1. Σαρ ισινέ τουμαρί ζωή πριν τι αρχίνεν τι κερέν μελέτη;

 ΣΑΡ ισινέ τουμαρί ζωή πριν τι αρχίνεν τι κερέν μελέτη ι Ιεχωβάσκε Μαρτυρέντζαρ; Μπουτ αμένταρ νταράσα σάντε σο ανάσα-λες αμαρέ γκοντιάτε. Ο τρόπος σο σκεφτίναας ντα αμαρό χαρακτήρας επηρεάντιβενας οντουλένταρ σο βακερέλα ο ντουνιάς ι πραγματένγκε σο ισί σωστά ντα ι πραγματένγκε σο ισί λάθος. “Να μπεσάας πο λατσσέ ντιβεσένγκε ντα ισινάμας μπι ι Ντεβλέσκο κο ντουνιάς”. (Εφεσ. 2:​12) Αλλά η μελέτη σο κερντέν αλλαντάς-λεν σαρέ ανταλά!

2. Σο ντικχλέν καζόμ κερένας μελέτη;

² Καζόμ κερένας μελέτη, ντικχλέν ότι τθερένα εκχέ Νταντές σο μανγκέλα-τουμέν μπουτ. Αγαντέν ότι, για τι κερέν ι Ιεχωβάσκο γκι ντα τι αβέν αντρέ λέσκε φαμιλιάτε ι τζενέντζαρ σο ντένα-λες λατρεία, έπρεπε τι κερέν μπαρέ αλλαγές τουμαρέ ζωγιάτε ντα κο τρόπος σο σκεφτίνενας. Έπρεπε τι σικλιόν τι τζουβντιόν αντικάς σαρ βακερέλα βοβ.​—Εφεσ. 5:​3-5.

3. Σο μανγκέλα ο Ιεχωβά τι κεράς σαρ βακερένα ο εδάφια Κολοσσαείς 3:9, 10, ντα σο κα ντικχάς ανταλέ μαθημάστε;

³ Ο Ιεχωβά ισί οντουβά σο κερντάς-αμέν ντα αμαρό Ντατ, οτθάρ τθερέλα ο δικαίωμας τι αποφασίνελ σο τι κερέν ο τζενέ σο ντένα-λες λατρεία. Ντα μανγκέλα πριν τι μπολντιάς τι προσπαθίνας τι “νικαβάς οπρ’ αμένταρ ο πουρανό χαρακτήρας ντα οντουλά σο κερέλα”. * (Διαβάνεν Κολοσσαείς 3:9, 10) Ανταβά μάθημας κα βοηθίνελ οντουλέν σο μανγκένα τι μπολντιόν τι απαντίνεν ακαλέ τρινέ ερωτησιέντε: (1) Σο ισί ο «πουρανό χαρακτήρας»; (2) Σόσκε βακερέλα αμένγκε ο Ιεχωβά τι  νικαβάς-λες οπρ’ αμένταρ; (3) Σαρ μπορίνασα τι κεράς-λες ανταβά; Ανταβά μάθημας κα βοηθίνελ αμέν-ντα σο ισινάμ μπολντέ μα τι τθεράς πάλι ο πουρανό χαρακτήρας.

4. Σο κερέλα ο τζενό σο τθερέλα ο «πουρανό χαρακτήρας»;

⁴ Ο τζενό σο κερέλα-λες κουμάντος ο «πουρανό χαρακτήρας» σκεφτίνελα ντα κερέλα πράγματα αντικάς σαρ μανγκέλα ο σώμας. Μπέκιμ ντικχέλα σάντε πο νεαυτός, ισί χολιάκο, να σικαβέλα εκτίμηση ντα ισί μπαρικανό. Μπέκιμ μπεϊντίνελα τι ντικχέλ πορνογραφία ντα ταινίες σο τθερένα αντρέ λουμνιπέ ή βία. Σίγουρα, τθερέλα λατσσέ ιδιότητες, ντα μπέκιμ νιωθίνελα τύψεις ι μπέτι πραγματένγκε σο βακερέλα ή κερέλα. Αλλά να τθερέλα κάτι τι τσσίντελ-λες για τι αλλάνελ οντουλά σο σκεφτίνελα ντα οντουλά σο κερέλα.​—Γαλ. 5:​19-21· 2 Τιμ. 3:​2-5.

