1. Σόσκε μανγκάσα τι αβάς τζενέντζαρ σο ενδιαφερίντιβενα οντουλένγκε σο νιωθίνασα ντα μανγκένα αμαρό λατσσιπέ σαρ βακερέλα κι 1 Πέτρου 3:8;

ΜΑΝΓΚΑΣΑ τι αβάς τζενέντζαρ σο ενδιαφερίντιβενα οντουλένγκε σο νιωθίνασα ντα μανγκένα αμαρό λατσσιπέ. Ανταλά τζενέ προσπαθίνενα τι αγαβέν σο σκεφτίνασα ντα σαρ νιωθίνασα. Ντικχένα σο τθεράσα ανάγκη ντα ντένα-αμέν βοήθεια, μπάζιμα ατζέ-ντα πριν τι μανγκάς-λα λένταρ. Εκτιμίνασα ι τζενέν σο “αγαβένα-αμέν”. *​—Διαβάνεν 1 Πέτρου 3:8.

2. Σόσκε μπουτ φαρ νανέ εύκολος τι τζιτζίνας ι γιαβερένγκε;

² Σαρ Χριστιανοί, σαρέ μανγκάσα τι τζιτζίνας ι γιαβερένγκε, ή γιαβέρτουλους τι αγαβάς-λεν. Αλλά ισί μπαγιά ότι μπουτ φαρ νανέ εύκολος τι κεράς-λες ανταβά. Σόσκε; Εκ λόγος ισί ότι ισινάμ ατελείς. (Ρωμ. 3:​23) Η ατέλεια κερέλα-αμέν τι σκεφτίνας πιο μπουτ αμαρό νεαυτός. Οτθάρ, πρέπει τι κεράς σο νακχέλα αμαρέ βαστέσταρ για τι σκεφτίνας ι γιαβερέν. Επίσης, ο τρόπος σο μπαριλάμ ντα οντουλά σο νακχλάμ κι ζωή μπορεί τι δυσκολίνεν-αμέν τι τζιτζίνας ι γιαβερένγκε. Ντα κα μπορίναας τι επηρεάντιβας κατά τζενέ ντονταλάι αμένταρ. Ανταλέ τελευταίε ντιβεσέντε, μπουτ τζενέ να ενδιαφερίντιβενα για το αισθήματα ι γιαβερένγκε. “Μανγκένα σάντε πουμαρό νεαυτός”. (2 Τιμ. 3:1, 2) Σο κα βοηθίνελ-αμέν τι νακχαβάς ανταλά δυσκολίες σο να μουκχένα-αμέν τι σικαβάς ενδιαφέρον για το αισθήματα ι γιαβερένγκε;

3. (α) Σαρ κα αγαβάς πιο λατσσές ι γιαβερέν; (β) Σο κα ντικχάς ανταλέ μαθημάστε;

³ Κα αγαβάς πιο λατσσές ι γιαβερέν, άμα μοιάζασα κο Ιεχωβά Ντεβέλ ντα λέσκε Τσσαβέστε, κο Ιησούς Χριστός. Ο Ιεχωβά  Ντεβέλ ισί πφερντό αγάπη ντα ντέλα ο πιο λατσσό παράδειγμας για τι σικαβάς ενδιαφέρον κο γιαβερά. (1 Ιωάν. 4:8) Ο Ιησούς μοιάζελα τέλεια πι Νταντέστε. (Ιωάν. 14:9) Κάνα ισινέ κι πφουβ, σικαντάς σαρ μπορίνελα εκ τζενό τι τζιτζίνελ ι γιαβερένγκε. Ανταλέ μαθημάστε, κα ντικχάς πρώτα σαρ ο Ιεχωβά ντα ο Ιησούς σικαντέ ενδιαφέρον για το αισθήματα ι γιαβερένγκε. Σοράν κα ντικχάς σαρ κα μοιάζας λέντε.

