1. Κάνα αμαρτιντάς ο Αδάμ ντα η Εύα, καλά πράγματα σο τθερένα τι κερέν αμαρέ ντουσμανίσαρ μουτθαντάς ο Ιεχωβά;

Ο ΑΔΑΜ τζανέλας ότι ο σαπά να κερένα λάφι. Άρα, κάνα σικλιλό ότι εκ σαπ κερντάας λάφι κι Εύα, μπορεί τι αγαντάς ότι κι πραγματικότητα εκ πνεύμας κερντάας λάφι. (Γένεση 3:​1-6) Ο Αδάμ ντα η Εύα να τζανένας κον ισινέ οντουβά πνεύμας. Όμως, ο Αδάμ τραμπιντάς τι ακολουθίνελ οντουλέ πνευμάς, παρόλο σο να τζανέλας-λες, ντα τι τζαλ κόντρα πι λατσσέ Νταντέστε σο ισί κο ουρανός. (1 Τιμόθεο 2:​14) Μπουτ σουγκό, ο Ιεχωβά αρχισάλο τι μουτθαβέλ πιο μπουτ πράγματα σο τθερένα τι κερέν οντουλέ πφιρνέ ντουσμανίσαρ ντα ντινάς πο λάφι ότι τελικά κα καταστραφίντιβελας. Αλλά ο Ιεχωβά προειδοποιηντάς ότι, για κάποιος καιρός, ο πνεύμας σο κερντάας λάφι αντράλ κατά σαπ κα τζάλας κόντρα σαρέ οντουλέντε σο μανγκένα ι Ντεβλές.​—Γένεση 3:15.

2, 3. Καβά μπορεί τι ισί ο λόγος σο ο Ιεχωβά μουτθαντάς κο τζενέ χάνικ πράγματα ι Μπενγκέσκε πριν τι αβέλ ο Μεσσίας;

² Ο Ιεχωβά ποτές να βακερντάς αμένγκε ο ναβ οντουλέ αγγελόσκο σο γκιλό λέσαρ κόντρα. * (Ντικχ ι υποσημείωση) Ο  Ιεχωβά μουτθαντάς κον ισινέ οντουβά ντουσμάνι αφού νακχλέ περίπου 2.500 μπρεσά από αζομάν σο γκιλέ λέσαρ κόντρα κι Εδέμ. (Ιώβ 1:6) Τθερέλα ο τίτλος «Σατανάς», σο μανγκέλα τι βακερέλ «οντουβά σο τζάλα κόντρα». Σάντε τριν βιβλία κο Εβραϊκές Γραφές, ο βιβλία 1 Χρονικών, Ιώβ ντα Ζαχαρίας, βακερένα ο τίτλος Σατανάς. Σόσκε μουτθάντιλε αζόμ χάνικ πράγματα οντουλέ ντουσμανίσκε πριν τι αβέλ ο Μεσσίας;

³ Κο Εβραϊκές Γραφές, ο Ιεχωβά να μουτθαβέλα αμένγκε μπουτ πράγματα ι Μπενγκέσκε ντα λέσκε μπουτιένγκε. Ο πιο σημαντικός σκοπός σο γραφίντιλε ο Εβραϊκές Γραφές ισινέ τι βοηθίνεν ι τζενέν τι αγαβέν κον ισί ο Μεσσίας ντα τι ακολουθίνεν-λες. (Λουκάς 24:​44· Γαλάτες 3:​24) Κάνα αβιλό ο Μεσσίας, ο Ιεχωβά χρησιμοποιηντάς λες ντα λέσκε μαθητέν για τι μουτθαβέλ αμένγκε μπουτ κατά πράγματα σο τζανάσα ι Μπενγκέσκε ντα ι αγγελόνγκε σο ακολουθιντέ-λες. * (Ντικχ ι υποσημείωση) Ανταβά ισί λογικός, σόσκε ο Ιεχωβά κα χρησιμοποιήνελ ι Ιησούς ντα ι χρισμέ τζενέν για τι καταστραφίνεν ι Μπενγκές ντα οντουλέν σο ακολουθίνενα-λες.​—Ρωμαίους 16:​20· Αποκάλυψη 17:​14· 20:10.

