ΝΤΑΒΑ-ΜΑΝ γκοντί πριν από μπουτ μπρεσά εκ ντιβές σο κερέλας σιλ κο Μπρούκινγκς, κι Νότια Ντακότα, κι Αμερική. Μπορίναβας τι αγαβάβ ότι ατζεχάνικ κα περέλας πιο μπουτ σιλ. Ισινόμας μαζί χάνικ τζενέντζαρ αντρέ εκχέ σταβλόστε σο να τθερέλας τατιπέ ντα ιζντράας κατά σιλ. Ισινάμας ανγκλάλ σε εκ μπαρί λεκάνη για το ζώα σο ισινέ πφερντί σουρντέ πανίσαρ! Κα μανγκάβας τι βακεράβ τουμένγκε χάνικ πράγματα μι ζωγιάκε για τι αγαβέν σόσκε ισινάμας οτθέ.

Μπιάντιλομ 7 Μαρτίου κο 1936. Μο ντατ ντα μι ντάι τθερένας σταρέ τσσαβέν ντα με ισινόμας ο πιο χουρντό. Μπεσάας σε εκ χουρντό κτήμας κι Νότια Ντακότα. Η μπουτί κο κτήμας ισινέ σημαντική αμαρέ φαμιλιάκε, αλλά να ισινέ ο πιο σημαντικός πράγμας. Κο 1934, μο ντατ ντα μι ντάι μπολντιλέ ντα αβιλέ Μάρτυρες του Ιεχωβά. Αφιερωντέας πουμαρί ζωή κο Ιεχωβά, οτθάρ ο θέλημας λέσκο ισινέ ο πιο σημαντικός πράγμας λένγκε. Μο ντατ, ο Κλάρενς, ισινέ υπηρέτης εκκλησίας (ακανά βακέρντιβελα συντονιστής του πρεσβυτερίου) αμαρέ χουρντέ εκκλησιάτε κο Κάντι, κι Νότια Ντακότα. Πιο σοράν μο κακ ο Άλφρεντ λιντάς ασακό διορισμός.

Σαρ φαμιλί τζάας συνέχεια κο συναθροίσεις ντα κο έργος κχερ κχερέστε για τι βακεράς ι γιαβερένγκε για την μπουτ σουκάρ ελπίδα σο ντέλα η Αγία Γραφή για το μέλλον. Ο παράδειγμας μι νταντέσκο ντα μι νταγιάκο ντα λένγκο σικλιαριπέ βοηθιντέ-αμέν τι μανγκάς ι Ιεχωβάς. Μι πφεν, η Ντόροθι, ντα με αβιλάμ ευαγγελιζόμενοι όταν ισινάμας σιοβέ μπρεσένγκε. Κο 1943, γραφιντόμ-μαν κι Σχολή Θεοκρατικής Διακονίας, σο αζομάν αρχισάλιας τι αβέλ-πες κο συναθροίσεις.

Ο συνελεύσεις ισινέ μπουτ σημαντικές αμένγκε. Ντάβα-μαν γκοντί εκ συνέλευση κο 1949 κο Σιου Φολς της Νότιας Ντακότα. Ο πφραλ  Γκραντ Σούτερ κερντάς ι ομιλία σο τθερέλας ο θέμας «Ισί Πιο Αργά από ό,τι Αμντίνενα!» Βακερντάς ότι ο Χριστιανοί σο ισί αφιερωμέ πρέπει τι χρησιμοποιήνεν πουμαρί ζωή για τι βακερέν ο λατσσέ αμπέρια ι Ντεβλέσκε Βασιλειάκε. Μετά ανταλέσταρ, αφιερωντόμ μι ζωή κο Ιεχωβά. Μπολντιλόμ κι γιαβέρ συνέλευση περιοχής κο Μπρούκινγκς, στις 12 Νοεμβρίου κο 1949. Ακ σόσκε ισινόμας αντρέ οντουλέ παγωμέ σταβλόστε, σαρ βακερντόμ κι αρχή. Με ντα γιαβερά τριν τζενέ μπεκλεντίναας τι μπολντιάς σε εκ μπαρί λεκάνη σο ισινέ κερντί από ατσάλι.

