1, 2. (α) Σαρ νιωθίνενα μερικά νταντά ντα νταγιά κάνα λένγκε τσσαβέ μανγκένα τι μπολντιόν; (β) Σόσκε πουτσένα οντουλέν σο μανγκένα τι μπολντιόν αν αφιερωντέ-πες κο Ιεχωβά; (Ντικχ ι φωτογραφία σο ισί κι αρχή)

Ο ΝΤΑΤ ντα η ντάι ι Μαριάκι ντικχένας πουμαρέ τσσαγιά σο ιστίντιλι οπρέ γιεκ ι γιαβερέ τζενέντζαρ σο μανγκένας τι μπολντιόν. Ο πφραλ σο κερέλας ι ομιλία ι μπολιμάσκι κερντάς ντούι ερωτήσεις. Η Μαρία απαντιντάς ζουρανές ντα καθαρά. Χάνικ πιο σοράν, μπολντιλί.

² Λάκο ντατ ντα λάκι ντάι ισινέ μπουτ περήφανοι σο αφιερωντάας πι ζωή κο Ιεχωβά ντα μπολντιλί. Αλλά πριν τι μπολντιόλ, η ντάι ι Μαριάκι ανησυχίνελας χάνικ. Βόι σκεφτίνελας: “Μήπως η Μαρία ισί μπουτ χουρντί για τι μπολντιόλ; Αγαβέλα μπαγιά καζόμ σημαντικός ισί τι αφιερώνελ-πες κο Ιεχωβά; Μήπως κα αβέλας πιο λατσσό τι μπεκλεντίνελ χάνικ ατζέ ντα σοράν τι μπολντιόλ;” Μπουτ νταντά ντα νταγιά σκεφτίνενα ασακέ ερωτήσεις κάνα λένγκε τσσαβέ βακερένα λένγκε ότι μανγκένα τι μπολντιόν. (Εκκλησιαστής 5:5) Ντα ανταβά ισί  λογικός, σόσκε η πιο σημαντική απόφαση σο μπορίνελα τι λελ εκ τζενό ισί τι αφιερώνελ πι ζωή κο Ιεχωβά ντα τι μπολντιόλ.​—Ντικχ ο πλαίσιος « Αφιερωντέν-τουμέν κο Ιεχωβά;»

3, 4. (α) Σαρ σικλιαρντάς-αμέν ο απόστολος Πέτρος ότι ο μπολιπέ ισί μπουτ σημαντικός; (β) Σόσκε ο Πέτρος κερντάς λάφι για τη σχέση σο τθερέλα ο μπολιπέ με τη κιβωτός σο κερντάς ο Νώε;

³ Ο απόστολος Πέτρος κερντάς λάφι για τη σχέση σο τθερέλα ο μπολιπέ με τη κιβωτός σο κερντάς ο Νώε. Βακερντάς: «Ο μπολιπέ, σο ταιριάνελα ανταλέσαρ, σώνελα τουμέν-ντα ακανά». (Διαβάνεν 1 Πέτρου 3:​20, 21) Η κιβωτός σικαβέλας ξεκάθαρα κο γιαβερά ότι ο Νώε μανγκέλας τι κερέλ ο θέλημας ι Ντεβλέσκο σαρέ πι γκίσαρ. Ο Νώε κερντάς πιστά ο έργος σο ντινάας-λες ο Ιεχωβά. Επειδή ο Νώε τθερέλας πίστη, ο Ιεχωβά σωντάς εμ λες εμ λέσκι φαμιλί κατά Κατακλυσμός. Σο μανγκέλας τι σικλιαρέλ-αμέν ο Πέτρος;

