1. Καβά προνόμιος τθερένα ο πρεσβύτεροι, σαρ βακερέλα ο εδάφιος 1 Πέτρου 5:2;

 Ο ΙΕΧΩΒΑ ντινάς κο Χριστιανοί πρεσβύτεροι ι ευθύνη τι αρακχαβέν λέσκε πολύτιμε μπρακέν. Ανταλά αφοσιωμέ μουρσά ισί πφερντέ εκτίμηση ι Ιεχωβάσκε σο τθερένα ο προνόμιος τι υπηρετίνεν πουμαρέ πφραλέν ντα πουμαρέ πφενίν ντα μαρένα-πες μπουτ για τι αβέν “τσομπάνια σο αρακχαβένα-λεν μπαγιά”. (Ιερ. 23:4· διαβάνεν 1 Πέτρου 5:2) Καζόμ ευλογιμέ ισινάμ σο τθεράσα ασακέ μουρσέν αμαρέ κχανγκιρίντε!

2. Καλά δοκιμασίες μπέκιμ τι νακχένα κάποιοι πρεσβύτεροι;

² Καζόμ ο πρεσβύτεροι κερένα πουμαρέ ευθύνες, νακχένα μπουτ δυσκολίες. Για παράδειγμας, πρέπει τι κερέν μπουτ μπουτί για τι αρακχαβέν εκ κχανγκιρί. Ο Τόνι, εκ πρεσβύτερος κο Ηνωμένες Πολιτείες, χρειαζίντιλο τι σικλιόλ πο λατσσές καλά ισί λέσκε όρια κο πράγματα σο μπορίνελας τι κερέλ. Ο Τόνι βακερέλα: «Κάνα αρχισάλο ο Κορωνοϊός, προσπαθίναβας τι κεράβ συνέχεια πο μπουτ πράγματα για τι αβέν-πες ο συναθροίσεις ντα ο έργος. Αλλά καμπόρ-ντα πράγματα τι κεράβας, πάντα υπαρχίντιβενας ατζέκ αμπόρ τι αβέν-πες. Τελικά, ισινόμας αζόμ απασχολημέ σο να τθεράβας σαάτι για τι διαβάναβ ι Γραφή, τι σικλιαράβ-μαν ντα τι προσευχίντιβαβ». Ο Ιλίρ, εκ πρεσβύτερος κο Κόσοβος, νακχλάς εκ γιαβέρ πρόβλημας. Κάνα ισινέ εκχέ τθανέστε σο αβέλας-πες τζένγκι, δυσκολίντιλο τι ντελ καν σε εκ οδηγία κατά οργάνωση. Ο Ιλίρ βακερέλα: «Ισινέ δύσκολος τι σικαβάβ θάρρος κάνα ο Μπέθελ διοριντάς-μαν τι βοηθίναβ ι πφραλέν ντα ι πφενίν σο ισινέ εκχέ επικίνδυνε περιοχιάτε. Νταράβας, ντα η οδηγία σο λιντόμ να ντικχιόλας γκοντιαβέρ». Ο Τιμ, εκ ιεραπόστολος κι Ασία, δυσκολίντιβελας τι κερέλ σαρέ ο πράγματα σο έπρεπε τι κερέλ κάθε ντιβές. Ο Τιμ βακερέλα: «Μπάζιμα, ισινόμας αζόμ κχινό σο νιωθίναβας ότι να τθεράβας ζορ τι βοηθίναβ ι πφραλέν ντα ι πφενίν». Σο κα βοηθίνελ ι πρεσβυτερόν σο νακχένα ασακέ δυσκολίες;

3. Σαρ μπορίνασα σαρέ τι βοηθίντιβας κατά παράδειγμας του Γεδεών;

