1. Σόσκε κάποιοι αξίνενα τιμή, ντα σο κα σικλιάς ανταλέ μαθημάστε;

ΣΑΡ ντάσα τιμή κο τζενέ; Κεράσα-λες ανταβά όταν ντάσα-λεν μπαρί προσοχή ντα σικαβάσα λένγκε σεβασμός. Συνήθως, ντάσα τιμή εμ οντουλέντε σο κερντέ κάτι σο αξίνελα τιμή εμ οντουλέντε σο τθερένα εκ σημαντικός διορισμός ή θέση. Ανταλέ μαθημάστε, κα σικλιάς κάστε πρέπει τι ντας τιμή ντα σόσκε.

2, 3. (α) Σόσκε ο Ιεχωβά αξίνελα ι πιο μπαρί τιμή; (Ντικχ ι φωτογραφία σο ισί κι αρχή.) (β) Κο εδάφιος Αποκάλυψη 5:13, κον ισί ο Μπρακό, ντα σόσκε πρέπει τι ντας-λες τιμή;

² Ο εδάφιος Αποκάλυψη 5:13 βακερέλα ότι “Οντουβά σο μπεσέλα κο θρόνος ντα ο Μπρακό” αξίνενα τιμή. “Οντουβά σο μπεσέλα κο θρόνος” ισί ο Ιεχωβά. Κο κεφάλαιος 4 της Αποκάλυψης, ο πνευματικά πλάσματα κο ουρανός σικαβένα αμένγκε ατζέκ εκ τανό λόγος σο ο Ιεχωβά, “Οντουβά σο τζουβντιόλα για πάντα”, αξίνελα τιμή. Βον βακερένα: «Άξιος ισινάν, Ιεχωβά, βα, αμαρό Ντεβέλ, τι λες ι δόξα ντα ι τιμή ντα ι ζορ, σόσκε τούι κερντάν-λεν σαρέ, ντα επειδή μανγκλάν-λες κερντιλέ ντα υπαρχίντιβενα».—Αποκάλυψη 4:9-11.

 ³ “Ο Μπρακό” σο βακέρντιβελα κο εδάφιος Αποκάλυψη 5:13 ισί ο Ιησούς Χριστός. Σαρ τζανάσα-λες ανταβά; Όταν ισινέ κι πφουβ, ο Ιησούς βακέρντιβελας «ο Μπρακό ι Ντεβλέσκο σο νασκιαρέλα ι αμαρτία ι ντουνιάσκι». (Ιωάννης 1:29) Καβά γιαβέρ βασιλιάς ντινάς πι ζωή σαρ λύτρος αντράλ πι γκίσταρ πι υπηρετόνγκε; Ανταβά σίγουρα ισί εκ λατσσό λόγος για τι ντας-λες τιμή. Ο Ιησούς αξίνελα τιμή επειδή ισί «ο Βασιλιάς οντουλένγκο σο κυβερνίνενα σαρ βασιλιάδες ντα ο Κύριος οντουλένγκο σο κυβερνίνενα σαρ κύριοι». (1 Τιμόθεο 6:14-16) Μπορεί τουμέν-ντα τι νιωθίνεν αντικάς σαρ νιωθίνενα ο άγγελοι σο γκιλιαβένα: «Ο Μπρακό σο τσσιντέ αξίνελα τι λελ δύναμη ντα χουλανιπέ ντα σοφία ντα τιμή ντα δόξα ντα ευλογία».—Αποκάλυψη 5:12.

4. Σόσκε ισί λατσσό τι ντας τιμή κο Ιεχωβά ντα κο Χριστός;

⁴ Ο εδάφια Ιωάννης 5:22, 23 βακερένα ότι ο Ιεχωβά τσσουντάς ι Χριστός κριτής σαρέ ι τζενένγκο. Ανταβά ισί εκ σημαντικός λόγος σο πρέπει τι ντιντιόλ τιμή κο Ιησούς. Ντα όταν κεράσα-λες ανταβά, ντάσα τιμή κο Ιεχωβά-ντα. Κον τραμπίνελα τι ντελ τιμή κο Ιησούς ντα λέσκε Νταντέστε κα μπορίνελ τι τζουβντιόλ για πάντα.—Διαβάνεν Ψαλμός 2:11, 12.

