1. Σο σικαβέλα ο βιβλίος Αποκάλυψη ι Ντεβλέσκε λαόσκε;

 Ο ΒΙΒΛΙΟΣ Αποκάλυψη σικαβέλα ότι η Βασιλεία ι Ντεβλέσκι κερέλα κουμάντος κο ουρανός ντα ότι ο Μπενγκ παλντίντιλο οτθάρ. (Αποκ. 12:​1-9) Ανταβά αντάς ειρήνη κο ουρανός, αλλά προβλήματα αμένγκε. Σόσκε; Επειδή ο Μπενγκ ισί χολιαμέ ντα τσσουντάς κι γιακχ οντουλέν σο υπηρετίνενα πιστά ι Ιεχωβάς ατθέ κι πφουβ.​—Αποκ. 12:​12, 15, 17.

2. Σο κα βοηθίνελ-αμέν τι ατσσάς πιστοί;

² Σαρ μπορίνασα τι ατσσάς πιστοί παρόλο σο τσσουβέλα-λεν αμέντζαρ ο Μπενγκ; (Αποκ. 13:​10) Κάτι σο κα βοηθίνελ-αμέν ισί τι τζανάς σο κα αβέλ-πες ανγκλ’ αμέντε. Για παράδειγμας, κι Αποκάλυψη, ο απόστολος Ιωάννης βακερέλα χάνικ κατά ευλογίες σο κα τθεράς ατζεχάνικ. Αντρέ ανταλέ ευλογιέντε κα αβέλ η καταστροφή-ντα ι Ντεβλέσκε ντουσμανίνγκι. Ακανά κα ντικχάς σαρ βακερέλα η Αποκάλυψη ότι ισί ο ντουσμάνια ι Ντεβλέσκε ντα σο κα αβέλ-πες λένγκε.

3. Καλά ισί μερικά σημάδια σο σικαβέλα η Αποκάλυψη;

³ Κατά πρώτος εδάφιος ατζέκ, η Αποκάλυψη βακερέλα αμένγκε ότι οντουλά σο κα διαβάνας σικάντιβενα «σημαδίντζαρ», δηλαδή συμβολικέ λαφίντζαρ. (Αποκ. 1:1) Διαβάνασα μερικέ θηριόνγκε σο μανγκένα τι σικαβέν ι Ντεβλέσκε ντουσμανίν. Για παράδειγμας, ντικχάσα “εκχέ θηριός τι νικλίλ κατά ντεριάβ”. Τθερέλα «10 σινγκά ντα 7 σορέ». (Αποκ. 13:1) Σοράν, ντικχάσα «εκχέ γιαβερέ θηριός τι νικλίλ κατά πφουβ». Ανταβά θηρίος κερέλα λάφι σαρ δράκος ντα κερέλα «τι περέλ γιακ κατά ουρανός». (Αποκ. 13:​11-13) Σοράν, ντικχάσα εκχέ γιαβερέ  θηριός, “εκχέ ντιπ λολέ θηριός”, σο οπρά-λέστε μπεσέλα εκ λουμνί. Ανταλά τριν θηρία μανγκένα τι σικαβέν ι ντουσμανίν σο τσσουβένα-λεν ι Ιεχωβά Ντεβλέσαρ ντα λέσκε Βασιλειάσαρ μπουτ βακίτι ακανά. Οτθάρ, ισί μπουτ σημαντικός τι αγαβάς κον ισί.​—Αποκ. 17:1, 3.

4, 5. Σαρ βοηθίνενα-αμέν ο εδάφια Δανιήλ 7:​15-17 τι αγαβάς σο μανγκένα τι σικαβέν ανταλά σημάδια;

⁴ Για τι σικλιάς κον ισί ανταλά ντουσμάνια, πρέπει πρώτα τι αγαβάς σο μανγκένα τι βακερέν ανταλά συμβολικά λάφια. Κα αγαβάς-λεν ανταλά άμα κα μουκχάς ι Αγία Γραφή τι εξηγίνελ αμένγκε πο νεαυτός. Μπουτ κατά σύμβολα σο ισί κι Αποκάλυψη εξηγισάλε γιαβερέ βιβλιόντε κι Γραφή. Για παράδειγμας, ο προφήτης Δανιήλ ντικχλάς εκχέ σουνέστε ότι «σταρ μπουτ μπαρέ θηρία νικίστιλε κατά ντεριάβ». (Δαν. 7:​1-3) Ο Δανιήλ γραφιντάς ότι ανταλά μπουτ μπαρέ θηρία μανγκένα τι σικαβέν σταρέ “βασιλιαδέν”, ή γιαβέρσοϊ κυβερνήσεις. (Διαβάνεν Δανιήλ 7:​15-17) Ανταλά ξεκάθαρα λάφια βοηθίνενα-αμέν τι αγαβάς ότι ο θηρία σο ισί κι Αποκάλυψη-ντα πρέπει τι μανγκένα τι σικαβέν κυβερνήσεις.

