1, 2. Σόσκε αβένα πο σημαντικές αμένγκε ο αρχές ι Γραφιάκε κάνα αλλάνενα ο πράγματα αμαρέ ζωγιάτε;

 Ο ΝΤΙΒΕΣ πουμαρέ μπιαβέσκο, ο τζαμουτρό ντα η μπορί ασουνένα εκ ομιλία αντράλ κατά Γραφή. Να ασουνένα πρώτη φαρ ο αρχές ι Γραφιάκε σο βακέρντιβενα ανταλέ ομιλιάτε. Αλλά από ακανά, ανταλά λάφια κα αβέν πο σημαντικά λένγκε. Σόσκε; Επειδή κα κερέν-λεν πουμαρέ ζωγιάτε σαρ αντρόγυνος.

² Ανταβά αβέλα-πες κάνα εκ αντρόγυνος κερέλα τσσαβέν. Ο μπρεσά σο νακχλέ, μπέκιμ ασουντέ μπερεκέτι ομιλίες σο βακερένας σαρ τι μπαριαρέν ο νταντά ντα ο νταγιά πουμαρέ τσσαβέν. Ακανά όμως, ανταλά λάφια αβένα πο σημαντικά λένγκε σόσκε βον-ντα τθερένα τσσαβέν. Σο μπαρί ευθύνη! Κάνα ο πράγματα αμαρέ ζωγιάτε αλλάνενα, αλλάνελα ο τρόπος-ντα σο ντικχάσα αρχές ι Γραφιάκε σο τζανάσα μπουτ λατσσές. Άκ’ σόσκε ο υπηρέτες ι Ιεχωβάσκε διαβάνενα ι Γραφή ντα, σαρ βακέρντιλοας κο βασιλιάδες κο Ισραήλ, σκεφτίνενα-λα λατσσές “σαρέ ο ντιβεσά πουμαρέ ζωγιάκε”.​—Δευτ. 17:19.

3. Σο κα ντικχάς ανταλέ μαθημάστε;

³ Νταντάλεν ντα νταγιάλεν, τθερένα εκ κατά πο μπαρέ προνόμια σο μπορίνελα τι τθερέλ εκ Χριστιανός: τι σικλιαρέν τουμαρέ τσσαβέν ι Ιεχωβάσκε. Αλλά να ερεσέλα τι βακερέν λένγκε αμαρέ Ντεβλέσκε. Πρέπει τι βοηθίνεν-λεν τι τθερέν μπαρό μανγκιπέ λέσκε αντρέ πουμαρέ γκίστε. Σαρ κα κερέν-λες ανταβά; Ανταλέ μαθημάστε, κα ντικχάς σταρ αρχές κατά  Γραφή σο μπορίνενα τι βοηθίνεν-τουμέν. (2 Τιμ. 3:​16) Ντα κα σικλιάς σαρ ντικχλέ λατσσιπέ μερικά νταντά ντα νταγιά σο κερντέ ο συμβουλές ι Γραφιάκε.

4. Καγιά αρχή κα βοηθίνελ-τουμέν τι σικλιαρέν χάνικ χάνικ τουμαρέ τσσαβέν τι μανγκέν ι Ιεχωβάς; (Ιακώβου 1:5)

⁴ Αρχή 1: Ρόντεν ο συμβουλές ι Ιεχωβάσκε. Μανγκέν κατά Ιεχωβά τι ντελ-τουμέν ι σοφία σο τθερένα ανάγκη για τι βοηθίνεν τουμαρέ τσσαβέν τι μπαριαρέν πουμαρό μανγκιπέ λέσκε. (Διαβάνεν Ιακώβου 1:5) Βοβ ντέλα ο πο λατσσέ συμβουλές. Σόσκε; Ντικχέν σάντε ντούι λόγοι. Πρώτον, ο Ιεχωβά ισί Ντατ πο μπουτ μπρεσά σαριλένταρ. (Ψαλμ. 36:9) Δεύτερον, ο γκοντιαβέρ συμβουλές σο ντέλα ανένα πάντα λατσσιπέ.​—Ησ. 48:17.

