1, 2. Καβά πράγμας σο τθερέλα τι κερέλ με το προσευχές μπέκιμ τι νακχέλα αμαρέ γκοντιάταρ;

 ΝΑΚΧΛΟ ποτές τουμαρέ γκοντιάταρ άμα απαντίνελα ο Ιεχωβά τουμαρέ προσευχιέντε; Άμα βα, να ισινέν σάντε τουμέν. Μπουτ πφραλά ντα πφενιά βακερντέ βον-ντα ότι ανησυχίνενα ανταλέ πραγμάσκε, ειδικά κάνα νακχένας εκ μπαρί δυσκολία πουμαρέ ζωγιάτε. Άμα βασανίνελα-αμέν εκ πρόβλημας, μπέκιμ αμένγκε-ντα τι αβέλ δύσκολος τι αγαβάς σαρ απαντίνελα ο Ιεχωβά αμαρέ προσευχιέντε.

² Κα ντικχάς σόσκε μπορίνασα τι αβάς σίγουροι ότι ο Ιεχωβά απαντίνελα κο προσευχές πι υπηρετόνγκε. (1 Ιωάν. 5:​15) Ντα κα ντικχάς ακαλά ερωτήσεις: Σόσκε μπάζιμα ντικχίντιβελα ότι ο Ιεχωβά να απαντίνελα αμαρέ προσευχιέντε; Καλέ τροπόντζαρ απαντίνελα ο Ιεχωβά αμαρέ προσευχιέντε αντιβές;

3. Σόσκε μανγκέλα ο Ιεχωβά τι προσευχίντιβας λέστε;

³ Η Γραφή βακερέλα αμένγκε ότι ο Ιεχωβά μανγκέλα-αμέν μπουτ ντα ότι ισινάμ πολύτιμοι λέσκε. (Αγγ. 2:7· 1 Ιωάν. 4:​10) Οτθάρ, βακερέλα αμένγκε τι μανγκάς λέσκι βοήθεια αντράλ κατά προσευχή. (1 Πέτρ. 5:6, 7) Μανγκέλα τι βοηθίνελ-αμέν τι ατσσάς πασέ λέστε ντα τι νακχαβάς αμαρέ δυσκολίες με επιτυχία.

4. Σαρ τζανάσα ότι ο Ιεχωβά απαντίνελα κο προσευχές σο κερένα λέσκε υπηρέτες; (Ντικχέν ι φωτογραφία-ντα)

⁴ Κι Γραφή, διαβάνασα μπουτ φαρ ότι ο Ιεχωβά απαντίνελας κο προσευχές πι υπηρετόνγκε. Αβέλα τουμαρέ γκοντιάτε καέκ παράδειγμας; Εκ ασακό παράδειγμας ισί ο βασιλιάς Δαβίδ. Βοβ τθερέλας μπουτέ επικίνδυνε ντουσμανίν σαρέ πι ζωγιάτε ντα μανγκέλας ι βοήθεια ι Ιεχωβάσκι μπουτ φαρ αντράλ κατά προσευχή. Εκχέ περιπτωσιάτε, μολιντάς ι Ιεχωβάς: «Ιεχωβά, ασούν μι προσευχή·  ασούν προσεκτικά σο μολίναβα-τουτ για βοήθεια. Επειδή ισινάν πιστός ντα δίκαιος, απάντινε μάνγκε». (Ψαλμ. 143:1) Ο Ιεχωβά απαντιντάς κο προσευχές σο κερντάς ο Δαβίδ για τι ελευθερώντιβελ. (1 Σαμ. 19:​10, 18-20· 2 Σαμ. 5:​17-25) Ο Δαβίδ μπορίνελας τι βακερέλ με σιγουριά: «Ο Ιεχωβά ισί πασέ σαρέ οντουλέντε σο ρόντενα λέσκε». Μπορίνασα αμέν-ντα τι τθεράς ι ίδια σιγουριά.​—Ψαλμ. 145:18.

