1. Σαρ βακερέλα η Γραφή, σο ισί η διόρθωση;

ΣΟ ΣΚΕΦΤΙΝΕΝΑ όταν ασουνένα ι λέξη «διόρθωση»; Μπουτ τζενέ πακιάνα ότι ισί η τιμωρία, αλλά νανέ σάντε ανταβά. Η Αγία Γραφή βακερέλα ότι η διόρθωση ισί αμαρέ λατσσιμάσκε ντα τθερέλα σχέση πραγματέντζαρ, σαρ ισί ο σικλιαριπέ, η σοφία, η αγάπη ντα η ζωή. (Παροιμίες 1:​2-7· 4:​11-13) Ανταβά αβέλα-πες επειδή η διόρθωση ι Ντεβλέσκι σικαβέλα αμένγκε ότι μανγκέλα-αμέν ντα ότι μανγκέλα τι τζουβντιάς για πάντα. (Εβραίους 12:6) Παρόλο σο μπάζιμα ι Ντεβλέσκι διόρθωση τθερέλα τιμωρία-ντα, ποτές να ντέλα-λα με σκληρός ή μπέτι τρόπος. Ντα ο πιο σημαντικός λόγος σο ντιντιόλα διόρθωση ισί για τι σικλιαρέλ εκχέ τζενές, σαρ σικλιαρέλα εκ ντατ πι αγαπημέ τσσαβές.

2, 3. Σόσκε η διόρθωση μπορεί τι τθερέλα σχέση εμ ι σικλιαριμάσαρ εμ ι τιμωριάσαρ; (Ντικχ ι φωτογραφία σο ισί κι αρχή)

² Σκεφτίνεν ακαβά παράδειγμας. Εκ χουρντό, ο Γιαννάκης, κχελέλας μπάλα αντρέ κο κχερ. Λέσκι ντάι βακερντάς λέσκε: «Γιαννάκη, τζανέσα ότι δεν πρέπει τι κχελές μπάλα αντρέ κο κχερ! Μπορεί τι πφανγκές κάτι». Αλλά βοβ να ντέλα καν πι νταγιά, συνεχίνελα τι κχελέλ ι μπαλάσαρ, φουρτίνελα-λα εκχέ βαζόστε ντα πφανγκέλα-λες! Σο κερντάς ι Γιαννακίσκι ντάι για τι  διορθώνελ-λες; Σικλιαρντάς-λες σόσκε ισινέ λάθος ανταβά σο κερντάς. Μανγκέλας τι αγαβέλ λάκο τσσαβό ότι ισί λατσσό λέσκε τι ντελ καν πι νταντές ντα πι νταγιά ντα ότι λένγκε κανόνες ισί σημαντικοί ντα λογικοί. Για τι βοηθίνελ-λες τι αγαβέλ-λες ανταβά, αποφασιντάς ότι κα αβέλας σωστός τι τσσουβέλ-λες τιμωρία-ντα, οτθάρ λιντάς λέσταρ ι μπάλα για χάνικ καιρός. Παρόλο σο ο Γιαννάκης μπορεί μα τι μπεϊντιντάς-λες ανταβά, βοηθισάλο τι ντελ-πες γκοντί ότι κα τθερέλ μπέτι αποτελέσματα άμα να ντέλα καν πι νταντές ντα πι νταγιά.

³ Σαρ Χριστιανοί, ισινάμ φαμιλί ι Ντεβλέσκι. (1 Τιμόθεο 3:​15) Αμαρό Ντατ, ο Ιεχωβά, τθερέλα ο δικαίωμας τι αποφασίνελ ο σωστός ντα ο λάθος ντα τι διορθώνελ-αμέν κάνα να ντάσα-λες καν. Ντα αν οντουλά σο κερντάμ αντέ μπέτι αποτελέσματα, η διόρθωση σο ντέλα ο Ιεχωβά με αγάπη μπορίνελα τι βοηθίνελ-αμέν τι ντας-αμέν γκοντί καζόμ σημαντικός ισί τι ντας-λες καν. (Γαλάτες 6:7) Ο Ντεβέλ μανγκέλα-αμέν μπουτ ντα να μανγκέλα τι τθεράς προβλήματα.​—1 Πέτρου 5:6, 7.