4. Σόσκε να χρειαζίντιβελα τι νταράς κατά Μπενγκ;

⁴ Ο απόστολος Πέτρος μοιασκιαρέλα ι Μπενγκές εκχέ “λιονταρίσαρ” ντα ο Ιωάννης βακερέλα λέσκε «σαπ» ντα «δράκος». (1 Πέτρου 5:8· Αποκάλυψη 12:9) Αλλά να χρειαζίντιβελα τι νταράς κατά Μπενγκ. Λέσκι ζορ τθερέλα όρια. (Διαβάνεν Ιακώβου 4:7) Ο Ιεχωβά, ο Ιησούς ντα ο πιστοί άγγελοι αρακχαβένα-αμέν. Επειδή βον βοηθίνενα-αμέν, μπορίνασα τι τζας κόντρα αμαρέ ντουσμανίστε. Όμως, χρειαζίντιβελα τι τζανάς ο απαντήσεις τρινέ σημαντικέ ερωτησιέντε: Καζόμ ζορ τθερέλα ο Μπενγκ; Σαρ προσπαθίνελα τι χουχαβέλ ι τζενέν; Ντα καλά πράγματα ναστί κερέλα; Ακανά κα απαντίνας ανταλέ ερωτησιέντε ντα κα ντικχάς σο μπορίνασα τι σικλιάς.

5, 6. Σόσκε ο κυβερνήσεις ι τζενένγκε ναστί ανένα ο αλλαγές σο τθερένα πιο μπουτ ανάγκη ο τζενέ;

⁵ Μπουτ άγγελοι τσσιντιντέ κατά Μπενγκ ντα γκιλέ κόντρα κο Ντεβέλ. Πριν τι αβέλ ο Κατακλυσμός, ο Μπενγκ τσσουντάς τουλάχιστον μερικέ οντουλέ αγγελόνταρ κο πειρασμός τι τζαν τζουβλίντζαρ. Η Γραφή σικαβέλα-λες ανταβά με συμβολικός τρόπος κάνα βακερέλα ότι ο δράκος σο πελό κατά ουρανός ταρτιντάς παλά-πέστε ο εκ τρίτος κατά τσεργανιά. (Γένεση 6:​1-4· Ιούδα 6· Αποκάλυψη 12:3, 4) Κάνα οντουλά άγγελοι μουκχλέ ι Ντεβλέσκι φαμιλί, τραμπιντέ τι κερέλ-λεν κουμάντος ο Μπενγκ. Δεν πρέπει τι σκεφτίνας ότι οντουλά γκεραλέ άγγελοι νανέ οργανωμέ. Ο Μπενγκ προσπαθιντάς τι κερέλ εκ κυβέρνηση σο κα αβέλας οργανωμέ σαρ ι Ντεβλέσκι Βασιλεία. Κερντάς πο νεαυτός βασιλιάς ντα οργανωντάς ι δαιμονέν, ντινάς-λεν ζορ ντα κερντάς-λεν άρχοντες ι ντουνιάσκε.​—Εφεσίους 6:12.

⁶ Ο Μπενγκ χρησιμοποιήνελα πι οργάνωση  για τι κερέλ κουμάντος σαρέ ι τζενένγκε κυβερνήσεις. Μπορίνασα τι αβάς σίγουροι ανταλέσκε, σόσκε σικαντάς κο Ιησούς «σαρέ ο βασιλείες ι πφουβιάκε» ντα βακερντάς: «Κα νταβ-τουτ σαρί ανταγιά εξουσία ντα λένγκι δόξα, σόσκε ντιντιλί μάντε, ντα ντάβα-λα κάστε μανγκάβα». (Λουκάς 4:5, 6) Μπουτ κυβερνήσεις κερένα λατσσέ πράγματα ι τζενένγκε ντα μερικοί κυβερνήτες μανγκένα μπαγιά τι βοηθίνεν ι τζενέν. Αλλά καέκ τζενό σο κυβερνίνελα ναστί ανέλα ο αλλαγές σο τθεράσα πιο μπουτ ανάγκη.​—Ψαλμός 146:3, 4· Αποκάλυψη 12:12.

