1, 2. Σο πρέπει τι κεράς για τι τθεράς λατσσί φιλία ι Ιεχωβάσαρ, σαρ βακερέλα ο εδάφιος Ψαλμός 25:14;

 ΚΑΛΑ ιδιότητες πακιάνα ότι χρειαζίντιβενα για τι ατσσικιαρέν ζουρανί τουμαρί φιλία εκχέ τζενέσαρ; Μάλλον κα βακερένας ότι ο λατσσέ αμαλά πρέπει τι μανγκέν ντα τι στηρίνεν ο εκ ι γιαβερές. Να κα σκεφτίνενας ότι η νταρ ισί εκ σημαντική ιδιότητα για τι τθερέν εκ λατσσί φιλία. Όμως, σαρ βακερέλα ο εδάφιος ανταλέ μαθημάσκο, οντουλά σο μανγκένα τι τθερέν λατσσί φιλία ι Ιεχωβάσαρ πρέπει τι “νταρέν λέσταρ”.​—Διαβάνεν Ψαλμός 25:14.

² Καζόμ μπρεσά-ντα τι υπηρετίνας ι Ιεχωβάς, σαρέ χρειαζίντιβελα τι τθεράς ι σωστή νταρ λέσταρ. Αλλά σο μανγκέλα τι βακερέλ τι νταράς κατά Ντεβέλ; Σαρ μπορίνασα τι σικλιάς τι νταράς κατά Ιεχωβά; Ντα σο σικλιάσα κατά Αβδιού, σο ισινέ υπεύθυνος κο κχερ του Αχαάβ, κατά αρχιερέας Ιωδαέ ντα κατά βασιλιάς Ιωάς, για την νταρ κατά Ντεβέλ;

3. Βακερέν σαρ μπορίνελα τι αρακχαβέλ-αμέν η νταρ.

³ Μπορεί τι νταράς άμα κα αγαβάς ότι υπαρχίντιβελα κίνδυνος τι παθίνας κάτι κακός. Ανταγιά νταρ μπορεί τι αβέλ λατσσί ντα τι τσσίντελ-αμέν τι λας γκοντιαβέρ αποφάσεις. Η νταρ μα τι περάς κα κερέλ-αμέν μα τι πφιράς μπουτ πασέ κο γκρεμός. Η νταρ μα τι ντας-αμέν μπέκιμ τι τσσίντελ-αμέν τι νασάς σουγκό εκχέ πραγμάσταρ σο ισί επικίνδυνος. Η νταρ μα τι χαλαβάς ι φιλία σο τθεράσα εκχέ τζενέσαρ σο μανγκάσα κα τσσιναβέλ-αμέν μα τι βακεράς ή τι κεράς κάτι μπέτι.

4. Καγιά νταρ μανγκέλα τι τθεράς ο Μπενγκ κατά Ιεχωβά;

⁴ Ο Μπενγκ μανγκέλα ο τζενέ τι ιζράν κατά νταρ σο τθερένα κατά Ιεχωβά. Μανγκέλα τι πακιάς οντουβά σο πακιάλας ο Ελιφάς-ντα​—ότι ο Ιεχωβά ισί εκ Ντεβέλ σο λέλα εκδίκηση, σο χολιάνελα μπουτ ντα καέκ να αβέλα-πες τι κερέλ λέσκο γκι. (Ιώβ 4:​18, 19) Ο Μπενγκ μανγκέλα τι τθεράς ανταγιά νταρ κατά Ιεχωβά  για τι τσσιναβάς τι υπηρετίνας-Λες. Για μα τι περάς ανταλέ παγιδάτε, χρειαζίντιβελα τι μπαριαράς ι σωστή νταρ κατά Ντεβέλ.