4. (α) Σαρ μανγκέλα τι σικλιαράς ι γιαβερέν ο Ιεχωβά; (β) Σο κα ντικχάς ανταλέ μαθημάστε;

⁴ Κάνα ντάσα διόρθωση αντράλ κατά Γραφή, μπορίνασα τι βοηθίνας εκχέ τσσαβές ή εκχέ τζενές σο κεράσα-λες μελέτη τι αβέλ μαθητής ι Χριστόσκο. Χρησιμοποιήνασα ι Γραφή για τι σικλιαράς ο σωστός κο τζενέ σο κεράσα-λεν μελέτη ντα για τι βοηθίνας-λεν τι αγαβέν ντα τι “κερέν σαρέ οντουλά σο βακερντάς αμένγκε ο Ιησούς”. (Ματθαίος 28:​19, 20· 2 Τιμόθεο 3:​16) Ο Ιεχωβά μανγκέλα λένταρ τι λεν ασακί εκπαίδευση για τι μπορίνεν βον-ντα τι βοηθίνεν γιαβερέν τι ακολουθίνεν ι Χριστός. (Διαβάνεν Τίτο 2:​11-14) Ακανά κα ντικχάς τριν σημαντικές ερωτήσεις: (1) Σαρ σικαβέλα η διόρθωση σο ντέλα ο Ντεβέλ ότι μανγκέλα-αμέν; (2) Σο μπορίνασα τι σικλιάς τζενένταρ σο διορθωντάς ο Ντεβέλ; (3) Σαρ μπορίνασα τι μοιάζας κο Ιεχωβά ντα λέσκε Τσσαβέστε κάνα ντάσα διόρθωση;

5. Σαρ σικαβέλα η διόρθωση σο ντέλα ο Ιεχωβά ότι μανγκέλα-αμέν;

⁵ Ο Ιεχωβά διορθώνελα-αμέν, σικλιαρέλα-αμέν ντα ντέλα-αμέν εκπαίδευση σόσκε μανγκέλα-αμέν. Μανγκέλα τι ατσσάς πασέ λέστε ντα τι τζουβντιάς για πάντα. (1 Ιωάννη 4:​16) Ποτές να προσβαλίνελα-αμέν ούτε κερέλα-αμέν τι νιωθίνας ότι να αξίνασα τίποτα. (Παροιμίες 12:​18) Αλλά ο Ιεχωβά ντικχέλα αμαρέ λατσσέ ιδιότητες ντα ντέλα-αμέν ι ελευθερία τι τραμπίνας σο κα κεράς. Μπορίνενα τι ντικχέν σαρ σικαβέλα η διόρθωση σο λάσα κατά Γραφή, κατά έντυπα, αμαρέ νταντέσταρ ντα νταγιάταρ ή κατά πρεσβύτεροι ότι ο Ιεχωβά μανγκέλα-αμέν; Κι πραγματικότητα, κάνα ο πρεσβύτεροι προσπαθίνενα τι διορθώνεν-αμέν με ήρεμος τρόπος ντα αγάπη, ατζέ-ντα πριν τι αγαβάς ότι κερντάμ κάτι λάθος, σικαβένα ι αγάπη σο τθερέλα αμένγκε ο Ιεχωβά.​—Γαλάτες 6:1.

