1. Σο δοκιμασίες μπέκιμ τι νακχένα ο υπηρέτες ι Ιεχωβάσκε;

ΜΗΠΩΣ νακχένα εκ δύσκολη δοκιμασία; Μπέκιμ κάποιος τουμαρέ κχανγκιριάταρ τι πφαμπαρντάς τουμαρό γκι. (Ιακ. 3:2) Ή μπέκιμ ο τζενέ σο κερένα λέντζαρ μπουτί ή τουμαρέ συμμαθητές τι πρασάνα-τουμέν επειδή υπηρετίνενα ι Ιεχωβάς. (1 Πέτρ. 4:3, 4) Ή κάποιος τουμαρέ φαμιλιάταρ προσπαθίνελα τι τσσιναβέλ-τουμέν τι τζαν κο συναθροίσεις ή τι κερέν λάφι οντουλένγκε σο πακιάνα. (Ματθ. 10:​35, 36) Άμα εκ δοκιμασία ισί μπουτ δύσκολη, μπορεί τι νιωθίνενα ότι κα αβέλας πιο λατσσό τι τσσιναβέν τι υπηρετίνεν ι Ιεχωβάς. Αλλά μπορίνενα τι αβέν σίγουροι ότι, σο-ντα δοκιμασία τι νακχένα, ο Ιεχωβά κα ντελ-τουμέν ι σοφία για τι ντεν-λα πέρα ντα ι ζορ για τι νταϊντίνεν-λα.

2. Σαρ μπορίνελα τι βοηθίνελ-αμέν ο διάβασμας ι Γραφιάκο σαρ βακερέλα ο εδάφιος Ρωμαίους 15:4;

² Πι Λαφίστε, ο Ιεχωβά μανγκλάς τι γραφίντιβελ σο ακριβώς νακχλέ ο ατελείς τζενέ σο νταϊντιντέ δύσκολες δοκιμασίες. Σόσκε; Για τι σικλιάς λένταρ. Ανταβά ταιριάνελα οντουλέντζαρ σο γραφιντάς ο Παύλος κο Ρωμαίους 15:4. (Διαβάνεν) Ανταλά ιστορίες λοκχιαρένα αμαρό γκι ντα ντένα-αμέν ελπίδα. Αλλά για τι βοηθίντιβας, να ερεσέλα σάντε τι διαβάνας ι Γραφή. Πρέπει τι μουκχάς-λα τι αλλάνελ ο τρόπος σο σκεφτίνασα ντα τι ερεσέλ αμαρέ γκίστε. Σο μπορίνασα τι κεράς άμα μανγκάσα βοήθεια για τι ντας πέρα εκ δυσκολία σο νακχάσα; Μπορίνασα τι κεράς ακαλά σταρ πράγματα: (1) Τι κεράς προσευχή, (2) Τι χρησιμοποιήνας αμαρί φαντασία, (3) Τι σκεφτίνας λατσσές ντα (4) Τι κεράς οντουλά σο σικλιάσα. Για τι ντικχάς σο μανγκέλα τι βακερέλ ο κάθε εκ ανταλένταρ. * Σοράν,  κα χρησιμοποιήνας ανταλά σταρ πράγματα για τι σικλιαράς-αμέν οντουλένταρ σο νακχλάς ο βασιλιάς Δαβίδ ντα ο απόστολος Παύλος.

3. Σο πρέπει τι κερέν πριν τι αρχίνεν τι διαβάνεν ι Γραφή, ντα σόσκε;

³ (1) Τι κερέν προσευχή. Πριν τι αρχίνεν τι διαβάνεν ι Γραφή, μανγκέν κατά Ιεχωβά τι κερέλ-τουμέν τι αγαβέν σαρ μπορίνενα τι βοηθίντιβεν οντουλένταρ σο διαβάνενα. Για παράδειγμας, άμα χρειαζίντιβενα βοήθεια για τι ντεν πέρα εκ πρόβλημας, μανγκέν κατά Ιεχωβά τι βοηθίνελ-τουμέν τι αρακχέν αρχές ι Γραφιάκε για τι αποφασίνεν σο τι κερέν.​—Φιλιπ. 4:6, 7· Ιακ. 1:5.

