1. Καγιά σημαντική απόφαση τθερένα τι λεν σαρέ ο τζενέ;

 Ο ΤΖΕΝΕ αντιβές τθερένα τι λεν εκ σημαντική απόφαση. Κα τσσίντεν κατά Ιεχωβά Ντεβέλ σο σάντε βοβ τθερέλα ο δικαίωμας τι κερέλ κουμάντος ή λέσκε πφιρνέ ντουσμανίσταρ, κατά Μπενγκ; Οντουβά σο κα τραμπίνεν ο τζενέ κα σικαβέλ άμα κα τζουβντιόν ή να κα τζουβντιόν για πάντα. (Ματθ. 25:​31-33, 46) Κι «μπαρί στεναχώρια», κα ντιντιόλ-λεν ο σημάδι σο κα σικαβέλ άμα κα σώντιβεν ή κα αβέν καταστροφή.​—Αποκ. 7:​14· 14:​9-11· Ιεζ. 9:4, 6.

2. (α) Σο βακερένα αμένγκε τι κεράς ο εδάφια Εβραίους 10:​35-39; (β) Σαρ μπορίνελα τι βοηθίνελ-αμέν ο βιβλίος Αποκάλυψη;

² Διαβάνεν Εβραίους 10:​35-39. Άμα τραμπιντέν τι τσσίντεν κατά κυβέρνηση ι Ιεχωβάσκι, λιντέν γκοντιαβέρ απόφαση. Ακανά μανγκένα σαρέ τουμαρέ γκίσαρ τι βοηθίνεν γιαβερέν-ντα τι τραμπίνεν τι κερέν-λες ανταβά. Για τι βοηθίνεν-λεν, μπορίνενα τι βακερέν μερικά λάφια κατά βιβλίος Αποκάλυψη. Ανταβά σημαντικός βιβλίος μουτθαβέλα σο κα αβέλ-πες οντουλένγκε σο τζάνα κόντρα κο Ιεχωβά, αλλά βακερέλα ο ευλογίες-ντα σο κα τθερέν οντουλά σο τσσίντενα λέσκε κυβερνησιάταρ. Ισί λατσσό τι ρόντας αχόρτ ανταλέ σημαντικέ αληθειέντε. Άμα κα κεράς-λες ανταβά, κα μανγκάς ατζέ πο μπουτ μα τι τσσιναβάς τι υπηρετίνας ι Ιεχωβάς. Ντα μπορίνασα τι χρησιμοποιήνας οντουλά σο σικλιλάμ για τι βοηθίνας γιαβερέν-ντα τι τραμπίνεν τι υπηρετίνεν ι Ιεχωβάς για πάντα.

3. Σο κα ντικχάς ανταλέ μαθημάστε;

³ Ανταλέ μαθημάστε, κα ντικχάς ακαλά ερωτήσεις: Σο κα  αβέλ-πες οντουλένγκε σο τσσίντενα κατά κυβέρνηση ι Ντεβλέσκι; Ντα σο κα αβέλ-πες οντουλένγκε σο τραμπίνενα τι τσσίντεν κατά ντιπ λολό θηρίος ι Αποκαλυψιάκο;

4. Καγιά ομάδα ντικχέλα ο απόστολος Ιωάννης τι αβέλ γιεκ ι Ιησούσαρ κο ουρανός;

⁴ Εκχέ φαντασιάτε, ο απόστολος Ιωάννης ντικχέλα ντούι ομάδες σο τσσίντενα κατά κυβέρνηση ι Ιεχωβάσκι ντα λένα ευλογίες σο ατσσόνα για πάντα. Κι πρώτη ομάδα ισί 144.000. (Αποκ. 7:4) Βον λιντιόνα κατά πφουβ για τι αβέν εκχέ κυβερνησιάτε, ή γιαβέρσοϊ Βασιλειάτε, ι Ιησούσαρ κο ουρανός. Γιεκ λέσαρ κερένα κουμάντος ι πφουβ. (Αποκ. 5:9, 10· 14:3, 4) Κι φαντασία, ο Ιωάννης ντικχέλα-λεν τι αβέν γιεκ ι Ιησούσαρ κο βες Σιών κο ουρανός.​—Αποκ. 14:1.

