1, 2. Σαρ ο Λωτ, καγιά δυσκολία τθερένα ο Χριστιανοί αντιβές;

 ΚΑΝΑ ντικχάσα ο μπίλατζανε πράγματα σο κερένα ο τζενέ, νιωθίνασα σαρ ο δίκαιος Λωτ. Βοβ “στεναχωρίντιβελας μπουτ κατά μπίλατζανε πράγματα ι τζενένγκε σο να κερένας ο νόμος”, σόσκε τζανέλας ότι αμαρό Ντατ σο ισί κο ουρανός μισίνελα ο γκεραλέ πράγματα. (2 Πέτρ. 2:7, 8) Επειδή ο Λωτ νταρέλας κατά Ντεβέλ ντα μανγκέλας-λες, τζουνγκάλας κατά μπίλατζανε πράγματα σο κερένας ο τζενέ ντονταλάι λέσταρ. Αντιβές-ντα, ντονταλάι αμένταρ ισί τζενέ σο τθερένα χάνικ ή ιτς σεβασμός για το πάκι νόμοι ι Ιεχωβάσκε. Αμέν όμως, μπορίνασα τι ατσσάς πάκι άμα ατσσικιαράσα αμαρί αγάπη ι Ντεβλέσκε ντα άμα σικλιάσα τι τθεράς ι σωστή νταρ ι Ντεβλέσκε.​—Παρ. 14:2.

² Οντουλέσκε, ο Ιεχωβά βοηθίνελα-αμέν τι κεράς-λες ανταβά αντράλ κατά ενθάρρυνση σο λάσα κατά βιβλίος Παροιμίες. Σαρέ ο Χριστιανοί, μουρσά ντα τζουβλιά, τερνέ ντα πφουρέ, μπορίνενα τι βοηθίντιβεν μπουτ καζόμ κα ντικχέν ο γκοντιαβέρ συμβουλές σο ισί οτθέ.

3. Καβά ισί εκ λόγος σο χρειαζίντιβελα τι αρακχαβάς αμαρό γκι, σαρ βακερέλα ο εδάφιος Παροιμίες 17:​3; (Ντικχέν ι φωτογραφία-ντα)

³ Εκ σημαντικός λόγος για τι αρακχαβάς αμαρό γκι ισί ότι ο Ιεχωβά ρόντελα αντρέ αμαρέ γκίστε. Ανταβά μανγκέλα τι βακερέλ ότι ντικχέλα πο μπουτ οντουλένταρ σο μπορίνενα τι ντικχέν ο γιαβερά, ντα τζανέλα σο τζενέ ισινάμ μπαγιά αντρ’ αμέντε. (Διαβάνεν Παροιμίες 17:3) Ο Ιεχωβά κα νιωθίνελ αμένγκε αγάπη άμα συνεχίνασα τι σκεφτίνας λέσκε συμβουλές, σο βοηθίνενα-αμέν τι τζουβντιάς για πάντα. (Ιωάν. 4:​14) Αντικάς, να κα μουκχάς ο δηλητήριος ι λουμνικανέ πραγματένγκο ντα ι ψεματένγκο, σο αβέλα κατά Μπενγκ ντα λέσκε ντουνιάσταρ, τι ασταρέλ τθαν αντρ’ αμέντε. (1 Ιωάν. 5:​18, 19) Καζόμ αβάσα πο λατσσέ αμαλά ι  Ιεχωβάσαρ, αμαρί αγάπη ντα αμαρό σεβασμός λέσκε κα μπαριόν. Επειδή να μανγκάσα τι πφανγκάς ο γκι αμαρέ Νταντέσκο, κα μισίνας ατζέ-ντα ι σκέψη τι αμαρτίνας. Κάνα τζάσα κο πειρασμός τι κεράς κάτι γκεραλό, κα σκεφτίνας: “Σαρ κα μπορίναβας τι πφανγκάβ επίτηδες ο γκι Οντουλέσκο σο μανγκέλα-μαν αζόμ μπουτ;”​—1 Ιωάν. 4:9, 10.

