1. Σο μουτθαβένα αμένγκε ο προφητείες ι Γραφιάκε;

ΣΟ ΚΑ αβέλ-πες κι Ιεχωβάσκο λαός ατζεχάνικ; Τζανάσα ι απάντηση. Η Γραφή βακερέλα αμένγκε καλά σημαντικά πράγματα ατζεχάνικ κα επηρεάνεν-αμέν σαριλέν. Ισί εκ προφητεία σο μουκχέλα-αμέν τι ντικχάς σο κα κερέν μερικές κατά πιο ζουρανέ κυβερνήσεις κι πφουβ. Ανταγιά προφητεία ισί γραμμέ κο Δανιήλ κεφάλαιος 11. Οτθέ βακερέλα ντουέ βασιλιαδένγκε σο τζάνα κόντρα ο εκ ι γιαβερέσαρ, ντα ανταλά βασιλιάδες βακέρντιβενα βασιλιάς κατά βορράς ντα βασιλιάς κατά νότος. Ο πιο μπουτ πράγματα ανταλέ προφητειάταρ νικίστιλε μπαγιά, οτθάρ ισινάμ σίγουροι ότι κα νικιόν μπαγιά ο γιαβερά-ντα πράγματα σο βακερέλα.

2. Σο πρέπει τι τθεράς αμαρέ γκοντιάτε κάνα διαβάνασα ι Δανιηλίσκι προφητεία σαρ ντικχίντιβελα κο εδάφια Γένεση 3:​15 ντα Αποκάλυψη 11:7 ντα 12:17;

² Για τι αγαβάς ι προφητεία σο ισί γραμμέ κο Δανιήλ κεφάλαιος 11, πρέπει τι τθεράς αμαρέ γκοντιάτε ότι κερέλα λάφι σάντε για βασιλιάδες ντα κυβερνήσεις σο κερένας κουμάντος τθεμέντε σο τζουβντιόνας μπουτ υπηρέτες ι Ντεβλέσκε ή τσσουβένας-λεν λέντζαρ. Παρόλο σο ο υπηρέτες ι Ντεβλέσκε ισί χάνικ σαρό κο ντουνιάς, μπουτ φαρ τσσουβένα-λεν κι γιακχ. Σόσκε; Επειδή ο Μπενγκ ντα σαρό λέσκο ντουνιάς μανγκένα τι καταστραφίνεν οντουλέν σο υπηρετίνενα ι Ιεχωβάς ντα ι Ιησούς. (Διαβάνεν Γένεση 3:​15 ντα Αποκάλυψη 11:7· 12:​17) Επίσης, η προφητεία σο γραφιντάς ο Δανιήλ πρέπει τι ταιριάνελ γιαβερέ προφητειέντζαρ σο ισί κο Λάφι κι Ντεβλέσκο. Ντα για τι αγαβάς σωστά ι Δανιηλίσκι προφητεία, χρειαζίντιβελα τι ντικχάς γιαβερά-ντα εδάφια κατά Γραφή.

3. Σο κα ντικχάς ανταλέ μαθημάστε ντα κο γιαβέρ;

 ³ Οτθάρ, ακανά κα κεράς λάφι ι εδαφιόνγκε Δανιήλ 11:​25-39. Κα ντικχάς κον ισινέ ο βασιλιάς κατά βορράς ντα κον ο βασιλιάς κατά νότος κατά 1870 μέχρι κο 1991, ντα σόσκε τθεράσα λόγους τι αλλάνας ο τρόπος σο αγαβάσα εκ κομμάτι ανταλέ προφητειάταρ. Κο γιαβέρ μάθημας, κα ντικχάς ο εδάφια Δανιήλ 11:​40–12:1 ντα κα αγαβάς πιο λατσσές ανταβά κομμάτι ι προφητειάκο σο βακερέλα αμένγκε ι βακιτίσκε κατά 1991 μέχρι κο Αρμαγεδδώνας. Καζόμ κα διαβάνεν ανταλά ντούι μαθήματα, κα αβέλ λατσσό τι ντικχέν ο πίνακας «Ντούι Βασιλιάδες Τζάνα Κόντρα ο εκ ι Γιαβερέσαρ κο Τελευταία Ντιβεσά» για τι βοηθίντιβεν. Πρώτα όμως, πρέπει τι τζανάς κον ισί ο ντούι βασιλιάδες ανταλέ προφητειάτε.

