1. Καλά λάφια βακερέλα η Αγία Γραφή ι αληθινέ μανγκιμάσκε;

 «Ο ΦΛΟΓΕΣ ι μανγκιμάσκε ισί μπαρί γιακ, η φλόγα του Γιαχ. Ο πανιά σο τθάβντενα φοράσαρ να σβήνενα ο μανγκιπέ ούτε λένα-λες ο λενιά». b (Άσμ. Ασμ. 8:6, 7) Σο σουκάρ λάφια ι αληθινέ μανγκιμάσκε! Ο παντριμέ τζενέ λένα ζορ ανταλέ λαφίνταρ. Ζευγάρια, μπορίνενα τι τθερέν ζουρανό μανγκιπέ ο εκ ι γιαβερέσκε.

2. Σο πρέπει τι κερέλ εκ ζευγάρι για τι αβέλ σίγουρος ότι να κα σουρντιόν ο εκ κατά γιαβέρ;

² Κα τθερέλ εκ ζευγάρι ζουρανό μανγκιπέ σαρί πι ζωή; Ανταβά ισί λένγκε βαστέστε. Για παράδειγμας, εκ γιακ μπορίνελα τι πφαμπόλ για πάντα​—αλλά σάντε άμα συνεχίνασα τι τσσουβάς λάκε καστά. Άμα να κεράσα-λες ανταβά, κα μερέλ. Αντικάς, ο μανγκιπέ-ντα σο τθερέλα εκ ζευγάρι μπορίνελα τι ατσσόλ ζουρανό για πάντα​—αλλά σάντε άμα κερένα πράγματα για τι αβέν ατζέ πο πασέ ο εκ κο γιαβέρ. Κάποιες φορές, εκ ζευγάρι μπέκιμ νιωθίνελα ότι σουρντιλό ο εκ κατά γιαβέρ, ντα ατζέ πο μπουτ κάνα τθερένα προβλήματα ι λοβέντζαρ, νασφαλίματα ή δυσκολίντιβενα καζόμ μπαριαρένα πουμαρέ τσσαβέν. Οτθάρ, άμα ισινέν παντριμέ, σαρ μπορίνενα τι ατσσικιαρέν ζουρανί ι «φλόγα του Γιαχ» τουμαρέ μπιαβέστε; Ανταλέ μαθημάστε, κα ντικχάς τριν τρόπους σο κα βοηθίνεν-τουμέν τι αβέν ατζέ πο πασέ ο εκ κο γιαβέρ ντα τι τθερέν εκ ευτυχισμέ μπιαβ. c

3. Σαρ βοηθίντιβελα εκ ζευγάρι τι ατσσικιαρέλ ζουρανό πο μανγκιπέ άμα ισί λατσσέ αμαλά ι Ιεχωβάσαρ; (Εκκλησιαστής 4:​12) (Ντικχέν ι φωτογραφία-ντα)

³ Για τι ατσσικιαρέν ζουρανί ι «φλόγα του Γιαχ», εμ ο ρομ εμ η ρομνί πρέπει τι προσπαθίνεν τι αβέν λατσσέ αμαλά ι Ιεχωβάσαρ. Σαρ βοηθίνελα ανταβά λένγκο μπιαβ; Κάνα ι ρομέσκε ντα ι ρομνιάκε ισί σημαντική λένγκε η φιλία σο τθερένα πουμαρέ Νταντέσαρ σο ισί κο ουρανός, κερένα αντράλ πουμαρέ γκίσταρ λέσκε συμβουλές. Ανταβά βοηθίνελα-λεν τι γλιτώνεν ντα τι νακχαβέν προβλήματα σο κα μπορίνενας τι κερέν-λεν τι σουρντιόν ο εκ κατά γιαβέρ. (Διαβάνεν Εκκλησιαστής 4:​12) Επίσης, ο πνευματικά τζενέ μαρένα-πες τι μοιάζεν κο Ιεχωβά ντα τι τθερέν ιδιότητες σο σικαβέλα βοβ, σαρ ισί ο λατσσιπέ, η υπομονή ντα η συγχώρηση. (Εφεσ. 4:​32–5:1) Κάνα εκ ζευγάρι σικαβέλα ασακέ ιδιότητες, ισί πο εύκολος τι μπαριόλ λέσκο μανγκιπέ. Εκ πφεν, η Λένα, σο ισί παντριμέ πο μπουτ από 25 μπρεσά, βακερέλα: «Ισί εύκολος τι μανγκές ντα τι σεβάνες εκχέ πνευματικέ τζενές».

