1. Καλέ πραγμάσαρ μοιασκιαρέλα ο Δαβίδ ι Ιεχωβάς, σαρ διαβάνασα κο εδάφιος Ψαλμός 18:46;

 ΤΖΟΥΒΝΤΙΑΣΑ εκχέ ντουνιάστε σο αβένα προβλήματα χωρίς τι μπεσάς λένγκε ντα κερένα δύσκολη ή ατζέ-ντα αλλάνενα αμαρί ζωή. Ισινάμ μπουτ χαρούμενοι σο μπορίνασα τι μανγκάς βοήθεια κατά Ιεχωβά Ντεβέλ! Κο γιαβέρ μάθημας ντικχλάμ ότι ο Ιεχωβά ισί ο τζουβντό Ντεβέλ ντα ότι ισί πάντα έτοιμος για τι βοηθίνελ-αμέν. Κάνα ντικχάσα λέσκι βοήθεια αμαρέ ζωγιάτε, αβάσα σίγουροι ότι «o Ιεχωβά ισί τζουβντό!» (Διαβάνεν Ψαλμός 18:​46) Όμως, σοράν ανταλέσταρ, ο Δαβίδ βακερντάς ότι ο Ντεβέλ ισινέ “λέσκο Βράχος”. Σόσκε τι μοιασκιαρέλ ι Ιεχωβάς, ι τζουβντέ Ντεβλές, εκχέ πραγμάσαρ σο να τζουβντιόλα—με εκ βράχος;

2. Σο κα ντικχάς ανταλέ μαθημάστε;

² Ανταλέ μαθημάστε, κα ντικχάς σόσκε ο Ιεχωβά βακέρντιβελα βράχος ντα σο σικλιαρέλα-αμέν ανταβά για το χαρακτήρας λέσκο. Ατζέ, κα σικλιάς σαρ μπορίνασα τι κεράς ι Ιεχωβάς αμαρό Βράχος. Σοράν, κα ντικχάς σαρ μπορίνασα τι τθεράς ο ιδιότητες ι Ιεχωβάσκε σο κερένα-λες τι μοιάζελ σαρ βράχος.

ΣΟΣΚΕ ΒΑΚΕΡΝΤΙΒΕΛΑ Ο ΙΕΧΩΒΑ ΒΡΑΧΟΣ;

3. Σόσκε η Αγία Γραφή μοιασκιαρέλα ι Ιεχωβάς με «βράχος»; (Ντικχέν ι φωτογραφία)

³ Η Αγία Γραφή μοιασκιαρέλα ι Ιεχωβάς με «βράχος» για τι βοηθίνελ-αμέν τι αγαβάς μερικές ιδιότητες σο τθερέλα. Μπουτ φαρ, κάνα ο υπηρέτες ι Ιεχωβάσκε ντένα-λες δόξα επειδή τθερέλα μπουτ σουκάρ ιδιότητες, μοιασκιαρένα-λες σαρ βράχος. Η πρώτη φαρ σο ο Ιεχωβά βακέρντιβελα «ο Μπαρ», δηλαδή βράχος, ισί κο εδάφιος Δευτερονόμιο 32:4. Η Άννα βακερντάς πι προσευχιάτε ότι «βράχος νανέ σαρ αμαρό Ντεβέλ». (1 Σαμ. 2:2) Ο Αββακούμ βακερντάς ι Ιεχωβάσκε «ισινάν μο Βράχος». (Αββακ. 1:12) Ο τζενό σο γραφιντάς ο Ψαλμός 73 βακερντάς ι Ντεβλέσκε ότι ισινέ ο “βράχος λέσκε γκίσκο”. (Ψαλμ. 73:26) Ατζέ-ντα  ο Ιεχωβά βακερντάς πέσκε ότι ισί σαρ βράχος. (Ησ. 44:8) Ακανά κα ντικχάς τριν ιδιότητες ι Ιεχωβάσκε σο κερένα-λες τι μοιάζελ σαρ βράχος ντα κα σικλιάς σαρ μπορίνασα τι κεράς-λες «αμαρό Βράχος».—Δευτ. 32:31.