5. Σο κα αβέλ-πες ατζεχάνικ οντουλένγκε σο ατσσιλέ κατά 144.000;

⁵ Κατά μπρεσά ι αποστολόνγκε μέχρι ακανά, χιλιάδες τζενέ τραμπίντιλε για τι αβέν αντρέ κο 144.000. (Λουκ. 12:​32· Ρωμ. 8:​17) Όμως, βακέρντιβελα κο Ιωάννης ότι, κο τελευταία ντιβεσά, οντουλά τζενέ σο κα ατσσόν κι πφουβ κατά 144.000 κα αβέν σάντε χάνικ. Λένγκε, κα τσσουβντιόλ η τελευταία «σφραγίδα», σο σικαβέλα ότι τθερένα ι Ιεχωβάσκι ευλογία, πριν τι αρχίνελ η μπαρί στεναχώρια. (Αποκ. 7:2, 3· 12:​17) Σοράν, κι μπαρί στεναχώρια, οντουλά σο ατσσιλέ κα λιντιόν κο ουρανός για τι αβέν γιεκ ι γιαβερέντζαρ κατά 144.000 σο μουλέ πιστοί. Οτθέ, κα κερέν κουμάντος ι Ιησούσαρ κι Βασιλεία κι Ντεβλέσκι.​—Ματθ. 24:​31· Αποκ. 5:9, 10.

6, 7. (α) Κας ντικχέλα ο Ιωάννης σοράν κατά 144.000, ντα σο σικλιάσα λένγκε; (β) Σόσκε πρέπει τι αβέν σημαντικά ο λάφια κο κεφάλαιος 7 κι Αποκάλυψη εμ οντουλένγκε σο κα τζαν κο ουρανός εμ οντουλένγκε σο ισί αντρέ κο «μπαρό πλήθος»;

⁶ Σοράν κατά 144.000, ο Ιωάννης ντικχέλα εκ «μπαρό πλήθος». Όμως, ανταβά πλήθος ναστί γκιντιόλα. (Αποκ. 7:9, 10) Σο σικλιάσα λένγκε; Κο Ιωάννης βακέρντιβελα: «Βον ισί σο αβένα κατά μπαρί στεναχώρια, ντα τθοντέ πουμαρέ σέα ντα κερντέ-λεν παρνέ ι Μπρακέσκε ρατέσαρ». (Αποκ. 7:​14) Αφού κα σώντιβελ κατά μπαρί στεναχώρια, ανταβά «μπαρό πλήθος» κα τζουβντιόλ ατθέ κι πφουβ ντα κα τθερέλ μπουτ σουκάρ ευλογίες.​—Ψαλμ. 37:​9-11, 27-29· Παρ. 2:​21, 22· Αποκ. 7:​16, 17.

⁷ Είτε τραμπίντιλαμ τι τζας κο ουρανός είτε κα ατσσάς ατθέ κι πφουβ, ντικχάσα αμαρό νεαυτός ανταλέ λαφίντε σο ισί κι Αποκάλυψη κεφάλαιος 7; Πρέπει τι ντικχάς-λες. Σο σουκάρ βακίτι κα αβέλ ανταβά εμ οντουλένγκε σο κα τζαν κο ουρανός εμ οντουλένγκε σο κα ατσσόν ατθέ κι πφουβ! Κα αβάς μπουτ χαρούμενοι σο τραμπιντάμ τι τσσίντας κατά κυβέρνηση ι Ιεχωβάσκι. Σο γιαβέρ βακερέλα αμένγκε ο βιβλίος Αποκάλυψη ι μπαρέ στεναχωριάκε;​—Ματθ. 24:21.