5. Απαντίνελας πάντα ο Ιεχωβά κο προσευχές πι υπηρετόνγκε κο πουρανέ μπρεσά ι τροπόσαρ σο μπεκλεντίνενας; Βακερέν εκ παράδειγμας. (Ντικχέν ι φωτογραφία-ντα)

⁵ Ο Ιεχωβά μπέκιμ μα τι απαντίνελα αμαρέ προσευχιέντε ι τροπόσαρ σο μπεκλεντίνασα. Ανταβά αβιλό-πες κο απόστολος Παύλος, σο μανγκλάς βοήθεια κατά Ντεβέλ για τι νασκιαρέλ λέσταρ «εκ καντρό [σο τθερέλας] αντρέ κο σώμας». Τρινέ περιπτωσιέντε, ο Παύλος προσευχίντιλο συγκεκριμέ ανταλέ δύσκολε προβλημάσκε. Απαντιντάς ο Ιεχωβά ανταλέ προσευχιέντε; Βα, αλλά όχι αντικάς σαρ μπεκλεντίνελας ο Παύλος. Αντίς τι νασκιαρέλ ο πρόβλημας, ο Ιεχωβά ντινάς-λες ι ζορ σο χρειαζίντιβελας για τι συνεχίνελ τι υπηρετίνελ-λες πιστά.​—2 Κορ. 12:​7-10.

6. Μπάζιμα, σόσκε μπορεί τι ντικχίντιβελα ότι ο Ιεχωβά να απαντίνελα αμαρέ προσευχιέντε;

⁶ Μπέκιμ τι ντιντιόλ αμέν-ντα εκ απάντηση σο να κα αβέλ οντιά σο μπεκλεντίναας. Μπορίνασα τι αβάς σίγουροι ότι ο Ιεχωβά τζανέλα ακριβώς καβά ισί ο πο λατσσό τρόπος για τι βοηθίνελ-αμέν. Ντα μπορίνελα «τι κερέλ πο μπουτ οντουλένταρ σο σκεφτίνασα ντα σαρέ οντουλένταρ σο μανγκάσα λέσταρ ή αγαβάσα». (Εφεσ. 3:​20) Οτθάρ, η απάντηση αμαρέ προσευχιέντε μπέκιμ τι αβέλ εκχέ σαατίστε ή εκχέ τροπόσαρ σο να μπεκλεντίναας.

7. Σόσκε μπέκιμ τι χρειαζίντιβελ τι αλλάνας οντουλά σο βακεράσα αμαρέ προσευχιέντε; Βακερέν εκ παράδειγμας.

⁷ Καζόμ αγαβάσα πο λατσσές ο θέλημας ι Ιεχωβάσκο, μπέκιμ τι χρειαζίντιβελ τι αλλάνας οντουλά σο βακεράσα αμαρέ προσευχιέντε. Ντικχέν σο αβιλό-πες κο Μάρτιν Πέτσιγκερ. Χάνικ βακίτι αφού παντρισάλο, ο πφραλ Πέτσιγκερ γκιλό φυλακή σε εκ στρατόπεδος συγκέντρωσης σο τθερένας ο Ναζί. Κι αρχή, μανγκέλας κατά Ιεχωβά τι ελευθερώνελ-λες κατά στρατόπεδος συγκέντρωσης για τι αρακχαβέλ πι ρομνιά ντα τι συνεχίνελ τι βακερέλ ο λατσσέ αμπέρια. Όμως, σοράν από ντούι εβδομάδες, να ντικχίντιβελας ότι ο Ιεχωβά κα ελευθερώνελας-λες. Οτθάρ, αρχισάλο τι προσευχίντιβελ: «Ιεχωβά, μολίναβα-τουτ, σίκαβ μάνγκε σο μανγκέσα τι κεράβ». Σοράν, αρχισάλο τι σκεφτίνελ σο νακχένας ο γιαβερά πφραλά κο στρατόπεδος συγκέντρωσης. Μπουτ λένταρ τθερένας μπαρί ανησυχία πουμαρέ ρομνίνγκε ντα πουμαρέ τσσαβένγκε.  Κι συνέχεια, ο πφραλ Πέτσιγκερ προσευχίντιλο: «Ιεχωβά, ευχαριστίναβα-τουτ μι νεβέ διορισμόσκε. Βοήθινε-μαν τι νταβ ζορ μι πφραλέν». Οτθάρ, ο γιαβερά εννιά μπρεσά ντέλας ζορ ι πφραλέν κο στρατόπεδα!