Σοράν αποφασιντόμ τι κεράβ σκαπανικός. Αρχισάλομ ο σκαπανικός κι 1 Ιανουαρίου κο 1952, όταν ισινόμας 15 μπρεσένγκο. Η Αγία Γραφή βακερέλα: «Οντουβά σο πφιρέλα γκοντιαβέρ τζενέντζαρ κα αβέλ γκοντιαβέρ», ντα υπαρχίντιβενας μπουτ γκοντιαβέρ τζενέ μι φαμιλιάτε σο υποστηριντέ μι απόφαση τι κεράβ σκαπανικός. (Παροιμίες 13:20) Μπουτ φαρ τζάβας κο έργος μι κακέσαρ τον Τζούλιους, σο ισινέ 60 μπρεσένγκο. Παρόλο σο ισινέ μπουτ πιο μπαρό μάνταρ, απολαμβάναας ο έργος γιεκ. Σικλιλόμ μπουτ πράγματα λέσταρ ντα οντουλένταρ σο νακχλάς πι ζωγιάτε. Μετά από χάνικ, αρχισάλι η Ντόροθι-ντα ο σκαπανικός.

Κάνα ισινόμας τερνό, μο ντατ ντα μι ντάι καλίνενας μπουτέ επισκοπόν ντα λένγκε ρομνίν για τι μπεσέν αμέντε. Εκ αντρόγυνος σο βοηθιντάς-μαν μπουτ ισινέ ο Τζέσε ντα η Λιν Κάντγουελ. Σικαντέ μάνγκε ενδιαφέρον ντα ενθαρρυντέ-μαν. Όταν υπηρετίνενας εκκλησιέντε σο ισινέ πασέ αμέντε, μπουτ φαρ βακερένας μάνγκε τι τζαβ λέντζαρ κο έργος. Νακχλόμ μπουτ σουκάρ λέντζαρ! Μανγκάβας τι κεράβ μπουτ πράγματα κο έργος κι Ιεχωβάσκο σαρ βον ντα τι κεράβ σκαπανικός.

Ο γιαβέρ επίσκοπος περιοχής σο τθεράας ισινέ ο Μπαντ Μίλερ. Όταν βοβ ντα λέσκι ρομνί, η Τζόαν, αβιλέ αμαρέ εκκλησιάτε, ισινόμας 18 μπρεσένγκο. Αζομάν έπρεπε τι παρουσιάντιβαβ κι στρατολογία. Μανγκλέ μάνταρ τι κεράβ εκ μπουτί σο αγαβάβας ότι τζάλας κόντρα κι εντολή σο ντινάς ο Ιησούς ότι δεν πρέπει τι ανακατούντιβας κο πολιτικά πράγματα. Αλλά με μανγκάβας τι βακεράβ ο λατσσέ αμπέρια ι Βασιλειάκε. (Ιωάννης 15:19) Οτθάρ μανγκλόμ απαλλαγή επειδή κεράβας ο έργος ι Ντεβλέσκο.

Χαιρισάλομ μπουτ όταν ο πφραλ Μίλερ βακερντάς μάνγκε ότι κα αβέλας μάντζαρ κι συνάντηση κι στρατολογία. Να λατζάλας ντα να  νταρέλας κατά τζενέ. Επίσης τζανέλας λατσσές ι Γραφή. Τθεράβας μπουτ θάρρος επειδή ισινέ βοβ πασέ μάντε! Ο αποτέλεσμας ισινέ ότι, χάνικ πριν τι νικιόλ ο νιλάι κο 1954, λιντόμ απαλλαγή κατά στρατολογία. Ισινόμας ελεύθερος τι κεράβ πιο μπουτ πράγματα ι Ιεχωβάσκε.

Αφού νακχλό χάνικ καιρός, βακερντέ μάνγκε τι υπηρετίναβ κο Μπέθελ, κο Κτήμας της Εταιρίας Σκοπιά, σαρ βακέρντιβελας αζομάν, κο Στάτεν Άιλαντ κι Νέα Υόρκη. Υπηρετίναβας οτθέ περίπου τριν μπρες. Τθεράβας μπουτ σουκάρ εμπειρίες σόσκε αρακχλόμ μπουτέ γκοντιαβέρ πφραλέν ντα πφενίν ντα κερντόμ λέντζαρ μπουτί.