6. Σαρ η διόρθωση σικαβέλα ι Ντεβλέσκι αγάπη ατζέ-ντα άμα κάποιος πρέπει τι χασαρέλ εκ προνόμιος;

 ⁶ Μερικές φορές για τι ντιντιόλ διόρθωση να ερεσένα ο συμβουλές. Αν εκ τζενό κερντάς εκ μπαρί αμαρτία, ναστί τθερέλα συγκεκριμέ προνόμια αντρέ κι εκκλησία. Ατζέ-ντα κάνα αβέλα-πες ανταβά, η διόρθωση σικαβέλα ι αγάπη σο τθερέλα ο Ντεβέλ λέσκε. Για παράδειγμας, μπορεί τι βοηθίνελ-λες τι ντικχέλ καζόμ σημαντικός ισί τι αφιερώνελ πιο μπουτ χρόνος για τι διαβάνελ ι Γραφή, τι σκεφτίνελ προσεκτικά σο διαβάνελα ντα τι κερέλ προσευχή. Ανταλά πράγματα κα βοηθίνεν-λες τι κερέλ πιο ζουρανί πι φιλία ι Ιεχωβάσαρ. (Ψαλμός 19:7) Καζόμ νακχέλα ο καιρός, μπορεί τι λελ πάλι ο ευθύνες ντα ο προνόμια σο χασαρντάας. Ατζέ-ντα κάνα εκ τζενό χάλα αποκοπή, ανταβά σικαβέλα ι αγάπη ι Ιεχωβάσκι, σόσκε αρακχαβέλα ι εκκλησία οντουλένταρ σο μπορίνενα τι επηρεάνεν-λα. (1 Κορινθίους 5:6, 7, 11) Ντα ι Ντεβλέσκι διόρθωση ισί πάντα δίκαιη, οτθάρ βοηθίνελα ι αποκομμέ τζενές τι αγαβέλ καζόμ σοβαρή ισί λέσκι αμαρτία. Ανταβά μπορίνελα τι κερέλ-λες τι μετανιώνελ.​—Πράξεις 3:19.

7. Κον ισινέ ο Σεβνά ντα καγιά μπέτι ιδιότητα μπαριλί αντρέ λέστε;

⁷ Για τι αγαβάς καζόμ σημαντική ισί η διόρθωση, κα κεράς λάφι ντουέ τζενένγκε σο διορθωντάς ο Ιεχωβά. Ο εκ ισί ο Σεβνά, εκ Ισραηλίτης σο τζουβντιόλας αζομάν σο κυβερνίνελας ο βασιλιάς Εζεκίας, ντα ο γιαβέρ ισί ο Γκρέιαμ, εκ πφραλ αμαρέ ντιβεσέντε. Ο Σεβνά ισινέ “υπεύθυνος εκχέ κχερέσκε”, μάλλον ι κχερέσκε σο τθερέλας ο βασιλιάς Εζεκίας, ντα τθερέλας μπαρί εξουσία. (Ησαΐας 22:​15) Αλλά ο Σεβνά αβιλό μπαρικανό ντα μανγκέλας τι κερέλ ι γιαβερέν τι πακιάν ότι ισινέ σημαντικός. Κερντάς ατζέ-ντα εκ πααλίς μεζάρι πέσκε ντα νικλίλας σε «μπουτ σουκάρ άμαξες».​—Ησαΐας 22:​16-18.

8. Σαρ διορθωντάς ο Ιεχωβά ι Σεβνάς ντα καβά ισινέ ο αποτέλεσμας;

⁸ Ο Σεβνά προσπαθίνελας τι λελ δόξα, οτθάρ ο Ντεβέλ λιντάς λέσταρ ο διορισμός  σο τθερέλας ντα ντινάς-λες εκχέ τζενέστε σο βακέρντιβελας Ελιακείμ. (Ησαΐας 22:​19-21) Ανταβά αβιλό-πες κάνα ο βασιλιάς Σενναχειρείμ κατά Ασσυρία μανγκέλας τι κερέλ τζένγκι κι Ιερουσαλήμ. Σοράν, ο Σενναχειρείμ μπουτσσαντάς μερικέ αξιωματικόν ντα εκχέ μπαρέ στρατός για τι νταραβέλ ι Ιουδαιόν ντα τι κερέλ ι Εζεκιάς τι παραδόντιβελ. (2 Βασιλέων 18:​17-25) Ο Εζεκίας μπουτσσαντάς τον Ελιακείμ ντα ντουέ γιαβερέ τζενέν τι κερέν λάφι κο αξιωματικοί. Εκ οντουλένταρ ισινέ ο Σεβνά, σο αβιλόας γραμματέας Ανταλέσταρ αγαβάσα ότι ο Σεβνά μάλλον σικλιλόας τι αβέλ ταπεινός ντα να προσβαλισάλοας ούτε αρχισάλοας τι τζιτζίνελ πέσκε. Δεχτιντάς αντράλ πι γκίσταρ εκ θέση σο να ισινέ αζόμ σημαντική. Μπορίνασα τι σικλιάς τριν πράγματα οντουλένταρ σο αβιλέ-πες κο Σεβνά.