4. Καλά τριν πράγματα κα βοηθίνεν-αμέν τι αγαβάς κον ισί ο βασιλιάς κατά βορράς ντα ο βασιλιάς κατά νότος;

⁴ Κι αρχή, ο ναβά «βασιλιάς κατά βορράς» ντα «βασιλιάς κατά νότος» βακέρντιβενας για κυβερνήσεις σο ισινέ βόρεια ντα νότια κατά τθεμ Ισραήλ. Σόσκε βακεράσα-λες ανταβά; Επειδή ο άγγελος βακερντάς κο Δανιήλ: «Αβιλόμ τι βοηθίναβ-τουτ τι αγαβές σο κα αβέλ-πες τι λαόστε κο τελευταία ντιβεσά». (Δαν. 10:​14) Μέχρι κι Πεντηκοστή κο μπρες 33 Κ.Χ., ο λαός Ισραήλ ισινέ ο λαός ι Ντεβλέσκο. Αλλά οτθάρ μπερί, ο Ιεχωβά σικαντάς ξεκάθαρα ότι ο πιστοί μαθητές ι Ιησούσκε ισινέ λέσκο λαός. Άρα, ο πιο μπαρό κομμάτι ι προφητειάκο σο ισί κο βιβλίος Δανιήλ κεφάλαιος 11 βακερέλα ι Χριστόσκε μαθητένγκε, όχι για το λαός Ισραήλ. (Πράξ. 2:​1-4· Ρωμ. 9:​6-8· Γαλ. 6:​15, 16) Ντα καζόμ νακχένας ο μπρεσά, αλλάνελας ο βασιλιάς κατά βορράς ντα ο βασιλιάς κατά νότος. Όμως, κάποια πράγματα ατσσόνας ίδια. Πρώτον, ο βασιλιάδες είτε κερένας κουμάντος τθεμέντε σο τζουβντιόνας μπουτ υπηρέτες ι Ντεβλέσκε είτε τσσουβένας-λεν λέντζαρ. Δεύτερον, ο τρόπος σο συμπεριφερίντιβενας κο λαός κι Ντεβλέσκο σικαβέλας ότι μισίνενας ι αληθινέ Ντεβλές, ι Ιεχωβάς. Ντα τρίτον, ο ντούι βασιλιάδες μανγκένας τι τθερέν μπαρί ζορ, οτθάρ τζάνας κόντρα ο εκ ι γιαβερέσαρ.

5. Ισινέ βασιλιάς κατά βορράς ντα βασιλιάς κατά νότος κο μπρεσά 100 μέχρι 1870; Εξηγίνεν.

⁵ Χάνικ πιο σοράν κατά μπρες 100 Κ.Χ., η αληθινή Χριστιανική κχανγκιρί καζόμ τζάλας πφερντιόλας ψεύτικε Χριστιανόντζαρ, σο σικλιαρένας λάθος πράγματα ντα γκεραβένας ο αλήθειες ι Ντεβλέσκε Λαφίσκε. Από αζομάν ντα μέχρι περίπου κο 1870, ο Ντεβέλ να τθερέλας εκ οργανωμέ λαός οπράλ κι πφουβ. Ο ψεύτικοι Χριστιανοί αβιλέ μπουτ, σαρ ο ζιζάνια εκχέ χωραφίστε. Οτθάρ, ισινέ μπουτ δύσκολος τι αγαντίντιβεν κον ισινέ ο αληθινοί Χριστιανοί. (Ματθ. 13:​36-43) Σόσκε ισί σημαντικός ανταβά; Επειδή σικαβέλα ότι ο βασιλιάς κατά βορράς ντα ο βασιλιάς κατά νότος να ισινέ βασιλιάδες ή κυβερνήσεις σο κερένας κουμάντος κο μπρεσά 100 μέχρι 1870. Ο Ντεβέλ να τθερέλας εκ οργανωμέ λαός για τι τσσουβέν-λεν λέσαρ. * Όμως, χάνικ πιο σοράν κατά 1870, μπορίνασα τι βακεράς ότι αβιλό πάλι εκ βασιλιάς κατά βορράς ντα εκ βασιλιάς κατά νότος. Σόσκε βακεράσα-λες ανταβά;

6. Κάνα αρχισάλο πάλι ο λαός ι Ντεβλέσκο τι οργανώντιβελ; Εξηγίνεν.