Κο κτήμας κο Στάτεν Άιλαντ ισινέ επίσης ο ραδιοφωνικός σταθμός WBBR. Ο Μάρτυρες του Ιεχωβά τθερένας οντουβά σταθμός κατά 1924 μέχρι κο 1957. Κο κτήμας ισινέ διορισμέ σάντε 15 με 20 τζενέ κατά φαμιλί Μπέθελ. Ο πιο μπουτ ισινάμας τερνέ ντα να τζανάας λατσσές ι μπουτί. Αλλά εκ χρισμέ πφραλ σο ισινέ πιο μπαρό κο μπρεσά, ο Έλντον Γούντγουορθ, κερέλας μπουτί αμέντζαρ. Βοβ ισινέ σαρ εκ ντατ αμένγκε ντα σικλιαρντάς-αμέν μπουτ πράγματα. Όταν μερικές φορές τθεράας δυσκολίες ο εκ ι γιαβερέσαρ, ο πφραλ Γούντγουορθ βακερέλας αμένγκε ότι ο Ιεχωβά κερέλα μπουτ σουκάρ ντα σημαντικά πράγματα παρόλο σο χρησιμοποιήνελα τζενέν σο ισί ατελείς.

Επίσης ο πφραλ Φρέντερικ Γ. Φρανς ισινέ αμέντζαρ ντα βοηθιντάς-αμέν σαριλέν. Ισινέ γκοντιαβέρ ντα τζανέλας μπουτ λατσσές ι Γραφή. Ενδιαφερίντιβελας ι κάθε εκχέσκε αμένταρ. Αμαρό μάγειρας ισινέ ο Χάρι Πίτερσον. Ισινέ αμένγκε μπουτ πιο εύκολος τι ντας-λες βίκος ανταλέ ναβέσαρ παρά λέσκε κανονικέ ναβέσαρ, σο ισινέ Παπαργυρόπουλος. Ισινέ βοβ-ντα χρισμέ ντα μανγκέλας μπουτ ο έργος. Ο πφραλ Πίτερσον κερέλας λατσσές πι μπουτί κο Μπέθελ, αλλά ποτές να μουκχέλας ο έργος. Ντέλας εκατοντάδες περιοδικά κάθε μάσεκ. Τζανέλας βοβ-ντα λατσσές ι Γραφή ντα απαντίνελας μπουτέ ερωτησιέντε σο τθεράας.

Κο κτήμας ετοιμάναας φρούτα ντα λαχανικά ντα τσσουβάας-λεν σε κουσέρβες. Κάθε μπρες, τσσουβάας σε κουσέρβες περίπου 43.000 λίτρα φρούτα ντα λαχανικά για τη φαμιλί Μπέθελ. Κεράβας μπουτί εκχέ μπουτ γκοντιαβέρ  πφενιάσαρ, με την Έτα Χαθ. Βόι κερέλας ο συνταγές για τι ετοιμάνας ο φρούτα ντα ο λαχανικά. Αβένας πφενιά σο μπεσένας οτθέ πασέ για τι κερέν μπουτί αμέντζαρ ντα η Έτα βοηθίνελας-λεν τι κερέν οργανωμέ πουμαρί μπουτί. Παρόλο σο η Έτα τζανέλας μπουτ λατσσές ι μπουτί, πάντα σεβάνελας ι πφραλέν σο ισινέ υπεύθυνοι κο κτήμας. Ισινέ εκ μπουτ λατσσό παράδειγμας αμένγκε.

Η Άντζελα Ρομάνο ισινέ εκ κατά τερνέ πφενιά σο αβιλέ για τι κερέν μπουτί κο κτήμας. Η Έτα βοηθιντάας-λα όταν σικλιλί ι αλήθεια. Η Άντζι ντα με παντρισάλαμ κο 1958, τον Απρίλιο, ντα από αζομάν μέχρι ακανά απολαμβάνασα γιεκ ο έργος ι Ιεχωβάσκο 58 μπρεσά. Σαρέ ανταλά μπρεσά, η πίστη σο τθερέλα η Άντζι κο Ιεχωβά κερντάς αμαρί παντριά ζουρανί. Ισί γκοντιαβέρ ντα μπορίναβα τι στηρίντιβαβ λάτε, σο-ντα δυσκολίες τθεράσα.