8. Καβά σημαντικός πράγμας πρέπει τι τθεράς αμαρέ γκοντιάτε κάνα προσευχίντιβασα;

⁸ Πρέπει τι ντας-αμέν γκοντί ότι ο Ιεχωβά τθερέλα εκ σκοπός, ντα κα κερέλ-λες κο σαάτι σο τραμπιντάς. Ανταβά σκοπός ισί τι νασκιαρέλ για πάντα σαρέ ο προβλήματα σο ανένα αμένγκε αζόμ ντουκχ αντιβές, σαρ ισί ο φυσικές καταστροφές, ο νασφαλίματα ντα ο μεριπέ. Ο Ιεχωβά κα κερέλ πο σκοπός αντράλ πι Βασιλειάταρ. (Δαν. 2:​44· Αποκ. 21:3, 4) Όμως, μέχρι τι αβέλ-πες ανταβά, ο Ιεχωβά μουκχέλα ι Μπενγκές τι κερέλ κουμάντος κο ντουνιάς. b (Ιωάν. 12:​31· Αποκ. 12:9) Άμα ο Ιεχωβά κα νασκιαρέλας ο προβλήματα ι τζενένγκε ακανά, κα ντικχίντιβελας ότι η κυβέρνηση ι Μπενγκέσκι ισί λατσσί. Άρα, παρόλο σο πρέπει τι μπεκλεντίνας ι Ιεχωβάσκε μέχρι τι κερέλ μερικές υποσχέσεις τι νικιόν μπαγιά, ανταβά να μανγκέλα τι βακερέλ ότι μουκχέλα-αμέν χωρίς βοήθεια. Για τι ντικχάς μερικούς τρόπους σο βοηθίνελα-αμέν ο Ιεχωβά.

9. Σαρ μπορίνελα ο Ιεχωβά τι βοηθίνελ-αμέν κάνα χρειαζίντιβελα τι λας αποφάσεις; Βακερέν εκ παράδειγμας.

⁹ Ντέλα-αμέν σοφία. Ο Ιεχωβά ντέλα-αμέν πο λάφι ότι κα ντελ-αμέν ι σοφία σο χρειαζίντιβασα για τι λας λατσσέ αποφάσεις. Χρειαζίντιβασα ι Ντεβλέσκι σοφία ειδικά κάνα λάσα αποφάσεις σο κα επηρεάνεν σαρί αμαρί ζωή, σαρ για παράδειγμας κάνα σκεφτίνασα άμα κα παντρίνας ή όχι. (Ιακ. 1:5) Ντικχέν ο παράδειγμας εκχέ πφενιάκο σο να ισινέ παντριμέ, ντα βακέρντιβελα Μαρία. c Υπηρετίνελας χαράσαρ ι Ιεχωβάς σαρ τακτική σκαπάνισσα, ντα εκ ντιβές γνωριντάς εκχέ πφραλές. Βόι βακερέλα: «Καζόμ αμαρί φιλία αβέλας πο λατσσί, αρχισάλαμ τι τθεράς αισθήματα ο εκ ι γιαβερέσκε. Τζανάβας ότι έπρεπε τι λαβ εκ απόφαση. Προσευχίντιβαβας αντράλ μι γκίσταρ ανταλέ πραγμάσκε μπουτ σαάτια. Τθεράβας ανάγκη ι βοήθεια ι Ιεχωβάσκι, αλλά τζανάβας ότι ο Ιεχωβά να κα λέλας ι απόφαση μάνγκε». Η Μαρία νιωθίνελα ότι ο Ιεχωβά απαντιντάς λάκε προσευχιέντε σο μανγκέλας λέσταρ σοφία. Σαρ; Καζόμ ρόντελας κο έντυπα αμαρέ, αρακχλάς συγκεκριμέ θέματα σο βοηθιντέ-λα τι αρακχέλ απαντήσεις κο ερωτήσεις σο τθερέλας. Επίσης, ασουντάς προσεκτικά ο σοφές συμβουλές πι πιστέ νταγιάκε. Ανταλά συμβουλές βοηθιντέ ι Μαριά τι αγαβέλ πο λατσσές πο αισθήματα. Τελικά, μπορισάλι τι λελ εκ σοφή απόφαση.

