1. Σόσκε χρειαζίντιβασα σαρέ ι Ντεβλέσκι σοφία; (Παροιμίες 4:7)

 ΑΜΑ τθερένας καέκ φαρ τι λεν εκ σημαντική απόφαση, σίγουρα μανγκλέν σοφία κατά Ντεβέλ σόσκε αγαντέν καζόμ μπουτ χρειαζίντιβενας-λα. (Ιακ. 1:5) Ο Βασιλιάς Σολομών γραφιντάς: «Η σοφία ισί ο πο σημαντικός πράγμας». (Διαβάνεν Παροιμίες 4:7) Αγαβάσα ότι ο Σολομών να κερέλας λάφι σαβέ τι μανγκές σοφιάκε. Κερέλας λάφι ι σοφιάκε σο αβέλα κατά Ιεχωβά Ντεβέλ. (Παρ. 2:6) Αλλά μπορίνελα ι Ντεβλέσκι σοφία τι βοηθίνελ-αμέν τι ντας-λεν πέρα ι προβληματέντζαρ σο τθεράσα αντιβές; Βα, μπορίνελα, σαρ κα ντικχάς ανταλέ μαθημάστε.

2. Καβά ισί εκ τρόπος για τι αβάς μπαγιά γκοντιαβέρ;

² Εκ τρόπος για τι αβάς μπαγιά γκοντιαβέρ ισί τι σικλιάς ντα τι κεράς ο λάφια ντουέ μουρσένγκε σο ισινέ μπουτ γκοντιαβέρ. Πρώτον, κα κεράς λάφι ι Σολομωντάσκε. Η Γραφή βακερέλα ότι «ο Ντεβέλ κερντάς ι Σολομωντάς μπουτ γκοντιαβέρ ντα ντινάς-λες εκ γκι σο αγαβέλας» μπουτ πράγματα. (1 Βασ. 4:​29) Δεύτερον, κα κεράς λάφι ι Ιησούσκε, σο ισινέ ο πο γκοντιαβέρ σαρέ κατά γιαβερά τζενέ. (Ματθ. 12:​42) Η Γραφή βακερντάας ότι οπράλ κο Ιησούς “κα μπεσέλας ο πνεύμας ι Ιεχωβάσκο, ντα οτθάρ βοβ κα τθερέλας σοφία ντα κα αγαβέλας σαρ ισί μπαγιά ο πράγματα”.​—Ησ. 11:2.

3. Σο κα ντικχάς ανταλέ μαθημάστε;

³ Ο Ντεβέλ ντινάς κο Σολομών ντα κο Ιησούς μπουτ σοφία, οτθάρ βον ντινέ λατσσέ συμβουλές πραγματένγκε σο ισί σημαντικά  σαρέ αμένγκε. Ανταλέ μαθημάστε, κα ντικχάς τριν ανταλέ πραγματένταρ: τι ντικχάς ο λοβέ, ι μπουτί ντα αμαρό νεαυτός σαρ μανγκέλα ο Ντεβέλ.

4. Σαρ τζουβντιόλας ο Σολομών ντα σαρ ο Ιησούς;

⁴ Ο Σολομών ισινέ μπουτ χουλανό ντα τζουβντιόλας εκχέ μπουτ σουκάρ κχερέστε. (1 Βασ. 10:7, 14, 15) Ο Ιησούς, οκιά μπάνταρ, να τθερέλας μπουτ πράγματα ντα πιρό κχερ. (Ματθ. 8:​20) Αλλά ο ντούι-ντα ντικχένας ο λοβέ σαρ μανγκέλα ο Ιεχωβά σόσκε λένγκι σοφία αβέλας λέσταρ.

5. Σαρ ντικχέλας ο λοβέ ο Σολομών;

⁵ Ο Σολομών βακερντάς ότι ο λοβέ “αρακχαβένα-αμέν”. (Εκκλ. 7:​12) Ι λοβέντζαρ, μπορίνασα τι κινάς ο πράγματα σο χρειαζίντιβασα ντα μπέκιμ χάνικ πράγματα σο μανγκάσα-ντα. Αλλά ο Σολομών, παρόλο σο ισινέ μπουτ χουλανό, αγαβέλας ότι ο λοβέ να ισινέ ο πο σημαντικός πράγμας. Για παράδειγμας, γραφιντάς: «Ο λατσσό ναβ ισί πο λατσσό κατά μπαρό χουλανιπέ». (Παρ. 22:1) Ο Σολομών ντικχλάς ότι ο τζενέ σο μανγκένα ο λοβέ, ο πο μπουτ φαρ, να ερεσένα-λεν οντουλά σο τθερένα. (Εκκλ. 5:​10, 12) Ντα βακερντάς μα τι ντας σαρί αμαρί μπέσα κο λοβέ σόσκε, καζόμ-ντα λοβέ τι τθεράσα, μπορεί τι χασάρντιβεν σουγκό.​—Παρ. 23:4, 5.