4. Σόσκε τραμπιντάς ο Ιεχωβά ι Ιωσηφίς ντα ι Μαριά για τι αβέν ο ντατ ντα η ντάι ι Μεσσιάσκε;

⁴ Ντικχέν εκ παράδειγμας κατά Γραφή. Κάνα ο Ιεχωβά έπρεπε τι τραμπίνελ εκ ζευγάρι για τι αβέν ο ντατ ντα η ντάι ι Μεσσιάσκε, τραμπιντάς ι Ιωσηφίς ντα ι Μαριά, παρόλο σο υπαρχίντιβενας μπουτ τζενέ σο αστάρντιβενας κατά Δαβίδ. Σόσκε; Επειδή ισινέ ο ντούι-ντα λατσσέ αμαλά ι Ιεχωβάσαρ ντα ο Ιεχωβά τζανέλας ότι κα στηρίνενας πουμαρό μπιαβ κο μανγκιπέ σο τθερένας λέσκε. Ζευγάρια, σο μπορίνενα τι σικλιόν κατά Ιωσήφ ντα κατά Μαρία;

5. Σο μπορίνενα τι σικλιόν ο μουρσά κατά Ιωσήφ;

⁵ Ο Ιωσήφ κερέλας αντράλ πι γκίσταρ ο οδηγίες σο ντέλας-λες ο Ιεχωβά, ντα οτθάρ αβέλας πο λατσσό ρομ. Τρινέ τουλάχιστον περιπτωσιέντε, λιντάς οδηγίες κατά Ντεβέλ σο τθερένας τι κερέν λέσκε φαμιλιάσαρ. Κάθε φαρ, ντέλας καν σουγκό, ατζέ-ντα κάνα ανταβά μανγκέλας τι βακερέλ ότι έπρεπε τι κερέλ μπαρέ αλλαγές. (Ματθ. 1:​20, 24· 2:​13-15, 19-21) Κάνα κερέλας ο οδηγίες σο λέλας κατά Ντεβέλ, ο Ιωσήφ αρακχαβέλας, στηρίνελας ντα φροντίνελας ι Μαριά. Ανέν τουμαρέ γκοντιάτε σαρ οντουλά σο κερέλας ο Ιωσήφ, κερένας ι Μαριά τι μανγκέλ ντα τι σεβάνελ-λες ατζέ πο μπουτ! Μουρσάλεν, κα μοιάζεν κο Ιωσήφ καζόμ ρόντενα συμβουλές κι Γραφή σο κα βοηθίνεν-τουμέν τι αρακχαβέν τουμαρί φαμιλί. d Κάνα κερένα ανταλά συμβουλές, ατζέ-ντα άμα ανταβά μανγκέλα τι βακερέλ ότι κα κερέν μπαρέ αλλαγές, σικαβένα μανγκιπέ τουμαρέ ρομνιάκε ντα κερένα πο ζουρανό τουμαρό μπιαβ. Εκ πφεν κο Βανουάτου, σο ισί παντριμέ πο μπουτ από 20 μπρεσά, βακερέλα: «Κάνα μο ρομ ρόντελα ο οδηγίες ι Ιεχωβάσκε ντα κερέλα-λεν, σεβάναβα-λες ατζέ πο μπουτ. Νιωθίναβα αρακχαντί ντα τθεράβα σιγουριά κο αποφάσεις λέσκε».

6. Σο μπορίνενα τι σικλιόν ο τζουβλιά κατά Μαρία;