5. Μπορίνασα τι νικαβάς ντιπ οπρ’ αμένταρ ο πουρανό χαρακτήρας; Εξηγίνεν. (Πράξεις 3:19)

⁵ Αφού ισινάμ ατελείς, καέκ αμένταρ ναστί νασκιαρέλα ντιπ σαρέ ο μπέτι πράγματα σο αβένα λέσκε γκοντιάτε ντα λέσκε γκίστε. Μπάζιμα, κα κεράς ή κα βακεράς κάτι σο κα μετανιώνας. (Ιερ. 17:9· Ιακ. 3:2) Αλλά κάνα νικαβάσα οπρ’ αμένταρ ο πουρανό χαρακτήρας, τσσιναβένα τι κερέν-αμέν κουμάντος ο γκεραλέ σκέψεις ντα χούγια. Αβάσα γιαβερά τζενέ.​—Ησ. 55:7· διαβάνεν Πράξεις 3:19.

6. Σόσκε βακερέλα αμένγκε ο Ιεχωβά τι νασκιαράς ο μπέτι πράγματα αμαρέ γκοντιάταρ ντα ο γκεραλέ χούγια;

⁶ Ο Ιεχωβά βακερέλα αμένγκε τι νασκιαράς ο μπέτι πράγματα αμαρέ γκοντιάταρ ντα ο γκεραλέ χούγια επειδή μανγκέλα-αμέν μπουτ ντα μανγκέλα τι απολαμβάνας ι ζωή. (Ησ. 48:​17, 18) Τζανέλα ότι οντουλά σο κερένα ο λάθος πράγματα σο μανγκέλα ο σώμας κερένα ζιάνι εμ πουμαρέ νεαυτόσκε εμ οντουλένγκε σο ισί πασέ λέντε. Πφαμπόλα λέσκο γκι κάνα ντικχέλα τι κεράς ζιάνι αμαρέ νεαυτόσκε ντα ι γιαβερένγκε.

7. Σο τθεράσα τι τραμπίνας σαρ βακερένα ο εδάφια Ρωμαίους 12:1, 2;

⁷ Μερικοί αμαρέ αμαλένταρ ντα αμαρέ τζενένταρ κι αρχή μπέκιμ πρασάνα-αμέν επειδή προσπαθίνασα τι κεράς αλλαγές κο χαρακτήρας αμαρό. (1 Πέτρ. 4:3, 4) Οντουλά τζενέ μπέκιμ βακερένα ότι τθεράσα ο δικαίωμας τι κεράς σο μανγκάσα ντα ότι δεν πρέπει τι  μουκχάς τι βακερέν αμένγκε ο γιαβερά σο τι κεράς. Αλλά οντουλά σο να ντένα καν κο λάφια κι Ιεχωβάσκε να κερένα μπαγιά σο μανγκένα βον. Μουκχένα ι Μπενγκέσκο ντουνιάς τι λατσσαρέλ-λεν. (Διαβάνεν Ρωμαίους 12:1, 2) Σαρέ τθεράσα τι τραμπίνας: Είτε κα ατσσικιαράς αμαρό πουρανό χαρακτήρας, σο λατσσάρντιβελα κατά αμαρτία ντα κατά Μπενγκέσκο ντουνιάς, είτε κα μουκχάς κο Ιεχωβά τι κερέλ-αμέν ο πο λατσσό τζενό σο μπορίνασα τι αβάς ακανά.​—Ησ. 64:8.

8. Καγιά βοήθεια τθεράσα για τι νασκιαράς ο μπέτι σκέψεις ντα ο γκεραλέ χούγια;

⁸ Ο Ιεχωβά τζανέλα ότι χρειαζίντιβελα χρόνος ντα προσπάθεια για τι νασκιαράς ο μπέτι σκέψεις ντα ο γκεραλέ χούγια. (Ψαλμ. 103:​13, 14) Αλλά αντράλ πι Λαφίσταρ, πι πνευμάσταρ ντα πι οργανωσιάταρ, ο Ιεχωβά ντέλα-αμέν ι σοφία, ι ζορ ντα ι βοήθεια σο χρειαζίντιβασα για τι αλλάνας. Σίγουρα τθερέλα-τουμέν βοηθιντό. Ακανά ντικχέν μερικά πράγματα σο μπορίνενα τι κερέν για τι νικαβέν ατζέ πο μπουτ οπρά-τουμένταρ ο πουρανό χαρακτήρας ντα τι ερεσέν κο μπολντιπέ.