6. Σαρ ντικχέλας ο Ιησούς ο υλικά πράγματα; (Ματθαίος 6:​31-33)

⁶ Ο Ιησούς ντικχέλας ο υλικά πράγματα σαρ μανγκέλα ο Ντεβέλ. Μπεϊντίνελας τι χαλ ντα τι πιλ. (Λουκ. 19:2, 6, 7) Εκ φαρ, κερντάς ο πανί τι αβέλ μπουτ λατσσί μολ, ντα ανταβά ισινέ λέσκο πρώτος θαύμας. (Ιωάν. 2:​10, 11) Ο ντιβές σο μουλό, εκ κατά σέα σο ιρίλας ισινέ μπουτ πααλίς. (Ιωάν. 19:​23, 24) Αλλά ο Ιησούς να μουκχλάς ο υλικά πράγματα τι αβέν πρώτα λέσκε ζωγιάτε. Βακερντάς οντουλένγκε σο τζάνας παλά-λέστε: «Καέκ ναστί υπηρετίνελα σαρ δούλος ντουέ κυριόν . . . Ναστί υπηρετίνενα σαρ δούλοι ι Ντεβλές ντα ο Χουλανιπέ». (Ματθ. 6:​24) Ο Ιησούς σικλιαρντάς ότι, άμα μανγκάσα πρώτα ι Βασιλεία, ο  Ιεχωβά κα ντελ-αμέν σο-ντα χρειαζίντιβασα.​—Διαβάνεν Ματθαίος 6:​31-33.

7. Σο λατσσιπέ ντικχλάς εκ πφραλ επειδή ντικχέλας ο λοβέ σαρ μανγκέλα ο Ντεβέλ;

⁷ Μπουτ πφραλά ντα πφενιά ντικχλέ λατσσιπέ σόσκε ντινέ καν κο γκοντιαβέρ συμβουλές κι Ντεβλέσκε σο τθερένα τι κερέν ι λοβέντζαρ. Ο Ντάνιελ, εκ μπίπαντριμε πφραλ, βακερέλα: «Κάνα ισινόμας τερνό, τραμπιντόμ τι τσσουβάβ ο πράγματα ι Ντεβλέσκε πρώτα μι ζωγιάτε». Επειδή ο Ντάνιελ ατσσικιαρντάς πι ζωή απλή, μπορισάλο τι ντελ πι σαατίσταρ για τι κερέλ μπουτ πράγματα ι Ιεχωβάσκε. Βοβ βακερέλα: «Μπορίναβα μπαγιά τι βακεράβ ότι να μετανιωσάλομ ιτς ι ντρομέσκε σο τραμπιντόμ. Σίγουρα, κα νικαβάβας μπουτ λοβέ άμα ανταβά ισινέ ο πο σημαντικός πράγμας μι ζωγιάτε. Αλλά σαρ κα ντένας-μαν ο λοβέ ι αμαλέν σο τθεράβα ακανά; Σαρ κα ντένας-μαν ι χαρά σο τθεράβα επειδή τσσουντόμ ι Βασιλεία πρώτα μι ζωγιάτε; Καζόμ-ντα λοβέ τι τθεράβας, να κα αβένας τίποτα ανγκλάλ κο ευλογίες σο ντινάς-μαν ο Ιεχωβά». Αγαβάσα μπουτ λατσσές ότι ντικχάσα λατσσιπέ κάνα να τσσουβάσα ανγκλάλ ο λοβέ, αλλά ο πράγματα ι Ντεβλέσκε.