⁵ Ακανά κα ντικχάς μερικά σημάδια σο ισί κι Αποκάλυψη. Καζόμ κεράσα-λες ανταβά, κα σικλιάς σαρ βοηθίνελα-αμέν η Γραφή τι αγαβάς σο μανγκένα τι σικαβέν. Κα αρχίνας ι θηριόντζαρ. Πρώτα, κα βακεράς σο μανγκέλα τι σικαβέλ ο κάθε εκ λένταρ. Σοράν, κα ντικχάς σο κα αβέλ-πες ανταλέ θηριόντε. Τέλος, κα ντικχάς σο μανγκένα τι βακερέν αμένγκε ανταλά.

6. Σο μανγκέλα τι σικαβέλ ο θηρίος ι εφτά σορέντζαρ σο ισί κο εδάφια Αποκάλυψη 13:​1-4;

⁶ Σο ισί ο θηρίος ι εφτά σορέντζαρ; (Διαβάνεν Αποκάλυψη 13:​1-4) Ντικχάσα ότι ανταβά θηρίος ισί σαρ εκ λεοπάρδαλη αλλά τθερέλα πιντρέ αρκουδάκε, μούι λιονταρίσκο ντα ντες σινγκά. Σαρέ ανταλά τθερένα-λεν ο σταρ θηρία-ντα σο ισί κο κεφάλαιος 7 κο Δανιήλ. Όμως, ατθέ κο βιβλίος Αποκάλυψη, σαρέ ανταλά τθερέλα-λεν εκ θηρίος, όχι σταρ διαφορετικά θηρία. Ανταβά θηρίος να μανγκέλα τι σικαβέλ σάντε εκ κυβέρνηση, ή γιαβέρσοϊ παγκόσμια αυτοκρατορία. Διαβάνασα ότι κερέλα κουμάντος «οπράλ κι κάθε φυλή ντα λαός ντα τσσιπ ντα τθεμ». Άρα, πρέπει τι αβέλ πο μπαρό κάθε κυβερνησιάταρ σο κερέλα κουμάντος εκχέ τθεμέστε. (Αποκ. 13:7) Οτθάρ, ανταβά θηρίος πρέπει τι μανγκέλα τι σικαβέλ σαρέ ο κυβερνήσεις σο τθερένα κερντό κουμάντος σαρέ ανταλά μπρεσά ι τζενέν. *​—Εκκλ. 8:9.

7. Σο μανγκέλα τι σικαβέλ ο κάθε εκ κατά εφτά σορέ ι θηριόσκε;

⁷ Σο μανγκέλα τι σικαβέλ ο κάθε εκ κατά εφτά σορέ; Κάτι σο βοηθίνελα-αμέν τι αγαβάς-λες ανταβά ισί κι Αποκάλυψη κεφάλαιος 17. Ανταβά κεφάλαιος σικαβέλα εκ άγαλμας ι θηριόσκο σο βακέρντιβελα κο κεφάλαιος 13. Κο εδάφιος Αποκάλυψη 17:​10 διαβάνασα: «Ισί εφτά βασιλιάδες: Ο παντς λένταρ πελέ, ο εκ ισί ακανά ντα ο γιαβέρ να αβιλό ατζέκ· αλλά κάνα κα αβέλ, πρέπει τι ατσσόλ χάνικ βακίτι». Σαρέ κατά κυβερνήσεις σο χρησιμοποιηντάς ο Μπενγκ, εφτά ξεχωρίνενα σαρ «σορέ». Ισί μπαρέ κυβερνήσεις σο κερντέ κουμάντος ι Ντεβλέσκε λαός ή γκιλέ λέσαρ κόντρα. Κο μπρεσά κι απόστολε Ιωαννίσκε, παντς ανταλένταρ κερντέας κουμάντος πο τζανγκλέ: η Αίγυπτος, η Ασσυρία, η Βαβυλώνα, η Μηδοπερσία ντα η Ελλάδα. Η έκτη μπαρί κυβέρνηση, η Ρώμη, κερέλας κουμάντος ατζέ κάνα ο Ιωάννης γραφιντάς ι Αποκάλυψη. Καγιά κα  αβέλας η έβδομη ντα τελευταία μπαρί ζορ, ή γιαβέρσοϊ ο έβδομος σορό;

