1. Σο βοηθίνελα ι Ιεχωβάσκε λαός τι συνεχίνελ τι ντελ-λες λατρεία παρόλο σο τθερέλα προβλήματα;

 Η ΓΡΑΦΗ βακερέλα ότι ο ντιβεσά σο τζουβντιάσα ισί «δύσκολα ντα επικίνδυνα». (2 Τιμ. 3:1) Ο λαός ι Ιεχωβάσκο τθερέλα ο προβλήματα σο τθερένα σαρέ ο τζενέ κο πφιρνό ντουνιάς κι Μπενγκέσκο. Όμως, νακχάσα κάτι γιαβέρ-ντα. Ο τζενέ τζάνα αμέντζαρ κόντρα επειδή υπηρετίνασα ι Ιεχωβάς. Σο βοηθίνελα-αμέν τι συνεχίνας τι ντας λατρεία ι Ιεχωβάς παρόλο σο τθεράσα σαρέ ανταλά; Εκ μπουτ σημαντικός λόγος ισί ότι ντικχλάμ ι βοήθεια ι Ιεχωβάσκι ντα τζανάσα ότι ισί “ο τζουβντό Ντεβέλ”.—Ιερ. 10:10· 2 Τιμ. 1:12.

2. Σο τζανάσα ι Ιεχωβάσκε, ντα σαρ ανταβά ντέλα-αμέν ζορ;

² Ο Ιεχωβά ντικχέλα σο-ντα δοκιμασία νακχάσα ντα ρόντελα ευκαιρίες για τι βοηθίνελ-αμέν. (2 Χρον. 16:9· Ψαλμ. 23:4) Κάνα ντάσα-αμέν γκοντί ότι ο Ντεβέλ πφαμπόλα αμένγκε ντα ισί πάντα έτοιμος τι βοηθίνελ-αμέν, μπορίνασα τι λας ζορ για τι νταϊντίνας σο-ντα δοκιμασία τθεράσα. Σκεφτίνεν σαρ αβέλας-πες ανταβά κο βασιλιάς Δαβίδ.

3. Σο μανγκέλας τι βακερέλ ο Δαβίδ κάνα γραφιντάς ότι «ο Ιεχωβά ισί τζουβντό»;

³ Ο Δαβίδ τζανέλας ι Ιεχωβάς ντα ντέλας μπέσα Λέστε. Κάνα ο Σαούλ ντα γιαβερά κουλαντίνενας-λες για τι μουνταρέν-λες, ο Δαβίδ προσευχισάλο κο Ιεχωβά για τι βοηθίνελ-λες. (Ψαλμ. 18:6) Κάνα ο Ντεβέλ απαντιντάς λέσκε προσευχιάτε ντα σωντάς-λες, ο Δαβίδ βακερντάς: «Ο Ιεχωβά ισί τζουβντό!» (Ψαλμ. 18:46) Σο μανγκέλας τι βακερέλ ο Δαβίδ; Εκ βιβλίος βακερντάς ότι ο Δαβίδ ντέλας μπέσα κο Ιεχωβά «σόσκε τζανέλας ότι ισί ο αληθινός Ντεβέλ σο πάντα κα βοηθίνελ πι υπηρετόν». Ο Δαβίδ τζανέλας ότι ο Ντεβέλ ντικχέλας σο νακχέλας ντα ισινέ έτοιμος τι βοηθίνελ-λες. Ανταβά ντινάς ζορ κο Δαβίδ τι  συνεχίνελ τι υπηρετίνελ ι Ιεχωβάς ντα τι ντελ λέστε δόξα.—Ψαλμ. 18:28, 29, 49.

4. Σο λατσσιπέ κα τθεράς άμα ντικχάσα ι Ιεχωβάς σαρ τζουβντό Ντεβέλ;

⁴ Άμα ισινάμ σίγουροι ότι ο Ιεχωβά ισί ο τζουβντό Ντεβέλ, ανταβά κα βοηθίνελ-αμέν τι υπηρετίνας-λες αντράλ αμαρέ γκίσταρ. Κα τθεράς ι ζορ τι νταϊντίνας δοκιμασίες. Επίσης, ανταβά κα τσσίντελ-αμέν τι συνεχίνας τι κεράς ο πο λατσσό κι υπηρεσία λέσκι. Ατζέ, κα αβάς αποφασισμέ τι ατσσάς πασέ κο Ιεχωβά.