5. Σο μανγκέλα τι βακερέλ τι νταράς κατά Ντεβέλ;

⁵ Ο τζενό σο τθερέλα ι σωστή νταρ κατά Ντεβέλ μανγκέλα-λες ντα να μανγκέλα τι κερέλ τίποτα σο κα κερέλας ζιάνι κι φιλία σο τθερέλα λέσαρ. Ο Ιησούς τθερέλας ασακί “νταρ κατά Ντεβέλ”. (Εβρ. 5:7) Να ιζράλας κατά νταρ σο τθερέλας κατά Ιεχωβά. (Ησ. 11:2, 3) Οκιά μπάνταρ, τθερέλας μπαρί αγάπη λέσκε ντα μανγκέλας τι ντελ-λες καν. (Ιωάν. 14:​21, 31) Σαρ ο Ιησούς, αντικάς αμέν-ντα, κάνα ντικχάσα ι αγάπη, ι σοφία, ι δικαιοσύνη ντα ι ζορ ι Ιεχωβάσκι, ανταβά κερέλα-αμέν τι σαστίνας ντα τι σεβάνας-Λες μπουτ. Τζανάσα επίσης ότι ο Ιεχωβά μανγκέλα-αμέν μπουτ ντα επηρεάντιβελα οντουλένταρ σο κεράσα κάνα σικλιαρέλα-αμέν. Μπορίνασα είτε τι ανάς ντουκχ κο Ιεχωβά είτε τι κεράς λέσκο γκι τι χαιρίνελ.​—Ψαλμ. 78:​41· Παρ. 27:11.

6. Καβά ισί εκ τρόπος για τι σικλιάς τι νταράς κατά Ντεβέλ; (Ψαλμός 34:11)

⁶ Κάνα μπιάντιβασα, να τθεράσα νταρ κατά Ιεχωβά. Πρέπει τι σικλιάς τι τθεράς-λα. (Διαβάνεν Ψαλμός 34:​11) Εκ τρόπος για τι κεράς-λες ανταβά ισί τι ντικχάς προσεκτικά ι δημιουργία. Καζόμ πο μπουτ ντικχάσα ι σοφία, ι ζορ ντα ι μπαρί αγάπη σο τθερέλα ο Ντεβέλ αμένγκε «οντουλένταρ σο κερντάς», αζόμ πο μπουτ κα σεβάνας-λες ντα κα μανγκάς-λες. (Ρωμ. 1:​20) Εκ πφεν, η Έιντριεν, βακερντάς: «Η σοφία ι Ιεχωβάσκι, σαρ ντικχίντιβελα κι δημιουργία, μουκχέλα-μαν πουταρντέ μόσαρ ντα βοηθίνελα-μαν τι αγαβάβ ότι βοβ τζανέλα καβά ισί ο πο λατσσό μάνγκε». Επειδή σκεφτίνελας λατσσές ανταβά, βακερντάς: «Σόσκε τι μανγκάβ τι κεράβ εκ πράγμας σο κα αβέλας εμπόδιος κι φιλία σο τθεράβα ι Ιεχωβάσαρ, σο ντινάς-μαν μι ζωή;» Μπορίνενα τι ντεν χάνικ σαάτι ανταγιά εβδομάδα για τι σκεφτίνεν λατσσές εκ πράγμας κατά δημιουργία; Ανταβά κα μπαριαρέλ τουμαρό σεβασμός ντα τουμαρί αγάπη ι Ιεχωβάσκε.​—Ψαλμ. 111:2, 3.

7. Σαρ βοηθίνελα-αμέν η προσευχή τι τθεράς ι σωστή νταρ κατά Ιεχωβά;

