1. Σο βακερέλα ο Ιεχωβά πι υπηρετόνγκε τι κερέν; (Ντικχέν ι φωτογραφία-ντα)

 ΚΟΝ μπορίνελα τι λοκχιαρέλ αμαρό γκι ντα τι οδηγίνελ-αμέν; Τζανάσα ι απάντηση. Μπορίνασα τι πλησιάνας ι Ιεχωβά Ντεβλές αντράλ κατά προσευχή. Ο Ιεχωβά βακερέλα αμένγκε τι κεράς ακριβώς ανταβά. Μανγκέλα μα τι τσσιναβάς τι προσευχίντιβας​—τι “προσευχίντιβας συνέχεια”. (1 Θεσ. 5:​17) Μπορίνασα τι προσευχίντιβας λέστε χωρίς τι σακιντίνας, ντα τι μανγκάς λέσταρ τι οδηγίνελ-αμέν σαρέ κο πράγματα αμαρέ ζωγιάτε. (Παρ. 3:5, 6) Επειδή ο Ιεχωβά ισί Ντεβέλ σο ντέλα αντράλ πι γκίσταρ, μουκχέλα-αμέν τι προσευχίντιβας λέστε καζόμ φαρ μανγκάσα.

2. Σο κα σικλιάς ανταλέ μαθημάστε;

² Ισί αμένγκε πολύτιμος ο δώρος ι προσευχιάκο. Όμως, επειδή τθεράσα αζόμ μπουτ πράγματα τι κεράς, μπέκιμ τι δυσκολίντιβασα τι αρακχάς σαάτι για προσευχή. Ντα μπορεί τι νιωθίνασα ότι χρειαζίντιβελα τι κεράς αμαρέ προσευχές πο λατσσέ. Ευτυχώς, η Γραφή μπορίνελα τι οδηγίνελ-αμέν ντα τι ντελ-αμέν μπουτ ζορ. Ανταλέ μαθημάστε, κα σικλιάς σαρ μπορίνασα τι αρακχάς σαάτι για προσευχή καζόμ κα ντικχάς ο παράδειγμας ι Ιησούσκο. Επίσης, κα ντικχάς παντς σημαντικά θέματα σο μπορίνασα τι βακεράς αμαρέ προσευχιέντε για τι κεράς-λεν πο λατσσέ.

3. Σο αγαβέλας ο Ιησούς ι προσευχιένγκε;

³ Ο Ιησούς αγαβέλας καζόμ σημαντικές ισί αμαρέ προσευχές ι Ιεχωβάσκε. Μπουτ βακίτι πριν τι αβέλ κι πφουβ, ντικχέλας πι Νταντές τι απαντίνελ κο προσευχές σο κερένας πιστά μουρσά ντα τζουβλιά. Για παράδειγμας, ο Ιησούς ισινέ πασέ πι Νταντέστε  κάνα Βοβ απαντιντάς κο προσευχές σο κερντέ αντράλ πουμαρέ γκίσταρ η Άννα, ο Δαβίδ, ο Ηλίας ντα μπουτ γιαβερά. (1 Σαμ. 1:​10, 11, 20· 1 Βασ. 19:​4-6· Ψαλμ. 32:5) Άκ’ σόσκε ο Ιησούς σικλιαρντάς πι μαθητέν τι προσευχίντιβεν μπουτ φαρ ντα με σιγουριά!​—Ματθ. 7:​7-11.