5. (α) Σο νικαβέλα η οργάνωση ι Ιεχωβάσκι για τι βοηθίνελ ι νταντέν ντα ι νταΐν; (β) Σο σικλιλέν κατά τρόπος σο μπαριαρντέ πουμαρέ τσσαβέν ο πφραλ ντα η πφεν Αμορίμ σαρ σικαβέλα ο βίντεος;

⁵ Αντράλ πι Λαφίσταρ ντα πι οργανωσιάταρ, ο Ιεχωβά ντέλα μπουτ πνευματικός χαμπέ σο μπορίνελα τι βοηθίνελ-τουμέν τι σικλιαρέν τουμαρέ τσσαβέν τι μανγκέν-λες. (Ματθ. 24:​45) Για παράδειγμας, μπορίνενα τι ντικχέν ο θέματα «Συμβουλές για την Οικογένεια», σο νικιόνας κο περιοδικός Ξύπνα! ντα ακανά ισί αμαρέ ιστοτοπόστε. Ντα μπουτ βίντεα κο ιστότοπος jw.org μπορίνενα τι βοηθίνεν ι νταντέν ντα ι νταΐν τι κερέν ο συμβουλές ι Ιεχωβάσκε καζόμ μπαριαρένα πουμαρέ τσσαβέν. *​—Παρ. 2:​4-6.

6. Σαρ βοηθίντιβελα εκ ντατ πι ρομνιάσαρ οντουλένταρ σο νικαβέλα η οργάνωση ι Ιεχωβάσκι;

⁶ Μπουτ νταντά ντα νταγιά βακερντέ ότι εκτιμίνενα ι βοήθεια σο ντινάς-λεν ο Ιεχωβά αντράλ πι οργανωσιάταρ. Εκ ντατ, ο Τζο, βακερέλα: «Νανέ ιτς εύκολος τι μπαριαρές τρινέ τσσαβέν κι αλήθεια. Μι ρομνιάσαρ πάντα προσευχίντιβασα κο Ιεχωβά τι βοηθίνελ-αμέν. Μπουτ φαρ αγαντάμ ότι εκ θέμας ή εκ βίντεος νικίστιλο οπράλ κο σαάτι για τι βοηθίνελ-αμέν τι ντας-λεν πέρα εκχέ δυσκολιάσαρ. Ο συμβουλές ι Ιεχωβάσκε ισί μπουτ σημαντικές αμένγκε». Ο Τζο ντα λέσκι ρομνί ντικχλέ ότι ανταλά θέματα ντα βίντεα βοηθίνενα λένγκε τσσαβέν τι αβέν πασέ κο Ιεχωβά.

7. Σόσκε ισί σημαντικός ο νταντά ντα ο νταγιά τι ντεν λατσσό παράδειγμας πουμαρέ τσσαβέντε; (Ρωμαίους 2:21)

 ⁷ Αρχή 2: Σικλιαρέν τουμαρέ παραδειγμάσαρ. Ο τσσαβέ ντικχένα πουμαρέ νταντές ντα πουμαρέ νταγιά ντα μπουτ φαρ κερένα οντουβά σο ντικχένα λένταρ. Σίγουρα, σαρέ ο νταντά ντα ο νταγιά ισί ατελείς. (Ρωμ. 3:​23) Όμως, ο γκοντιαβέρ νταντά ντα νταγιά κερένα σο νακχέλα λένγκε βαστένταρ για τι ντεν λατσσό παράδειγμας πουμαρέ τσσαβέντε. (Διαβάνεν Ρωμαίους 2:​21) Εκ ντατ βακερντάς: «[Ο τσσαβέ] γκίντενα-λεν σαρέ σαρ σφουγγάρια». Βακερέλα ακαβά-ντα: «Κάνα να κεράσα οντουλά σο σικλιαράσα-λεν, κα βακερέν-λες αμένγκε». Οτθάρ, άμα μπεκλεντίνασα αμαρέ τσσαβένταρ τι μανγκέν ι Ιεχωβάς, πρέπει τι ντικχέν ότι αμαρό μανγκιπέ λέσκε ισί ζουρανό.

