ΜΑΘΗΜΑΣ 19
Αποκάλυψη—Σο Μανγκέλα τι Βακερέλ Τουμένγκε Αντιβές
«Ευτυχισμέ ισί οντουβά σο διαβάνελα ζουρανές . . . ο λάφια ανταλέ προφητειάκε».—ΑΠΟΚ. 1:3.
ΥΜΝΟΣ 15 Ντεν Δόξα κο Πρώτος Τσσαβό κι Ιεχωβάσκο!
ΣΟ ΚΑ ΝΤΙΚΧΑΣ *
1, 2. Καβά ισί εκ λόγος σο πρέπει τι μανγκάς τι σικλιάς σο βακερέλα η Αποκάλυψη;
ΝΤΙΝΑΣ-ΤΟΥΜΕΝ εκ τζενό τι ντικχέν καέκ φαρ λέσκε φωτογραφίες; Κο πο μπουτ φωτογραφίες, ντικχένα τζενέν σο να τζανένα-λεν. Αλλά τουμαρί γιακ περέλα εκχέ φωτογραφιάτε. Σόσκε; Σόσκε ισινέν τουμέν-ντα αντρέ. Ντικχένα-λα λατσσές για τι ντεν-τουμέν γκοντί κάνα ντα κάι νικίστιλεν ανταγιά φωτογραφία ντα για τι αγαβέν καλά ισί ο γιαβερά τζενέ. Οντιά φωτογραφία τθερέλα μπαρί σημασία τουμένγκε.
2 Ο βιβλίος Αποκάλυψη ισί σαρ οντιά φωτογραφία. Σόσκε; Ντικχέν ντούι λόγοι. Πρώτον, ανταβά βιβλίος ι Γραφιάκο γραφισάλο αμένγκε. Ο πρώτος εδάφιος βακερέλα: «Αποκάλυψη κατά Ιησούς Χριστός, σο ντινάς-λα λέστε ο Ντεβέλ, για τι σικαβέλ πι δουλόνγκε οντουλά σο πρέπει τι αβέν-πες ατζεχάνικ». (Αποκ. 1:1) Οτθάρ, ο λάφια ανταλέ βιβλιόσκε νανέ σαρέ ι τζενένγκε αλλά ισί αμένγκε, σο ντινάμ αμαρό λάφι τι τζουβντιάς ι Ντεβλέσκε. Σαρ λαός ι Ντεβλέσκο, δεν πρέπει τι σαστίνας άμα ντικχλάμ ότι βοηθίνασα τι νικιόν μπαγιά ο προφητείες ανταλέ μπουτ σουκάρ βιβλιόσκε. Γιαβερέ λαφίντζαρ, ντικχάσα-αμέν «αντρέ κι φωτογραφία».
3, 4. Σαρ βακερέλα ο βιβλίος Αποκάλυψη, κάνα κα νικιόνας μπαγιά λάκε προφητείες, ντα σο πρέπει τι μανγκέλ τι κερέλ ο κάθε εκ αμένταρ;
3 Ο δεύτερος λόγος τθερέλα τι κερέλ ι βακιτίσαρ σο νικιόνα μπαγιά ανταλά προφητείες. Ο πφουρό απόστολος Ιωάννης σικαντάς καβά κα αβέλας ανταβά βακίτι κάνα βακερντάς: «Ο άγιος πνεύμας αντάς-μαν κο ντιβές κι Κυριόσκο». (Αποκ. 1:10) Κάνα ο Ιωάννης γραφιντάς ανταλά λάφια πασέ κο 96 Κ.Χ., ο “ντιβές ι Κυριόσκο” ισινέ μπουτ ντουρ. (Ματθ. 25:14, 19· Λουκ. 19:12) Αλλά σαρ σικαβένα ο προφητείες ι Γραφιάκε, οντουβά ντιβές αβιλό κο 1914 κάνα ο Ιησούς αβιλό Βασιλιάς κο ουρανός. Οντουλέ μπρεσέσταρ, αρχισάλε τι αβέν-πες ο προφητείες ι Αποκαλυψιάκε σο νικιόνα μπαγιά κι Ντεβλέσκο λαός. Βα, ακανά τζουβντιάσα κο «ντιβές κι Κυριόσκο»!
