1. Καγιά δυσκολία νακχλάμ μπουτ αμένταρ;

 ΤΥΧΙΣΑΛΟ τουμένγκε ποτές τι τσσουβέν εκ πνευματικός στόχος σο δυσκολίντιβενα τι πετυχίνεν-λες; b Άμα βα, να αβιλό-πες σάντε τουμένγκε ανταβά. Για παράδειγμας, ο Φίλιπ μανγκέλας τι κερέλ πο λατσσέ προσευχές ντα τι προσευχίντιβελ πο μπουτ φαρ, αλλά δυσκολίντιβελας τι αρακχέλ σαάτι για προσευχή. Η Έρικα τσσουντάας στόχος τι αβέλ πι σαατίστε κο ξεκίνημας, αλλά σχεδόν κάθε φαρ αργίνελας. Ο Τόμας προσπαθιντάς μπερεκέτι φαρ τι διαβάνελ σαρί ι Γραφή. Βοβ βακερέλα: «Απλώς να απολαμβάναβας ο διάβασμας ι Γραφιάκο. Αρχισάλομ τριν φαρ, αλλά πάντα ερεσάβας μέχρι κο Λευιτικό ντα σταματίναβας».

2. Σόσκε δεν πρέπει τι χασαράς αμαρί ζορ κάνα τθεράσα εκ πνευματικός στόχος σο να πετυχιντάμ-λες ατζέκ;

² Άμα ακανά τθερένα εκ στόχος σο να πετυχιντέν ατζέκ, μα αμντίνεν ότι ισινέν άχρηστοι. Για τι πετυχίνας ατζέ-ντα εκ χουρντό στόχος, μπουτ φαρ ανταβά μανγκέλα σαάτι ντα μπουτ μπουτί. Σάντε σο συνεχίνενα τι μανγκέν τι πετυχίνεν τουμαρό στόχος, σικαβένα ότι ισί τουμένγκε σημαντική τουμαρί φιλία ι Ιεχωβάσαρ ντα ότι μανγκένα τι ντεν-λες ο πο λατσσό σο μπορίνενα. Ο Ιεχωβά εκτιμίνελα τουμαρέ προσπάθειες. Σίγουρα, να μπεκλεντίνελα τουμένταρ πο μπουτ οντουλένταρ σο μπορίνενα τι ντεν-λες. (Ψαλμ. 103:​14· Μιχ. 6:8) Άρα, τουμαρό στόχος πρέπει τι αβέλ λογικός ντα κάτι σο μπορίνενα τι κερέν. Άμα τθερένα εκ ασακό στόχος, σο μπορίνενα τι κερέν για τι πετυχίνεν-λες; Για τι ντικχάς μερικές συμβουλές.

3. Σόσκε ισί σημαντικός τι μανγκάς μπαγιά τι πετυχίνας αμαρό στόχος;

³ Ισί μπουτ σημαντικός τι μανγκέν μπαγιά τι πετυχίνεν τουμαρό πνευματικός στόχος. Κάνα μανγκένα μπαγιά τι πετυχίνεν-λες, ανταβά κα τσσίντελ-τουμέν τι κερέν μπουτ μπουτί ανταλέσκε. Κα μπορίναας τι μοιασκιαράς ι ζορ σο τσσίντελα-αμέν τι μανγκάς τι πετυχίνας αμαρό στόχος ι μπαρμπαλιάσαρ σο τσσίντελα εκ καράβι τι τζαλ οτθέ σο μανγκέλα ο καπετάνιος. Άμα η μπαρμπάλ συνεχίνελα τι πφούντελ, ο καπετάνιος κα ερεσέλ οτθέ σο μανγκέλα. Ντα άμα η μπαρμπάλ ισί ζουρανί, μπορεί τι ερεσέλ πο σουγκό. Αντικάς αμέν-ντα, καζόμ πο μπουτ μανγκάσα τι κεράς αμαρέ στόχους, αζόμ πο σίγουρος κα αβέλ ότι κα πετυχίνας-λεν. «Κάνα μανγκέσα μπαγιά τι κερές κάτι, κα προσπαθίνες-λες μπουτ», βακερέλα ο Νταβίντ, εκ πφραλ κο Ελ Σαλβαδόρ. «Προσπαθίνεσα μα τι μουκχές τίποτα τι τσσιναβέλ-τουτ κατά στόχος σο τθερέσα». Οτθάρ, σο μπορίνενα τι κερέν για τι μανγκέν πο μπουτ τι πετυχίνεν τουμαρό στόχος;