 ⁶ Η Μαρία τθερέλας πιρί φιλία ι Ιεχωβάσαρ. Λάκι πίστη να βασίντιβελας οντουλέντε σο κερέλας ο Ιωσήφ. Τζανέλας λατσσές ο Γραφές. e Ντα αρακχέλας σαάτι για τι σκεφτίνελ λατσσές οντουλά σο σικλιόλας. (Λουκ. 2:​19, 51) Σίγουρα η Μαρία ισινέ λατσσί ρομνί επειδή ισινέ πνευματική τζενί. Αντιβές, μπουτ τζουβλιά προσπαθίνενα τι κερέν σο κερέλας η Μαρία-ντα. Για παράδειγμας, εκ πφεν, η Έμικο, βακερέλα: «Πριν τι παντρίναβ, τθεράβας μιρό πνευματικός πρόγραμμας. Αλλά κάνα παντρισάλομ, μο ρομ προσευχίντιβελας ι ντουένγκε-ντα ντα κερέλας ι φαμιλιάκι λατρεία. Οτθάρ, αγαντόμ ότι αρχισάλομ τι βασίντιβαβ λέστε για τι κερέλ ανταλά πράγματα μάνγκε. Αγαντόμ ότι έπρεπε τι βάνταβ μο φορτίος κο πράγματα σο τθερένα τι κερέν ι Ιεχωβάσαρ. Οτθάρ, ακανά ξεχωρίναβα σαάτι για τι ατσσάβ κορκορί μι Ντεβλέσαρ​—τι προσευχίντιβαβ, τι διαβάναβ ι Γραφή ντα τι σκεφτίναβ λατσσές λέσκε σκέψεις». (Γαλ. 6:5) Τζουβλιάλεν, άμα αβένα συνέχεια πο λατσσέ αμαλά ι Ιεχωβάσαρ, τουμαρέ ρομά κα τθερέν ατζέ πο μπουτ λόγους τι ισαρέν-τουμέν ντα τι μανγκέν-τουμέν.​—Παρ. 31:30.

7. Καβά πράγμας σο τθερέλα τι κερέλ με τη λατρεία ι Ιεχωβάσκι σικλιόνα ο ζευγάρια κατά Ιωσήφ ντα κατά Μαρία;

⁷ Επίσης, ο Ιωσήφ ντα η Μαρία συνεργαζίντιβενας για τι ατσσόν λατσσέ αμαλά ι Ιεχωβάσαρ. Αγαβένας καζόμ σημαντικός ισινέ τι ντεν λατρεία ι Ιεχωβάς γιεκ σαρ φαμιλί. (Λουκ. 2:22-24, 41· 4:​16) Ανταβά μπέκιμ τι αβέλας δύσκολος, ειδικά καζόμ η φαμιλί μπαριόλας, αλλά κερένας-λες. Σο σουκάρ παράδειγμας ι ζευγαρίνγκε αντιβές! Άμα τθερένα τσσαβέν, σαρ ο Ιωσήφ ντα η Μαρία, μπέκιμ τι αβέλ δύσκολος τουμένγκε τι τζαν κο συναθροίσεις ή τι αρακχέν σαάτι για τι κερέν ι φαμιλιάκι λατρεία. Μπορεί τι αβέλ ατζέ πο δύσκολος τι αρακχέν σαάτι για τι σικλιαρέν-τουμέν κατά Γραφή ή τι προσευχίντιβεν γιεκ σαρ ζευγάρι. Όμως, τι ντεν-τουμέν γκοντί ότι, κάνα ντένα λατρεία γιεκ ι Ιεχωβάς, αβένα εμ πο πασέ λέστε εμ πο πασέ ο εκ ι γιαβερέσαρ. Οτθάρ, τι τσσουβέν ι λατρεία ι Ιεχωβάσκι πρώτα τουμαρέ ζωγιάτε.

8. Άμα εκ ζευγάρι τθερέλα μπαρέ δυσκολίες πι μπιαβέστε, σο μπορίνελα τι κερέλ για τι βοηθίντιβελ πο μπουτ κατά φαμιλιάκι λατρεία;

⁸ Σο αβέλα-πες όμως άμα τθερένα μπαρέ δυσκολίες τουμαρέ μπιαβέστε; Η σκέψη τι μπεσέν γιεκ ντα τι κερέν φαμιλιάκι λατρεία μπέκιμ να ταρτίνελα-τουμέν. Άμα αβέλα-πες κάτι ασακό, κι αρχή ντικχέν κάτι χουρντό ντα σουκάρ, κάτι σο ο ντούι-ντα συμφωνίνενα τι συζητίνεν. Ανταβά μπορίνελα τι βοηθίνελ-τουμέν τι μανγκέν πο μπουτ ο εκ ι γιαβερές ντα τι μανγκέν τι ντεν λατρεία ι Ιεχωβάς γιεκ.