⁴ Κάνα ο τζενέ ντικχλέ ι κιβωτός, τζανένας ότι ο Νώε τθερέλας πίστη κο Ντεβέλ. Κάνα ο τζενέ ντικχένα εκχέ τζενές τι μπολντιόλ, τζανένα ότι αφιερωντάς πι ζωή κο Ντεβέλ σόσκε τθερέλα πίστη κο Χριστός σο αναστισάλο. Σαρ ο Νώε, οντουλά σο μπολντιόνα ντένα καν ι Ντεβλές ντα κερένα ο έργος σο ντινάς-λεν. Ντα σαρ ο Ιεχωβά σωντάς ι Νωές κατά Κατακλυσμός, αντικάς κα σώνελ πι πιστέ μπολντέ υπηρετόν κάνα κα καταστραφίνελ ανταλέ πφιρνέ ντουνιάς. (Μάρκος 13:​10· Αποκάλυψη 7:9, 10) Άρα, ισί μπουτ σημαντικός τι αφιερώνας αμαρί ζωή κο Ιεχωβά ντα τι μπολντιάς. Κι πραγματικότητα, αν κάποιος σινανέ αργίνελα τι μπολντιόλ, κα μπορίνελας τι χασαρέλ ι ευκαιρία τι τζουβντιόλ για πάντα.

5. Σο κα σικλιάς ανταλέ μαθημάστε;

⁵ Ακανά σο τζανάσα καζόμ σημαντικός ισί ο μπολιπέ, πρέπει τι λας απαντήσεις  ακαλέ τρινέ ερωτησιέντε: Σο βακερέλα η Αγία Γραφή ι μπολιμάσκε; Σο πρέπει τι κερέλ εκ τζενό πριν τι μπολντιόλ; Σόσκε πρέπει πάντα τι ντας-αμέν γκοντί καζόμ σημαντικός ισί ο μπολιπέ κάνα σικλιαράσα αμαρέ τσσαβέν ή εκχέ τζενές σο κεράσα-λες μελέτη;

6, 7. (α) Σο σημασία τθερέλας ο μπολιπέ σο κερέλας ο Ιωάννης; (β) Καβά μπολιπέ ισινέ διαφορετικός σαρέ κατά γιαβερά, ντα σόσκε;

⁶ Κι Γραφή, ο πρώτος τζενό σο διαβάνασα ότι μπολέλας γιαβερέν ισινέ ο Ιωάννης ο Βαφτιστής. (Ματθαίος 3:​1-6) Σόσκε ο τζενέ τζάνας λέστε για τι μπολντιόν; Για τι σικαβέν ότι μετανιωσάλεας πουμαρέ αμαρτιένγκε, δηλαδή παραδεχτίνενας ότι να ντινέας καν κο Μωσαϊκός Νόμος ντα ότι στεναχωρίντιβενας μπουτ ανταλέσκε. Αλλά ο πιο σημαντικός μπολιπέ σο κερντάς ο Ιωάννης τθερέλας μπουτ διαφορετική σημασία. Ο Ιωάννης τθερέλας ο μπαρό προνόμιος τι μπολέλ ι Ιησούς, ι Ντεβλέσκε τέλειε Τσσαβές. (Ματθαίος 3:​13-17) Ο Ιησούς ποτές να αμαρτιντάας. Να χρειαζίντιβελας τι μετανιώνελ. (1 Πέτρου 2:​22) Άρα, σόσκε μπολντιλό; Για τι σικαβέλ ότι ισινέ έτοιμος τι χρησιμοποιήνελ πι ζωή για τι κερέλ ο θέλημας ι Ντεβλέσκο.​—Εβραίους 10:7.

⁷ Κάνα ο Ιησούς αρχισάλο τι βακερέλ ο λατσσέ αμπέρια, λέσκε μαθητές αρχισάλε τι μπολέν τζενέν. (Ιωάννης 3:​22· 4:1, 2) Οντουλά τζενέ μπολντιόνας σόσκε βον-ντα μετανιωσάλεας ι αμαρτιένγκε σο κερντέ επειδή να ντινέας καν κο Μωσαϊκός Νόμος. Αλλά σοράν κατά μεριπέ ντα κατά ανάσταση ι Ιησούσκι, οντουλά σο μανγκένας τι αβέν λέσκε μαθητές κα τθερένας εκ γιαβέρ λόγος για τι μπολντιόν.