4. Καλέ πραγμάσκε μπορίνασα τι προσευχίντιβας; (Φιλιππησίους 2:​13) (Ντικχέν ι φωτογραφία-ντα)

⁴ Τι προσευχίντιβεν για τι μανγκέν πο μπουτ τι πετυχίνεν τουμαρό στόχος. Αντράλ πι πνευμάσταρ, ο Ιεχωβά μπορίνελα τι κερέλ-τουμέν τι μανγκέν τι πετυχίνεν τουμαρό στόχος. (Διαβάνεν Φιλιππησίους 2:​13) Μπάζιμα, τσσουβάσα εκ στόχος σόσκε τζανάσα ότι πρέπει, ντα ότι ανταβά ισί λατσσό. Αλλά μπορεί μα τι μανγκάσα μπαγιά τι πετυχίνας-λες. Ανταβά αβιλό-πες κι Νορίνα, εκ πφεν κι Ουγκάντα. Τθερέλας στόχος τι κερέλ εκ μελέτη, αλλά να μανγκέλας-λες μπουτ ανταβά σόσκε νιωθίνελας ότι να σικλιαρέλας λατσσέ τροπόσαρ. Σο βοηθιντάς-λα; Βόι βακερέλα: «Αρχισάλομ τι προσευχίντιβαβ κάθε ντιβές τι βοηθίνελ-μαν ο Ιεχωβά τι μανγκάβ πο μπουτ τι κεράβ εκ μελέτη. Εκτός ανταλέσταρ, προσπαθιντόμ τι αβάβ πο λατσσί κο τρόπος σο σικλιαράβας. Σοράν χάνικ μασεκένταρ, ντικχλόμ ότι μανγκάβας πο μπουτ τι κεράβ εκ μελέτη. Οντουβά μπρες, αρχισάλομ ντούι μελέτες».

5. Σο μπορίνασα τι σκεφτίνας λατσσές για τι μανγκάς πο μπουτ τι πετυχίνας αμαρό στόχος;

⁵ Τι σκεφτίνεν λατσσές οντουλά σο κερντάς ο Ιεχωβά τουμένγκε. (Ψαλμ. 143:5) Ο απόστολος Παύλος σκεφτίνελας λατσσές ο λατσσιπέ σο σικαντάας λέσκε ο Ιεχωβά παρόλο σο να αξίνελας-λες. Ανταβά τσσίντελας-λες τι κερέλ μπουτ μπουτί ι Ιεχωβάσκε. (1 Κορ. 15:9, 10· 1 Τιμ. 1:​12-14) Αντικάς τουμέν-ντα, καζόμ πο λατσσές σκεφτίνενα οντουλά σο κερντάς ο Ιεχωβά τουμένγκε, αζόμ πο μπουτ κα μανγκέν τι πετυχίνεν τουμαρό στόχος. (Ψαλμ. 116:​12) Ντικχέν σο βοηθιντάς εκχέ πφενιά κι Ονδούρα τι πετυχίνελ ο στόχος τι αρχίνελ τακτικός σκαπανικός. Βόι βακερέλα: «Σκεφτίναβας καζόμ μπουτ μανγκέλα-μαν ο Ιεχωβά. Αντάς-μαν πι λαόστε, φροντίνελα-μαν ντα αρακχαβέλα-μαν. Ανταλά αχόρτ σκέψεις μπαριαρντέ μο μανγκιπέ λέσκε ντα κερντέ-μαν τι προσπαθίναβ πο μπουτ τι αρχίναβ ο σκαπανικός».

