Μο ντατ ντα μι ντάι νασλέ κατά Εσθονία κο Δεύτερος Παγκόσμιος Πόλεμος ντα γκιλέ κι Γερμανία, οτθέ σο μπιάντιλομ. Αζομάν κερένας προετοιμασίες για τι τζας κο Καναδάς. Αμαρό πρώτος κχερ ισινέ κι Οτάβα κο Καναδάς σε εκ ασβεστωμέ γωνία αντρέ σε εκ κοτέτσι. Ισινάμας μπουτ τσορορέ, όμως πάλι λατσσές τθεράας για πρωινός βαντρέ.

Εκ ντιβές, κάποιοι Μάρτυρες ι Ιεχωβάσκε διαβαντέ μι νταγιάκε ο εδάφια Αποκάλυψη 21:3, 4. Οντουλά λάφια αγγιντέ αζόμ μπουτ μι νταγιά σο αρχισάλι τι ροβέλ. Ο σπόρος ι αληθειάκο μπαριλό μι νταγιάκε ντα μι νταντέσκε γκίστε. Ο ντούι-ντα κερντέ σουγκό πρόοδος ντα μπολντιλέ.

Μο ντατ ντα μι ντάι να τζανένας λατσσές ο αγγλικά, όμως η αλήθεια ισινέ λένγκε μπουτ σημαντική. Ο πο μπουτ Σάββατα, μο ντατ λέλας μαν ντα μι πο χουρντέ πφενιά, τη Σίλβια, για τι τζας κο έργος, παρόλο σο μπάζιμα κερέλας μπουτί σαρί ι ιράτ σε εκ εργοστάσιος σο λιώνελας ο νικέλιος κο Σάντμπερι κο Οντάριο. Επίσης, κάθε εβδομάδα διαβάναας ι Σκοπιά σαρ φαμιλί. Μο ντατ ντα μι ντάι βοηθιντέ-μαν τι μανγκάβ ι Ντεβλές. Ανταβά κερντάς-μαν τι αφιερώναβ μι ζωή κο Ιεχωβά κο 1956, κάνα ισινόμας 10 μπρεσένγκο. Κάθε φαρ σο σκεφτίναβα καζόμ μπουτ μανγκέλας ι Ιεχωβάς μο ντατ ντα μι ντάι, ανταβά ντέλα-μαν ζορ για τι συνεχίναβ τι υπηρετίναβ-λες.

Κάνα μπιτισκιαρντόμ ο σχολείος, μι προσοχή νασλί κατά πνευματικά πράγματα. Αμντίναβας ότι, άμα κα αβάβας σκαπανέας, να κα νικαβάβας ποτές μπερεκέτι λοβέ για τι κεράβ ο ταξίδια σο μανγκάβας ντα τι ντικχάβ σαρό ο ντουνιάς. Αρχισάλομ τι κεράβ μπουτί σε εκ ραδιοφωνικός σταθμός σαρ ντι-τζέι. Μπεϊντίναβας μπουτ ανταγιά μπουτί, όμως κεράβας-λα σάντε ιράτ. Ο αποτέλεσμας ισινέ τι χασαράβ μπουτ συναθροίσεις ντα τι κεράβ παρέα τζενέντζαρ σο να μανγκένας ι Ντεβλές. Τελικά, μι συνείδηση, σο σικλιαρντόμ-λα κατά Γραφή, τσσιντιντάς-μαν τι κεράβ αλλαγές.

Γκιλόμ τι μπεσάβ κι Όσαουα κο Οντάριο. Οτθέ, γνωριντόμ τον Ρέι Νόρμαν, λέσκε πφενιά, τη Λέσλι, ντα γιαβερέ σκαπανίν. Σαρέ σικαντέ μάνγκε ενδιαφέρον. Κάνα ντικχλόμ καζόμ ευτυχισμέ ισινέ, ανταβά κερντάς-μαν τι σκεφτίναβ πάλι μο στόχους. Βακερντέ μάνγκε τι αρχίναβ ο σκαπανικός, κάτι σο κερντόμ κο Σεπτέμβριος του 1966. Ισινόμας μπουτ ευτυχισμέ, ντα μι ζωή ισινέ σουκάρ. Όμως, μπεσένας μάνγκε εκπλήξεις σο κα αλλάνενας μι ζωή.