Ο ΤΖΟΥΒΝΤΟ ΝΤΕΒΕΛ ΚΑ ΝΤΕΛ-ΤΟΥΜΕΝ ΖΟΡ

5. Σο ντέλα-αμέν σιγουριά κάνα νακχάσα δοκιμασίες; (Φιλιππησίους 4:13)

⁵ Άμα ντάσα-αμέν γκοντί ότι ο Ιεχωβά ισί ο τζουβντό Ντεβέλ ντα ότι ισί οτθέ για τι βοηθίνελ-αμέν, κα νταϊντίνας σο-ντα δοκιμασίες τθεράσα, είτε ισί μπαρέ είτε χουρντέ. Βοβ μπορίνελα τι βοηθίνελ-αμέν σαρέ κο δοκιμασίες. Τίποτα ναστί τσσιναβέλα-λες τι κερέλ-λες ανταβά. Ισί ο Πο Ζουρανό ντα μπορίνελα τι ντελ-αμέν ζορ για τι νταϊντίνας. (Διαβάνεν Φιλιππησίους 4:13) Ανταβά ντέλα-αμέν σιγουριά κάνα νακχάσα δοκιμασίες. Κάνα ντικχάσα σαρ στηρίνελα-αμέν ο Ιεχωβά κο πο χουρντέ δοκιμασίες ανταβά κα κερέλ-αμέν σίγουρους ότι κα βοηθίνελ-αμέν κο πο μπαρέ-ντα.

6. Καλά εμπειρίες σο τθερέλας ο Δαβίδ κάνα ισινέ τερνό μπαριαρντέ λέσκι μπέσα κο Ιεχωβά;

⁶ Σκεφτίνεν ντούι εμπειρίες σο τθερέλας ο Δαβίδ ντα μπαριαρντέ λέσκι μπέσα κο Ιεχωβά. Κάνα ισινέ τερνό τσομπάνης, εκ αρκούδα καπτιντάς εκχέ μπρακές κατά κοπάδι λέσκε νταντέσκο. Ο ίδιος κερντάς εκ λιοντάρι-ντα. Κο ντούι-ντα περιπτώσεις, ο Δαβίδ κουλαντιντάς μπίνταρανες οντουλά ζώα ντα αντικάς σωντάς ι μπρακέν. Όμως, να αμντισάλο ότι καταφεριντάς-λεν κορκορό. Τζανέλας ότι ο Ιεχωβά ντινάας-λες ι ζορ τι κερέλ-λες ανταβά. (1 Σαμ. 17:34-37) Ο Δαβίδ ποτές να μπισταρντάς οντουλά εμπειρίες. Οκιά μπάνταρ, σκεφτίνελας-λεν λατσσές ντα μπαριαρέλας πι μπέσα ότι ο τζουβντό Ντεβέλ κα ντέλας-λες ζορ κο μέλλον.

7. Σαρ ντικχέλας ο πράγματα ο Δαβίδ, ντα σαρ βοηθιντάς-λες ανταβά τι πολεμίνελ τον Γολιάθ;

⁷ Πο σοράν, καζόμ ισινέ ατζέ τερνό, ο Δαβίδ γκιλό κο στρατόπεδος κι Ισραηλιτένγκο. Αγαντάς ότι ο στρατιώτες νταρασάλεας επειδή εκ Φιλισταίος γίγαντας, ο Γολιάθ, αβιλό για τι “πρασάλ ι Ισραηλίσκε στρατός”. (1 Σαμ. 17:10, 11) Ο στρατιώτες νταρασάλεας επειδή τσσουβένας σημασία καζόμ μπαρό ισινέ ο Γολιάθ ντα καζόμ μπέτι λάφια βακερέλας λένγκε. (1 Σαμ. 17:24, 25) Ο Δαβίδ όμως ντικχέλας ο πράγματα γιαβέρτουλους. Ο Δαβίδ τζανέλας ότι κάνα ο Γολιάθ πρασάλας ι Ισραηλιτέν, προσβαλίνελας «ι τζουβντέ Ντεβλέσκε στρατός». (1 Σαμ. 17:26) Ο Δαβίδ τθερέλας πι γκοντιάτε ι Ιεχωβάς. Ισινέ σίγουρος ότι ο Ντεβέλ σο βοηθιντάας-λες κάνα ισινέ τσομπάνης κα βοηθίνελας-λες πάλι. Ισινέ σίγουρος ότι ο Ντεβέλ κα στηρίνελας-λες, οτθάρ πολεμιντάς τον Γολιάθ ντα νικιντάς!—1 Σαμ. 17:45-51.