9. Σο μπορίνελα τι βοηθίνελ-τουμέν ο Λάφι ι Ντεβλέσκο τι κερέν;

⁹ Χρησιμοποιήνεν ι Γραφή για τι ρόντεν σο τζενέ ισινέν. Ο Λάφι ι Ντεβλέσκο ισί σαρ ανιάς. Μπορίνελα τι βοηθίνελ-τουμέν τι αγαβέν τουμαρό τρόπος σκέψης, οντουλά σο βακερένα ντα οντουλά σο κερένα. (Ιακ. 1:​22-25) Ο τζενό σο κερέλα-τουμέν μελέτη ντα γιαβερά γκοντιαβέρ πφραλά μπορίνενα τι σικαβέν τουμένγκε σο τι κερέν. Για παράδειγμας, αντράλ κατά Γραφή μπορίνενα τι βοηθίνεν-τουμέν τι ντικχέν καλέ πραγματέντε ισινέν λατσσέ ντα καλέντε να ισινέν. Οντουλά πφραλά μπορίνενα τι σικλιαρέν-τουμέν τι αρακχέν συμβουλές ι Γραφιάκε σο κα βοηθίνεν-τουμέν τι νασκιαρέν γκεραλέ χούγια. Ντα ο Ιεχωβά ισί πάντα οτθέ τι βοηθίνελ-τουμέν. Τζανέλα πο λατσσές σαριλένταρ σαρ τι βοηθίνελ-τουμέν. Τζανέλα σο τθερένα τουμαρέ γκίστε. (Παρ. 14:​10· 15:​11) Οτθάρ, τι αβέν σικλέ τι προσευχίντιβεν λέστε ντα τι σικλιαρέν-τουμέν λέσκε Λαφίσταρ κάθε ντιβές.

10. Σο σικλιλέν οντουλέσταρ σο αβιλό-πες κο Ίλι;

¹⁰ Τι αβέν σίγουροι ότι ο κανόνες ι Ιεχωβάσκε ισί ο πο λατσσέ. Σο-ντα μανγκέλα αμένταρ ο Ιεχωβά ισί αμαρέ λατσσιμάσκε. Οντουλά σο τζουβντιόνα αντικάς σαρ βακερένα λέσκε κανόνες σεβάνενα πουμαρό νεαυτός, τθερένα σκοπός κι ζωή ντα ισί μπαγιά ευτυχισμέ. (Ψαλμ. 19:​7-11) Οκιά μπάνταρ, ο τζενέ σο να ντένα καν κο κανόνες κι Ιεχωβάσκε ντα κερένα οντουλά σο μανγκέλα λένγκο σώμας, τθερένα μπέτι αποτελέσματα. Ντικχέν σο βακερέλα ο Ίλι. Βοβ μπαριλό εκχέ φαμιλιάτε σο μανγκέλα ι Ιεχωβάς. Αλλά κάνα ισινέ πο τερνό, τραμπιντάς μπέτι παρέες. Λέσκι ζωή ισινέ αντρέ κο ναρκωτικά, κο λουμνιπέ ντα κο τσοριπέ. Ο Ίλι βακερέλα ότι, καζόμ τζάλας, αβέλας πο χολιάκο ντα βίαιος. «Κι πραγματικότητα, κεράβας σαρέ οντουλά σο σικλιλόμας σαρ Χριστιανός μα τι κεράβ», βακερέλα. Όμως, να μπισταρντάς οντουλά σο σικλιλόας κάνα ισινέ χουρντό. Τελικά, αρχισάλο πάλι τι κερέλ μελέτη. Μαρντάς-πες για τι τσσιναβέλ ο γκεραλέ χούγια, ντα κο 2000 μπολντιλό. Σο λατσσιπέ ντικχλάς επειδή ντέλα-καν κο κανόνες κι Ιεχωβάσκε; Βοβ βακερέλα: «Ακανά τθεράβα ειρήνη μι γκοντιάτε ντα πάκι συνείδηση». * Σαρ σικαβέλα ανταγιά εμπειρία, οντουλά σο να ντένα καν κο κανόνες κι Ιεχωβάσκε κερένα ζιάνι πουμαρέ νεαυτόσκε. Αλλά ατζέ-ντα αζομάν, ο Ιεχωβά μανγκέλα τι βοηθίνελ-λεν τι αλλάνεν.