8, 9. Σο σικλιλέν οντουλένταρ σο βακερντέ ο Άντριου ντα η Έμα;

⁸ Ισί μπουτ τρόποι τι σικλιαρέν ο νταντά ντα ο νταγιά πουμαρέ τσσαβέν τι μανγκέν ι Ιεχωβάς. Ντικχέν σο βακερέλα εκ πφραλ 17 μπρεσένγκο, ο Άντριου: «Μο ντατ ντα μι ντάι πάντα βακερένας μάνγκε καζόμ σημαντική ισί η προσευχή. Κάθε ιράτ, μο ντατ προσευχίντιβελας μάντζαρ, ατζέ-ντα άμα κερντόμας προσευχή κορκορό πο τζανγκλέ. Μο ντατ ντα μι ντάι πάντα βακερένας αμένγκε: “Μπορίνεσα τι κερές λάφι κο Ιεχωβά καζόμ φαρ μανγκέσα”. Οτθάρ, η προσευχή αβιλί μπουτ σημαντική μάνγκε. Ακανά ισί μάνγκε μπουτ εύκολος τι κεράβ προσευχή κο Ιεχωβά ντα τι ντικχάβ-λες σαρ εκ Ντατ σο μανγκέλα-μαν». Νταντάλεν ντα νταγιάλεν, ποτές μα μπιστρέν καζόμ μπορίνελα τι βοηθίνελ τουμαρέ τσσαβέν ο μανγκιπέ σο τθερένα τουμέν ι Ιεχωβάσκε.

⁹ Ντικχέν ο παράδειγμας ι Εμάκο-ντα. Κάνα λάκο ντατ νασλό κατά φαμιλί, μουκχλάς λάκε νταγιάκε μπουτ μπαρέ μπόρτζια. Η Έμα βακερέλα: «Μπουτ φαρ μι ντάι να τθερέλας λοβέ, αλλά πάντα βακερέλας σαρ αρακχαβέλα ο Ιεχωβά πι υπηρετόν ντα ντέλα-λεν ο αναγκαία. Ντικχάβας κατά τρόπος σο τζουβντιόλας ότι πακιάλας-λες μπαγιά ανταβά. Μι ντάι κερέλας πι ζωγιάτε οντουλά σο βακερέλας». Σο σικλιάσα; Ο νταντά ντα ο νταγιά μπορίνενα τι σικλιαρέν πουμαρέ παραδειγμάσαρ ατζέ-ντα κάνα ισί δυσκολίες.​—Γαλ. 6:9.

10. Καλά ευκαιρίες τθερένας μπουτ Ισραηλίτες για τι κερέν λάφι πουμαρέ τσσαβέντζαρ; (Δευτερονόμιο 6:6, 7)

¹⁰ Αρχή 3: Κερέν λάφι καζόμ πο μπουτ αβέλα-πες τουμαρέ τσσαβέντζαρ. Ο Ιεχωβά βακερντάς ι πουρανέ Ισραηλιτένγκε τι σικλιαρέν μπουτ φαρ πουμαρέ τσσαβέν λέσκε. (Διαβάνεν Δευτερονόμιο 6:6, 7) Αζομάν, ο τζενέ τθερένας μπουτ ευκαιρίες αντρέ κο ντιβές τι κερέν λάφι πουμαρέ τσσαβέντζαρ ντα τι σικλιαρέν-λεν χάνικ χάνικ τι μανγκέν ι Ιεχωβάς. Για παράδειγμας, ο τσσαβέ βοηθίνενας μπουτ σαάτια πουμαρέ νταντές τι σπειρίνελ ή τι γκίντελ. Ο τσσαγιά μπουτ σαάτια αντρέ κο ντιβές βοηθίνενας πουμαρέ νταγιά τι σουβέλ, τι κχουβέλ ντα τι κερέλ γιαβερά μπουτιά ι κχερέσκε. Καζόμ κερένας μπουτί γιεκ, ο νταντά ντα ο νταγιά μπορίνενας τι βακερέν πουμαρέ τσσαβένγκε μπουτέ σημαντικέ πραγματένγκε. Φιρειπείν, μπορεί τι βακερένας καζόμ λατσσό ισί ο Ιεχωβά ντα σαρ βοηθίνελας λένγκι φαμιλί.