4 Επειδή τζουβντιάσα ανταλέ μπουτ σουκάρ βακιτίστε, αμέν ισινάμ οντουλά σο πρέπει τι ντας μπουτ προσοχή κι συμβουλή κι εδαφιόσκι Αποκάλυψη 1:3 σο ντιντιόλα μανγκιμάσαρ: «Ευτυχισμέ ισί οντουβά σο διαβάνελα ζουρανές ντα οντουλά σο ασουνένα ο λάφια ανταλέ προφητειάκε ντα κερένα οντουλά σο ισί γραμμέ λάτε σόσκε ο βακίτι σο τραμπίντιλο ισί πασέ». Μπαγιά, χρειαζίντιβελα τι “διαβάνας ζουρανές”, “τι ασουνάς ο λάφια ανταλέ προφητειάκε” ντα τι “κεράς-λεν”. Καλά ισί μερικά ανταλέ λαφίνταρ σο πρέπει τι κεράς;
ΑΒΕΝ ΣΙΓΟΥΡΟΙ ΟΤΙ ΤΟΥΜΑΡΙ ΛΑΤΡΕΙΑ ΚΕΡΕΛΑ Ι ΙΕΧΩΒΑΣΚΟ ΓΚΙ
5. Σαρ σικαβέλα ο βιβλίος Αποκάλυψη καζόμ σημαντικός ισί τι αβάς σίγουροι ότι αμαρί λατρεία κερέλα ι Ιεχωβάσκο γκι;
5 Κατά πρώτος κεφάλαιος ι Αποκαλυψιάκο, σικλιάσα ότι ο Ιησούς τζανέλα σαρέ οντουλά σο αβένα-πες κο κχανγκιριά λέσκε λαόσκε. (Αποκ. 1:12-16, 20· 2:1) Ο Ιησούς σικαντάς-λες ανταβά ι λαφίντζαρ σο βακερντάς ι εφτά κχανγκιρίνγκε κι Μικρά Ασία. Οντουλέ λαφίντζαρ, σικαντάς κο πρώτοι Χριστιανοί σο τι κερένας για τι ντεν λατρεία ι Ιεχωβάς αντικάς σαρ μανγκέλα. Ανταλά λάφια ισί σαρέ ι Ντεβλέσκε λαόσκε αντιβές-ντα. Σο σικλιάσα αμέν; Αμαρό αρχηγός, ο Χριστός Ιησούς, τζανέλα λατσσές σαρ ισινάμ πνευματικά. Ισινάμ λέσκε βαστέντε ντα αρακχαβέλα-αμέν. Τίποτα να νασέλα λέσκε γιακχίνταρ. Τζανέλα σο πρέπει τι κεράς για μα τι τσσιναβάς τι τθεράς ι Ιεχωβάσκι ευλογία. Καλέ λαφίντε σο βακερντάς πρέπει τι ντας καν αντιβές;
6. (α) Καβά πρόβλημας τθερέλας η κχανγκιρί κι Έφεσος σαρ βακερένα ο εδάφια Αποκάλυψη 2:3, 4; (β) Σο σικλιάσα αμέν ανταλέσταρ;
6 Διαβάνεν Αποκάλυψη 2:3, 4. Μα τι χασαράς ο μανγκιπέ σο τθεράας κι αρχή ι Ιεχωβάσκε. Ο Ιησούς βακερντάς ι Χριστιανόνγκε κι Έφεσος ότι νταϊντιντέας ντα να τσσιναντέας τι υπηρετίνεν ι Ιεχωβάς παρόλο σο νακχένας σαβέ τι μανγκές δυσκολίες. Όμως, χασαρντέας ο μανγκιπέ σο τθερένας κι αρχή. Έπρεπε τι τζουβντιαρέν οντουβά μανγκιπέ σόσκε, άμα να κα κερένας-λες ανταβά, λένγκι λατρεία να κα κερέλας ι Ντεβλέσκο γκι. Αμέν-ντα αντιβές, να ερεσέλα σάντε τι νταϊντίνας. Χρειαζίντιβελα τι τθεράς ο σωστοί λόγοι για τι νταϊντίνας. Αμαρό Ντεβέλ να ντικχέλα σάντε σο κεράσα αλλά σόσκε-ντα κεράσα-λες. Λέσκε, ισί σημαντικός τι ντικχέλ σο τσσίντελα-αμέν τι κεράς κάτι σόσκε μπεκλεντίνελα τι ντας-λες λατρεία επειδή μανγκάσα-λες μπουτ ντα εκτιμίνασα-λες.—Παρ. 16:2· Μάρκ. 12:29, 30.