9. Σόσκε πρέπει ο ζευγάρια τι νακχέν σαάτι γιεκ;

⁹ Ζευγάρια, μπορίνενα επίσης τι ατσσικιαρέν ζουρανό τουμαρό μανγκιπέ καζόμ νακχένα σαάτι γιεκ. Ανταβά κα βοηθίνελ-τουμέν τι αγαβέν σο σκεφτίνελα ντα σαρ νιωθίνελα τουμαρό ρομ ή τουμαρί ρομνί. (Γέν. 2:​24) Ντικχέν σο αγαντέ χάνικ σοράν πουμαρέ μπιαβέσταρ η Λίλια ντα ο Ρουσλάν, σο ισί παντριμέ πο μπουτ από 15 μπρεσά. Η Λίλια βακερέλα: «Αγαντάμ ότι να κα μπορίναας τι νακχάς γιεκ αζόμ σαάτι καζόμ αμντίναας. Ισινάμας μπουτ απασχολημέ ι μπουτιάσαρ, ι φαμιλιάκε μπουτιέντζαρ ντα πο σοράν αμαρέ τσσαβέντζαρ. Αγαντάμ ότι, άμα να κα αρακχάας σαάτι αμένγκε σαρ ζευγάρι, κα μπορίναας τι τσσίντας-αμέν ντουρ ο εκ κατά γιαβέρ».

10. Σαρ μπορίνενα ο ζευγάρια τι κερέν οντουβά σο βακερένα ο εδάφια Εφεσίους 5:​15, 16;

¹⁰ Σο μπορίνενα τι κερέν ο ζευγάρια για τι αβέν σίγουροι ότι κα νακχέν σαάτι γιεκ; Μπέκιμ πρέπει τι κερέν πρόγραμμας, δηλαδή τι ξεχωρίνεν σαάτι ο εκ ι γιαβερέσκε. (Διαβάνεν Εφεσίους 5:​15, 16) Εκ πφραλ κι Νιγηρία, ο Ούζοντου,  βακερέλα: «Κάνα κεράβα μο πρόγραμμας, γραφίναβα ο σαάτι-ντα σο κα νακχάβ γιεκ μι ρομνιάσαρ, ντα ανταβά ισί εκ κατά πο σημαντικά πράγματα μι προγραμμάστε». (Φιλιπ. 1:​10) Ντικχέν σαρ η Αναστασία, η ρομνί εκχέ επισκοπόσκι κι Μολδαβία, χρησιμοποιήνελα πο χρόνος καζόμ πο λατσσές αβέλα-πες. Η Αναστασία βακερέλα: «Προσπαθίναβα τι κεράβ μο μπουτιά κάνα μο ρομ ισί απασχολημέ πιρέ μπουτιέντζαρ. Αντικάς, μπορίνασα τι νακχάς σαάτι γιεκ πο σοράν». Σο αβέλα-πες όμως, άμα τουμαρέ προγράμματα δυσκολίνενα-τουμέν τι αρακχέν σαάτι σο κα νακχέν γιεκ;

11. Καλά πράγματα κερένας γιεκ ο Ακύλας ντα η Πρίσκιλλα;

¹¹ Ο ζευγάρια μπορίνενα τι σικλιόν μπουτ κατά Ακύλας ντα κατά Πρίσκιλλα, εκ ζευγάρι σο εκτιμίνενας-λες μπουτ Χριστιανοί κο πρώτος αιώνας. (Ρωμ. 16:3, 4) Παρόλο σο η Γραφή να βακερέλα αμένγκε μπουτ λεπτομέρειες λένγκε μπιαβέσκε, σικαβέλα ότι κερένας μπουτί, βακερένας ο λατσσέ αμπέρια ντα βοηθίνενας γιαβερέν γιεκ. (Πράξ. 18:2, 3, 24-26) Ντα κάνα η Γραφή κερέλα λάφι ι Ακυλάσκε ντα ι Πρισκιλλάκε, πάντα βακερέλα-λεν γιεκ.

