1. Σόσκε μπορεί τι σαστισάλεν ι πρώτη φαρ σο κερντέν λάφι κο γιαβερά οντουλένγκε σο βακερέλα η Γραφή;

ΝΤΕΝΑ-ΤΟΥΜΕΝ γκοντί κάνα αγαντέν ότι αρακχλένας ι αλήθεια; Ισινέ μπουτ εύκολος τι αγαβέν οντουλά σο σικλιόνας κατά Γραφή! Αμντίνενας ότι σαρέ κα χαιρίνενας τι σικλιόν ο πράγματα σο σικλιλένας. Ισινένας σίγουροι ότι οντουλά σο βακερέλα η Αγία Γραφή κα βοηθίνενας-λεν τι τθερέν εκ πφερντί ζωή ακανά ντα κα ντένας-λεν εκ σουκάρ ελπίδα ι ντιβεσένγκε σο κα αβέν. (Ψαλμ. 119:​105) Οντουλέσκε, βακερντέν σαρέ τουμαρέ αμαλένγκε ντα τουμαρέ τζενένγκε ο αλήθειες σο αρακχλένας. Αλλά σο αβιλό-πες; Σαστισάλεν σόσκε μπουτ λένταρ να μανγκλέ τι ασουνέν οντουλά σο βακερντέν λένγκε.

2, 3. Κο ντιβεσά κι Ιησούσκε, σο πακιάνας ο πιο μπουτ τζενέ λέσκε;

² Καέκ αμένταρ δεν πρέπει τι σαστίνελ κάνα ο γιαβερά να μανγκένα τι ασουνέν ο λατσσέ αμπέρια σο βακεράσα λένγκε. Κο ντιβεσά κι Ιησούσκε, ο πιο μπουτ τζενέ να πακιαντέ λέστε, παρόλο σο λέσκε θαύματα σικαβένας ότι ο Ντεβέλ ισινέ πασέ λέστε. Για παράδειγμας, ο Ιησούς τζουβντιαρντάς ι Λαζαρός. Ανταβά ισινέ εκ θαύμας σο οντουλά σο τζάνας κόντρα ι Ιησούσαρ ναστί βακερένας ότι να αβιλό-πες. Όμως, ο Ιουδαίοι αρχηγοί να πακιάνας ότι ο Ιησούς ισινέ ο Μεσσίας, ντα μανγκλέ τι μουνταρέν εμ λες εμ ι Λαζαρός!​—Ιωάν. 11:​47, 48, 53· 12:​9-11.

³ Ο Ιησούς τζανέλας ότι ο πιο μπουτ τζενέ να κα μανγκένας τι πακιάν ότι βοβ ισινέ ο Μεσσίας. (Ιωάν. 5:​39-44) Βακερντάς μερικέ μαθητένγκε σο τθερέλας ο Ιωάννης ο Βαφτιστής: «Ευτυχισμέ ισί οντουβά σο να χασαρέλα πι πίστη ιτιρί μάνταρ». (Ματθ. 11:2, 3, 6) Σόσκε αζόμ μπουτ τζενέ να πακιαντέ κο Ιησούς;

4. Σο κα ντικχάς ανταλέ μαθημάστε;

 ⁴ Ανταλέ μαθημάστε ντα κο γιαβέρ, κα ντικχάς σόσκε μπουτ τζενέ κο ντιβεσά κι Ιησούσκε να πακιαντέ λέστε. Επίσης, κα ντικχάς σόσκε μπουτ τζενέ αντιβές να μανγκένα τι ασουνέν ο λατσσέ αμπέρια σο βακεράσα λένγκε. Ντα ο πιο σημαντικός, κα σικλιάς σόσκε μπορίνασα τι τθεράς ζουρανί πίστη κο Ιησούς ντα αντικάς μα τι μουκχάς τίποτα τι τσσιναβέλ-αμέν τι τζας παλά-λέστε.