 ³ Ο πρεσβύτεροι μπορίνενα τι σικλιόν κατά παράδειγμας του Γεδεών, σο ισινέ κριτής. (Εβρ. 6:​12· 11:​32) Βοβ σώνελας ντα αρακχαβέλας ι Ντεβλέσκε λαός. (Κριτ. 2:​16· 1 Χρον. 17:6) Σαρ ο Γεδεών, αντικάς ο πρεσβύτεροι-ντα διορισάλε τι φροντίνεν ι Ντεβλέσκε λαός ανταλέ μπουτ δύσκολε ντιβεσέντε. (Πράξ. 20:​28· 2 Τιμ. 3:1) Μπορίνασα τι σικλιάς μπουτ πράγματα κατά Γεδεών σο ισινέ μετριόφρων, ταπεινός ντα ντέλας καν ι Ντεβλές. Επίσης, να ισινέ εύκολος τι σικαβέλ υπομονή καζόμ κερέλας πο διορισμούς. Είτε υπηρετίνασα σαρ πρεσβύτεροι είτε όχι, μπορίνασα τι μπαριαράς αμαρί εκτίμηση αμαρέ πρεσβυτερόνγκε. Μπορίνασα τι στηρίνας ανταλέ πνευματικέ μουρσέν σο μαρένα-πες ι κχανγκιριάκε.​—Εβρ. 13:17.

4. Σαρ σικαντάς ο Γεδεών μετριοφροσύνη ντα ταπεινότητα;

⁴ Ο Γεδεών ισινέ μετριόφρων ντα ταπεινός. b Κάνα εκ άγγελος ι Ιεχωβάσκο βακερντάς κο Γεδεών ότι ο Ντεβέλ τραμπιντάας-λες για τι σώνελ ι Ισραηλιτέν κατά ζουρανέ Μαδιανίτες, οντουβά ταπεινός τζενό απαντιντάς: «Μι φαμιλί ισί η πο χουρντί κο Μανασσής ντα με ισινόμ ο πο ασήμαντος μι νταντέσκε κχερέστε». (Κριτ. 6:​15) Ο Γεδεών αμντίνελας ότι να τθερέλας ο ικανότητες τι κερέλ ανταβά διορισμός, αλλά ο Ιεχωβά τθερέλας διαφορετική άποψη. Ι Ιεχωβάσκε βοηθειάσαρ, ο Γεδεών κερντάς λατσσές πο διορισμός.

5. Κάνα μπορεί τι αβέλ δύσκολος εκχέ πρεσβυτερόσκε τι σικαβέλ μετριοφροσύνη ντα ταπεινότητα;

⁵ Ο πρεσβύτεροι κερένα ο πο λατσσό σο μπορίνενα για τι σικαβέν μετριοφροσύνη ντα ταπεινότητα κάθε πραγμάστε. (Μιχ. 6:8· Πράξ. 20:​18, 19) Να ισαρένα-πες οντουλένγκε σο μπορίνενα τι κερέν ή οντουλένγκε σο κερντέ. Ούτε πακιάνα ότι να τθερένα καέκ αξία επειδή κερντέ κάποια λάθη. Όμως, μπάζιμα ισί δύσκολος εκχέ πρεσβυτερόσκε τι ατσσόλ ταπεινός ντα μετριόφρων. Για παράδειγμας, μπέκιμ τι ντιντιόν-λες μπερεκέτι διορισμοί ντα σοράν τι αγαβέλ ότι δυσκολίντιβελα τι κερέλ-λεν σαρέ. Ή μπορεί κάποιοι τι κρίνεν-λες ι τροπόσκε σο κερντάς εκ διορισμός ντα κάποιοι τι ισαρέν-λες ι τροπόσκε σο κερντάς εκ γιαβέρ διορισμός. Σο σικλιόνα ο πρεσβύτεροι κατά Γεδεών, σο κα βοηθίνελ-λεν ασακέ περιπτωσιέντε;

6. Σο σικλιόνα ο πρεσβύτεροι για τη μετριοφροσύνη κατά Γεδεών; (Ντικχέν ι φωτογραφία-ντα)