8. Σαρ κα αρχίνελ η μπαρί στεναχώρια, ντα σο κα κερέν ο πο μπουτ τζενέ;

⁸ Σαρ ντικχλάμ κο γιαβέρ μάθημας, ο πολιτικοί ανταλέ ντουνιάσκε ατζεχάνικ κα τσσουβέν-λεν ι Μπαρέ Βαβυλωνάσαρ, σο ισί σαρέ ο ψεύτικες θρησκείες ι ντουνιάσκε. (Αποκ. 17:​16, 17) Ανταβά κα σικαβέλ ότι ερεσλί η μπαρί στεναχώρια. Αλλά κα κερέλ ανταβά μπουτέ τζενέν τι υπηρετίνεν ι Ιεχωβάς; Νάα. Οκιά μπάνταρ, ο κεφάλαιος 6 κι Αποκάλυψη σικαβέλα ότι οντουβά βακίτι, ο τζενέ σο να υπηρετίνενα ι Ιεχωβάς κα ρόντεν αρακχαϊπέ κο πολιτικοί ντα κο έμποροι ανταλέ ντουνιάσκε, σο βακέρντιβελα ότι ισί σαρ βεσά. Αφού οντουλά τζενέ να κα τσσίντεν κατά Βασιλεία ι Ντεβλέσκι, ο Ιεχωβά κα ντικχέλ-λεν σαρ ντουσμάνια.​—Λουκ. 11:​23· Αποκ. 6:​15-17.

9. Σαρ κα ξεχωρίνεν ο υπηρέτες ι Ιεχωβάσκε κι μπαρί στεναχώρια, ντα σο κα αβέλ-πες λένγκε;

 ⁹ Ισί μπαγιά ότι ο πιστοί υπηρέτες ι Ιεχωβάσκε κα ξεχωρίνεν οντουλέ μπαρέ στεναχωριάτε σο κα αβέλ μπουτ πφαρί. Σάντε βον να κα τσσιναβέν τι υπηρετίνεν ι Ιεχωβά Ντεβλές ντα να κα μανγκέν τι τσσίντεν κατά «θηρίος». (Αποκ. 13:​14-17) Οντουλά σο τζάνα κόντρα κο Ιεχωβά κα χολιάνεν μπουτ σόσκε κα ντικχέν λέσκε υπηρετόν τι ατσσόν πιστοί. Οτθάρ, τθεμά σο κα γκιντίντιβεν σαρέ γιεκ, πφερντέ χολί, κα τσσουβέν-λεν ι Ντεβλέσκε λαόσαρ σαρί κι πφουβ. Κι Γραφή, ανταλά τθεμά βακέρντιβενα Γωγ κατά τθεμ Μαγώγ.​—Ιεζ. 38:​14-16.

10. Σο κα κερέλ ο Ιεχωβά κάνα ο Γωγ κα τσσουβέλ-λεν λέσκε υπηρετόντζαρ σαρ αγαβάσα κατά εδάφια Αποκάλυψη 19:​19-21;

¹⁰ Σο κα κερέλ ο Ιεχωβά κάνα κα αβέλ-πες ανταβά; Βοβ βακερέλα αμένγκε: «Μι μπαρί χολί κα αβέλ σαρ γιακ». (Ιεζ. 38:​18, 21-23) Ο κεφάλαιος 19 κι Αποκάλυψη βακερέλα σο κα αβέλ-πες σοράν. Ο Ιεχωβά κα μπουτσσαβέλ πι Τσσαβές για τι αρακχαβέλ πι υπηρετόν ντα τι κερέλ καταστροφή λένγκε ντουσμανίν. Ανταλέ τζενγκίστε, ι Ιησούσαρ κα αβέν «ο στρατοί κο ουρανός», δηλαδή ο πιστοί άγγελοι ντα ο 144.000. (Αποκ. 17:​14· 19:​11-15) Σο κα αβέλ-πες κο τέλος ανταλέ τζενγκίσκο; Σαρέ ο τζενέ ντα ο οργανώσεις σο τζάνα κόντρα κο Ιεχωβά κα καταστραφίντιβεν ντιπ.​—Διαβάνεν Αποκάλυψη 19:​19-21.