5. Σόσκε μπορεί τι σκεφτίνενας μερικοί ότι ο Ιησούς να ισινέ ο Μεσσίας;

⁵ Ο τρόπος σο μπαριλό ο Ιησούς κερντάς μπουτέ τζενέν μα τι πακιάν λέστε. Αγαβένας ότι ισινέ μπουτ λατσσό δάσκαλος ντα ότι κερέλας θαύματα. Αλλά λένγκε, ισινέ σάντε ο τσσαβό εκχέ τσορορέ ξυλουργόσκο. Ντα ισινέ κατά Ναζαρέτ, εκ πόλη σο ι τζενένγκε μπορεί μα τι ισινέ αζόμ σημαντική. Ατζέ-ντα ο Ναθαναήλ, σο αβιλό μαθητής ι Ιησούσκο, κι αρχή βακερντάς: «Μπορίνελα τι νικιόλ κάτι λατσσό κατά Ναζαρέτ;» (Ιωάν. 1:​46) Μπέκιμ πακιάλας βοβ-ντα ότι η πόλη σο τζουβντιόλας ο Ιησούς να ισινέ σημαντική. Ή μπορεί τι τθερέλας πι γκοντιάτε ι προφητεία σο ισί κο εδάφιος Μιχαίας 5:2, σο βακερέλας ότι ο Μεσσίας κα μπιάντιβελας κι Βηθλεέμ, όχι κι Ναζαρέτ.

6. Σο κα βοηθίνελας ι τζενέν κο ντιβεσά κι Ιησούσκε τι αγαβέν ότι ο Ιησούς ισινέ ο Μεσσίας;

⁶ Σο βακερέλα η Γραφή; Ο προφήτης Ησαΐας βακερντάας ότι ο ντουσμάνια ι Ιησούσκε να κα μανγκένας τι ρόντεν “κατάρ αστάρντιβελας [ο Μεσσίας]”. (Ησ. 53:8) Γραφίντιλεας μπουτ προφητείες σο βακερένας πράγματα ι Ιησούσκε ζωγιάκε. Άμα οντουλά τζενέ κα ντένας πουμαρέ σαατίσταρ για τι ρόντεν ανταλά πράγματα, κα σικλιόνας ότι ο Ιησούς μπιάντιλο κι Βηθλεέμ ντα ότι αστάρντιβελας κατά βασιλιάς Δαβίδ. (Λουκ. 2:​4-7) Οτθάρ, αγαβάσα ότι ο Ιησούς μπιάντιλο οτθέ σο βακερέλας η προφητεία σο ισί κο εδάφιος Μιχαίας 5:2. Άρα, καβά ισινέ ο πρόβλημας; Ο τζενέ σιγκιαρντέ τι πακιάν μερικά πράγματα χωρίς τι τζανέν άμα ισί μπαγιά. Οτθάρ, να πακιαντέ κο Ιησούς.

7. Σόσκε μπουτ τζενέ αντιβές να μανγκένα τι αβέν Μάρτυρες ι Ιεχωβάσκε;

⁷ Τθεράσα ανταβά πρόβλημας αντιβές; Βα. Ο πιο μπουτ υπηρέτες ι Ιεχωβάσκε νανέ χουλανέ ή σημαντικά τζενέ. Μπουτ τζενέ βακερένα ότι ισί «αγράμματοι ντα συνηθισμέ». (Πράξ. 4:​13) Μερικοί πακιάνα ότι ο υπηρέτες ι Ντεβλέσκε ναστί σικλιαρένα κατά Γραφή σόσκε να νακχλέ καέκ πανεπιστήμιος για τι σικλιόν ι Γραφιάκε. Γιαβερά βακερένα ότι ο Μάρτυρες ι Ιεχωβάσκε ισί «αμερικανική θρησκεία». Αλλά η αλήθεια ισί ότι ο πιο μπουτ Μάρτυρες ι Ιεχωβάσκε να τζουβντιόνα κι Αμερική. Ντα γιαβερά ασουντέ ότι ο Μάρτυρες να πακιάνα κο Ιησούς. Σαρέ ανταλά μπρεσά, μπουτ τζενέ βακερένα ότι ο λαός ι Ιεχωβάσκο ισί «κομμουνιστές», «Αμερικανοί κατάσκοποι» ντα «τζενέ σο τζάνα κόντρα κο κράτος». Οντουλέσκε μπουτ τζενέ να μανγκένα τι αβέν Μάρτυρες ι Ιεχωβάσκε σόσκε ασουνένα ασακέ ιστορίες ντα να τζανένα ι αλήθεια ι Ιεχωβάσκε λαόσκε.