 ⁶ Τι μανγκέν βοήθεια. Ο μετριόφρων τζενό αγαβέλα ότι υπαρχίντιβενα πράγματα σο να μπορίνελα τι κερέλ. Ο Γεδεών σικαντάς ότι ισινέ μετριόφρων επειδή μανγκέλας ι βοήθεια ι γιαβερένγκι. (Κριτ. 6:​27, 35· 7:​24) Ο γκοντιαβέρ πρεσβύτεροι κερένα κάτι ασακό. Ο Τόνι βακερέλα: «Χουρντιαρέλα μπερί, σικλιαρντέ-μαν τι κεράβ πο μπουτ μπουτιά οντουλένταρ σο μπορίναβας τι νταβ πέρα. Οτθάρ, αποφασιντόμ τι συζητίνας για τη μετριοφροσύνη κι φαμιλιάκι λατρεία ντα μανγκλόμ μι ρομνιάταρ τι βακερέλ μάνγκε σαρ πακιάλας ότι τζάβας-λεν οπράλ ανταλέστε. Ντα ντικχλόμ πάλι ο βίντεος Να Εκπαιδεύετε, να Εμπιστεύεστε και να Ενδυναμώνετε Άλλους, Μιμούμενοι τον Ιησού κο ιστότοπος jw.org». Ο Τόνι αρχισάλο τι μανγκέλ γιαβερένταρ τι βοηθίνεν-λες ι μπουτιέντζαρ σο τθερέλας τι κερέλ. Ο αποτέλεσμας; Ο Τόνι βακερέλα: «Εμ η μπουτί κι κχανγκιρί αβέλα-πες, εμ με τθεράβα πο μπουτ σαάτι για τι μπαριαράβ μι φιλία ι Ιεχωβάσαρ».

7. Σαρ μπορίνενα ο πρεσβύτεροι τι μοιάζεν κο Γεδεών κάνα ο γιαβερά κρίνενα-λεν; (Ιακώβου 3:13)

⁷ Τι απαντίνεν ήρεμα άμα κρίνενα-τουμέν. Κάτι γιαβέρ σο μπορεί τι δυσκολίνελ ι πρεσβυτερόν ισί κάνα κάποιος κρίνελα-λεν. Ο παράδειγμας σο ντινάς ο Γεδεών μπορίνελα πάλι τι βοηθίνελ-λεν. Επειδή ο Γεδεών αγαβέλας ότι να ισινέ τέλειος, απαντιντάς ήρεμα κάνα ο Εφραϊμίτες κρίνενας-λες. (Κριτ. 8:​1-3) Να απαντιντάς λένγκε χολιάσαρ. Σικαντάς ότι ισινέ ταπεινός κάνα ασουντάς λένγκε παράπονα, ντα απαντιντάς εκχέ τροπόσαρ σο ηρεμιντάς ο πράγματα. Ο γκοντιαβέρ πρεσβύτεροι μοιάζενα κο Γεδεών κάνα ασουνένα προσεκτικά, απαντίνενα ήρεμα ντα ατσσόνα κοβλέ γκίσκε άμα κρίνενα-λεν. (Διαβάνεν Ιακώβου 3:​13) Ανταλέ τροπόσαρ, κα υπαρχίντιβελ ειρήνη κι κχανγκιρί.

8. Σο πρέπει τι κερέν ο πρεσβύτεροι κάνα ο γιαβερά ισαρένα-λεν; Βακερέν εκ παράδειγμας.