8. Σαρ μπορίνασα τι τθεράς ι Ιεχωβάς αμαρέ γκοντιάτε κάνα νακχάσα δοκιμασίες; (Ντικχέν ι φωτογραφία-ντα)

⁸ Αμέν-ντα μπορίνασα τι νακχαβάς ο δοκιμασίες με επιτυχία άμα ντάσα-αμέν γκοντί ότι ο τζουβντό Ντεβέλ μανγκέλα τι βοηθίνελ-αμέν. (Ψαλμ. 118:6) Μπορίνασα τι μπαριαράς αμαρί σιγουριά ανταλέστε άμα σκεφτίνασα σο κερντάς ο Ιεχωβά μέχρι ακανά. Τι διαβάνεν ιστορίες κατά Γραφή σο ανένα τουμαρέ γκοντιάτε σαρ σωντάς πι υπηρετόν. (Ησ. 37:17, 33-37) Επίσης, ντικχέν εμπειρίες αμαρέ ιστοτοπόστε, κο jw.org, σο σικαβένα σαρ ο Ιεχωβά ντέλα ζορ πφραλέντε ντα πφενίντε αμαρέ ντιβεσέντε. Σκεφτίνεν σο τθερέλα κερντό ο Ιεχωβά τουμένγκε. Μπέκιμ νιωθίνενα ότι ο Ιεχωβά να τθερέλα κερντό κάτι μπουτ μπαρό τουμένγκε, σαρ ισί τι σώνελ-τουμέν από  εκ λιοντάρι ή από εκ αρκούδα. Ισί μπαγιά όμως ότι ο Ιεχωβά κερντάς μπουτ πράγματα τουμένγκε. Ταρτιντάς-τουμέν για τι αβέν λέσαρ αμαλά. (Ιωάν. 6:44) Ατζέ-ντα ακανά, σάντε λέσκε βοηθειάσαρ ατσσόνα κι αλήθεια. Μανγκέν λέσταρ τι ανέλ τουμαρέ γκοντιάτε σαρ απαντιντάς τουμαρέ προσευχιέντε, σαρ ντινάς-τουμέν ζορ οπράλ κο σαάτι ή σαρ βοηθιντάς-τουμέν τι νταϊντίνεν εκ δυσκολία. Άμα σκεφτίνενα-λεν λατσσές σαρέ ανταλά κα μπαριόλ τουμαρί σιγουριά ότι ο Ιεχωβά κα συνεχίνελ τι κερέλ πράγματα τουμένγκε.

9. Σαρ πρέπει τι ντικχάς αμαρέ δοκιμασίες; (Παροιμίες 27:11)

⁹ Κάνα τθεράσα δοκιμασίες χρειαζίντιβελα τι σκεφτίνας σο ισί πο σημαντικός. Ο Μπενγκ βακερέλα ότι κάνα κα τθεράς δυσκολίες κα μουκχάς ι Ιεχωβάς. Οτθάρ, ο τρόπος σο αντιδράνασα κο δοκιμασίες αμαρέ επηρεάνελα ο αισθήματα ι Ιεχωβάσκε. (Ιώβ 1:10, 11· διαβάνεν Παροιμίες 27:​11) Αλλά κάνα νακχάσα αμαρέ δοκιμασίες με επιτυχία, σικαβάσα ότι μανγκάσα ι Ιεχωβάς, ντα ότι ο Μπενγκ ισί ψεύτης. Μήπως η κυβέρνηση οτθέ σο μπεσένα, τζάλα κόντρα κο Μάρτυρες κι Ιεχωβάσκε; Μήπως τθερένα προβλήματα ι λοβέντζαρ; Μήπως ο τζενέ σο κερένα λένγκε έργος να μανγκένα τι ασουνέν-τουμέν; Ή μήπως τθερένα εκ γιαβέρ δοκιμασία; Άμα βα, ντεν-τουμέν γκοντί ότι τθερένα εκ ευκαιρία τι κερέν ι Ιεχωβάσκο γκι τι χαιρίνελ. Επίσης, μα μπιστρέν ότι Βοβ να κα μουκχέλ-τουμέν ποτές τι δοκιμάντιβεν πο μπουτ οντουλέσταρ σο αντιχίνενα. (1 Κορ. 10:13) Κα ντελ-τουμέν ι ζορ τι νταϊντίνεν.

