδίκηση ισί ι Ιεχωβάσκι. Ο Ιεχωβά να ντινάς-αμέν ο δικαίωμας τι λας εκδίκηση κάνα εκ τζενό αμαρτίνελα κόντρα αμέντε. (Διαβάνεν Ρωμαίους 12:​19-21) Αμέν ναστί ντικχάσα σαρέ ο πράγματα ντα ισινάμ ατελείς, οτθάρ ναστί κρίνασα σωστά, σαρ ο Ντεβέλ. (Εβρ. 4:​13) Ντα μπάζιμα αμαρό γκι να μουκχέλα-αμέν τι λας σωστές αποφάσεις. Πι πνευμάσαρ, ο Ιεχωβά κερντάς ι Ιακωβός τι γραφίνελ: «Η χολί ι τζενέσκι να ανέλα ι δικαιοσύνη ι Ντεβλέσκι». (Ιακ. 1:​20) Μπορίνασα τι αβάς σίγουροι ότι ο Ιεχωβά κα κερέλ ο σωστός ντα ότι κα ανέλ τέλεια δικαιοσύνη.

12. Σαρ κα σικαβάς ότι ντάσα μπέσα κι δικαιοσύνη κι Ιεχωβάσκι;

 ¹² Κάνα συγχωρίνασα, σικαβάσα ότι ντάσα μπέσα κι δικαιοσύνη κι Ιεχωβάσκι. Κάνα μουκχάσα ο πράγματα κι Ιεχωβάσκε βαστά, σικαβάσα ότι ισινάμ σίγουροι ότι βοβ κα λατσσαρέλ σαρό ο ζιάνι σο αβιλό ιτιρί κατά αμαρτία. Κο νεβό ντουνιάς σο ντινάς πο λάφι τι ανέλ, ο μπέτι πράγματα σο νακχλάμ ποτές «να κα αβέν κι γκοντί ούτε κο γκι». (Ησ. 65:​17) Αλλά άμα εκ τζενό αντάς μπουτ ντουκχ αμαρέ γκίστε, αβέλα-πες μπαγιά τι νασκιαράς ι χολί σο μπέκιμ τθεράσα αντρ’ αμέντε; Ντικχέν σαρ κερντέ-λες ανταβά μερικά τζενέ.

13, 14. Σο σικλιλέν κατά Τόνι σο συγχωριντάς ι Χοσές;

¹³ Μπουτ πφραλά ντα πφενιά τραμπιντέ τι συγχωρίνεν ατζέ-ντα κάνα ο γιαβερά αντέ λένγκε μπουτ ντουκχ οντουλέντζαρ σο κερντέ. Σο λατσσίματα ντικχλέ αμαρέ πφραλά;

¹⁴ Μπουτ βακίτι πριν τι σικλιόλ ι αλήθεια, ο Τόνι, * σο τζουβντιόλα κο Φιλιππίνες, λιντάς αμπέρι ότι οντουβά σο μουνταρντάς εκχές λέσκε μπαρέ πφραλένταρ ισινέ εκ τζενό σο βακερένας λέσκε Χοσέ. Αζομάν, ο Τόνι ισινέ μπουτ βίαιος ντα μανγκέλας τι λελ εκδίκηση. Ο Χοσέ αστάρντιλο ντα τσσουβντιλό φυλακή οντουλέσκε σο κερντάς. Σοράν, κάνα ο Χοσέ νικίστιλο κατά φυλακή, ο Τόνι χαλάς σοβέλ ότι κα αρακχέλ-λες ντα κα μουνταρέλ-λες. Κιντάς εκ πιστόλι-ντα για τι κερέλ-λες ανταβά. Όμως, ο Τόνι αρχισάλο μελέτη ι Ιεχωβάσκε Μαρτυρέντζαρ. Βοβ βακερέλα: «Κι μελέτη σικλιλόμ ότι έπρεπε τι αλλάναβ, ντα ανταβά μανγκέλας τι βακερέλ τι νασκιαράβ μι χολί». Ο Τόνι μπολντιλό ντα πο σοράν αβιλό πρεσβύτερος. Ανέν τουμαρέ γκοντιάτε καζόμ σαστισάλο κάνα λιντάς αμπέρι ότι ο Χοσέ-ντα αβιλόας μπολντό υπηρέτης ι Ιεχωβάσκο! Κάνα ντικχλέ ο εκ ι γιαβερές, ντινέ-πες ανγκάλι τατές, ντα ο Τόνι βακερντάς κο Χοσέ ότι συγχωριντάας-λες. Ο Τόνι βακερέλα ότι, κάνα συγχωριντάς ι Χοσές, λιντάς αζόμ μπαρί χαρά σο ναστί βακερέλας λαφίντζαρ καζόμ σουκάρ νιωθίνελας. Βα, ο Ιεχωβά ευλογιντάς ι Τονίς σόσκε συγχωριντάς αντράλ πι γκίσταρ.