8. (α) Καγιά εντολή ντινάς ο Ιησούς αφού αναστισάλο; (β) Σόσκε πρέπει τι μπολντιόν ο Χριστιανοί;

⁸ Κο 33 Κ.Χ., αφού νακχλέας χάνικ ντιβεσά κατά ανάσταση λέσκι, ο Ιησούς κερντάς λάφι σε πιο μπουτ από 500 μουρσά, τζουβλιά ντα ίσως χουρντέ-ντα. Μάλλον αζομάν ισινέ σο βακερντάς: «Τζαν ντα κερέν μαθητέν σαρέ κατά τθεμά, μπολέν-λεν κο ναβ κι Νταντέσκο ντα κι Τσσαβέσκο ντα του αγίου πνεύματος, ντα σικλιαρέν-λεν τι κερέν σαρέ οντουλά σο βακερντόμ τουμένγκε». (Ματθαίος 28:​19, 20· 1 Κορινθίους 15:6) Ο Ιησούς ντινάς οντουλέντε σο ακολουθίνενας-λες ι εντολή τι κερέν μαθητέν. Κον μανγκέλα τι αβέλ λέσκο μαθητής, ή γιαβέρτουλους τι τσσουβέλ λέσκο «ζυγός» οπρά-πέστε, πρέπει τι μπολντιόλ. (Ματθαίος 11:​29, 30) Για τι υπηρετίνελ εκ τζενό ι Ντεβλές αντικάς σαρ μανγκέλα Βοβ, πρέπει τι δεχτίνελ ότι ο Ντεβέλ χρησιμοποιήνελα ι Ιησούς για τι κερέλ πο θέλημας. Σοράν, οντουβά τζενό μπορίνελα τι μπολντιόλ ντα τι τθερέλ ι ευλογία ι Ντεβλέσκι. Μπουτέ εδαφιόντε, η Γραφή σικαβέλα ότι ο πρώτοι μαθητές ι Ιησούσκε τζανένας καζόμ σημαντικός ισινέ τι μπολντιόν. Να σκεφτίνενας ότι έπρεπε τι μπεκλεντίνεν ντα τι μπολντιόν πιο σοράν.​—Πράξεις 2:​41· 9:​18· 16:​14, 15, 32, 33.

9, 10. Σο μπορίνασα τι σικλιάς ι μπολιμάσκε κατά Αιθίοπας ντα κατά Σαούλ;

⁹ Διαβάνεν Πράξεις 8:​35, 36. Εκ Αιθίοπας σο δεχτιντάας ι θρησκεία ι Ιουδαιόνγκι γκιλόας κο ναός κι Ιερουσαλήμ για τι ντελ λατρεία ντα βουρτίνελας πι τθεμέστε. Εκ άγγελος ι Ιεχωβάσκο μπουτσσαντάς ι Φιλιππός τι βακερέλ λέσκε ι Ντεβλέσκε, ντα ο Φίλιππος σικλιαρντάς-λες «ο λατσσέ αμπέρια σο τθερένα τι κερέν ι Ιησούσαρ». Σο κερντάς ο Αιθίοπας; Αγαντάς καζόμ  σημαντικός ισινέ τι δεχτίνελ ι Ιησούς σαρ Κύριος ντα μανγκέλας τι κερέλ οντουλά σο μανγκέλα ο Ιεχωβά κατά Χριστιανοί. Οτθάρ, μπολντιλό χωρίς τι χασαρέλ χρόνος.