⁶ Κατά 1870 ντα σοράν, ο λαός ι Ντεβλέσκο αρχισάλο τι οργανώντιβελ. Οντουβά  μπρες, ο Κάρολος Τ. Ρώσσελ ντα οντουλά σο ισινέ λέσαρ γκιντισάλε για τι ρόντεν λατσσές κι Γραφή. Ο πφραλ Ρώσσελ ντα οντουλά σο ισινέ λέσαρ ισινέ σαρ ο αγγελιοφόρος σο “καθαριντάς ο ντρομ” πριν τι αβέλ η Μεσσιανική Βασιλεία. (Μαλ. 3:1) Ο λαός ι Ντεβλέσκο ισινέ πάλι οργανωμέ! Αζομάν όμως, υπαρχίντιβενας κάποιες κυβερνήσεις σο κα τσσουβένας-λεν ι Ντεβλέσκε υπηρετόντζαρ; Για τι ντικχάς.

7. Κον ισινέ ο βασιλιάς κατά νότος μέχρι κο Πρώτος Παγκόσμιος Πόλεμος;

⁷ Κο 1870, η Βρετανία κερέλας κουμάντος κο πιο μπουτ τθεμά ντα τθερέλας ο πιο ζουρανό στρατός κι πφουβ. Η προφητεία ι Δανιηλίσκι κερέλα λάφι εκχέ χουρντέ σινγκάκε σο νικιντάς τριν γιαβερά σινγκά. Η χουρντί σινγκ ισί η Βρετανία ντα ο γιαβερά σινγκά ισί η Γαλλία, η Ισπανία ντα η Ολλανδία. (Δαν. 7:7, 8) Επίσης, η Βρετανία ισινέ ο βασιλιάς κατά νότος μπουτ μπρεσά σοράν κατά Πρώτος Παγκόσμιος Πόλεμος. Κο ίδια μπρεσά, ο Ηνωμένες Πολιτείες της Αμερικής ισινέ ο πιο χουλανό τθεμ σαρό κο ντουνιάς ντα αρχισάλε τι τθερέν μπουτ λατσσί συνεργασία με τη Βρετανία.

8. Κον ισί ο βασιλιάς κατά νότος κο τελευταία ντιβεσά;

⁸ Κο Πρώτος Παγκόσμιος Πόλεμος, η Βρετανία ντα ο Ηνωμένες Πολιτείες, σο ανγκλέ κερέλας-λεν κουμάντος η Βρετανία, τθερένας συνεργασία ντα αβιλέ γιεκ η πιο μπαρί ζορ σαρό κο ντουνιάς. Σαρ βακερντάας ο Δανιήλ, ανταβά βασιλιάς γκιντιντάς “μπουτ μπαρό ντα ζουρανό στρατός”. (Δαν. 11:​25) Κο τελευταία ντιβεσά, ο βασιλιάς κατά νότος ισί η Αγγλοαμερικανική Παγκόσμια Δύναμη. * Κον ισί όμως ο βασιλιάς κατά βορράς;

9. Κάνα αβιλό εκ νεβό βασιλιάς κατά βορράς, ντα σαρ νικίστιλο μπαγιά ο εδάφιος Δανιήλ 11:25;

⁹ Κο 1871, εκ μπρες αφού ο Ρώσσελ ντα οντουλά σο ισινέ λέσαρ γκιντισάλε για τι ρόντεν λατσσές κι Γραφή, εκ νεβό βασιλιάς κατά βορράς αβιλό. Οντουβά μπρες, ο Ότο φον Μπίσμαρκ βοηθιντάς τι αβέν γιεκ μερικά τθεμά για τι κερέλ εκ μπουτ ζουρανό τθεμ σο βακέρντιβελας Γερμανική Αυτοκρατορία. Ο Γουλιέλμος Α΄ κατά Πρωσία αβιλό βασιλιάς ανταλέ νεβέ τθεμέσκο ντα τραμπιντάς τον Μπίσμαρκ για τι κερέλ κουμάντος ανταγιά κυβέρνηση. * Σοράν, η Γερμανία κερντάς κουμάντος τθεμά κι Αφρική ντα κο Ειρηνικός Ωκεανός, ντα προσπαθιντάς τι αβέλ πιο ζουρανί κατά Βρετανία. (Διαβάνεν Δανιήλ 11:​25) Η Γερμανική Αυτοκρατορία γκιντιντάς εκ μπουτ ζουρανό στρατός ντα τθερέλας πιο μπουτ καράβια σχεδόν σαρέ κατά γιαβερά τθεμά. Ανταλά χρησιμοποιηντάς-λεν κο πρώτος παγκόσμιος πόλεμος για τι κερέλ τζένγκι πι ντουσμανίντζαρ.