⁸ Τι ντεν σαρί ι δόξα κο Ιεχωβά. Κάνα ο γιαβερά ισαρένας τον Γεδεών σόσκε νικιντάς ι Μαδιανιτέν, βοβ ντινάς σαρί ι δόξα κο Ιεχωβά. (Κριτ. 8:​22, 23) Σαρ μπορίνενα ο πρεσβύτεροι τι μοιάζεν κο Γεδεών; Πρέπει τι ντεν κο Ιεχωβά ι δόξα ι πραγματένγκε σο κερένα. (1 Κορ. 4:6, 7) Για παράδειγμας, άμα ο γιαβερά ισαρένα εκχέ πρεσβυτερός σόσκε ισί λατσσό δάσκαλος, βοβ μπορίνελα τι βακερέλ ότι λέσκο σικλιαριπέ ισί κατά Λάφι ι Ντεβλέσκο ντα ότι σαρέ σικλιάσα κατά οργάνωση ι Ντεβλέσκι. Μπάζιμα, ο πρεσβύτεροι ισί λατσσό τι σκεφτίνεν άμα ταρτίνενα μπουτ ι προσοχή πουμαρέ νεαυτόστε. Ντικχέν ο παράδειγμας εκχέ πρεσβυτερόσκο σο βακερένα λέσκε Τίμοθι. Κάνα αρχισάλο τι υπηρετίνελ σαρ πρεσβύτερος, ο Τίμοθι μανγκέλας μπουτ τι κερέλ δημόσιες ομιλίες. Βοβ βακερέλα: «Κάνα αρχίναβας μο ομιλίες, αρακχάβας μπουτ λάφια ντα παραδείγματα σο κερένας ι γιαβερέν τι σαστίνεν. Μπουτ φαρ, ο γιαβερά ισαρένας-μαν ανταλένγκε. Δυστυχώς, ταρτίναβας ι προσοχή μι νεαυτόστε ντα όχι κι Γραφή ή κο Ιεχωβά». Καζόμ νακχέλας ο βακίτι, ο Τίμοθι αγαντάς ότι έπρεπε τι αλλάνελ ο τρόπος σο σικλιαρέλας για μα τι ταρτίνελ μπουτ ι προσοχή πι νεαυτόστε. (Παρ. 27:​21) Καβά ισινέ ο αποτέλεσμας; Ο Τίμοθι βακερέλα: «Ακανά, ο πφραλά ντα ο πφενιά βακερένα μάνγκε σαρ βοηθιντάς-λεν μι ομιλία τι νακχαβέν εκ πρόβλημας, τι νταϊντίνεν εκ δοκιμασία ή τι τζαν πο πασέ κο Ιεχωβά. Λένγκε λάφια ντένα-μαν πο μπαρί χαρά κατά ισαριπέ σο λάβας πριν από μπουτ μπρεσά».

9. Σόσκε ισινέ δύσκολος τι ντελ καν κο Ιεχωβά ντα τι σικαβέλ θάρρος ο Γεδεών; (Ντικχέν ι φωτογραφία κι ανγκλαϊνί σελίδα)

⁹ Κάνα ο Γεδεών διορισάλο σαρ κριτής, έπρεπε τι ντελ καν κο Ιεχωβά ντα τι σικαβέλ θάρρος. Λιντάς ο επικίνδυνος διορισμός τι χαλαβέλ ο θυσιαστήριος του Βάαλ σο τθερέλας λέσκο ντατ. (Κριτ. 6:​25, 26) Πο σοράν, κάνα γκιντιντάς εκχέ στρατός, ο Ιεχωβά ντινάς-λες ντούι φαρ ι οδηγία τι τθερέλ πο χάνικ στρατιωτέν. (Κριτ. 7:​2-7) Τελικά,  ντιντιλί-λες η εντολή τι τζαλ κο στρατόπεδος κι ντουσμανίσκο ντα τι κερέλ τζένγκι αντρέ κι ιράτ.​—Κριτ. 7:​9-11.

10. Κάνα μπέκιμ τι αβέλ δύσκολος εκχέ πρεσβυτερόσκε τι ντελ καν;

¹⁰ Ο πρεσβύτεροι πρέπει τι αβέν “έτοιμοι τι ντεν καν”. (Ιακ. 3:​17) Εκ πρεσβύτερος σο ντέλα καν κερέλα αντράλ πι γκίσταρ οντουλά σο βακερέλα η Γραφή ντα ο οδηγίες σο ντέλα η οργάνωση ι Ντεβλέσκι. Αντικάς, ντέλα ο λατσσό παράδειγμας κο γιαβερά. Όμως, νανέ πάντα εύκολος τι ντελ καν. Για παράδειγμας, μπορεί τι λελ μπουτ οδηγίες ή τι αλλάνεν σουγκό, ντα τι αβέλ δύσκολος τι ακολουθίνελ-λεν. Μπάζιμα, μπέκιμ τι σκεφτίνελ άμα εκ οδηγία ισί λατσσί ή γκοντιαβέρ. Ή μπέκιμ τι ντιντιόλ-λες εκ διορισμός σο κα τσσουβέλας-λες σε κίνδυνος τι ασταρέν-λες ο ασκέρια. Σαρ μπορίνενα ο πρεσβύτεροι τι ντεν καν ντα τι μοιάζεν κο Γεδεών ασακέ περιπτωσιέντε;