5. Σόσκε μπορίνασα τι βακεράς ότι σαρέ ο τζενέ αξίνενα τιμή ντα σεβασμός;

⁵ Ο τζενέ κερντιλέ “τι μοιάζεν κο Ντεβέλ”. (Γένεση 1:27) Ανταβά μανγκέλα τι βακερέλ ότι ο πιο μπουτ τζενέ τθερένα ι ικανότητα τι σικαβέν ο ιδιότητες σο τθερέλα ο Ντεβέλ. Για παράδειγμας, ο τζενέ μπορίνενα τι σικαβέν αγάπη, λατσσιπέ ντα τι νιωθίνεν ι γιαβερένγκι ντουκχ. Επίσης ο τζενέ κερντιλέ με συνείδηση, δηλαδή μπορίνενα τι αγαβέν σο ισί σωστός ή λάθος, λατσσό ή γκεραλό. (Ρωμαίους 2:14, 15) Ο πιο μπουτ τζενέ μπεϊντίνενα ο πράγματα σο ισί πάκι ντα σουκάρ ντα μανγκένα τι τζουβντιόν ειρηνικά ι γιαβερέντζαρ. Ανταβά να κερέλα αμένγκε εντύπωση, επειδή ο Ιεχωβά Ντεβέλ μπεϊντίνελα τι αβέν σαρέ ο πράγματα σε εκ σειράς ντα τι υπαρχίντιβελ ειρήνη. Ντικχίντιβελα ξεκάθαρα ότι σαρέ ο τζενέ κερντιλέ τι μπορίνεν τι μοιάζεν με κάποιος τρόπος κο Ιεχωβά. Οτθάρ, αξίνενα τι ντας-λεν τιμή ντα σεβασμός.—Ψαλμός 8:5.

6, 7. Σαρ ξεχωρίνενα ο Μάρτυρες του Ιεχωβά μπουτέ τζενένταρ όταν ντένα τιμή ι γιαβερέν;

⁶ Τζανάσα ότι ο γιαβερά τζενέ αξίνενα τι λεν τιμή, αλλά μπορεί τι ισί δύσκολος τι αγαβάς σαρ ντα καζόμ πρέπει τι ντας-λεν τιμή. Ανταβά αβέλα-πες επειδή ο πιο μπουτ τζενέ ισί ατελείς ντα επηρεάντιβενα μπουτ κατά Μπενγκέσκο ντουνιάς. Μπουτ τζενέ τθερένα σαρ είδωλα μουρσέν ή τζουβλίν. Αντί τι ντεν-λεν τιμή ντα τι σικαβέν λένγκε σεβασμός αντικάς σαρ μανγκέλας ο Ιεχωβά, ο τζενέ ντένα κο γιαβερά τζενέ μπουτ τιμή ντα συμπεριφερίντιβενα κο κάθε εκ λένταρ σαρ ντεβέλ. Μπορεί τι συμπεριφερίντιβενα ντα τι ιριαβένα-πες σαρ ο πολιτικοί, ο αθλητές, ο ηθοποιοί ντα γιαβερά τζενέ σο ισί διάσημοι.

⁷ Ο αληθινοί Χριστανοί τζανένα ότι ισί λάθος τι ντεν αζόμ μπουτ τιμή κο τζενέ. Σαρέ κατά τζενέ σο τζουβντιλέ ποτές, σάντε ο Ιησούς μουκχλάς εκ τέλειος παράδειγμας για τι μοιάζας λέστε. (1 Πέτρου 2:21) Πρέπει τι ντας-αμέν γκοντί ότι «σαρέ αμαρτιντέ ντα να μπορίνενα τι ερεσέν κι Ντεβλέσκι δόξα». (Ρωμαίους 3:23) Καέκ τζενό να αξίνελα τι ντιντιόλ-λες λατρεία. Όταν ντάσα κο τζενέ πιο μπουτ τιμή από ό,τι πρέπει, στεναχωρίνασα ι Ιεχωβάς.