8. Σαρ τζανάσα ότι ο Σολομών ντικχέλας ι μπουτί σαρ μανγκέλα ο Ντεβέλ; (Εκκλησιαστής 5:​18, 19)

⁸ Ο Σολομών βακερντάς ότι η πφαρί μπουτί ντέλα-αμέν χαρά ντα ισί «δώρος κατά Ντεβέλ». (Διαβάνεν Εκκλησιαστής 5:​18, 19) Γραφιντάς: «Η κάθε προσπάθεια σο κερντιόλα ανέλα λατσσιπέ». (Παρ. 14:​23) Ο Σολομών τζανέλας σο βακερέλας. Ισινέ μπουτιαρνό τζενό! Κερντάς κχερά, κήπους ντα δεξαμενές, φυτιντάς ρεζά ντα λατσσαρντάς πόλεις. (1 Βασ. 9:​19· Εκκλ. 2:​4-6) Ανταγιά πφαρί μπουτί σίγουρα αντάς λέσκε χαρά. Αλλά ο Σολομών τζανέλας ότι, για τι αβέλ μπαγιά ευτυχισμέ, να ερεσένας σάντε ανταλά. Κερέλας μπουτ πράγματα ι Ιεχωβάσκε-ντα. Για παράδειγμας, ισινέ υπεύθυνος τι λατσσάρντιβελ ο μπουτ σουκάρ ναός ι Ιεχωβάσκο. Ανταγιά μπουτί ατσσικιαρντάς εφτά μπρεσά! (1 Βασ. 6:​38· 9:1) Σοράν σαρέ ανταλένταρ, ο Σολομών αγαντάς ότι ο πράγματα ι Ντεβλέσκε ισί μπουτ πο σημαντικά σαρέ κατά γιαβερά πράγματα. Γραφιντάς: «Ο αποτέλεσμας, αφού βακέρντιλε σαρέ ανταλά, ισί: Τι νταρές κατά αληθινός Ντεβέλ ντα τι κερές ο εντολές λέσκε».​—Εκκλ. 12:13.

9. Σαρ ατσσικιαρέλας ο Ιησούς πι μπουτί κι σωστή θέση;

⁹ Ο Ιησούς ισινέ μπουτ μπουτιαρνό. Ο πρώτα μπρεσά σο τζουβντιόλας κι πφουβ, κερέλας μπουτί σαρ ξυλουργός. (Μάρκ. 6:3) Λέσκο ντατ ντα λέσκι ντάι, σο μαρένας-πες τι ανέν ο αναγκαία πουμαρέ μπαρέ φαμιλιάτε, σίγουρα εκτιμίνενας λέσκι βοήθεια. Ο Ιησούς ισινέ τέλειος, οτθάρ πρέπει τι κερέλας μπουτ λατσσές πι μπουτί! Ντα σίγουρα μπεϊντίνελας-λα. Αλλά ατζέ-ντα κάνα κερέλας μπουτί, αρακχέλας σαάτι ι Ντεβλέσκε πραγματένγκε. (Ιωάν. 7:​15) Πο σοράν, κάνα κερέλας έργος σαρό ο ντιβές, βακερντάς ι τζενένγκε: «Προσπαθίνεν τι τθερέν, όχι ο χαμπέ σο χασάρντιβελα, αλλά ο χαμπέ σο ατσσόλα ντα ντέλα ζωή για πάντα». (Ιωάν. 6:​27) Ντα κι Επί του Όρους Ομιλία, βακερντάς: «Γκίντεν τουμαρέ νεαυτόσκε θησαυρούς κο ουρανός».​—Ματθ. 6:20.

10. Καβά πρόβλημας μπορεί τι τθεράς άμα ισινάμ λατσσέ αμαρέ μπουτιάτε;

¹⁰ Η σοφία σο αβέλα κατά Ντεβέλ βοηθίνελα-αμέν τι ντικχάς αμαρί μπουτί σαρ μανγκέλα βοβ. Σαρ Χριστιανοί, σικλιάσα τι αβάς μπουτιαρνέ ντα τι “κεράς αμαρέ βαστέντζαρ οντουβά σο ισί λατσσό”. (Εφεσ. 4:​28) Ο αφεντικά μπουτ φαρ ντικχένα ότι ισινάμ  τίμιοι ντα μπουτιαρνέ, ντα μπέκιμ βακερένα αμένγκε καζόμ εκτιμίνενα αμαρί μπουτί. Ανταβά κα μπορίνελας τι κερέλ-αμέν τι ντας κι μπουτί πο μπουτ αμαρέ σαατίσταρ σόσκε μανγκάσα τι ντας αμαρέ αφεντικόστε ατζέ πο λατσσί εντύπωση ι Ιεχωβάσκε Μαρτυρένγκε. Αλλά μπουτ σουγκό, μπορεί τι αγαβάς ότι να ατσσόλα-αμέν μπουτ σαάτι αμαρέ φαμιλιάκε ντα ι Ντεβλέσκε πραγματένγκε. Χρειαζίντιβελα τι κεράς εκ αλλαγή για τι τθεράς σαάτι ι πο σημαντικέ πραγματένγκε.