7. (α) Καβά πρόβλημας ντικχλάς ο Ιησούς κι κχανγκιρί κο Σάρδεις σαρ βακερένα ο εδάφια Αποκάλυψη 3:1-3; (β) Σο χρειαζίντιβελα τι κεράς αμέν;
7 Διαβάνεν Αποκάλυψη 3:1-3. Τι ατσσάς τζανγκαντέ. Ο πφραλά κατά κχανγκιρί κο Σάρδεις, τθερένας εκ γιαβέρ πρόβλημας. Παρόλο σο ανγκλέ κερένας μπουτ πράγματα κι Ντεβλέσκι υπηρεσία, σοράν να κερένας αζόμ μπουτ. Οτθάρ, ο Ιησούς βακερντάς λένγκε τι “τζανγκάντιβεν”. Καβά σημαντικός πράγμας σικλιάσα αμέν; Τζανάσα ότι ο Ιεχωβά να κα μπιστρέλ οντουλά σο κεράσα. (Εβρ. 6:10) Όμως, ναστί ατσσάσα σάντε οντουλέντε σο κερντάμ ανγκλέ κι Ιεχωβάσκι υπηρεσία. Ατζέ-ντα άμα τθεράσα πο μπουτ δυσκολίες ακανά, χρειαζίντιβελα τι κεράς μπουτ πράγματα «κο έργος κι Κυριόσκο» ντα τι ατσσάς τζανγκαντέ μέχρι κο τέλος.—1 Κορ. 15:58· Ματθ. 24:13· Μάρκ. 13:33.
8. Σο σικλιάσα κατά λάφια σο βακέρντιλε κο πφραλά κι Λαοδίκεια; (Αποκάλυψη 3:15-17)
8 Διαβάνεν Αποκάλυψη 3:15-17. Τι ντας λατρεία σαρέ αμαρέ γκίσαρ. Ο λάφια σο βακερντάς ο Ιησούς κο πφραλά κι Λαοδίκεια σικαντέ εκ γιαβέρ πρόβλημας. Βον ισινέ “χλιαροί” κι λατρεία σο ντένας. Επειδή να ντένας λατρεία ι Ιεχωβάς σαρέ πουμαρέ γκίσαρ, ο Ιησούς βακερντάς ότι ισινέ «ταλαιπωριμέ ντα μπεζαβά». Έπρεπε τι σικαβέν ότι πφαμπόνας μπουτ ι Ιεχωβάσκε πραγματένγκε. (Αποκ. 3:19) Σο σικλιάσα αμέν; Άμα ακανά να πφαμπάσα αζόμ μπουτ ι Ιεχωβάσκε πραγματένγκε, πρέπει τι μπαριαράς αμαρί εκτίμηση ι πνευματικέ χουλανιμάσκε σο τθεράσα. (Αποκ. 3:18) Ποτές να κα μανγκάας τι μαράς-αμέν για τι τθεράς σουκάρ ζωή ντα αντικάς τι ταρτίντιβελας αμαρί προσοχή ντα μα τι τσσουβάας ο πνευματικά πράγματα πρώτα αμαρέ ζωγιάτε.