4. Σο σικλιάσα κατά προσευχές ι Ιησούσκε;

⁴ Πι προσευχιέντζαρ σο κερέλας κο Ιεχωβά, ο Ιησούς ντινάς ο παράδειγμας πι μαθητέντε. Σαρέ ο μπρεσά σο κερέλας πο έργος, προσευχίντιβελας μπουτ φαρ. Χρειαζίντιβελας τι αρακχέλ σαάτι για προσευχή, σόσκε ισινέ μπουτ απασχολημέ ντα τθερέλας μπουτέ τζενέν ντονταλάι πέσταρ. (Μάρκ. 6:​31, 45, 46) Ιστίλας μπουτ πρωί επειδή μανγκέλας τι τθερέλ σαάτι για τι ατσσόλ κορκορό ντα τι κερέλ προσευχή. (Μάρκ. 1:​35) Τουλάχιστον σε εκ περίπτωση, κερντάς προσευχή σαστί ιράτ πριν τι λελ εκ σημαντική απόφαση. (Λουκ. 6:​12, 13) Επίσης, ο Ιησούς προσευχίντιλο μπουτ φαρ ι ιράτ πριν τι μερέλ, σόσκε ατζεχάνικ κα μπιτισκιαρέλας ο πο δύσκολος κομμάτι κατά διορισμός σο τθερέλας κι πφουβ.​—Ματθ. 26:​39, 42, 44.

5. Σαρ μπορίνασα τι μοιάζας κο Ιησούς κάνα προσευχίντιβασα;

⁵ Ο παράδειγμας ι Ιησούσκο σικλιαρέλα-αμέν ότι, καζόμ-ντα απασχολημέ τι αβάς, πρέπει τι αρακχάς σαάτι για τι προσευχίντιβας. Σαρ ο Ιησούς, αντικάς αμέν-ντα μπέκιμ χρειαζίντιβελα τι τραμπίνας εκ συγκεκριμέ σαάτι ανταλέσκε​—τι ιστιάς πο νωρίς το πρωί ή τι σοβάς χάνικ πο σοράν αρατί. Κάνα κεράσα-λες ανταβά, σικαβάσα κο Ιεχωβά ότι εκτιμίνασα ανταβά ξεχωριστός δώρος. Εκ πφεν, η Λιν, ντέλα-πες γκοντί καζόμ μπουτ συγκινισάλι κάνα σικλιλί για το προνόμιος ι προσευχιάκο. Βόι βακερέλα: «Κάνα σικλιλόμ ότι μπορίναβας τι κεράβ λάφι κο Ιεχωβά κάνα μανγκάβας, ανταβά βοηθιντάς-μαν τι ντικχάβ-λες σαρ εκ μπουτ λατσσό Αμάλ ντα τι μανγκάβ τι κεράβ πο λατσσέ μο προσευχές». Σίγουρα, μπουτ αμένταρ νιωθίνασα αντικάς. Οτθάρ, για τι ντικχάς παντς σημαντικά θέματα σο μπορίνασα τι βακεράς αμαρέ προσευχιέντε.

6. Σο ισί άξιος τι λελ ο Ιεχωβά, σαρ βακερένα ο εδάφια Αποκάλυψη 4:​10, 11;

⁶ Τι δοξάνεν ι Ιεχωβάς. Ο απόστολος Ιωάννης ντικχλάς εκ φαντασία σο κερντάς-λες τι σαστίνελ. Ντικχλάς 24 πρεσβυτερόν κο ουρανός τι ντεν λατρεία κο Ιεχωβά. Ντένας δόξα κο Ντεβέλ, επειδή τζανένας ότι ισινέ άξιος τι λελ «ι δόξα, ι τιμή ντα ι ζορ». (Διαβάνεν Αποκάλυψη 4:10, 11) Ο πιστοί άγγελοι-ντα τθερένα μπουτ  λόγους για τι ντεν δόξα ντα τιμή κο Ιεχωβά. Ισί λέσαρ κο ουρανός ντα τζανένα-λες λατσσές. Ντικχένα λέσκε ιδιότητες σο σικάντιβενα σαρέ οντουλέντε σο κερέλα. Καζόμ ντικχένα ι Ιεχωβάς τι κερέλ πράγματα, νικιόλα λένταρ τι δοξάνεν-λες.​—Ιώβ 38:​4-7.