8. Σο πρέπει τι κερέν ο τζενέ για τι αγαβέν καβά ισί ο λαός ι Ντεβλέσκο αντιβές σαρ βακερέλα ο εδάφιος Πράξεις 17:11;

⁸ Σο κα βοηθίνελ ι τζενέν τι σικλιόν ι αλήθεια ι Ιεχωβάσκε λαόσκε; Ο τζενέ πρέπει τι ρόντεν τι αρακχέν καγιά ισί η αλήθεια. Ανταβά μανγκέλας τι κερέλ ο Ευαγγελιστής Λουκάς. Προσπαθιντάς τι ρόντελ «μπουτ λατσσές σαρέ ο πράγματα από την αρχή». Μανγκέλας, οντουλά σο κα διαβάνενας λέσκο Ευαγγέλιος, τι “τζανέν μπουτ λατσσές ότι κα μπορίνενας τι ντεν μπέσα” οντουλένγκε σο ασουντέας ι Ιησούσκε. (Λουκ. 1:​1-4) Ο Ιουδαίοι σο τζουβντιόνας κι πουρανί Βέροια ισινέ σαρ ο Λουκάς. Κάνα ασουντέ πρώτη φαρ ο λατσσέ αμπέρια ι Ιησούσκε, συγκριντέ ο  πράγματα σο ασουνένας οντουλέντζαρ σο βακερένας ο Εβραϊκές Γραφές για τι αβέν σίγουροι. (Διαβάνεν Πράξεις 17:​11) Αντικάς ο τζενέ-ντα αντιβές, πρέπει τι ρόντεν τι αρακχέν καγιά ισί η αλήθεια. Πρέπει τι συγκρίνεν οντουλά σο σικλιόνα κατά λαός ι Ντεβλέσκο οντουλέντζαρ σο βακερέλα η Γραφή. Επίσης, πρέπει τι διαβάνεν οντουλά σο κερέλα ο λαός ι Ιεχωβάσκο αμαρέ ντιβεσέντε. Άμα ρόντενα λατσσές, να κα μουκχέν κο πράγματα σο βακερένα ντα σικλιαρένα ο τζενέ τι επηρεάνεν-λεν.

9. Σο αβιλό-πες κάνα ο Ιησούς να μανγκλάς τι σικαβέλ εκ σημείος κατά ουρανός;

⁹ Μερικέ τζενένγκε να ερεσένας λένγκε ο σουκάρ πράγματα σο σικλιαρέλας ο Ιησούς. Μανγκένας κάτι γιαβέρ-ντα. Βακερντέ λέσκε ότι για τι πακιάν ότι ισινέ ο Μεσσίας, έπρεπε τι σικαβέλ λένγκε εκ «σημείος κατά ουρανός». (Ματθ. 16:1) Μπορεί τι μανγκλέ-λες λέσταρ ανταβά επειδή να αγαντέας λατσσές ο εδάφια Δανιήλ 7:​13, 14. Όμως, να ισινέ ατζέκ ο βακίτι ι Ιεχωβάσκο τι νικιόλ μπαγιά ανταγιά προφητεία. Σάντε οντουλένταρ σο σικλιαρέλας ο Ιησούς, έπρεπε τι αβέν σίγουροι ότι βοβ ισινέ ο Μεσσίας. Αλλά κάνα να κερντάς οντουβά σο μανγκλέ λέσταρ, βον να πακιαντέ λέστε.​—Ματθ. 16:4.