4. Σαρ αρακχαντάς η νταρ κατά Ιεχωβά εκχέ πφενιά για μα τι περέλ κο πειρασμός;

⁴ Η Μάρτα, εκ πφεν κι Κροατία σο γκιλί κο πειρασμός τι κερέλ λουμνιπέ, βακερντάς: «Ισινέ μάνγκε δύσκολος τι σκεφτίναβ καθαρά ντα τι ατσσικιαράβ μο νεαυτός σο τσσίντελας-μαν κι αμαρτία, αλλά η νταρ κατά Ιεχωβά αρακχαντάς-μαν». b Σαρ; Η Μάρτα βακερντάς ότι σκεφτίνελας λατσσές ο μπέτι πράγματα σο κα αβένας άμα κα κερέλας κάτι λουμνικανό. Μπορίνασα αμέν-ντα τι κεράς-λες ανταβά. Ο πο μπέτι πράγμας σο κα ανέλ αμένγκε η αμαρτία ισί ότι κα πφανγκάς ο γκι ι Ιεχωβάσκο ντα κα χασαράς ι ευκαιρία τι υπηρετίνας-λες για πάντα.​—Γέν. 6:5, 6.

5. Σο σικλιόνα κατά Λεό;

⁵ Κάνα νταράσα κατά Ιεχωβά, προσοχίνασα μα τι αβάς αμαλά οντουλέντζαρ σο κερένα γκεραλέ πράγματα. Ο Λεό, σο τζουβντιόλα κο Κονγκό, σικλιλό-λες λατσσές ανταβά. Σταρ μπρεσά σοράν πι μπολντιμάσταρ, μπλεξάλο μπέτι παρεέντζαρ. Αμντίνελας ότι, άμα βοβ να κα κερέλας κάτι γκεραλό, να αμαρτίνελας κόντρα κο Ιεχωβά. Χάνικ πο σοράν όμως, λέσκε μπέτι παρέες κερντέ-λες τι ματιόλ ντα τι κερέλ λουμνικανέ πράγματα. Αζομάν αρχισάλο τι ανέλ πι γκοντιάτε οντουλά σο σικλιαρντάας-λες λέσκο ντατ ντα λέσκι ντάι, σο ισινέ Μάρτυρες, ντα καζόμ ευτυχισμέ ισινέ κάνα υπηρετίνελας ι Ιεχωβάς. Καβά ισινέ ο αποτέλεσμας; Ο Λεό αγαντάς-πες. Μανγκλάς βοήθεια κατά πρεσβύτεροι ντα βουρτισάλο κο Ιεχωβά. Αντιβές, υπηρετίνελα χαράσαρ σαρ πρεσβύτερος ντα ειδικός σκαπανέας.

6. Καλέ ντουέ συμβολικέ τζουβλίνγκε κα κεράς λάφι ακανά;

 ⁶ Ακανά, κα ντικχάς ο κεφάλαιος 9 κατά Παροιμίες, σο βακερέλα ντουέ τζουβλίνγκε. Η εκ τανί μανγκέλα τι σικαβέλ ι σοφία ντα η γιαβέρ ο ντινιλιπέ. (Ντικχέν Ρωμαίους 5:​14· Γαλάτες 4:​24) Καζόμ κεράσα-λες ανταβά, ντεν-τουμέν γκοντί ότι ο ντουνιάς ι Μπενγκέσκο ισί κολλημέ κο σεξ ντα κι πορνογραφία. (Εφεσ. 4:​19) Οτθάρ ισί σημαντικός τι συνεχίνας τι νταράς κατά Ντεβέλ ντα τι ατσσάς ντουρ κατά μπέτι πράγματα. (Παρ. 16:6) Οντουλέσκε, σαρέ αμέν, μουρσά ντα τζουβλιά, μπορίνασα τι βοηθίντιβας ανταλέ κεφαλαιόσταρ. Η κάθε εκ ανταλέ τζουβλίνταρ ντέλα εκ πρόσκληση οντουλέντε σο να τζανένα μπουτ πράγματα​—«οντουλέντε σο νανέ γκοντιαβέρ». Η κάθε εκ ισί σαρ τι βακερέλα: “Ελάν μι κχερέστε τι χαν”. (Παρ. 9:1, 5, 6, 13, 16, 17) Όμως ο αποτελέσματα σο τθερέλα η κάθε εκ πρόσκληση ισί μπουτ διαφορετικά.

