ΣΑΡΕ μανγκάσα τι βακερέν ο γιαβερά ότι τθεράσα αγαθότητα ή γιαβέρτουλους ότι ισινάμ λατσσέ τζενέ. Όμως, αμαρέ ντιβεσέντε ισί μπουτ δύσκολος τι αβάς λατσσέ τζενέ. Μπουτ τζενέ ισί «ντουσμάνια ι λατσσιμάσκε». (2 Τιμ. 3:3) Να ντένα καν κο κανόνες κι Ιεχωβάσκε ντα βακερένα ότι «ο λατσσιπέ ισί γκεραλιπέ ντα ο γκεραλιπέ ισί λατσσιπέ». (Ησ. 5:​20) Επίσης, ο μπέτι πράγματα σο νακχλάμ ντα αμαρί ατέλεια δυσκολίνενα-αμέν τι αβάς λατσσέ τζενέ. Οτθάρ, μπορεί τι νιωθίνασα σαρ η Αν * σο υπηρετίνελα ι Ιεχωβάς μπουτ μπρεσά αλλά βακερέλα: «Ισί μάνγκε μπουτ δύσκολος τι πακιάβ ότι μπορίναβα τι αβάβ λατσσί τζενί».

Σο σουκάρ ισί τι τζανάς ότι σαρέ μπορίνασα τι τθεράς αγαθότητα! Η αγαθότητα αβέλα κατά άγιος πνεύμας ι Ντεβλέσκο, ντα ανταβά πνεύμας ισί πιο ζουρανό κατά ντουνιάς, κατά γιαβερά τζενέ ντα αμαρέ νεαυτόσταρ. Κα ντικχάς ι αγαθότητα πιο λατσσές ντα κα σικλιάς σαρ μπορίνασα τι τθεράς ανταγιά ιδιότητα.

Χάνικ λαφίντζαρ, αγαθότητα μανγκέλα τι βακερέλ τι αβέλ κάποιος λατσσό, πάκι κι Ντεβλέσκε γιακχά ντα μα τι τθερέλ ιτς ο γκεραλιπέ αντρέ πέστε. Εκ ασακό τζενό ρόντελα πάντα σαρ τι βοηθίνελ ι γιαβερέν ντα κερέλα λατσσιπέ λένγκε.

Μπορεί τι ντικχλέν τζενέν σο κερένα λατσσέ πράγματα πουμαρέ φαμιλιάκε ντα πουμαρέ αμαλένγκε, αλλά ερεσέλα σάντε ανταβά για τι αβάς λατσσέ κι Ντεβλέσκε γιακχά; Ισί μπαγιά ότι ναστί αβέλα-πες τι αβάς συνέχεια λατσσέ, σόσκε η Γραφή βακερέλα ότι «να υπαρχίντιβελα δίκαιος τζενό κι πφουβ σο κερέλα πάντα ο λατσσιπέ ντα να αμαρτίνελα ποτές». (Εκκλ. 7:​20) Ο απόστολος Παύλος βακερντάς: «Τζανάβα ότι αντρέ μάντε, δηλαδή μι σωμάστε, νανέ τίποτα λατσσό». (Ρωμ. 7:​18) Οτθάρ, άμα μανγκάσα τι τθεράς ανταγιά ιδιότητα χρειαζίντιβελα τι σικλιάς-λα κατά Ιεχωβά, σο λέσταρ αβέλα η αγαθότητα.

Ο Ιεχωβά Ντεβέλ βακερέλα σο ισί λατσσό. Η Αγία Γραφή βακερέλα: «Τούι [Ιεχωβά] ισινάν λατσσό ντα οντουλά σο κερέσα ισί λατσσέ. Σίκλιαρ-μαν το νόμους». (Ψαλμ. 119:​68) Ντικχέν ανταλέ εδαφιόστε ντούι πράγματα για την αγαθότητα ι Ιεχωβάσκι.