10. Σαρ κερντάς ο Ιησούς τι νικιόλ μπαγιά οντουβά σο γραφιντάς ο Ησαΐας ι Μεσσιάσκε;

¹⁰ Σο βακερέλα η Γραφή; Ο προφήτης Ησαΐας γραφιντάς ι Μεσσιάσκε: «Να κα ντελ βίκος ούτε κα βάντελ πι φωνή, ντα να κα μουκχέλ πι φωνή τι ασούντιβελ κο ντρομ». (Ησ. 42:1, 2) Ο Ιησούς κερέλας πο έργος χωρίς τι ταρτίνελ ι προσοχή οπρά-πέστε. Να κερντάς μπαρέ ναούς, να ιρίλας σέα σαρ οντουλά σο ιρίνας ο παπάζια ούτε μανγκέλας τι ντεν-λες βίκος σαρ ντένας βίκος ι παπαζίν αζομάν. Κάνα δικάνενας-λες, ο Ιησούς να μανγκλάς τι κερέλ εκ θαύμας για τι σικαβέλ κο βασιλιάς Ηρώδης ότι ισινέ ο Μεσσίας, παρόλο σο λέσκι ζωή ισινέ σε κίνδυνος. (Λουκ. 23:​8-11) Ο Ιησούς κερντάς μερικά θαύματα, αλλά ο πιο σημαντικός πράγμας λέσκε ισινέ τι βακερέλ ο λατσσέ αμπέρια. «Ανταλέσκε αβιλόμ», βακερντάς πι μαθητένγκε.​—Μάρκ. 1:38.

11. Καλά λάθος πράγματα πακιάνα μερικά τζενέ αντιβές;

 ¹¹ Τθεράσα ανταβά πρόβλημας αντιβές; Βα. Μπουτ τζενέ αντιβές εντυπωσιάντιβενα κατά μπαρέ ναούς σο τθερένα αντρέ πααλίς εικόνες ντα χρυσά πράγματα, κατά παπάζια σο τθερένα τίτλους για τι ντικχίντιβεν σημαντικοί ντα κατά πράγματα σο κερένα για τι ντεν δόξα ι Ντεβλές παρόλο σο ο πιο μπουτ μπισταρντέ κατάρ αστάρντιβενα ντα σο μανγκένα τι βακερέν. Αλλά ο τζενέ σο τζάνα κο ναοί να σικλιόνα μπουτ πράγματα ι Ντεβλέσκε ντα οντουλένγκε σο τθερέλα πι γκοντιάτε τι κερέλ. Οντουλά σο αβένα κο συναθροίσεις σο κεράσα, σικλιόνα σο μανγκέλα ο Ιεχωβά αμένταρ, ντα σαρ μπορίνασα τι κεράς οντουλά σο βακερέλα. Αμαρέ Αίθουσες Βασιλείας ισί πάκι ντα απλές, ντα νανέ πφερντέ πααλίς πραγματέντζαρ. Οντουλά σο τθερένα ι ευθύνη αντρέ κι κχανγκιρί, να ιριαβένα-πες διαφορετικά ούτε τθερένα τίτλους σο κερένα-λεν τι ντικχίντιβεν σημαντικοί. Σο-ντα σικλιαράσα ντα σο-ντα πακιάσα ισί κατά Γραφή. Όμως, μπουτ τζενέ αντιβές να μανγκένα τι ασουνέν-αμέν σόσκε πακιάνα ότι ο τρόπος σο ντάσα λατρεία ι Ντεβλές ισί μπουτ απλός ντα ότι οντουλά σο σικλιαράσα να ταιριάνενα οντουλέντζαρ σο μανγκένα τι ασουνέν.