10. Σο κερέλα ο Ιεχωβά για τι βοηθίνελ πι υπηρετόν, σαρ βακερέλα ο εδάφιος Φιλιππησίους 4:​13; Βακερέν εκ παράδειγμας. (Ντικχέν ι φωτογραφία-ντα)

¹⁰ Ντέλα-αμέν ι ζορ τι νταϊντίνας. Σαρ αβιλό-πες ι απόστολε Παυλόσαρ-ντα, ο Ιεχωβά ντέλα-αμέν ι ζορ σο χρειαζίντιβασα για τι νταϊντίνας αμαρέ δοκιμασίες. (Διαβάνεν Φιλιππησίους 4:​13) Σκεφτίνεν σαρ βοηθιντάς ο Ιεχωβά εκχέ  πφραλές, σο βακερένα λέσκε Μπέντζαμιν, τι νταϊντίνελ δύσκολα προβλήματα. Σχεδόν σαρέ ο μπρεσά σο ισινέ τερνό, ο Μπέντζαμιν ντα λέσκι φαμιλί τζουβντιόνας κο καταυλισμούς σο μπεσένας ο πρόσφυγες κι Αφρική. Ο Μπέντζαμιν βακερέλα: «Προσευχίντιβαβας μπουτ φαρ κο Ιεχωβά ντα μανγκάβας λέσταρ τι ντελ-μαν ι ζορ τι κεράβ οντουβά σο ανέλα χαρά λέσκε γκίστε. Ο Ιεχωβά απαντίνελας μι προσευχιέντε ντα ντέλας-μαν ειρήνη αντρέ μάντε, θάρρος για τι συνεχίναβ τι βακεράβ ο λατσσέ αμπέρια ντα έντυπα σο βοηθίνενας-μαν τι ατσσάβ πνευματικά ζουρανό». Σοράν, εξηγίνελα: «Καζόμ διαβάναβας εμπειρίες γιαβερέ Μαρτυρένγκε ντα σικλιάβας σαρ βοηθιντάας-λεν ο Ιεχωβά τι νταϊντίνεν, ανταβά κερέλας-μαν πο αποφασισμέ τι ατσσάβ πιστός».

11, 12. Σαρ μπέκιμ τι τραμπίνελ ο Ιεχωβά τι χρησιμοποιήνελ αμαρί πνευματική φαμιλί για τι απαντίνελ αμαρέ προσευχιέντε; (Ντικχέν ι φωτογραφία-ντα)

¹¹ Χρησιμοποιήνελα αμαρί πνευματική φαμιλί. Ι ιράτ πριν τι ντελ πι ζωή σαρ θυσία, ο Ιησούς προσευχίντιλο αντράλ πι γκίσταρ. Μολιντάς ι Ιεχωβάς μα τι μουκχέλ ι γιαβερέν τι αμντίνεν ότι να σεβάνελας ι Ντεβλέσκο ναβ ντα τι μουνταρέν-λες ανταλέσκε. Αντίς τι κερέλ-λες ανταβά, ο Ιεχωβά βοηθιντάς ι Ιησούς κάνα μπουτσσαντάς λέσκε εκχέ αγγελός, σο ισινέ λέσκο πφραλ, για τι ντελ-λες ζορ. (Λουκ. 22:​42, 43) Ο Ιεχωβά μπορίνελα επίσης τι βοηθίνελ-αμέν αντράλ κατά πφραλά σο κα αβέν τι ντικχέν-αμέν ή κα λεν-αμέν εκ τηλέφωνος σο κα ντελ-αμέν ζορ. Σαρέ αμέν μπορίνασα τι ρόντας ευκαιρίες για τι βακεράς εκ «λατσσό λάφι» αμαρέ πφραλέντε.​—Παρ. 12:25.

¹² Ντικχέν ο παράδειγμας εκχέ πφενιάκο, σο βακερένα λάκε Μίριαμ. Χάνικ εβδομάδες σοράν κατά μεριπέ λάκε ρομέσκο, η Μίριαμ ισινέ κορκορί κο κχερ. Ισινέ μπουτ στεναχωριμέ ντα πφανγκιλόας λάκο γκι. Συνέχεια ροβέλας ντα τθερέλας ι ανάγκη τι κερέλ λάφι εκχέ τζενέσαρ. Βόι βακερέλα: «Να τθεράβας ι ζορ τι λαβ τηλέφωνος καεκχέστε, ανταλέσκε κερντόμ προσευχή κο Ιεχωβά. Καζόμ ροβάβας ντα κεράβας προσευχή, λιντέ-μαν τηλέφωνος. Ισινέ εκ πρεσβύτερος, εκ αγαπημέ πφραλ». Οντουβά πρεσβύτερος πι ρομνιάσαρ λοκχιαρντέ λάκο γκι. Η Μίριαμ ισί σίγουρη ότι ο Ιεχωβά κερντάς οντουλέ πφραλές τι λελ-λα τηλέφωνος.