4. Σαρ κα τζουβντιαρέν τουμαρέ γκοντιάτε εκ ιστορία ι Γραφιάκι;

⁴ (2) Τι χρησιμοποιήνεν τουμαρί φαντασία. Ο Ιεχωβά ντινάς-αμέν κάτι μπουτ σουκάρ: αμαρί φαντασία. Για τι τζουβντιαρέν τουμαρέ γκοντιάτε εκ ιστορία ι Γραφιάκι, προσπαθίνεν τι ανέν τουμαρέ γκοντιάτε οντουλά σο αβένα-πες ντα τι τσσουβέν τουμαρό νεαυτός κι θέση οντουλέσκι σο ισί κι ιστορία. Προσπαθίνεν τι ντικχέν ο πράγματα σο ντικχλάς ντα τι νιωθίνεν οντουλά σο μπορεί τι νιωθίνελας.

5. Καλά πράγματα πρέπει τι σκεφτίνεν λατσσές, ντα σαρ κα κερέν-λες ανταβά;

⁵ (3) Τι σκεφτίνεν λατσσές. Τι σκεφτίνεν λατσσές οντουλά σο διαβάνενα ντα σαρ μπορίνενα τι κερέν-λεν τουμαρέ ζωγιάτε. Ανταβά βοηθίνελα-τουμέν τι ντικχέν σαρ ταιριάνενα οντουλά σο σικλιλέν οντουλέντζαρ σο τζανένας ντα αντικάς τι αγαβέν-λεν πιο λατσσές. Άμα διαβάνενα ι Γραφή χωρίς τι σκεφτίνεν λατσσές οντουλά σο διαβάνενα, ισί σαρ τι ντικχένα εκ παζλ οπράλ κο τραπέζι χωρίς τι ενώνεν-λες. Κάνα σκεφτίνενα οντουλά σο διαβάνενα, ισί σαρ τι ενώνενα ανταβά παζλ για τι μπορίνεν τι ντικχέν σαρί ι εικόνα. Κάτι σο κα βοηθίνελ-τουμέν τι σκεφτίνεν πιο λατσσές ισί τι κερέν ασακέ ερωτήσεις: “Σο κερντάς ο τζενό σο ισί κι ιστορία για τι νακχαβέλ πο πρόβλημας; Σαρ βοηθιντάς-λες ο Ιεχωβά; Σαρ οντουλά σο σικλιλόμ βοηθίνενα-μαν τι νταϊντίναβ ο δοκιμασίες;”

6. Σόσκε πρέπει τι κεράς οντουλά σο σικλιάσα;

⁶ (4) Τι κερέν οντουλά σο σικλιόνα. Ο Ιησούς βακερντάς ότι, άμα να κεράσα οντουλά σο σικλιάσα, κα αβάς σαρ εκ τζενό σο κερέλα πο κχερ οπράλ κο κούμι. Παρόλο σο κερέλα μπουτ μπουτί, μαρέλα-πες σινανέ. Σόσκε; Επειδή κάνα κα ντελ ζουρανό μπρισίμ ντα κα τθερέλ πλημμύρες, λέσκο κχερ κα περέλ. (Ματθ. 7:​24-27) Κάτι ασακό αβέλα-πες αμέντζαρ-ντα. Άμα κεράσα προσευχή, χρησιμοποιήνασα αμαρί φαντασία ντα σκεφτίνασα λατσσές αλλά να κεράσα οντουλά σο σικλιάσα, σαρέ κεράσα-λεν σινανέ. Κάνα κα τθεράς προβλήματα ή κα τζαν αμέντζαρ κόντρα, αμαρί πίστη να κα αβέλ αζόμ ζουρανί. Οκιά μπάνταρ, κάνα σικλιαράσα-αμέν κατά Γραφή ντα κεράσα οντουλά σο σικλιάσα, λάσα πιο λατσσέ αποφάσεις, τθεράσα πιο μπουτ ειρήνη ντα μπαριαράσα αμαρί πίστη. (Ησ. 48:​17, 18) Ακανά κα ντικχάς σαρ τι κεράς ανταλά σταρ πράγματα για τι σικλιάς οντουλένταρ σο νακχλάς ο βασιλιάς Δαβίδ.