11. Κάνα τθερένα ευκαιρία ο νταντά ντα ο νταγιά τι κερέν λάφι πουμαρέ τσσαβέντζαρ;

¹¹ Ο μπρεσά αλλαξάλε. Μπουτέ τθεμέντε, ο τζενέ ναστί νακχένα σαάτι πουμαρέ τσσαβέντζαρ αντρέ κο ντιβές, σόσκε βον μπέκιμ ισί κι μπουτί ντα ο τσσαβέ κο σχολείος. Οτθάρ, πρέπει τι ρόντεν ευκαιρίες για τι κερέν λάφι πουμαρέ τσσαβέντζαρ. (Εφεσ. 5:​15, 16· Φιλιπ. 1:​10) Ι φαμιλιάκι λατρεία ντέλα-λεν εκ ασακί ευκαιρία. Εκ τερνό πφραλ, ο Αλεξάντερ,  βακερέλα: «Μο ντατ κανονίνελα πάντα τι κεράς φαμιλιάκι λατρεία ντα να μουκχέλα τίποτα τι λελ αμένταρ ανταβά σαάτι σο νακχάσα γιεκ. Σοράν κατά λατρεία, μπεσάσα ντα κεράσα αμένγκε λάφι».

12. Σο πρέπει τι τθερέν πουμαρέ γκοντιάτε ο σορέ ι φαμιλιάκε καζόμ κερένα ι φαμιλιάκι λατρεία;

¹² Τουμέν σο ισινέν ο σορέ ι φαμιλιάκε, σο μπορίνενα τι κερέν για τι μπεϊντίνεν τουμαρέ τσσαβέ ι φαμιλιάκι λατρεία; Κα μπορίνενας τι κερέν γιεκ λέντζαρ αμαρό νεβό βιβλίος Μπουτ Σουκάρ Ζωή για Πάντα! Ανταβά βιβλίος κα ντελ-τουμέν ι ευκαιρία τι πουτρέν μπουτ σουκάρ συζητήσεις. Σίγουρα, μανγκένα τι βακερέν τουμένγκε τουμαρέ τσσαβέ σο τθερένα πουμαρέ γκίστε ντα πουμαρέ γκοντιάτε, οτθάρ μα κερέν λένγκε λάφια ντα μα χαν-τουμέν λέντζαρ κι φαμιλιάκι λατρεία. Ντα άμα βον κα βακερέν κάτι σο τζάλα κόντρα κο αρχές κι Γραφιάκε, κερέν ο πο λατσσό για μα τι χολιάνεν λένγκε. Αλλά βακερέν λένγκε ότι μπεϊντίνενα σο πουτρένα τουμένγκε πουμαρό γκι ντα κερέν-λεν μα τι λατζάν. Κα βοηθίνεν τουμαρέ τσσαβέν σάντε άμα τζανένα σο τθερένα μπαγιά πουμαρέ γκίστε.

13. Καλά γιαβερά ευκαιρίες τθερένα ο νταντά ντα ο νταγιά για τι βοηθίνεν πουμαρέ τσσαβέν τι αβέν πασέ κο Ιεχωβά;

¹³ Νταντάλεν ντα νταγιάλεν, ρόντεν ευκαιρίες αντρέ κο ντιβές για τι βοηθίνεν τουμαρέ τσσαβέν τι αβέν πασέ κο Ιεχωβά. Μα μπεκλεντίνεν τι αβέλ ο σαάτι σο κερένα-λεν μελέτη για τι σικλιαρέν-λεν αμαρέ Ντεβλέσκε σο μανγκέλα-αμέν. Ντικχέν σο βακερέλα εκ ντάι, η Λίζα: «Βοηθίναας αμαρέ τσσαβέν τι σικλιόν ι Ιεχωβάσκε αντράλ οντουλένταρ σο λατσσαρντάς. Για παράδειγμας, κάνα ασάνας αμαρέ τσσαβέ οντουλέντζαρ σο κερέλας αμαρό τζουκέλ, βακεράας λένγκε ότι ανταβά σικαβέλα καζόμ ευτυχισμέ Ντεβέλ ισί ο Ιεχωβά ντα καζόμ μπουτ μανγκέλα ι ζωή, σαρ αμέν-ντα».