7. Καλέ πραγματένγκε μπορίνασα τι δοξάνας ι Ιεχωβάς;

⁷ Πρέπει αμέν-ντα τι δοξάνας ι Ιεχωβάς αμαρέ προσευχιέντε. Κεράσα-λες ανταβά κάνα βακεράσα λέσκε σόσκε μανγκάσα-λες ντα σόσκε σεβάνασα-λες. Καζόμ διαβάνενα ντα σικλιαρένα-τουμέν κατά Γραφή, τι προσπαθίνεν τι αρακχέν ιδιότητες σο σικαβέλα ο Ιεχωβά ντα ερεσένα τουμαρέ γκίστε. (Ιώβ 37:​23· Ρωμ. 11:​33) Σοράν, τι βακερέν κο Ιεχωβά σαρ νιωθίνενα ανταλέ ιδιοτητένγκε. Μπορίνασα επίσης τι δοξάνας ι Ιεχωβάς επειδή βοηθίνελα αμέν ντα σαρέ αμαρέ πφραλέν ντα πφενίν. Φροντίνελα-αμέν ντα αρακχαβέλα-αμέν συνέχεια.​—1 Σαμ. 1:27· 2:1, 2.

8. Καλά ισί μερικοί λόγοι για τι βακεράς ευχαριστώ κο Ιεχωβά; (1 Θεσσαλονικείς 5:18)

⁸ Τι βακερέν ευχαριστώ κο Ιεχωβά. Τθεράσα μπουτ λόγους για τι βακεράς ευχαριστώ κο Ιεχωβά αντράλ κατά προσευχή. (Διαβάνεν 1 Θεσσαλονικείς 5:​18) Μπορίνασα τι βακεράς λέσκε ευχαριστώ κάθε λατσσέ πραγμάσκε σο τθεράσα, σόσκε κάθε λατσσό δώρος αβέλα λέσταρ. (Ιακ. 1:​17) Για παράδειγμας, μπορίνασα τι βακεράς λέσκε ευχαριστώ ι σουκάρ πφουβιάκε ντα ι εντυπωσιακέ πραγματένγκε σο κερντάς. Ντα μπορίνασα τι βακεράς λέσκε καζόμ εκτιμίνασα αμαρί ζωή, αμαρί φαμιλί, αμαρέ αμαλέν ντα αμαρί ελπίδα. Επίσης, πρέπει τι βακεράς ευχαριστώ κο Ιεχωβά σο μουκχέλα-αμέν τι αβάς λέσκε αμαλά.

9. Σόσκε μπέκιμ χρειαζίντιβελα τι μπαριαράς αμαρί εκτίμηση ι Ιεχωβάσκε;

⁹ Μπέκιμ πρέπει τι κεράς μπαρέ προσπάθειες για τι σκεφτίνας ο λόγους σο τθεράσα αμέν για τι σικαβάς αμαρί εκτίμηση κο Ιεχωβά. Τζουβντιάσα εκχέ ντουνιάστε σο ισί αχάριστος. Ο πο μπουτ φαρ, ο τζενέ σκεφτίνενα σάντε οντουλά σο μανγκένα βον, όχι σαρ τι σικαβέν εκτίμηση οντουλένγκε σο τθερένα. Άμα κα αρχίνας αμέν-ντα τι μοιάζας λέντε, αμαρέ προσευχές μπορεί τι αβέν εκ κατάλογος ι πραγματέντζαρ σο μανγκάσα κατά Ντεβέλ. Για μα τι μουκχάς τι αβέλ-πες κάτι ασακό, χρειαζίντιβελα τι μπαριαράς ντα τι σικαβάς συνέχεια αμαρί εκτίμηση σαρέ οντουλένγκε σο κερέλα ο Ιεχωβά αμένγκε.​—Λουκ. 6:45.