9-11. (α) Καλά σημαντικά πράγματα μπορίνασα τι σικλιάς κατά Σεβνά; (β) Σαρ νιωθίνενα για το τρόπος σο συμπεριφερισάλο ο Ιεχωβά κο Σεβνά;

⁹ Πρώτον, ο Σεβνά χασαρντάς πο διορισμός ντα ανταβά ανέλα αμαρέ γκοντιάτε ότι «ο μπαρικανιπέ γκερέλα κι καταστροφή». (Παροιμίες 16:​18) Μπορεί τι τθεράσα ειδικούς διορισμούς κι εκκλησία ντα ο γιαβερά μπορεί τι αμντίνενα ότι ισινάμ σημαντικοί. Αν αβέλα-πες ανταβά, κα ατσσάς ταπεινοί; Κα ντας-αμέν γκοντί ότι σο-ντα ικανότητες τθεράσα ντα σο-ντα λατσσέ πράγματα καταφερίνασα τι κεράς ισί σάντε χάρη κο Ιεχωβά; (1 Κορινθίους 4:7) Ο απόστολος Παύλος προειδοποιηντάς: «Βακεράβα ι κάθε εκχέσκε σο ισί τουμέντζαρ μα τι σκεφτίνελ πι νεαυτόσκε πιο μπουτ πράγματα από ό,τι πρέπει τι σκεφτίνελ, αλλά τι χρησιμοποιήνελ πι γκοντί για τι σκεφτίνελ λογικά».​—Ρωμαίους 12:3.

¹⁰ Δεύτερον, η αυστηρή συμβουλή σο ντινάς ο Ιεχωβά κο Σεβνά ίσως σικαβέλα ότι πακιάλας ότι ο Σεβνά μπορίνελας τι αλλάνελ. (Παροιμίες 3:​11, 12) Ανταβά ισί εκ μάθημας οντουλένγκε σο χασαρντέ εκ ειδικός προνόμιος. Αντί τι χολιάνεν ντα τι προσβαλίντιβεν, οντουλά τζενέ μπορίνενα τι συνεχίνεν τι ντεν ο πιο λατσσό κο Ιεχωβά. Μπορίνενα τι τραμπίνεν τι ντικχέν ι διόρθωση σαρ απόδειξη σο σικαβέλα ότι ο Ιεχωβά μανγκέλα-λεν. Ντεν-τουμέν γκοντί ότι αμαρό Ντατ κο τέλος κα ευλογίνελ οντουλέν σο ατσσόνα ταπεινοί. (Διαβάνεν 1 Πέτρου 5:6, 7) Η διόρθωση ι Ιεχωβάσκι, σο ντιντιόλα με αγάπη, μπορίνελα τι λατσσαρέλ αμαρό χαρακτήρας άμα ισινάμ ταπεινοί ντα αβάσα σαρ κοβλί τσικ λέσκε βαστέντε.

¹¹ Τρίτον, σικλιάσα εκ μπουτ σημαντικός μάθημας κατά τρόπος σο συμπεριφερισάλο ο Ιεχωβά κο Σεβνά. Ο τρόπος σο διορθώνελα ο Ιεχωβά σικαβέλα ότι μισίνελα ι αμαρτία, αλλά σικαβέλα επίσης ότι μανγκέλα ι τζενές σο αμαρτιντάς. Ο Ιεχωβά ρόντελα ο λατσσιπέ αντρέ κο τζενέ. Αν ισινάν ντατ, ντάι ή πρεσβύτερος, κα προσπαθίνες τι ντες διόρθωση αντικάς σαρ ντέλα-λα ο Ιεχωβά;​—Ιούδα 22, 23.