⁷ Εκχέ γιαβερέ τροπόσαρ σο μπαριαράσα αμαρί νταρ κατά Ντεβέλ, ισί κάνα προσευχίντιβασα συνέχεια. Καζόμ πο μπουτ προσευχίντιβασα, αζόμ πο πραγματικός αβέλα ο Ιεχωβά αμένγκε. Κάθε φαρ σο μανγκάσα λέσταρ ζορ για τι νταϊντίνας εκ δοκιμασία, ντάσα-αμέν γκοντί καζόμ ζουρανό ισί. Κάνα βακεράσα λέσκε ευχαριστώ σο ντινάς αμένγκε πι Τσσαβές σαρ δώρος, ντάσα-αμέν γκοντί καζόμ μπουτ μανγκέλα-αμέν ο Ιεχωβά. Ντα κάνα τθεράσα εκ πρόβλημας ντα μολίνασα ι Ιεχωβάς τι βοηθίνελ-αμέν, αβάσα ατζέ πο σίγουροι ότι ισί μπουτ γκοντιαβέρ. Ασακέ προσευχές μπαριαρένα αμαρό σεβασμός ι Ιεχωβάσκε. Επίσης, κερένα-αμέν ατζέ πο αποφασισμέ μα τι κεράς κάτι σο κα χαλαβέλας αμαρί φιλία λέσαρ.

8. Σαρ μπορίνασα τι ατσσικιαράς αμαρί νταρ κατά Ντεβέλ;

⁸ Μπορίνασα τι ατσσικιαράς αμαρί νταρ κατά Ντεβέλ κάνα σικλιαράσα-αμέν κατά Γραφή ντα τθεράσα αμαρέ γκοντιάτε τι σικλιάς εμ κατά λατσσέ εμ κατά γκεραλέ παραδείγματα σο τθερέλα. Κα κεράς λάφι ντουέ πιστέ τζενένγκε σο υπηρετίνενας ι Ιεχωβάς​—για τον Αβδιού, σο ισινέ υπεύθυνος κο κχερ του Αχαάβ, ντα για τον Ιωδαέ, σο ισινέ αρχιερέας. Σοράν, κα ντικχάς σο σικλιάσα κατά Ιωάς, σο ισινέ βασιλιάς κο Ιούδας. Ο Ιωάς κι αρχή τζάλας-λεν λατσσές αλλά πο σοράν νασλό κατά Ιεχωβά.

9. Σαρ βοηθίνελας τον Αβδιού η νταρ μα τι στεναχωρίνελ ι Ιεχωβάς; (1 Βασιλέων 18:3, 12)

⁹ Η πρώτη φαρ σο η Γραφή κερέλα αμένγκε λάφι για τον Αβδιού b βακερέλα: «Ο Αβδιού  νταρέλας μπουτ κατά Ιεχωβά». (Διαβάνεν 1 Βασιλέων 18:3, 12) Σαρ βοηθίνελας τον Αβδιού η σωστή νταρ κατά Ιεχωβά; Ανταγιά νταρ κερέλας-λες τι αβέλ τίμιος ντα μπεσαλής. Οτθάρ, ο βασιλιάς τσσουντάς-λες υπεύθυνος πι κχερέστε. (Ντικχέν Νεεμίας 7:2) Η νταρ σο τθερέλας ο Αβδιού κατά Ντεβέλ ντέλας-λες επίσης μπαρό θάρρος, εκ ιδιότητα σο σίγουρα χρειαζίντιβελας. Τζουβντιόλας αζομάν σο κερέλας κουμάντος ο πφιρνό βασιλιάς Αχαάβ, σο «ισινέ ο πο γκεραλό τζενό κο γιακχά κι Ιεχωβάσκε σαρέ κατά [βασιλιάδες] σο τζουβντιλέ πο τζανγκλέ λέσταρ». (1 Βασ. 16:​30) Επίσης, η ρομνί του Αχαάβ, η Ιεζάβελ, σο ντέλας λατρεία κο Βάαλ, μισίνελας ι Ιεχωβάς αζόμ μπουτ σο προσπαθίνελας τι νασκιαρέλ ντιπ ι αληθινή λατρεία σαρό κατά βόρειος βασίλειος. Μουνταρντάς ατζέ-ντα μπουτέ προφητέν ι Ντεβλέσκε. (1 Βασ. 18:4) Σίγουρα, ο Αβδιού ντέλας λατρεία ι Ιεχωβάς εκχέ δύσκολε βακιτίστε.