9. Καλέ πραγμάσταρ πρέπει τι ατσσάς ντουρ σαρ σικαβένα ο λάφια σο βακερντάς ο Ιησούς κο Χριστιανοί κι Πέργαμος ντα κο Θυάτειρα;
9 Μα τι ασουνάς ιτς ο σικλιαριπέ ι αποστατένγκο. Ο Ιησούς διορθωντάς μερικέ τζενέν κι Πέργαμος σόσκε βον ανένας διχόνοια ντα λένγκο σικλιαριπέ τζάλας κόντρα κο Ντεβέλ. (Αποκ. 2:14-16) Ισαρντάς ι πφραλέν κο Θυάτειρα σο ατσσιλέας ντουρ κατά «αχόρτ πράγματα ι Μπενγκέσκε» ντα βακερντάς λένγκε τι «ασταρέν σικίς» ι αλήθεια. (Αποκ. 2:24-26) Ο μπίζουρανε Χριστιανοί οντουλέ κχανγκιρίντε, σο μουκχλέας πουμαρό νεαυτός τι χουχάντιβελ ψεύτικε λαφίνταρ, έπρεπε τι μετανιώνεν. Σο αβέλα-πες αμαρέ ντιβεσέντε; Δεν πρέπει τι ασουνάς καέκ σικλιαριπέ σο τζάλα κόντρα κο Ιεχωβά. Ο αποστάτες μπέκιμ βακερένα ότι μανγκένα ι Ντεβλές, αλλά «οντουλέντζαρ σο κερένα σικαβένα ότι νανέ μπαγιά ανταβά». (2 Τιμ. 3:5) Άμα σικλιαράσα-αμέν λατσσές κατά Ντεβλέσκο Λάφι, ισί πο εύκολος εμ τι αγαβάς καβά σικλιαριπέ ισί ψεύτικος εμ μα τι ασουνάς-λες.—2 Τιμ. 3:14-17· Ιούδα 3, 4.
10. Σο γιαβέρ σικλιάσα κατά λάφια σο βακερντάς ο Ιησούς κο κχανγκιριά κι Πέργαμος ντα κο Θυάτειρα;
10 Τι νασάς κάθε λουμνιμάσταρ ντα μα τι μουκχάς τι αβέλ-πες. Ισινέ εκ γιαβέρ-ντα πρόβλημας κι Πέργαμος ντα κο Θυάτειρα. Ο Ιησούς καταδικαντάς μερικέ τζενέν οντουλέ κχανγκιρίντε σόσκε να ατσσόνας ντουρ κατά λουμνιπέ. (Αποκ. 2:14, 20) Σο σικλιάσα αμέν; Να αβέλα-πες τι μπεκλεντίνας ότι ο Ιεχωβά κα πφάντελ πο γιακχά κο λουμνιπέ σο κερντάμ, καβά-ντα τι ισινέ ανταβά, ατζέ-ντα άμα υπηρετίνασα-λες μπουτ μπρεσά ντα ακανά τθεράσα μπουτ προνόμια. (1 Σαμ. 15:22· 1 Πέτρ. 2:16) Ο Ιεχωβά μπεκλεντίνελα τι ντας καν λέσκε λαφίντε καζόμ-ντα γκεραλό τι ισί ανταβά ντουνιάς.—Εφεσ. 6:11-13.