¹⁰ Εκ γιαβέρ παράδειγμας ισί εκ Ιουδαίος σο βακερένας λέσκε Σαούλ. Σαρ λαός, ο Ιουδαίοι ισινέ αφιερωμέ κο Ιεχωβά, αλλά Βοβ μουκχλάας-λεν σόσκε να ντινέ-Λες καν. Ο Σαούλ πακιάλας ότι ο Ιουδαίοι συνεχίνενας τι υπηρετίνεν ι Ντεβλές με το σωστός τρόπος, οτθάρ τζάλας κόντρα κο Χριστιανοί. Αλλά εκ ντιβές, ο αναστημέ Ιησούς, σο αμντίνελας-λες μουλό ο Σαούλ, κερντάς λέσαρ λάφι κατά ουρανός. Σο κερντάς ο Σαούλ; Δεχτιντάς χαράσαρ ι βοήθεια σο ντινάς-λες ο Χριστιανός μαθητής Ανανίας. Η Γραφή βακερέλα: «Σοράν ιστίντιλο ντα μπολντιλό». (Πράξεις 9:​17, 18· Γαλάτες 1:​14) Πιο σοράν, σαρέ σικλιλέ-λες σαρ απόστολος Παύλος. Ντικχάσα ότι μόλις ο Σαούλ αγαντάς ότι ο Ντεβέλ χρησιμοποιήνελας ι Ιησούς για τι κερέλ πο θέλημας, μπολντιλό χωρίς τι χασαρέλ χρόνος.​—Διαβάνεν Πράξεις 22:​12-16.

11. (α) Σόσκε αποφασίνενα τι μπολντιόν μπουτ τζενέ σο κερένα μελέτη αμαρέ ντιβεσέντε; (β) Σαρ νιωθίνασα κάνα εκ τζενό μπολντιόλα;

¹¹ Ο ίδιος αβέλα-πες αμαρέ ντιβεσέντε-ντα μπουτέ τζενέντζαρ σο κερένα μελέτη, είτε ισί τερνέ είτε πφουρέ. Μανγκένα οντουλά σο βακερέλα η Γραφή ντα τθερένα εμπιστοσύνη λέντε, οτθάρ αφιερώνενα-πες κο Ιεχωβά αντράλ πουμαρέ γκίσταρ ντα μπολντιόνα. Κι πραγματικότητα, η ομιλία ι μπολιμάσκι ισί πάντα κάτι ξεχωριστός σο αβέλα-πες κο συνελεύσεις. Ο Μάρτυρες ι Ιεχωβάσκε χαιρίνενα κάνα οντουλά σο κερένα μελέτη δεχτίνενα ι αλήθεια ντα αποφασίνενα τι μπολντιόν. Ο νταντά ντα ο νταγιά χαιρίνενα μπουτ κάνα λένγκε τσσαβέ κερένα-λες ανταβά. Κο υπηρεσιακός μπρες 2017, πιο μπουτ από 284.000 νεβέ τζενέ μπολντιλέ για τι σικαβέν ότι αφιερωντέ πουμαρί ζωή κο Ιεχωβά. (Πράξεις 13:​48) Ισί ξεκάθαρος ότι αγαντέ καζόμ σημαντικός ισί ι Χριστιανόνγκε τι μπολντιόν. Αλλά σο έπρεπε τι κερέν πριν τι μπορίνεν τι μπολντιόν;

12. Σο πρέπει τι κερέν οντουλά σο κερένα μελέτη πριν τι μπολντιόν;