7. Κατέ γκερέλα εκ κατά προσκλήσεις, σαρ βακερένα ο εδάφια Παροιμίες 9:​13-18; (Ντικχέν ι φωτογραφία-ντα)

⁷ Ντικχέν ι πρόσκληση σο ντέλα «η τζουβέλ σο να τθερέλα γκοντί». (Διαβάνεν Παροιμίες 9:​13-18) Βόι ντέλα βίκος, χωρίς τι λατζάλ, οντουλέν σο νανέ γκοντιαβέρ: “Ελάν ακατέ” τι χαν. Καβά ισί ο αποτέλεσμας; «Οτθέ ισί οντουλά σο ισί μπίζουρανε ανγκλάλ κο μεριπέ». Μπέκιμ ντένα-τουμέν γκοντί γιαβερά-ντα λάφια κατά πρώτα οχτώ κεφάλαια κο Παροιμίες, σο μανγκένα τι σικαβέν κάτι γιαβέρ. Λάσα ι προειδοποίηση τι αρακχαβάς-αμέν κατά «τζουβέλ σο νασλί κατά σωστός ντρομ» ντα κατά “λουμνί τζουβέλ”. Βακέρντιβελα αμένγκε: «Λάκο κχερ βουλιάνελα κο μεριπέ». (Παρ. 2:​11-19) Ο εδάφια Παροιμίες 5:​3-10 βακερένα αμένγκε τι αρακχαβάς-αμέν εκχέ γιαβερέ τζουβλιάταρ σο νασλί κατά σωστός ντρομ ντα «λάκε πιντρέ γουλίνα κο μεριπέ».

8. Καγιά απόφαση μπέκιμ τι χρειαζίντιβελ τι λας;

⁸ Οντουλά σο ασουνένα “ι τζουβλιά σο να τθερέλα γκοντί” πρέπει τι λεν εκ απόφαση: Κα δεχτίνεν λάκι πρόσκληση ή όχι; Μπέκιμ τι χρειαζίντιβελ αμέν-ντα τι λας εκ ασακί απόφαση. Σο κα κεράς άμα κάποιος κα βακερέλ αμένγκε τι κεράς κάτι λουμνικανό; Ή σο κα κεράς άμα κα ντικχάς ξαφνικά φωτογραφίες σο τθερένα πορνογραφία;

9, 10. Καλά ισί μερικοί λόγοι σο πρέπει τι ατσσάς ντουρ κατά λουμνικανέ πράγματα;

⁹ Τθεράσα σημαντικούς λόγους για τι ατσσάς ντουρ κατά λουμνικανέ πράγματα. Η «τζουβέλ σο να τθερέλα γκοντί» βακερέλα: «Ο τσορντικανό πανί ισί γκουλντό». Σο ισί «ο τσορντικανό πανί»; Η Γραφή βακερέλα ότι ο σεξουαλικές σχέσεις σο τθερέλα εκ αντρόγυνος ισί σαρ ο πανί σο ανέλα δροσιά. (Παρ. 5:​15-18) Εκ μουρς ντα εκ τζουβέλ σο ισί παντριμέ νόμιμα μπορίνενα τι απολαμβάνεν ο σωστές σεξουαλικές πράξεις ο εκ ι γιαβερέσαρ. «Ο τσορντικανό πανί» όμως ισί  κάτι γιαβέρ. Ανταβά λάφι μπέκιμ μανγκέλα τι σικαβέλ ο σεξουαλικές πράξεις σο ισί απαγορευμέ ντα μπίλατζανε. Ανταλά πράγματα συνήθως αβένα-πες αποτσοράλ, σαρ εκ τσορ συνήθως τσορέλα αποτσοράλ. «Ο τσορντικανό πανί» μπέκιμ ντικχίντιβελα μπουτ γκουλντό, ντα ειδικά άμα κάποιος αμντίνελα ότι καέκ να κα αγαβέλ ο λουμνικανέ πράγματα σο κερέλα. Όμως, χουχαβέλα πο νεαυτός σόσκε ο Ιεχωβά ντικχέλα σαρέ ο πράγματα. Ο πο “κερκό” ντα ο πο μπέτι πράγμας σο μπορεί τι αβέλ-πες αμένγκε ισί τι χασαράς ι ευλογία ι Ιεχωβάσκι, κάτι σο νανέ ιτς “γκουλντό”. (1 Κορ. 6:9, 10) Αλλά υπαρχίντιβενα γιαβερά-ντα μπέτι αποτελέσματα.