4. Σαρ αρακχαβέλα-αμέν ο Ιεχωβά; (Ψαλμός 94:22)

⁴ Ο Ιεχωβά ισί τθαν σο αρακχαβέλα. Κάνα ισί μπουτ ζουρανί μπαρμπάλ εκ τζενό μπορίνελα τι γκεραβέλ-πες σε εκ μπαρό βράχος. Αντικάς ο Ιεχωβά-ντα αρακχαβέλα-αμέν κάνα νακχάσα μπαρέ δυσκολίες. (Διαβάνεν Ψαλμός 94:22) Ατσσικιαρέλα-αμέν αρακχαντέ ντα ντέλα πο λάφι ότι σο-ντα ζιάνι τι αβέλ αμένγκε να κα ατσσόλ για πάντα. Αλλά να κερέλα σάντε ανταβά. Ντέλα πο λάφι-ντα ότι ανγκλ’ αμέντε κα νασκιαρέλ σο-ντα κερέλα-αμέν τι αγχώντιβας ή τι τσσίντας μπουτ.—Ιεζ. 34:25, 26.

5. Σαρ μπέκιμ τι αβέλ ο Ιεχωβά τθαν σο αρακχαβέλα-αμέν;

⁵ Εκ τρόπος σο κεράσα ι Ιεχωβάς τι αβέλ τθαν σο αρακχαβέλα-αμέν, ισί η προσευχή. Κάνα κεράσα προσευχή, λάσα ι «ειρήνη ι Ντεβλέσκι» σο αρακχαβέλα αμαρό γκι ντα αμαρί γκοντί. (Φιλιπ. 4:6, 7) Ντικχέν ι εμπειρία ι πφραλέσκι Αρτιόμ, σο τσσουντέ-λες φυλακή οντουλένγκε σο πακιάλας. Κάνα ισινέ κι φυλακή, εκ γκεραλό ανακριτής μπουτ φαρ συμπεριφερίντιβελας λέσκε μπέτι ντα μανγκέλας τι νταραβέλ-λες. «Λέλας-μαν μπουτ άγχος κάθε φαρ σο μανγκέλας-μαν ο ανακριτής.... Πάντα κεράβας προσευχή κο Ιεχωβά. Μανγκάβας λέσταρ τι βοηθίνελ-μαν τι ατσσάβ ήρεμος ντα τι αβάβ γκοντιαβέρ», βακερντάς ο Αρτιόμ. «Σο-ντα τι κερέλας μάνγκε ο ανακριτής, ατσσάβας ήρεμος. . . . Ι Ιεχωβάσκε βοηθειάσαρ, ισινέ σαρ τι αβάβας παλάλ από εκ μπαρό ντουβάρι».

6. Σόσκε μπορίνασα πάντα τι ντας μπέσα κο Ιεχωβά; (Ησαΐας 26:3, 4)

⁶ Ο Ιεχωβά ισί μπεσαλής. Σαρ εκ βράχος σο ναστί κουνιάντιβελα, ο Ιεχωβά ισί πάντα έτοιμος τι βοηθίνελ-αμέν. Μπορίνασα τι ντας λέσκε μπέσα επειδή ισί «Βράχος σο ατσσόλα για πάντα». (Διαβάνεν Ησαΐας 26:3, 4) Κα αβέλ πάντα τζουβντό για τι ατσσικιαρέλ πο λάφι, τι ασουνέλ αμαρέ προσευχές ντα τι ντελ-αμέν ζορ. Επίσης μπορίνασα τι ντας μπέσα κο Ιεχωβά επειδή ισί αφοσιωμέ οντουλέντε σο υπηρετίνενα-λες. (2 Σαμ. 22:26) Ποτές να κα μπιστρέλ οντουλά σο κεράσα ντα πάντα κα ευλογίνελ-αμέν.—Εβρ. 6:10· 11:6.