Καζόμ τζάβας ατζέ σχολείος, κερντόμ αίτηση για τι τζαβ κο Μπέθελ κο Τορόντο. Πο σοράν, ενώ κεράβας σκαπανικός, καλιντέ-μαν τι υπηρετίναβ κο Μπέθελ  για σταρ μπρεσά. Όμως μπεϊντίναβας μπουτ τη Λέσλι ντα νταράβας ότι, άμα κα δεχτίναβας ανταγιά πρόσκληση, να κα ντικχάβας-λα ατζέκ φαρ. Σοράν από μπουτ προσευχές σο κερντόμ αντράλ μι γκίσταρ, τελικά δεχτιντόμ ανταγιά πρόσκληση ντα χαιρετιντόμ πφανγκέ γκίσαρ τη Λέσλι.

Κο Μπέθελ, κεράβας μπουτί κο πλυντήριος ντα σοράν σαρ γραμματέας. Η Λέσλι αβιλί ειδική σκαπάνισσα κο Γκατινό κο Κεμπέκ. Μπουτ φαρ σκεφτίναβας σαρ ισινέ η Λέσλι, ντα άμα λιντόμας ι σωστή απόφαση. Όμως μπεσέλας μάνγκε εκ κατά πο σουκάρ εκπλήξεις μι ζωγιάτε. Ο Ρέι, ο πφραλ της Λέσλι, αβιλό κο Μπέθελ ντα μπεσάας παρέα! Αντικάς μπορίναβας τι μπαριαράβ μι φιλία με τη Λέσλι. Παντρισάλαμ κο τελευταίος ντιβές σο μπιτίνελας μο διορισμός, σο ατσσικιαρντάς σταρ μπρεσά, δηλαδή 27 Φεβρουαρίου 1971.

Διορισάλαμ εκχέ κχανγκιριάτε σο κερέλας λάφι γαλλικά κο Κεμπέκ. Σοράν χάνικ μπρεσένταρ, αβιλί μάνγκε εκ γιαβέρ έκπληξη. Καλιντέ-μαν τι υπηρετίναβ σαρ επίσκοπος περιοχής. Αζομάν ισινόμας 28 μπρεσένγκο. Νιωθίναβας μπουτ τερνό ντα πακιάβας ότι να ισινόμας πεκό για τι υπηρετίναβ σαρ επίσκοπος περιοχής, αλλά ντινέ-μαν ζορ ο εδάφια Ιερεμίας 1:7, 8. Η Λέσλι όμως τθερέλας εκ πρόβλημας. Να ισινέ λάκε εύκολος τι σοβέλ ι ιράτ επειδή κο παρελθόν κερντάας ντούι τρακάρες. Οτθάρ, σαρ κα κεράας ο έργος περιοχής; Παρόλο σο ο πράγματα ισινέ αντικάς, η Λέσλι βακερντάς: «Άμα ο Ιεχωβά βακερέλα αμένγκε τι κεράς κάτι, δεν πρέπει τι προσπαθίνας τι κεράς-λες ανταβά;» Τελικά, δεχτιντάμ ο διορισμός ντα χαιρισάλαμ σο κερντάμ ο έργος περιοχής για 17 μπρεσά.

Κο έργος περιοχής, μο πρόγραμμας ισινέ μπουτ δύσκολος ντα να τθεράβας πάντα μπουτ σαάτι για τη Λέσλι. Χρειαζίντιβαβας ατζέκ εκ μάθημας. Εκ Δευτέρα, μπουτ πρωί, μπασκιαρντέ μο κουδούνι. Να ισινέ καέκ κι πόρτα, εκτός από εκ σεβλί σο τθερέλας αντρέ εκ τραπεζομάντιλος, φρούτα, κιράλ, μαντρό, εκ μπουκάλι μολ, ποτήρια ντα εκ σημείωμας σο βακερέλας: «Τζα τι ρομνιάσαρ για πικνίκ». Ισινέ εκ μπουτ σουκάρ ντα τατό ντιβές. Αλλά εξηγιντόμ κι Λέσλι ότι έπρεπε τι ετοιμάναβ κάποιες ομιλίες ντα ότι ναστί κα τζάας. Βόι αγαντάς-λες, όμως στεναχωρισάλι χάνικ. Καζόμ μπεσάβας μι γραφειόστε, μι συνείδηση αρχισάλι τι πειράνελ-μαν. Ντα αζομάν σκεφτιντόμ ο εδάφια Εφεσίους 5:​25, 28. Μήπως ο Ιεχωβά βακερέλας μάνγκε τι σκεφτίναβ ο συναισθηματικές ανάγκες μι ρομνιάκε; Κερντόμ εκ προσευχή ντα βακερντόμ κι Λέσλι: «Πάμε». Βόι πφερντιλί χαρά. Γκιλάμ αμαρέ κουρσάσαρ εκχέ μπουτ σουκάρ τθανέστε πασέ εκχέ λενιάτε, μπουγαρντάμ ο τραπεζομάντιλος ντα νακχλάμ εκ κατά πο σουκάρ ντιβεσά αμαρέ ζωγιάκε. Ντα ερεσαντόμ τι ετοιμάναβ μο ομιλίες-ντα.