15, 16. Σο σικλιλέν κατά Πίτερ ντα κατά Σου σο συγχωριντέ οντουλέ τζενές σο τσσουντάς ι βόμβα;

¹⁵ Κο 1985, ο Πίτερ ντα η Σου ισινέ εκχέ συναθροισιάτε κι Αίθουσα Βασιλείας, κάνα οτθέ  σο να μπεκλεντίνενας, αβιλί-πες εκ ζουρανί έκρηξη. Εκ τζενό τσσουντάας βόμβα αντρέ κι Αίθουσα Βασιλείας! Η Σου ντινάς-πες μπουτ. Ντα οτθάρ αβιλό ζιάνι λάκε γιακχίντε, λάκε κανέντε ντα ναστί ασουνγκέλας. * Ο Πίτερ ντα η Σου μπουτ φαρ σκεφτίνενας: “Καβά τζενό κα κερέλας εκ ασακό γκεραλό πράγμας;” Μπουτ μπρεσά πο σοράν, οντουβά τζενό σο τσσουντάς ι βόμβα ντα να ισινέ υπηρέτης ι Ιεχωβάσκο, αστάρντιλο ντα καταδικασάλο τι μπεσέλ κι φυλακή σαρί πι ζωή. Συγχωριντάς ο Πίτερ ντα η Σου οντουλέ τζενές; Κάνα κερντέ λένγκε ανταγιά ερώτηση, βακερντέ: «Ο Ιεχωβά σικλιαρέλα-αμέν ότι, άμα ασταράσα χολί, μπορεί τι κεράς ζιάνι αμαρέ σωμάστε, αμαρέ γκίστε ντα αμαρέ γκοντιάτε. Οτθάρ, κάνα αβιλό-πες ανταβά, μανγκλάμ μπουτ σουγκό κατά Ιεχωβά τι βοηθίνελ-αμέν τι νασκιαράς ι χολί ντα τι συνεχίνας αμαρί ζωή».

¹⁶ Ισινέ λένγκε εύκολος τι συγχωρίνεν; Νάα πάντα. Βον βακερένα ακαβά-ντα: «Ισί φαρ σο η Σου τσσίντελα μπουτ ιτιρί οντουλέσταρ σο αβιλό-πες αζομάν. Κάνα αβέλα-πες ανταβά, αμαρί χολί μπαριόλα πάλι. Αλλά να μουκχάσα αμαρί γκοντί τι ατσσόλ οτθέ, ντα αντικάς αμαρί χολί νασέλα. Ντα μπορίνασα τι βακεράς αντράλ αμαρέ γκίσταρ ότι, άμα εκ ντιβές οντουβά τζενό σο τσσουντάς ι βόμβα κα αβέλ πφραλ αμαρό, αμέν κα πουτράς λέσκε αμαρί ανγκάλι. Ανταβά σο νακχλάμ σικλιαρντάς-αμέν ότι ο λάφια ι Γραφιάκε ντένα-αμέν μπαρί ελευθερία. Ελευθερώνενα-αμέν πο μπουτ τροπόντζαρ οντουλένταρ σο νακχένα αμαρέ γκοντιάταρ! Ντα λοκχιόλα αμαρό γκι σο τζανάσα ότι ο Ιεχωβά μπουτ σουγκό κα λατσσαρέλ σο-ντα ζιάνι αβιλό-πες».