7. Καγιά ιστορία ι Γραφιάκι κα ντικχάς ακανά;

⁷ Μήπως εκ τουμαρέ αμαλένταρ ή τουμαρέ τζενένταρ κερντάς κάτι σο πφαμπαρντάς τουμαρό γκι ντα ακανά να ντένα λέσκε μπέσα; Άμα βα, κα βοηθίντιβεν μπουτ άμα κα διαβάνεν σο κερντάς ο βασιλιάς Δαβίδ κάνα λέσκο τσσαβό, ο Αβεσσαλώμ, προδωντάς-λες ντα μανγκλάς τι αβέλ βοβ βασιλιάς λέσκε θεσιάτε.​—2 Σαμ. 15:​5-14, 31· 18:​6-14.

8. Σο κα μπορίνενας τι κερέν για τι βοηθίνελ-τουμέν ο Ιεχωβά;

⁸ (1) Τι κερέν προσευχή. Καζόμ τθερένα τουμαρέ γκοντιάτε ι ιστορία, βακερέν κο Ιεχωβά σαρ νιωθίνενα ι μπέτι τροπόσκε σο συμπεριφερισάλε τουμένγκε. (Ψαλμ. 6:​6-9) Τι αβέν συγκεκριμέ. Σοράν, μανγκέν κατά Ιεχωβά τι βοηθίνελ-τουμέν τι αρακχέν ο  αρχές ι Γραφιάκε σο χρειαζίντιβενα καζόμ προσπαθίνενα τι ντεν πέρα ανταβά δύσκολος πρόβλημας.

9. Βακερέν χάνικ λαφίντζαρ σο αβιλό-πες κο Δαβίδ ντα κο Αβεσσαλώμ.

⁹ (2) Τι χρησιμοποιήνεν τουμαρί φαντασία. Ανέν τουμαρέ γκοντιάτε οντουλά σο αβένα-πες ανταλέ ιστοριάτε ντα προσπαθίνεν τι αγαβέν σαρ νιωσάλο ο βασιλιάς Δαβίδ. Ο Αβεσσαλώμ, ο τσσαβό ι Δαβιδίσκο, προσπαθίνελα μπουτ μπρεσά τι κερέλ ι λαός τι μανγκέλ-λες. (2 Σαμ. 15:7) Κάνα ντιντιόλα-λες η ευκαιρία, μπουτσσαβέλα κατασκοπόν σαρό κο Ισραήλ για τι κερέλ ι λαός τι δεχτίνελ-λες σαρ βασιλιάς. Μάλιστα, κερέλα τον Αχιτόφελ, σο ισινέ λατσσό αμάλ ι Δαβιδίσκο ντα ντέλας-λες συμβουλές, τι τσσίντελ λέσταρ κι κόντρα σο τζάλας ι Δαβιδίσαρ. Ο Αβεσσαλώμ βακερέλα σαριλένγκε ότι ισί βασιλιάς, ντα σοράν προσπαθίνελα τι ασταρέλ ντα τι μουνταρέλ ι Δαβιδίς σο μάλλον οντουβά βακίτι ισινέ μπουτ νασφαλό. (Ψαλμ. 41:​1-9) Ο Δαβίδ σικλιόλα σο μανγκέλα τι κερέλ ο Αβεσσαλώμ ντα νασέλα κατά Ιερουσαλήμ. Τελικά, ο στρατός σο τθερέλα ο Αβεσσαλώμ κερέλα τζένγκι ι Δαβιδίσκε στρατόσαρ. Οντουλά σο τζάνα κόντρα κο Δαβίδ χασαρένα ντα ο Αβεσσαλώμ μερέλα.