10. Σαρ σικαντάς ο Αβδιού μπαρό θάρρος;

¹⁰ Σαρ σικαντάς ο Αβδιού μπαρό θάρρος; Κάνα η Ιεζάβελ αρχισάλι τι κουλαντίνελ ι Ντεβλέσκε προφητέν για τι μουνταρέλ-λεν, ο Αβδιού λιντάς 100 ανταλένταρ ντα γκεραντάς “ι 50 εκχέ σπηλιάτε ντα ι γιαβερέ 50 εκχέ γιαβερέ σπηλιάτε ντα ντέλας-λεν μαντρό ντα πανί”. (1 Βασ. 18:​13, 14) Άμα κα αρακχένας τον Αβδιού, σο σικαντάς μπαρό θάρρος, σίγουρα κα μουνταρένας-λες. Βέβαια, ο Αβδιού ισινέ τζενό ντα να μανγκέλας τι μερέλ. Αλλά μανγκέλας ι Ιεχωβάς ντα οντουλέν σο υπηρετίνενας-Λες πο μπουτ πι ζωγιάταρ-ντα.

11. Σαρ μοιάζενα ο υπηρέτες ι Ιεχωβάσκε αντιβές με τον Αβδιού; (Ντικχέν ι φωτογραφία-ντα)

¹¹ Αντιβές, μπουτ υπηρέτες ι Ιεχωβάσκε τζουβντιόνα τθεμέντε σο η κυβέρνηση τσσιναντάς αμαρό έργος. Σαρ ο Αβδιού, ανταλά αγαπητά πφραλά ντα πφενιά να τσσιναβένα τι ντεν λατρεία ι Ιεχωβάς, παρόλο σο συνεχίνενα τι σεβάνεν οντουλέν σο τθερένα μπαρέ θέσεις κο ντουνιάς. (Ματθ. 22:​21) Σικαβένα πουμαρί νταρ κο Ντεβέλ κάνα ντένα καν πρώτα κο Ντεβέλ, ντα όχι κο τζενέ. (Πράξ. 5:​29) Κερένα-λες ανταβά κάνα συνεχίνενα τι βακερέν ο λατσσέ αμπέρια ντα κερένα συναθροίσεις χωρίς τι ταρτίνεν ι προσοχή. (Ματθ. 10:​16, 28) Προσπαθίνενα τι αβέν σίγουροι ότι λένγκε πφραλά ντα λένγκε πφενιά κα λεν ο πνευματικός χαμπέ σο τθερένα-λες μπαρί ανάγκη. Ντικχέν σο αβιλό-πες κο Ανρί, σο τζουβντιόλα εκχέ τθεμέστε κι Αφρική, σο η κυβέρνηση τσσιναντάας αμαρό έργος. Κάνα αμαρό  έργος ισινέ απαγορευμέ, ο Ανρί βακερντάς ότι κα γκερέλας βοβ ο πνευματικός χαμπέ πι πφραλέντε ντα πι πφενίντε. Ο Ανρί γραφιντάς: «Σαρ τζενό, ισινόμ λατζανό. Οτθάρ, ισινόμ σίγουρος ότι ο μπαρό σεβασμός ι Ιεχωβάσκε ντινάς-μαν ο θάρρος σο χρειαζίντιβαβας». Μπορίνενα τι σκεφτίνεν τουμαρό νεαυτός τι σικαβέλ ασακό θάρρος; Κα σικαβέν ασακό θάρρος άμα μπαριαρένα ι σωστή νταρ κατά Ντεβέλ.