Αμαρέ διορισμοί σο τθεράας κο έργος περιοχής ισινέ μπουτ ντα σουκάρ. Γκιλάμ κατά Βρετανική Κολομβία μέχρι κο Νιουφάουντλαντ. Οντουβά σο μανγκάβας χουρντιαρέλα, αβέλας-πες μπαγιά. Κεράβας ταξίδια. Σκεφτίναβας τι κεράβ αίτηση για τη Σχολή Γαλαάδ, όμως να μανγκάβας τι αβάβ ιεραπόστολος κο ξένα τθεμά. Ο ιεραπόστολοι ντικχίντιβενας μάνγκε μπουτ ξεχωριστά τζενέ, ντα πακιάβας ότι με να τθεράβας αζόμ μπουτ ικανότητες για τι αβάβ ιεραπόστολος. Εκτός ανταλένταρ, νταράβας μα τι μπουτσσαβέν-αμέν  εκχέ τθανέστε κι Αφρική σο κα υπαρχίντιβενας νασφαλίματα ντα τζένγκια. Μια χαρά ισινόμας κο Καναδάς.

Κο 1992, ο Μάρτυρες ι Ιεχωβάσκε αρχισάλε τι κερέν πάλι έργος ελεύθερα μερικέ τθεμέντε σο μέχρι αζομάν ισινέ κι Σοβιετική Ένωση. Οτθάρ, ο πφραλά πουτσλέ-αμέν άμα κα μανγκάας τι τζας κι Εσθονία σαρ ιεραπόστολοι. Σαστισάλαμ, αλλά κερντάμ προσευχή ανταλέσκε. Σκεφτιντάμ πάλι ακαβά: “Άμα ο Ιεχωβά βακερέλα αμένγκε τι κεράς κάτι, δεν πρέπει τι προσπαθίνας τι κεράς-λες ανταβά;” Δεχτιντάμ, ντα με σκεφτιντόμ: “Πάλι λατσσές να κα τζας κι Αφρική”.

Αρχισάλαμ αμέσως τι σικλιάς εσθονικά. Περίπου ντούι μάσεκ από αζομάν σο γκιλάμ κι Εσθονία, μανγκλέ αμένταρ τι κεράς ο έργος περιοχής. Κα τζάας τι ντικχάς 46 κχανγκιριά ντα όμιλοι κο τριν Βαλτικά τθεμά, ντα κο Καλίνινγκραντ κι Ρωσία. Ανταβά μανγκέλας τι βακερέλ ότι έπρεπε τι προσπαθίνας τι σικλιάς χάνικ λετονικά, χάνικ λιθουανικά ντα χάνικ ρωσικά. Να ισινέ εύκολος, αλλά ο πφραλά χαιρίνενας σο ντικχένας-αμέν τι κεράς προσπάθεια, ντα βοηθίνενας-αμέν. Κο 1999, κερντιλό εκ γραφείος τμήματος κι Εσθονία, ντα διορισάλομ κι επιτροπή γιεκ με τον Τόμας Έντουρ, τον Λέμπιτ Ράιλε ντα τον Τόμι Κάουκο.

Ντικχλάμ μπουτέ Μαρτυρέν σο γκερντέας-λεν εξορία κι Σιβηρία. Παρόλο σο τσσιντιντέ μπουτ κι φυλακή ντα ισινέ ντουρ πουμαρέ φαμιλιάταρ, ποτές να μουκχλέ ο κερκιπέ τι μπαριόλ αντρέ λένγκε γκίστε. Ατσσικιαρντέ πουμαρί χαρά ντα συνεχιντέ τι πφαμπόν μπουτ ι εργόσκε. Ανταβά βοηθιντάς-αμέν τι αγαβάς ότι μπορίναας τι νταϊντίνας ντα τι αβάς χαρούμενοι σο-ντα δυσκολίες τι αβέν.