7. Σο κα αβέλ-πες κάνα ντάσα μπέσα κο Ιεχωβά; (Ντικχέν ι φωτογραφία-ντα)

⁷ Κεράσα ι Ιεχωβάς αμαρό Βράχος κάνα ντάσα λέστε μπέσα σαρέ αμαρέ γκίσαρ. Ισινάμ σίγουροι ότι, άμα ντάσα-λες καν ατζέ-ντα κο δυσκολίες, κα ντικχάς λατσσιπέ. (Ησ. 48:17, 18) Κάθε φαρ σο βοηθίνελα-αμέν, αμαρί μπέσα λέστε μπαριόλα. Αντικάς, αβάσα σίγουροι ότι σάντε ο Ιεχωβά μπορίνελα τι βοηθίνελ-αμέν τι νταϊντίνας ο δοκιμασίες, καζόμ-ντα πφαρέ τι αβέν. Κάνα να τθεράσα καεκχέ γιαβερές για τι βοηθίνελ-αμέν, αγαβάσα καζόμ μπεσαλής ισί ο Ιεχωβά. «Κο βακίτι σο ισινόμας πφαντό, αβιλόμ πο πασέ κο Ντεβέλ», βακερντάς ο Βλαντίμιρ. «Σικλιλόμ τι νταβ πο μπουτ μπέσα κο Ιεχωβά επειδή ισινόμας κορκορό ντα να ισινέ μι βαστέστε τι κεράβ κάτι».

8. (α) Σόσκε βακεράσα ότι ο Ιεχωβά ισί σταθερός; (β) Σο λατσσιπέ ντικχάσα κάνα κεράσα ι Ντεβλές αμαρό Βράχος; (Ψαλμός 62:6, 7)

 ⁸ Ο Ιεχωβά ισί σταθερός. Ο Ιεχωβά ισί σαρ εκ μπαρό βράχος σο να κουνιάντιβελα. Λέσκο χαρακτήρας ντα λέσκο σκοπός να αλλάνενα. (Μαλ. 3:6) Κάνα ο Αδάμ ντα η Εύα γκιλέ λέσαρ κόντρα, ο Ιεχωβά να αλλαντάς πο σκοπός ι τζενένγκε. Σαρ γραφιντάς ο απόστολος Παύλος, ο Ιεχωβά «ναστί αβέλα κάτι γιαβέρ οντουλέσταρ σο ισί». (2 Τιμ. 2:13) Ανταβά μανγκέλα τι βακερέλ ότι, σο-ντα τι αβέλ-πες ή σο-ντα τι κερέν ο γιαβερά, ο Ιεχωβά ποτές να κα αλλάνελ πο ιδιότητες, πο σκοπός ή πο κανόνες. Επειδή ο Ιεχωβά ισί σταθερός, μπορίνασα τι ντας λέσκε μπέσα ότι κα βοηθίνελ-αμέν δύσκολε ντιβεσέντε ντα ότι κα σώνελ-αμέν.—Διαβάνεν Ψαλμός 62:6, 7.

9. Τι σικλιόνα τουμέν κατά Τατιάνα;

⁹ Κάνα ντικχάσα λατσσές ο χαρακτήρας ι Ιεχωβάσκο ντα τθεράσα συνέχεια αμαρέ γκοντιάτε λέσκο σκοπός, κα κεράς-λες αμαρό Βράχος. Ανταβά κα βοηθίνελ-αμέν τι ατσσάς ήρεμοι ντα σταθεροί κάνα νακχάσα δοκιμασίες. (Ψαλμ. 16:8) Ανταβά αγαντάς-λες εκ πφεν, η Τατιάνα, σο ισινέ πφαντί πι κχερέστε οντουλένγκε σο πακιάλας. Βόι βακερντάς: «Ισινόμας ντιπ κορκορί. . . . Κι αρχή ισινέ δύσκολος. Μπουτ φαρ χασαράβας μι ζορ». Όμως, κάνα αγαντάς ότι νακχέλας ανταγιά δοκιμασία επειδή μανγκέλας τι κερέλ ι Ιεχωβάσκο γκι, μπορισάλι τι νταϊντίνελ ντα τι ατσσόλ πιστή. Η Τατιάνα βακερντάς: «Αγαβάβας σόσκε αβένας-πες σαρέ ανταλά, ντα αντικάς μπορίναβας τι νταβ-μαν γκοντί ότι ι Ιεχωβάσκε νακχαβάβας ανταγιά δοκιμασία. Ανταβά βοηθιντάς-μαν μα τι σκεφτίναβ μο νεαυτός».