12. Σαρ σικαντάς ο αρχιερέας Ιωδαέ ντα η ρομνί λέσκι ότι τθερένας μπαρί αφοσίωση κο Ιεχωβά;

¹² Ο αρχιερέας Ιωδαέ νταρέλας κατά Ιεχωβά, ντα ανταγιά νταρ κερέλας-λες τι αβέλ αφοσιωμέ ντα τι ανέλ ι πάκι λατρεία. Ανταβά ντικχίντιλο ξεκάθαρα κάνα η τσσάι της Ιεζάβελ, η Γοθολία, αρχισάλι τι αβέλ βασίλισσα κο Ιούδας παράνομα. Ο λαός τθερέλας κάθε λόγος τι νταρέλ κατά Γοθολία. Ισινέ επικίνδυνη ντα μανγκέλας αζόμ μπουτ τι αβέλ βασίλισσα σο προσπαθιντάς τι μουνταρέλ σαρέ οντουλέν σο ισινέ τι αβέν βασιλιάδες​—πι ίδιε πι αγγονίν! (2 Χρον. 22:​10, 11) Εκ οντουλέ τσσαβένταρ, ο Ιωάς, τζουβντιλό επειδή σωντάς-λες η ρομνί του Ιωδαέ, η Ιωσαβέθ. Βόι ντα λάκο ρομ γκεραντέ ι τσσαβές ντα φροντίνενας-λες. Αντικάς, ο Ιωδαέ ντα η Ιωσαβέθ κερντέ σο νακχέλας λένγκε βαστέσταρ για τι συνεχίνεν τι υπαρχίντιβεν βασιλιάδες σο κα αστάρντιβενας κατά Δαβίδ. Ο Ιωδαέ ισινέ αφοσιωμέ κο Ιεχωβά ντα να νταρέλας κατά Γοθολία.​—Παρ. 29:25.

13. Κάνα ο Ιωάς ισινέ εφτά μπρεσένγκο, σαρ σικαντάς πάλι αφοσίωση ο Ιωδαέ κο Ιεχωβά;

¹³ Κάνα ο Ιωάς ισινέ εφτά μπρεσένγκο, ο Ιωδαέ σικαντάς πάλι καζόμ αφοσιωμέ ισινέ κο Ιεχωβά. Κερντάς εκ σχέδιος. Άμα κα πετυχίνελας, ο Ιωάς κα αβέλας βασιλιάς, επειδή αστάρντιβελας κατά Δαβίδ ντα αξίνελας-λες. Άμα όμως ο σχέδιος να κα πετυχίνελας, ισινέ σχεδόν σίγουρος ότι ο Ιωδαέ κα μερέλας. Ι Ιεχωβάσκε ευλογιάσαρ, ο σχέδιος πετυχιντάς. Ο αρχηγοί ντα ο Λευίτες βοηθιντέ τον Ιωδαέ, ντα αντικάς ο Ιωδαέ κερντάς τον Ιωάς βασιλιάς ντα ντινάς εντολή τι μουνταρέν τη Γοθολία. (2 Χρον. 23:​1-5, 11, 12, 15· 24:1) Σοράν, ο Ιωδαέ «κερντάς συμφωνία ι Ιεχωβάσαρ, ι βασιλιάσαρ ντα ι λαόσαρ ότι κα συνεχίνενας τι αβέν λαός ι Ιεχωβάσκο». (2 Βασ. 11:​17) Ο Ιωδαέ «επίσης τσσουντάς ι τζενέν σο αρακχαβένας ο μπαρέ πόρτες ι Ιεχωβάσκε κχερέσκε για μα τι τζαλ αντρέ καέκ σο ισινέ μαγαριμέ».​—2 Χρον. 23:19.