Καζόμ νακχένας ο μπρεσά, κεράας μπουτ πράγματα κο έργος ντα αντικάς τθεράας χάνικ ντιβεσά τι ξεκουράντιβας. Οτθάρ, η Λέσλι αρχισάλι τι νιωθίνελ μπουτ κχινί. Να αγαντάμ αμέσως ότι ανταβά αβέλας-πες επειδή τθερέλας εκ νασφαλιπέ σο τσσινέλας λάκι ζορ, σο βακέρντιβελα ινομυαλγία. Σκεφτίναας σοβαρά τι βουρτίνας κο Καναδάς. Κάνα βακερντέ αμένγκε τι τζας κι σχολή οντουλένγκε σο ισί κο επιτροπές τμήματος κο Πάτερσον κι Νέα Υόρκη, αμντίναβας ότι να κα μπορίναας τι νακχάς ι σχολή. Όμως, σοράν από μπουτ προσευχές σο κερντάμ αντράλ αμαρέ γκίσταρ, δεχτιντάμ. Ο Ιεχωβά ευλογιντάς αμαρί απόφαση. Καζόμ παρακολουθίναας ι σχολή, η Λέσλι γκιλί κο γιατρός ντα λιντάς ι βοήθεια σο χρειαζίντιβελας. Οτθάρ, μπορισάλαμ τι αρχίνας τι κεράς πάλι ο πράγματα σο κεράας ανγκλέ.

Εκ ιράτ κο 2008, κάνα βουρτίναας κι Εσθονία, λιντέ-μαν τηλέφωνος κατά παγκόσμια κεντρικά γραφεία ντα πουτσλέ-μαν άμα κα δεχτίναας εκ διορισμός κο Κονγκό. Σαστισάλομ, πο μπουτ επειδή έπρεπε τι απαντίναβ κο γιαβέρ ντιβές. Κι αρχή, να βακερντόμ-λες κι Λέσλι επειδή τζανάβας ότι να κα σοβέλας οντιά ιράτ. Τελικά, με ισινόμας οντουβά σο να σοτάς επειδή προσευχίντιβαβας οντουλένγκε σο ανησυχίνενας-μαν άμα κα τζάας κι Αφρική.

Κο γιαβέρ ντιβές, κάνα βακερντόμ-λες κι Λέσλι, σκεφτιντάμ: «Ο Ιεχωβά βακερέλα αμένγκε τι τζας κι Αφρική. Σαρ ισινάμ σίγουροι ότι ναστί κεράσα οντουβά σο μανγκλάς αμένταρ ντα τι απολαμβάνας-λες άμα να κα προσπαθίνας;» Οτθάρ, σοράν από 16 μπρεσά κι Εσθονία, γκιλάμ αεροπλανόσαρ κι Κινσάσα  κο Κονγκό. Ο Μπέθελ οτθέ τθερέλας εκ μπουτ σουκάρ κήπος ντα υπαρχίντιβελας μπουτ μπαρί ηρεμία. Εκ κατά πρώτα πράγματα σο τσσουντάς η Λέσλι αμαρέ δωματιόστε ισινέ εκ κάρτα σο ατσσικιαρντάας από αζομάν σο νασλάμας κατά Καναδάς. Κι κάρτα ισινέ γραμμέ ο λάφια: «Τι νικαβές μπουμπούκια κάι-ντα τι φυτίνενα-τουτ». Καζόμ σικλιάας ι πφραλέν, κεράας μελέτες ντα ντικχάας καζόμ σουκάρ ισινέ ο ιεραποστολικός έργος, τθεράας μπαρί χαρά. Σοράν, τθεράας ο προνόμιος τι τζας σε 13 γραφεία τμήματος αφρικανικέ τθεμέντε. Ανταβά ντινάς-αμέν ι ευκαιρία τι ντικχάς σαβέ τι μανγκές τζενέν ντα τι σικλιάς μπουτ πράγματα λένταρ. Η νταρ σο τθεράας κι αρχή χασάρντιλι, ντα βακεράας ευχαριστώ κο Ιεχωβά σο μπουτσσαντάς-αμέν τι υπηρετίνας κι Αφρική.