12. Σο μπορίνενα τι κερέν ο ζευγάρια για τι νακχέν πο μπουτ σαάτι γιεκ; (Ντικχέν ι φωτογραφία-ντα)

¹² Σαρ μπορίνενα ο ζευγάρια τι μοιάζεν κο Ακύλας ντα κι Πρίσκιλλα; Σκεφτίνεν ο μπουτ πράγματα σο χρειαζίντιβελα τι κερέν τουμέν ντα τουμαρό ρομ ή ρομνί. Μήπως κα μπορίνενας τι κερέν κάποια πράγματα ανταλένταρ σαρ ζευγάρι ντα όχι κορκορέ; Για παράδειγμας, ο Ακύλας ντα η Πρίσκιλλα βακερένας γιεκ ο λατσσέ αμπέρια. Τθερένα τουμέν πρόγραμμας για τι κερέν μπουτ φαρ ο ίδιος; Επίσης, ο Ακύλας ντα η Πρίσκιλλα κερένας μπουτί γιεκ. Τουμέν μπέκιμ να κερένα μπουτί γιεκ τουμαρέ ρομέσαρ ή ρομνιάσαρ, αλλά μήπως μπορίνενα τι κερέν γιεκ μερικά κατά μπουτιά ι φαμιλιάκε; (Εκκλ. 4:9) Κάνα βοηθίνενα ο εκ ι γιαβερές, νιωθίνενα ότι ισινέν εκ ομάδα, σαρ τι βακεράας, ντα τθερένα ι ευκαιρία τι κερέν λάφι. Ο Ρόμπερτ ντα η Λίντα ισί παντριμέ πο μπουτ από 50 μπρεσά. Ο Ρόμπερτ βακερέλα: «Ισί μπαγιά ότι να τθεράσα μπουτ σαάτι για τι διασκεδάνας γιεκ. Αλλά κάνα με τθοβάβα ο τσαρέ ντα μι ρομνί κοσέλα-λεν ή κάνα τσσινάβα ο τσαριά κατά κήπος ντα βόι νικιόλα για τι βοηθίνελ-μαν, νιωθίναβα μπουτ χαρούμενος. Κάνα κεράσα πράγματα γιεκ, αβάσα πο πασέ. Αμαρό μανγκιπέ μπαριόλα ατζέ πο μπουτ».

13. Σο πρέπει τι κερέν ο ζευγάρια για τι αβέν μπαγιά ενωμέ;

¹³ Τι ντεν-τουμέν γκοντί όμως ότι, σάντε επειδή ισινέν κο ίδιος μέρος, ανταβά να μανγκέλα τι βακερέλ πάντα ότι κα αβέν ενωμέ. Εκ ρομνί κι Βραζιλία βακερέλα: «Αντιβές, τθεράσα αζόμ μπουτ πράγματα σο ταρτίνενα αμαρί προσοχή. Αγαντόμ λοιπόν ότι κα μπορίναας τι περάς κι παγίδα τι αμντίνας ότι νακχάσα σαάτι γιεκ σάντε επειδή μπεσάσα κο ίδιος κχερ. Σικλιλόμ ότι να ερεσέλα σάντε τι αβάς γιεκ. Πρέπει επίσης τι νταβ μι ρομές ι προσοχή σο τθερέλα ανάγκη». Ντικχέν σαρ ο Μπρούνο ντα λέσκι ρομνί, η Τεΐζ, κερένα ο πο λατσσό για τι ντεν προσοχή ο εκ  ι γιαβερές. Ο Μπρούνο βακερέλα: «Κάνα νακχάσα σαάτι γιεκ, πφάντασα αμαρέ κινητά ντα απολαμβάνασα ι παρέα ο εκ ι γιαβερέσκι».

14. Άμα ο ρομ ντα η ρομνί να απολαμβάνενα ι παρέα ο εκ ι γιαβερέσκι, σο μπορίνενα τι κερέν;

¹⁴ Σο αβέλα-πες όμως άμα τουμέν ντα τουμαρό ρομ ή ρομνί να απολαμβάνενα ι παρέα ο εκ ι γιαβερέσκι; Μπέκιμ μπεϊντίνενα γιαβερά πράγματα ή μπέκιμ νευριάνενα ο εκ ι γιαβερές. Σο μπορίνενα τι κερέν; Ντεν-τουμέν γκοντί ι γιακ σο βακερντάμ κι αρχή. Να μπαριόλα αμέσως. Χάνικ χάνικ, χρειαζίντιβελα τι τσσουβάς λάκε πο μπαρέ καστά. Αντικάς τουμέν-ντα, κι αρχή, κα μπορίνενας τι νακχέν σάντε χάνικ λεπτά γιεκ κάθε ντιβές. Τι αβέν σίγουροι ότι κα κερέν κάτι σο κα μπεϊντίνεν-λες ο ντούι-ντα, όχι κάτι σο κα μπορίνελας τι χολιασκιαρέλ-τουμέν. (Ιακ. 3:​18) Άμα κα αρχίνεν χουρντέ πραγματέντζαρ, μπέκιμ τι ντικχέν ότι ο μανγκιπέ σο τθερένα ο εκ ι γιαβερέσκε κα μπαριόλ πάλι.