14. Καλέ τροπόντζαρ δοξάντιλο ο Ιωδαέ επειδή ντινάας δόξα κο Ιεχωβά;

¹⁴ Μπουτ μπρεσά πο τζανγκλέ, ο Ιεχωβά βακερντάας: «Οντουλέν σο δοξάνενα-μαν κα δοξάναβ-λεν με-ντα». Ντα αντικάς αβιλό-πες. Ο Ιεχωβά ευλογιντάς τον Ιωδαέ. (1 Σαμ. 2:​30) Για παράδειγμας, κανονιντάς τι γραφίντιβεν ο σουκάρ πράγματα σο κερντάς ο αρχιερέας για τι μπορίνας τι σικλιάς λένταρ. (Ρωμ. 15:4) Ντα κάνα ο Ιωδαέ μουλό, τθερέλας ο μπαρό προνόμιος τι πραχούντιβελ «κι Πόλη κι Δαβιδίσκι γιεκ ι βασιλιαδέντζαρ, επειδή κερντάας ο λατσσιπέ κο Ισραήλ κο πράγματα σο τθερένας τι κερέν ι αληθινέ Ντεβλέσαρ ντα Λέσκε κχερέσαρ».​—2 Χρον. 24:​15, 16.

15. Σο μπορίνασα τι σικλιάς κατά ιστορία ι Γραφιάκι για τον Ιωδαέ; (Ντικχέν ι φωτογραφία-ντα)

¹⁵ Η ιστορία ι Γραφιάκι σο βακερέλα για τον Ιωδαέ μπορίνελα τι βοηθίνελ-αμέν σαριλέν τι μπαριαράς αμαρί νταρ κατά Ντεβέλ. Ο πρεσβύτεροι μπορίνενα τι μοιάζεν κο Ιωδαέ κάνα ατσσόνα τζανγκαντέ ντα αρακχαβένα πιστά ι Ντεβλέσκε μπρακέν. (Πράξ. 20:​28) Ο πφουρέ μπορίνενα τι σικλιόν κατά Ιωδαέ ότι, άμα νταρένα κατά Ιεχωβά ντα ατσσόνα αφοσιωμέ, βοβ μπορίνελα τι χρησιμοποιήνελ-λεν για τι κερέλ πο σκοπός. Να μουκχέλα-λεν κι νάκρη. Ο τερνέ μπορίνενα τι ντικχέν σο κερντάς ο Ιεχωβά με τον Ιωδαέ ντα τι μοιάζεν Λέστε κάνα συμπεριφερίντιβενα κο αφοσιωμέ πφουρέ με σεβασμός, ειδικά οντουλέντε σο υπηρετιντέ ι Ιεχωβάς μπουτ  μπρεσά. (Παρ. 16:​31) Τέλος, μπορίνασα σαρέ τι σικλιάς κατά αρχηγοί ντα κατά Λευίτες σο βοηθιντέ τον Ιωδαέ. Οτθάρ, τι βοηθίνας “οντουλέν σο οδηγίνενα-αμέν” ντα τι ντας-λεν καν.​—Εβρ. 13:17

16. Σο σικαβέλα ότι ο βασιλιάς Ιωάς να ισινέ ζουρανό πνευματικά;

¹⁶ Ο βασιλιάς Ιωάς βοηθίντιλο κατά λατσσό παράδειγμας του Ιωδαέ. (2 Βασ. 12:2) Οτθάρ, ο τερνό βασιλιάς μανγκέλας τι κερέλ ο γκι ι Ντεβλέσκο. Αλλά σοράν κατά μεριπέ του Ιωδαέ, ο Ιωάς ασουντάς ι αρχοντέν σο αβιλέας αποστάτες. Καβά ισινέ ο αποτέλεσμας; Βοβ ντα λέσκο λαός «αρχισάλε τι υπηρετίνεν ο ιερές στήλες ντα ο είδωλα». (2 Χρον. 24:4, 17, 18) Παρόλο σο ο Ιεχωβά ισινέ μπουτ πληγωμέ, «μπουτσσαβέλας προφητέν λέντε για τι ανέλ-λεν πασέ πέστε, . . . αλλά βον να μανγκένας τι ασουνέν-λεν». Να ασουντέ ούτε ι τσσαβές του Ιωδαέ, ι Ζαχαριάς, σο να ισινέ σάντε προφήτης ντα ιερέας, αλλά ξάδελφος του Ιωάς-ντα. Ο βασιλιάς Ιωάς ερεσλό ατζέ-ντα κο σημείος τι μουνταρέλ ι Ζαχαριάς ντα να σικαντάς ιτς εκτίμηση κι φαμιλί σο χρωστάνελας αζόμ μπουτ πράγματα λάκε.​—2 Χρον. 22:​11· 24:​19-22.

