Κάσκε βακέρντιβενα ο λάφια «κα αρακχαβές-λεν» σο ισί κο εδάφιος Ψαλμός 12:7; Ι “ταλαιπωριμέ τζενένγκε” (εδάφιος 5) ή για το «λάφια ι Ιεχωβάσκε» (εδάφιος 6);

Ο εδάφια σο ισί πο οπρέ σικαβένα ότι ανταβά εδάφιος κερέλα λάφι τζενένγκε.

Κο Ψαλμός 12:1-4, διαβάνασα ότι ο «πιστοί εξαφανισάλε αντράλ κατά τζενέ». Ακανά, τσσουβέν σημασία κο εδάφια Ψαλμός 12:5-7, σο βακερένα:

Ο εδάφιος 5 σικαβέλα σο κα κερέλ ο Ντεβέλ ι “ταλαιπωριμέ τζενένγκε”. Κα σώνελ-λεν.

Ο εδάφιος 6 βακερέλα ότι «ο λάφια ι Ιεχωβάσκε ισί πάκι», “σαρ καθαρισμέ ασήμι”. Ανταβά σικαβέλα μπουτ σουκάρ τροπόσαρ σαρ νιωθίνασα για το λάφια ι Ιεχωβάσκε.—Ψαλμ. 18:30· 119:140.

Ακανά τσσουβέν σημασία κο γιαβέρ εδάφιος, Ψαλμός 12:7: «Τούι κα αρακχαβές-λεν, Ιεχωβά. Κα αρακχαβές συνέχεια ι κάθε εκχές κατά τζενέ σο τζουβντιόνα ανταλέ βακιτίστε». Κάσκε βακέρντιβελα ο λάφι «κα αρακχαβές-λεν»;

Πριν κατά εδάφιος 7, ο εδάφιος 6 βακερέλα για το «λάφια ι Ιεχωβάσκε». Οτθάρ, μερικά τζενέ μπορεί τι αμντίνεν ότι ο εδάφιος 7 σικαβέλα ότι ο Ντεβέλ “αρακχαβέλα” πο λάφια. Τζανάσα ότι ο Ντεβέλ αρακχαντάς ι Γραφή παρόλο σο πελί μπαρί κόντρα ντα μπουτ τζενέ προσπαθιντέ τι καταστραφίνεν-λα ντα μα τι μουκχέν τι διαβάντιβελ ντα τι μεταφράντιβελ.—Ησ. 40:8· 1 Πέτρ. 1:25.

Όμως εμ ο λάφια σο ισί κο εδάφιος 5 ισί μπαγιά. Ο Ιεχωβά βοηθιντάς μπουτ φαρ ντα σωντάς “ι ταλαιπωριμέ τζενέν” ντα οντουλέν σο «ισί μπουτ πιεσμέ», ντα κα συνεχίνελ τι κερέλ-λες ανταβά.—Ιώβ 36:15· Ψαλμ. 6:4· 31:1, 2· 54:7· 145:20.

Άρα κάσκε κερέλα λάφι ο εδάφιος 7;

Άμα κα ντικχάς ατζέ πο λατσσές ανταβά ψαλμός, κα αγαβάς ότι ο λάφια «κα αρακχαβές-λεν» βακέρντιβενα ι τζενένγκε.

Κο εδάφιος Ψαλμός 12:1, ο Δαβίδ κερέλα λάφι ι πιστέ τζενένγκε σο βακερντέ λένγκε ψέματα ο πφιρνέ τζενέ. Πο σοράν, διαβάνασα ότι ο Ιεχωβά κα τζαλ κόντρα οντουλέ τζενέντζαρ σο βακερένα μπέτι πράγματα. Ανταβά ψαλμός κερέλα-αμέν σίγουρους ότι ο Ντεβέλ κα τσσίντελ πι λαόσταρ επειδή λέσκε λάφια ισί πάκι.

Άρα, ο εδάφιος 7 μανγκέλα τι βακερέλ ότι ο Ιεχωβά κα αρακχαβέλ ι ταλαιπωριμέ τζενέν σο τσσιντιντέ μπουτ κατά πφιρνέ.

Ο λάφι «κα αρακχαβές-λεν» χρησιμοποιησάλο ανταλέ εδαφιόστε σε αντίγραφα κατά Εβραϊκές Γραφές, σο μπορίνασα τι ντας λένγκε μπέσα. Κι Μετάφραση των Εβδομήκοντα χρησιμοποιησάλο ντούι φαρ ο λάφι «αμέν» ανταλέ εδαφιόστε. Άρα αγαβάσα ότι βακέρντιβελα ι πιστέ τζενένγκε σο ισί ταλαιπωριμέ ντα μπουτ πιεσμέ. Ντα ο εδάφιος 7 βακερέλα ότι “ο κάθε εκ” κατά πιστά τζενέ κα αβέλ αρακχαντό «κατά τζενέ σο τζουβντιόνα ανταλέ βακιτίστε», δηλαδή κατά πφιρνέ τζενέ. (Ψαλμ. 12:7, 8) Σε εκ μετάφραση-ντα κατά Εβραϊκές Γραφές κι αραμαϊκή τσσιπ, χρησιμοποιησάλο ο λάφι «κα αρακχαβές-λεν» κο πρώτος μέρος κι εδαφιόσκο αντικάς: «Τούι, ΚΥΡΙΕ, κα αρακχαβές συνέχεια ι δίκαιε τζενέν κατά γκεραλέ τζενέ σο τζουβντιόνα ανταλέ βακιτίστε». Ανταβά κερέλα-αμέν ατζέ πο σίγουρους ότι ο εδάφιος Ψαλμός 12:7 να βακερέλα ι Ντεβλέσκε λαφίνγκε.

Οτθάρ, ανταβά εδάφιος ντέλα κο πιστά τζενέ ι ελπίδα ότι ο Ντεβέλ κα σώνελ-λεν.