1. Σο πρέπει τι κεράς για τι σώντιβας κατά ντιβές ι Ιεχωβάσκο;

 ΚΑΝΑ η Αγία Γραφή κερέλα λάφι “ι Ιεχωβάσκε ντιβεσέσκε”, βακερέλα ι βακιτίσκε σο ο Ιεχωβά κρίνελα πι ντουσμανίν ντα σώνελα πι λαός. Κο πουρανέ μπρεσά, ισινέ φαρ σο ο Ιεχωβά τιμωριντάς μερικά τθεμά. (Ησ. 13:1, 6· Ιεζ. 13:5· Σοφ. 1:8) Αμαρέ ντιβεσέντε, «ο ντιβές ι Ιεχωβάσκο» αρχίνελα κάνα ο αρχηγοί ι τθεμένγκε κερένα επίθεση κι Μπαρί Βαβυλώνα ντα μπιτίνελα με το τζένγκι σο βακέρντιβελα Αρμαγεδδώνας. Για τι σώντιβας οντουλέ “ντιβεσέσταρ”, χρειαζίντιβελα τι ετοιμάνας-αμέν από ακανά. Ο Ιησούς σικλιαρντάς ότι πρέπει, όχι σάντε τι ετοιμάνας-αμέν για την «μπαρί στεναχώρια», αλλά επίσης τι “αβάς συνέχεια έτοιμοι” ανταλέσκε.​—Ματθ. 24:​21· Λουκ. 12:40.

2. Σόσκε μπορίνασα τι βοηθίντιβας κατά Πρώτη Επιστολή κο Θεσσαλονικείς;

² Κι πρώτη επιστολή σο γραφιντάς κο Θεσσαλονικείς ι Ντεβλέσκε πνευμάσαρ, ο απόστολος Παύλος χρησιμοποιηντάς μερικά παραδείγματα για τι βοηθίνελ ι Χριστιανόν τι αβέν συνέχεια έτοιμοι ι μπαρέ ντιβεσέσκε σο κα κρίνελ ο Ιεχωβά. Ο Παύλος τζανέλας ότι ο ντιβές ι Ιεχωβάσκο να κα αβέλας αζομάν. (2 Θεσ. 2:​1-3) Όμως, βακερντάς ι πφραλένγκε τι ετοιμάνεν-πες οντουλέ ντιβεσέσκε σαρ τι αβέλας γιαβίν. Ανταγιά συμβουλή μπορίνασα τι κεράς-λα αμέν-ντα. Για τι ντικχάς ι εξήγηση σο ντινάς ακαλέ λαφίνγκε: (1) σαρ κα αβέλ ο ντιβές ι Ιεχωβάσκο, (2) κον να κα σώντιβεν οντουλέ ντιβεσέσταρ ντα (3) σαρ μπορίνασα τι ετοιμάνας-αμέν για τι σώντιβας.

3. Σαρ αβέλα ο ντιβές ι Ιεχωβάσκο σαρ εκ τσορ αντρέ κι ιράτ; (Ντικχέν ι φωτογραφία-ντα)

³ «Σαρ εκ τσορ αντρέ κι ιράτ». (1 Θεσ. 5:2) Ανταβά ισί ο πρώτος κατά τριν παραδείγματα σο σικαβένα σαρ κα αβέλ ο ντιβές ι Ιεχωβάσκο. Ο πο μπουτ φαρ, ο τσορά σιγκιαρένα κάνα τζάνα τσοριμάσκε  ντα κερένα-λες αντρέ κι ιράτ, κάνα ο τζενέ να μπεκλεντίνενα λένγκε. Ο ντιβές ι Ιεχωβάσκο-ντα κα αβέλ ξαφνικά, οτθέ σο ο πο μπουτ τζενέ να κα μπεκλεντίνεν λέσκε. Ατζέ-ντα ο αληθινοί Χριστιανοί μπορεί τι ατσσόν πουταρντέ μόσαρ κάνα κα ντικχέν καζόμ σουγκό κα αβέν-πες ο πράγματα. Αμέν όμως να κα καταστραφίντιβας, σαρ ο πφιρνέ.