Κο Κονγκό, ντινέ-αμέν χαμπέ, σαρ ο έντομα, σο αμντίναας ότι ναστί κα χάας. Αλλά κάνα ντικχλάμ αμαρέ πφραλέν τι απολαμβάνεν-λεν, δοκιμαντάμ-λεν ντα μπεϊντιντάμ-λεν.

Κεράας ταξίδια κο ανατολικός τθαν κι τθεμέσκο για τι ενθαρρύνας αμαρέ πφραλέν ντα τι ντας-λεν ο πράγματα σο χρειαζίντιβενας. Οντουλέ τθεμέντε, ο αντάρτες κερένας επιθέσεις κο γκαβά ντα κακός κο τζουβλιά ντα κο χουρντέ. Ο πο μπουτ πφραλά να τθερένας μπουτ υλικά πράγματα. Όμως, πφερέλας-αμέν ζορ λένγκι ελπίδα κι ανάσταση, λένγκι αγάπη ι Ιεχωβάσκε ντα λένγκι αφοσίωση λέσκε οργανωσιάτε. Ανταβά κερντάς-αμέν τι ντικχάς σαρ ισί αμαρί πίστη, ντα τι μπαριαράς-λα. Μερικά πφραλά χασαρντέας πουμαρέ κχερά, ντα ο πράγματα σο καλλιεργιντέ πουμαρέ χωραφίντε. Ανταβά κερντάς-μαν τι τσσουβάβ λατσσές μι γκοντιάτε καζόμ σουγκό μπορίνενα τι εξαφανίντιβεν ο υλικά πράγματα ντα καζόμ σημαντικός ισί ο πνευματικός χουλανιπέ. Παρόλο σο τθερένας μπαρέ δυσκολίες, ο πφραλά σπάνια κερένας παράπονα. Λένγκι συμπεριφορά βοηθίνελας-αμέν τι νταϊντίνας ο δυσκολίες ντα ο προβλήματα υγείας με θάρρος.

Μπεκλεντίνελας αμένγκε εκ γιαβέρ έκπληξη. Μανγκλέ αμένταρ τι τζας κο γραφείος τμήματος κο Χονγκ Κονγκ. Ποτές να νακχλόας αμαρέ γκοντιάταρ ότι κα τζουβντιάας κι Ασία! Αλλά αφού ντικχλάμας ο βας ι Ιεχωβάσκο σαρέ αμαρέ διορισμόντε, δεχτιντάμ ι πρόσκληση. Κο 2013, ροϊμάσαρ μουκχλάμ αμαρέ αγαπημέ αμαλέν ντα ο σουκάρ τθανά της Αφρικής ντα νασλάμ τι τζας εκχέ τθανέστε σο να τζανάας.

 Ισινέ εκ μπαρί αλλαγή τι τζουβντιάς κο Χονγκ Κονγκ επειδή ισινέ εκ μπαρί πόλη τζενέντζαρ σαρό κατά ντουνιάς. Ακανά έπρεπε τι σικλιάς ι καντονεζική τσσιπ. Ο πφραλά όμως καλωσοριντέ-αμέν αντράλ πουμαρέ γκίσταρ, ντα μπεϊντιντάμ μπουτ ο χαμπέ λένγκε τθεμέσκο. Ο έργος οτθέ μπαριόλας σουγκό, οτθάρ ο γραφείος τμήματος χρειαζίντιβελας πο μπουτ κτίρια. Όμως, ο τιμές για τι κινέλ κάποιος τθανά ντα κτίρια κο Χονγκ Κονγκ ισινέ μπουτ πααλίς. Οτθάρ, ο Κυβερνών Σώμας λιντάς ι γκοντιαβέρ απόφαση τι μπικινέλ ο πο μπουτ κτίρια κατά γραφείος τμήματος σο ισινέ κο Χονγκ Κονγκ. Χάνικ πο σοράν ανταλέσταρ, κο 2015, γκιλάμ κι Νότια Κορέα, σο υπηρετίνασα μέχρι αντιβές. Ατθέ τθεράσα τι κεράς ατζέκ εκχέ δύσκολε τσσιμπάσαρ, αλλά παρόλο σο τθεράσα ντρομ ανγκλ’ αμέντε, λάσα ζορ επειδή ο πφραλά βακερένα αμένγκε ότι ακανά κεράσα λάφι πο λατσσές κο κορεατικά.