7. Σαρ χρησιμοποιήνελα ο Μπενγκ όχι σάντε ο κυβερνήσεις αλλά εμ ι ψεύτικη θρησκεία ντα ο εμπορικός σύστημας; (Ντικχ ι φωτογραφία σο ισί κι αρχή)

⁷ Ο Μπενγκ ντα ο δαίμονες χρησιμοποιήνενα επίσης ι ψεύτικη θρησκεία ντα ο εμπορικός σύστημας για τι χουχαβέν «σαρέ ι ντουνιάς». (Αποκάλυψη 12:9) Ο Μπενγκ χρησιμοποιήνελα ι ψεύτικη θρησκεία για τι βακερέλ κο τζενέ ψέματα ι Ιεχωβάσκε, ντα προσπαθιντάς ατζέ-ντα τι γκεραβέλ ι Ντεβλέσκο ναβ. (Ιερεμίας 23:​26, 27) Οτθάρ, μερικά λατσσέ τζενέ σο αμντίνενα ότι ντένα λατρεία ι Ντεβλές κι πραγματικότητα ντένα λατρεία ι δαιμονέν. (1 Κορινθίους 10:​20· 2 Κορινθίους 11:​13-15) Ο Μπενγκ χρησιμοποιήνελα ο εμπορικός σύστημας-ντα για τι βακερέλ κο τζενέ ψέματα, σαρ για παράδειγμας ότι ο λοβέ ντα ο υλικά πράγματα κερένα ι τζενέν ευτυχισμέ. (Παροιμίες 18:​11) Οντουλά σο πακιάνα ανταβά ψέμας χαλαβένα σαρί πουμαρί ζωή για τι υπηρετίνεν ο «Χουλανιπέ», αντίς τι υπηρετίνεν ι Ντεβλές. (Ματθαίος 6:​24) Ατζέ-ντα άμα ανγκλέ μανγκένας ι Ντεβλές, η αγάπη για το υλικά πράγματα αβέλα αζόμ ζουρανί σο λένγκι αγάπη ι Ντεβλέσκε χασάρντιβελα.​—Ματθαίος 13:​22· 1 Ιωάννη 2:​15, 16.

8, 9. (α) Καλά ντούι πράγματα μπορίνασα τι σικλιάς οντουλένταρ σο κερντάς ο Αδάμ, η Εύα ντα ο γκεραλέ άγγελοι; (β) Σόσκε ισί λατσσό τι τζανάς ότι ο Μπενγκ κερέλα κουμάντος ι ντουνιάς;

⁸ Μπορίνασα τι σικλιάς ντούι σημαντικά πράγματα οντουλένταρ σο κερντάς ο Αδάμ, η Εύα ντα ο γκεραλέ άγγελοι. Πρώτον, σικλιάσα ότι ισί σάντε ντούι ντρομά ντα ότι πρέπει τι τραμπίνας εκ τανό. Μπορίνασα τι τσσίντας είτε κατά Ιεχωβά είτε κατά Μπενγκ. (Ματθαίος 7:​13) Δεύτερον, σικλιάσα ότι ο πράγματα σο κερδίνενα οντουλά σο τσσίντενα κατά Μπενγκ ισί μπουτ χουρντέ ανγκλάλ κο μπέτι αποτελέσματα σο τθερένα. Κο Αδάμ ντα κι Εύα ντιντιλί η ευκαιρία τι αποφασίνεν κορκορέ ο σωστός ντα ο λάθος. Ντα ο δαίμονες λιντέ εξουσία για τι κερέν κουμάντος ι τζενένγκε κυβερνήσεις. (Γένεση 3:​22) Όμως, κάνα κάποιος τραμπίνελα τι τσσίντελ κατά Μπενγκ τθερέλα πάντα μπέτι αποτελέσματα.​—Ιώβ 21:​7-17· Γαλάτες 6:7, 8.

⁹ Σόσκε ισί λατσσό τι τζανάς ότι ο Μπενγκ κερέλα κουμάντος ι ντουνιάς; Βοηθίνελα-αμέν τι τθεράς σωστή άποψη για το κυβερνήσεις ντα κερέλα-αμέν τι βακεράς ο λατσσέ αμπέρια. Τζανάσα ότι ο Ιεχωβά μανγκέλα τι σεβάνας ο κυβερνήσεις. (1 Πέτρου 2:​17) Μπεσέλα αμένταρ τι ντας καν κο νόμοι σο τσσουβένα άμα οντουλά νόμοι να τζάνα κόντρα κο κανόνες λέσκε. (Ρωμαίους 13:​1-4) Αλλά τζανάσα επίσης ότι πρέπει μα τι τθεράς καέκ σχέση ανταλέ ντουνιάσαρ ντα μα τι υποστηρίνας ποτές καέκ πολιτικός κόμμας ή τζενές σο κυβερνίνελα.  (Ιωάννης 17:​15, 16· 18:​36) Αγαβάσα ότι ο Μπενγκ προσπαθίνελα τι γκεραβέλ ντα τι μελιαρέλ ι Ιεχωβάσκο ναβ, οτθάρ κεράσα σο νακχέλα αμαρέ βαστέσταρ για τι σικλιαράς ι τζενέν ι αλήθεια ι Ντεβλέσκε. Ισινάμ περήφανοι σο τθεράσα οπρ’ αμέντε λέσκο ναβ ντα σο χρησιμοποιήνασα-λες. Ντα επειδή μανγκάσα ι Ντεβλές, τθεράσα μπουτ πιο λατσσέ αποτελέσματα οντουλένταρ σο κα τθεράας άμα κα μανγκάας ο λοβέ ή ο υλικά πράγματα.​—Ησαΐας 43:​10· 1 Τιμόθεο 6:​6-10.