12-14. (α) Σαρ αντιδράνενα μερικοί κι Ιεχωβάσκι διόρθωση; (β) Σαρ βοηθιντάς η Αγία Γραφή εκχέ πφραλές τι αλλάνελ πι συμπεριφορά, ντα καβά ισινέ ο αποτέλεσμας;

¹² Δυστυχώς, μερικά τζενέ πληγώντιβενα αζόμ μπουτ κάνα λένα διόρθωση σο τσσίντενα-πες ντουρ κατά Ντεβέλ ντα κατά εκκλησία. (Εβραίους 3:​12, 13) Μήπως ανταβά μανγκέλα τι βακερέλ ότι καέκ ναστί βοηθίνελα-λεν; Όχι! Σκεφτίνεν ο παράδειγμας του Γκρέιαμ, σο χαλάς αποκοπή ντα σοράν βουρτισάλο κι αλήθεια. Όμως, σοράν ανταλέσταρ τσσιναντάς τι τζαλ κο έργος ντα κο συναθροίσεις. Εκ πρεσβύτερος προσπαθιντάς τι αβέλ λέσκο αμάλ ντα τελικά ο Γκρέιαμ μανγκλάς κατά πρεσβύτερος τι κερέλ-λες μελέτη.

¹³ Ο πρεσβύτερος πιο σοράν βακερντάς: «Ο Γκρέιαμ ισινέ μπαρικανό. Κρίνελας ι πρεσβυτερόν σο λιντέας απόφαση τι χαλ  αποκοπή. Οτθάρ κο γιαβερά μελέτες σο κερντάμ, συζητιντάμ εδάφια σο βακερένα ι μπαρικανιμάσκε ντα για το μπέτι αποτελέσματα σο ανέλα. Ο Γκρέιαμ αρχισάλο τι ντικχέλ πο νεαυτός κο πνευματικός ανιάς, δηλαδή κι Αγία Γραφή, ντα να μπεϊντίνελας οντουβά σο ντικχέλας! Ο αποτέλεσμας ισινέ μπουτ σουκάρ! Αγαντάς ότι ο μπαρικανιπέ να μουκχέλας-λες τι ντικχέλ καθαρά ντα ότι βοβ κερέλας λάθος σο κρίνελας ι γιαβερέν, οτθάρ αρχισάλο τι κερέλ αλλαγές. Αρχισάλο τι τζαλ τακτικά κο συναθροίσεις, τι κερέλ προσωπική μελέτη ντα τι προσευχίντιβελ κάθε ντιβές. Ντα δεχτιντάς ο πνευματικές ευθύνες σο τθερέλα σαρ σορό ι φαμιλιάκο, κάτι σο αντάς μπαρί χαρά λέσκε ρομνιάκε ντα λέσκε τσσαβένγκε».​—Λουκάς 6:​41, 42· Ιακώβου 1:​23-25.

¹⁴ Οντουβά πρεσβύτερος επίσης βακερντάς: «Εκ ντιβές, ο Γκρέιαμ βακερντάς μάνγκε κάτι σο γκιλό ντιπ αντρέ μι γκίστε. “Τζανάβα ι αλήθεια μπουτ μπρεσά”, βακερντάς, “ντα κερντόμας σκαπανικός-ντα. Αλλά σάντε ακανά μπορίναβα τι βακεράβ ότι μανγκάβα μπαγιά ι Ιεχωβάς”». Αφού νακχλό χάνικ καιρός, ο Γκρέιαμ διορισάλο τι βοηθίνελ κο μικρόφωνα ντα χαιρισάλο μπουτ ανταλέσκε. Ο πρεσβύτερος βακερντάς: «Λέσκο παράδειγμας σικλιαρντάς-μαν ότι κάνα εκ τζενό ταπεινώνελα πο νεαυτός ανγκλάλ κο Ντεβέλ ντα δεχτίνελα ι διόρθωση, ευλογίντιβελα μπουτ!»