¹² Πριν τι μπολντιόν, οντουλά σο κερένα μελέτη πρέπει τι σικλιόν ι αλήθεια ι Ντεβλέσκε, ο σκοπός σο τθερέλα ι τζενένγκε ντα ι πφουβιάκε, ντα οντουλά σο κερντάς για τι σώνελ ι τζενέν. (1 Τιμόθεο 2:​3-6) Σοράν, πρέπει τι αρχίνεν τι τθερέν πίστη, σο κα βοηθίνελ-λεν τι ντεν καν κι Ντεβλέσκε νόμοι ντα τι τσσιναβέν τι κερέν σο μισίνελα. (Πράξεις 3:​19) Ανταβά ισί σημαντικός, σόσκε ο Ιεχωβά να κα δεχτίνελ εκχέ τζενές σο αφιερώνελα-πες λέστε ντα συνεχίνελα τι κερέλ ο πράγματα σο μισίνελα. (1 Κορινθίους 6:9, 10) Αλλά πρέπει τι αβέν-πες γιαβερά-ντα πράγματα. Οντουλά σο μανγκένα τι αφιερώνεν πουμαρί ζωή κο Ιεχωβά πρέπει τι τζαν κο συναθροίσεις ντα τι τθερέν ι συνήθεια τι βακερέν ο λατσσέ αμπέρια ντα τι σικλιαρέν ι γιαβερέν. Ανταβά πρέπει τι κερέν-λες σαρέ οντουλά σο μανγκένα τι ακολουθίνεν ι Χριστός. (Πράξεις 1:8) Εκ τζενό σο κερέλα μελέτη πρέπει  πρώτα τι κερέλ σαρέ ανταλά πράγματα. Σοράν, μπορίνελα τι αφιερώνελ-πες κο Ιεχωβά εκχέ προσευχιάσαρ σο κα κερέλ κορκορό ντα μετά τι μπολντιόλ.

13. Κάνα σικλιαράσα ι γιαβερέν, σόσκε πρέπει τι ντας-αμέν γκοντί ότι πρέπει τι μπολντιόν για τι αβέν αληθινοί Χριστιανοί;

¹³ Κάνα βοηθίνασα αμαρέ τσσαβέν ντα γιαβερέν σο κεράσα-λεν μελέτη τι κερέν ανταλά σημαντικά πράγματα, πρέπει τι ντας-αμέν γκοντί ότι οντουλά σο μανγκένα τι αβέν αληθινοί μαθητές ι Ιησούσκε πρέπει τι μπολντιόν. Σοράν, να κα σακιντίνας τι βακεράς λένγκε κο σωστές στιγμές καζόμ σημαντικός ισί τι αφιερώντιβεν ντα τι μπολντιόν. Μανγκάσα αμαρέ τσσαβέ ντα ο γιαβερά σο κερένα μελέτη τι συνεχίνεν τι κερέν πρόοδος ντα τι μπολντιόν!

14. Σόσκε να πιένασα καεκχές τι μπολντιόλ;

¹⁴ Καέκ δεν πρέπει τι πιένελ ή τι αναγκάνελ εκχέ τσσαβές ή εκχές σο κερέλα μελέτη τι μπολντιόλ. Ο Ιεχωβά να αναγκάνελα καεκχές τι υπηρετίνελ-λες. (1 Ιωάννη 4:8) Κάνα σικλιαράσα ι γιαβερέν, πρέπει τι βοηθίνας-λεν τι αγαβέν καζόμ σημαντικός ισί λένγκε τι τθερέν προσωπική φιλία ι Ιεχωβάσαρ. Σοράν, άμα εκ τζενό σο κερέλα μελέτη εκτιμίνελα μπαγιά σο γνωριντάς ι αλήθεια ι Ντεβλέσκε ντα μανγκέλα μπαγιά τι κερέλ σαρέ οντουλά σο πρέπει τι κερέν ο αληθινοί Χριστιανοί, κα μανγκέλ τι μπολντιόλ.​—2 Κορινθίους 5:​14, 15.