11. Καλά πράγματα μισίνελα ο Ιεχωβά;

 ¹¹ Σικλιόν τι μισίνεν σο-ντα μισίνελα ο Ιεχωβά. (Ψαλμ. 97:​10) Η Γραφή βακερέλα ότι ο Ιεχωβά μισίνελα ο “μπαρικανέ γιακχά, ι τσσιπ σο βακερέλα ψέματα ντα ο βαστά σο τσσορένα ο ρατ ι λατσσέ τζενένγκο”. (Παρ. 6:​16, 17) Ντα «τζουνγκάλα κατά τζενέ σο χάνα-πες ντα χουχαβένα ι γιαβερέν». (Ψαλμ. 5:6) Ο Ιεχωβά μισίνελα ανταλά πράγματα αζόμ μπουτ σο καταστραφιντάς σαρέ ι πφιρνέ τζενέν κο μπρεσά κι Νωέσκε επειδή πφερντέας ι πφουβ βία. (Γέν. 6:​13) Σκεφτίνεν εκ γιαβέρ παράδειγμας. Αντράλ κατά προφήτης Μαλαχίας, ο Ιεχωβά βακερντάς ότι μισίνελα οντουλέν σο κανονίνενα πφιρνιμάσαρ τι χωρίνεν πουμαρέ ρομέσταρ ή πουμαρέ ρομνιάταρ. Ο Ντεβέλ να μανγκέλα λένγκι λατρεία ντα κα μανγκέλ λένταρ λογαριασμός οντουλένγκε σο κερένα.​—Μαλ. 2:​13-16· Εβρ. 13:4.

12. Σο μανγκέλα τι βακερέλ “τι τζουνγκάς κατά πφιρνιπέ”;

¹² Ο Ιεχωβά μανγκέλα “τι τζουνγκάς κατά πφιρνιπέ”. (Ρωμ. 12:9) Κάνα τζουνγκάσα εκχέ πραγμάσταρ, να μανγκάσα ούτε τι ντικχάς-λες. Ανέν τουμαρέ γκοντιάτε σο κα κερένας άμα εκ τζενό κα βακερέλας τουμένγκε τι χαν εκ χαλαντό χαμπέ. Σάντε σο σκεφτίνενα-λες λέλα-τουμέν τσσαντιπέ. Αντικάς-ντα, σάντε σο σκεφτίνασα τι κεράς κάτι σο να μανγκέλα ο Ιεχωβά, πρέπει τι τζουνγκάς.

13. Σόσκε πρέπει τι αρακχαβάς αμαρί γκοντί;

¹³ Τι αρακχαβέν τουμαρί γκοντί. Οντουλά σο σκεφτίνασα επηρεάνενα οντουλά σο κεράσα. Άκ’ σόσκε ο Ιησούς σικλιαρντάς-αμέν τι νασκιαράς ο σκέψεις σο μπορίνενα τι γκερέν-αμέν εκχέ μπαρέ αμαρτιάτε. (Ματθ. 5:​21, 22, 28, 29) Μανγκάσα τι κεράς ο γκι αμαρε Νταντέσκο, αντικάς νανέ; Οτθάρ, ισί μπουτ σημαντικός τι νασκιαράς σουγκό σο-ντα μπέτι σκέψεις αβένα αμαρέ γκοντιάτε.