Ο Ιεχωβά ισί λατσσό. Τίποτα ναστί κερέλα ι Ιεχωβάς μα τι τθερέλ αγαθότητα. Ντικχέν σο αβιλό-πες κάνα ο Ιεχωβά βακερντάς κο Μωυσής: «Κα νακχάβ ανγκλά-τούταρ ντα κα μπορίνες τι ντικχές καζόμ λατσσό ισινόμ». Καζόμ νακχέλας η δόξα ι Ιεχωβάσκι, ντα σικάντιλο καζόμ λατσσό ισί, ο Μωυσής ασουντάς ακαλά λάφια: «Ιεχωβά, Ιεχωβά, Ντεβέλ σο σικαβέλα έλεος ντα τζιτζίνελα ι γιαβερένγκε, σο να χολιάνελα εύκολα, ντα ισί πφερντό αφοσιωμέ αγάπη ντα αλήθεια, σο σικαβέλα αφοσιωμέ αγάπη χιλιάδες τζενένγκε, σο συγχωρίνελα λάθη ντα αμαρτίες, αλλά σίγουρα κα τιμωρίνελ οντουλές σο φταίνελα». (Έξοδ. 33:​19· 34:6, 7) Άρα, αγαβάσα ξεκάθαρα ότι σο-ντα κερέλα ο Ιεχωβά ντα σαρέ λέσκε ιδιότητες σικαβένα ότι ισί λατσσό. Παρόλο σο ο Ιησούς ισινέ ο πιο λατσσό τζενό σο νακχλό κατά πφουβ, βακερντάς: «Σάντε ο Ντεβέλ ισί λατσσό, καέκ γιαβέρ».​—Λουκ. 18:​19.

Οντουλά σο κερέλα ο Ιεχωβά ισί λατσσέ. Σο-ντα κερέλα ο Ντεβέλ ισί λατσσό. «Ο Ιεχωβά ισί λατσσό σαριλέντζαρ, ντα λέσκο έλεος ντικχίντιβελα σαρέ  οντουλέντε σο κερέλα». (Ψαλμ. 145:9) Ο Ιεχωβά ισί λατσσό ντα να ξεχωρίνελα ι τζενέν, οτθάρ ντέλα σαριλέντε ζωή ντα οντουλά σο χρειαζίντιβενα για τι ατσσόν τζουβντέ. (Πράξ. 14:​17) Επίσης, λέσκι αγαθότητα ντικχίντιβελα κάνα συγχωρίνελα-αμέν. Ο ψαλμωδός βακερντάς: «Τούι, Ιεχωβά, ισινάν λατσσό ντα έτοιμος τι συγχωρίνες». (Ψαλμ. 86:5) Μπορίνασα τι αβάς σίγουροι ότι «ο Ιεχωβά να κα γκεραβέλ τίποτα λατσσό οντουλένταρ σο πφιρένα σαρέ κο πράγματα σωστά».​—Ψαλμ. 84:11.

Κερντιλάμ τι μοιάζας κο Ντεβέλ, οτθάρ μπορίνασα τι αβάς λατσσέ τζενέ ντα τι κεράς ο λατσσιπέ. (Γέν. 1:​27) Αλλά ανταβά να κα αβέλ-πες χωρίς τι κεράς τίποτα. Ο Ιεχωβά βακερέλα αμένγκε ότι πρέπει τι σικλιάς τι κεράς οντουβά σο ισί λατσσό. (Ησ. 1:​17) Σαρ κα κεράς-λες ανταβά; Ντικχέν τριν τρόπους.

Πρώτον, μπορίνασα τι μανγκάς κατά Ντεβέλ άγιος πνεύμας, σο βοηθίνελα ι Χριστιανόν τι αβέν λατσσέ λέσκε γιακχίντε. (Γαλ. 5:​22) Βα, ο πνεύμας ι Ντεβλέσκο μπορίνελα τι βοηθίνελ-αμέν τι σικλιάς τι μανγκάς ο λατσσιπέ ντα τι μισίνας ο γκεραλιπέ. (Ρωμ. 12:9) Κι πραγματικότητα, η Γραφή σικαβέλα ότι ο Ιεχωβά κα κερέλ-αμέν «σταθερούς κάθε λατσσέ πραγμάστε ντα λαφίστε».​—2 Θεσ. 2:​16, 17.

Δεύτερον, πρέπει τι διαβάνας ο Λάφι ι Ντεβλέσκο. Καζόμ κεράσα-λες ανταβά, ο Ιεχωβά σικλιαρέλα-αμέν «σαρό ο ντρομ ι λατσσιμάσκο» ντα βοηθίνελα-αμέν τι κεράς «κάθε λατσσό πράγμας». (Παρ. 2:9· 2 Τιμ. 3:​17) Αμαρό γκι ισί σαρ εκ θησαυροφυλάκιος. Κάνα διαβάνασα ι Γραφή ντα σκεφτίνασα λατσσές οντουλά σο διαβάνασα, τσσουβάσα αντρέ αμαρέ γκίστε λατσσέ πράγματα, ντα ανταβά ισί σαρ τι πφεράσα αμαρό θησαυροφυλάκιος σημαντικέ πραγματέντζαρ σο κα βοηθίνεν-αμέν πιο σοράν.​—Λουκ. 6:​45· Εφεσ. 5:9.