11. Σο κα βοηθίνελ ι πρεσβυτερόν τι ντεν καν;

¹¹ Τι ασουνέν προσεκτικά ο οδηγίες ντα τι κερέν-λεν. Ο Ντεβέλ βακερντάς κο Γεδεών σαρ τι χαλαβέλ ο θυσιαστήριος πι νταντέσκο, κατέ τι κερέλ νεβό θυσιαστήριος ι Ιεχωβάσκε ντα καβά ζώος τι θυσιάνελ. Ο Γεδεών να αντάς αντίρρηση κο οδηγίες​—απλώς κερντάς-λεν. Αντιβές, ο πρεσβύτεροι λένα οδηγίες κατά οργάνωση ι Ιεχωβάσκι αντράλ κατά επιστολές, ανακοινώσεις ντα οδηγίες σο βοηθίνενα-αμέν τι ατσσάς αρακχαντέ ντα πασέ κο Ιεχωβά. Μανγκάσα αμαρέ πρεσβυτερόν επειδή κερένα πιστά ο οδηγίες ι Ντεβλέσκε. Αντικάς, βοηθίντιβελα σαρί η κχανγκιρί.​—Ψαλμ. 119:​112.

12. Σαρ μπορίνενα ο πρεσβύτεροι τι κερέν ο εδάφιος Εβραίους 13:​17 κάνα αβέλα εκ νεβί οδηγία;

¹² Τι αβέν έτοιμοι τι κερέν αλλαγές. Ντεν-τουμέν γκοντί ότι ο Ιεχωβά ντινάς κο Γεδεών ι οδηγία τι βακερέλ σχεδόν σαρέ πι στρατιωτέντε τι τζαν πουμαρέ κχερέντε. (Κριτ. 7:8) Ο Γεδεών μπέκιμ τι σκεφτιντάς: “Ισί μπαγιά σημαντική ανταγιά αλλαγή; Κα πετυχίνελ;” Όμως, ντινάς καν. Ο πρεσβύτεροι αντιβές μοιάζενα κο Γεδεών κάνα κερένα ο αλλαγές σο λένα κατά οργάνωση ι Ντεβλέσκι. (Διαβάνεν Εβραίους 13:​17) Για παράδειγμας, κο 2014, ο Κυβερνών Σώμας αλλαντάς ο τρόπος σο ποκίντιβενα ο μπουτιά σο αβένα-πες για τι χτίντιβεν ο Αίθουσες Βασιλείας ντα ο Αίθουσες Συνελεύσεων. (2 Κορ. 8:​12-14) Ο κχανγκιριά να κα λένας ακανά δάνεια σο κα χρειαζίντιβελας σοράν τι ποκινέν-λεν. Αντίς ανταλέσκε, ο κχανγκιριά σαρό κο ντουνιάς κα τσσουβένας λοβέ εκχέ ταμειόστε για τι χτίντιβεν Αίθουσες Βασιλείας ντα Αίθουσες Συνελεύσεων οτθέ σο υπαρχίντιβελας ανάγκη. Η αίθουσα κα χτίντιβελας είτε η κχανγκιρί οντουλέ τθανέστε μπορίνελας τι ποκινέλ είτε να μπορίνελας. Κάνα ο Χοσέ ασουντάς ανταγιά αλλαγή, τθερέλας αμφιβολίες ντα σκεφτίνελας: “Να κα χτίντιβελ ούτε εκ Αίθουσα Βασιλείας. Να αβένα-πες αντικάς ο πράγματα αμαρέ τθεμέστε”. Σο βοηθιντάς τον Χοσέ τι υποστηρίνελ ι οδηγία σο ντιντιλί; Βοβ βακερέλα: «Ο εδάφια Παροιμίες 3:5, 6 αντέ μι γκοντιάτε ότι πρέπει τι νταβ μπέσα κο Ιεχωβά. Ντα ο αποτελέσματα ισί μπουτ σουκάρ! Ακανά χτίνασα πο μπουτ Αίθουσες Βασιλείας. Ντα ο νεβό τρόπος σο χρησιμοποιήνασα αμαρέ  συνεισφορές βοηθίνελα σαριλέν σόσκε υπαρχίντιβελα ισορροπία».