Ο ΤΖΟΥΒΝΤΟ ΝΤΕΒΕΛ ΚΑ ΕΥΛΟΓΙΝΕΛ-ΤΟΥΜΕΝ

10. Σο κα κερέλ ο τζουβντό Ντεβέλ οντουλένγκε σο υπηρετίνενα-λες;

¹⁰ Ο Ιεχωβά πάντα ευλογίνελα οντουλέν σο υπηρετίνενα-λες. (Εβρ. 11:6) Ντέλα-αμέν ειρήνη ντα κερέλα-αμέν τι νιωθίνας πφερντέ αντρ’ αμέντε. Επίσης, κο μέλλον κα ντελ-αμέν ζωή για πάντα. Ισινάμ ντιπ σίγουροι ότι ο Ιεχωβά εμ μανγκέλα εμ τθερέλα ι ζορ τι ευλογίνελ-αμέν. Ανταγιά σιγουριά τσσίντελα-αμέν τι κεράς ο πο λατσσό κι υπηρεσία λέσκι,  σαρ κερένας ο πιστοί υπηρέτες λέσκε κο πουρανέ μπρεσά. Ανταβά κερντάς ο Τιμόθεος-ντα.—Εβρ. 6:10-12.

11. Σο τσσιντιντάς ι Τιμοθεός τι κερέλ ο πο λατσσό κι κχανγκιρί; (1 Τιμόθεο 4:10)

¹¹ Διαβάνεν 1 Τιμόθεο 4:10. Ο Τιμόθεος τθερέλας ζουρανί πίστη ότι ο Ιεχωβά κα ευλογίνελας-λες. Άκ’ σόσκε κερέλας ο πο λατσσό ντα μαρέλας-πες ι Ιεχωβάσκε ντα ι γιαβερένγκε. Σο κερντάς; Ο απόστολος Παύλος βακερντάς λέσκε τι αβέλ πο λατσσό δάσκαλος κο έργος ντα κι κχανγκιρί. Ο Τιμόθεος επίσης έπρεπε τι ντελ ο λατσσό παράδειγμας πι πφραλέντε, εμ κο τερνέ εμ κο πφουρέ. Ατζέ, τθερέλας μερικούς δύσκολους διορισμούς, σαρ για παράδειγμας τι ντελ συμβουλή οντουλέντε σο χρειαζίντιβενας-λες, σταθερά αλλά μανγκιμάσαρ. (1 Τιμ. 4:11-16· 2 Τιμ. 4:1-5) Μπάζιμα ο γιαβερά να ντικχένας ι μπουτί σο κερέλας ο Τιμόθεος, ή να εκτιμίνενας-λα. Αλλά βοβ ισινέ σίγουρος ότι ο Ιεχωβά κα ευλογίνελας-λες.—Ρωμ. 2:6, 7.

12. Σο μπορεί τι τσσίντελ ι πρεσβυτερόν τι συνεχίνεν τι κερέν ο πο λατσσό κι κχανγκιρί; (Ντικχέν ι φωτογραφία-ντα)

¹² Αντικάς αντιβές-ντα, ο πρεσβύτεροι ισί σίγουροι ότι ο Ιεχωβά ντικχέλα ντα εκτιμίνελα ι λατσσί μπουτί σο κερένα. Ο πρεσβύτεροι ντένα ζορ κο πφραλά, κερένα ομιλίες ντα νικιόνα κο έργος. Εκτός ανταλένταρ, μπουτ πρεσβύτεροι βοηθίνενα κι οικοδόμηση ντα ντένα βοήθεια κάνα αβένα καταστροφές. Γιαβερά υπηρετίνενα σε Ομάδες Επισκέψεων σε Ασθενείς ή σε Επιτροπές Προσέγγισης Νοσοκομείων. Ο πρεσβύτεροι τζανένα ότι η κχανγκιρί ισί ι Ιεχωβάσκι, όχι ι τζενένγκι. Οτθάρ, κερένα ο πο λατσσό κο διορισμοί σο ντινάς-λεν ο Ιεχωβά ντα ισί ντιπ σίγουροι ότι βοβ κα ευλογίνελ-λεν οντουλένγκε σο κερένα.—Κολ. 3:23, 24.