8, 9. (α) Σαρ ντικχένα ο Μάρτυρες του Ιεχωβά ι τζενέν σο κυβερνίνενα οτθέ σο τζουβντιόνα; (β) Κάνα δεν πρέπει τι ασουνάς ι τζενέν σο τθερένα εξουσία;

 ⁸ Κάποια τζενέ αξίνενα αμαρί τιμή ντα αμαρό σεβασμός επειδή τθερένα εκ σημαντική θέση. Για παράδειγμας, σκεφτίνεν ι τζενέν σο κυβερνίνενα οτθέ σο τζουβντιόνα τουμέν ντα οντουλά σο κερένα τουμένγκε. Βοηθίνενα τι υπαρχίντιβελ ασφάλεια ντα φροντίνενα για το ανάγκες ι τζενένγκε. Λένγκε μπουτιάταρ βοηθίντιβασα μπουτ. Ο απόστολος Παύλος βακερντάς ότι πρέπει τι ντικχάς ασακέ τζενέν σαρ «μπαρέ εξουσίες». Επίσης, βακερντάς ότι πρέπει τι ακολουθίνας ο νόμους σο τσσουβένα: «Τι ντεν σαριλέντε οντουλά σο πρέπει τι ντεν-λεν, οντουλέστε σο μανγκέλα ο φόρος, ο φόρος», ντα «οντουλέστε σο μανγκέλα ι τιμή, ι τιμή».—Ρωμαίους 13:1, 7.

⁹ Σαρ Μάρτυρες του Ιεχωβά, κεράσα ο πιο λατσσό σο μπορίνασα για τι σικαβάς σεβασμός οντουλέντε σο κυβερνίνενα οτθέ σο τζουβντιάσα. Σίγουρα, κάθε τθεμ τθερέλα διαφορετικά έθιμα, ντα οτθάρ οντουβά σο μπεκλεντίνενα αμένταρ εκχέ τθεμέστε ισί διαφορετικός οντουλέσταρ σο μπεκλεντίνενα εκχέ γιαβερέ τθεμέστε. Αμέν συνεργαζίντιβασα ανταλέ τζενέντζαρ. Όμως, άμα μανγκλέ αμένταρ τι κεράς κάτι σο να μανγκέλα ο Ιεχωβά, ναστί κεράσα-λες. Όταν αβένα-πες ασακέ πράγματα, αμέν ασουνάσα ντα ντάσα τιμή ι Ιεχωβάς ντα όχι ι τζενέν.—Διαβάνεν 1 Πέτρου 2:13-17.

10. Σαρ ι Ιεχωβάσκε υπηρέτες κο πουρανέ μπρεσά ισί εκ μπουτ λατσσό παράδειγμας αμένγκε αντιβές;

¹⁰ Μπορίνασα τι σικλιάς μπουτ πράγματα κατά Ιεχωβάσκε υπηρέτες κο πουρανέ μπρεσά, σο ντινέ τιμή κο κυβερνήσεις ντα κο τζενέ σο τθερένας εξουσία. Ο Ιωσήφ ντα η Μαρία ισί εκ λατσσό παράδειγμας. Όταν ο Ρωμαίοι μανγκένας τι σικλιόν καζόμ τζενέ τζουβντιόνας οντουλέ τθεμέστε, ο Ιωσήφ ντα η Μαρία γκιλέ κι Βηθλεέμ για τι κερέν απογραφή παρόλο σο η Μαρία ισινέ έτοιμη τι μπιανέλ. (Λουκάς 2:1-5) Ο απόστολος Παύλος ισί εκ γιαβέρ παράδειγμας τζενέσκο σο σεβάνελας ι τζενέν σο κυβερνίνενας. Όταν κατηγοριντέ-λες ότι κερντάς κάτι σο να ισινέ σωστός, υπερασπιντάς με σεβασμός πο νεαυτός ανγκλάλ κο Βασιλιάς Ηρώδης Αγρίππας ντα ανγκλάλ κο Φήστος, σο κυβερνίνελας ι ρωμαϊκή επαρχία της Ιουδαίας.—Πράξεις 25:1-12· 26:1-3.

11, 12. (α) Σόσκε να ντάσα μπαρί τιμή κο παπάζια; (β) Σο αβιλό-πες όταν εκ Μάρτυρας κατά Αυστρία σικαντάς σεβασμός σε εκ πολιτικός;