6. Σο γιαβέρ κα βοηθίνελ-αμέν τι μανγκάς πο μπουτ τι πετυχίνας αμαρό στόχος;

⁶ Τι τθερέν τουμαρέ γιακχά κο ευλογίες σο κα ανέλ τουμαρό στόχος. Ντικχέν σο βοηθιντάς ι Ερικά, σο βακερντάμ λάκε πο οπρέ, τι πετυχίνελ  ο στόχος τι αβέλ πι σαατίστε. Βόι βακερέλα: «Αγαντόμ ότι χασαράβας μπουτ πράγματα κάνα αργίναβας κο ξεκινήματα. Άμα όμως κα ερεσάβας πο τζανγκλέ, κα μπορίναβας τι χαιρετίναβ ι πφραλέν ντα ι πφενίν ντα τι νακχάβ χάνικ σαάτι λέντζαρ. Κα μπορίναβας επίσης τι ασουνάβ συμβουλές σο κα βοηθίνενας-μαν τι απολαμβάναβ πο μπουτ ο έργος ντα τι κεράβ-λες πο λατσσές». Η Έρικα τθερέλας πο γιακχά κο λατσσέ πράγματα σο κα αβένας άμα κα αβέλας πι σαατίστε, ντα πετυχιντάς πο στόχος. Τουμέν, καλέ ευλογιέντε κα μπορίνενας τι τθερέν τουμαρέ γιακχά; Άμα τουμαρό στόχος ισί τι κερέν πο λατσσές ο διάβασμας ι Γραφιάκο ή τουμαρέ προσευχές, σκεφτίνεν σαρ ανταβά κα μπαριαρέλ τουμαρί φιλία ι Ιεχωβάσαρ. (Ψαλμ. 145:​18, 19) Άμα τουμαρό στόχος ισί τι κερέν μπουτί οπράλ σε εκ Χριστιανική ιδιότητα, σκεφτίνεν σαρ ανταβά κα βοηθίνελ-τουμέν τι τζαν-λεν πο λατσσές ι γιαβερέντζαρ. (Κολ. 3:​14) Κα μπορίνενας ατζέ-ντα τι κερέν εκ κατάλογος ντα τι γραφίνεν αντρέ σαρέ ο λόγοι σο μανγκένα τι πετυχίνεν τουμαρό στόχος, ντα τι ντικχέν-λες μπουτ φαρ. Ο Τόμας βακερέλα: «Καζόμ πο μπουτ λόγους τθεράβα τι πετυχίναβ εκ στόχος, αζόμ πο σίγουρος κα αβέλ ότι να κα τσσιναβάβ τι προσπαθίναβ».

7. Σο βοηθιντάς ι πφραλές Χούλιο ντα λέσκε ρομνιά τι πετυχίνεν πουμαρό στόχος;

⁷ Τι κερέν παρέα τζενέντζαρ σο ντένα-τουμέν ζορ. (Παρ. 13:​20) Ντικχέν σο βοηθιντάς ι πφραλές Χούλιο ντα λέσκε ρομνιά τι πετυχίνεν πουμαρό στόχος τι κερέν πο μπουτ ι εργόσκε. Ο Χούλιο βακερέλα: «Τραμπιντάμ αμαλέν σο μανγκένας τι πετυχίνας αμαρό στόχος, ντα κεράας λέντζαρ λάφι ανταλέσκε. Μπουτ λένταρ πετυχιντέας ήδη ασακέ στόχους, οτθάρ μπορίνενας τι ντεν-αμέν λατσσέ συμβουλές. Επίσης, αμαρέ αμαλά πουτσένας-αμέν σαρ τζάνας αμαρέ σχέδια ντα ντένας-αμέν ζορ κάνα τθεράας-λες ανάγκη».

8. Σο μπορεί τι αβέλ-πες άμα κεράσα μπουτί για τι πετυχίνας αμαρό στόχος σάντε κάνα μανγκάσα-λες μπουτ ανταβά; (Ντικχέν ι φωτογραφία-ντα)