10. Σαρ η εκτίμηση βοηθιντάς εκχέ πφενιά τι νταϊντίνελ; (Ντικχέν ι φωτογραφία-ντα)

¹⁰ Κάνα εκτιμίνασα οντουλά σο τθεράσα, ανταβά βοηθίνελα-αμέν τι νταϊντίνας ο δυσκολίες. Σκεφτίνεν ι εμπειρία ι πφενιάκι Κιονγκ-σουκ, σο βακέρντιλι κι Σκοπιά 15 Ιανουαρίου 2015. Η Κιονγκ-σουκ σικλιλί ότι τθερέλας καρκίνος κο πνεύμονας ντα ότι να κα τζουβντιόλας μπουτ. Βόι βακερντάς: «Ανταβά νασφαλιπέ λιντάς μάνταρ σαρί μι ζορ. Νιωσάλομ ότι σαρέ μπιτισάλε, ντα νταράβας μπουτ». Σο βοηθιντάς-λα τι νταϊντίνελ; Βόι βακερντάς ότι κάθε ιράτ, πριν τι τζαλ τι σοβέλ, νικλίλας κι νταράτσα πι κχερέσκι ντα κερέλας προσευχή ζουρανές παντζέ πραγματένγκε σο κερντέ-λα τι νιωθίνελ εκτίμηση ανταλέ ντιβεσέσκε. Ανταβά κερέλας-λα τι ηρεμίνελ  ντα τσσίντελας-λα τι βακερέλ κο Ιεχωβά ότι μανγκέλας-λες. Αγαντάς σαρ ο Ιεχωβά στηρίνελα πι πιστέ υπηρετόν κάνα βον νακχένα δυσκολίες. Επίσης, αγαντάς ότι ο ευλογίες σο τθεράσα αμαρέ ζωγιάτε ισί πο μπουτ κατά δοκιμασίες σο νακχάσα. Σαρ η Κιονγκ-σουκ, αντικάς αμέν-ντα τθεράσα μπουτ λόγους για τι νιωθίνας εκτίμηση ι Ιεχωβάσκε, ατζέ-ντα άμα ακανά νακχάσα εκ δοκιμασία. Άμα κα σικαβάς λέσκε αμαρί εκτίμηση αντράλ κατά προσευχή, ανταβά μπορεί τι βοηθίνελ-αμέν τι νταϊντίνας ντα τι ατσσικιαράς αμαρί χαρά.

11. Σόσκε χρειαζίντιβενας θάρρος ο μαθητές ι Ιησούσκε κάνα βοβ βουρτισάλο κο ουρανός;

¹¹ Τι μανγκέν κατά Ιεχωβά τι ντελ-τουμέν θάρρος κο έργος. Χάνικ πριν τι βουρτίνελ κο ουρανός, ο Ιησούς βακερντάς πάλι πι μαθητένγκε ο διορισμός σο τθερένας τι ντεν μαρτυρία λέσκε «κι Ιερουσαλήμ, σαρί κι Ιουδαία ντα κι Σαμάρεια, ατζέ-ντα κο τθαν σο ισί πο ντουρ οπράλ κι πφουβ». (Πράξ. 1:8· Λουκ. 24:​46-48) Χάνικ πο σοράν, ο Ιουδαίοι αρχηγοί ασταρντέ ι απόστολε Πετρός ντα ι Ιωαννής ντα αντέ-λεν κο Σάνχεδριν. Βακερντέ ανταλέ πιστέ μουρσένγκε τι τσσιναβέν τι βακερέν ο λατσσέ αμπέρια ντα απειλιντέ-λεν. (Πράξ. 4:​18, 21) Σο κερντάς ο Πέτρος ντα ο Ιωάννης;

12. Σο κερντέ ο μαθητές, σαρ βακερένα ο εδάφια Πράξεις 4:​29, 31;