¹¹ Σο κα βακεράς ι παπαζίνγκε; Πρέπει τι ντας-λεν μπαρί τιμή; Σικαβάσα λένγκε ο ίδιος σεβασμός σο κα σικαβάας κάθε τζενέσκε-ντα. Όμως κα αβέλας λάθος τι ντας-λεν μπαρί τιμή, ατζέ-ντα άμα μπεκλεντίνενα αμένταρ κάτι ασακό. Σόσκε; Επειδή η ψεύτικη θρησκεία να σικλιαρέλα ι αλήθεια ι Ντεβλέσκε ντα ι Γραφιάκε. Ο Ιησούς κατηγοριντάς ι αρχηγόν ι ψεύτικε θρησκειάκε ντα βακερντάς ότι ισινέ υποκριτές ντα ότι να οδηγίνενας ι τζενέν με λατσσό τρόπος. (Ματθαίος 23:23, 24) Οκιά μπάνταρ, όμως, να κα αβέλας λάθος τι σικαβάς μπαρό σεβασμός ντα τι ντας τιμή κο τζενέ σο κυβερνίνενα αμαρέ τθεμέστε. Επειδή κεράσα-λες ανταβά, οντουλά τζενέ μερικές φορές βοηθιντέ-αμέν.

¹² Εκ ασακό τζενό ισινέ ο Χάινριχ Γκλάισνερ, εκ πολιτικός κατά Αυστρία. Κο Δεύτερος Παγκόσμιος Πόλεμος, ο Ναζί ασταρντέ-λες για τι τσσουβέν-λες φυλακή. Όταν τσσουντέ-λες κο τρένος για τι μπουτσσαβέν-λες κο στρατόπεδος συγκέντρωσης, αρακχλάς εκχέ μπουτ λατσσέ Μαρτυράς κατά Αυστρία, τον Λέοπολντ  Ένγκλαϊτνερ. Ο πφραλ Ένγκλαϊτνερ εξηγιντάς με σεβασμός κο Γκλάισνερ οντουλά σο πακιάλας, ντα βοβ ασουνέλας-λες με προσοχή. Όταν τελειωσάλο ο πόλεμος, ο Γκλάισνερ χρησιμοποιηντάς μπουτ φαρ πι θέση για τι βοηθίνελ τους Μάρτυρες κι Αυστρία. Μπορεί τι τζανένα γιαβερά-ντα παραδείγματα σο τθερένας λατσσό αποτέλεσμας επειδή ο Χριστιανοί σικαντέ σεβασμός κο τζενέ σο τθερένα εξουσία.

13. Καλά τζενέ αξίνενα πιο μπουτ αμαρί τιμή ντα αμαρό σεβασμός, ντα σόσκε;

¹³ Αμαρέ πφραλά ντα πφενιά αξίνενα αμαρί τιμή ντα αμαρό σεβασμός. Ανταβά πρέπει τι κεράς-λες πιο μπουτ κο πφραλά σο τθερένα ι ευθύνη αντρέ κι εκκλησία, σαρ ισί ο πρεσβύτεροι, ο επίσκοποι περιοχής, ο πφραλά σο ισί κι Επιτροπή Τμήματος ντα οντουλά σο ισί κο Κυβερνών Σώμας. (Διαβάνεν 1 Τιμόθεο 5:17) Σαρέ ανταλά πφραλά φροντίνενα ο ανάγκες σο τθερέλα ι Ντεβλέσκο λαός, ντα η Αγία Γραφή βακερέλα ότι ανταλά υπηρέτες ισί “τζενέ σο ντιντιλέ σαρ δώρα”. (Εφεσίους 4:8) Οτθάρ ισί σημαντικός τι ντας-λεν τιμή ντα σεβασμός κατάρ-ντα τι αβέν, σο-ντα μόρφωση ή κοινωνική θέση τι τθερένα ή καζόμ-ντα λοβέ τι τθερένα. Ο πρώτοι Χριστιανοί μουκχλέ αμένγκε εκ μπουτ λατσσό παράδειγμας. Ντένας τιμή κο τζενέ σο τθερένας ι ευθύνη, ντα αμέν κεράσα ο ίδιος αντιβές. Όταν ισινάμ μαζί ασακέ μουρσέντζαρ, να συμπεριφερίντιβασα λένγκε σαρ τι αβένας άγγελοι. Αλλά σεβάνασα-λεν ντα ντάσα-λεν τιμή επειδή κερένα μπουτ πράγματα ντα ισί ταπεινοί.—Διαβάνεν 2 Κορινθίους 1:24· Αποκάλυψη 19:10.

