1, 2. Σαρ βοηθίνελα ο παράδειγμας ι απόστολε Παυλόσκο ι πρεσβυτερόν αντιβές;

 Ο ΑΠΟΣΤΟΛΟΣ ΠΑΥΛΟΣ μανγκέλας ι πφραλέν. Μαρέλας-πες λένγκε. (Πράξ. 20:​31) Αλλά ο πφραλά-ντα μανγκένας-λες μπουτ. Εκ φαρ, κάνα ο πρεσβύτεροι κατά Έφεσος σικλιλέ ότι να κα ντικχένας-λες γιαβέρ φαρ, «ροντέ μπουτ». (Πράξ. 20:​37) Σαρ ο Παύλος, αντικάς αμαρέ μπουτιαρνέ πρεσβύτεροι-ντα μανγκένα μπουτ πουμαρέ πφραλέν ντα πφενίν ντα κερένα σο νακχέλα λένγκε βαστένταρ για τι βοηθίνεν-λεν. (Φιλιπ. 2:​16, 17) Μπάζιμα όμως ο πρεσβύτεροι τθερένα δυσκολίες. Σαρ κα νακχαβέν-λεν;

² Αμαρέ μπουτιαρνέ πρεσβύτεροι μπορίνενα τι σικλιόν κατά παράδειγμας ι Παυλόσκο. (1 Κορ. 11:1) Ο Παύλος να τθερέλας ι ζορ ι αγγελόνγκι. Ισινέ εκ ατελής τζενό σο δυσκολίντιβελας μπάζιμα τι κερέλ ο σωστός. (Ρωμ. 7:​18-20) Επίσης, μαρέλας-πες σαβέ τι μανγκές προβληματέντζαρ. Αλλά ο Παύλος να μουκχλάς-πες ούτε χασαρντάς πι χαρά. Κάνα ο πρεσβύτεροι μοιάζενα κο Παύλος, μπορίνενα τι νακχαβέν ο δυσκολίες ντα τι ατσσικιαρέν πουμαρί χαρά καζόμ υπηρετίνενα ι Ιεχωβάς. Κα ντικχάς σαρ αβέλα-πες ανταβά.

3. Σο κα σικλιάς ανταλέ μαθημάστε, ντα σο λατσσιπέ κα ντικχάς;

³ Ανταλέ μαθημάστε, κα ντικχάς σταρ δυσκολίες σο τθερένα ο πρεσβύτεροι. (1) Τι αρακχέν σαάτι εμ ι εργόσκε εμ γιαβερέ πραγματένγκε, (2) τι αβέν λατσσέ τσομπάνια, (3) τι ντεν-λεν πέρα πουμαρέ ατελειέντζαρ ντα (4) τι νταϊντίνεν ο ατέλειες ι γιαβερένγκε. Κα ντικχάς σαρ νακχαβέλας ο Παύλος ανταλά δυσκολίες ντα σαρ μπορίνενα ο πρεσβύτεροι τι μοιάζεν λέστε.

4. Σόσκε μπέκιμ τι δυσκολίντιβενα ο πρεσβύτεροι τι ντεν λατσσό παράδειγμας κο έργος;

⁴ Σόσκε ισί δύσκολος. Ο πρεσβύτεροι πρέπει τι ντεν λατσσό παράδειγμας κο έργος, αλλά τθερένα μπουτ γιαβερά-ντα πράγματα τι κερέν. Για παράδειγμας, μπουτ λένταρ κερένα ι εισήγηση κι συνάθροιση Ζωή ντα Έργος ντα ο Σικλιαριπέ ι Γραφιάκο κι Κχανγκιρί. Ντα τθερένα τι κερέν ομιλίες-ντα. Επίσης, ντένα μπουτ πουμαρέ σαατίσταρ για τι σικλιαρέν ι διακονικέ υπηρετόν ντα τι ντεν ζορ χαράσαρ κο πφραλά ντα κο πφενιά. (1 Πέτρ. 5:2) Ισί πρεσβύτεροι σο κερένα μπουτί για τι λατσσαρέν ντα τι περιποιήνεν Αίθουσες Βασιλείας ντα γιαβερά τθανά σο οτθέ ντιντιόλα λατρεία κο Ιεχωβά. Όμως, η πο σημαντική μπουτί ι πρεσβυτερόνγκι ισί τι κερέν ο έργος σαρ ο γιαβερά-ντα πφραλά κι κχανγκιρί.​—Ματθ. 28:​19, 20.

5. Σο παράδειγμας μουκχλάς ο Παύλος κο έργος;

⁵ Ο παράδειγμας ι Παυλόσκο. Κο εδάφιος Φιλιππησίους 1:​10 ο Παύλος βακερέλα αμένγκε σόσκε ισινέ λατσσό κο έργος ακαλέ λαφίντζαρ: «Τι αβέν σίγουροι ότι αγαβένα καλά ισί ο πο σημαντικά πράγματα». Ο Παύλος κερέλας βοβ-ντα ανταβά σο βακερντάς κο γιαβερά. Τθερέλας εκ έργος τι κερέλ, ντα ισινέ ο πο σημαντικός πράγμας λέσκε ζωγιάτε. Κερέλας έργος «ανγκλάλ μπουτέ τζενέντε ντα κχερ κχερέστε». (Πράξ. 20:​20) Να κερέλας έργος εκ συγκεκριμέ σαάτι ή σάντε εκ ντιβές αντρέ κι εβδομάδα, αλλά κάθε φαρ-ντα σο ντιντιόλας-λες η ευκαιρία. Για παράδειγμας, καζόμ μπεκλεντίνελας κι Αθήνα, βακερντάς ο λατσσέ αμπέρια σημαντικέ τζενένγκε ντα χάνικ λένταρ ασουντέ-λες. (Πράξ. 17:​16, 17, 34) Ατζέ-ντα κάνα “πφαντιλό κι φυλακή”, ο Παύλος κερέλας λάφι ι Ντεβλέσκε οντουλέντε σο ντικχέλας.​—Φιλιπ. 1:​13, 14· Πράξ. 28:​16-24.