¹² Κάνα ο Ιουδαίοι αρχηγοί ι θρησκειάκε απειλιντέ ι Πετρός ντα ι Ιωαννής, βον απαντιντέ αντικάς: «Άμα ισί δίκαιος κο γιακχά κι Ντεβλέσκε τι ασουνάς τουμέν ντα όχι ι Ντεβλές, αγαβέν-λες κορκορέ. Αμέν, όμως, ναστί τσσιναβάσα τι κεράς λάφι οντουλένγκε σο ντικχλάμ ντα ασουντάμ». (Πράξ. 4:​19, 20) Κάνα μουκχλέ ι Πετρός ντα ι Ιωαννής ελεύθεροι, ο μαθητές κερντέ εκ ζουρανί προσευχή κο Ιεχωβά σο τθερέλας τι κερέλ με το θέλημας λέσκο. Προσευχίντιλε: «Βοήθινε τι υπηρετόν τι βακερέν το λάφι μπίνταρανες». Ο Ιεχωβά απαντιντάς οντουλέ σουκάρ προσευχιάτε.​—Διαβάνεν Πράξεις 4:​29, 31.

13. Σο σικλιάσα κατά παράδειγμας ι πφραλέσκο Τζιν-χιουκ;

¹³ Αμέν μοιάζασα κο μαθητές καζόμ συνεχίνασα τι κεράς έργος ατζέ-ντα κάνα η κυβέρνηση βακερέλα αμένγκε τι τσσιναβάς. Ντικχέν σο αβιλό-πες κο Τζιν-χιουκ, εκχέ πφραλέσκε σο γκιλό φυλακή επειδή ατσσιλό ουδέτερος. Κι φυλακή, τσσουντέ-λες υπεύθυνος τι αρακχαβέλ μερικέ τζενέν σο ισινέ κι απομόνωση, αλλά βακερντέ λέσκε τι κερέλ λέντζαρ λάφι σάντε ι πραγματένγκε σο χρειαζίντιβενας. Ανταβά μανγκέλας τι βακερέλ ότι δεν έπρεπε τι κερέλ λέντζαρ λάφι ι Γραφιάκε. Βοβ κερντάς προσευχή τι τθερέλ θάρρος ντα τι αβέλ προσεκτικός για τι κερέλ λάφι ι αληθειάκε κάθε φαρ σο κα τθερέλας ι ευκαιρία. (Πράξ. 5:​29) Βοβ βακερέλα: «Ο Ιεχωβά απαντιντάς μι προσευχιέντε ντα ντινάς-μαν ο θάρρος ντα ι σοφία τι αρχίναβ μελέτες σο ατσσικιαρένας παντς λεπτά κο πόρτες κι κελίνγκε. Ι ιράτ, γραφίναβας γράμματα σο ντάβας-λεν κο φυλακισμέ ο γιαβέρ ντιβές». Αμέν-ντα μπορίνασα τι αβάς σίγουροι ότι ο Ιεχωβά κα βοηθίνελ-αμέν τι κεράς αμαρό έργος. Σαρ ο Τζιν-χιουκ, αντικάς αμέν-ντα μπορίνασα τι προσευχίντιβας για θάρρος ντα σοφία.

14. Σο μπορίνελα τι βοηθίνελ-αμέν κάνα νακχάσα προβλήματα; (Ψαλμός 37:3, 5)

¹⁴ Τι μανγκέν ι βοήθεια ι Ιεχωβάσκι για τι νταϊντίνεν τουμαρέ προβλήματα. Μπουτ αμένταρ ταλαιπωρίντιβασα επειδή ισινάμ νασφαλέ, τθεράσα προβλήματα αντρ’ αμέντε, χασαρντάμ εκχέ τζενές σο μανγκάας, νακχάσα εκ πρόβλημας αμαρέ φαμιλιάτε, τζάνα αμέντζαρ κόντρα ή τθεράσα εκ γιαβέρ πρόβλημας. Πράγματα σαρ ισί ο πανδημίες ντα ο τζένγκια κερντέ μπουτ ανταλέ προβληματένταρ ατζέ πο δύσκολα. Τι πουτρέν τουμαρό γκι κο Ιεχωβά. Τι κερέν λέσκε λάφι οντουλένγκε σο νακχένα αντικάς σαρ κα κερένας λάφι εκχέ λατσσέ αμαλέστε. Τι αβέν σίγουροι ότι ο Ιεχωβά “κα βοηθίνελ-τουμέν”.​—Διαβάνεν Ψαλμός 37:3, 5.