13. Σαρ νιωθίνελα ο Ιεχωβά για το προσπάθειες σο κερέλα ο κάθε εκ αμένταρ;

¹³ Να μπορίνενα σαρέ τι αβέν πρεσβύτεροι. Αλλά σαρέ τθεράσα τι ντας κάτι κο Ιεχωβά. Αμαρό Ντεβέλ χαιρίνελα μπουτ κάνα κεράσα ο πο λατσσό σο μπορίνασα για τι  υπηρετίνας-λες. Τσσουβέλα σημασία κο συνεισφορές σο κεράσα, καζόμ χουρντέ-ντα τι αβέν. Αβέλα λέσκο γκι κάνα κεράσα ο πο λατσσό για τι νακχαβάς αμαρί λατζ ντα τι βάντας αμαρό βας για τι ντας απαντήσεις κο συναθροίσεις. Επίσης, χαιρίνελα κάνα συγχωρίνασα οντουλέν σο προσβαλιντέ-αμέν. Μπέκιμ νιωθίνενα ότι ναστί κερένα σαρέ οντουλά σο κα μανγκένας. Τι αβέν σίγουροι, όμως, ότι ο Ιεχωβά μανγκέλα-τουμέν οντουλένγκε σο μπορίνενα τι κερέν. Εκτιμίνελα-λεν ντα κα ευλογίνελ-τουμέν.—Λουκ. 21:1-4.

ΑΤΣΣΟΝ ΠΑΣΕ ΚΟ ΤΖΟΥΒΝΤΟ ΝΤΕΒΕΛ

14. Άμα ατσσάσα πασέ κο Ιεχωβά, σαρ κα βοηθίνελ-αμέν ανταβά τι ατσσάς πιστοί; (Ντικχέν ι φωτογραφία-ντα)

¹⁴ Άμα ντάσα-αμέν γκοντί ότι ο Ιεχωβά τθερέλα αισθήματα ντα επηρεάντιβελα οντουλένταρ σο κεράσα, κα αβέλ αμένγκε πο εύκολος τι ατσσάς πιστοί λέστε. Ο Ιωσήφ ισινέ εκ λατσσό παράδειγμας οπράλ ανταλέστε. Ούτε σο νακχλάς λέσκε γκοντιάταρ τι κερέλ λουμνιπέ. Τζανέλας ότι ο Ντεβέλ τθερέλα αισθήματα ντα να μανγκέλας τι πφανγκέλ λέσκο γκι. (Γέν. 39:9) Για τι ντικχάς αμέν-ντα ι Ιεχωβάς αντικάς, πρέπει τι ντας αμαρέ σαατίσταρ για τι προσευχίντιβας λέστε ντα τι σικλιαράς-αμέν λέσκε Λαφίσταρ. Αντικάς, αμαρί φιλία λέσαρ κα αβέλ πο ζουρανί. Άμα τθεράσα λατσσί φιλία ι Ιεχωβάσαρ, σαρ ο Ιωσήφ, να κα μανγκάς τι κεράς τίποτα σο κα πφανγκέλ λέσκο γκι.—Ιακ. 4:8.

15. Σο σικλιάσα οντουλέσταρ σο αβιλό-πες κο Ισραηλίτες κι έρημος; (Εβραίους 3:12)

¹⁵ Οντουλά σο μπιστρένα ότι ο Ιεχωβά ισί ο τζουβντό Ντεβέλ μπορίνενα εύκολα τι τσσίντεν-πες ντουρ λέσταρ. Ντικχέν σο αβιλό-πες κο Ισραηλίτες κάνα ισινέ κι έρημος. Τζανένας ότι ο Ιεχωβά υπαρχίντιβελα, αλλά αρχισάλε τι τθερέν αμφιβολίες ότι κα ντέλας-λεν ο αναγκαία. Ερεσλέ ατζέ-ντα κο σημείος τι πουτσέν: «Ισί ο Ιεχωβά αμέντζαρ ή νανέ;» (Έξοδ. 17:2, 7) Σοράν, γκιλέ κόντρα κο Ντεβέλ. Σίγουρα, να μανγκάσα τι μοιάζας οντουλέ Ισραηλιτέντε σο να ντινέ καν. Οκιά μπάνταρ, μανγκάσα τι σικλιάς οντουλέσταρ σο αβιλό-πες.—Διαβάνεν Εβραίους 3:12.