¹⁰ Ο λουμνιπέ μπορεί τι ανέλ εκχέ τζενέσκε λατζ, τι κερέλ-λες τι νιωθίνελ άχρηστος, τι κερέλ εκχέ τζουβλιά τι ατσσόλ κχαμνί χωρίς τι μανγκέλ-λες, ντα τι χαλαβέλ φαμιλιά. Σίγουρα, ισί γκοντιαβέρ τι νασάς κατά «κχερ» ι τζουβλιάκο σο να τθερέλα γκοντί ντα λάκε χαμπέσταρ. Μπουτ τζενέ σο κερένα λουμνιπέ, να χασαρένα σάντε πουμαρί φιλία ι Ιεχωβάσαρ, αλλά πφερντιόνα νασφαλίματα-ντα σο μπορεί τι γκερέν-λεν κο μεριπέ. (Παρ. 7:​23, 26) Κο κεφάλαιος 9, ο εδάφιος 18 τελειώνελα ακαλέ λαφίντζαρ: «Λάκε μισαφίρια ισί ντιπ τελέ κο Μεζάρι». Άμα ισί αντικάς, σόσκε μπουτ τζενέ δεχτίνενα λάκι πρόσκληση αφού κερέλα λένγκε μπαρό ζιάνι;​—Παρ. 9:​13-18.

11. Σόσκε κερέλα μπαρό ζιάνι τι ντικχάς πορνογραφία;

¹¹ Εκ συνηθισμέ παγίδα ισί η πορνογραφία. Μερικά τζενέ αμντίνενα ότι να κα κερέλ λένγκε ζιάνι άμα ντικχένα πορνογραφία. Ισί μπαγιά όμως ότι η πορνογραφία κερέλα ζιάνι, ισί μπουτ τζουνγκαλί ντα ισί δύσκολος κάποιος τι τσσιναβέλ λάταρ. Ο τζενέ σο ντικχένα λουμνικανέ φωτογραφίες ισί δύσκολος τι μπιστρέν-λεν, ντα ατσσόνα λένγκε γκοντιάτε. Επίσης, η πορνογραφία να μουνταρέλα ο μπέτι πράγματα σο μανγκάσα, αλλά μπαριαρέλα-λεν. (Κολ. 3:5· Ιακ. 1:​14, 15) Ισί μπαγιά ότι μπουτ τζενέ σο ντικχένα πορνογραφία τελικά κερένα λουμνιπέ.

12. Σαρ σικαβάσα ότι νασάσα ντουρ κατά φωτογραφίες σο κερένα-αμέν τι σκεφτίνας λουμνικανέ πράγματα;

¹² Σαρ Χριστιανοί, σο πρέπει τι κεράς άμα αμαρό κινητός ή τάμπλετ νικαβέλα αμένγκε εκ λουμνικανί φωτογραφία; Πρέπει τι τσσιναβάς αμέσως τι ντικχάς-λα. Κα αβέλ αμένγκε πο εύκολος τι κεράς-λες ανταβά άμα κα τθεράς αμαρέ γκοντιάτε ότι ο πο σημαντικός πράγμας σο τθεράσα ισί αμαρί φιλία ι Ιεχωβάσαρ. Ατζέ-ντα φωτογραφίες σο ο πο μπουτ τζενέ αμντίνενα ότι νανέ λουμνικανέ μπορίνενα τι κερέν εκχέ τζενές τι σκεφτίνελ λουμνικανέ πράγματα. Σόσκε πρέπει τι νασάς λένταρ; Επειδή να μανγκάσα τι κεράς ούτε εκ χουρντό βήμας σο κα γκερέλ-αμέν κο λουμνιπέ αντρέ αμαρέ γκίστε. (Ματθ. 5:​28, 29) Εκ πρεσβύτερος κι Ταϊλάνδη, ο Ντέιβιντ, βακερέλα: «Σκεφτίναβα: “Παρόλο σο ο φωτογραφίες νανέ λουμνικανέ, κα κεράβ ι Ιεχωβάσκο γκι άμα κα συνεχίναβ τι ντικχάβ-λεν;” Ανταγιά σκέψη βοηθίνελα-μαν τι κεράβ πράγματα γκοντιάσαρ».