11. Σο σικλιλάμ μέχρι ακανά; (Ντικχέν ο πλαίσιος-ντα « Σο Σικλιάσα Αμέν Αντιβές»)
11 Σο σικλιλάμ μέχρι ακανά; Χρειαζίντιβελα τι αβάς σίγουροι ότι αμαρί λατρεία κερέλα ι Ιεχωβάσκο γκι. Άμα αμαρί λατρεία να κερέλα ι Ιεχωβάσκο γκι επειδή κεράσα κάτι σο νανέ λατσσό, χρειαζίντιβελα τι κεράς σουγκό αλλαγές για τι τθεράς πάλι ι Ιεχωβάσκι ευλογία. (Αποκ. 2:5, 16· 3:3, 16) Ο Ιησούς όμως βακερντάς κάτι γιαβέρ-ντα κο κχανγκιριά. Σο ισινέ ανταβά;
ΑΒΕΝ ΕΤΟΙΜΟΙ ΤΙ ΝΤΑΪΝΤΙΝΕΝ ΚΑΝΑ ΚΑ ΤΖΑΝ ΤΟΥΜΕΝΤΖΑΡ ΚΟΝΤΡΑ
12. Σο βακερντάς ο Ιησούς κο πφραλά κι Σμύρνη ντα κι Φιλαδέλφεια σο ισί αμένγκε-ντα αντιβές; (Αποκάλυψη 2:10)
12 Ακανά κα ντικχάς σο βακερντάς ο Ιησούς κο κχανγκιριά κι Σμύρνη ντα κι Φιλαδέλφεια. Βακερντάς κο Χριστιανοί οτθέ μα τι νταρέν κατά τζενένγκι κόντρα, σόσκε λένγκι πίστη κα ευλογίντιβελας. (Διαβάνεν Αποκάλυψη 2:10· 3:10) Σο σικλιάσα αμέν αντιβές; Πρέπει τι μπεκλεντίνας ότι κα τζαν αμέντζαρ κόντρα ντα τι αβάς έτοιμοι τι νταϊντίνας. (Ματθ. 24:9, 13· 2 Κορ. 12:10) Σόσκε ισί σημαντικός μα τι μπιστράς-λες ανταβά;
13, 14. Σο αβέλα-πες κι Ντεβλέσκο λαός σαρ βακέρντιβελα κο κεφάλαιος 12 κι Αποκάλυψη;
13 Ο βιβλίος Αποκάλυψη βακερέλα αμένγκε ότι ο τζενέ κα τζάνας κόντρα κι Ντεβλέσκο λαός αμαρέ ντιβεσέντε, κο «ντιβές κι Κυριόσκο». Ο κεφάλαιος 12 κι Αποκάλυψη βακερέλα ότι, κάνα μπιάντιβελα ι Ντεβλέσκι Βασιλεία, αβέλα-πες τζένγκι κο ουρανός. Ο Μιχαήλ, σο ισί ο δοξασμέ Ιησούς Χριστός, ντα λέσκο στρατός κερένα τζένγκι ι Μπενγκέσαρ ντα λέσκε δαιμονέντζαρ. (Αποκ. 12:7, 8) Οντουλά ντουσμάνια ι Ντεβλέσκε χασαρένα, φουρτίντιβενα κι πφουβ ντα τσσιντικιαρένα μπουτ οντουλέν σο μπεσένα λάτε. (Αποκ. 12:9, 12) Αλλά σο αβέλα-πες κι Ντεβλέσκο λαός ιτιρί σαρέ ανταλένταρ;
14 Σοράν η Αποκάλυψη βακερέλα αμένγκε σο κερέλα ο Μπενγκ. Ναστί τζάλα κο ουρανός, οτθάρ τσσουβέλα-λεν ι Ντεβλέσκε χρισμέ υπηρετόντζαρ σο ατσσιλέ κι πφουβ. Βον τραμπίντιλε τι κερέν κουμάντος κι Ντεβλέσκι Βασιλεία, ντα καζόμ ισί κι πφουβ, τθερένα “οπρά-πουμέντε ο έργος για τι ντεν μαρτυρία ι Ιησούσκε”. (Αποκ. 12:17· 2 Κορ. 5:20· Εφεσ. ) Σαρ νικίστιλι μπαγιά ανταγιά προφητεία; 6:19, 20
15. Καλέ τζενέν μανγκένα τι σικαβέν ο “ντούι μάρτυρες” σο βακέρντιβενα κο κεφάλαιος 11 κι Αποκάλυψη, ντα σο αβιλό-πες λένγκε;
15 Ο Μπενγκ κερντάς ι Ντεβλέσκε ντουσμανίν τι τσσουβέν-λεν ι χρισμέ πφραλέντζαρ σο κερένας κουμάντος κο έργος κι Βασιλειάκο. Οντουλά πφραλά ισινέ ο συμβολικοί “ντούι μάρτυρες” σο βακέρντιβελα ότι μουνταρντέ-λεν. * (Αποκ. 11:3, 7-11) Κο 1918, οχτώ υπεύθυνα πφραλά κατηγορισάλε σινανέ ντα καταδικασάλε τι νακχέν μπουτ βακίτι κι φυλακή. Κο γιακχά κι τζενένγκε, ντικχίντιβελας ότι ο έργος οντουλέ χρισμέ τζενένγκο “μουλόας”.