8. Σο μανγκέλα τι σικαβέλ ο έβδομος σορό ι θηριόσκο;

⁸ Σαρ κα ντικχάς, ο προφητείες ι βιβλιόσκε Δανιήλ βοηθίνενα-αμέν τι αγαβάς σο μανγκέλα τι σικαβέλ ο έβδομος ντα τελευταίος σορό ι θηριόσκο. Καγιά μπαρί ζορ κερέλα κουμάντος ανταλέ τελευταίε βακιτίστε, «κο ντιβές κι Κυριόσκο»; (Αποκ. 1:​10) Ισί ντούι μπαρέ κυβερνήσεις σο ενωντέ πουμαρί ζορ, ο Ηνωμένος Βασίλειος ντα ο Ηνωμένες Πολιτείες της Αμερικής, γιαβερέ λαφίντζαρ η Αγγλοαμερικανική Παγκόσμια Δύναμη. Άρα, αγαβάσα ότι ανταγιά ισί ο έβδομος σορό ι θηριόσκο σο βακέρντιβελα κο εδάφια Αποκάλυψη 13:​1-4.

9. Σο μανγκέλα τι σικαβέλ ο θηρίος σο τθερέλα «ντούι σινγκά σαρ σινγκά μπρακέσκε»;

⁹ Ο κεφάλαιος 13 κι Αποκάλυψη βακερέλα αμένγκε πο τελέ ότι η Αγγλοαμερικανική Παγκόσμια Δύναμη, σο ισί ο έβδομος σορό, ισί θηρίος-ντα. Ανταβά θηρίος τθερέλα «ντούι σινγκά σαρ σινγκά μπρακέσκε, αλλά αρχισάλο τι κερέλ λάφι σαρ δράκος». «Κερέλα μπαρέ πράγματα, κερέλα ατζέ-ντα τι περέλ γιακ κατά ουρανός κι πφουβ ανγκλάλ κο τζενέ». (Αποκ. 13:​11-15) Ο 16 ντα ο 19 κεφάλαιος κι Αποκάλυψη βακερένα ανταλέ θηριόσκε «προφήτης σο χουχαβέλα». (Αποκ. 16:​13· 19:​20) Ο Δανιήλ βακερέλα κάτι σο μοιάζελα ανταλέσαρ, βακερέλα ότι η Αγγλοαμερικανική Παγκόσμια Δύναμη «κα ανέλ . . . μπαρί καταστροφή». (Δαν. 8:​19, 23, 24) Ακριβώς ανταβά αβιλό-πες κο Δεύτερος Παγκόσμιος Πόλεμος. Ο ντούι ατομικές βόμβες σο φουρτίντιλε κι Ιαπωνία για τι τσσινάντιβελ ο τζένγκι κερντιλέ κατά Βρετανοί ντα κατά Αμερικανοί. Η Αγγλοαμερικανική Παγκόσμια Δύναμη κερντάς, σαρ τι βακεράας, «τι περέλ γιακ κατά ουρανός κι πφουβ».

10. Σο μανγκέλα τι σικαβέλ ο «άγαλμας ι θηριόσκο»; (Αποκάλυψη 13:​14, 15· 17:3, 8, 11)

¹⁰ Σοράν, ντικχάσα εκχέ γιαβερέ θηριός. Ανταβά ισί σχεδόν ίδιος ι θηριόσαρ σο τθερέλα εφτά σορέ, όμως ισί ντιπ λολό. Βακέρντιβελα «άγαλμας ι θηριόσκο» ντα «όγδοος βασιλιάς». * (Διαβάνεν Αποκάλυψη 13:​14, 15· 17:3, 8, 11) Βακέρντιβελα ότι ανταβά «βασιλιάς» υπαρχίντιβελα, σοράν τσσιναβέλα τι υπαρχίντιβελ ντα πο σοράν αβέλα πάλι οτθέ. Καζόμ μπουτ ταιριάνενα ανταλά λάφια κο Οργανισμός Ηνωμένων Εθνών, σο τσσουβέλα ανγκλάλ οντουβά σο μανγκέλα ο πολιτικός σύστημας σαρέ ι ντουνιάσκο! Κι αρχή, υπαρχίντιβελας ι ναβέσαρ Κοινωνία των Εθνών. Σοράν, τσσιναντάς τι υπαρχίντιβελ κο Δεύτερος Παγκόσμιος Πόλεμος. Πο σοράν, αβιλό πάλι ι ναβέσαρ σο τζανάσα-λες αντιβές.