10. Σαρ νικίστιλε μπαγιά ο εδάφια Δανιήλ 11:​25β, 26;

¹⁰ Σοράν, ο Δανιήλ βακερντάς σο κα αβέλας-πες κι Γερμανική Αυτοκρατορία ντα κο ζουρανό στρατός σο τθερέλας. Η προφητεία βακερέλα ότι ο βασιλιάς κατά βορράς «να κα ατσσόλ ζουρανό». Σόσκε; «Σόσκε κα κερέν σχέδια για τι χουχαβέν-λες. Οντουλά σο κα χαν λέσκε σουκάρ χαμπιματένταρ κα κερέν-λες τι περέλ». (Δαν. 11:​25β, 26α) Αζομάν σο τζουβντιόλας ο Δανιήλ, οντουλά σο χάνας κατά «βασιλιάσκε χαμπίματα» ισινέ ο τζενέ σο “κερένας μπουτί [ι βασιλιάσκε]”. (Δαν. 1:5) Κάσκε βακερέλα ατθέ η προφητεία; Βακερέλα τζενένγκε σο τθερένας μπαρί ζορ κι Γερμανική Αυτοκρατορία​—σαρ ισί ο στρατηγοί ντα ο στρατιωτικοί σο κερένας μπουτί ι βασιλιάσκε. Ανταλά τζενέ τσσουντέ πουμαρό βας για τι περέλ η αυτοκρατορία. * Η προφητεία να βακερντάας σάντε ότι κα περέλας η αυτοκρατορία, αλλά βακερντάς ο αποτέλεσμας-ντα κατά τζένγκι σο κα αβέλας-πες ι βασιλιάσαρ κατά νότος. Βακερντάς ότι: «Λέσκο στρατός [ι βασιλιάσκο κατά βορράς] κα καταστραφίντιβελ ντα μπουτ τζενέ κα μερέν». (Δαν. 11:​26β) Κο πρώτος παγκόσμιος πόλεμος, ακριβώς σαρ βακέρντιλοας, ο στρατός κατά Γερμανία “καταστραφισάλο” ντα μπουτ τζενέ μπαγιά “μουλέ”. Ανταλέ τζενγκίστε μουλέ ο πιο μπουτ τζενέ σαρέ κατά γιαβερά τζένγκια σο αβιλέ-πες μέχρι αζομάν.

11. Σο κερντάς ο βασιλιάς κατά βορράς ντα ο βασιλιάς κατά νότος;

¹¹ Ο εδάφια Δανιήλ 11:​27, 28 κερένα λάφι πραγματένγκε σο αβιλέ-πες πριν κατά Πρώτος Παγκόσμιος Πόλεμος. Βακερένα ότι ο βασιλιάς κατά βορράς ντα ο βασιλιάς κατά νότος κα “μπεσένας κο ίδιος τραπέζι ντα κα βακερένας ψέματα”. Επίσης, βακερένα ότι ο βασιλιάς κατά βορράς κα γκίντελας “μπερεκέτι λατσσέ πράγματα”. Ντα πάλι, ανταβά ακριβώς αβιλό-πες. Η Γερμανία ντα η Βρετανία βακερένας η εκ κι γιαβέρ ότι μανγκένας ειρήνη, αλλά ανταβά αγαντίντιλο ότι ισινέ εκ μπαρό ψέμας κάνα αβιλό τζένγκι κο 1914. Επίσης, κο μπρεσά πριν κατά 1914, η Γερμανία αβιλίας ο δεύτερος πιο χουλανό τθεμ κι πφουβ. Σοράν, αβιλό-πες μπαγιά ανταβά σο βακερέλα ο εδάφιος Δανιήλ 11:​29 ντα κι αρχή ο εδάφιος 30, η Γερμανία κερντάς τζένγκι ι βασιλιάσαρ κατά νότος αλλά χασαρντάς.