15, 16. (α) Πρέπει εκ τζενό τι τθερέλ εκ συγκεκριμέ ηλικία για τι μπολντιόλ; Εξηγίνεν. (β) Σόσκε πρέπει τι μπολντιόλ σαρ Μάρτυρας ι Ιεχωβάσκο εκ τζενό σο κερέλα μελέτη ατζέ-ντα άμα μπολντιλόας εκχέ γιαβερέ θρησκειάτε;

¹⁵ Εκ τζενό να χρειαζίντιβελα τι μπολντιόλ εκχέ συγκεκριμέ ηλικιάτε. Σαρέ ισινάμ διαφορετικοί, ντα μερικά τζενέ σο  κερένα μελέτη προχωρίνενα πιο σουγκό γιαβερένταρ. Μπουτ τζενέ μπολντιόνα χουρντέ ντα ατσσόνα πιστοί κο Ιεχωβά καζόμ μπαριόνα. Γιαβερά ισί πιο μπαρέ κάνα σικλιόνα ι αλήθεια ι Γραφιάκι ντα μπολντιόνα. Ντα μερικοί ισί πιο μπουτ από 100 μπρεσένγκε!

¹⁶ Εκ τζενί σο κερέλας μελέτη μπολντιλίας διάφορε θρησκειέντε. Οτθάρ, πουτσλάς ι πφενιά σο κερέλας μελέτη λάσαρ αν έπρεπε τι μπολντιόλ πάλι. Η πφεν σικαντάς λάκε μερικά εδάφια σο απαντίνενας λάκε ερωτησιάτε. Μόλις η τζενί αγαντάς σο βακερέλα η Γραφή τι κεράς, μπολντιλί παρόλο σο ισινέ σχεδόν 80 μπρεσένγκι. Σο σικλιάσα ανταλέ παραδειγμάσταρ; Ο Ιεχωβά κα δεχτίνελ αμαρό μπολιπέ σάντε άμα τζανάσα μπαγιά λέσκο θέλημας. Άρα, ατζέ-ντα άμα μπολντιλάμας εκχέ γιαβερέ θρησκειάτε, πρέπει τι μπολντιάς σαρ Μάρτυρες ι Ιεχωβάσκε.​—Διαβάνεν Πράξεις 19:​3-5.

17. Σο πρέπει τι σκεφτίνελ εκ τζενό ο ντιβές σο μπολντιόλα;

¹⁷ Ο ντιβές σο μπολντιόλα εκ τζενό, χαιρίνασα μπουτ. Όμως, οντουβά ντιβές πρέπει τι σκεφτίνας προσεκτικά σο σημασία τθερέλα η αφιέρωση ντα ο μπολιπέ. Για τι κεράς σαρέ οντουλά σο πρέπει τι κερέν ο αληθινοί Χριστιανοί, πρέπει τι προσπαθίνας μπουτ. Ο μαθητές ι Ιησούσκε δεν πρέπει τι «τζουβντιόν . . . πουμαρέ νεαυτόσκε αλλά οντουλέσκε σο μουλό λένγκε ντα αναστισάλο».​—2 Κορινθίους 5:​15· Ματθαίος 16:24.

18. Καλά ερωτήσεις κα ντικχάς κο γιαβέρ μάθημας;

¹⁸ Σαρ σικλιλάμ ανταλέ μαθημάστε, η απόφαση τι αβάς αληθινοί Χριστιανοί ισί μπουτ σημαντική. Οτθάρ η ντάι ι Μαριάκι κερντάς πι νεαυτόσκε ο ερωτήσεις σο βακερντάμ κι αρχή. Αν ισινάν ντατ ή ντάι, μπορεί τι πουτσλάν-τουτ: “Ισί μο τσσαβό έτοιμος τι μπολντιόλ; Τζανέλα μπουτ πράγματα ι Ιεχωβάσκε για τι αφιερώνελ-πες λέστε; Μήπως πρέπει τι σπουδάνελ ντα τι αρακχέλ εκ μπουτί πριν τι μπολντιόλ; Σο κα αβέλ-πες άμα κα μπολντιόλ ντα σοράν κα κερέλ εκ μπαρί αμαρτία;” Κα συζητίνας ανταλά ερωτήσεις κο γιαβέρ μάθημας ντα κα σικλιάς σαρ μπορίνενα ο Χριστιανοί νταντά ντα νταγιά τι τθερέν σωστή άποψη ι μπολιμάσκε.