13. (α) Καγιά σιγουριά τθερέλας ο Γεδεών; (β) Σαρ μπορίνενα ο πρεσβύτεροι τι μοιάζεν λέστε; (Ντικχέν ι φωτογραφία-ντα)

¹³ Τι σικαβέν θάρρος καζόμ κερένα οντουβά σο μανγκέλα ο Ιεχωβά. Ο Γεδεών ντινάς καν κο Ιεχωβά παρόλο σο νταρέλας ντα υπαρχίντιβενας μπουτ κίνδυνοι. (Κριτ. 9:​17) Αφού λιντάς ζορ κατά Ιεχωβά, ισινέ πφερντό σιγουριά ότι ο Ντεβέλ κα αβέλας πασέ λέστε καζόμ βοβ κα αρακχαβέλας ι Ντεβλέσκε λαός. Ο πρεσβύτεροι σο τζουβντιόνα τθανέντε σο η κυβέρνηση τσσιναντάς αμαρό έργος, μοιάζενα κο Γεδεών. Μπίνταρανες, ντένα ο λατσσό παράδειγμας ντα τζάνα κο συναθροίσεις ντα κο έργος παρόλο σο ισί κίνδυνος τι ασταρέν-λεν, τι κερέν-λεν ανάκριση, τι χασαρέν πουμαρί μπουτί ή τι νταπέν-λεν. c Κι μπαρί στεναχώρια, ο πρεσβύτεροι κα χρειαζίντιβεν θάρρος για τι ντεν καν κο οδηγίες σο κα λεν, ατζέ-ντα άμα κα αβέλ επικίνδυνος τι κερέν-λεν. Μπέκιμ τι λας οδηγίες σαρ κα κεράς αμαρό έργος, σο κα μοιάζελ σαρ χαλάζι μπαρέ μπαρέντζαρ, ντα σαρ κα σώντιβας κατά Γωγ του Μαγώγ.​—Ιεζ. 38:​18· Αποκ. 16:21.

14. Σόσκε ισινέ δύσκολος τι σικαβέλ υπομονή ο Γεδεών;

¹⁴ Ο διορισμός σο τθερέλας ο Γεδεών σαρ κριτής ανέλας λέσκε μπουτ κούραση. Κο τζένγκι, κάνα ο Μαδιανίτες νασλέ για τι σώντιβεν αρατί, ο Γεδεών κουλαντιντάς-λεν κατά κοιλάδα της Ιεζραέλ μέχρι κι Λεν Ιορδάνης, σο μπέκιμ ντονταλάι ισινέ πφερντί δέντρα ντα θάμνοι. (Κριτ. 7:​22) Μήπως ο Γεδεών σταματιντάς κο Ιορδάνης; Νάα! Παρόλο σο ισινέ κχινέ, βοβ ντα λέσκε 300 μουρσά νακχλέ ι λεν ντα συνεχιντέ τι κουλαντίνεν ι Μαδιανιτέν. Τελικά, ερεσαντέ-λεν ντα νικιντέ-λεν.​—Κριτ. 8:​4-12.

15. Κάνα μπορεί τι αβέλ δύσκολος εκχέ πρεσβυτερόσκε τι σικαβέλ υπομονή;

¹⁵ Μπάζιμα, εκ πρεσβύτερος μπορεί τι νιωθίνελ αζόμ μπουτ κχινό κατά ευθύνες σο τθερέλα κι κχανγκιρί ντα κι φαμιλί σο νασέλα σαρί λέσκι ζορ. Κάνα νιωθίνενα αντικάς, σαρ μπορίνενα ο πρεσβύτεροι τι μοιάζεν κο Γεδεών;

16, 17. Σο βοηθιντάς τον Γεδεών τι νταϊντίνελ, ντα καλέ πραγμάσκε μπορίνενα τι αβέν σίγουροι ο πρεσβύτεροι; (Ησαΐας 40:​28-31) (Ντικχέν ι φωτογραφία-ντα)