10. Σο κα μπορίνελας τι κερέλ ο βασιλιάς Δαβίδ;

¹⁰ Σοράν, ανέν τουμαρέ γκοντιάτε σαρ πρέπει τι νιωσάλο ο Δαβίδ καζόμ νακχέλας-λεν σαρέ ανταλά. Μανγκέλας τον Αβεσσαλώμ ντα ντέλας μπέσα κο Αχιτόφελ. Όμως, ο ντούι-ντα προδωντέ-λες. Πφαμπαρντέ λέσκο γκι ντα προσπαθιντέ ατζέ-ντα τι μουνταρέν-λες. Ο Δαβίδ κα μπορίνελας τι τσσιναβέλ τι ντελ μπέσα πι γιαβερέ-ντα αμαλένγκε ντα τι πακιάλ ότι βον-ντα τσσιντιντέας κατά Αβεσσαλώμ. Κα μπορίνελας τι σκεφτίνελ σάντε πο νεαυτός ντα τι κανονίνελ τι νασέλ κορκορό. Ή κα μπορίνελας τι χασαρέλ πο κουράγιος. Να κερντάς όμως τίποτα ανταλένταρ. Αλλά νακχαντάς ανταγιά δύσκολη δοκιμασία. Σαρ;

11. Σο κερντάς ο Δαβίδ κάνα νακχλάς οντιά δυσκολία;

¹¹ (3) Τι σκεφτίνεν λατσσές. Καλά αρχές σικλιλέν ανταλέ ιστοριάταρ; Απαντίνεν κι ερώτηση: “Σο κερντάς ο Δαβίδ για τι νακχαβέλ πο πρόβλημας;” Ο Δαβίδ ατσσιλό ήρεμος ντα αντικάς να σιγκιαρντάς τι λελ αποφάσεις σο να ισινέ γκοντιαβέρ. Ούτε νταρασάλο αζόμ μπουτ σο να τζανέλας σο τι κερέλ. Αλλά κερντάς προσευχή κο Ιεχωβά για τι βοηθίνελ-λες. Επίσης, μανγκλάς βοήθεια πι αμαλένταρ. Ντα κερντάς σουγκό οντουβά σο αποφασιντάας. Παρόλο σο πφαμπαρντέ λέσκο γκι, ο Δαβίδ να τσσιναντάς τι ντελ μπέσα ι γιαβερένγκε ντα να πφερντιλό χολί. Συνεχίνελας τι ντελ μπέσα ι Ιεχωβάσκε ντα πι αμαλένγκε.

12. Σο κερντάς ο Ιεχωβά για τι βοηθίνελ ι Δαβιδίς;

¹² Σαρ βοηθιντάς ο Ιεχωβά ι Δαβιδίς; Άμα κα ρόντεν, κα σικλιόν ότι ο Ιεχωβά ντινάς κο Δαβίδ ι ζορ σο χρειαζίντιβελας για τι νταϊντίνελ ανταγιά δοκιμασία. (Ψαλμ. 3:​1-8· οπραϊνέ λάφια) Ο Ιεχωβά ευλογιντάς ο αποφάσεις ι Δαβιδίσκε. Ντα βοηθιντάς ι αφοσιωμέ αμαλέν σο τθερέλας ο Δαβίδ καζόμ κερένας τζένγκι για τι αρακχαβέν πουμαρέ βασιλιάς.