Κο 1957, όταν ο πφραλά μπικιντέ ο ραδιοφωνικός σταθμός WBBR κο Στάτεν Άιλαντ, υπηρετιντόμ για χάνικ κο Μπέθελ κο Μπρούκλιν. Σοράν, η Άντζι ντα με παντρισάλαμ, οτθάρ νασλόμ κατά Μπέθελ. Για τριν μπρες κεράας σκαπανικός κο Στάτεν Άιλαντ. Μάλιστα για χάνικ καιρός κερντόμ μπουτί οντουλένγκε σο κιντέας αμαρό ραδιοφωνικός σταθμός, σο ακανά βακέρντιβελας WPOW.

Η Άντζι ντα με ατσσικιαρντάμ αμαρί ζωή απλή για τι μπορίνας τι υπηρετίνας κάι-ντα κα χρειαζίντιβελας. Κο 1961, δεχτιντάμ ι πρόσκληση για τι υπηρετίνας σαρ ειδικοί σκαπανείς κο Φολς Σίτι κι Νεμπράσκα. Όμως, μπεσλάμ χάνικ οτθέ, σόσκε αβιλί αμένγκε η πρόσκληση τι τζας εκχέ μασικέσκε κο Σάουθ Λάνσινγκ κι Νέα Υόρκη για τι νακχάς ι Σχολή Διακονίας της Βασιλείας. Μπεϊντιντάμ μπουτ οντουλά σο σικλιλάμ ντα αμντίναας ότι μετά κατά σχολή κα βουρτίναας πάλι κι Νεμπράσκα. Να μπεκλεντίναας τι λας νεβό διορισμός. Μπουτσσάντιλαμ τι υπηρετίνας σαρ ιεραπόστολοι κι Καμπότζη! Οντουλέ σουκάρ τθεμέστε σο ισί κι νοτιοανατολική Ασία ντικχλάμ ντα ασουντάμ νεβέ πράγματα ντα χαλάμ χαμπίματα σο να τζανάας. Μανγκάας μπουτ τι βακεράς ο λατσσέ αμπέρια ι Βασιλειάκε κο τζενέ σο μπεσένας οτθέ.

Όμως, η πολιτική κατάσταση κι Καμπότζη αλλαξάλι ντα έπρεπε τι τζας κο νότιος Βιετνάμ. Μετά από ντούι μπρες νασφάλιλομ σοβαρά ντα δυστυχώς έπρεπε τι βουρτίνας κι Αμερική. Έπρεπε τι νακχέλ χάνικ καιρός για τι αβάβ λατσσές. Όταν ζουράνιλομ, ξεκινιντάμ πάλι ο σκαπανικός.

Κο 1965, τον Μάρτιο, αρχισάλαμ τι υπηρετίνας ο εκκλησίες κο έργος περιοχής. Για 33 μπρεσά, η Άντζι ντα με νακχλάμ μπουτ σουκάρ κο έργος περιοχής ντα περιφερείας ντα μπεϊντίναας σο βοηθίναας κο συνελεύσεις. Απολαμβάναβας ανταβά έργος σόσκε πάντα χαιρίναβας τι τζαβ κο συνελεύσεις. Για μερικά μπρεσά τζάας σε εκκλησίες σο ισινέ κι Νέα Υόρκη ντα μπουτ συνελεύσεις αβιλέ κο Στάδιος Γιάνκι.