14. Σόσκε ισί σημαντικός ο νταντά ντα ο νταγιά τι βοηθίνεν πουμαρέ τσσαβέν τι τραμπίνεν γκοντιάσαρ πουμαρέ αμαλέν; (Παροιμίες 13:20)

¹⁴ Αρχή 4: Βοηθίνεν τουμαρέ τσσαβέν τι τραμπίνεν λατσσέ αμαλέν. Ο Λάφι ι Ντεβλέσκο σικαβέλα αμένγκε μπουτ λατσσές ότι αμαρέ αμαλά μπορίνενα τι κερέν αμένγκε είτε λατσσιπέ είτε ζιάνι. (Διαβάνεν Παροιμίες 13:​20) Νταντάλεν ντα νταγιάλεν, τζανένα κον  ισί ο αμαλά τουμαρέ τσσαβένγκε; Νακχλέν ιτς σαάτι λέντζαρ; Σαρ κα βοηθίνεν τουμαρέ τσσαβέν τι τραμπίνεν αμαλέν σο μανγκένα ι Ιεχωβάς; (1 Κορ. 15:​33) Κα κερέν-λες ανταβά, άμα κα καλίνεν τζενέν σο ισί λατσσέ αμαλά ι Ιεχωβάσαρ, τι κερέν πράγματα γιεκ τουμαρέ φαμιλιάσαρ.​—Ψαλμ. 119:63.

15. Σο μπορίνενα τι κερέν ο νταντά ντα ο νταγιά για τι βοηθίνεν πουμαρέ τσσαβέν τι τραμπίνεν λατσσέ αμαλέν;

¹⁵ Ντικχέν σο κερέλα εκ ντατ, ο Τόνι, ντα λέσκι ρομνί για τι βοηθίνεν πουμαρέ τσσαβέν τι τραμπίνεν λατσσέ αμαλέν: «Σαρέ ανταλά μπρεσά, μι ρομνί ντα με καλίνασα αμαρέ κχερέστε μπουτέ πφραλέν ντα πφενίν, εμ πφουρέν εμ τερνέν. Χάσα λέντζαρ ντα κεράσα γιεκ αμαρί φαμιλιάκι λατρεία. Ανταβά ισί εκ μπουτ σουκάρ τρόπος για τι σικλιάς-αμέν οντουλέντζαρ σο μανγκένα ι Ιεχωβάς ντα υπηρετίνενα-λες χαράσαρ. Τθεράας ι μπαρί χαρά τι πουτράς αμαρό κχερ ι επισκοπόνγκε, ι ιεραποστολόνγκε ντα γιαβερένγκε. Ο εμπειρίες σο βακερένας, ο μανγκιπέ σο σικαβένας πουμαρέ εργόσκε ντα σαρέ οντουλά σο κερένας αντράλ πουμαρέ γκίσταρ ι Ιεχωβάσκε σικλιαρντέ αμαρέ τσσαβέν ντα βοηθιντέ-λεν τι αβέν πασέ κο Ιεχωβά». Νταντάλεν ντα νταγιάλεν, κερέν ο πο λατσσό για τι βοηθίνεν τουμαρέ τσσαβέν τι τθερέν λατσσέ αμαλέν.

16. Σο αβέλα-πες άμα εκ τουμαρέ τσσαβένταρ κα βακερέλ ότι να μανγκέλα τι υπηρετίνελ ι Ιεχωβάς;