15. Σο πρέπει τι κεράς για τι ερεσέλ αμαρί διόρθωση κι γιαβερένγκε γκιά;

¹⁵ Άμα μανγκάσα τι αβάς λατσσέ δάσκαλοι, πρέπει πρώτα τι αβάς λατσσέ μαθητές. (1 Τιμόθεο 4:​15, 16) Άμα ο Ιεχωβά χρησιμοποιήνελα-τουμέν για τι διορθώνελ γιαβερέν, πρέπει τι ατσσόν ταπεινοί ντα τι μουκχέν ι Ιεχωβάς τι καθοδηγίνελ-τουμέν κι ζωή. Κάνα ο γιαβερά ντικχένα ότι ισινέν ταπεινοί, κα σεβάνεν-τουμέν ντα κα αβέλ λένγκε πιο εύκολος τι δεχτίνεν τουμαρί συμβουλή ή διόρθωση. Για τι ντικχάς ο παράδειγμας ι Ιησούσκο.

16. Σο μπορίνασα τι σικλιάς κατά σουκάρ τρόπος σο διορθώνελας ντα σικλιαρέλας ι γιαβερέν ο Ιησούς;

¹⁶ Ο Ιησούς πάντα ντέλας καν πι Νταντές, ατζέ-ντα κάνα ανταβά ισινέ μπουτ δύσκολος. (Ματθαίος 26:​39) Βακερέλας οντουλένγκε σο ασουνένας-λες ότι οντουλά σο σικλιαρέλας ντα λέσκι σοφία αβένας λέσκε Νταντέσταρ. (Ιωάννης 5:​19, 30) Ο Ιησούς ισινέ ταπεινός ντα ντέλας καν, ντα ανταβά βοηθιντάς-λες τι αβέλ δάσκαλος σο τζιτζίνελας ι γιαβερένγκε. Ο λατσσέ τζενέ μανγκένας τι αβέν λέσαρ. (Διαβάνεν Ματθαίος 11:​29) Λέσκε σουκάρ λάφια ενθαρρύνενας οντουλέν σο χασαρντέας πουμαρό κουράγιος ντα ισινέ μπίζουρανε. (Ματθαίος 12:​20) Διορθώνελας πι αποστολόν με σουκάρ τρόπος ντα αγάπη ατζέ-ντα αζομάν σο κα μπορίνελας τι νευριάνελ λέντζαρ επειδή χάνας-πες κον ισί ο πιο μπαρό.​—Μάρκος 9:​33-37· Λουκάς 22:​24-27.

17. Καλά ιδιότητες κα βοηθίνεν ι πρεσβυτερόν τι φροντίνεν λατσσές ι εκκλησία;

¹⁷ Κάθε φαρ σο ο πρεσβύτεροι ντένα διόρθωση σο βασίντιβελα κι Γραφιάκε αρχές, πρέπει τι μοιάζεν κο Χριστός. Αντικάς κα σικαβέν ότι μανγκένα τι καθοδηγίντιβεν κατά  Ντεβέλ ντα λέσκε Τσσαβέσταρ. Ο απόστολος Πέτρος γραφιντάς: «Τι αρακχαβέν ντα τι σικλιαρέν ι Ντεβλέσκε μπρακέν σο ισινέν υπεύθυνοι λένγκε ντα φροντίνενα-λεν με προσοχή, όχι ζορίσαρ, αλλά επειδή μανγκένα τι κερέν-λες ι Ντεβλέσκε· ούτε για τι κερδίνεν κάτι πφιρνικανές, αλλά αντράλ τουμαρέ γκίσταρ· ντα μα τι κερέν κουμάντος μπέτι τροπόσαρ οντουλέν σο ισί κληρονομιά ι Ντεβλέσκι, αλλά τι αβέν λατσσέ παραδείγματα ι μπρακένγκε». (1 Πέτρου 5:​2-4) Ο πρεσβύτεροι σο ντένα καν χαράσαρ κο Ντεβέλ ντα κο Χριστός ανένα ευλογίες εμ πουμένγκε εμ οντουλένγκε σο φροντίνενα.​—Ησαΐας 32:1, 2, 17, 18.