12. Σο κα βοηθίνελ-αμέν τι τθεράς ζουρανί πίστη σαρ βακερένα ο εδάφια Εβραίους 11:1, 6;

¹² Σο κα βοηθίνελ-αμέν μα τι χασαράς αμαρί πίστη; Ο απόστολος Παύλος βακερντάς ι Χριστιανόνγκε σο τζουβντιόνας κι Ρώμη: «Η πίστη αβέλα κατά πράγματα σο ασουνέλα εκ τζενό. Ντα ο πράγματα σο ασουνέλα ισί αντράλ κατά λάφι σο τθερέλα τι κερέλ ι Χριστόσαρ». (Ρωμ. 10:​17) Άρα, κεράσα αμαρί πίστη πιο ζουρανί κάνα διαβάνασα ι Γραφή, όχι κάνα κεράσα ο πράγματα ι θρησκειάκε σο ντικχίντιβενα σουκάρ αλλά τζάνα κόντρα ι Γραφιάσαρ. Πρέπει τι σικλιάς πιο μπουτ πράγματα ι Ντεβλέσκε για τι τθεράς ζουρανί πίστη σόσκε «χωρίς πίστη να αβέλα-πες εκ τζενό τι κερέλ ι Ντεβλέσκο γκι». (Διαβάνεν Εβραίους 11:1, 6) Οντουλέσκε, να χρειαζίντιβελα τι ντικχάς καέκ μπαρό σημείος κατά ουρανός για τι πακιάς ότι αρακχλάμ ι αλήθεια. Άμα κα διαβάνας με προσοχή ο λάφια ι Γραφιάκε, σο κερένα αμαρί πίστη πιο ζουρανί, ανταβά ερεσέλα για τι πακιάς σαρέ αμαρέ γκίσαρ ότι τθεράσα ι αλήθεια.

13. Σόσκε μπουτ τζενέ να πακιαντέ κο Ιησούς;

¹³ Κο ντιβεσά κι Ιησούσκε, ο μαθητές σο τθερέλας ο Ιωάννης ο Βαφτιστής σαστίνενας σο ντικχένας ι μαθητέν ι Ιησούσκε μα τι κερέν νηστεία. Ο Ιησούς βακερντάς ότι να χρειαζίντιβελας τι κερέν νηστεία καζόμ βοβ ισινέ ατζέ τζουβντό. (Ματθ. 9:​14-17) Όμως, ο Φαρισαίοι ντα γιαβερά τζάνας κόντρα ι Ιησούσαρ σόσκε να κερέλας ο έθιμα σο κερένας βον. Χολιάνενας κάνα κερέλας λατσσές ι νασφαλέν κο Σάββατος. (Μάρκ. 3:​1-6· Ιωάν. 9:​16) Μπορεί τι βακερένας ότι κερένας ο Σάββατος, αλλά να σακιντίνενας τι κινέν ντα τι μπικινέν πράγματα κο ναός. Χολιασάλε μπουτ κάνα ο Ιησούς βακερντάς λένγκε ότι οντουβά να ισινέ σωστός. (Ματθ. 21:​12, 13, 15) Ντα κάνα ο Ιησούς ισινέ κι συναγωγή κι Ναζαρέτ, μπουτ τζενέ χολιασάλε κάνα χρησιμοποιηντάς παραδείγματα κατά ιστορία ι Ισραηλιτένγκι για τι σικαβέλ λένγκε ότι ισινέ μπαρικανέ ντα ότι να τθερένας πίστη. (Λουκ. 4:​16, 25-30) Μπουτ τζενέ να πακιαντέ κο Ιησούς σόσκε να κερέλας οντουλά σο μπεκλεντίνενας.​—Ματθ. 11:​16-19.

14. Σόσκε βακερντάς ο Ιησούς μα τι κερέν ο έθιμα σο τζάνας κόντρα ι Γραφιάσαρ;

¹⁴ Σο βακερέλα η Γραφή; Ο Ιεχωβά βακερντάς αντράλ κατά προφήτης Ησαΐας: «Ανταβά λαός αβέλα πασέ μάντε πι λαφίντζαρ ντα δοξάνελα-μαν πι μόσαρ, αλλά ο γκι λέσκο ισί μπουτ ντουρ μάνταρ· ντα νταρένα μάνταρ σόσκε σικλιλέ ο εντολές ι τζενένγκε». (Ησ. 29:​13) Ο Ιησούς τθερέλας δίκιος σο βακερντάς μα τι κερέν ο έθιμα σο τζάνας κόντρα ι Γραφιάσαρ. Οντουλά σο τσσουβένας ο κανόνες ντα ο έθιμα ι τζενένγκε πιο οπρέ κατά Γραφή να πακιαντέ κο Ιεχωβά ντα οντουλέστε σο βοβ μπουτσσαντάς σαρ Μεσσίας.