13. Σικαβέν εκχέ παραδειγμάσαρ σαρ χρησιμοποιήνελα ο Ιεχωβά τζενέν σο να πακιάνα λέστε για τι απαντίνελ αμαρέ προσευχιέντε.

¹³ Μπορεί τι χρησιμοποιήνελ τζενέν σο να πακιάνα λέστε. (Παρ. 21:1) Ισί φαρ σο ο Ιεχωβά  απαντίνελα κο προσευχές πι υπηρετόνγκε κάνα τσσίντελα τζενέν σο να υπηρετίνενα-λες τι βοηθίνεν-λεν. Για παράδειγμας, τσσιντιντάς ι βασιλιάς Αρταξέρξης τι μουκχέλ ι Νεεμιάς τι βουρτίνελ κι Ιερουσαλήμ για τι βοηθίνελ τι λατσσάρντιβελ πάλι η πόλη. (Νεεμ. 2:​3-6) Αντιβές-ντα, ο Ιεχωβά μπορεί τι τσσίντελ ατζέ-ντα τζενέν σο να πακιάνα λέστε τι βοηθίνεν-αμέν κάνα χρειαζίντιβελα.

14. Σαρ ντέλα-τουμέν ζορ η εμπειρία σο τθερέλας η Σου Χινγκ; (Ντικχέν ι φωτογραφία-ντα)

¹⁴ Εκ πφεν, η Σου Χινγκ, νιωσάλι ότι ο Ιεχωβά βοηθιντάς-λα αντράλ λάκε γιατρόσταρ. Λάκο τσσαβό τθερέλα μπερεκέτι ψυχολογικά προβλήματα. Κάνα βοβ πελό ντα ντινάς-πες σοβαρά, η Σου Χινγκ πι ρομέσαρ μουκχλέ πουμαρί μπουτί για τι φροντίνεν πουμαρέ τσσαβές. Οτθάρ, τθερένας προβλήματα ι λοβέντζαρ. Η Σου Χινγκ βακερντάς ότι νιωθίνελας σαρ εκ λάστιχος σο τεντωσάλοας μπουτ. Πουταρντάς πο γκι κο Ιεχωβά ντα μανγκλάς λέσταρ βοήθεια. Ο γιατρός σικαντάς ενδιαφέρον οντουλέσκε σο νακχένας. Χάρη ανταλέσταρ, λιντέ εκ επίδομας κατά κυβέρνηση ντα αρακχλέ εκ κχερ χάνικ λοβέντζαρ για τι μπεσέν. Σοράν, η Σου Χινγκ βακερντάς: «Ντικχλάμ ο βας ι Ιεχωβάσκο κι δυσκολία ανταγιά. Ισί μπαγιά “Οντουβά σο ασουνέλα προσευχή”».​—Ψαλμ. 65:2.

15. Σο βοηθιντάς εκχέ πφενιά τι αγαβέλ ότι ο Ιεχωβά απαντίνελας λάκε προσευχιέντε;

¹⁵ Ο πο μπουτ φαρ, να λάσα απάντηση αμαρέ προσευχιέντε τροπόντζαρ σο κερένα-αμέν τι σαστίνας. Αλλά ο απαντήσεις σο λάσα ισί ακριβώς οντουβά σο χρειαζίντιβασα για τι ατσσάς αφοσιωμέ αμαρέ Νταντέστε σο ισί κο ουρανός. Οτθάρ, τι αβέν τζανγκαντέ για τι αγαβέν ο απαντήσεις ι Ιεχωβάσκε τουμαρέ προσευχιέντε. Εκ πφεν, η Γιόκο, νιωθίνελας ότι ο Ιεχωβά να απαντίνελας λάκε προσευχιέντε. Σοράν όμως, αρχισάλι τι γραφίνελ σο μανγκέλας κατά Ιεχωβά. Αφού νακχλάς χάνικ βακίτι, ντικχλάς πο σημειώσεις ντα αγαντάς ότι ο Ιεχωβά απαντιντάας κο πο μπουτ λάκε προσευχιένταρ, ατζέ-ντα μερικέ προσευχιέντε σο βόι μπισταρντάας. Μπάζιμα, χρειαζίντιβελα τι ατσσάς ντα τι σκεφτίνας σαρ απαντίνελα ο Ιεχωβά αμαρέ προσευχιέντε.​—Ψαλμ. 66:19, 20.