15. Σόσκε ισί μπουτ σημαντικός ο σεβασμός για τι ατσσόλ ζουρανό ο μανγκιπέ εκχέ ζευγαρίσκο;

¹⁵ Ο σεβασμός ισί μπουτ σημαντικός εκχέ μπιαβέστε. Ισί σαρ ο οξυγόνος σο βοηθίνελα εκ γιακ τι πφαμπόλ ζουρανές. Άμα νανέ οξυγόνος, η γιακ μερέλα. Αντικάς-ντα, άμα νανέ σεβασμός, ο μανγκιπέ σο τθερέλα εκ ζευγάρι μπορεί τι σουρντιόλ σουγκό. Οκιά μπάνταρ, κάνα ο ζευγάρι μαρέλα-πες τι σικαβέλ σεβασμός ο εκ ι γιαβερέσκε, ανταβά βοηθίνελα τι ατσσόλ ζουρανό λέσκο μανγκιπέ. Όμως, ντεν-τουμέν γκοντί ότι ο σημαντικός νανέ άμα τουμέν πακιάνα ότι σικαβένα σεβασμός, αλλά άμα τουμαρό ρομ ή τουμαρί ρομνί νιωθίνελα τουμαρό σεβασμός. Η Πένι ντα ο Αρέτ ισί παντριμέ πο μπουτ από 25 μπρεσά. Η Πένι βακερέλα: «Επειδή σεβάνασα ο εκ ι γιαβερές, νιωθίνασα σουκάρ κάνα ισινάμ αμαρέ κχερέστε. Να σακιντίνασα τι βακεράς οντουβά σο πακιάσα σόσκε τζανάσα ότι εκτιμίνασα ι γνώμη ο εκ ι γιαβερέσκι». Οτθάρ, σο μπορίνενα τι κερέν για τι βοηθίνεν τουμαρέ ρομές ή τουμαρέ ρομνιά τι νιωθίνελ μπαγιά τουμαρό σεβασμός; Ντικχέν ο παράδειγμας ι Αβρααμίσκο ντα ι Σαρράκο.

16. Σο μπορίνενα τι σικλιόν ο μουρσά κατά παράδειγμας ι Αβρααμίσκο; (1 Πέτρου 3:7) (Ντικχέν ι φωτογραφία-ντα)

¹⁶ Ο Αβραάμ σικαβέλας σεβασμός κι Σάρρα. Ασουνέλας-λα ντα ισινέ λέσκε σημαντικός σαρ νιωθίνελας βόι. Εκ φαρ, η Σάρρα ισινέ νευριασμέ ντα βακερντάς λέσκε χολιάσαρ οντουλά σο νιωθίνελας. Ντα τσσουντάς κο Αβραάμ ο βάρετα. Μήπως ο Αβραάμ κερντάς λάκε λάφια; Νάα. Τζανέλας ότι η Σάρρα ντέλας καν λέστε ντα στηρίνελας λέσκε αποφάσεις. Ο Αβραάμ ασουντάς-λα προσεκτικά ντα προσπαθιντάς τι αρακχέλ εκ λύση κο πρόβλημας. (Γέν. 16:5, 6) Σο σικλιάσα ανταλέσταρ; Μουρσάλεν, τθερένα ι εξουσία τι λεν αποφάσεις τουμαρέ φαμιλιάκε. (1 Κορ. 11:3) Όμως, σικαβένα μανγκιπέ κάνα τσσουβένα σημασία κι γνώμη τουμαρέ ρομνιάκι πριν τι λεν εκ απόφαση, ειδικά άμα η απόφαση κα επηρεάνελ-λα. (1 Κορ. 13:4, 5) Γιαβερά φαρ, τουμαρί ρομνί μπέκιμ ισί αγχωμέ ντα νιωθίνελα ι ανάγκη τι πουτρέλ πο γκι. Τουμέν, σεβάνενα  λάκε αισθήματα; Άμα βα, κα ασουνέν-λα προσεκτικά. (Διαβάνεν 1 Πέτρου 3:7) Η Ανζέλα ντα ο Ντμίτρι ισί παντριμέ σχεδόν 30 μπρεσά. Η Ανζέλα εξηγίνελα σαρ λάκο ρομ σικαβέλα λάκε ότι σεβάνελα-λα: «Ο Ντμίτρι ισί πάντα έτοιμος τι ασουνέλ-μαν κάνα ισινόμ νευριασμέ ή κάνα μανγκάβα απλώς τι κεράβ λάφι. Σικαβέλα μάνγκε υπομονή, ατζέ-ντα κάνα να κεράβα λάφι ήρεμα».