4. Σαρ σικάντιβελα κο Ησαΐας 63:​7-9 ότι ο Ιεχωβά ενδιαφερίντιβελα για το αισθήματα πι υπηρετόνγκε;

⁴ Η Γραφή σικλιαρέλα ότι ο Ιεχωβά ενδιαφερίντιβελα για το αισθήματα πι υπηρετόνγκε. Για παράδειγμας, ντεν-τουμέν γκοντί σαρ νιωθίνελας ο Ιεχωβά κάνα ο Ισραηλίτες τθερένας προβλήματα. Ο Λάφι ι Ντεβλέσκο βακερέλα: «Σαρέ κο στεναχώριες σο τθερένας, βοβ στεναχωρίντιβελας». (Διαβάνεν Ησαΐας 63:​7-9) Πιο σοράν, αντράλ κατά προφήτης Ζαχαρίας, ο Ιεχωβά βακερντάς ότι ο μπέτι πράγματα σο κερένα ο τζενέ λέσκε λαόστε, ισί σαρ τι κερένα-λεν λέσκε. Ο Ιεχωβά βακερντάς πι υπηρετόνγκε: «Κον πειράνελα-τουμέν πειράνελα ο μιρικλό μι γιακχάκο». (Ζαχ. 2:8) Να σικαβέλα μπουτ σουκάρ ανταβά παράδειγμας καζόμ πφαμπόλα ο Ιεχωβά πι λαόσκε;

5. Σικαβέν εκχέ παραδειγμάσαρ σο κερέλας ο Ιεχωβά για τι βοηθίνελ πι υπηρετόν σο τσσίντενας ταλαιπωρία.

⁵ Ο Ιεχωβά να τζιτζίνελα σάντε πι υπηρετόνγκε σο νακχένα προβλήματα, αλλά κερέλα πράγματα-ντα για τι βοηθίνελ-λεν. Για παράδειγμας, κάνα ο Ισραηλίτες τσσίντενας ταλαιπωρία σαρ σκλάβοι κι Αίγυπτος, ο Ιεχωβά αγαβέλας λένγκι ντουκχ ντα μανγκλάς τι λοκχιαρέλ-λεν. Ο Ιεχωβά βακερντάς κο Μωυσής: «Ντικχλόμ σο τσσίντελα μο λαός . . . ντα ασουντόμ ότι ντένα βίκος . . . Τζανάβα λατσσές σο τσσίντενα. Κα γουλιάβ για τι σώναβ-λεν κατά Αιγυπτιόνγκο βας». (Έξοδ. 3:7, 8) Ο Ιεχωβά τζιτζίνελας πι λαόσκε, οτθάρ ελευθερωντάς-λεν κατά σκλαβιά. Μπουτ μπρεσά πιο σοράν, κο Υποσχεμέ Τθεμ, ο Ισραηλίτες τθερένας ντουσμανίν σο τζάνας λέντζαρ κόντρα. Σο κερέλας ο Ιεχωβά; «Τζιτζίνελας λένγκε κάνα ασουνέλας-λεν τι τσσίντεν γκίσαρ ιτιρί οντουλένταρ σο ζορισκιαρένας-λεν ντα οντουλένταρ σο τσσιντικιαρένας-λεν». Ατθέ-ντα, ο Ιεχωβά  μανγκέλας τι βοηθίνελ πι υπηρετόν σόσκε τζιτζίνελας λένγκε. Μπουτσσαβέλας κριτέν για τι σώνεν ι Ισραηλιτέν λένγκε ντουσμανίνταρ.​—Κριτ. 2:​16, 18.

6. Βακερέν εκ παράδειγμας σο σικαβέλα σαρ ενδιαφερίντιβελας ο Ιεχωβά για το αισθήματα εκχέ τζενέσκε σο τθερέλας λάθος τρόπος σκέψης.