13. Σο κα βοηθίνελ-αμέν τι κεράς πράγματα γκοντιάσαρ;

¹³ Άμα τθεράσα ι σωστή νταρ κατά Ιεχωβά για μα τι στεναχωρίνας-λες, ανταβά κα βοηθίνελ-αμέν τι κεράς πράγματα γκοντιάσαρ. “Για τι αρχίνας τι τθεράς σοφία”, πρέπει τι νταράς κατά Ιεχωβά. Ανταβά ισί ο θεμέλιος της σοφίας. (Παρ. 9:​10) Ντικχάσα-λες ανταβά κο πρώτα λάφια σο ισί κο κεφάλαιος 9 κο Παροιμίες, σο διαβάνασα ι γιαβερέ συμβολικέ τζουβλιάκε, σο ισί «η αληθινή σοφία».

14. Καγιά διαφορετική πρόσκληση διαβάνασα κο Παροιμίες 9:​1-6;

¹⁴ Διαβάνεν Παροιμίες 9:​1-6. Ατθέ ντικχάσα εκ πρόσκληση κατά Ιεχωβά, σο ισί Οντουβά σο κερντάς-αμέν ντα Λέσταρ αβέλα σαρί η σοφία. (Παρ. 2:6· Ρωμ. 16:​27) Ακατέ διαβάνασα εκχέ μπαρέ κχερέσκε σο τθερέλα εφτά κολόνες. Ανταβά σικαβέλα μπουτ λατσσές ότι ο Ιεχωβά ντέλα αντράλ πι γκίσταρ ντα δεχτίνελα  λατσσιμάσαρ σαρέ οντουλέν σο μανγκένα τι σικλιόν λέσκε ντα τι αβέν γκοντιαβέρ.

15. Σο βακερέλα αμένγκε ο Ντεβέλ τι κεράς;

¹⁵ Ο παράδειγμας ι συμβολικέ τζουβλιάκο σο ισί κο Παροιμίες κεφάλαιος 9, ντα μανγκέλα τι σικαβέλ ι «αληθινή σοφία», σικλιαρέλα-αμέν ότι ο Ιεχωβά ντέλα αντράλ πι γκίσταρ. Βακέρντιβελα ότι ανταγιά συμβολική τζουβέλ ετοιμαντάς λατσσές ο μας σο κα ντελ, ανακατουντάς πι μολ ντα στρωντάς ο τραπέζι πι κχερέστε. (Παρ. 9:2, υποσ.) Επίσης, σαρ βακερένα ο εδάφια 4 ντα 5: «Οντουλέσκε σο νανέ γκοντιαβέρ, βόι [η σοφία σο σικάντιβελα σαρ τζουβέλ] βακερέλα: “Ελάν, χαν μο μαντρό”». Σόσκε πρέπει τι τζας κο κχερ σο τθερέλα η αληθινή σοφία ντα τι χας ο χαμπέ σο ντέλα; Ο Ιεχωβά μανγκέλα λέσκε τσσαβέ τι αβέν γκοντιαβέρ ντα αρακχαντέ. Να μανγκέλα τι κεράς λάθη σο κα ανέν αμένγκε ντουκχ ντα τύψεις. Άκ’ σόσκε «ντέλα σοφία οντουλέντε σο ισί δίκαιοι». (Παρ. 2:7) Κάνα τθεράσα ι σωστή νταρ κατά Ιεχωβά, μανγκάσα τι κεράς λέσκο γκι. Ασουνάσα λέσκε γκοντιαβέρ συμβουλές ντα κεράσα-λεν χαράσαρ.​—Ιακ. 1:25.

16. Σαρ βοηθιντάς τον Αλέν η νταρ κατά Ντεβέλ τι λελ εκ γκοντιαβέρ απόφαση, ντα καβά ισινέ ο αποτέλεσμας;

¹⁶ Η νταρ κατά Ντεβέλ βοηθιντάς ι πφραλές Αλέν, σο ισί πρεσβύτερος ντα δάσκαλος σε εκ σχολείος, τι λελ εκ γκοντιαβέρ απόφαση. Ο Αλέν βακερντάς: «Μπουτ τζενέ μι μπουτιάτε αμντίνενας ότι ο λουμνικανέ ταινίες ισινέ εκ τρόπος για τι σικλιόν για τη σεξουαλική αγωγή». Αλλά ο Αλέν να χουχάντιλο. «Επειδή νταράβας κατά Ντεβέλ», βακερντάς, «να μανγκλόμ ιτς τι ντικχάβ οντουλά σιναμάδες. Επίσης εξηγιντόμ κο τζενέ μι μπουτιάτε σόσκε να μανγκάβας τι κεράβ-λες ανταβά». Ο Αλέν κερντάς ι συμβουλή σο ντέλα «η αληθινή σοφία» τι “πφιρέλ κο ντρομ σο πφιρένα ο γκοντιαβέρ τζενέ”. (Παρ. 9:6) Μερικά τζενέ λέσκε μπουτιάταρ ατσσιλέ πουταρντέ μόσαρ, οτθάρ ακανά κερένα μελέτη ντα τζάνα κο συναθροίσεις.