11. Σο κερένα ο πολιτικά θηρία, ντα σόσκε αμέν να τθεράσα τίποτα τι νταράς λένταρ;

¹¹ Πουμαρέ χουχαϊματέντζαρ, ο πολιτικά θηρία κερένα ι τζενέν τι τζαν κόντρα κο Ιεχωβά ντα λέσκε λαόσαρ. Ισί σαρ τι “γκίντενα ι βασιλιαδέν σαρέ ι πφουβιάκε” κο τζένγκι κο Αρμαγεδδώνας, σο ισί ο “μπαρό ντιβές ι Παντοδύναμε Ντεβλέσκο”. (Αποκ. 16:​13, 14, 16) Αλλά αμέν να κα τθεράς τίποτα τι νταράς. Αμαρό μπαρό Ντεβέλ, ο Ιεχωβά, κα σώνελ σουγκό σαρέ οντουλέν σο υποστηρίνενα λέσκι κυβέρνηση.​—Ιεζ. 38:​21-23.

12. Σο κα αβέλ-πες σαρέ κο θηρία;

¹² Σο κα αβέλ-πες σαρέ κο θηρία; Ο εδάφιος Αποκάλυψη 19:​20 ντέλα ι απάντηση: «Αστάρντιλο ο θηρίος, ντα γιεκ λέσαρ ο προφήτης σο χουχαβέλα. Ο προφήτης σο χουχαβέλα κερντάας ανγκλάλ κο θηρίος ο μπαρέ πράγματα σο λέντζαρ χουχαντάς οντουλέν σο λιντέ ο σημάδι ι θηριόσκο ντα οντουλέν σο ντένα λατρεία λέσκο άγαλμας. Καζόμ ισινέ ατζέ  τζουβντέ, φουρτίντιλε ο ντούι-ντα κι γιακάκι λίμνη σο πφαμπόλα θειαφίσαρ». Άρα, καζόμ κα κερέν κουμάντος ατζέκ, ανταλά πολιτικά ντουσμάνια ι Ντεβλέσκε κα αβέν καταστροφή για πάντα.

13. Καγιά δυσκολία τθερένα ο Χριστιανοί ιτιρί κατά κυβερνήσεις ι ντουνιάσκε;

¹³ Σο μανγκέλα τι βακερέλ ανταβά αμένγκε; Σαρ Χριστιανοί, πρέπει τι αβάς αφοσιωμέ κο Ντεβέλ ντα λέσκε Βασιλειάτε. (Ιωάν. 18:​36) Ανταβά μανγκέλα τι βακερέλ ότι δεν πρέπει τι ανακατούντιβας ιτς κο πολιτικά πράγματα ι ντουνιάσκε. Όμως, μπορεί τι αβέλ μπουτ δύσκολος, σόσκε ο κυβερνήσεις ι ντουνιάσκε ζορισκιαρένα-αμέν τι τσσίντας λένταρ, εμ αμαρέ λαφίντζαρ εμ οντουλέντζαρ σο κεράσα. Οντουλά σο τσσίντενα λένταρ λένα ο σημάδι ι θηριόσκο. (Αποκ. 13:​16, 17) Όμως, οντουλά σο λένα ανταβά σημάδι να κα τθερέν ι ευλογία ι Ιεχωβάσκι ντα κα χασαρέν ι αιώνια ζωή. (Αποκ. 14:9, 10· 20:4) Οτθάρ, ισί μπουτ σημαντικός σαρέ αμέν μα τι ανακατούντιβας ιτς κο πολιτικά πράγματα, καζόμ-ντα τι ζορισκιαρένα-αμέν ο γιαβερά τι κεράς-λες ανταβά!