4. Σαρ μοιάζελα ο ντιβές ι Ιεχωβάσκο με το ντουκχά ι μπιανιμάσκε;

⁴ «Σαρ ο ντουκχά ι μπιανιμάσκε σο τθερέλα εκ κχαμνί». (1 Θεσ. 5:3) Εκ τζουβέλ σο ισί κχαμνί να τζανέλα κάνα ακριβώς κα ασταρέν-λα ο ντουκχά. Να τθερέλα όμως καέκ αμφιβολία ότι ανταβά κα αβέλ-πες. Ντα κάνα κα μπιανέλ, ανταβά κα αρχίνελ ξαφνικά, κα τθερέλ ντουκχά ντα ανταβά να κα σταματίνελ μέχρι τι νικιόλ ο μαξίμι. Αντικάς αμέν-ντα, να τζανάσα ο ντιβές ντα ο σαάτι σο κα αρχίνελ ο ντιβές ι Ιεχωβάσκο. Ισινάμ όμως σίγουροι ότι κα αβέλ. Ο Ντεβέλ κα κρίνελ ξαφνικά ι πφιρνέν ντα να κα γλιτώνεν κατά κρίση ι Ντεβλέσκι.

5. Σαρ μοιάζελα η μπαρί στεναχώρια ι σαατίσαρ σο ντισιόλα;

⁵ Σαρ ο σαάτι σο ντισιόλα. Ο τρίτος παράδειγμας ι Παυλόσκο βακερέλα πάλι τσορένγκε σο τσορένα ιράτ. Αλλά ανταγιά φαρ ο Παύλος μοιασκιαρέλα ο ντιβές ι Ιεχωβάσκο ι σαατίσαρ σο ντισιόλα. (1 Θεσ. 5:4) Ο τσορά σο αβένα ιράτ κα μπορίνενας τι αβέν αζόμ απασχολημέ κο τσοριπέ σο μπέκιμ τι νακχέλ ο σαάτι χωρίς τι αγαβέν-λες. Ο φως ι ντιβεσέσκο κα μπορίνελας τι νικιόλ οτθέ σο να μπεκλεντίνενα λέσκε ντα τι νικαβέλ ι τσορέν κι φόρα. Αντικάς-ντα, η μπαρί στεναχώρια κα νικαβέλ κι φόρα οντουλέν σο, σαρ ο τσορά, ατσσόνα κο καρανίκι ντα κερένα πράγματα σο πφανγκένα ο γκι ι Ντεβλέσκο. Οκιά μπάνταρ, αμέν μπορίνασα τι αβάς έτοιμοι κάνα να κεράσα πράγματα σο πφανγκένα ι Ιεχωβάσκο γκι αλλά κεράσα «σο-ντα πράγμας ισί λατσσό, δίκαιος ντα μπαγιά». (Εφεσ. 5:​8-12) Σοράν ο Παύλος χρησιμοποιήνελα ντούι παραδείγματα σο μοιάζενα ο εκ ι γιαβερέσαρ για τι κερέλ λάφι οντουλένγκε σο να κα σώντιβεν.

6. Σόσκε βακεράσα ότι ο πο μπουτ τζενέ σοβένα; (1 Θεσσαλονικείς 5:6, 7)