11. Καλέ μπουτ σημαντικέ πραγμάσκε σο κα αβέλ-πες βακερέλα ο βιβλίος Αποκάλυψη;

¹¹ Ανέν τουμαρέ γκοντιάτε σαρ κα νιωθίνεν ο πιστοί κι πφουβ κάνα κα σώντιβεν κατά μπαρί καταστροφή ι Ντεβλέσκε ντουσμανίνγκι! Σο μπαρί χαρά κα αβέλ ανταγιά! Παρόλο σο κα αβέλ μπαρί χαρά κο ουρανός κάνα κα καταστραφίντιβελ η Μπαρί Βαβυλώνα, κάτι γιαβέρ κα ανέλ πο μπαρί χαρά. (Αποκ. 19:​1-3) Ισί εκ κατά πο σημαντικά πράγματα σο βακερέλα η Αποκάλυψη​—“ο μπιαβ ι Μπρακέσκο”.​—Αποκ. 19:​6-9.

12. Κάνα κα αβέλ-πες ο μπιαβ ι Μπρακέσκο σαρ αγαβάσα κατά εδάφια Αποκάλυψη 21:1, 2;

¹² Κάνα αβέλα-πες ο μπιαβ; Σαρέ ο 144.000 κα αβέν κο ουρανός χάνικ πριν τι αρχίνελ ο Αρμαγεδδώνας. Αλλά ο μπιαβ ι Μπρακέσκο να κα αβέλ-πες οντουλέ βακιτίστε. (Διαβάνεν Αποκάλυψη 21:1, 2) Ο μπιαβ ι Μπρακέσκο κα αβέλ-πες σοράν κατά Αρμαγεδδώνας ντα κατά καταστροφή σαρέ ι Ντεβλέσκε ντουσμανίνγκι.​—Ψαλμ. 45:3, 4, 13-17.

13. Σο κα αβέλ-πες κο μπιαβ κι Μπρακέσκο;

¹³ Σο κα αβέλ-πες κο μπιαβ κι Μπρακέσκο; Σαρ εκ μπιαβ κερέλα γιεκ εκχέ μουρσές ντα εκχέ τζουβλιά, αντικάς ανταβά-ντα συμβολικός μπιαβ κερέλα γιεκ ι Βασιλιάς, σο ισί ο Ιησούς Χριστός, ντα ι “μποριά”, σο ισί ο 144.000. Από αζομάν σο κα αβέλ-πες ανταβά μπουτ σημαντικός πράγμας, η νεβί κυβέρνηση αρχίνελα τι κερέλ κουμάντος ι πφουβ 1.000 μπρεσά.​—Αποκ. 20:6.

14, 15. Σαρ βακερέλα ο κεφάλαιος 21 κι Αποκάλυψη ότι ισί ο 144.000; (Ντικχέν ι φωτογραφία κι ανγκλαϊνί σελίδα)

¹⁴ Σοράν, ο κεφάλαιος 21 κι Αποκάλυψη βακερέλα ότι ο 144.000 ισί σαρ εκ μπουτ σουκάρ πόλη σο βακέρντιβελα «Νεβί Ιερουσαλήμ». (Αποκ. 21:2, 9) Ανταγιά συμβολική πόλη τθερέλα 12 μπαρά σαρ θεμέλιος σο οπρά-λέντε ισί γραμμέ «ο 12 ναβά ι 12 αποστολόνγκε ι Μπρακέσκε». Σόσκε κερέλα εντύπωση ανταβά κο Ιωάννης; Σόσκε ντικχέλα ότι εκ κατά μπαρά οντουλά τθερέλα γραμμέ οπράλ λέσκο ναβ. Σο μπαρό προνόμιος!​—Αποκ. 21:​10-14· Εφεσ. 2:20.