Νανέ πάντα εύκολος τι κερέλ εκ τζενό νεβέ αμαλέν, αλλά αγαντάμ ότι, κάνα σικαβάσα αμέν πρώτα φιλοξενία κο γιαβερά, μπορίνασα τι σικλιάς-λεν πο σουγκό. Τθεράσα ντικχλό ότι πο μπουτ ισί ο πράγματα σο μοιάζενα ο πφραλά παρά ο πράγματα σο να μοιάζενα, ντα ότι ο Ιεχωβά κερντάς-αμέν εκχέ μπουτ σουκάρ τροπόσαρ για τι μπορίνας τι πουτράς αμαρό γκι ντα τι μανγκάς μπουτέ αμαλέν.​—2 Κορ. 6:11.

Τθεράσα αγαντό ότι ισί ανάγκη τι δεχτίνας ι γιαβερέν σαρ δεχτίνελα-λεν ο Ιεχωβά. Ντα τι ντικχάς ο αποδείξεις σο σικαβένα ότι ο Ιεχωβά μανγκέλα-αμέν ντα οδηγίνελα-αμέν αμαρέ ζωγιάτε. Κάνα ισινάμας πφανγκέ γκίσκε ή κάνα νακχέλας αμαρέ γκοντιάταρ άμα ο πφραλά συμπαθίνενας-αμέν, διαβάναας πάλι κάρτες ή γράμματα σο ντινέας-αμέν ο πφραλά, ντα ανταβά ντέλας-αμέν ζορ. Σίγουρα, ντικχλάμ ι Ιεχωβάς τι ηρεμίνελ-αμέν ντα τι ντελ-αμέν ζορ κάνα απαντίνελα αμαρέ προσευχιέντε.

Σαρέ ανταλά μπρεσά, η Λέσλι ντα με σικλιλάμ καζόμ σημαντικός ισί τι αρακχάς σαάτι ο εκ ι γιαβερέσκε, καζόμ-ντα πφερντό τι αβέλ αμαρό πρόγραμμας. Επίσης αγαντάμ ότι πρέπει τι ασάς αμαρέ λαθίντζαρ, ειδικά κάνα προσπαθίνασα τι σικλιάς εκ νεβί τσσιπ. Κάθε ιράτ, προσπαθίνασα τι σκεφτίνας κάτι σουκάρ για τι βακεράς ευχαριστώ κο Ιεχωβά.

Αμντίναβας ότι ποτές να κα μπορίναβας τι αβάβ ιεραπόστολος ή τι τζουβντιάβ γιαβερέ τθεμέντε. Όμως, τθεράβας ι χαρά τι σικλιάβ ότι σαρέ ο πράγματα μπορίνενα τι αβέν-πες ι Ιεχωβάσκε βοηθειάσαρ. Αβένα μι γκοντιάτε ο λάφια σο βακερντάς ο προφήτης Ιερεμίας: «Χουχαντάν-μαν, Ιεχωβά». (Ιερ. 20:7) Βα, ο Ιεχωβά ντινάς-αμέν μπουτ σουκάρ εκπλήξεις ντα ευλογίες σο να νακχένας αμαρέ γκοντιάταρ. Κερντάς ατζέ-ντα τι νικιόλ μπαγιά οντουβά σο μανγκάβας, τι κεράβ ταξίδια αεροπλανόσαρ. Κερντάμ ταξίδια αεροπλανόσαρ πο μπουτ τθεμέντε ατζέ-ντα οντουλένταρ σο μανγκάβας τι κεράβ χουρντιαρέλα μπερί, καζόμ τζάβας κο γραφεία τμήματος σαρό κο ντουνιάς. Ισινόμ πφερντό εκτίμηση σο η Λέσλι ισί πάντα έτοιμη τι στηρίνελ-μαν σαρέ ανταλέ διορισμόντε.

Ανάσα συνέχεια αμαρέ γκοντιάτε κάσκε κεράσα-λες ανταβά ντα σόσκε. Ο ευλογίες σο τθεράσα αντιβές σικαβένα καζόμ σουκάρ κα αβέλ αμαρί ζωή κο νεβό ντουνιάς, σο ο Ιεχωβά κα “πουτρέλ πο βας ντα κα τσαλιαρέλ ι επιθυμία σαρέ οντουλένγκι σο τζουβντιόνα”.​—Ψαλμ. 145:16.