14. Καβά πράγμας μουκχέλα σοράν πουταρντέ μόσαρ ι απόστολε Ιωαννής σαρ βακέρντιβελα κο εδάφια Αποκάλυψη 17:​3-5;

¹⁴ Ο απόστολος Ιωάννης βακερέλα ότι “ατσσιλό πουταρντέ μόσαρ” εκχέ γιαβερέ πραγμάσταρ σο ντικχλάς. Σο ισινέ ανταβά; Εκ τζουβέλ μπεσέλας οπράλ κο άγριος θηρίος. (Αποκ. 17:1, 2, 6) Ισί σαρ εκ «μπαρί λουμνί» ντα βακέρντιβελα «Βαβυλώνα η Μπαρί». “Κερέλα λουμνιπέ” ι «πφουβιάκε Βασιλιαδέντζαρ».​—Διαβάνεν Αποκάλυψη 17:​3-5.

15, 16. Κον ισί η «Βαβυλώνα η Μπαρί», ντα σαρ τζανάσα-λες ανταβά;

¹⁵ Κον ισί η «Βαβυλώνα η Μπαρί»; Ανταγιά τζουβέλ να αβέλα-πες τι σικαβέλ εκ πολιτική οργάνωση, σόσκε βακέρντιβελα ότι κερέλα λουμνιπέ ι πολιτικόντζαρ σο κερένα κουμάντος ανταλέ ντουνιάς. (Αποκ. 18:9) Κι πραγματικότητα, προσπαθίνελα τι τθερέλ πι βαστέντε ανταλέ τζενέν, αφού βακέρντιβελα ότι μπεσέλα οπράλ κο θηρίος. Ντα να μανγκέλα τι σικαβέλ ι μπίτσαλε γιακχάκε εμπορόν σο ισί κι Μπενγκέσκο ντουνιάς. Βον βακέρντιβενα εκχέ γιαβερέ τθανέστε κι Αποκάλυψη σαρ «έμποροι ι πφουβιάκε».​—Αποκ. 18:​11, 15, 16.

¹⁶ Κι Γραφή, ο λάφι «λουμνί» μπορεί τι βακέρντιβελα οντουλένγκε σο βακερένα ότι υπηρετίνενα ι Ντεβλές, αλλά ντένα λατρεία ψεύτικε ντεβλέντε ή αβένα αμαλά ι ντουνιάσκε εκχέ γιαβερέ τροπόσαρ. (1 Χρον. 5:​25· Ιακ. 4:4) Οκιά μπάνταρ, οντουλά σο ντένα λατρεία πιστά ι Ντεβλές βακέρντιβενα «πάκι» ή «παρθένοι». (2 Κορ. 11:2· Αποκ. 14:4) Η πουρανί Βαβυλώνα ισινέ εκ τθαν πφερντό ψεύτικε λατρειάσαρ. Άρα, η Βαβυλώνα η Μπαρί πρέπει τι μανγκέλα τι σικαβέλ σαρέ ο ψεύτικες λατρείες. Κι πραγματικότητα, ισί σαρέ ο ψεύτικες θρησκείες ι ντουνιάσκε.​—Αποκ. 17:5, 18· ντικχέν ο θέμας «Τι Είναι η Βαβυλώνα η Μεγάλη;» κο ιστότοπος jw.org.

17. Σο κα αβέλ-πες κι Βαβυλώνα κι Μπαρί;

¹⁷ Σο κα αβέλ-πες κι Βαβυλώνα κι Μπαρί; Ο εδάφια Αποκάλυψη 17:​16, 17 βακερένα ακαβά: «Ο 10 σινγκά σο ντικχλάν, ντα ο θηρίος, κα μισίνεν ι λουμνιά ντα κα κερέν-λα τι ατσσόλ κορκορί ντα νανγκί, ντα κα χαν λάκε μασά ντα κα πφαμπαρέν-λα σαρί γιακάσαρ. Επειδή ο Ντεβέλ τσσουντάς λένγκε γκίστε τι κερέν λέσκι σκέψη». Βα, ο Ιεχωβά κα τσσουβέλ ι τθεμέν τι χρησιμοποιήνεν ι ντιπ λολέ θηριός, δηλαδή ο Ηνωμένα Έθνη, για τι τζαν κόντρα σαρέ κο ψεύτικες θρησκείες ι ντουνιάσκε ντα για τι καταστραφίνεν-λεν.​—Αποκ. 18:​21-24.