17, 18. Καλά ευλογίες απολαμβάνενα οντουλά σο δεχτίνενα ι πρόσκληση κατά «αληθινή σοφία», ντα σο μπορίνενα τι μπεκλεντίνεν; (Ντικχέν ι φωτογραφία-ντα)

¹⁷ Ο Ιεχωβά χρησιμοποιήνελα ο παράδειγμας ανταλέ ντουέ συμβολικέ τζουβλίνγκο για τι σικαβέλ αμένγκε σαρ τι τθεράς εκ ευτυχισμέ μέλλον. Οντουλά σο δεχτίνενα ι πρόσκληση κατά τζουβέλ σο νανέ ιτς ήσυχη ντα «να τθερέλα γκοντί» μανγκένα τι απολαμβάνεν “γκουλντέ” πράγματα σο κερένα-λεν αποτσοράλ. Κι πραγματικότητα, τζουβντιόνα σάντε ανταλέ ντιβεσέσκε, ντα να σκεφτίνενα ο μέλλον. Οντουλά σο κερένα, κα γκερέν-λεν «ντιπ τελέ κο Μεζάρι».​—Παρ. 9:​13, 17, 18.

¹⁸ Καζόμ διαφορετικά ισί ο πράγματα ι τζενένγκε σο δεχτίνενα ι πρόσκληση της “αληθινής σοφίας”! Λάκε μισαφίρια απολαμβάνενα ακανά μπουτ χαμπίματα, σο ισί μπουτ λατσσές κερντέ ντα υγιεινά, εκ τραπέζι πφερντό λατσσέ  πνευματικέ χαμπιματέντζαρ. (Ησ. 65:​13) Αντράλ κατά προφήτης Ησαΐας, ο Ιεχωβά βακερέλα: «Ασουνέν-μαν προσεκτικά ντα χαν οντουβά σο ισί λατσσό, ντα κα αρακχέν μπαρί χαρά οντουλέστε σο ισί μπαγιά λατσσό χαμπέ». (Ησ. 55:1, 2) Σικλιάσα τι μανγκάς σο μανγκέλα ο Ιεχωβά ντα τι μισίνας σο μισίνελα. (Ψαλμ. 97:​10) Επίσης, αρακχάσα χαρά κάνα καλίνασα γιαβερέν τι βοηθίντιβεν κατά «αληθινή σοφία». Ισί σαρ τι “ντας βίκος κατά βουτσσέ τθανά σο ισί κι πόλη: «Κον να τζανέλα μπουτ πράγματα τι αβέλ ακατέ»”. Ο ευλογίες αμένγκε ντα οντουλένγκε σο μανγκένα τι ασουνέν να κα ατσσικιαρέν χάνικ. Ατσσόνα για πάντα, επειδή μουκχένα-αμέν τι “τζουβντιάς” για πάντα καζόμ “πφιράσα κο ντρομ σο πφιρένα ο γκοντιαβέρ τζενέ”.​—Παρ. 9:3, 4, 6.

19. Σο πρέπει τι αβάς αποφασισμέ τι κεράς, σαρ βακερένα ο εδάφια Εκκλησιαστής 12:​13, 14; (Ντικχέν ο πλαίσιος-ντα « Η Νταρ Κατά Ντεβέλ Βοηθίνελα-αμέν»)

¹⁹ Διαβάνεν Εκκλησιαστής 12:​13, 14. Μακάρι η νταρ κατά Ντεβέλ τι αρακχαβέλ αμαρό γκι ντα τι βοηθίνελ-αμέν τι αβάς πάκι κο πράγματα σο σκεφτίνασα ντα κεράσα, ντα τι αβάς πασέ λέστε ανταλέ τελευταίε ντιβεσέντε. Ανταγιά σωστή νταρ τσσίντελα-αμέν τι καλίνας καζόμ πο μπουτ τζενέν αβέλα-πες τι ρόντεν ι «αληθινή σοφία» ντα τι βοηθίντιβεν λάταρ.