10. Σαρ μπορίνελα ο Ιεχωβά τι αβέλ αμαρό Βράχος ακανά;

¹⁰ Κο ντιβεσά σο κα αβέν ανγκλ’ αμέντε, κα νακχάς μπαρέ δοκιμασίες ντα κα χρειαζίντιβελ τι ντας μπέσα κο Ιεχωβά πο μπουτ από ποτές. Οτθάρ, ισί σημαντικός τι μπαριαράς ακανά αμαρί μπέσα κο Ιεχωβά ντα τι αβάς ντιπ σίγουροι ότι κα βοηθίνελ-αμέν τι ατσσάς πιστοί λέστε. Σαρ μπορίνασα τι κεράς-λες ανταβά; Τι διαβάνεν ιστορίες κατά Γραφή ντα εμπειρίες πφραλένγκε αμαρέ ντιβεσένταρ. Τσσουβέν σημασία καλά ιδιότητες σικαντάς ο Ντεβέλ σαρ Βράχος για τι βοηθίνελ πι υπηρετόν. Τι σκεφτίνεν λατσσές ανταλά ιστορίες. Αντικάς κα κερέν ι Ιεχωβάς τουμαρό Βράχος.

ΤΙ ΤΘΕΡΕΝ Ο ΙΔΙΟΤΗΤΕΣ ΣΟ ΣΙΚΑΒΕΛΑ Ο ΙΕΧΩΒΑ ΣΑΡ ΒΡΑΧΟΣ

11. Σόσκε πρέπει τι τθεράς ο ιδιότητες σο σικαβέλα ο Ιεχωβά σαρ Βράχος; (Ντικχέν ο πλαίσιος-ντα « Εκ Στόχος ι Τερνέ Πφραλένγκε»)

¹¹ Μέχρι ακανά, ντικχλάμ σαρ σικαβέλα ο Ιεχωβά ότι ισί σαρ βράχος. Για τι ντικχάς ακανά σαρ μπορίνασα τι σικαβάς αμέν-ντα ανταλά ιδιότητες. Καζόμ πο λατσσές κεράσα-λες ανταβά, αζόμ πο μπουτ κα ντας ζορ κι κχανγκιρί. Για παράδειγμας, ο Ιησούς ντινάς κο Σίμωνας ο ναβ Κηφάς (σο μεταφράντιβελα «Πέτρος»). (Ιωάν. 1:42) Ανταβά ναβ μανγκέλα τι βακερέλ «κομμάτι κατά βράχος». Ανταβά σικαβέλας ότι  ο Πέτρος κα λοκχιαρέλας ι γιαβερένγκο γκι ντα κα κερέλας ζουρανί λένγκι πίστη. Ο πρεσβύτεροι μοιάζενα σαρ ι «βουτσσάλ σο ντέλα εκ μπαρό μπαρ». Ανταβά σικαβέλα σαρ αρακχαβένα ι πφραλέν κι κχανγκιρί. (Ησ. 32:2) Αλλά σαρέ αμέν μπορίνασα τι ντας ζορ ο εκ ι γιαβερές άμα σικαβάσα ο ιδιότητες ι Ιεχωβάσκε.—Εφεσ. 5:1.

12. Βακερέν τρόπους σο μπορίνασα τι αβάς ι γιαβερένγκε τθαν σο αρακχαβέλα.

¹² Τι αβέν τθαν σο αρακχαβέλα. Μπάζιμα, μπέκιμ τι χρειαζίντιβελ τι ντας μπαγιά εκ τθαν τι μπεσέν αμαρέ πφραλά άμα πρέπει τι νασέν πουμαρέ κχερέσταρ επειδή αβιλί εκ φυσική καταστροφή ή εκ τζένγκι. Καζόμ ο πράγματα «κο τελευταία ντιβεσά» αβένα πο μπέτι, σίγουρα κα τθεράς πο μπουτ ευκαιρίες για τι βοηθίνας ο εκ ι γιαβερές. (2 Τιμ. 3:1) Επίσης, μπορίνασα τι ντας αμαρέ πφραλέν ντα πφενίν παρηγοριά ντα αγάπη ντα τι βοηθίνας-λεν πνευματικά. Εκ τρόπος ισί τι κεράς-λεν τι νιωθίνεν σουκάρ κι Αίθουσα Βασιλείας, ντα αντικάς τι βοηθίνας τι αβέλ η κχανγκιρί εκ τθαν πφερντό αγάπη. Ο τζενέ κο ντουνιάς αντιβές ισί μπουτ σκληροί ντα να σικαβένα ιτς αγάπη. Οτθάρ, κάνα ο πφραλά ντα ο πφενιά αβένα κο συναθροίσεις, πρέπει τι κεράς ο πο λατσσό σο μπορίνασα για τι ντας-λεν ζορ ντα τι σικαβάς ότι μανγκάσα-λεν.