Τρίτον, κεράσα ο πιο λατσσό σο μπορίνασα για “τι μοιάζας οντουλέντε σο ισί λατσσέ”. (3 Ιωάν. 11) Κι Γραφή αρακχάσα ασακέ λατσσέ παραδείγματα. Σίγουρα, ο πιο λατσσέ παραδείγματα ισί ο Ιεχωβά ντα ο Ιησούς. Μπορίνασα όμως τι σικλιάς γιαβερένταρ-ντα σο ισινέ λατσσέ. Ντούι τζενέ σο μπορεί τι αβέν αμαρέ γκοντιάτε ισί η Ταβιθά ντα ο Βαρνάβας. (Πράξ. 9:​36· 11:​22-24) Κα βοηθίντιβεν λένγκε παραδειγμάσταρ αν κα διαβάνεν σο βακερέλα η Γραφή λένγκε. Καζόμ διαβάνενα, ντικχέν σο κερντέ για τι βοηθίνεν ι γιαβερέν. Σκεφτίνεν σο μπορίνενα τι κερέν για τι βοηθίνεν τουμαρέ φαμιλιάτε ή τουμαρέ κχανγκιριάτε. Επίσης, ντικχέν σο λατσσέ πράγματα αβιλέ-πες κι Ταβιθά ντα κο Βαρνάβας επειδή ισινέ λατσσέ ι γιαβερέντζαρ. Ασακέ λατσσέ πράγματα κα αβέν-πες τουμένγκε-ντα.

Αμαρέ ντιβεσέντε-ντα ισί τζενέ σο κερένα οντουβά σο ισί λατσσό. Για παράδειγμας, ο πρεσβύτεροι κερένα μπουτ μπουτί κι κχανγκιρί ντα ισί “τζενέ σο  μανγκένα ο λατσσιπέ”. Μα μπιστρέν ι πιστέ πφενίν-ντα σο “σικλιαρένα κο γιαβερά οντουβά σο ισί λατσσό” οντουλέντζαρ σο βακερένα ντα κερένα. (Τίτο 1:8· 2:3) Εκ πφεν σο βακερένα λάκε Ρόσλιν βακερέλα: «Τθεράβα εκχέ αμαλινά σο κερέλα σο νακχέλα λάκε βαστέσταρ για τι βοηθίνελ ντα τι ενθαρρύνελ ι γιαβερέν κι κχανγκιρί. Σκεφτίνελα σο νακχένα ο γιαβερά ντα μπουτ φαρ κερέλα λένγκε χουρντέ δώρα ή κερέλα γιαβερά πράγματα για τι βοηθίνελ-λεν. Πακιάβα ότι ισί μπαγιά μπουτ λατσσί τζενί».

Ο Ιεχωβά βακερέλα πι λαόσκε τι “ρόντελ ι λατσσιμάσκε”. (Αμώς 5:​14) Άμα κα κεράς-λες ανταβά, κα μανγκάς οντουβά σο βακερέλα ο Ιεχωβά ότι ισί λατσσό ντα κα μανγκάς μπαγιά τι κεράς-λες.

Για τι αβάς λατσσέ, να χρειαζίντιβελα τι κεράς μπαρέ πράγματα ι γιαβερένγκε ή τι ντας-λεν πααλίς δώρα. Για παράδειγμας, για τι μπαριόλ εκ λουλούδι να τσσουβάσα λέσκε μπουτ πανί σάντε εκ φαρ, αλλά τσσουβάσα πιο χάνικ πανί μπουτ φαρ. Αντικάς αμέν-ντα σικαβάσα ότι ισινάμ λατσσέ κάνα κεράσα μπερεκέτι χουρντέ πράγματα για τι βοηθίνας ι γιαβερέν.