Καζόμ νακχένας ο μπρεσά, η Άντζι ντα με λιντάμ μπουτ διορισμούς σο ισινέ νεβέ ντα δύσκολοι. Κο 1995 βακερντέ μάνγκε τι σικλιαράβ ι πφραλέν κι Σχολή Διακονικής Εκπαίδευσης.  Μετά από τριν μπρες, βακερντέ αμένγκε τι τζας κο Μπέθελ. Ισινόμας χαρούμενος σο βουρτίναβας πάλι κο Μπέθελ μετά από 40 μπρεσά, οτθέ σο αρχισάλομας ι ειδική ολοχρόνια υπηρεσία. Για χάνικ καιρός, κερντόμ μπουτί κο Τμήμας Υπηρεσίας ντα επίσης σικλιαράβας ι πφραλέν σε μπουτ σχολές. Κο 2007, ο Κυβερνών Σώμας κερντάς ο Τμήμας σο Οργανώνελα ο Θεοκρατικές Σχολές για τι τσσουβέλ εκχέ σειράστε σαρέ ο σχολές σο αβένα-πες κο Μπέθελ, ντα για μερικά μπρεσά ισινόμας ο υπεύθυνος.

Κο τελευταία μπρεσά, αβιλέ μπουτ αλλαγές κο σχολές κο Μπέθελ. Η Σχολή ι Πρεσβυτερόνγκε σο Υπηρετίνενα κο Εκκλησίες αρχισάλι κο 2008. Ντα αντρέ σε ντούι μπρες, πιο μπουτ από 12.000 πρεσβύτεροι νακχλέ οντιά σχολή κο Μπέθελ του Πάτερσον ντα κο Μπέθελ του Μπρούκλιν. Ανταγιά σχολή συνεχίνελα τι αβέλ-πες μπουτέ γιαβερέ τθεμέντε. Κατά 2010 η Σχολή Διακονικής Εκπαίδευσης βακέρντιβελας Βιβλική Σχολή ι Πφραλένγκε σο Ισί Εργένια, ντα επίσης αβιλί εκ γιαβέρ-ντα σχολή σο βακέρντιβελας Βιβλική Σχολή ι Χριστιανόνγκε σο ισί Παντριμέ.

Κο 2014, τον Σεπτέμβριο, ανταλά ντούι σχολές αβιλέ εκ τανί ντα βακέρντιβελα Σχολή για Ευαγγελιστές ι Βασιλειάκε. Ανταγιά σχολή μπορίνενα τι νακχέν-λα εμ αντρόγυνα εμ πφραλά ντα πφενιά σο ισί εργένια. Μπουτ τζενέ σαρό κο ντουνιάς χαιρισάλε μπουτ όταν ασουντέ ότι ανταγιά σχολή κα αβέλας λένγκε τθεμέστε-ντα. Χαιρίνασα επειδή πιο μπουτ τζενέ κα τθερέν ι ευκαιρία τι νακχέν ανταλά σχολές. Ισί μπαρό προνόμιος μάνγκε σο γνωριντόμ μπουτέ τζενέν σο κερντέ αλλαγές πουμαρέ ζωγιάτε για τι μπορίνεν τι νακχέν ανταλά σχολές.

Όταν σκεφτίναβα σαρέ οντουλά μπρεσά σο νακχλέ, από αζομάν σο ισινόμας έτοιμος τι μπολντιάβ αντρέ οντουλέ παγωμέ σταβλόστε μέχρι ακανά, ευχαριστίναβα ι Ιεχωβάς σο γνωριντόμ τζενέν σο ισινέ γκοντιαβέρ. Βοηθιντέ-μαν τι γνωρίναβ-λες ντα τι υπηρετίναβ-λες πιο λατσσές. Μερικοί ισινέ πιο τερνέ μάνταρ ενώ γιαβερά ισινέ πιο μπαρέ. Ντα μπουτ λένταρ ισινέ γιαβερέ τθεμένταρ ντα τθερένας διαφορετικές συνήθειες. Αλλά ντικχλόμ ότι μανγκένας μπουτ ι Ιεχωβάς, ντα ανταβά σικαβένας-λες με το τρόπος σο τζουβντιόνας ντα οντουλέντζαρ σο κερένας. Χαιρίναβα σο τθεράβα μπουτ γκοντιαβέρ αμαλέν αντρέ κο λαός κι Ιεχωβάσκο ντα μπορίναβα τι σικλιάβ λένταρ μπουτ πράγματα.