⁶ Ο Ιεχωβά ενδιαφερίντιβελα για το αισθήματα πι υπηρετόνγκε, ατζέ-ντα κάνα λένγκο τρόπος σκέψης ισί λάθος. Ντεν-τουμέν γκοντί ι Ιωνάς. Ο Ντεβέλ μπουτσσαντάς οντουλέ προφητής για τι βακερέλ κο Νινευίτες ότι κα καταστραφίνελας-λεν. Κάνα βον μετανιωσάλε, ο Ντεβέλ τραμπιντάς μα τι καταστραφίνελ-λεν. Ο Ιωνάς όμως να χαιρισάλο ανταλέσαρ. «Χολιασάλο μπουτ» σόσκε η προφητεία σο βακερντάς ότι η Νινευή κα καταστραφίντιβελας, να νικίστιλι μπαγιά. Αλλά ο Ιεχωβά κερντάς υπομονή ι Ιωνάσαρ ντα βοηθιντάς-λες τι λατσσαρέλ πο τρόπος σκέψης. (Ιωνάς 3:​10–4:​11) Τελικά ο Ιωνάς αγαντάς οντουβά σο σικλιαρέλας-λες ο Ιεχωβά, ντα Βοβ τσσουντάς-λες τι γραφίνελ ανταγιά ιστορία αμαρέ λατσσιμάσκε.​—Ρωμ. 15:4. *

7. Σο σικαβέλα αμένγκε ο τρόπος σο συμπεριφερίντιβελα ο Ιεχωβά πι υπηρετόνγκε;

⁷ Ο τρόπος σο συμπεριφερίντιβελα ο Ιεχωβά πι λαόσκε σικαβέλα αμένγκε ότι τζιτζίνελα πι υπηρετόνγκε. Τζανέλα αμαρί ντουκχ ντα σο τσσίντελα ο κάθε εκ αμένταρ. Ο Ιεχωβά “τζανέλα μπαγιά ο γκι ι τζενέσκο”. (2 Χρον. 6:​30) Αγαβέλα σαρέ οντουλά σο τθεράσα αμαρέ γκοντιάτε ντα αμαρέ γκίστε ντα καλά πράγματα ναστί κεράσα. Ντα “να κα μουκχέλ-αμέν τι δοκιμάντιβας πιο μπουτ οντουλέσταρ σο αντιχίνασα”. (1 Κορ. 10:​13) Σο μπαρί παρηγοριά ντένα-αμέν ανταλά λάφια!

8-10. Καλά πράγματα μπορεί τι βοηθιντέ ι Ιησούς τι πφαμπόλ ι γιαβερένγκε;

⁸ Σαρ τζενό κι πφουβ, ο Ιησούς πφαμπόλας μπουτ ι γιαβερένγκε. Ντικχέν τριν κατά πράγματα σο βοηθιντέ-λες τι κερέλ-λες ανταβά. Πρώτον, σαρ βακερντάμ πιο τζανγκλέ, ο Ιησούς μοιάζελα τέλεια πι Νταντέστε. Σαρ πο Ντατ, ο Ιησούς-ντα μανγκέλας ι τζενέν. Χαιρίνελας σο βοηθιντάς ι Ιεχωβάς τι κερέλ αζόμ πράγματα, αλλά ατζέ πιο μπαρί χαρά αρακχέλας κο τζενέ. (Παρ. 8:​31) Η αγάπη κερέλας-λες τι ενδιαφερίντιβελ για το αισθήματα ι γιαβερένγκε.

⁹ Δεύτερον, σαρ ο Ιεχωβά, ο Ιησούς-ντα ντικχέλας σο τθερένας ο τζενέ αντρέ κο γκι. Μπορίνελας τι αγαβέλ σόσκε κερένας κάποια πράγματα ντα σο νιωθίνενας. (Ματθ. 9:4· Ιωάν. 13:​10, 11) Κάνα ντικχέλας τζενέν σο τθερένας ντουκχ πουμαρέ γκίστε, πφαμπόλας λένγκε ντα οτθάρ λοκχιαρέλας λένγκο γκι.​—Ησ. 61:1, 2· Λουκ. 4:​17-21.