Η Γραφή βακερέλα αμένγκε τι αβάς «έτοιμοι» τι κεράς οντουβά σο ισί λατσσό. (2 Τιμ. 2:​21· Τίτο 3:1) Άμα ισινάμ τζανγκαντέ για τι ντικχάς σο νακχένα ο γιαβερά, μπορεί τι αρακχάς τρόπους τι κεράς λένγκο γκι “λένγκε λατσσιμάσκε, για τι ντας-λεν δύναμη”. (Ρωμ. 15:2) Ανταβά μπορεί τι αβέλ-πες άμα κα ντας-λεν κάτι σο τθεράσα. (Παρ. 3:​27) Κα μπορίναας τι καλίνας εκχέ τζενές για τι χας ή για τι κεράς παρέα ντα τι ενθαρρύνας ο εκ ι γιαβερές. Άμα τζανάσα ότι κάποιος ισί νασφαλό, μπορίνασα τι μπουτσσαβάς λέσκε εκ κάρτα, τι τζας τι ντικχάς-λες ή τι λας-λες εκ τηλέφωνος. Βα, τθεράσα μπουτ ευκαιρίες τι κεράς «λατσσό λάφι σο ντέλα ζορ ι γιαβερέν κάνα ισί ανάγκη, για τι κερέλ λατσσιπέ οντουλένγκε σο ασουνένα».​—Εφεσ. 4:29.

Σαρ ο Ιεχωβά, αντικάς αμέν-ντα μανγκάσα τι κεράς λατσσέ πράγματα σαριλέντε. Οτθάρ, να ξεχωρίνασα ι τζενέν. Εκ μπουτ λατσσό τρόπος για τι κεράς-λες ανταβά ισί τι βακεράς ο λατσσέ αμπέρια ι Βασιλειάκε σαριλέντε. Σαρ βακερντάς ο Ιησούς, μανγκάσα τι κεράς ο λατσσιπέ ατζέ-ντα οντουλέντε σο μισίνενα-αμέν. (Λουκ. 6:​27) Νανέ ποτές λάθος τι αβάς λατσσέ ντα τι κεράς ο λατσσιπέ κο γιαβερά, επειδή «να υπαρχίντιβελα νόμος σο τζάλα κόντρα ανταλέ πραγματέντε». (Γαλ. 5:​22, 23) Άμα ισινάμ λατσσέ ατζέ-ντα κάνα ο τζενέ τζάνα αμέντζαρ κόντρα ή τθεράσα προβλήματα, μπορεί τι ταρτίνας ι γιαβερέν κι αλήθεια ντα τι ντας δόξα ι Ντεβλές.​—1 Πέτρ. 3:​16, 17.

«Ο λατσσό τζενό ευλογίντιβελα οντουλένγκε σο κερέλα». (Παρ. 14:​14) Καλά ισί μερικές ευλογίες; Κάνα ισινάμ λατσσέ ι γιαβερέντζαρ, κα αβέν βον-ντα λατσσέ αμέντζαρ. (Παρ. 14:​22) Αλλά ατζέ-ντα άμα ο γιαβερά να κα κερέν-λες ανταβά, αμέν πρέπει τι συνεχίνας τι αβάς λατσσέ λέντζαρ. Αντικάς, μπορεί τι κοβλιόν ντα τι συμπεριφερίντιβεν αμένγκε πιο λατσσές.​—Ρωμ. 12:​20, υποσ.

Μπουτ πφραλά ντα πφενιά βακερένα ότι βοηθίντιλε επειδή κερντέ λατσσέ πράγματα ντα τσσιναντέ τι κερέν γκεραλέ πράγματα. Η Νάνσι βακερέλα: «Να τθεράβας γκοντί, κεράβας λουμνικανέ πράγματα ντα να σεβάναβας ι γιαβερέν. Όμως, καζόμ σικλιάβας ο κανόνες ι Ντεβλέσκε ντα ντάβας-λεν καν, αβάβας πιο ευτυχισμέ. Ακανά σεβάναβα μο νεαυτός».

Ο πιο σημαντικός λόγος τι τθεράς αγαθότητα ισί ότι αντικάς ντάσα χαρά κο Ιεχωβά. Ατζέ-ντα άμα μπουτ τζενέ να ντικχένα οντουλά σο κεράσα, ο Ιεχωβά ντικχέλα-λεν. Τζανέλα σο-ντα λατσσό κεράσα ντα σκεφτίνασα. (Εφεσ. 6:7, 8) Καβά ισί ο αποτέλεσμας; «Ο λατσσό τζενό λέλα ι ευλογία ι Ιεχωβάσκι». (Παρ. 12:2) Μανγκάσα τι συνεχίνας τι τθεράς αγαθότητα. Ο Ιεχωβά ντέλα πο λάφι ότι κα τθερέλ «δόξα, τιμή ντα ειρήνη ο κάθε τζενό σο κερέλα ο λατσσιπέ».​—Ρωμ. 2:10.