16. Σαρ μπορίνασα τι σικαβάς πίστη κάνα κεράσα προσευχή; (Εβραίους 11:6)

¹⁶ Σικαβάσα πίστη, όχι σάντε κάνα κεράσα προσευχή κο Ιεχωβά, αλλά εμ κάνα δεχτίνασα λέσκι απάντηση αμαρέ προσευχιέντε, καγιά-ντα τι αβέλ. (Διαβάνεν Εβραίους 11:6) Ντικχέν σο αβιλό-πες κο Μάικ ντα λέσκε ρομνιάτε, κι Κρίστι. Τθερένας στόχος τι υπηρετίνεν κο Μπέθελ.  Ο Μάικ βακερέλα: «Κεράας αιτήσεις σαρ αντρόγυνος για μπουτ μπρεσά ντα κεράας συνέχεια προσευχή κο Ιεχωβά για τι πετυχίνας ανταβά στόχος, αλλά ποτές να καλιντέ-αμέν κο Μπέθελ». Ο Μάικ ντα η Κρίστι ισινέ σίγουροι ότι ο Ιεχωβά τζανέλας καβά ισινέ ο πο λατσσό τρόπος για τι χρησιμοποιήνελ-λεν πι υπηρεσιάτε. Συνεχίνενας τι κερέν ο πο λατσσό σο μπορίνενας καζόμ υπηρετίνενας σαρ τακτικοί σκαπανείς οτθέ σο η ανάγκη ισινέ πο μπαρί ντα κερένας μπουτί κι οικοδόμηση. Αντιβές κερένα ο έργος περιοχής. «Ο Ιεχωβά να απαντίνελας πάντα αμαρέ προσευχιέντε ι τροπόσαρ σο μπεκλεντίναας», βακερέλα ο Μάικ, «αλλά απαντίνελας, ντα μάλιστα τροπόντζαρ σο να νακχλέας ιτς αμαρέ γκοντιάταρ».

17, 18. Καλέ πραγμάσκε μπορίνασα τι αβάς σίγουροι, σαρ βακερένα ο εδάφια Ψαλμός 86:6, 7;

¹⁷ Διαβάνεν Ψαλμός 86:6, 7. Ο Δαβίδ ισινέ σίγουρος ότι ο Ιεχωβά ασουνέλας λέσκε προσευχές ντα απαντίνελας λέντε. Μπορίνενα τουμέν-ντα τι τθερέν ασακί σιγουριά. Ο παραδείγματα σο ντικχλάμ ανταλέ μαθημάστε κερένα-αμέν σίγουρους ότι ο Ιεχωβά μπορίνελα τι ντελ-αμέν ι σοφία ντα ι ζορ σο χρειαζίντιβασα για τι νταϊντίνας. Μπέκιμ τι χρησιμοποιήνελ αμαρί πνευματική φαμιλί ή ατζέ-ντα τζενέν σο ακανά να πακιάνα λέστε για τι βοηθίνελ-αμέν εκχέ τροπόσαρ.

¹⁸ Παρόλο σο ο Ιεχωβά μπέκιμ μα τι απαντίνελ αμαρέ προσευχιέντε πάντα ι τροπόσαρ σο μπεκλεντίνασα, τζανάσα ότι απαντίνελα. Ντέλα-αμέν ακριβώς σο χρειαζίντιβασα κάνα χρειαζίντιβασα-λες. Οτθάρ, συνεχίνεν τι κερέν προσευχή με πίστη, ντα τι αβέν σίγουροι ότι ο Ιεχωβά κα φροντίνελ-τουμέν ακανά ντα κα “τσαλιαρέλ ι επιθυμία σαρέ οντουλένγκι σο τζουβντιόνα” κο νεβό ντουνιάς σο κα αβέλ.​—Ψαλμ. 145:16.