13. Σαρ μπορίνενα τι μοιάζεν κο Δαβίδ άμα κάποιος πφαμπαρντάς τουμαρό γκι; (Ματθ. 18:​15-17)

¹³ (4) Τι κερέν οντουλά σο σικλιόνα. Πουτσέν-τουμέν: “Σαρ μπορίναβα με τι μοιάζαβ κο Δαβίδ;” Κα χρειαζίντιβελ τι κερέν κάτι σουγκό για τι νακχαβέν ο πρόβλημας. Σκεφτίνεν άμα κα μπορίνενας τι κερέν ο πράγματα σο βακερντάς ο Ιησούς κο Ματθαίος κεφάλαιος 18 ή τι κερέν ι αρχή ανταλέ εδαφιόνγκι. (Διαβάνεν Ματθαίος 18:​15-17) Αλλά δεν πρέπει τι σιγκιαρέν τι λεν αποφάσεις κάνα ισινέν χολιαμέ. Πρέπει τι κερέν προσευχή κο Ιεχωβά για τι ντελ-τουμέν ήρεμος γκι ντα ι σοφία σο χρειαζίντιβενα για τι ντεν-λεν πέρα. Μα τσσιναβέν τι ντεν μπέσα τουμαρέ αμαλένγκε. Τι δεχτίνεν λένγκι βοήθεια. (Παρ. 17:​17) Ντα κάτι ατζέ πιο σημαντικός, τι κερέν ο συμβουλές  σο ντέλα-τουμέν ο Ιεχωβά αντράλ πι Λαφίσταρ.​—Παρ. 3:5, 6.

14. Κάνα μπορίνενα τι ντεν-τουμέν ζορ ο εδάφια 2 Τιμόθεο 1:​12-16 ντα 4:​6-11, 17-22;

¹⁴ Μήπως τουμαρί φαμιλί τζάλα τουμέντζαρ κόντρα επειδή υπηρετίνενα ι Ιεχωβάς; Ή μήπως τζουβντιόνα εκχέ τθεμέστε σο η κυβέρνηση να μουκχέλα-τουμέν τι κερέν κάποια πράγματα ή τσσιναβέλα ντιπ τουμαρό έργος; Άμα αβέλα-πες ανταβά, κα λεν μπαρί ζορ κάνα κα διαβάνεν ο εδάφια 2 Τιμόθεο 1:​12-16 ντα 4:​6-11, 17-22. * Ο Παύλος γραφιντάς ανταλά λάφια καζόμ ισινέ κι φυλακή.

15. Σο κα μπορίνενας τι μανγκέν κατά Ιεχωβά;

¹⁵ (1) Τι κερέν προσευχή. Πριν τι διαβάνεν ανταλά εδάφια, βακερέν κο Ιεχωβά τουμαρό πρόβλημας ντα σαρ νιωθίνενα. Τι αβέν συγκεκριμέ. Σοράν, μανγκέν λέσταρ τι βοηθίνελ-τουμέν τι αρακχέν αρχές ι Γραφιάκε οντουλένταρ σο νακχλάς ο Παύλος για τι βοηθίνεν-τουμέν τι τζανέν σο τι κερέν κο πρόβλημας σο νακχένα.

16. Σο νακχλάς ο Παύλος;

¹⁶ (2) Τι χρησιμοποιήνεν τουμαρί φαντασία. Τσσουβέν τουμαρό νεαυτός κι θέση κι Παυλόσκι. Ισί πφαντό τζαντζιρίντζαρ εκχέ φυλακιάτε κι Ρώμη. Γκιλόας πάλι κι φυλακή, αλλά ανταγιά φαρ ισί σίγουρος ότι κα μουνταρέν-λες. Μερικοί λέσκε αμαλένταρ μουκχλέ-λες, ντα ισί μπουτ κχινό.​—2 Τιμ. 1:15.

17. Σο κα μπορίνελας τι κερέλ ο Παύλος;

¹⁷ Ο Παύλος κα μπορίνελας τι τθερέλ πι γκοντιάτε σάντε οντουλά σο κερντάας ανγκλέ ντα τι σκεφτίνελας ότι άμα να κα κερέλας αζόμ μπουτ πράγματα ι Ιεχωβάσκε μπορεί μα τι τσσουβένας-λες κι φυλακή. Κα μπορίνελας τι χολιάνελ ι μουρσένγκε κατά Ασία σο μουκχλέας-λες, ντα τι τσσιναβέλ τι ντελ μπέσα πι γιαβερέ αμαλένγκε. Αλλά ο Παύλος να κερντάς τίποτα ανταλένταρ. Σαρ ατσσικιαρντάς πι σιγουριά ντα πι ελπίδα;