¹⁵ Καέκ γιαβέρ πόλη νανέ σαρ ανταγιά. Τθερέλα εκ μπαρό ντρομ σο ισί κερντό πάκι  χρυσαφίσαρ, 12 μπαρέ πόρτες σο ισί κερντέ μαργαριταρίντζαρ, ντουβάρια ντα θεμέλια σο ισί ζουζιμέ πααλίς μπαρέντζαρ ντα λάκο μπάριπε, λάκο μπούγλιπε ντα λάκο βούτσσιπε ισί ίδια. (Αποκ. 21:​15-21) Όμως, κάτι να τθερέλα! Ντικχέν σο βακερέλα αμένγκε πο τελέ ο Ιωάννης: «Ναός όμως να ντικχλόμ αντρέ ανταλάτε, σόσκε ο Ιεχωβά Ντεβέλ ο Πο Ζουρανό ντα ο Μπρακό ισί λάκο ναός. Η πόλη να χρειαζίντιβελα ο κχαμ ούτε ο τσσιμούτ για τι κερέν-λα τι λελ-πες, σόσκε κερντάς-λα τι λελ-πες η δόξα ι Ντεβλέσκι, ντα λάκο λυχνάρι ισινέ ο Μπρακό». (Αποκ. 21:​22, 23) Ο 144.000 κα αβέν ι Ιεχωβάσαρ. (Εβρ. 7:​27· Αποκ. 22:3, 4) Οτθάρ βακεράσα ότι ο Ιεχωβά ντα ο Ιησούς ισί ο ναός οντουλέ πολιάτε.

16. Σο κα αβέλ-πες ι τζενένγκε κο Χίλια Μπρεσά σο η Βασιλεία ι Ντεβλέσκι κα κερέλ κουμάντος ι πφουβ;

¹⁶ Ισί μπουτ σουκάρ ι χρισμέ τζενένγκε τι ανέν πουμαρέ γκοντιάτε οντιά πόλη. Αλλά οντουλά-ντα σο μπεκλεντίνενα τι τζουβντιόν κι πφουβ πρέπει τι τθερέν-λα πουμαρέ γκοντιάτε. Κο Χίλια Μπρεσά σο η Βασιλεία ι Ντεβλέσκι κα κερέλ κουμάντος ι πφουβ, η Νεβί Ιερουσαλήμ κα ανέλ μπουτ ευλογίες. Ο Ιωάννης ντικχέλα ανταλά ευλογίες τι τθάβντεν σαρ “λεν πανίσαρ σο ντέλα ζωή”. Ko ντούι μπάντες κι λενιάκε, ισί «δέντρα ζωγιάκε» σο νικαβένα φύλλα για τι κερέν λατσσές ι τθεμέν λένγκε νασφαλιμάσταρ. (Αποκ. 22:1, 2) Σαρέ ο τζενέ σο κα τζουβντιόν αζομάν κα τθερέν ι ευκαιρία τι ντικχέν λατσσιπέ οντουλέ σουκάρ πραγματένταρ σο κα αβέν-πες. Χάνικ χάνικ, σαρέ ο τζενέ σο ντένα καν ι Ιεχωβάς κα αβέν τέλειοι. Να κα αβέν πάλι νασφαλίματα, ντουκχ ντα ροϊπέ.​—Αποκ. 21:​3-5.

17. Κον κα ντικχέλ λατσσιπέ κατά Βασιλεία ι Χίλιε Μπρεσένγκι σαρ σικαβένα ο εδάφια Αποκάλυψη 20:​11-13;

¹⁷ Κον κα ντικχέλ λατσσιπέ ανταλέ σουκάρ πραγματένταρ σο κα αβέν-πες; Ο πρώτοι σο κα ντικχέν λατσσιπέ ισί ο μπαρό πλήθος σο κα σώντιβελ κατά Αρμαγεδδώνας ντα ο τσσαβέ σο μπορεί τι μπιάντιβεν κο νεβό ντουνιάς. Αλλά ο κεφάλαιος 20 κι Αποκάλυψη ντέλα πο λάφι-ντα ότι κα τζουβντιόν ο μουλέ. (Διαβάνεν Αποκάλυψη 20:​11-13) Ο πιστοί «δίκαιοι» σο μουλέ ανγκλέ ντα ο άδικοι, σο να τθερένας ι ευκαιρία τι σικλιόν ι Ιεχωβάσκε, κα τζουβντιόν πάλι ατθέ κι πφουβ. (Πράξ. 24:​15· Ιωάν. 5:​28, 29) Μανγκέλα τι βακερέλ ανταβά ότι κα τζουβντιόν πάλι σαρέ ο μουλέ κι πφουβ κι Βασιλεία κι Χίλιε Μπρεσένγκι; Νάα. Ο  πφιρνέ τζενέ, σο να μανγκλέ τι υπηρετίνεν ι Ιεχωβάς κάνα τθερένας ι ευκαιρία πριν τι μερέν, να κα τζουβντιόν πάλι. Ντιντιλί-λεν η ευκαιρία, αλλά σικαντέ ότι να αξίνενας τι τζουβντιόν κο Παράδεισος κι πφουβ.​—Ματθ. 25:​46· 2 Θεσ. 1:9· Αποκ. 17:8· 20:15.