¹⁶ Σο αβέλα-πες, άμα τουμέν κερένα ο πο λατσσό, αλλά εκ τουμαρέ τσσαβένταρ κα βακερέλ ότι να μανγκέλα τι υπηρετίνελ ι Ιεχωβάς; Μα αμντίνεν ότι να κερντέν λατσσές τουμαρί μπουτί σαρ ντατ ή ντάι. Ο Ιεχωβά ντινάς-αμέν σαριλέν, εμ τουμαρέ τσσαβέν, ι ελευθερία τι τραμπίνας άμα κα υπηρετίνας-λες. Άμα εκ τουμαρέ τσσαβένταρ τραμπιντάς τι μουκχέλ ι Ιεχωβάς, μα τσσιναβέν τι μπεκλεντίνεν ότι εκ ντιβές κα βουρτίνελ. Ντεν-τουμέν γκοντί ι παραβολή ι τσσαβέσαρ σο χασάρντιλο. (Λουκ. 15:​11-19, 22-24) Οντουβά τερνό κερντάς μπερεκέτι γκεραλέ πράγματα, αλλά σοράν βουρτισάλο. «Ανταγιά ισί εκ παραβολή», μπέκιμ τι βακερέλ εκ τζενό. «Μπορίνελα τι αβέλ-πες μπαγιά;» Βα, μπορίνελα! Ντα ανταβά αβιλό-πες εκχέ τερνέσκε-ντα, κο Ίλι.

17. Σαρ ντέλα-τουμέν ζορ οντουβά σο αβιλό-πες κο Ίλι;

 ¹⁷ Ο Ίλι βακερέλα: «[Μο ντατ ντα μι ντάι] κερντέ σο νακχέλας λένγκε βαστένταρ για τι σικλιαρέν-μαν τι μανγκάβ ι Ιεχωβάς ντα λέσκο Λάφι, ι Αγία Γραφή. Όμως, κάνα ισινόμας πασέ 15 μπρεσένγκο, αρχισάλομ τι τζαβ λέντζαρ κόντρα». Ο Ίλι κερέλας αποτσοράλ μπέτι πράγματα ντα να ασουνέλας ιτς πι νταντές ντα πι νταγιά σο μανγκένας τι βοηθίνεν-λες τι ατσσόλ πασέ κο Ιεχωβά. Κάνα νασλό κατά κχερ, κερντάς γκεραλέ πράγματα πι ζωγιάτε. Αλλά μπάζιμα, κερέλας λάφι ι Γραφιάκε πι αμαλέσαρ. Ο Ίλι βακερέλα: «Καζόμ πο μπουτ κεράβας λέσκε λάφι ι Ιεχωβάσκε, αζόμ πο μπουτ σκεφτίναβας με-ντα ι Ιεχωβάς. Χάνικ χάνικ, ο σπόροι ι αληθειάκε, σο μο ντατ ντα μι ντάι μαρντέας-πουμέν τι φυτίνεν αντρέ μι γκίστε, αρχισάλε τι μπαριόν». Ο Ίλι βουρτισάλο κι αλήθεια. * Ανέν τουμαρέ γκοντιάτε καζόμ μπαρί χαρά τθερένας λέσκο ντατ ντα λέσκι ντάι σο κερντέ ο πο λατσσό για τι σικλιαρέν-λες χουρντιαρέλα τι μανγκέλ ι Ιεχωβάς!​—2 Τιμ. 3:​14, 15.

18. Σαρ νιωθίνενα ι νταντένγκε ντα ι νταΐνγκε σο μαρένα-πες μπουτ για τι σικλιαρέν πουμαρέ τσσαβέν τι μανγκέν ι Ιεχωβάς;

¹⁸ Νταντάλεν ντα νταγιάλεν, τθερένα ο μπουτ σουκάρ προνόμιος τι μπαριαρέν οντουλέν σο κα αβέν ο νεβέ υπηρέτες ι Ιεχωβάσκε. (Ψαλμ. 78:​4-6) Ανταγιά ισί εκ μπουτ δύσκολη μπουτί, ντα ισαράσα-τουμέν αντράλ αμαρέ γκίσταρ σο μαρένα-τουμέν αζόμ μπουτ για τι βοηθίνεν τουμαρέ τσσαβέν! Τι τζανέν ότι κα αβέλ ο γκι αμαρέ λατσσέ Νταντέσκο, ι Ιεχωβάσκο, άμα να κα τσσιναβέν τι κερέν ο πο λατσσό για τι σικλιαρέν τουμαρέ τσσαβέν τι μανγκέν-λες ντα τι ντεν-λες καν.​—Εφεσ. 6:4.