14, 15. Σαρ ισί διαφορετικοί ο Χριστιανοί πρεσβύτεροι μπουτέ παπαζίνταρ;

¹⁴ Ανταλά πρεσβύτεροι ισί σαρ ταπεινά τσομπάνια. Να μανγκένα τι συμπεριφερίντιβεν λένγκε ο γιαβερά σαρ τι αβένας  διάσημοι. Οτθάρ ισί μπουτ διαφορετικοί μπουτέ παπαζίνταρ σο τζουβντιόνα αμαρέ ντιβεσέντε, αλλά οντουλένταρ-ντα σο τζουβντιόνας κο ντιβεσά κι Ιησούσκε. Βοβ βακερντάς: «Μπεϊντίνενα ο πιο λατσσέ θέσεις κο τραπέζια όταν χάνα ι γιαβερέντζαρ ντα ο ανγκλαϊνέ θέσεις κο συναγωγές, ντα ο χαιρετισμοί κο αγορές».—Ματθαίος 23:6, 7.

¹⁵ Ο Χριστιανοί πρεσβύτεροι ασουνένα ταπεινά ο λάφια ι Ιησούσκε: «Μα τι βακέρντιβεν Ραββί, επειδή εκ τανό ισί τουμαρό Δάσκαλος, ενώ σαρέ τουμέν ισινέν πφραλά. Επίσης, μα βακερέν καεκχέσκε ντάντε οπράλ κι πφουβ, επειδή εκ τανό ισί τουμαρό Ντατ, Οντουβά σο ισί κο ουρανός. Ούτε τι βακέρντιβεν αρχηγοί, επειδή εκ τανό ισί τουμαρό Αρχηγός, ο Χριστός. Αλλά ο πιο μπαρό τουμένταρ πρέπει τι αβέλ τουμαρό υπηρέτης. Οντουβά σο ισαρέλα-πες κα ταπεινώντιβελ ντα οντουβά σο ταπεινώνελα-πες κα ισαρέν-λες». (Ματθαίος 23:8-12) Όταν ο πρεσβύτεροι κο εκκλησίες σαρί κι πφουβ ισί ταπεινοί ντα ασουνένα ι Ιησούσκε λάφια, λένγκε πφραλά ντα λένγκε πφενιά κα μανγκέν-λεν, κα σεβάνεν-λεν ντα κα ντεν-λεν τιμή.

16. Σόσκε πρέπει τι συνεχίνας τι προσπαθίνας μπουτ για τι ντας τιμή κο γιαβερά;

¹⁶ Μπορεί τι μανγκάς χάνικ χρόνος μέχρι τι σικλιάς σαρ τι ντας τιμή κο γιαβερά. Ανταβά αβέλας-πες κο πρώτοι Χριστιανοί-ντα. (Πράξεις 10:22-26· 3 Ιωάννη 9, 10) Αλλά αξίνελα τι προσπαθίνας. Όταν ντάσα τιμή κο γιαβερά με το τρόπος σο μανγκέλα ο Ιεχωβά, αμέν-ντα κα βοηθίντιβας μπουτ.

17. Σαρ βοηθίντιβασα όταν σικαβάσα τιμή οντουλέντε σο τθερένα εξουσία;

¹⁷ Όταν ντάσα τιμή ντα σικαβάσα σεβασμός κο τζενέ σο τθερένα εξουσία οτθέ σο μπεσάσα, μπορεί τι υπερασπίνεν ο δικαίωμας σο τθεράσα τι κεράς λάφι ι Ντεβλέσκε. Ντα μπορεί τι τθερέν λατσσί άποψη για το έργος σο κεράσα. Ανταβά αβιλό-πες πριν κάποια μπρεσά κι Γερμανία όταν εκ σκαπάνισσα σο βακερένας λάκε Μπίργκιτ γκιλί τι παρακολουθίνελ η αποφοίτηση πι τσσαγιάκι κατά δημοτικός. Ο δασκάλες βακερντέ κι Μπίργκιτ ότι χαιρίνενας μπουτ σο τθερένας κο σχολείος χουρντέν σο ισινέ Μάρτυρες. Βακερντέ ότι ο χουρντέ σο ισινέ Μάρτυρες κερένας ο σχολείος εκ πιο λατσσό τθαν. Η Μπίργκιτ εξηγιντάς λένγκε: «Αμαρέ χουρντέ σικλιόνα τι συμπεριφερίντιβεν αντικάς σαρ μανγκέλα ο Ντεβέλ, ντα εκ κατά πράγματα σο σικλιόνα ισί τι σικαβέν σεβασμός πουμαρέ δασκαλόντε ντα τι ντεν-λεν τιμή». Εκ δασκάλα βακερντάς ότι, άμα σαρέ ο χουρντέ ισινέ σαρ ισί ο Μάρτυρες, κα αβέλας πιο εύκολα ο μάθημας. Τθερένας αζόμ λατσσί άποψη ι χουρντένγκε σο ισινέ Μάρτυρες σο, μερικές εβδομάδες σοράν, εκ κατά δασκάλες γκιλί σε εκ συνέλευση.