13. Σαρ μπορίνενα ο πρεσβύτεροι τι αβέν ι γιαβερένγκε τθαν σο αρακχαβέλα; (Ντικχέν ι φωτογραφία-ντα)

¹³ Ο πρεσβύτεροι μπορίνενα τι αβέν τθαν σο αρακχαβέλα ι πφραλένγκε ντα ι πφενίνγκε σο νακχένα σαβέ τι μανγκές προβλήματα. Κάνα αβένα καταστροφές ή εκ ιατρικός πρόβλημας ξαφνικά, ο πρεσβύτεροι σουγκό κανονίνενα τι ντιντιόλ βοήθεια. Επίσης ντένα ζορ αντράλ κατά Γραφή. Ο πφραλά ντα ο πφενιά κα νιωθίνεν άνετα τι μανγκέν βοήθεια εκχέ πρεσβυτερόσταρ άμα τζανένα ότι κα σικαβέλ λένγκε λατσσιπέ, κα ασουνέλ-λεν ντα κα αγαβέλ-λεν. Ασακέ ιδιότητες βοηθίνενα ι γιαβερέν τι  νιωθίνεν ότι ο πρεσβύτερος πφαμπόλα λένγκε. Αντικάς κα αβέλ λένγκε πο εύκολος τι κερέν ι συμβουλή σο κα ντελ-λεν κατά Γραφή.—1 Θεσ. 2:7, 8, 11.

14. Σαρ μπορίνασα τι σικαβάς ότι ισινάμ μπεσαλήδες;

¹⁴ Τι αβέν μπεσαλήδες. Μανγκάσα ο γιαβερά τι τζανέν ότι ισινάμ οτθέ λένγκε, ειδικά κάνα νακχένα δύσκολα ντιβεσά. (Παρ. 17:17) Σαρ μπορίνασα τι τθεράς ο ναβ ότι ισινάμ μπεσαλήδες τζενέ; Μπορίνασα τι μαράς-αμέν τι σικαβάς ο ιδιότητες ι Ιεχωβάσκε. Για παράδειγμας, τι ατσσικιαράς αμαρό λάφι ντα τι κεράς ο πο λατσσό για τι αβάς αμαρέ σαατίστε. (Ματθ. 5:37) Ή άμα τζανάσα ότι κάποιος μανγκέλα βοήθεια, μπορίνασα τι κεράς πράγματα για τι βοηθίνας-λες. Επίσης, μανγκάσα τι κεράς αμαρέ διορισμοί αντικάς σαρ βακερένα ο οδηγίες σο λάσα.

15. Σο λατσσιπέ τθερέλα η κχανγκιρί κάνα ο πρεσβύτεροι ισί μπεσαλήδες;

¹⁵ Σαρ κερένα λατσσιπέ κι κχανγκιρί ο μπεσαλήδες πρεσβύτεροι; Ο ευαγγελιζόμενοι νιωθίνενα αρακχαντέ κάνα τζανένα ότι μπορίνενα τι κερέν λάφι ι πρεσβυτερόντζαρ σο-ντα σαάτι  τι αβέλ. Επίσης νιωθίνενα ότι μανγκένα-λεν κάνα τζανένα ότι ο πρεσβύτεροι ισί έτοιμοι τι βοηθίνεν-λεν. Ντα καζόμ ο πρεσβύτεροι ντένα συμβουλές κατά Αγία Γραφή ντα κατά έντυπα σο ντέλα ο πιστός δούλος ντα να νικαβένα-λεν πουμαρέ γκοντιάταρ, ο πφραλά ντένα λένγκε μπέσα. Ο πφραλά ντα ο πφενιά τθερένα πο μπουτ λόγους τι ντεν μπέσα εκχέ πρεσβυτερόστε σο να μουτθαβέλα οντουλά σο βακερένα λέσκε ντα ατσσικιαρέλα πο λάφι.

