Για τι κεράς ι Ιεχωβάσκο γκι, πρέπει τι τθεράς πίστη. Όμως, η Αγία Γραφή βακερέλα ότι «η πίστη νανέ κάτι σο τθερένα-λες σαρέ». (2 Θεσ. 3:2) Ο απόστολος Παύλος κερέλας λάφι οντουλένγκε σο τζάνας λέσαρ κόντρα, “τζενένγκε σο ισινέ γκεραλέ ντα κερένας ζιάνι”, σο έπρεπε τι σώντιβελ λένταρ. Αλλά ο λάφια σο βακερντάς για την πίστη τθερένα τι κερέν ατζέ πο μπουτ πραγματέντζαρ. Μερικά τζενέ τραμπίνενα μα τι τσσουβέν σημασία κο αποδείξεις ότι υπαρχίντιβελα Δημιουργός, ο Ντεβέλ. (Ρωμ. 1:20) Γιαβερά τζενέ μπέκιμ τι βακερέν ότι τθερένα πίστη επειδή πακιάνα ότι υπαρχίντιβελα εκ πο μπαρί ζορ. Ανταβά όμως να ερεσέλα για τι βακεράς ότι τθεράσα ανταγιά πίστη σο κερέλα ι Ιεχωβάσκο γκι.

Χρειαζίντιβελα τι αβάς σίγουροι ότι ο Ιεχωβά υπαρχίντιβελα ντα ότι «ανέλα ευλογίες» οντουλέντε σο τθερένα ζουρανί πίστη. (Εβρ. 11:6) Η πίστη ισί αντρέ κο καρπός κι άγιε πνευμάσκο. Κάνα κεράσα προσευχή κο Ιεχωβά, ανταβά βοηθίνελα-αμέν τι λας άγιος πνεύμας. (Λουκ. 11:9, 10, 13) Εκ μπουτ σημαντικός τρόπος για τι λας άγιος πνεύμας ισί τι διαβάνας ι Ντεβλέσκο Λάφι. Σοράν, μπορίνασα τι σκεφτίνας οντουλά σο διαβάνασα ντα τι κεράς αμαρέ ζωγιάτε οντουλά σο σικλιάσα. Κάνα κεράσα-λες ανταβά μουκχάσα ο πνεύμας ι Ιεχωβάσκο τι επηρεάνελ-αμέν ντα τι ντελ-αμέν ι πίστη σο κερέλα λέσκο γκι.