18, 19. Σο πρέπει τι ντας-αμέν γκοντί κάνα ντάσα τιμή κο πρεσβύτεροι;

¹⁸ Ο συμβουλές σο ισί αντρέ κο Λάφι κι  Ντεβλέσκο μπορίνενα τι βοηθίνεν-αμέν τι αγαβάς σαρ τι ντας τιμή κο πρεσβύτεροι σο ισί αμαρέ εκκλησιάτε. (Διαβάνεν Εβραίους 13:7, 17) Μπορίνασα ντα πρέπει τι ισαράς-λεν ι δύσκολε μπουτιάκε σο κερένα. Όταν συνεργαζίντιβασα με το οδηγίες σο ντένα, ανταβά κα βοηθίνελ ι πρεσβυτερόν τι υπηρετίνεν με χαρά. Η Γραφή βακερέλα ότι πρέπει επίσης τι τθεράς μπαρί πίστη σαρ τθερένας βον-ντα. Όμως, ανταβά να μανγκέλα τι βακερέλ ότι προσπαθίνασα τι μοιάζας ακριβώς κο τρόπος σο εκ «σημαντικός» πρεσβύτερος ιριαβέλα-πες, κερέλα λάφι ντα σικλιαρέλα. Άμα κα κεράας-λες ανταβά, κα αβέλας σαρ τι ακολουθίνας τζενέν, ντα όχι ι Χριστός. Δεν πρέπει τι μπιστράς ότι ο πρεσβύτεροι ισί ατελείς τζενέ σαρ ισινάμ αμέν-ντα.

¹⁹ Όταν ντάσα τιμή ντα σικαβάσα σεβασμός κο πρεσβύτεροι ντα να συμπεριφερίντιβασα λένγκε σαρ διάσημοι, ανταβά κα βοηθίνελ-λεν. Σαρ; Κα αβέλ λένγκε πιο εύκολος τι ατσσόν ταπεινοί ντα μα τι σκεφτίνεν ότι ισί πιο λατσσέ κατά γιαβερά ή ότι ο πράγματα σο κερένα ισί πάντα σωστά.

20. Σαρ βοηθίντιβασα όταν ντάσα τιμή κο γιαβερά;

²⁰ Η τιμή σο ντάσα κο γιαβερά βοηθίνελα-αμέν τι ατσσάς ταπεινοί ντα μα τι αβάς εγωιστές όταν ντένα-αμέν μπαρί προσοχή. Επίσης, αρακχαβέλα-αμέν επειδή βοηθίνελα-αμέν μα τι χασαράς αμαρί πίστη άμα κάποιος σο σεβάνασα κα κερέλ κάτι σο κα στεναχωρίνελ-αμέν. Επίσης βοηθίντιβασα τι ατσσάς ενωμέ με την οργάνωση σο τθερέλα ο Ιεχωβά. Η οργάνωση να ντέλα μπαρί τιμή καεκχέ τζενέστε, είτε βοβ τθερέλα ι ίδια πίστη αμέντζαρ είτε όχι.

21. Καγιά ισί η πιο σημαντική βοήθεια σο αβέλα όταν ντάσα τιμή κο γιαβερά;

²¹ Ο πιο σημαντικός πράγμας σο αβέλα-πες όταν ντάσα τιμή ι γιαβερέν ισί ότι αντικάς κεράσα ι Ντεβλές χαρούμενος. Κα κεράς οντουβά σο μανγκέλα βοβ ντα κα ατσσάς πιστοί λέστε. Αζομάν ο Ιεχωβά κα μπορίνελ τι ντελ απάντηση κο Σατανάς σο βακερντάς ότι καέκ να μπορίνελα τι ατσσόλ πιστός. (Παροιμίες 27:11) Ο πιο μπουτ τζενέ κο ντουνιάς να αγαβένα σαρ τι ντεν τιμή κο γιαβερά με το σωστός τρόπος. Ισινάμ πφερντέ εκτίμηση σο τζανάσα σαρ τι ντας τιμή αντικάς σαρ μανγκέλα ο Ιεχωβά!