14. Σο σικαβένα τουμαρέ λάφια, ντα καλέ ερωτησιέντε πρέπει τι απαντίνας;

¹⁴ Τι κερέν κουμάντος τουμαρέ λάφια. Ο Ιησούς βακερντάς: «Σο-ντα νικιόλα κατά μούι αβέλα κατά γκι». (Ματθ. 15:​18) Βα, αμαρέ λάφια σικαβένα σο τζενέ ισινάμ αντρ’ αμέντε. Οτθάρ, πουτσέν-τουμέν: “Βακεράβα ι αλήθεια, ατζέ-ντα άμα νταράβα ότι κα αρακχάβ μο μπελιάς; Σαρ παντριμέ τζενό, προσοχίναβα για μα τι περάβ γιαβερένγκε; Κεράβα σο νακχέλα μι βαστένταρ για μα τι κεράβ λουμνικανέ λάφια; Κεράβα κοβλό λάφι κάνα εκ τζενό νευριασκιαρέλα-μαν;” Ισί λατσσό τι σκεφτίνεν ανταλά ερωτήσεις. Τουμαρέ λάφια ισί σαρ ο σουβντό τθαβ κο σέα. Άμα κα κερέν σο νακχέλα  τουμαρέ βαστένταρ για τι σικτίνεν, σαρ τι βακεράας, ο κουσίματα, ο ψέματα ντα ο λουμνικανέ λάφια κατά συζητήσεις σο κερένα, κα αβέλ τουμένγκε πο εύκολος τι νικαβέν οπρά-τουμένταρ ο πουρανός χαρακτήρας.

15. Σο μανγκέλα τι βακερέλ τι καρφώνας αμαρό πουρανό χαρακτήρας «κο κας»;

¹⁵ Mανγκέν τι κερέν σο-ντα χρειαζίντιβελα. Ο απόστολος Παύλος βακερντάς εκ παράδειγμας για τι σικλιαρέλ-αμέν καζόμ σημαντικός ισί τι αλλάνας αμαρί ζωή. Γραφιντάς ότι πρέπει τι καρφώνας αμαρό πουρανό χαρακτήρας «κο κας». (Ρωμ. 6:6) Γιαβερέ λαφίντζαρ, πρέπει τι κεράς οντουβά σο κερντάς ο Χριστός. Πρέπει τι «μουνταράς» ο σκέψεις ντα ο χούγια σο μισίνελα ο Ιεχωβά. Σάντε αντικάς κα τθεράς πάκι συνείδηση ντα κα τθεράς ι ευκαιρία τι τζουβντιάς για πάντα. (Ιωάν. 17:3· 1 Πέτρ. 3:​21) Τι ντεν-τουμέν γκοντί ότι ο Ιεχωβά να κα αλλάνελ πο κανόνες για τι κερέλ αμαρό γκι. Αμέν πρέπει τι αλλάνας ντα τι ντας καν κο κανόνες λέσκε.​—Ησ. 1:​16-18· 55:9.

16. Σόσκε δεν πρέπει τι τσσιναβάς τι τζας κόντρα κο πράγματα σο μανγκέλα ο σώμας;

¹⁶ Μα τσσιναβέν τι τζαν κόντρα κο λάθος πράγματα σο μανγκέλα ο σώμας. Ατζέ-ντα σοράν τουμαρέ μπολντιμάσταρ, κα χρειαζίντιβελ τι τζαν κόντρα κο πράγματα σο μανγκέλα ο σώμας. Ντικχέν σο αβιλό-πες κο Μαρίσιου. Κάνα ισινέ τερνό, τζάλας μουρσέντζαρ. Σοράν, γνωριντάς ι Ιεχωβάσκε λαός ντα αρχισάλο τι κερέλ μελέτη. Κερντάς αλλαγές πι ζωγιάτε, ντα κο 2002 μπολντιλό. Παρόλο σο υπηρετίνελα ι Ιεχωβάς μπουτ μπρεσά ακανά, ο Μαρίσιου βακερέλα: «Για τι βακεράβ μι αλήθεια, μπάζιμα χρειαζίντιβελα τι τασαβάβ ο μπέτι πράγματα σο μανγκάβα». Αλλά ανταβά να κερέλα-λες τι χασαρέλ πι ζορ. Οκιά μπάνταρ, σαρ βακερέλα: «Ντέλα-μαν ζορ η σκέψη ότι, αφού τραμπίναβα μα τι κεράβ-λεν, μπορίναβα τι κεράβ ο γκι ι Ιεχωβάσκο». *

17. Κάβα πράγμας ντέλα-τουμέν ζορ οντουλένταρ σο αβιλέ-πες κι Ναμπίχα;