⁶ «Οντουλά σο σοβένα». (Διαβάνεν 1 Θεσσαλονικείς 5:6, 7) Ο Παύλος μοιασκιαρντάς οντουλέν σο να κα σώντιβεν κατά Ιεχωβάσκο ντιβές ι τζενέντζαρ σο σοβένα. Οντουλά τζενέ να αγαβένα σο αβέλα-πες ντονταλάι λένταρ ούτε αγαβένα ότι νακχέλα ο σαάτι. Άρα, να μπορίνενα τι αγαβέν ο σημαντικά πράγματα σο αβένα-πες, ντα οτθάρ να μπορίνενα τι κερέν κάτι. Ο πο μπουτ τζενέ αντιβές σοβένα, σαρ τι βακεράας. (Ρωμ. 11:8) Να χάλα-λεν ανάγκη ο πράγματα σο σικαβένα ότι τζουβντιάσα κο «τελευταία ντιβεσά» ντα ότι η μπαρί στεναχώρια κα αβέλ σουγκό. Κάνα αβένα-πες μπαρέ αλλαγές κο ντουνιάς, μερικά τζενέ τζανγκάντιβενα, σαρ τι βακεράας, ντα μανγκένα τι σικλιόν χάνικ πράγματα ι λατσσέ αμπερίνγκε. Όμως, μπουτέν λέλα-λεν πάλι η λίντρα, σαρ τι βακεράας, αντίς τι ατσσόν τζανγκαντέ. Ατζέ-ντα κάποιοι σο πακιάνα ότι κα αβέλ εκ ντιβές σο ο Ντεβέλ κα κρίνελ ι τζενέν, σκεφτίνενα ότι ανταβά κα αργίνελ μπουτ τι αβέλ. (2 Πέτρ. 3:3, 4) Αμέν όμως αγαβάσα ότι ισί μπουτ σημαντικός τι ατσσάς τζανγκαντέ κάθε ντιβές σο νακχέλα.

7. Σαρ μοιάζενα κο ματέ οντουλά σο κα καταστραφίντιβεν κατά Ντεβέλ;

⁷ «Οντουλά σο ματιόνα». Ο απόστολος Παύλος μοιασκιαρντάς οντουλέν σο κα καταστραφίντιβεν κατά Ντεβέλ ι ματέντζαρ. Ο τζενέ σο ισί ματέ, σο-ντα τι αβέλ ντονταλάι λένταρ, αργίνενα τι κερέν κάτι, ντα λένα μπέτι αποφάσεις. Αντικάς-ντα, ο πφιρνέ να κερένα κάτι κάνα ο Ντεβέλ προειδοποιήνελα-λεν. Τραμπίνενα εκ ντρομ σο γκερέλα κι καταστροφή λένγκι. Αλλά κο Χριστιανοί ντιντιόλα η συμβουλή τι ατσσόν τζανγκαντέ ντα γκοντιαβέρ, τι σκεφτίνεν καθαρά. (1 Θεσ. 5:6) Εκ σπουδαγμέ τζενό σο ασχολίντιβελα ι Γραφιάσαρ βακερέλα ότι, ο τζενό σο σκεφτίνελα καθαρά, ατσσόλα ήρεμος ντα να χάλα-λες η νταρ. Ο τζενό σο σκεφτίνελα αντικάς μπορίνελα τι λελ ι σωστή απόφαση. Σόσκε πρέπει τι ατσσάς ήρεμοι ντα σταθεροί; Για μα τι ανακατούντιβας κο πολιτικά πράγματα ντα κο προβλήματα σο τθερέλα η κοινωνία αμαρέ ντιβεσέντε. Η πίεση τι τσσίντας ανταλέ πραγματένταρ κα αβέλ ατζέ πο μπαρί καζόμ ερεσέλα ο ντιβές ι Ιεχωβάσκο. Όμως, να χρειαζίντιβελα τι ανησυχίνας σο κα κεράς. Ο πνεύμας ι Ντεβλέσκο κα βοηθίνελ-αμέν τι αβάς ήρεμοι ντα τι λας γκοντιαβέρ αποφάσεις.​—Λουκ. 12:​11, 12.