16. Κάνα ισινάμ σταθεροί σαρ κεράσα λατσσιπέ εμ αμένγκε εμ ι γιαβερένγκε;

¹⁶ Τι αβέν σταθεροί. Άμα ντάσα καν κο Ιεχωβά σαρέ κο πράγματα ντα λάσα αποφάσεις σο βασίντιβενα κο αρχές κι Γραφιάκε, μπορίνασα τι αβάς λατσσό παράδειγμας ι γιαβερένγκε. Καζόμ σικλιάσα πο μπουτ ντα μπαριόλα αμαρί πίστη, αβάσα πο σταθεροί κι αλήθεια. Τζανάσα σο μανγκάσα ντα να τζάσα εκ ακατάρ εκ οκουτάρ ούτε χουχάντιβασα κατά ψεύτικα λάφια ντα κατά τρόπος σο σκεφτίνελα ο ντουνιάς. (Εφεσ. 4:14· Ιακ. 1:6-8) Επειδή τθεράσα πίστη κο Ιεχωβά ντα κο υποσχέσεις λέσκε ατσσάσα ήρεμοι κάνα σικλιάσα μπέτι αμπέρια. (Ψαλμ. 112:7, 8) Ντα κάνα αμέν ισινάμ σταθεροί, μπορίνασα τι βοηθίνας γιαβερέν-ντα σο νακχένα δοκιμασίες.—1 Θεσ. 3:2, 3.

17. Σο κερένα ο πρεσβύτεροι για τι βοηθίνεν ι γιαβερέν τι αβέν σταθεροί;

¹⁷ Ο πρεσβύτεροι δεν πρέπει τι νακχαβέν ο όρια κο συνήθειες, πρέπει τι αβέν μετρημέ, τι τθερέν σε εκ σειρά πουμαρί ζωή ντα τι αβέν λογικοί. Ανταλά μουρσά βοηθίνενα ι γιαβερέν τι αβέν σταθεροί ντα ντένα ζορ κι κχανγκιρί επειδή “ασταρένα ζουρανές ο πιστός λάφι”. (Τίτο 1:9· 1 Τιμ. 3:1-3) Ο παράδειγμας λένγκο ντα η ζορ σο ντένα, βοηθίνενα ι πφραλέν τι τζαν κο συναθροίσεις, κο έργος ντα τι σικλιαρέν-πες κατά Γραφή. Κάνα ο πφραλά ντα ο πφενιά νακχένα προβλήματα σο ανένα λένγκε άγχος, ο πρεσβύτεροι μπορίνενα τι βοηθίνεν-λεν τι τθερέν πουμαρέ γκοντιάτε ι Ιεχωβάς ντα ο υποσχέσεις λέσκε.

18. Σόσκε μανγκάσα τι ντας δόξα κο Ιεχωβά ντα τι τζας πο πασέ λέστε; (Ντικχέν ο πλαίσιος-ντα « Εκ Τρόπος τι Τζας Πο Πασέ κο Ιεχωβά»)

¹⁸ Αφού ντικχλάμ ο μπουτ σουκάρ ιδιότητες ι Ιεχωβάσκε, μπορίνασα τι βακεράς οντουβά σο βακερντάς ο Δαβίδ: «Δοξασμέ τι αβέλ ο Ιεχωβά, μο Βράχος». (Ψαλμ. 144:1) Ο Ιεχωβά πάντα κα σικαβέλ αμένγκε ότι ισί εκ Ντεβέλ σο μπορίνασα τι ντας λέστε μπέσα. Σαρέ αμαρέ ζωγιάτε, ατζέ-ντα κο πφουρίματα, κα μπορίνας τι βακεράς: «Βοβ ισί μο Βράχος», ντα κα αβάς σίγουροι ότι πάντα κα βοηθίνελ-αμέν τι ατσσάς ζουρανέ πνευματικά.—Ψαλμ. 92:14, 15.