¹⁷ Κερέν προσευχή για τι βοηθίνελ-τουμέν ο Ιεχωβά ντα ντεν μπέσα λέσκε πνευμάστε, όχι τουμαρέ ζοριάτε. (Γαλ. 5:​22· Φιλιπ. 4:6) Για τι νικαβάς οπρ’ αμένταρ ο πουρανό χαρακτήρας ντα μα τι ιριάς-λες ατζέκ φαρ, πρέπει τι μανγκάς-λες ανταβά σαρέ αμαρέ γκίσαρ. Ντικχέν σο αβιλό-πες κι Ναμπίχα. Λάκο ντατ μουκχλάς-λα κάνα ισινέ σιοβέ μπρεσένγκι.  «Ανταβά αντάς μάνγκε μπαρί ντουκχ αντρέ μι γκίστε», βακερέλα βόι. Καζόμ μπαριόλας, η Ναμπίχα τθερέλας πο μπουτ χολί αντρέ πέστε ντα χάλας-πες ι γιαβερέντζαρ. Αρχισάλι τι μπικινέλ ναρκωτικά, ασταρντέ-λα ντα μπεσλί μερικά μπρεσά κι φυλακή. Ο Μάρτυρες σο αρακχλέ-λα κι φυλακή κερντέ-λα μελέτη. Η Ναμπίχα αρχισάλι τι κερέλ μπαρέ αλλαγές. Βόι βακερέλα: «Να ισινέ μάνγκε δύσκολος τι μουκχάβ μερικά γκεραλέ χούγια. Ισινέ όμως μπουτ δύσκολος τι τσσιναβάβ ι τσιγάρα». Η Ναμπίχα μαρντάς-πες πο μπουτ από εκ μπρες ντα τελικά τσσιναντάς ανταβά γκεραλό χούι. Σαρ; «Πο μπουτ», σαρ βακερέλα βόι, «καταφεριντόμ-λεν επειδή να τσσιναβάβας τι κεράβ προσευχή κο Ιεχωβά». Ακανά βακερέλα κο γιαβερά: «Ισινόμ σίγουρη ότι άμα με μπορισάλομ τι κεράβ αλλαγές για τι κεράβ ο γκι ι Ιεχωβάσκο, σαρέ μπορίνενα!» *

18. Σο κερντέ μπουτ υπηρέτες ι Ντεβλέσκε σαρ βακερένα ο εδάφια 1 Κορινθίους 6:​9-11;

¹⁸ Κο πρώτος αιώνας, μερικοί σο ο Ιεχωβά τραμπιντάς τι κυβερνίνεν ι Χριστόσαρ κερένας μπέτι πράγματα ανγκλέ. Για παράδειγμας, τζάνας γιαβερέντζαρ ενώ ισινέ παντριμέ, τζάνας μουρσά μουρσέντζαρ ντα τζουβλιά τζουβλίντζαρ ντα ισινέ τσορά. Αλλά ο Ντεβέλ βοηθιντάς-λεν αντράλ κατά άγιος πνεύμας τι αλλάνεν πουμαρό χαρακτήρας. (Διαβάνεν 1 Κορινθίους 6:​9-11) Αντικάς αντιβές-ντα, η Γραφή βοηθιντάς εκατομμύρια τζενέν τι κερέν αλλαγές πουμαρέ ζωγιάτε. * Βον τσσιναντέ μπουτ γκεραλέ χούγια. Λένγκο παράδειγμας σικαβέλα ότι τουμέν-ντα μπορίνενα τι κερέν αλλαγές κο χαρακτήρας τουμαρό ντα τι τσσιναβέν ο γκεραλέ χούγια για τι ερεσέν κο μπολντιπέ.

19. Σο κα ντικχάς κο γιαβέρ μάθημας;

¹⁹ Οντουλά σο μανγκένα τι μπολντιόν να ερεσέλα τι νικαβέν οπρά-πουμένταρ ο πουρανό χαρακτήρας, πρέπει τι μαρέν-πες τι ιρίν-ντα ο νεβό χαρακτήρας. Ο γιαβέρ μάθημας κα σικαβέλ σαρ τι κεράς-λες ανταβά ντα σαρ μπορίνενα ο γιαβερά τι βοηθίνεν-αμέν.