15. Σόσκε μπουτ τζενέ αντιβές χολιάνενα ι Ιεχωβάσκε Μαρτυρέντζαρ;

¹⁵ Τθεράσα ανταβά πρόβλημας αντιβές; Βα. Μπουτ τζενέ χολιάνενα κάνα ο Μάρτυρες ι Ιεχωβάσκε να κερένα λέντζαρ έθιμα σο τζάνα κόντρα ι Γραφιάσαρ, σαρ ισί ο γενέθλια ντα ο Χριστούγεννα. Γιαβερά χολιάνενα κάνα ο Μάρτυρες ι Ιεχωβάσκε να κερένα γιορτές για τι ισαρέν πουμαρό τθεμ ή έθιμα ι μουλένγκε σο τζάνα κόντρα ι Γραφιάσαρ. Οντουλά σο χολιάνενα ι Ιεχωβάσκε Μαρτυρέντζαρ ιτιρί ανταλέ πραγματένταρ μπορεί τι πακιάνα μπαγιά ότι ντένα λατρεία ι Ντεβλές αντικάς σαρ μανγκέλα. Αλλά ναστί κερένα ι Ντεβλέσκο γκι άμα τσσουβένα ο έθιμα ι ντουνιάσκε πιο οπρέ οντουλένταρ σο σικλιαρέλα η Γραφή.​—Μάρκ. 7:​7-9.

16. Σο πρέπει τι κεράς ντα σο δεν πρέπει τι κεράς σαρ βακερένα ο εδάφια Ψαλμός 119:​97, 113, 163-165;

¹⁶ Σο κα βοηθίνελ-αμέν μα τι χασαράς αμαρί πίστη; Πρέπει τι μανγκάς ατζέ πιο μπουτ ο νόμοι ντα ο αρχές ι Ιεχωβάσκε. (Διαβάνεν Ψαλμός 119:​97, 113, 163-165) Άμα μανγκάσα ι Ιεχωβάς, να κα μανγκάς τι κεράς καέκ έθιμος σο πφανγκέλα λέσκο γκι. Να κα τσσουβάς τίποτα πιο οπρέ κατά αγάπη σο τθεράσα ι Ιεχωβάσκε.

17. Κο ντιβεσά κι Ιησούσκε, σο μπεκλεντίνενας μπουτ τζενέ ότι κα κερέλας ο Μεσσίας;

¹⁷ Μερικοί κο ντιβεσά κι Ιησούσκε μανγκένας τι αλλάνελ η κυβέρνηση. Μπεκλεντίνενας ότι ο Μεσσίας κα ελευθερώνελας-λεν κατά Ρωμαίους σο τσσιντικιαρένας-λεν μπουτ πράγματα. Όμως κάνα προσπαθιντέ τι κερέν-λες βασιλιάς, βοβ να μανγκλάς. (Ιωάν. 6:​14, 15) Ο ιερείς ντα γιαβερά νταρένας ότι ο Ιησούς κα προσπαθίνελας τι ανέλ εκ γιαβέρ κυβέρνηση. Πακιάνας ότι σοράν ο Ρωμαίοι κα χολιάνενας ντα κα λένας λένταρ ι εξουσία σο ντινέας-λεν. Επειδή ανησυχίνενας για το πολιτικά, μπουτ Ιουδαίοι να πακιαντέ κο Ιησούς.