¹⁰ Τρίτον, ο Ιησούς νακχλάς μερικά προβλήματα σο τθερένας ο τζενέ. Για παράδειγμας, ο Ιησούς μάλλον μπαριλό εκχέ τσορορέ φαμιλιάτε. Κερέλας μπουτί πι μαμοσολόστε, κο Ιωσήφ, ντα σικλιλό τι κερέλ σκληρή μπουτί πι βαστέντζαρ. (Ματθ. 13:​55· Μάρκ. 6:3) Λογικά ο Ιωσήφ μουλό καζόμ ο Ιησούς ισινέ ατζέ κι πφουβ. Οτθάρ αγαβάσα ότι ο Ιησούς μάλλον νιωσάλο ι ντουκχ σο ανέλα ο μεριπέ εκχέ αγαπημέ τζενέσκο. Ντα τζανέλας σαρ ισί τι τθερές τζενέν σο να πακιάνα ο ίδια πράγματα τούσαρ. (Ιωάν. 7:5) Ανταλά πράγματα αλλά γιαβερά-ντα μάλλον βοηθιντέ ι Ιησούς τι αγαβέλ ο προβλήματα ντα ο αισθήματα ι τζενένγκε.

11. Κάνα ντικχίντιβελας ατζέ πιο λατσσές ο ενδιαφέρον ι Ιησούσκο; Εξηγίνεν. (Ντικχ ι φωτογραφία κι ανγκλαϊνί σελίδα)

¹¹ Ο ενδιαφέρον ι Ιησούσκο ντικχίντιβελας ατζέ πιο λατσσές κάνα κερέλας θαύματα.  Ο Ιησούς να κερέλας θαύματα σάντε επειδή έπρεπε. “Τζιτζίνελας” ι τζενένγκε σο τσσίντενας ταλαιπωρία. (Ματθ. 20:​29-34· Μάρκ. 1:​40-42) Για παράδειγμας, σκεφτίνεν σαρ νιωσάλο κάνα λιντάς εκχέ κασουκές ντουρ κατά τζενέ για τι κερέλ-λες λατσσές ή κάνα τζουβντιαρντάς ι χηράκε τσσαβές. (Μάρκ. 7:​32-35· Λουκ. 7:​12-15) Ο Ιησούς τζιτζισάλο οντουλέ τζενένγκε ντα μανγκέλας τι βοηθίνελ-λεν.

12. Σαρ σικάντιβελα κο Ιωάννης 11:​32-35 ότι ο Ιησούς τζιτζισάλο ι Μαρθάκε ντα ι Μαριάκε;

¹² Ο Ιησούς τζιτζισάλο ι Μαρθάκε ντα ι Μαριάκε. Κάνα ντικχλάς ότι ισινέ μπουτ στεναχωριμέ σο μουλό λένγκο πφραλ, ο Λάζαρος, «ο Ιησούς δακρυσάλο». (Διαβάνεν Ιωάννης 11:​32-35) Να ροντάς απλά επειδή χασαρντάς εκχέ λατσσέ αμαλές. Τζανέλας ότι κα τζουβντιαρέλας ι Λαζαρός. Ο Ιησούς ροντάς σόσκε αγαβέλας ντα νιωθίνελας ι ντουκχ πι αγαπημέ αμαλένγκι.