16. Σο κα μπορίνελας τι δοκιμάνελ αμαρί πίστη;

 ¹⁶ Ο ντουνιάς να βοηθίνελα-αμέν ιτς τι ατσσάς πασέ κο Ιεχωβά. Μπουτ τζενέ βακερένα ότι να υπαρχίντιβελα Ντεβέλ. Μπουτ φαρ οντουλά σο να ντένα καν κο Ντεβέλ ντικχίντιβελα ότι τζουβντιόνα λατσσές. Κάνα ντικχάσα-λες ανταβά, μπορεί τι δοκιμάντιβελα αμαρί πίστη. Ενώ ποτές να κα βακεράας ότι να υπαρχίντιβελα Ντεβέλ, κα μπορίναας τι αρχίνας μα τι αβάς σίγουροι ότι κα βοηθίνελ-αμέν. Ο τζενό-ντα σο γραφιντάς ο Ψαλμός 73 νιωθίνελας αντικάς για κάποιος βακίτι. Ντικχέλας ότι ο γιαβερά ντονταλάι λέσταρ απολαμβάνενας πουμαρί ζωή παρόλο σο να ντένας καν κο νόμοι κι Ντεβλέσκε. Οτθάρ, αρχισάλο τι τθερέλ αμφιβολίες άμα αξίνελας τι υπηρετίνελ ι Ντεβλές.—Ψαλμ. 73:11-13.

17. Σο κα βοηθίνελ-αμέν τι ατσσάς πασέ κο Ιεχωβά;

¹⁷ Σο βοηθιντάς ι τζενές σο γραφιντάς ανταβά ψαλμός τι αλλάνελ ο τρόπος σο σκεφτίνελας; Σκεφτιντάς λατσσές σο κα αβέλ-πες οντουλέντε σο μπιστρένα ι Ιεχωβάς. (Ψαλμ. 73:18, 19, 27) Επίσης σκεφτιντάς ο ευλογίες σο τθερέλα εκ τζενό σο υπηρετίνελα ι Ντεβλές. (Ψαλμ. 73:24) Αμέν-ντα μπορίνασα τι σκεφτίνας λατσσές ο ευλογίες σο ντινάς-αμέν ο Ιεχωβά. Συγκρίνεν ι ζωή σο τθερένα ακανά με τη ζωή σο κα τθερένας άμα να κα υπηρετίνενας ι Ιεχωβάς. Άμα κα ντας-αμέν γκοντί σόσκε ισί λατσσό αμένγκε τι υπηρετίνας ι Ιεχωβάς, ανταβά κα βοηθίνελ-αμέν τι ατσσάς πιστοί λέστε. Ντα σαρ ο τζενό σο γραφιντάς ανταβά ψαλμός, κα βακεράς: «Μάνγκε . . . ισί λατσσό τι πλησιάναβ ι Ντεβλές».—Ψαλμ. 73:28.

18. Σόσκε δεν πρέπει τι νταράς οντουλένταρ σο κα αβέν κο μέλλον;

¹⁸ Μπορίνασα τι νταϊντίνας σο-ντα δοκιμασίες κα αβέν ανταλέ τελευταίε ντιβεσέντε επειδή “υπηρετίνασα σαρ δούλοι εκχέ τζουβντέ ντα αληθινέ Ντεβλές”. (1 Θεσ. 1:9) Αμαρό Ντεβέλ πφαμπόλα αμένγκε ντα πάντα κα βοηθίνελ-αμέν. Σικαντάς ότι ισινέ γιεκ πι υπηρετόντζαρ κο πουρανέ μπρεσά ντα κα αβέλ αμέντζαρ-ντα αντιβές. Ατζεχάνικ κα νακχάς ι πο μπαρί στεναχώρια σο αβιλί-πες ποτές. Αλλά να κα αβάς κορκορέ. Ο Ιεχωβά κα αβέλ αμέντζαρ. (Ησ. 41:10) Μακάρι σαρέ «τι τθεράς μπαρό θάρρος ντα τι βακεράς: “Ο Ιεχωβά ισί μο βοηθός· να κα νταράβ”».—Εβρ. 13:5, 6.