12. Σο κερντάς ο βασιλιάς κατά βορράς ντα ο βασιλιάς κατά νότος κο πρώτος παγκόσμιος πόλεμος;

¹² Κατά 1914 ντα σοράν, ο ντούι βασιλιάδες τζάνας πιο μπουτ κόντρα ο εκ ι γιαβερέσαρ ντα ι Ντεβλέσκε λαόσαρ. Για παράδειγμας, κο πρώτος παγκόσμιος πόλεμος, εμ η γερμανική εμ η βρετανική κυβέρνηση τζάνας κόντρα ι Ντεβλέσκε υπηρετόντζαρ σο να μανγκένας τι τζαν κο τζένγκι. Ντα ο Ηνωμένες Πολιτείες πφαντέ κι φυλακή οντουλέν σο κερένας κουμάντος ο έργος. Ανταβά κερντάς τι νικιόλ μπαγιά η προφητεία κο εδάφια Αποκάλυψη 11:​7-10.

13. Σο κερντάς ο βασιλιάς κατά βορράς σοράν κατά 1933 ντα κο δεύτερος παγκόσμιος πόλεμος;

¹³ Σοράν, κατά 1933 ντα πιο μπουτ κο δεύτερος παγκόσμιος πόλεμος, ο βασιλιάς κατά βορράς τσσιντικιαρντάς μπουτ πράγματα ι Ντεβλέσκε λαός. Κάνα ο Ναζί κερένας κουμάντος κι Γερμανία, ο Χίτλερ ντα οντουλά σο ισινέ λέσαρ να μουκχένας ι Ντεβλέσκε λαός τι κερέλ ο έργος. Ο βασιλιάς κατά βορράς μουνταρντάς περίπου 1.500 υπηρετόν ι Ιεχωβάσκε ντα ατζέ πιο μπουτ μπουτσσάντιλε κο στρατόπεδα συγκέντρωσης. Ο Δανιήλ βακερντάας-λεν σαρέ ανταλά. Ο βασιλιάς κατά βορράς να μουκχέλας ι Ιεχωβάσκε υπηρετόν τι κερέν έργος ντα αντικάς “μαγαριντάς ο αγιαστήριος” ντα “τσσιναντάς ι θυσία σο αβέλας-πες κάθε ντιβές”. (Δαν. 11:​30β, 31α) Ο Χίτλερ, σο κερέλας κουμάντος κι Γερμανία, ντινάς ατζέ-ντα πο λάφι τι μουνταρέλ σαρέ ι Ντεβλέσκε λαός κι Γερμανία.

14. Κον αβιλό ο βασιλιάς κατά βορράς σοράν κατά δεύτερος παγκόσμιος πόλεμος; Εξηγίνεν.

¹⁴ Σοράν κατά δεύτερος παγκόσμιος πόλεμος, η Σοβιετική Ένωση, σο ισινέ εκ κομμουνιστική κυβέρνηση, αβιλί ο βασιλιάς κατά βορράς. Αρχισάλι τι κερέλ κουμάντος μπουτ τθεμά σο κερέλας-λεν κουμάντος η Γερμανία. Σαρ ο Ναζί, αντικάς η Σοβιετική Ένωση-ντα τζάλας μπαρί κόντρα σαρέ οντουλέντε σο τσσουβένας πρώτα πουμαρέ ζωγιάτε ι λατρεία ι αληθινέ Ντεβλέσκι.

15. Σο κερντάς ο βασιλιάς κατά βορράς αφού τελειωσάλο ο Δεύτερος Παγκόσμιος Πόλεμος;

¹⁵ Αφού τελειωσάλο ο Δεύτερος Παγκόσμιος Πόλεμος, ο νεβό βασιλιάς κατά βορράς, η Σοβιετική Ένωση ντα ο τθεμά σο ισινέ λάσαρ, τσσουντάς-λεν ι Ντεβλέσκε λαόσαρ. Ο εδάφια Αποκάλυψη 12:​15-17 βακερένα ότι η κόντρα σο κα τζάνας ι Ντεβλέσκε λαόσαρ ισί σαρ εκ “λεν”. Σαρ βακερέλα ανταγιά προφητεία, ο βασιλιάς κατά βορράς να μουκχέλας τι αβέλ-πες ο έργος ντα μπουτσσαντάς χιλιάδες υπηρετόν ι Ιεχωβάσκε ντουρ λένγκε κχερένταρ. Κι πραγματικότητα, από αζομάν σο αρχισάλε ο τελευταία ντιβεσά, ο βασιλιάς κατά βορράς τζάλα μπαρί κόντρα κι Ντεβλέσκο λαός, αλλά ποτές ναστί τσσιναντάς λέσκο έργος. *