⁸ Ισί μπαγιά όμως ότι, μερικά ντιβεσά, σαρέ νιωθίνασα ότι να μανγκάσα μπουτ τι πετυχίνας αμαρό στόχος. Μήπως ανταβά μανγκέλα τι βακερέλ ότι ναστί κεράσα μπουτί για τι πετυχίνας αμαρό στόχος; Νάα. Για παράδειγμας, η μπαρμπάλ μπορίνελα τι τσσίντελ εκ καράβι για τι τζαλ οτθέ σο μανγκέλα ο καπετάνιος. Όμως, μπάζιμα η μπαρμπάλ ισί ζουρανί ντα μπάζιμα νανέ αζόμ ζουρανί, ή μερικά ντιβεσά να πφούντελα ιτς. Μήπως ανταβά μανγκέλα τι βακερέλ ότι ο καπετάνιος ναστί συνεχίνελα πο ταξίδι; Όχι πάντα. Φιρειπείν, μερικά καράβια τθερένα μηχανή. Γιαβερά τθερένα κουπιά. Ο καπετάνιος μπορίνελα τι χρησιμοποιήνελ-λεν ανταλά για τι συνεχίνελ πο ταξίδι. Η ζορ σο τσσίντελα-αμέν τι μανγκάς τι πετυχίνας αμαρό στόχος μοιάζελα ι μπαρμπαλιάσαρ. Μπάζιμα, ανταγιά ζορ ισί ζουρανί ντα μπάζιμα νανέ αζόμ ζουρανί. Ντα μερικά ντιβεσά μπέκιμ τι νιωθίνας ότι να μανγκάσα ιτς τι κεράς μπουτί οπράλ κο στόχος σο τσσουντάμ. Οτθάρ, άμα κεράσα μπουτί για τι πετυχίνας αμαρό στόχος σάντε κάνα νιωθίνασα ότι μανγκάσα-λες μπουτ ανταβά, μπορεί μα τι πετυχίνας-λες ποτές. Αλλά σαρ ο καπετάνιος αρακχέλα γιαβερά τρόπους για τι ερεσέλ οτθέ σο μανγκέλα, αντικάς αμέν-ντα μπορίνασα τι κεράς  μπουτί για τι πετυχίνας αμαρό στόχος, ατζέ-ντα κάνα νιωθίνασα ότι να μανγκάσα-λες αζόμ μπουτ. Παρόλο σο κα χρειαζίντιβελ τι κεράς-αμέν κουμάντος, κα αβάς χαρούμενοι κάνα κα πετυχίνας αμαρό στόχος. Πριν τι ντικχάς σο μπορίνασα τι κεράς, κα συζητίνας εκ ερώτηση σο μπορεί τι τθεράς.

9. Ισί λάθος τι προσπαθίνας τι πετυχίνας εκ στόχος κάνα να μανγκάσα μπαγιά τι κεράς-λες ανταβά; Εξηγίνεν.

⁹ Ο Ιεχωβά μανγκέλα τι υπηρετίνας-λες χαράσαρ ντα αντράλ αμαρέ γκίσταρ. (Ψαλμ. 100:2· 2 Κορ. 9:7) Οτθάρ, υπαρχίντιβελα καέκ λόγος τι προσπαθίνας τι πετυχίνας εκ πνευματικός στόχος άμα να ντέλα αμαρό γκι τι κεράς-λες ανταβά; Σκεφτίνεν ο παράδειγμας ι απόστολε Παυλόσκο, σο βακερντάς: «Νταπάβα μο σώμας ντα κεράβα-λες κουμάντος σαρ δούλος». (1 Κορ. 9:​25-27) Ο Παύλος ζορισκιαρέλας πο νεαυτός τι κερέλ ο σωστός, ατζέ-ντα κάνα να ντέλας λέσκο γκι τι κερέλ-λες ανταβά. Μπεϊντιντάς ο Ιεχωβά ο έργος ι Παυλόσκο; Σίγουρα! Επίσης, ευλογιντάς-λες λέσκε προσπαθειένγκε.​—2 Τιμ. 4:7, 8.

10. Σο λατσσιπέ τθεράσα κάνα προσπαθίνασα τι πετυχίνας εκ στόχος ατζέ-ντα κάνα να μανγκάσα-λες μπαγιά ανταβά;