10-12. (α) Σαρ μπορεί ο Μπενγκ τι χρησιμοποιηντάς δολώματα για τι τσσουβέλ μερικέ αγγελόν κο πειρασμός; (β) Σο σικλιάσα οντουλένταρ σο κερντέ ο γκεραλέ άγγελοι;

¹⁰ Ο Μπενγκ χρησιμοποιήνελα έξυπνους τρόπους για τι χουχαβέλ ι γιαβερέν. Για τι τσσουβέλ-λεν τι κερέν σο μανγκέλα, μπάζιμα χρησιμοποιήνελα δολώματα ντα γιαβέρ φαρ προσπαθίνελα τι νταραβέλ-λεν.

¹¹ Ο Μπενγκ χρησιμοποιηντάς δολώματα για τι τσσουβέλ μπουτέ αγγελόν κο πειρασμός. Μπορεί τι παρατηρίνελας-λεν μπουτ καιρός για τι αγαβέλ σο κα μπορίνελας τι τσσουβέλ-λεν κο πειρασμός. Μερικοί άγγελοι αστάρντιλε κατά δόλωμας ντα γκιλέ ι τζουβλίντζαρ. Λένγκε τσσαβέ ισινέ γκεραλέ γίγαντες σο χάνας-πες ι γιαβερέντζαρ. (Γένεση 6:​1-4) Εκτός ανταλέσταρ, ο Μπενγκ μπορεί επίσης τι ντινάς-λεν πο λάφι ότι κα κερένας κουμάντος σαρέ ι τζενέν. Ανταβά μπορεί τι κερντάς-λες επειδή μανγκέλας τι κερέλ σο νακχέλας λέσκε βαστέσταρ για μα τι νικιόλ μπαγιά η προφητεία ι Ιεχωβάσκι σο βακερέλα “ι τζουβλιάκε προσαγγονίσκε”. (Γένεση 3:​15) Αλλά ο Ιεχωβά να μουκχλάς-λες τι καταφερίνελ-λες ανταβά. Αντάς ο Κατακλυσμός ντα αντικάς τσσιναντάς ο σχέδια ι Μπενγκέσκε ντα ι δαιμονένγκε.

¹² Σο σικλιάσα ανταλέσταρ; Ο λουμνικανέ πράγματα ντα ο μπαρικανιπέ ισί μπουτ έξυπνα δολώματα. Ο άγγελοι σο τσσιντιντέ κατά Μπενγκ ισινέας μπουτ μπρεσά κο ουρανός γιεκ ι Ντεβλέσαρ! Όμως, μπουτ λένταρ μουκχλέ τι μπαριόν λένγκε γκιέντε λάθος επιθυμίες, ντα ανταλά επιθυμίες αβιλέ μπουτ ζουρανέ. Πρέπει πάντα τι ντας-αμέν γκοντί ότι, καμπόρ-ντα μπρεσά τι υπηρετίνασα ι Ιεχωβάς, ο μπέτι επιθυμίες μπορίνενα τι μπαριόν αμαρέ γκίστε.  (1 Κορινθίους 10:​12) Οτθάρ, πρέπει τι ντικχάς συνέχεια σο ισί αμαρέ γκίστε ντα τι πάλντας σαρέ ο λουμνικανέ σκέψεις ντα ο μπαρικανιπέ!​—Γαλάτες 5:​26· διαβάνεν Κολοσσαείς 3:5.