11. Σαρ σικλιλό εκ πφραλ τι ντικχέλ ι μπουτί σαρ μανγκέλα ο Ιεχωβά;

¹¹ Εκ τερνό πφραλ, ο Γουίλιαμ, ντικχλάς πι γιακχίντζαρ καζόμ σημαντικός ισί μα τι τσσουβάς πρώτα ι μπουτί. Ανγκλέ, κερέλας μπουτί εκχέ πρεσβυτερόστε. Ο Γουίλιαμ βακερέλα: «[Ανταβά πφραλ] ισί μπουτ λατσσό παράδειγμας, σόσκε ντικχέλα ι μπουτί σαρ μανγκέλα ο Ντεβέλ. Ισί μπουτ μπουτιαρνό ντα τζάλα-λεν λατσσές πι πελατόντζαρ σόσκε κερέλα μπουτ λατσσί μπουτί. Όμως, κο τέλος κι ντιβεσέσκο σο μπιτισκιαρέλα πι μπουτί, τζανέλα σαρ τι μουκχέλ-λα παλά-πέστε ντα τι ντελ πι σαατίσταρ ντα πι ζοριάταρ πι φαμιλιάτε ντα κι λατρεία κι Ιεχωβάσκι. Ισί εκ κατά πο ευτυχισμέ τζενέ σο τζανάβα!» *

12. Σαρ σικαντάς ο Σολομών ότι ντικχέλας πο νεαυτός σαρ μανγκέλα ο Ιεχωβά, αλλά σο αβιλό-πες σοράν;

¹² Κάνα ο Σολομών ισινέ πιστός, ντικχέλας πο νεαυτός σαρ μανγκέλα ο Ιεχωβά. Αζομάν σο ισινέ τερνό, αγαντάς πο όρια ντα μανγκλάς ι Ιεχωβάσκι βοήθεια. (1 Βασ. 3:​7-9) Κάνα ισινέ νεβό βασιλιάς, ο Σολομών αγαβέλας καζόμ ζιάνι κερέλα ο μπαρικανιπέ. Γραφιντάς: «Ο μπαρικανιπέ γκερέλα κι καταστροφή, ντα κον αμντίνελα-πες πο οπρέ κατά γιαβερά, κα περέλ». (Παρ. 16:​18) Πο σοράν όμως, ο Σολομών να ντινάς καν ανταλέ λαφίστε σο βακερντάς. Αβιλό μπαρικανό ντα να ασουνέλας ι Ντεβλές. Για παράδειγμας, εκ νόμος βακερέλας κο Εβραίοι βασιλιάδες “μα τι λεν πουμένγκε μπουτέ ρομνίν, για μα τι  νασέλ λένγκο γκι κατά λατσσό ντρομ”. (Δευτ. 17:​17) Ο Σολομών να ασουντάς ανταβά νόμος ντα λιντάς 700 ρομνίν. Εκτός λένταρ, αντάς ατζέ 300 ρομνίν πι κχερέστε. Μπουτ οντουλέ ρομνίνταρ, πακιάνας γιαβερέ ντεβλέντε! (1 Βασ. 11:​1-3) Ο Σολομών μπέκιμ αμντίνελας ότι σαρέ ισινέ λατσσές. Σοράν όμως, κάνα τσσιντιντάς-πες ντουρ κατά Ιεχωβά, αβιλό λέσκε μπαρό ζιάνι.​—1 Βασ. 11:​9-13.

13. Σο σικλιάσα κάνα ανάσα αμαρέ γκοντιάτε ι ταπεινότητα ι Ιησούσκι;

¹³ Ο Ιησούς να τσσιναντάς τι αβέλ ταπεινός ντα τι ντικχέλ πο νεαυτός σαρ μανγκέλα ο Ντεβέλ. Πριν τι αβέλ κι πφουβ, κερντάς μπουτ μπαρέ πράγματα κι υπηρεσία κι Ιεχωβάσκι. Αντράλ κατά Ιησούς, «αβιλέ σαρέ ο γιαβερά πράγματα κο ουρανός ντα κι πφουβ». (Κολ. 1:​16) Κάνα μπολντιλό, ντικχίντιβελα ότι ντινάς-πες γκοντί ο πράγματα σο κερντάας κάνα ισινέ πι Νταντέσαρ. (Ματθ. 3:​16· Ιωάν. 17:5) Αλλά οντουλά σο τζανέλας να κερντέ-λες τι αβέλ μπαρικανό. Ποτές να βάντελας-πες πο οπρέ κατά γιαβερά. Βακερντάς πι μαθητένγκε ότι αβιλόας κι πφουβ, «όχι για τι υπηρετίνεν-λες, αλλά για τι υπηρετίνελ ντα τι ντελ πι ζωή σαρ λύτρος μπουτέ τζενένγκε». (Ματθ. 20:​28) Ντα επειδή αγαβέλας πο όρια, βακερντάς ότι ναστί κερέλας τίποτα κορκορό. (Ιωάν. 5:​19) Σο ταπεινότητα σικαντάς ο Ιησούς! Ντινάς-αμέν μπουτ λατσσό παράδειγμας.