¹⁰ Αντικάς-ντα, κάνα ο Ιεχωβά ντικχέλα αμέν-ντα τι προσπαθίνας τι πετυχίνας αμαρό στόχος​—ατζέ-ντα άμα να μανγκάσα-λες μπουτ ανταβά—​αβέλα λέσκο γκι. Νιωθίνελα αντικάς σόσκε, παρόλο σο μπορεί μα τι κεράς-λες επειδή μανγκάσα οντουβά πράγμας, τζανέλα ότι κεράσα-λες επειδή μανγκάσα Λες. Σαρ ο Ιεχωβά ευλογιντάς ι Παυλός, αντικάς κα ευλογίνελ αμέν-ντα αμαρέ προσπαθειένγκε. (Ψαλμ. 126:5) Ντα καζόμ ντικχάσα ι ευλογία ι Ιεχωβάσκι, μπορεί τι αρχίνας τι μανγκάς πο μπουτ τι πετυχίνας αμαρό στόχος. Εκ πφεν κατά Πολωνία, η Λουτσίνα, βακερέλα: «Μπάζιμα, να μανγκάβα τι νικιάβ κο έργος, ντα ατζέ πο μπουτ κάνα ισινόμ κχινί. Όμως, η χαρά σο νιωθίναβα σοράν κατά έργος ισί εκ μπουτ σουκάρ δώρος». Για τι ντικχάς λοιπόν σο μπορίνασα τι κεράς κάνα να μανγκάσα μπαγιά τι πετυχίνας αμαρό στόχος.

11. Σαρ μπορίνελα τι βοηθίνελ-αμέν ο Ιεχωβά τι μπαριαράς αμαρί εγκράτεια;

¹¹ Τι προσευχίντιβεν για εγκράτεια. Εγκράτεια μανγκέλα τι βακερέλ τι κεράς κουμάντος οντουλά σο νιωθίνασα ντα κεράσα. Ανταβά λάφι βακέρντιβελα μπουτ φαρ για τι σικαβέλ ότι πρέπει τι ατσσικιαράς αμαρό νεαυτός για μα τι κερέλ κάτι γκεραλό. Όμως, χρειαζίντιβασα εγκράτεια εμ για τι κεράς κάτι λατσσό, ατζέ πο μπουτ κάνα ισί κάτι δύσκολος ή κάτι σο να μανγκάσα μπουτ τι κεράς-λες. Ντεν-τουμέν γκοντί ότι η εγκράτεια ισί αντρέ κο καρπός κι πνευμάσκο, οτθάρ τι μανγκέν κατά Ιεχωβά άγιος πνεύμας για τι βοηθίνελ-τουμέν τι μπαριαρέν ανταγιά σημαντική ιδιότητα. (Λουκ. 11:​13· Γαλ. 5:​22, 23) Ο Νταβίντ, σο βακερντάμ λέσκε πο τζανγκλέ, εξηγιντάς σαρ βοηθιντάς-λες η προσευχή. Μανγκέλας τι σικλιαρέλ-πες κατά Γραφή πο συχνά. Βοβ βακερέλα: «Μανγκάβας κατά Ιεχωβά τι βοηθίνελ-μαν τι τθεράβ εγκράτεια. Λέσκε βοηθειάσαρ, μπορισάλομ τι τσσουβάβ εκ λατσσό πρόγραμμας για τι σικλιαράβ-μαν κατά Γραφή ντα τι κεράβ-λες πάντα».

12. Σαρ βοηθίνελα-αμέν ο Εκκλησιαστής 11:4 τι πετυχίνας αμαρέ πνευματικούς στόχους;

¹² Μα μπεκλεντίνεν τι τζαν τουμένγκε τέλεια ο πράγματα. Ανταλέ ντουνιάστε, μάλλον ποτές να κα τζαν αμένγκε τέλεια ο πράγματα. Άμα κα μπεκλεντίνας κάτι ασακό, μπέκιμ να κα πετυχίνας ποτές αμαρό στόχος. (Διαβάνεν Εκκλησιαστής 11:4) Εκ πφραλ, ο Ντέινιελ, βακερέλα: «Ποτές να κα αβέν τέλεια ο πράγματα αμαρέ ζωγιάτε. Οτθάρ, δεν πρέπει τι μπεκλεντίνας, πρέπει απλώς τι αρχίνας». Εκ πφραλ κι Ουγκάντα, ο Πολ, βακερέλα ατζέκ εκ λόγος σο δεν πρέπει τι μουκχάς γιαβινάκε οντουβά σο μανγκάσα τι κεράς: «Κάνα αρχίνασα παρόλο σο ο πράγματα ισί δύσκολα, ντάσα κο Ιεχωβά κάτι τι ευλογίνελ».​—Μαλ. 3:10.