18. (α) Σο μπεκλεντίνελα ο Ιεχωβά κατά νταντά ντα κατά νταγιά; (β) Σαρ βοηθίνελα ο Ντεβέλ ι νταντέν ντα ι νταΐν;

¹⁸ Ο ίδιες αρχές μπορίνενα τι ντεν βοήθεια κο φαμιλιά-ντα. Ο Ιεχωβά βακερέλα κι φαμιλίνγκε σορέ: «Μα κερέν τουμαρέ τσσαβέν τι νευριάνεν, αλλά καζόμ μπαριαρένα-λεν τι ντεν-λεν ι διόρθωση ντα ο συμβουλές ι Ιεχωβάσκε». (Εφεσίους 6:4) Ισί μπαγιά σημαντική η εκπαίδευση ντα η διόρθωση; Ο εδάφιος Παροιμίες 19:​18 βακερέλα: «Τι σικλιαρές τι τσσαβές καζόμ υπαρχίντιβελα ελπίδα, ντα μα έλα υπεύθυνος λέσκε μεριμάσκε». Ο Ιεχωβά ντέλα κο νταντά ντα κο νταγιά ι ευθύνη τι διορθώνεν πουμαρέ τσσαβέν. Άμα να κα κερέν-λες ανταβά, κα ντεν λόγος λέστε! (1 Σαμουήλ 3:​12-14) Όμως, ο Ιεχωβά ντέλα κο νταντά ντα κο νταγιά ι σοφία ντα ι δύναμη σο χρειαζίντιβενα κάνα προσευχίντιβενα για τι μανγκέν λέσκι βοήθεια ντα στηρίντιβενα λέσκε Λαφίστε ντα κο άγιος πνεύμας για τι καθοδηγίνελ-λεν.​—Διαβάνεν Ιακώβου 1:5.

19, 20. (α) Καλά ευλογίες τθεράσα κάνα δεχτίνασα ι Ντεβλέσκι διόρθωση; (β) Σο κα ντικχάς κο γιαβέρ μάθημας;

¹⁹ Άμα δεχτίνασα ι Ντεβλέσκι διόρθωση ντα μοιάζασα κο Ιεχωβά ντα κο Ιησούς κάνα διορθώνασα γιαβερέν, κα τθεράς μπουτ ευλογίες! Αμαρέ φαμιλιά ντα αμαρέ εκκλησίες κα τθερέν ειρήνη ντα ο κάθε εκ κα νιωθίνελ ότι μανγκένα-λες, ότι εκτιμίνενα-λες ντα ότι ισί ασφαλής. Ανταγιά ειρήνη ντα ευτυχία ισί μπουτ χουρντί ανγκλάλ κι ειρήνη ντα κι ευτυχία σο κα τθεράς κο μέλλον. (Ψαλμός 72:7) Η διόρθωση ι Ιεχωβάσκι προετοιμάνελα-αμέν για τι τζουβντιάς για πάντα γιεκ, σαρ εκ ειρηνική ντα ενωμέ φαμιλί σο τθερέλα Νταντές ι Ιεχωβάς. (Διαβάνεν Ησαΐας 11:9) Άμα κα τθεράς ανταβά αμαρέ γκοντιάτε κα αγαβάς ότι, κι πραγματικότητα, η διόρθωση ισί εκ μπουτ σουκάρ τρόπος σο σικαβέλα ο Ντεβέλ πι αγάπη αμένγκε.

²⁰ Κο γιαβέρ μάθημας, κα σικλιάς πιο μπουτ για τη διόρθωση κι φαμιλί ντα κι εκκλησία. Κα ντικχάς σαρ μπορίνασα τι διορθώνας αμαρό νεαυτός. Ντα κα σικλιάς σαρ τι νασάς ντουρ εκχέ πραγμάσταρ σο μπορίνελα τι ανέλ αμένγκε μπουτ πιο μπαρί ντουκχ κατά διόρθωση.