13. Σόσκε λάσα ζορ σο τζανάσα ότι ο Ιησούς αγαβέλας ι γιαβερέν;

¹³ Ισί μπουτ λατσσό τι τζανάς ότι ο Ιησούς αγαβέλας ι γιαβερέν. Αμέν να ισινάμ τέλειοι σαρ ισινέ βοβ, αλλά σίγουρα μανγκάσα-λες σόσκε τζιτζίνελας ι τζενένγκε. (1 Πέτρ. 1:8) Λάσα ζορ σο τζανάσα ότι ακανά κυβερνίνελα σαρ Βασιλιάς κι Ντεβλέσκι Βασιλεία. Ατζεχάνικ κα νασκιαρέλ σαρέ ο βάσανα. Ο Ιησούς, επειδή ισινέ βοβ-ντα τζενό, μπορίνελα πιο λατσσές σαριλένταρ τι βοηθίνελ ι τζενέν τι νασκιαρέν ι ντουκχ σο αντάς λένγκε η κυβέρνηση ι Μπενγκέσκι. Μπαγιά, ισί μπουτ σουκάρ τι τθεράς εκχέ Βασιλιάς σο μπορίνελα “τι αγαβέλ αμαρέ αδυναμίες”.​—Εβρ. 2:​17, 18· 4:​15, 16.

14. Σο μανγκάσα τι κεράς σαρ βακερέλα κο εδάφια Εφεσίους 5:1, 2;

¹⁴ Κάνα ανάσα αμαρέ γκοντιάτε ο παράδειγμας ι Ιεχωβάσκο ντα ι Ιησούσκο, μανγκάσα τι κεράς ο πιο λατσσό για τι αγαβάς πιο μπουτ ι γιαβερέν. (Διαβάνεν Εφεσίους 5:1, 2) Αμέν ναστί ντικχάσα σο τθερένα ο γιαβερά πουμαρέ γκίστε. Αλλά μπορίνασα τι κεράς ο πιο λατσσό για τι αγαβάς ο αισθήματα ντα ο ανάγκες λένγκε. (2 Κορ. 11:​29) Ο ντουνιάς ντικχέλα σάντε πο νεαυτός, αλλά αμέν κεράσα σο νακχέλα αμαρέ βαστέσταρ για “μα τι ντικχάς σάντε αμαρό συμφέρον, αλλά ο συμφέρον ι γιαβερένγκο-ντα”.​—Φιλιπ. 2:4.

15. Καλά τζενέ ειδικά πρέπει τι αγαβέν ι γιαβερέν;

¹⁵ Ειδικά ο πρεσβύτεροι πρέπει τι αγαβέν ι γιαβερέν. Τζανένα ότι κα ντεν λογαριασμός κο Ιεχωβά για το τρόπος σο συμπεριφερίντιβενα λέσκε μπρακένγκε. (Εβρ. 13:​17) Για τι βοηθίνεν ι πφραλέν, ο πρεσβύτεροι πρέπει τι τζιτζίνεν λένγκε. Σαρ σικαβένα ο πρεσβύτεροι ότι αγαβένα ι γιαβερέν;

16. Σο κερέλα ο πρεσβύτερος σο τζιτζίνελα ι πφραλένγκε, ντα σόσκε ισί σημαντικός ανταβά;

¹⁶ Ο πρεσβύτερος σο τζιτζίνελα ι γιαβερένγκε, αρακχέλα χρόνος για τι αβέλ πι πφραλέντζαρ. Κερέλα ερωτήσεις ντα σοράν ασουνέλα με προσοχή ντα υπομονή. Ανταβά ισί ατζέ πιο σημαντικός άμα εκ ανταλέ μπρακένταρ μανγκέλα τι πουτρέλ πο γκι αλλά να αρακχέλα ο σωστά λάφια. (Παρ. 20:5) Κάνα ντέλα πι σαατίσταρ σαρέ πι γκίσαρ, ο πφραλά κα ντεν λέσκε πιο μπουτ μπέσα, κα αβέν πιο λατσσέ αμαλά λέσαρ ντα κα μανγκέν-λες πιο μπουτ.​—Πράξ. 20:37.

17. Καβά ισί ο πιο σημαντικός πράγμας σο πρέπει τι τθερέν ο πρεσβύτεροι σαρ βακερένα μπουτ πφραλά ντα πφενιά; Βακερέν εκ παράδειγμας.