14. Σαρ σικλιαρντάς-αμέν ο Ιησούς τι ντικχάς αμαρό νεαυτός σαρ μανγκέλα ο Ντεβέλ;

¹⁴ Ο Ιησούς σικλιαρντάς οντουλέν σο τζάνας παλά-λέστε τι ντικχέν πουμαρό νεαυτός σαρ μανγκέλα ο Ντεβέλ. Εκ φαρ βακερντάς λένγκε: «Ο μπαλά τουμαρέ σορέσκε ισί σαρέ γκιντέ». (Ματθ. 10:​30) Ανταβά λάφι λοκχιαρέλα αμαρό γκι, ντα ατζέ πο μπουτ άμα αμντίνασα ότι να ισινάμ σημαντικοί. Μανγκέλα τι βακερέλ ότι αμαρό Ντατ πφαμπόλα μπουτ αμένγκε, ότι τθεράσα αξία λέσκε γιακχίντε. Άμα ο Ιεχωβά βακερέλα ότι αξίνασα τι ντας-λες λατρεία ντα τι τζουβντιάς λέσκε νεβέ ντουνιάστε, κον ισινάμ αμέν για τι βακεράς ότι να τθερέλα δίκιος;

15. (α) Σαρ βακερντάς Η Σκοπιά ότι πρέπει τι ντικχάς αμαρό νεαυτός; (β) Καλά ευλογίες χασαράσα άμα ντικχάσα μπουτ αμαρό νεαυτός σαρ σικαβένα ο φωτογραφίες κι σελίδα 24;

 ¹⁵ Πριν 17 μπρεσά, Η Σκοπιά βακερντάας ότι πρέπει τι ντικχάς αμαρό νεαυτός σαρ μανγκέλα ο Ντεβέλ: «Σίγουρα, να κα μανγκάας τι αμντίνας ότι ισινάμ πο οπρέ κατά γιαβερά ντα τι αβάς μπαρικανέ ούτε κα μανγκάας τι αμντίνας ότι να τθεράσα καέκ αξία. Οντουβά σο μανγκάσα ισί τι ντικχάς αμαρό νεαυτός σαρ ισί μπαγιά, τι αγαβάς ότι μερικά πράγματα κεράσα-λεν λατσσές ντα γιαβερά ναστί κεράσα-λεν. Εκ πφεν βακερντάς: “Να ισινόμ ούτε η πο γκεραλί τζενί ούτε η πο λατσσί τζενί κο ντουνιάς. Ισί πράγματα σο κεράβα-λεν λατσσές ντα γιαβερά σο να κεράβα-λεν αζόμ λατσσές, σαρ αβέλα-πες σαρέ ι τζενέντζαρ”». * Αγαβάσα καζόμ λατσσό ισί τι ντικχάς αμαρό νεαυτός σαρ μανγκέλα ο Ντεβέλ;

16. Σόσκε ντέλα-αμέν ο Ιεχωβά γκοντιαβέρ συμβουλές;

¹⁶ Αντράλ πι Λαφίσταρ, ο Ιεχωβά ντέλα-αμέν γκοντιαβέρ συμβουλές. Μανγκέλα-αμέν ντα μανγκέλα τι αβάς ευτυχισμέ. (Ησ. 48:​17, 18) Ο γκοντιαβέρ ντρομ, ο ντρομ σο ανέλα ι πο μπαρί ευτυχία, ισί τι τσσουβάς ο πράγματα ι Ιεχωβάσκε πρώτα αμαρέ ζωγιάτε. Άμα κεράσα-λες ανταβά, να κα τθεράς ο μπουτ προβλήματα σο τθερένα ο τζενέ σο ντένα μπουτ σημασία κο λοβέ, κι μπουτί ή πουμέντε. Ο κάθε εκ αμένταρ τι μανγκέλ σαρέ πι γκίσαρ τι αβέλ γκοντιαβέρ ντα τι κερέλ ι Ιεχωβάσκο γκι τι χαιρίνελ!​—Παρ. 23:15.