18. Σο μπορίνασα τι κεράς για τι αβάς σίγουροι ότι να τθεράσα καέκ σχέση ι Μπαρέ Βαβυλωνάσαρ;

 ¹⁸ Σο μανγκέλα τι βακερέλ ανταβά αμένγκε; Πρέπει τι ατσσάς σταθεροί κι «θρησκεία σο ισί πάκι ντα νανέ μελαλί κο γιακχά κι Ντεβλέσκε». (Ιακ. 1:​27) Δεν πρέπει ποτές τι μουκχάς αμαρό νεαυτός τι ταρτίντιβελ κατά ψεύτικος σικλιαριπέ, κατά γιορτές, κατά μπίλατζανε χούγια ντα κατά μπενγκαλέ πράγματα ι Μπαρέ Βαβυλωνάκε! Ντα πρέπει μα τι τσσιναβάς τι βακεράς ι τζενένγκε τι «νικιόν λάταρ», ντα αντικάς μα τι αμαρτίνεν γιεκ λάσαρ κο γιακχά κι Ντεβλέσκε.​—Αποκ. 18:4.

19. Κον ισί ο «μπαρό δράκος σο ισί λολό σαρ γιακ»;

¹⁹ Ο βιβλίος Αποκάλυψη βακερέλα “εκχέ μπαρέ δρακόσκε-ντα σο ισί λολό σαρ γιακ”. (Αποκ. 12:3) Ανταβά δράκος κερντάς τζένγκι ι Ιησούσαρ ντα λέσκε αγγελόντζαρ. (Αποκ. 12:​7-9) Τζάλα κοντρα κι Ντεβλέσκο λαός ντα ντέλα εξουσία κο πολιτικά θηρία. (Αποκ. 12:​17· 13:4) Κον ισί ανταβά δράκος; Ισί «ο σαπ σο ισινέ κι αρχή, οντουβά σο βακέρντιβελα Διάβολος ντα Σατανάς». (Αποκ. 12:9· 20:2) Βοβ ισί παλάλ σαρέ κατά γιαβερά ντουσμάνια ι Ιεχωβάσκε.

20. Σο κα αβέλ-πες κο δράκος;

²⁰ Σο κα αβέλ-πες κο δράκος; Ο εδάφια Αποκάλυψη 20:​1-3 βακερένα ότι εκ άγγελος κα τσσουβέλ ι Μπενγκές κι άβυσσος, σο μανγκέλα τι σικαβέλ ότι κα αβέλ πφαντό εκχέ φυλακιάτε, σαρ τι βακεράας. Καζόμ κα αβέλ πφαντό, ο Μπενγκ να κα «χουχαβέλ ι τζενέν μέχρι τι τελειώνεν ο 1.000 μπρεσά». Κο τέλος, ο Μπενγκ ντα ο δαίμονες λέσκε κα “φουρτίντιβεν κι λίμνη σο πφαμπόλα γιακάσαρ ντα θειαφίσαρ”, κάτι σο μανγκέλα τι σικαβέλ ότι κα αβέν καταστροφή για πάντα. (Αποκ. 20:​10) Ανέν τουμαρέ γκοντιάτε εκχέ ντουνιάς σο να κα αβέλ ο Μπενγκ ντα λέσκε δαίμονες. Σο σουκάρ βακίτι κα αβέλ ανταβά!

21. Σόσκε μπορίνασα τι χαιρίνας οντουλένγκε σο διαβαντάμ κο βιβλίος Αποκάλυψη;

²¹ Καζόμ ζορ λάσα σο αγαβάσα σο μανγκένα τι βακερέν ανταλά σημάδια σο ισί γραμμέ κο βιβλίος Αποκάλυψη! Να ντικχλάμ σάντε κον ισί ι Ντεβλέσκε ντουσμάνια, αλλά ντικχλάμ-ντα σο κα αβέλ-πες λένγκε. Βα, «ευτυχισμέ ισί οντουβά σο διαβάνελα ζουρανές ντα οντουλά σο ασουνένα ο λάφια ανταλέ προφητειάκε». (Αποκ. 1:3) Αλλά σοράν κατά καταστροφή ι Ντεβλέσκι ντουσμανίνγκι, καλά ευλογίες κα τθερέν ο πιστά τζενέ; Κα ντικχάς-λες ανταβά κο γιαβέρ μάθημας.