8. Καλέ πραγματέντε μοιάζενα ο ιδιότητες σο κα βοηθίνεν-αμέν τι ατσσάς τζανγκαντέ ντα γκοντιαβέρ, σαρ διαβάνασα κο 1 Θεσσαλονικείς 5:​8; (Ντικχέν ι φωτογραφία-ντα)

⁸ «Τι ιριάς ο θώρακας . . . ντα ι . . . περικεφαλαία». Ο Παύλος μοιασκιαρντάς-αμέν στρατιωτέντζαρ σο ισί τζανγκαντέ ντα ιρίνα πανοπλία. (Διαβάνεν 1 Θεσσαλονικείς 5:8) Εκ στρατιώτης πρέπει τι αβέλ έτοιμος για τζένγκι σο-ντα σαάτι τι αβέλ. Κάτι ασακό αβέλα-πες αμέντζαρ-ντα. Ατσσάσα έτοιμοι ι Ιεχωβάσκε ντιβεσέσκε κάνα ιριάσα ο θώρακας της πίστης ντα ι μανγκιμάσκο, ντα ι ελπίδα σαρ περικεφαλαία. Ανταλά ιδιότητες κα βοηθίνεν-αμέν μπουτ.

9. Σαρ αρακχαβέλα-αμέν αμαρί πίστη;

⁹ Ο θώρακας αρακχαβέλας ι καρδιά ι στρατιωτίσκι. Η πίστη ντα η αγάπη αρακχαβένα αμαρό γκι. Κα βοηθίνεν-αμέν τι συνεχίνας τι υπηρετίνας ι Ντεβλές ντα τι ακολουθίνας ι Ιησούς. Η πίστη κερέλα-αμέν σίγουρους ότι ο Ιεχωβά κα ευλογίνελ-αμέν άμα ρόντασα λέσκε σαρέ αμαρέ γκίσαρ. (Εβρ. 11:6) Κα τσσίντελ-αμέν τι ατσσάς αφοσιωμέ αμαρέ Αρχηγόστε, κο Ιησούς, ατζέ-ντα άμα κα χρειαζίντιβελ τι νακχάς δυσκολίες. Σαρ κα μπαριαράς αμαρί πίστη για τι νταϊντίνας ο δυσκολίες ι ζωγιάκε; Μπορίνασα τι σικλιάς τζενένταρ αμαρέ ντιβεσέντε σο ατσσικιαρντέ πουμαρί ακεραιότητα παρόλο σο τζάνας λέντζαρ κόντρα ο γιαβερά ή τθερένας οικονομικά προβλήματα. Ντα μπορίνασα μα τι περάς κι παγίδα  τι αβάς μπίτσαλε γιακχάκε άμα μοιάζασα οντουλέντε σο κερντέ απλή πουμαρί ζωή για τι τσσουβέν ι Βασιλεία πρώτη πουμαρέ ζωγιάτε. b

10. Σαρ βοηθίνελα-αμέν τι νταϊντίνας η αγάπη ι Ντεβλέσκε ντα ι τζενένγκε;

¹⁰ Η αγάπη ισί μπουτ σημαντική για τι ατσσάς τζανγκαντέ ντα γκοντιαβέρ. (Ματθ. 22:​37-39) Η αγάπη ι Ντεβλέσκε βοηθίνελα-αμέν τι νταϊντίνας κο έργος σο-ντα προβλήματα τι ανέλ αμένγκε ανταβά. (2 Τιμ. 1:7, 8) Επειδή μανγκάσα ατζέ-ντα οντουλέν σο να υπηρετίνενα ι Ιεχωβάς, συνεχίνασα τι βακεράς ο λατσσέ αμπέρια ντα τι κεράς σαρό αμαρό τομέας, κάνα ντάσα μαρτυρία ατζέ-ντα κατά τηλέφωνος ντα κατά επιστολές. Να χασαράσα αμαρί ελπίδα ότι εκ ντιβές ο τζενέ κα αλλάνεν ντα κα αρχίνεν τι κερέν ο σωστός.​—Ιεζ. 18:​27, 28.