 ¹⁶ Τι αβέν σίγουροι ότι ο Ιεχωβά κα ντελ-τουμέν ζορ. Ο Γεδεών ισινέ σίγουρος ότι ο Ιεχωβά κα ντέλας-λες ζορ, ντα αντικάς αβιλό-πες. (Κριτ. 6:​14, 34) Εκ φαρ, ο Γεδεών ντα λέσκε μουρσά κουλαντίνενας τσανγκίντζαρ ντουέ Μαδιανιτέν σο ισινέ βασιλιάδες, ντα μπέκιμ ανταλά βασιλιάδες ισινέ οπράλ κο καμήλες. (Κριτ. 8:​12, 21) Όμως, ο Ντεβέλ βοηθιντάς ι αποφασισμέ Ισραηλιτέν τι ασταρέν-λεν ντα τι νικίνεν κο τζένγκι. Αντικάς-ντα, ο πρεσβύτεροι μπορίνενα τι στηρίντιβεν κο Ιεχωβά, οντουλέστε σο «να κχινιόλα ούτε τσσιντιόλα-πες». Κα ντελ-λεν ζορ κάνα χρειαζίντιβενα-λα.​—Διαβάνεν Ησαΐας 40:​28-31.

¹⁷ Ντικχέν ι εμπειρία εκχέ πφραλέσκι σο βακερένα λέσκε Μάθιου ντα ισί κι Επιτροπή Προσέγγισης Νοσοκομείων. Σο βοηθίνελα-λες τι νταϊντίνελ; Ο Μάθιου βακερέλα: «Αγαντόμ καζόμ μπαγιά ισί ο λάφια κο Φιλιππησίους 4:​13. Μπουτ φαρ, κάνα νιωθίναβα ότι ισινόμ ντιπ κχινό, προσευχίντιβαβα αντράλ μι γκίσταρ κο Ιεχωβά, ντα μολίναβα ι Ντεβλές τι ντελ-μαν ζορ κο σώμας ντα κι γκοντί για τι στηρίναβ μι πφραλέν. Οντουλέ περιπτωσιέντε, νιωθίναβα ο πνεύμας ι Ντεβλέσκο τι κερέλ μπουτί αντρέ μάντε, καζόμ βοηθίνελα-μαν τι νταϊντίναβ». Σαρ ο Γεδεών, αντικάς αμαρέ αφοσιωμέ πρεσβύτεροι-ντα, μπέκιμ τι νακχένα δυσκολίες καζόμ μαρένα-πες για τι αρακχαβέν ι Ντεβλέσκε μπρακέν. Σίγουρα, πρέπει τι αγαβέν ότι λένγκι ζορ νανέ συνέχεια η ίδια, ντα ναστί κερένα πάντα σαρέ οντουλά σο μανγκένα τι κερέν. Μπορίνενα όμως τι αβέν σίγουροι ότι ο Ιεχωβά κα ασουνέλ-λεν κάνα μολίνενα-λες τι βοηθίνελ-λεν ντα κα ντελ-λεν ζορ για τι νταϊντίνεν.​—Ψαλμ. 116:1· Φιλιπ. 2:13.

18. Χάνικ λαφίντζαρ, σαρ μπορίνενα ο πρεσβύτεροι τι μοιάζεν κο Γεδεών;

¹⁸ Ο πρεσβύτεροι μπορίνενα τι σικλιόν μπουτ πράγματα κατά παράδειγμας του Γεδεών. Πρέπει τι αβέν μετριόφρονες ντα ταπεινοί κάνα σκεφτίνενα καζόμ μπουτί κα κερέν, ντα κάνα ο γιαβερά κρίνενα-λεν ή ισαρένα-λεν. Πρέπει τι ντεν καν ντα τι σικαβέν θάρρος, ειδικά καζόμ ερεσέλα ο τέλος ανταλέ ντουνιάσκο. Ντα χρειαζίντιβελα τι αβέν σίγουροι ότι, σο-ντα δυσκολίες τι νακχέν, ο Ντεβέλ μπορίνελα τι ντελ-λεν ζορ. Σίγουρα, νιωθίνασα εκτίμηση ανταλέ μπουτιαρνέ τσομπανίνγκε ντα “ισί αμένγκε πολύτιμοι ασακέ τζενέ”.​—Φιλιπ. 2:29.