17. Σο μπορίνενα τι σικλιόν ο τζουβλιά κατά παράδειγμας ι Σαρράκο; (1 Πέτρου 3:5, 6)

¹⁷ Η Σάρρα σικαβέλας σεβασμός κο Αβραάμ καζόμ στηρίνελας λέσκε αποφάσεις. (Γέν. 12:5) Εκ φαρ, ο Αβραάμ αποφασιντάς τι πουτρέλ πο κχερ μερικέ μισαφιρίνγκε σο να μπεκλεντίνελας. Μανγκλάς κατά Σάρρα τι σταματίνελ σο-ντα κερέλας οντιά στιγμή ντα τι ετοιμάνελ μπερεκέτι μαντρό. (Γέν. 18:6) Η Σάρρα να χασαρντάς σαάτι ντα κερντάς οντουβά σο μανγκλάς λάταρ ο Αβραάμ. Τζουβλιάλεν, μπορίνενα τι μοιάζεν κι Σάρρα καζόμ στηρίνενα ο αποφάσεις τουμαρέ ρομέσκε. Αντικάς, κερένα πο ζουρανό τουμαρό μπιαβ. (Διαβάνεν 1 Πέτρου 3:5, 6) Ο Ντμίτρι εξηγίνελα σαρ λέσκι ρομνί σικαβέλα λέσκε ότι σεβάνελα-λες: «Εκτιμίναβα ο προσπάθειες σο κερέλα η Ανζέλα για τι στηρίνελ μο αποφάσεις, ατζέ-ντα κάνα βόι να συμφωνίνελα. Άμα ο πράγματα να τζάνα αζόμ λατσσές, βόι να κρίνελα-μαν». Ισί μπουτ εύκολος τι μανγκέν εκχέ τζενές σο σεβάνελα-τουμέν!

18. Σαρ βοηθίντιβενα ο ζευγάρια κάνα προσπαθίνενα τι ατσσικιαρέν ζουρανό πουμαρό μανγκιπέ;

¹⁸ Αντιβές, ο Μπενγκ μανγκέλα τι χασάρντιβελ ο μανγκιπέ σο ισί αντρέ κο ζευγάρια κι Χριστιανόνγκε. Τζανέλα ότι, άμα εκ ρομ ντα εκ ρομνί κα τσσιναβέν τι μανγκέν ο εκ ι γιαβερές, μπορεί τι αρχίνεν τι τσσίντεν-πες ντουρ κατά Ιεχωβά. Όμως, ο αληθινός μανγκιπέ να χασάρντιβελα! Οτθάρ, μακάρι τι τθερέν τουμαρέ μπιαβέστε ο μανγκιπέ σο ισί κο Άσμα Ασμάτων. Τι αβέν αποφασισμέ τι τσσουβέν ι Ιεχωβάς πρώτος τουμαρέ μπιαβέστε, τι αρακχέν σαάτι ο εκ ι γιαβερέσκε ντα τι σεβάνεν ο αισθήματα ντα ο ανάγκες ο εκ ι γιαβερέσκε. Άμα κερένα-λες ανταβά, τουμαρό μπιαβ κα δοξάνελ ι Ιεχωβάς, σο λέσταρ αβέλα ο αληθινός μανγκιπέ, ντα τουμαρό μανγκιπέ κα αβέλ σαρ εκ γιακ σο πφαμπόλα ζουρανές για πάντα.