17. Σαρ γκιλέ ο πράγματα για τον Ιωάς;

¹⁷ Ο Ιωάς να ατσσικιαρντάς ι σωστή νταρ κατά Ιεχωβά, ντα ο πράγματα να γκιλέ λατσσές λέσκε. Ο Ιεχωβά βακερντάας: «Οντουλέν σο να ντένα-μαν αξία, ούτε με κα νταβ-λεν αξία». (1 Σαμ. 2:​30) Πο σοράν, εκ χουρντό συριακός στρατός νικιντάς ο μπουτ μπαρό στρατός του Ιωάς ντα μουκχλάς ι βασιλιάς σοβαρά ντινό. Κάνα ο Σύριοι νασλέ, ο ίδιε ο υπηρέτες λέσκε μουνταρντέ-λες επειδή βοβ μουνταρντάας ι  Ζαχαριάς. Οντουβά πφιρνό βασιλιάς να ισινέ ιτς άξιος τι πραχούντιβελ κο μεζάρια κι βασιλιαδένγκε.​—2 Χρον. 24:​23-25· Ματθ. 23:35.

18. Σο μπορίνασα τι κεράς για μα τι αβάς σαρ τον Ιωάς, σαρ βακερένα ο εδάφια Ιερεμίας 17:7, 8;

¹⁸ Σο σικλιάσα κατά παράδειγμας του Ιωάς; Βοβ ισινέ σαρ εκ δέντρος σο να τθερέλας μπαρέ ρίζες ντα έπρεπε τι στηρίντιβελ εκχέ καστέστε. Κάνα ασουντάς ι αποστατόν, σο ισινέ σαρ εκ ζουρανί μπαρμπάλ, σαρ τι βακεράας, ντα νασλό ο κας​—δηλαδή ο Ιωδαέ—​ο Ιωάς πελό τελέ. Ανταβά σικαβέλα ξεκάθαρα ότι δεν πρέπει τι νταράς κατά Ντεβέλ σάντε επειδή τθεράσα ντονταλάι αμένταρ λατσσέ παραδείγματα πφραλένταρ ντα πφενίνταρ ή αμαρέ φαμιλιάταρ. Για τι ατσσάς πνευματικά ζουρανέ, πρέπει τι μπαριαράς αμαρί αφοσίωση κο Ντεβέλ ντα αμαρί νταρ λέσκε. Ανταβά κεράσα-λες κάνα σικλιαράσα-αμέν κατά Γραφή, σκεφτίνασα λατσσές οντουλά σο διαβάνασα ντα κεράσα προσευχή.​—Διαβάνεν Ιερεμίας 17:7, 8· Κολ. 2:6, 7.

19. Σο μανγκέλα ο Ιεχωβά αμένταρ;

¹⁹ Ο Ιεχωβά να μανγκέλα μπουτ πράγματα αμένταρ. Ανταβά ντικχίντιβελα χάνικ λαφίντζαρ κο εδάφιος Εκκλησιαστής 12:​13, σο βακερέλα: «Τι νταρές κατά αληθινός Ντεβέλ ντα τι κερές ο εντολές λέσκε, σόσκε ανταγιά ισί σαρί η υποχρέωση ι τζενέσκι». Άμα νταράσα κατά Ντεβέλ, κα νταϊντίνας σο-ντα δοκιμασίες κα αβέν ανγκλ’ αμέντε ντα κα ατσσάς σταθεροί σαρ ο Αβδιού ντα ο Ιωδαέ. Τίποτα να κα μπορίνελ τι χαλαβέλ αμαρί φιλία ι Ιεχωβάσαρ.