13. Καβά ισί εκ γιαβέρ δόλωμας σο χρησιμοποιήνελα ο Μπενγκ, ντα σαρ μπορίνασα τι νασάς λέσταρ;

¹³ Εκ γιαβέρ δόλωμας σο χρησιμοποιήνελα ο Μπενγκ ισί η περιέργεια για το πνευματισμός, δηλαδή πραγματένγκε σαρ ισί η μαγεία, η επικοινωνία ι μουλέντζαρ ντα γιαβερά ασακέ μπέτι πράγματα. Αντιβές, χρησιμοποιήνελα ι ψεύτικη θρησκεία ντα ι διασκέδαση για τι κερέλ ι τζενέν τι ασχολίντιβεν ι δαιμονέντζαρ. Ταινίες, ηλεκτρονικά παιχνίδια ντα γιαβερά πράγματα σο τθερένα τι κερέν με τη διασκέδαση κερένα ο πνευματισμός τι ντικχίντιβελ σουκάρ. Σαρ μπορίνασα τι νασάς ανταλέ δολωμάσταρ; Δεν πρέπει τι μπεσάς κατά Ντεβλέσκι οργάνωση τι βακερέλ αμένγκε καγιά διασκέδαση ισί λατσσί ντα καγιά νανέ. Πρέπει τι σικλιαράς αμαρί συνείδηση για τι κεράς λατσσέ επιλογές σο βασίντιβενα κι Ιεχωβάσκε αρχές. (Εβραίους 5:​14) Ντα άμα αμαρί αγάπη ι Ντεβλέσκε ισί «αληθινή», κα κεράς λατσσέ επιλογές. (Ρωμαίους 12:9) Εκ τζενό σο να τθερέλα αληθινή αγάπη ι Ντεβλέσκε, γιαβέρ βακερέλα ντα γιαβέρ κερέλα. Οτθάρ, κάνα τραμπίνασα διασκέδαση, μπορίνασα τι πουτσάς-αμέν: “Ακολουθίναβα ο ίδιες αρχές σο βακεράβα ι γιαβερένγκε τι ακολουθίνεν; Σο κα σκεφτίνεν μο μελέτες ή μο επανεπισκέψεις άμα ντικχλέ σο πραγματέντζαρ διασκεδάναβα;” Κάνα ακολουθίνασα ο ίδιες αρχές σο βακεράσα ι γιαβερένγκε τι ακολουθίνεν, ισί πιο εύκολος τι νασάς κατά Μπενγκέσκε δολώματα.​—1 Ιωάννη 3:18.

14. Σαρ μπορεί ο Μπενγκ τι προσπαθίνελ τι νταραβέλ-αμέν, ντα σαρ μπορίνασα τι τζας κόντρα κο νταραϊπέ λέσκο;

¹⁴ Ο Μπενγκ προσπαθίνελα επίσης τι νταραβέλ-αμέν για μα τι αβάς αφοσιωμέ κο Ιεχωβά. Για παράδειγμας, μπορεί τι τσσουβέλ ο κυβερνήσεις τι τσσιναβέν αμαρό έργος. Μπορεί τι κερέλ οντουλέν σο κεράσα λέντζαρ μπουτί ή αμαρέ συμμαθητέν τι πρασάν-αμέν επειδή ακολουθίνασα ι Γραφιάκε κανόνες. (1 Πέτρου 4:4) Ο Μπενγκ μπορίνελα ατζέ-ντα τι επηρεάνελ αμαρέ τζενέν, σο μπορεί τι μανγκένα αμαρό λατσσιπέ, για τι τσσιναβέν-αμέν κατά συναθροίσεις. (Ματθαίος 10:​36) Σο μπορίνασα  τι κεράς για τι τζας κόντρα κο νταραϊπέ κι Μπενγκέσκο; Δεν πρέπει τι κερέν αμένγκε εντύπωση ασακέ επιθέσεις, σόσκε τζανάσα ότι ο Μπενγκ πολεμίνελα-αμέν. (Αποκάλυψη 2:​10· 12:​17) Επίσης, πρέπει τι ντας-αμέν γκοντί καβά ισί ο πιο μπαρό ζήτημας: Ο Μπενγκ βακερέλα ότι υπηρετίνασα ι Ιεχωβάς σάντε κάνα ισί εύκολος ντα ότι κα νασάς κατά Ντεβέλ αν ο πράγματα κα δυσκολίντιβεν. (Ιώβ 1:​9-11· 2:4, 5) Ντα πρέπει πάντα τι μανγκάς ζορ κατά Ιεχωβά. Τι ντεν-τουμέν γκοντί ότι ο Ιεχωβά ποτές να κα μουκχέλ-αμέν.​—Εβραίους 13:5.