17. Σο σικλιλέν κατά Μάιρα σο συγχωριντάς πι ρομές;

¹⁷ Η Μάιρα σικλιλί ι αλήθεια κάνα ισινέ παντριμέ ντα τθερέλας ντουέ χουρντέ τσσαβέν. Λάκο ρομ να αβιλό Μάρτυρας. Σοράν, βοβ κερντάς λουμνιπέ ντα μουκχλάς πι φαμιλί. Η Μάιρα βακερέλα: «Κάνα μο ρομ μουκχλάς μαν ντα αμαρέ ντουέ τσσαβέν, τασαντέ-μαν ο μπέτι συναισθήματα σο τθερένα μπουτ τζενέ κάνα μουκχέλα-λεν εκ αγαπημέ τζενό. Ναστί πακιάβας οντουβά σο αβιλόας-πες, να ντάβας  μπέσα ι γιαβερένγκε, τθεράβας πφανγκό γκι ντα τύψεις, τσσουβάβας οπρά-μάντε ο βάρετα ντα ισινόμας χολιαμέ». Παρόλο σο λένγκο μπιαβ τσσιντιλό, η ντουκχ να νασλί λάκε γκίσταρ. Η Μάιρα βακερέλα ακαβά-ντα: «Μπουτ μασεκά οντουλά συναισθήματα να μουκχένας-μαν τι ηρεμίναβ, ντα αγαντόμ ότι κερένας ζιάνι κι φιλία σο τθεράβας ι Ιεχωβάσαρ ντα ι γιαβερέ τζενέντζαρ». Ακανά, η Μάιρα βακερέλα ότι τσσιναντάς τι ασταρέλ χολί πι ρομέσκε. Μπεκλεντίνελα ότι εκ ντιβές μπέκιμ τι αβέλ βοβ-ντα πασέ κο Ιεχωβά. Η Μάιρα ντικχέλα ανγκλάλ. Μπαριαρντάς κορκορί πι ντουέ τσσαβέν ντα βοηθιντάς-λεν τι αβέν υπηρέτες ι Ιεχωβάσκε. Αντιβές, τθερέλα ι χαρά τι υπηρετίνελ ι Ιεχωβάς γιεκ πι τσσαβέντζαρ ντα λένγκε φαμιλίντζαρ.

18. Σο μπορίνασα τι αβάς σίγουροι ότι κα κερέλ ο Ιεχωβά, σο ισί ο Πο Μπαρό Κριτής;

¹⁸ Καζόμ λοκχιόλα αμαρό γκι σο τζανάσα ότι να τθεράσα αμέν ι ευθύνη τι αποφασίνας σαρ πρέπει τι κρίντιβεν ο τζενέ! Ανταβά μπουτ σημαντικός πράγμας κα κερέλ-λες ο Ιεχωβά, σο ισί ο Πο Μπαρό Κριτής. (Ρωμ. 14:​10-12) Μπορίνασα τι αβάς ντιπ σίγουροι ότι κα κρίνελ πάντα αντικάς σαρ βακερένα ο τέλειοι κανόνες λέσκε σο σικαβένα ο σωστός ντα ο λάθος. (Γέν. 18:​25· 1 Βασ. 8:​32) Ποτές να κα κερέλ κάτι σο ισί άδικος!

19. Σο κα κερέλ η τέλεια δικαιοσύνη ι Ιεχωβάσκι;

¹⁹ Μπεσάσα σαρ σαρ τι αβέλ ο βακίτι σο ο Ιεχωβά κα λατσσαρέλ ντιπ σαρό ο ζιάνι σο αβιλό ιτιρί κατά ατέλεια ντα κατά αμαρτία. Αζομάν, σο-ντα προβλήματα τθεράσα αμαρέ σωμάστε ή αμαρέ γκίστε, κα νασέν ντα να κα αβέν πάλι. (Ψαλμ. 72:​12-14· Αποκ. 21:3, 4) Να κα ντας-αμέν γκοντί ο μπέτι πράγματα σο νακχλάμ. Καζόμ μπεκλεντίνασα τι αβέλ οντουβά μπουτ σουκάρ βακίτι, ισινάμ πφερντέ εκτίμηση ι Ιεχωβάσκε σο κερντάς-αμέν τι μπορίνας τι συγχωρίνας ντα αντικάς τι μοιάζας λέστε.