16. Καβά μπουτ σουκάρ πράγμας αβιλό-πες κο 1919, αλλά σο κερέλα ο Μπενγκ οτθάρ μπερί;
16 Η προφητεία κο κεφάλαιος 11 κι Αποκάλυψη βακερέλας ότι ο “ντούι μάρτυρες” κα αβένας πάλι κι ζωή αντρέ χάνικ βακιτίστε. Να νακχλόας ούτε εκ μπρες οτθάρ μπερί σο τσσουβντιλέας φυλακή, ντα η προφητεία νικίστιλι μπαγιά κάνα αβιλό-πες κάτι μπουτ σουκάρ. Κο Μάρτιος 1919, οντουλά χρισμέ πφραλά νικίστιλε κατά φυλακή ντα πο σοράν ο κατηγορίες λιντιλέ παλάλ. Ο πφραλά βουρτισάλε σουγκό κο έργος κι Βασιλειάκο. Αλλά ο Μπενγκ να τσσιναντάς τι τσσουβέλ-λεν ι Ντεβλέσκε λαόσαρ. Οτθάρ μπερί, η κόντρα σο τζάλα ο Μπενγκ σαρέ ι Ντεβλέσκε λαόσαρ ισί σαρ μπαρί «λεν». (Αποκ. 12:15) Βα, σαρέ αμέν χρειαζίντιβελα τι νταϊντίνας ντα τι σικαβάς πίστη.—Αποκ. 13:10.
ΚΕΡΕΝ Ο ΠΟ ΛΑΤΣΣΟ ΚΟ ΕΡΓΟΣ ΣΟ ΝΤΙΝΑΣ-ΑΜΕΝ Ο ΙΕΧΩΒΑ
17. Καγιά βοήθεια λιντάς ι Ντεβλέσκο λαός οτθάρ σο να μπεκλεντίνελας παρόλο σο ο Μπενγκ τσσουβέλα-λεν λέσαρ;
17 Ο κεφάλαιος 12 κι Αποκάλυψη σικαβέλα σοράν ότι ι Ντεβλέσκο λαός κα λέλας βοήθεια οτθάρ σο να μπεκλεντίνελας. Κα αβέλας σαρ «η πφουβ» τι μπιλιαβέλας «ι λεν», δηλαδή ι κόντρα ι τζενένγκι. (Αποκ. 12:16) Άκ’ ανταβά αβιλό-πες. Ισί φαρ σο ο πο ζουρανέ πράγματα ι Μπενγκέσκε ντουνιάσκε, σαρ ισί μερικά δικαστήρια, βοηθιντέ ι Ντεβλέσκε λαός. Μπουτ φαρ, ο υπηρέτες ι Ιεχωβάσκε λιντέ νίκες κο δικαστήρια ντα ανταλά νίκες ντινέ-λεν πο μπαρί ελευθερία. Σο κερντέ κάνα ντιντιλί-λεν ανταγιά ελευθερία; Χρησιμοποιηντέ ο σαάτι καζόμ πο λατσσές αβέλας-πες για τι κερέν ο έργος σο ντινάς-λεν ο Ιεχωβά. (1 Κορ. 16:9) Σο έργος ισί ανταβά;
18. Σο ισί ο πο σημαντικός αμένγκε ανταλέ τελευταίε ντιβεσέντε;
18 Ο Ιησούς βακερντάς ότι λέσκο λαός κα βακερέλας ο «λατσσέ αμπέρια ι [Ντεβλέσκε] Βασιλειάκε» σαρί κι πφουβ πριν τι αβέλ ο τέλος. (Ματθ. 24:14) Καζόμ κερέλα-λες ανταβά, λέλα βοήθεια κατά άγγελοι σο τθερένα “λατσσέ αμπέρια σο κα ατσσόν για πάντα οντουλένγκε σο μπεσένα κι πφουβ, σαρέ κο τθεμά, κο φυλές, κο τσσιμπά ντα κο λαοί”.—Αποκ. 14:6.