15. Μπορίνελα ο Μπενγκ τι αναγκάνελ-αμέν τι κεράς πράγματα σο να μανγκάσα; Εξηγίνεν.

¹⁵ Ο Μπενγκ ναστί αναγκάνελα ι τζενέν τι κερέν πράγματα σο να μανγκένα. (Ιακώβου 1:​14) Μπουτ τζενέ κο ντουνιάς να αγαβένα ότι τσσίντενα κατά Μπενγκ. Αλλά κάνα εκ τζενό σικλιόλα ι αλήθεια, πρέπει τι τραμπίνελ αν κα τσσίντελ κατά Ιεχωβά ή κατά Μπενγκ. (Πράξεις 3:​17· 17:​30) Αν ισινάμ αποφασισμέ τι ντας καν ι Ντεβλές, ο Μπενγκ ναστί πφανγκέλα αμαρί αφοσίωση.​—Ιώβ 2:3· 27:5.

16, 17. (α) Σο γιαβέρ ναστί κερέλα ο Μπενγκ ντα ο δαίμονες; (β) Σόσκε δεν πρέπει τι νταράς τι προσευχίντιβας ζουρανές κο Ιεχωβά;

¹⁶ Ισί γιαβερά-ντα πράγματα σο ναστί κερέλα ο Μπενγκ ντα ο δαίμονες. Για παράδειγμας, η Γραφή να βακερέλα πουθενά ότι μπορίνενα τι τζανέν σο τθεράσα αμαρέ γκοντιάτε ή αμαρέ γκίστε. Σάντε ο Ιεχωβά ντα ο Ιησούς μπορίνενα τι κερέν-λες ανταβά. (1 Σαμουήλ 16:7· Μάρκος 2:8) Πρέπει όμως τι νταράς ότι, άμα κεράσα λάφι ή προσευχίντιβασα ζουρανές, ο Μπενγκ ντα ο δαίμονες κα ασουνέν σο βακεράσα ντα κα χρησιμοποιήνεν ανταλά πληροφορίες για τι κερέν αμένγκε γκεραλιπέ; Όχι! Σόσκε; Σκεφτίνεν: Να νταράσα τι κεράς λατσσέ πράγματα κι υπηρεσία κι Ιεχωβάσκι απλά επειδή ο Μπενγκ μπορεί τι ντικχέλ-αμέν. Οτθάρ, δεν πρέπει τι νταράς τι προσευχίντιβας ζουρανές απλά επειδή ο Μπενγκ μπορεί τι ασουνέλ-αμέν. Επίσης, η Γραφή βακερέλα ότι ο υπηρέτες ι Ντεβλέσκε μπουτ φαρ προσευχίντιβενας ζουρανές, ντα πουθενά να διαβάνασα ότι νταρένας μα τι ασουνέλ-λεν ο Μπενγκ. (1 Βασιλέων 8:​22, 23· Ιωάννης 11:​41, 42· Πράξεις 4:​23, 24) Αν κεράσα σο νακχέλα αμαρέ βαστέσταρ για τι μπεϊντίνελ ο Ντεβέλ αμαρέ λάφια ντα αμαρέ πράξεις, μπορίνασα τι αβάς σίγουροι ότι ο Ιεχωβά να κα μουκχέλ ι Μπενγκές τι κερέλ αμένγκε κάτι σο κα μπορίνελας τι κερέλ-αμέν τι χασαράς ι αιώνια ζωή.​—Διαβάνεν Ψαλμός 34:7.

¹⁷ Χρειαζίντιβελα τι τζανάς αμαρέ ντουσμανίς, αλλά να χρειαζίντιβελα τι νταράς λέσταρ. Παρόλο σο ισινάμ ατελείς, με τη βοήθεια ι Ιεχωβάσκι μπορίνασα τι νικίνας ι Μπενγκές! (1 Ιωάννη 2:​14) Άμα κα τζας λέσαρ κόντρα, κα νασέλ αμένταρ. (Ιακώβου 4:7· 1 Πέτρου 5:9) Αντιβές, ο Μπενγκ τζάλα μπουτ κόντρα κο τερνέ. Σαρ μπορίνενα ο τερνέ τι αντιμετωπίνεν ο επιθέσεις ι Μπενγκέσκε; Κα ντικχάς-λες ανταβά κο γιαβέρ μάθημας.