18. Σαρ κα αβέν ο πράγματα κι πφουβ κάνα κα μπιτίνεν ο 1.000 μπρεσά;

¹⁸ Κάνα κα μπιτίνεν ο 1.000 μπρεσά, σαρέ οντουλά σο κα τζουβντιόν κι πφουβ κα αβέν τέλειοι. Σαρέ ο τζενέ αζομάν να κα τθερέν οπρά-πουμέντε ι αμαρτία σο λιντάμ κατά Αδάμ. (Ρωμ. 5:​12) Η αρμάν σο λιντάμ κατά αμαρτία ι Αδαμίσκι κα χασάρντιβελ ντιπ. Οτθάρ, ο τζενέ σο κα ατσσόν κι πφουβ κα “αβέν κι ζωή” σαρ τέλεια τζενέ κάνα κα μπιτίνεν ο 1.000 μπρεσά.​—Αποκ. 20:5.

19. Σόσκε κα χρειαζίντιβελ τι αβέλ-πες εκ τελευταία δοκιμασία;

¹⁹ Τζανάσα ότι ο Ιησούς ατσσιλό πιστός κο Ντεβέλ ατζέ-ντα κάνα ο Μπενγκ δοκιμαντάς-λες. Κα ατσσόν όμως ο τέλεια τζενέ πιστοί κο Ιεχωβά κάνα ο Μπενγκ κα δοκιμάνελ-λεν; Ο κάθε εκ κα μπορίνελ τι σικαβέλ πι αφοσίωση κο Ιεχωβά κάνα ο Μπενγκ κα πουτάρντιβελ κατά άβυσσος κο τέλος κι 1.000 μπρεσένγκο. (Αποκ. 20:7) Οντουλά σο κα ατσσόν πιστοί κο βακίτι ανταλέ τελευταίε δοκιμασιάκο κα λεν ζωή για πάντα ντα κο τέλος κα αβέν μπαγιά ελεύθεροι. (Ρωμ. 8:​21) Οντουλά σο κα τζαν κόντρα κο Ντεβέλ κα καταστραφίντιβεν για πάντα, γιεκ ι Διαβολόσαρ ντα λέσκε δαιμονέντζαρ.​—Αποκ. 20:​8-10.

20. Σαρ νιωθίνενα σο ντικχλέν ο σουκάρ προφητείες σο ισί κο βιβλίος Αποκάλυψη;

²⁰ Σαρ νιωθίνενα σο ντικχλέν χάνικ λαφίντζαρ οντουλά σο βακερέλα ο βιβλίος Αποκάλυψη; Να σαστίνενα σο ντικχένα τουμαρό νεαυτός αντρέ ανταλέ μπουτ σουκάρ προφητειέντε; Να κερέλα-τουμέν ανταβά τι μανγκέν τι βακερέν γιαβερένγκε-ντα τι ντεν αμέντζαρ πάκι λατρεία αμαρέ Ντεβλέστε; (Αποκ. 22:​17) Ακανά σο ντικχλάμ ότι κα αβέν-πες ανγκλ’ αμέντε ανταλά πράγματα, ισινάμ μπουτ χαρούμενοι ντα μανγκάσα τι βακεράς ο λάφια ι απόστολε Ιωαννίσκερε: «Αμήν! Έλα, Κύριε Ιησού».​—Αποκ. 22:20.