15. Σαρ βοηθίνελα-αμέν η προσευχή “τι νταϊντίνας κάνα τθεράσα πφανγκό γκι”; Βακερέν εκ παράδειγμας.

 ¹⁵ Άμα να τσσιναβάσα τι κεράς προσευχή, ανταβά κα βοηθίνελ-αμέν “τι νταϊντίνας κάνα τθεράσα πφανγκό γκι”. (Ρωμ. 12:​12) Ο Ιεχωβά τζανέλα σο νακχένα λέσκε υπηρέτες​—“ασουνέλα κάνα ντένα-λες βίκος για βοήθεια”. (Ψαλμ. 145:​18, 19) Εκ σκαπάνισσα σο ισί 29 μπρεσένγκι, η Κρίστι, αγαντάς καζόμ μπαγιά ισί ανταβά. Οτθέ σο να μπεκλεντίνελας-λες, αρχισάλι τι τθερέλ σοβαρά προβλήματα υγείας. Οτθάρ, πελί σε μπαρί κατάθλιψη. Σοράν, σικλιλί ότι λάκι ντάι ισινέ μπουτ νασφαλί ντα κα μερέλας. Η Κρίστι βακερέλα: «Προσευχίντιβαβας αντράλ μι γκίσταρ κο Ιεχωβά τι νταβ-λεν πέρα ο κάθε ντιβές. Μαράβας-μαν τι τθεράβ εκ λατσσό πρόγραμμας πνευματικέ πραγματέντζαρ, σαρ ισί τι τζαβ κο συναθροίσεις ντα τι σικλιαράβ-μαν κατά Γραφή». Ντα συνεχίνελα: «Χάρη κι προσευχή, μπορισάλομ τι νταϊντίναβ οντουλά δύσκολες στιγμές. Τζανάβας ότι ο Ιεχωβά ισινέ πάντα οτθέ, ντα ανταβά λοκχιαρέλας μπουτ μο γκι. Παρόλο σο να νακχαντόμ σουγκό μο προβλήματα υγείας, ο Ιεχωβά απαντίνελας μι προσευχιέντε ντα ντέλας-μαν ειρήνη αντρέ μάντε ντα ηρεμία κο γκι». Μα τι μπιστράς ποτές ότι ο Ιεχωβά «τζανέλα τι ελευθερώνελ κατά δοκιμασία ι τζενέν σο πακιάνα-λες ντα ασουνένα-λες».​—2 Πέτρ. 2:9.

16. Σόσκε χρειαζίντιβασα ι βοήθεια ι Ιεχωβάσκι για μα τι περάς κο πειρασμός;

¹⁶ Τι μανγκέν ι βοήθεια ι Ιεχωβάσκι για μα τι περέν κο πειρασμός. Σαρ ατελείς τζενέ, μαράσα-αμέν συνέχεια μα τι περάς κο πειρασμός τι κεράς κάτι κακός. Ο Μπενγκ κερέλα σο νακχέλα λέσκε βαστέσταρ για τι κερέλ ανταβά αγώνας καζόμ πο δύσκολος αβέλα-πες. Εκ τρόπος σο προσπαθίνελα τι μελιαρέλ αμαρό τρόπος σκέψης ισί η διασκέδαση σο τθερέλα λουμνικανέ πράγματα. Ασακί διασκέδαση μπορεί τι κερέλ-αμέν τι σκεφτίνας μπίλατζανε πράγματα. Ανταβά μπορίνελα τι κερέλ-αμέν μα τι αβάς πάκι κο γιακχά κι Ντεβλέσκε ντα τι γκερέλ-αμέν σε εκ σοβαρή αμαρτία.​—Μάρκ. 7:​21-23· Ιακ. 1:​14, 15.