11. Σαρ βοηθίνελα-αμέν η αγάπη σο τθεράσα αμαρέ πφραλένγκε ντα πφενίνγκε; (1 Θεσσαλονικείς 5:11)

¹¹ Εκτός κατά αγάπη σο τθεράσα ι τζενένγκε, τθεράσα αγάπη αμαρέ πφραλένγκε-ντα. Σικαβάσα ασακί αγάπη κάνα “ενθαρρύνασα ο εκ ι γιαβερές ντα ντάσα ζορ ο εκ ι γιαβερές”. (Διαβάνεν 1 Θεσσαλονικείς 5:​11) Σαρ ο στρατιώτες σο κερένα τζένγκι πασ’ πασέ, αντικάς αμέν-ντα ενθαρρύνασα ο εκ ι γιαβερές. Σίγουρα, εκ στρατιώτης μπορεί κατά λάθος τι ντελ πιρέ στρατιωτής κο τζένγκι, αλλά ποτές να κα κερέλας-λες ανταβά επίτηδες. Αντικάς αμέν-ντα ποτές να κα πληγώναας επίτηδες αμαρέ πφραλέν ντα πφενίν ούτε κα κεράας λένγκε κακός άμα βον κα κερένας αμένγκε κακός. (1 Θεσ. 5:​13, 15) Σικαβάσα επίσης αμαρί αγάπη κάνα σεβάνασα ι πφραλέν σο οδηγίνενα-αμέν κι κχανγκιρί. (1 Θεσ. 5:​12) Κάνα ο Παύλος γραφιντάς ανταγιά επιστολή, η κχανγκιρί κι Θεσσαλονίκη να πφαντάας ούτε εκ μπρες από αζομάν σο κερντιλίας. Ο διορισμέ μουρσά μάλλον να τθερένας εμπειρία ντα μπέκιμ τι κερντέας λάθη. Όμως, αξίνενας σεβασμός. Καζόμ η μπαρί στεναχώρια ερεσέλα, μπορεί τι χρειαζίντιβελ τι στηρίντιβας ατζέ πο μπουτ κο πρεσβύτεροι σο ισί αμαρέ κχανγκιριάτε για τι οδηγίνεν-αμέν. Μπέκιμ μα τι μπορίνας τι λας οδηγίες ούτε κατά παγκόσμια κεντρικά γραφεία ούτε κατά γραφείος τμήματος. Οτθάρ, ισί σημαντικός τι σικλιάς τι μανγκάς ντα τι σεβάνας αμαρέ πρεσβυτερόν ακανά. Σο-ντα τι αβέλ-πες, τι ατσσάς τζανγκαντέ ντα γκοντιαβέρ ντα μα  τι τθεράς αμαρέ γιακχά κο ατέλειες λένγκε. Πρέπει τι τθεράς αμαρέ γκοντιάτε ότι ο Ιεχωβά, αντράλ κατά Χριστός, οδηγίνελα ανταλέ πιστέ μουρσέν.

12. Σαρ αρακχαβέλα η ελπίδα αμαρό τρόπος σκέψης;

¹² Σαρ η περικεφαλαία αρακχαβέλας ο σορό ι στρατιωτίσκο, αντικάς η ελπίδα τι σώντιβας αρακχαβέλα αμαρό τρόπος σκέψης. Άμα τθεράσα ζουρανί ελπίδα, κα αγαβάς ότι σο-ντα ντέλα ανταβά ντουνιάς ισί άχρηστος. (Φιλιπ. 3:8) Αμαρί ελπίδα βοηθίνελα-αμέν τι ατσσάς ήρεμοι. Ανταβά αβιλό-πες κο Γουάλας ντα κι Λορίντα, σο υπηρετίνενα κι Αφρική. Αντρέ σε τριν εβδομάδες, μουλό λένταρ εκ ντατ ντα εκ ντάι. Ιτιρί κατά Κορωνοϊός, να μπορίνενας τι βουρτίνεν πουμαρέ τθεμέστε για τι αβέν γιεκ πουμαρέ φαμιλίντζαρ. Ο Γουάλας γραφιντάς: «Η ελπίδα ότι ο μουλέ κα τζουβντιόν βοηθίνελα-μαν τι σκεφτίναβ-λεν, όχι σαρ ισινέ χάνικ ντιβεσά πριν τι μερέν ανταλέ ντουνιάστε, αλλά σαρ κα αβέν κο πρώτα ντιβεσά σο κα τζουβντιόν κο νεβό ντουνιάς. Ανταγιά ελπίδα ηρεμίνελα-μαν κάνα ισινόμ μπουτ στεναχωριμέ ή κάνα σικλιντίναβα λένγκε».