18. Καλά προφητείες σο τθερένας τι κερέν ι Μεσσιάσαρ να ντένας σημασία μπουτ τζενέ;

¹⁸ Σο βακερέλα η Γραφή; Παρόλο σο μπουτ  προφητείες βακερένας ότι ο Μεσσίας κο τέλος κα αβέλας εκ Πολεμιστής σο κα νικίνελας πι ντουσμανίν, γιαβερά προφητείες σικαβένας ότι έπρεπε πρώτα τι μερέλ αμαρέ αμαρτιένγκε. (Ησ. 53:9, 12) Άρα, σόσκε ο Ιουδαίοι πακιάνας λάθος πράγματα ι Μεσσιάσκε; Μπουτ τζενέ κο ντιβεσά κι Ιησούσκε ντένας σημασία σάντε κο προφητείες σο βακερένας ότι λένγκε προβλήματα κα τελειώνενας.​—Ιωάν. 6:​26, 27.

19. Καλά λάθος πράγματα σο πακιάνα ο τζενέ κερένα-λεν μα τι ασουνέν-αμέν;

¹⁹ Τθεράσα ανταβά πρόβλημας αντιβές; Βα. Μπουτ τζενέ να μανγκένα τι ασουνέν-αμέν επειδή να ανακατούντιβασα κο πολιτικά. Βακερένα ότι πρέπει τι ψηφίνας κο εκλογές. Όμως, αμέν αγαβάσα ότι άμα τραμπίνασα εκχέ τζενές τι κερέλ-αμέν κουμάντος, ισί σαρ τι κεράσα ι Ιεχωβάς κι νάκρη. (1 Σαμ. 8:​4-7) Επίσης, ο τζενέ μπορεί τι πακιάνα ότι πρέπει τι κεράς σχολεία, νοσοκομεία ή τι γκίντας λοβέ ι τσορορένγκε. Να μανγκένα τι ασουνέν-αμέν επειδή κεράσα μπαρέ προσπάθειες τι βακεράς ο λατσσέ αμπέρια αντίς τι προσπαθίνας τι λύνας ο προβλήματα ι ντουνιάσκε.

20. Καβά πρέπει τι αβέλ ο πιο σημαντικός πράγμας αμένγκε σαρ βακερντάς ο Ιησούς κο εδάφια Ματθαίος 7:​21-23;

²⁰ Σο κα βοηθίνελ-αμέν μα τι χασαράς αμαρί πίστη; (Διαβάνεν Ματθαίος 7:​21-23) Ο πιο σημαντικός πράγμας αμένγκε πρέπει τι αβέλ τι κεράς ο έργος σο βακερντάς αμένγκε ο Ιησούς. (Ματθ. 28:​19, 20) Δεν πρέπει ποτές τι ντας μπουτ αμαρέ σαατίσταρ για τι λύνας σαρέ ο προβλήματα ι ντουνιάσκε. Μανγκάσα ι τζενέν ντα πφαμπάσα λένγκε. Αλλά τζανάσα ότι ο πιο λατσσό τρόπος για τι βοηθίνας-λεν ισί τι σικλιαράς-λεν ι Ντεβλέσκε Βασιλειάκε ντα τι βοηθίνας-λεν τι αβέν αμαλά ι Ιεχωβάσαρ.

21. Σο πρέπει τι αβάς αποφασισμέ τι κεράς;

²¹ Ανταλέ μαθημάστε, ντικχλάμ σταρ λόγους σο μπουτ τζενέ κο ντιβεσά κι Ιησούσκε να πακιαντέ λέστε ντα κα μπορίνενας τι κερέν μερικέ τζενέν μα τι ασουνέν ι μαθητέν ι Ιησούσκε αντιβές. Αλλά υπαρχίντιβενα σάντε ανταλά λόγοι; Νάα. Κο γιαβέρ μάθημας, κα ντικχάς σταρ γιαβερά-ντα λόγους. Τι αβάς αποφασισμέ μα τι χασαράς αμαρί πίστη κο Ιησούς αλλά τι ατσσικιαράς-λα ζουρανί!