17. Σαρ μπορίνασα τι κεράς πράγματα σο συμφωνίνενα ι προσευχιέντζαρ σο κεράσα μα τι περάς κο πειρασμός; (Ντικχέν ι φωτογραφία-ντα)

 ¹⁷ Χρειαζίντιβασα ι βοήθεια ι Ιεχωβάσκι για μα τι τζας κο πειρασμός τι κεράς κάτι κακός. Κάνα ο Ιησούς σικλιαρντάς πι μαθητέν τι προσευχίντιβεν, βακερντάς ακαβά-ντα: «Βοήθινε-αμέν μα τι περάς κο πειρασμός, αλλά ελευθέρωνε-αμέν κατά πφιρνό». (Ματθ. 6:​13) Ο Ιεχωβά μανγκέλα τι βοηθίνελ-αμέν, αλλά πρέπει τι μανγκάς βοήθεια λέσταρ. Πρέπει επίσης τι κεράς πράγματα σο συμφωνίνενα αμαρέ προσευχιέντζαρ. Μπορίνασα τι κεράς ο πο λατσσό σο μπορίνασα για μα τι τσσουβάς αμαρέ γκοντιάτε ο λάθος πράγματα σο κερένα ο πο μπουτ τζενέ κι Μπενγκέσκο ντουνιάς. (Ψαλμ. 97:​10) Μπορίνασα τι πφεράς αμαρί γκοντί λατσσέ πραγματέντζαρ κάνα διαβάνασα ντα σικλιαράσα-αμέν κατά Γραφή. Κάτι γιαβέρ σο κα αρακχαβέλ αμαρί γκοντί ισί τι τζας κο συναθροίσεις ντα τι κεράς έργος. Ντα ο Ιεχωβά ντέλα πο λάφι ότι να κα μουκχέλ-αμέν τι δοκιμάντιβας πο μπουτ οντουλέσταρ σο αντιχίνασα.​—1 Κορ. 10:12, 13.

18. Καβά πράγμας σο τθερέλα τι κερέλ με την προσευχή χρειαζίντιβελα τι κεράς σαρέ;

¹⁸ Ο κάθε εκ αμένταρ χρειαζίντιβελα τι προσευχίντιβελ πο μπουτ από ποτές για τι ατσσόλ πιστός κο Ιεχωβά ανταλέ δύσκολε τελευταίε ντιβεσέντε. Τι αρακχέν σαάτι κάθε ντιβές για τι προσευχίντιβεν αντράλ τουμαρέ γκίσταρ. Ο Ιεχωβά μανγκέλα “τι πουτράς αμαρό γκι λέστε” αντράλ κατά προσευχή. (Ψαλμ. 62:8) Τι δοξάνεν ι Ιεχωβάς ντα τι βακερέν λέσκε ευχαριστώ σαρέ οντουλένγκε σο κερέλα. Τι μανγκέν λέσταρ τι βοηθίνελ-τουμέν τι τθερέν θάρρος κο έργος. Τι μολίνεν-λες τι βοηθίνελ-τουμέν τι νταϊντίνεν τουμαρέ προβλήματα ντα μα τι περέν καέκ πειρασμόστε σο μπορεί τι νακχένα. Μα μουκχέν τίποτα ντα καεκχές τι τσσιναβέλ-τουμέν τι προσευχίντιβεν συνέχεια κο Ιεχωβά. Σαρ απαντίνελα ο Ιεχωβά αμαρέ προσευχιέντε; Κα ντικχάς ανταβά σημαντικός ερώτημας κο γιαβέρ μάθημας.