13. Σόσκε ισί λατσσό τι αρχίνας με πο χουρντέ στόχους;

¹³ Αρχίνεν χουρντέ πραγματέντζαρ. Μπέκιμ μα τι μανγκάσα μπαγιά τι κεράς αμαρό στόχος επειδή ντικχιόλα αμένγκε μπουτ δύσκολος. Άμα ανταβά αβέλα-πες τουμέντζαρ-ντα, κα μπορίνενας τι χωρίνεν τουμαρό στόχος σε πο χουρντέ στόχους. Άμα  τουμαρό στόχος ισί τι κερέν μπουτί οπράλ σε εκ ιδιότητα, αρχίνεν τι σικαβέν-λα πο χουρντέ πραγματέντε. Άμα τουμαρό στόχος ισί τι διαβάνεν σαρί ι Γραφή, αρχίνεν τι διαβάνεν χάνικ σαάτι κάθε φαρ. Ο Τόμας, σο βακερντάμ λέσκε πο τζανγκλέ, τσσουντάας στόχος τι διαβάνελ ι Γραφή εκχέ μπρεσέστε, αλλά δυσκολίντιλο. Βοβ βακερέλα: «Αγαντόμ ότι ο πρόβλημας ισινέ ότι διαβάναβας μπερεκέτι εδάφια κάθε φαρ. Οτθάρ, αποφασιντόμ τι κεράβ ατζέκ εκ προσπάθεια, αλλά ανταγιά φαρ, διαβάναβας χάνικ εδάφια κάθε ντιβές ντα σκεφτίναβας-λεν λατσσές. Αντικάς, αρχισάλομ τι απολαμβάναβ ο διάβασμας». Επειδή καζόμ νακχέλας ο βακίτι ο Τόμας μπεϊντίνελας ο διάβασμας, αρχισάλο τι διαβάνελ πο μπουτ σαάτι κάθε ντιβές. Τελικά, διαβαντάς σαρί ι Γραφή. c

14. Σόσκε μπορεί τι κεράς παλάλ;

¹⁴ Ισί μπαγιά ότι, καζόμ-ντα τι μανγκάς τι πετυχίνας αμαρό στόχος ή καζόμ-ντα τι κεράς κουμάντος αμαρό νεαυτός, μπορεί πάλι τι κεράς παλάλ. Για παράδειγμας, «κάτι σο να μπεσάσα» μπορεί τι λελ αμένταρ ο σαάτι σο χρειαζίντιβασα για τι πετυχίνας αμαρό στόχος. (Εκκλ. 9:​11) Μπέκιμ νακχάσα εκ δυσκολία σο κερέλα-αμέν τι χασαράς αμαρό κουράγιος ντα αμαρί ζορ. (Παρ. 24:10) Επειδή ισινάμ ατελείς, μπέκιμ τι κεράς λάθη σο κα δυσκολίνεν-αμέν τι πετυχίνας αμαρό στόχος. (Ρωμ. 7:​23) Ή μπορεί απλώς τι ισινάμ κχινέ. (Ματθ. 26:​43) Σο κα βοηθίνελ-αμέν τι συνεχίνας ατζέ-ντα άμα κερντάμ παλάλ ή τθεράας εκ μπέτι ντιβές;

15. Άμα κερντάμ παλάλ εκ φαρ, μήπως ισινάμ άχρηστοι; Εξηγίνεν. (Ψαλμός 145:14)

¹⁵ Ντεν-τουμέν γκοντί ότι, άμα κερντέν εκ φαρ παλάλ, να ισινέν άχρηστοι. Η Γραφή βακερέλα ότι μπορεί τι νακχάς προβλήματα ή δυσκολίες παλάλ γιαβερέστε. Όμως, σικαβέλα ότι μπορίνασα τι ιστιάς πάλι, ντα ατζέ πο μπουτ κάνα τθεράσα ι βοήθεια ι Ιεχωβάσκι. (Διαβάνεν Ψαλμός 145:​14) Ο Φίλιπ, σο βακερντάμ λέσκε πο τζανγκλέ, εξηγίνελα σο μανγκέλα τι βακερέλ επιτυχία λέσκε: «Μι επιτυχία να τθερέλα τι κερέλ με το φορές σο κα περάβ. Οκιά μπάνταρ, τθερέλα τι κερέλ με το φορές  σο κα ιστιάβ». Ο Νταβίντ, σο βακερντάμ λέσκε πο τζανγκλέ, βακερέλα: «Κάθε φαρ σο κεράβα παλάλ ή τθεράβα εκ μπέτι ντιβές, προσπαθίναβα τι ντικχάβ-λες, όχι σαρ εμπόδιος, αλλά σαρ ευκαιρία για τι σικαβάβ κο Ιεχωβά καζόμ μπουτ μανγκάβα-λες». Βα, άμα συνεχίνενα τι τσσίντεν ανγκλάλ παρόλο σο μπάζιμα κερένα παλάλ, σικαβένα κο Ιεχωβά ότι μανγκένα τι κερέν λέσκο γκι. Καζόμ μπουτ πρέπει τι χαιρίνελα ο Ιεχωβά κάνα ντικχέλα ότι συνεχίνενα τουμαρό αγώνας για τι πετυχίνεν τουμαρό στόχος!