¹⁷ Μπουτ πφραλά ντα πφενιά βακερένα ότι ο πιο σημαντικός πράγμας σο πρέπει τι τθερέλ εκ πρεσβύτερος ισί τι αγαβέλ ι γιαβερέν. Σόσκε; «Ισί πιο εύκολος τι κερές λέντζαρ λάφι σόσκε τζανέσα ότι κα αγαβέν-τουτ», βακερέλα η Άντελεϊντ. Επίσης, βακερέλα: «Ντικχέσα ότι αγαβένα-τουτ  κατά αντίδραση σο τθερένα κάνα κερέσα λέντζαρ λάφι». Εκ πφραλ ντέλα-πες γκοντί με εκτίμηση: «Εκ φαρ ντικχλόμ ο γιακχά εκχέ πρεσβυτερόσκε τι πφερντιόν δάκρυα καζόμ βακεράβας λέσκε μο πρόβλημας. Ποτές να κα μπιστράβ-λες ανταβά».​—Ρωμ. 12:15.

18. Σαρ σικαβάσα ότι αγαβάσα ι γιαβερέν;

¹⁸ Νανέ σάντε ο πρεσβύτεροι οντουλά σο πρέπει τι αγαβέν ι γιαβερέν. Σαρέ μπορίνασα τι κεράς-λες ανταβά. Σαρ; Τι προσπαθίνεν τι αγαβέν σο νακχέλα τουμαρί φαμιλί ντα ο πφραλά κατά κχανγκιρί. Τι σικαβέν ότι πφαμπόνα ι τερνένγκε κι κχανγκιρί, ι νασφαλένγκε, ι πφουρένγκε ντα οντουλένγκε σο μουλέ λένταρ αγαπημέ τζενέ. Τι πουτσέν-λεν σαρ τζάνα. Τι ασουνέν-λεν μπαγιά κάνα πουτρένα πουμαρό γκι. Τι σικαβέν λένγκε ότι αγαβένα μπαγιά λένγκο πρόβλημας. Τι κερέν σο νακχέλα τουμαρέ βαστέσταρ για τι βοηθίνεν. Κάνα κεράσα-λες ανταβά, σικαβάσα ότι μανγκάσα-λεν μπαγιά.​—1 Ιωάν. 3:18.

19. Σόσκε χρειαζίντιβελα τι αβάς έτοιμοι τι βοηθίνας ι γιαβερέν με διάφορους τρόπους;

¹⁹ Χρειαζίντιβελα τι αβάς έτοιμοι τι βοηθίνας ι γιαβερέν με διάφορους τρόπους. Σόσκε; Επειδή κάθε τζενό συμπεριφερίντιβελα διαφορετικά κάνα τθερέλα δυσκολίες. Ισί τζενέ σο μανγκένα τι κερέν λάφι πουμαρέ προβληματένγκε ντα γιαβερά σο να μανγκένα. Αμέν μανγκάσα τι βοηθίνας-λεν, αλλά δεν πρέπει τι κεράς ερωτήσεις σο κα κερέν-λεν τι λατζάν. (1 Θεσ. 4:​11) Ατζέ-ντα κάνα ο γιαβερά πουτρένα πουμαρό γκι, μπορεί μα τι συμφωνίνας οντουλέντζαρ σο βακερένα. Πρέπει όμως τι αγαβάς ότι αντικάς νιωθίνενα βον. Μανγκάσα τι ασουνάς με προσοχή ντα μα τι σιγκιαράς τι κεράς λάφι.​—Ματθ. 7:1· Ιακ. 1:19.

20. Σο κα ντικχάς κο γιαβέρ μάθημας;

²⁰ Μανγκάσα τι αγαβάς ι γιαβερέν κι κχανγκιρί, αλλά μανγκάσα ανταβά τι κεράς-λες κο έργος-ντα. Σαρ σικαβάσα ότι αγαβάσα ι γιαβερέν κάνα κεράσα μαθητέν; Κα ντικχάς-λες ανταβά κο γιαβέρ μάθημας.