19. Καλά γιαβερά αμπέρια πρέπει τι βακερέν οντουλά σο μανγκένα ι Ιεχωβάς;
19 Ι Ντεβλέσκο λαός να τθερέλα τι βακερέλ σάντε λατσσέ αμπέρια κο τζενέ. Χρειαζίντιβελα τι υποστηρίνελ ο έργος ι αγγελόνγκο-ντα σο βακέρντιβενα κο κεφάλαια 8 μέχρι 10 κι Αποκάλυψη. Οντουλά άγγελοι βακερένα σο κα τσσίντεν οντουλά σο να μανγκένα ι Ντεβλέσκι Βασιλεία. Βα, ο Μάρτυρες ι Ιεχωβάσκε βακερένα αμπέρια τιμωριάκε σο ισί σαρ «χαλάζι ντα γιακ» ντα σο σικαβένα ι τιμωρία σο κα ντελ ο Ντεβέλ κο πφιρνό ντουνιάς κι Μπενγκέσκο. (Αποκ. 8:7, 13) Ο τζενέ πρέπει τι τζανέν ότι ο τέλος ισί πασέ για τι κερέν μπαρέ αλλαγές πουμαρέ ζωγιάτε ντα αντικάς τι τζουβντιόν κατά ντιβές ι Ιεχωβάσκε χολιάκο. (Σοφ. 2:2, 3) Ο ντουνιάς να μπεϊντίνελα ανταλά αμπέρια. Αμέν πρέπει τι αβάς μπίνταρανε για τι βακεράς-λεν. Κι μπαρί στεναχώρια, ο τελευταία αμπέρια ι τιμωριάκε κα αβέν ατζέ πο πφαρέ.—Αποκ. 16:21.
ΚΕΡΕΝ Ο ΛΑΦΙΑ Ι ΠΡΟΦΗΤΕΙΑΚΕ
20. Σο κα ντικχάς κο γιαβερά ντούι μαθήματα;
20 Χρειαζίντιβελα μπαγιά τι κεράς «ο λάφια ανταλέ προφητειάκε» σόσκε ο προφητείες ι Αποκαλυψιάκε νικιόνα μπαγιά αμέντε. (Αποκ. 1:3) Αλλά σαρ κα νταϊντίνας πιστά κάνα τζάνα αμέντζαρ κόντρα ντα σαρ να κα τσσιναβάς τι βακεράς μπίνταρανες ανταλά λάφια; Κα λας ζορ ντουέ πραγματένταρ: πρώτον, οντουλένταρ σο βακερέλα ο βιβλίος Αποκάλυψη ι Ντεβλέσκε ντουσμανίνγκε ντα, δεύτερον, κατά ευλογίες σο κα λας άμα κα ατσσάς πιστοί. Κα ντικχάς-λεν ανταλά κο γιαβερά ντούι μαθήματα.
ΥΜΝΟΣ 32 Τσσίντεν Κατά Ιεχωβά!
^ Τζουβντιάσα μπουτ σουκάρ βακιτίντε! Ο προφητείες σο ισί κο βιβλίος Αποκάλυψη νικιόνα μπαγιά αντιβές. Σο μανγκένα τι σικαβέν αμένγκε; Ανταλέ μαθημάστε ντα κο ντούι γιαβερά, κα ντικχάς χάνικ λαφίντζαρ σο βακερέλα ο βιβλίος Αποκάλυψη. Ανταλά μαθήματα κα σικαβέν αμένγκε σαρ αμαρί λατρεία κα κερέλ ι Ιεχωβάσκο γκι καζόμ ντάσα καν οντουλέντε σο ισί γραμμέ ανταλέ βιβλιόστε.
^ Ντικχέν «Ερωτήσεις από Αναγνώστες» κι Σκοπιά 15 Νοεμβρίου 2014, σ. 30.