16. Σαρ κερντάς η Σοβιετική Ένωση τι νικιόν μπαγιά ο εδάφια Δανιήλ 11:​37-39;

¹⁶ Διαβάνεν Δανιήλ 11:​37-39. Σαρ βακερέλα η προφητεία, ο βασιλιάς κατά βορράς “να σεβαντάς ι Ντεβλές σο τθερένας λέσκε νταντά”. Σαρ αβιλό-πες ανταβά; Η Σοβιετική Ένωση, μανγκέλας τι καταστραφίνελ ι θρησκεία, οτθάρ προσπαθιντάς τι λελ κατά θρησκείες σαρί ι ζορ σο τθερένας. Για τι κερέλ-λες ανταβά, η σοβιετική κυβέρνηση κατά 1918 αρχιντάας τι βακερέλ κο σχολεία τι σικλιαρέν ότι να νανέ Ντεβέλ. Σαρ “δοξαντάς ι ντεβλές σο κερέλα κουμάντος ο φρούρια” ανταβά βασιλιάς κατά βορράς; Η  Σοβιετική Ένωση χαλαντάς μπουτ λοβέ για τι αβγατίνελ πο στρατός ντα τι κερέλ χιλιάδες πυρηνικά όπλα σο κα κερένας-λα ατζέ πιο ζουρανί. Τελικά, εμ ο βασιλιάς κατά βορράς εμ ο βασιλιάς κατά νότος γκιντιντέ μπερεκέτι όπλα σο κα μπορίνενας τι μουνταρέν δισεκατομμύρια τζενέν!

17. Σο ισί «ο τζουνγκαλό πράγμας σο ανέλα καταστροφή»;

¹⁷ Ο βασιλιάς κατά βορράς γιεκ ι βασιλιάσαρ κατά νότος κερντέ εκ σημαντικός πράγμας. “Τσσουντέ ο τζουνγκαλό πράγμας σο ανέλα καταστροφή”. (Δαν. 11:​31) Ανταβά «τζουνγκαλό πράγμας» ισί ο Ηνωμένα Έθνη.

18. Σόσκε βακέρντιβενα ο Ηνωμένα Έθνη «τζουνγκαλό πράγμας»;

¹⁸ Ο Οργανισμός Ηνωμένων Εθνών βακέρντιβελα «τζουνγκαλό πράγμας» σόσκε αμντίνελα ότι μπορίνελα τι ανέλ ειρήνη σαρό κο ντουνιάς, κάτι σο μπορίνελα τι κερέλ σάντε η Βασιλεία ι Ντεβλέσκι. Επίσης, η προφητεία βακερέλα ότι ο τζουνγκαλό πράγμας «ανέλα καταστροφή» σόσκε ο Ηνωμένα Έθνη κα τσσουβέν-λεν σαρέ ι ψεύτικε θρησκειέντζαρ ντα κα καταστραφίνεν-λεν.​—Ντικχέν ο πίνακας «Ντούι Βασιλιάδες Τζάνα Κόντρα ο εκ ι Γιαβερέσαρ κο Τελευταία Ντιβεσά».

19, 20. (α) Σόσκε πρέπει τι τζανάς σαρέ ανταλά πράγματα; (β) Καλέ ερωτησιάτε κα απαντίνελ ο γιαβέρ μάθημας;

¹⁹ Πρέπει τι τζανάς σαρέ ανταλά πράγματα σόσκε σικαβένα ότι κατά 1870 μέχρι κο 1991 η προφητεία ι Δανιηλίσκι, σο βακερέλα ι βασιλιάσκε κατά βορράς ντα ι βασιλιάσκε κατά νότος, νικίστιλι μπαγιά. Άρα, μπορίνασα τι πακιάς ότι κα νικιόλ μπαγιά ο γιαβέρ-ντα κομμάτι ι προφητειάκο.

²⁰ Κο 1991, η Σοβιετική Ένωση πελί. Κον ισί αντιβές ο βασιλιάς κατά βορράς; Ο γιαβέρ μάθημας κα ντελ-αμέν ι απάντηση.