13. Σο μπορίνασα τι κεράς για τι λας άγιος πνεύμας;

¹³ «Μα μουνταρέν ι γιακ ι πνευμάσκι». (1 Θεσ. 5:​19) Ο Παύλος μοιασκιαρντάς ο άγιος πνεύμας εκχέ γιακάσαρ σο ισί αντρ’ αμέντε. Κάνα τθεράσα ο πνεύμας ι Ντεβλέσκο, πφαμπάσα αντρ’ αμέντε, σαρ τι βακεράας, για τι κεράς ο σωστός ντα λάσα ζορ για τι υπηρετίνας ι Ιεχωβάς. (Ρωμ. 12:​11) Σο μπορίνασα τι κεράς για τι λας άγιος πνεύμας; Μπορίνασα τι προσευχίντιβας ανταλέσκε, τι σικλιαράς-αμέν κατά Λάφι ι Ντεβλέσκο ντα τι αβάς γιεκ λέσκε οργανωσιάσαρ, σο οδηγίντιβελα λέσκε πνευμάσταρ. Άμα κα κεράς-λες ανταβά, κα μπορίνας τι μπαριαράς «ο καρπός ι πνευμάσκο».​—Γαλ. 5:​22, 23.

14. Σο δεν πρέπει τι κεράς για τι συνεχίνας τι λας ο πνεύμας ι Ντεβλέσκο; (Ντικχέν ι φωτογραφία-ντα)

¹⁴ Κάνα ο Ντεβέλ ντέλα-αμέν πο άγιος πνεύμας, πρέπει τι αβάς προσεκτικοί για “μα τι μουνταράς ι γιακ ι πνευμάσκι”. Ο Ντεβέλ ντέλα πο άγιος πνεύμας σάντε οντουλέντε σο ατσσικιαρένα πάκι πουμαρέ σκέψεις ντα πουμαρί ζωή. Να κα συνεχίνελ τι ντελ-αμέν πο άγιος πνεύμας άμα συνεχίνασα τι σκεφτίνας μαγαριμέ πράγματα ντα σοράν κεράσα-λεν αμαρέ ζωγιάτε. (1 Θεσ. 4:7, 8) Επίσης,  για τι συνεχίνας τι λας άγιος πνεύμας, δεν πρέπει τι “ντικχάς ο προφητείες σαρ κάτι άχρηστος”. (1 Θεσ. 5:​20) Ανταλέ εδαφιόστε, ο «προφητείες» μανγκένα τι βακερέν ο λάφια σο ντέλα-αμέν ο Ιεχωβά αντράλ πι πνευμάσταρ, σαρ ισί για παράδειγμας ο προφητείες σο τθερένα τι κερέν με το ντιβές ι Ιεχωβάσκο ντα ότι ισινάμ μπουτ πασέ κο τέλος. Να σκεφτίνασα ότι ο ντιβές ι Ιεχωβάσκο, δηλαδή ο Αρμαγεδδώνας, να κα αβέλ καζόμ αμέν ισινάμ τζουβντέ. Οκιά μπάνταρ, σικαβάσα ότι μπεκλεντίνασα λέσκε σουγκό, δηλαδή τθεράσα-λες συνέχεια αμαρέ γκοντιάτε, κάνα ατσσικιαράσα αμαρί ζωή πάκι ντα κάνα ισινάμ απασχολημέ κο «πράγματα σο σικαβένα αφοσίωση κο Ντεβέλ» κάθε ντιβές.​—2 Πέτρ. 3:​11, 12.