18. Σο κερντάς ο Παύλος κι δοκιμασία σο νακχέλας;

¹⁸ (3) Τι σκεφτίνεν λατσσές. Απαντίνεν ακαλέ ερωτησιάτε: «Σαρ νακχαντάς ο Παύλος πο πρόβλημας;» Παρόλο σο τζανέλας ότι ατζεχάνικ κα μουνταρένας-λες, ο Παύλος να μπισταρντάς ότι ο πιο σημαντικός ισινέ τι ντελ δόξα κο Ιεχωβά. Συνεχίνελας τι τθερέλ πι γκοντιάτε σαρ τι ντελ ζορ ι γιαβερέν. Μουκχέλας-πες κο Ιεχωβά αντράλ κατά προσευχή. (2 Τιμ. 1:3) Να σκεφτίνελας σάντε οντουλέν σο μουκχλέας-λες, αλλά βακερέλας καζόμ μπουτ εκτιμίνελας πι πιστέ αμαλέν σο βοηθίνενας-λες μπουτέ τροπόντζαρ. Επίσης, ο Παύλος συνεχίνελας τι σικλιαρέλ-πες κατά Λάφι ι Ντεβλέσκο. (2 Τιμ. 3:​16, 17· 4:​13) Ντα ο πιο σημαντικός, ισινέ σίγουρος ότι ο Ιεχωβά ντα ο Ιησούς μανγκένας-λες. Βον να μουκχλέας-λες ντα κα ευλογίνενας-λες σο ισινέ αφοσιωμέ ντα κερντάς μπουτ πράγματα λένγκε.

19. Σαρ βοηθιντάς ο Ιεχωβά ι Παυλός;

¹⁹ Ο Ιεχωβά βακερντάας κο Παύλος ότι κα τζάνας λέσαρ κόντρα επειδή ισινέ Χριστιανός. (Πράξ. 21:​11-13) Σαρ βοηθιντάς ο Ιεχωβά ι Παυλός; Απαντίνελας λέσκε προσευχιέντε ντα ντέλας-λες ζορ. (2 Τιμ. 4:​17) Ο Ιεχωβά βακερντάς κο Παύλος ότι κα ευλογίντιβελας οντουλένγκε σο μαρντάς-πες τι κερέλ. Ντα κερντάς λέσκε αφοσιωμέ αμαλέν τι βοηθίνεν-λες μπουτέ τροπόντζαρ.

20. Σαρ μπορίνασα τι τθεράς ι πίστη ι Παυλόσκι σο σικάντιβελα κο εδάφια Ρωμαίους 8:​38, 39;

²⁰ (4) Τι κερέν οντουλά σο σικλιόνα. Πουτσέν-τουμέν: “Σαρ μπορίναβα με τι μοιάζαβ κο Παύλος;” Σαρ ο Παύλος, αντικάς αμέν-ντα πρέπει τι μπεκλεντίνας ότι κα τζαν αμέντζαρ κόντρα οντουλένγκε σο πακιάσα. (Μάρκ. 10:​29, 30) Για τι ατσσάς πιστοί κο Ιεχωβά κάνα τθεράσα δοκιμασίες, πρέπει τι κεράς προσευχή λέστε ντα μα τι τσσιναβάς τι σικλιαράς-αμέν κατά Γραφή. Ντα πρέπει τι τθεράς πάντα αμαρέ γκοντιάτε ότι εκ κατά πιο σημαντικά πράγματα σο τθεράσα τι κεράς  ισί τι ανάς δόξα κο Ιεχωβά. Μπορίνασα τι αβάς σίγουροι ότι ο Ιεχωβά να κα μουκχέλ-αμέν ποτές ντα ότι, σο-ντα τι κερέν ο γιαβερά, ναστί κερένα-λες τι τσσιναβέλ τι μανγκέλ-αμέν.​—Διαβάνεν Ρωμαίους 8:​38, 39· Εβρ. 13:5, 6.