16. Σο μπορίνασα τι σικλιάς άμα κερντάμ εκ φαρ παλάλ;

¹⁶ Άμα κερντέν εκ φαρ παλάλ, σικλιόν κάτι ανταλέσταρ. Σκεφτίνεν σόσκε αβιλό-πες ανταβά, ντα πουτσέν-τουμέν: “Σο μπορίναβα τι αλλάναβ για μα τι αβέλ-πες πάλι;” (Παρ. 27:​12) Μπάζιμα όμως, άμα κερντάμ παλάλ, ανταβά μπέκιμ τι σικαβέλα ότι αμαρό στόχος να ισινέ αζόμ εύκολος καζόμ αμντίναας. Άμα αμντίνενα ότι ανταβά αβέλα-πες τουμέντζαρ-ντα, σκεφτίνεν πάλι τουμαρό στόχος για τι ντικχέν άμα συνεχίνελα τι αβέλ λογικός τουμένγκε. d Ι Ιεχωβάσκε να ισινέν άχρηστοι άμα να μπορισάλεν τι πετυχίνεν εκ στόχος σο να αβέλας-πες τι κερέν-λες.​—2 Κορ. 8:12.

17. Σόσκε πρέπει τι ντας-αμέν γκοντί οντουλά σο κερντάμ ήδη;

¹⁷ Ντεν-τουμέν γκοντί σο πετυχιντέν ήδη. Η Γραφή βακερέλα ότι «ο Ντεβέλ νανέ άδικος για τι μπιστρέλ οντουλά σο κερντέν». (Εβρ. 6:​10) Οτθάρ, μα μπιστρέν-λεν ούτε τουμέν. Τι σκεφτίνεν οντουλά σο κερντέν ήδη​—για παράδειγμας, ότι αβιλέν αμαλά ι Ιεχωβάσαρ, ότι αρχισάλεν τι κερέν λάφι λέσκε κο γιαβερά ή ότι μπολντιλέν. Σαρ κερντέν πρόοδος ντα πετυχιντέν πνευματικούς στόχους ανγκλέ, αντικάς-ντα μπορίνενα τι συνεχίνεν τι κερέν πρόοδος για τι πετυχίνεν ο στόχος σο τθερένα ακανά.​—Φιλιπ. 3:16.

18. Σο πρέπει τι ντας-αμέν γκοντί καζόμ κεράσα μπουτί για τι πετυχίνας αμαρό στόχος; (Ντικχέν ι φωτογραφία-ντα)

¹⁸ Ι Ιεχωβάσκε βοηθειάσαρ, μπορίνενα τι πετυχίνεν τουμαρό στόχος, σαρ εκ καπετάνιος σο ερεσέλα πφερντό χαρά οτθέ σο μανγκέλα. Αλλά ντεν-τουμέν γκοντί ότι μπουτ καπετάνιοι απολαμβάνενα εμ ο ταξίδι. Αντικάς τουμέν-ντα, καζόμ κερένα μπουτί συνέχεια για τι πετυχίνεν τουμαρό πνευματικός στόχος, μα μπιστρέν τι ντικχέν σαρ βοηθίνελα-τουμέν ντα ευλογίνελα-τουμέν ο Ιεχωβά καζόμ προσπαθίνενα τι ερεσέν κο στόχος. (2 Κορ. 4:7) Άμα να κα μουκχέν-τουμέν, κα λεν ατζέ πο μπαρέ ευλογίες.​—Γαλ. 6:9.