15. Σο μπορίνασα τι κεράς για μα τι χουχάντιβας κατά ψεύτικες πληροφορίες ντα κατά λάφια σο αβένα κατά δαίμονες; (1 Θεσσαλονικείς 5:21)

¹⁵ Μπουτ σουγκό, ο ντουσμάνια ι Ντεβλέσκε κα αρακχέν εκ τρόπος για τι βακερέν: «Ειρήνη ντα ασφάλεια!» (1 Θεσ. 5:3) Ο ντουνιάς κα πφερντιόλ κατά λάφια σο αβένα κατά δαίμονες, ντα ο πο μπουτ τζενέ κα χουχάντιβεν. (Αποκ. 16:​13, 14) Σο κα βακεράς αμένγκε; Αμέν να κα χουχάντιβας άμα “ρόντασα σαρέ ο πράγματα για τι ντικχάς άμα ισί σωστά”. (Διαβάνεν 1 Θεσσαλονικείς 5:​21) Ο πουρανό μπαλαμανό λάφι δοκιμάζετε, σο μεταφράντιβελα «τι ρόντεν . . . για τι ντικχέν άμα ισί σωστά», χρησιμοποιήντιβελας ι τζενένγκε σο δοκιμάνενας μέταλλα σαρ ο χρυσός ντα ο ασήμι για τι αβέν σίγουροι ότι ισί γνήσια. Οτθάρ, χρειαζίντιβελα τι δοκιμάνας ο πράγματα σο ασουνάσα ή διαβάνασα για τι αβάς σίγουροι ότι ισί γνήσια. Ανταβά ισινέ σημαντικός ι πφραλένγκε κι Θεσσαλονίκη, αλλά κα αβέλ ατζέ πο σημαντικός αμένγκε καζόμ ερεσέλα η μπαρί στεναχώρια. Αντίς τι πακιάς σο-ντα βακερένα αμένγκε ο γιαβερά, τσσουβάσα αμαρί γκοντί τι κχελέλ για τι συγκρίνας οντουλά σο διαβάνασα ή ασουνάσα οντουλέντζαρ σο βακερέλα η Γραφή ντα η οργάνωση ι Ιεχωβάσκι. Άμα κα κεράς-λες ανταβά, να κα χουχάντιβας καέκ λαφίσταρ σο αβέλα κατά δαίμονες.​—Παρ. 14:​15· 1 Τιμ. 4:1.

16. Καγιά σίγουρη ελπίδα τθεράσα, ντα σο τσσίντελα-αμέν τι κεράς ανταβά;

¹⁶ Ο υπηρέτες ι Ντεβλέσκε σαρ ομάδα κα σώντιβεν κατά μπαρί στεναχώρια. Όμως, να τζανάσα σο κα αβέλ-πες ανγκλ’ αμέντε κο κάθε εκ αμένταρ. (Ιακ. 4:​14) Όμως, είτε κα νακχάς τζουβντέ κατά μπαρί στεναχώρια είτε κα μεράς πριν τι αβέλ, κα λας ζωή για πάντα άμα κα ατσσάς πιστοί. Ο χρισμέ κα αβέν ι Χριστόσαρ κο ουρανός. Ο γιαβερά μπρακέ κα αβέν κο παράδεισος κι πφουβ. Οτθάρ, τι τθεράς αμαρέ γιακχά κι μπουτ σουκάρ ελπίδα σο τθεράσα ντα τι αβάς συνέχεια έτοιμοι για το ντιβές ι Ιεχωβάσκο!