21. Σαρ νακχαντέ πουμαρέ δυσκολίες η Άιγια ντα ο Έκτορ;

²¹ Σαρ-ντα τι αβέν ο πράγματα αμαρέ ζωγιάτε, μπορίνασα τι λας ζορ τζενένταρ σο ισί κι Γραφή. Για παράδειγμας, η Άιγια, εκ σκαπάνισσα κι Ιαπωνία, βακερέλα ότι η ιστορία ι Ιωνάσκι βοηθιντάς-λα τι νασκιαρέλ ι νταρ κάνα κερέλας έργος κο σταντ. Ο Έκτορ ισί εκ τερνό κι Ινδονησία σο λέσκο ντατ ντα λέσκι ντάι να υπηρετίνενα ι Ιεχωβάς. Ο παράδειγμας σο μουκχλάς η Ρουθ τσσίντελα-λες τι σικλιόλ ι Ιεχωβάσκε ντα τι υπηρετίνελ-λες.

22. Σαρ μπορίνενα τι βοηθίντιβεν καζόμ αβέλα-πες πιο μπουτ κατά Γραφιάκε σιναμάδες ή κατά θέματα κατά σειρά «Να Μιμείστε την Πίστη Τους»;

²² Κατέ κα αρακχέν παραδείγματα ι Γραφιάκε σο κα ντεν-τουμέν ζορ; Ο βίντεα, ο ηχητικά δράματα ντα ο θέματα κατά σειρά «Να Μιμείστε την Πίστη Τους» τζουβντιαρένα τουμαρέ γκοντιάτε ο ιστορίες ι Γραφιάκε. * Πριν τι ντικχέν, τι ασουνέν ή τι διαβάνεν ανταλά πράγματα, μανγκέν κατά Ιεχωβά τι βοηθίνελ-τουμέν τι αρακχέν σημεία σο κα μπορίνεν τι κερέν τουμαρέ ζωγιάτε. Τσσουβέν τουμαρό νεαυτός κι θέση οντουλέσκι σο ισί κι ιστορία. Σκεφτίνεν λατσσές σαρέ οντουλά σο κερντέ ο πιστοί υπηρέτες ι Ιεχωβάσκε ντα σαρ βοβ βοηθιντάς-λεν τι νακχαβέν ο δυσκολίες. Σοράν, κερέν τουμαρέ ζωγιάτε οντουλά σο σικλιλέν. Βακερέν ευχαριστώ κο Ιεχωβά σο βοηθίνελα-τουμέν. Ντα για τι σικαβέν ότι εκτιμίνενα λέσκι βοήθεια, ρόντεν ευκαιρίες για τι ντεν ζορ ι γιαβερέν ντα τι βοηθίνεν-λεν.

23. Σο βακερέλα ο Ιεχωβά ότι κα κερέλ αμένγκε σαρ βακερένα ο εδάφια Ησαΐας 41:​10, 13;

²³ Η ζωή ανταλέ ντουνιάστε σο κερέλα-λες κουμάντος ο Μπενγκ ισί δύσκολη, ντα μπάζιμα να τζανάσα σο τι κεράς. (2 Τιμ. 3:1) Να χρειαζίντιβελα όμως τι τσσουβάς αμαρέ γκίστε ή τι νταράς. Ο Ιεχωβά τζανέλα σο νακχάσα. Άμα κα περάς, ντέλα-αμέν πο λάφι ότι κα ασταρέλ-αμέν πι ζουρανέ δεξί βαστέσαρ. (Διαβάνεν Ησαΐας 41:​10, 13) Ισινάμ ντιπ σίγουροι ότι κα βοηθίνελ-αμέν, ντα η Γραφή ντέλα-αμέν ζορ για τι νακχαβάς σο-ντα δυσκολίες τθεράσα.