6. Σο κερντάς ο Παύλος για τι σικλιαρέλ ι γιαβερέν;

⁶ Ο Παύλος χρησιμοποιήνελας πο σαάτι καζόμ πο λατσσές αβέλας-πες. Μπουτ φαρ λέλας γιαβερέν-ντα παλά-πέστε κο έργος. Για παράδειγμας, κο πρώτος ιεραποστολικός ταξίδι, γκιλό παλά-λέστε ο Ιωάννης Μάρκος ντα, κο δεύτερος, ο Τιμόθεος. (Πράξ. 12:​25· 16:​1-4) Σίγουρα, ο Παύλος κερέλας ο πο λατσσό για τι σικλιαρέλ ανταλέ μουρσέν σαρ τι κερέν ο πράγματα αντρέ κι κχανγκιρί, σαρ τι αβέν λατσσέ τσομπάνια ντα σαρ τι σικλιαρέν λατσσές.​—1 Κορ. 4:17.

7. Σαρ μπορίνενα ο πρεσβύτεροι τι κερέν οντουλά σο βακερντάς ο Παύλος κο εδάφια Εφεσίους 6:​14, 15;

⁷ Σικλιαριπέ. Ο πρεσβύτεροι να μοιάζενα κο Παύλος σάντε κάνα κερένα έργος κχερ κχερέστε, αλλά κάνα ισί έτοιμοι-ντα τι ντεν μαρτυρία κάι-ντα τι αβέν. (Διαβάνεν Εφεσίους 6:​14, 15) Για παράδειγμας, ο πρεσβύτεροι μπορίνενα τι ντεν μαρτυρία κάνα τζάνα τι κινέν πράγματα ή κάνα ισί πουμαρέ μπουτιάτε. Ή κάνα βοηθίνενα τι κερντιόλ εκ τθαν σο οτθέ ντιντιόλα  λατρεία ι Ιεχωβάς, μπορίνενα τι βακερέν ο λατσσέ αμπέρια κο γείτονες ή γιαβερέ τζενένγκε σο τζάνα οτθέ. Σαρ ο Παύλος, ο πρεσβύτεροι μπορίνενα τι χρησιμοποιήνεν ο σαάτι σο κερένα έργος για τι σικλιαρέν ι γιαβερέν, εμ ι διακονικέ υπηρετόν.

8. Σο μπέκιμ τι χρειαζίντιβελα τι κερέλ καέκ φαρ εκ πρεσβύτερος;

⁸ Ο πρεσβύτεροι δεν πρέπει ποτές τι ντεν αζόμ μπουτ πουμαρέ σαατίσταρ κο διορισμοί κι κχανγκιριάκε ή κι περιοχιάκε, ντα αντικάς μα τι τθερέν σαάτι για τι κερέν έργος. Για τι τθερέν σαάτι εμ ι εργόσκε εμ γιαβερέ πραγματένγκε, μπέκιμ τι χρειαζίντιβελα καέκ φαρ τι βακερέν «νάα» μερικέ διορισμόντε. Άμα κερντέ προσευχή ντα σκεφτιντέ λατσσές, μπέκιμ τι αγαβέν ότι, άμα κα κερένας οντουβά διορισμός, κα τσσουβένας κι νάκρη γιαβερά πο σημαντικά πράγματα. Αντρέ ανταλέντε ισί τι κερέν ι φαμιλιάκι λατρεία κάθε εβδομάδα, τι κερέν ο πο λατσσό κο έργος ή τι σικλιαρέν πουμαρέ τσσαβέν τι κερέν έργος. Ισί πρεσβύτεροι σο δυσκολίντιβενα τι βακερέν «νάα» εκχέ διορισμόστε, αλλά ο Ιεχωβά αγαβέλα ότι μανγκένα τι ντεν πουμαρέ σαατίσταρ σαρέ κο σημαντικά πράγματα.

9. Σο δυσκολίνελα ι πρεσβυτερόν σο τθερένα τι κερέν μπουτ πράγματα;

⁹ Σόσκε ισί δύσκολος. Ο λαός ι Ιεχωβάσκο τθερέλα μπουτ δοκιμασίες. Ανταλέ τελευταίε ντιβεσέντε, σαρέ χρειαζίντιβασα ζορ ντα λοκχιπέ. Ντα ισί τζενέ σο μανγκένα βοήθεια για μα τι κερέν εκ λάθος. (1 Θεσ. 5:​14) Όμως, ο πρεσβύτεροι ναστί νασκιαρένα σαρέ ο δοκιμασίες σο τθερέλα ο λαός ι Ιεχωβάσκο. Αλλά ο Ιεχωβά μπεκλεντίνελα λένταρ τι κερέν σο νακχέλα λένγκε βαστένταρ για τι ντεν ζορ ντα τι αρακχαβέν λέσκε μπρακέν. Σαρ αβέλα-πες ο πρεσβύτεροι σο τθερένα τι κερέν μπουτ πράγματα τι αρακχέν σαάτι για τι αβέν πασέ κο πφραλά ντα κο πφενιά;

10. Σο κερέλας ο Παύλος για τι αρακχαβέλ ι Ιεχωβάσκε λαός σαρ βακερέλα ο εδάφιος 1 Θεσσαλονικείς 2:7;

¹⁰ Ο παράδειγμας ι Παυλόσκο. Ο Παύλος ρόντελας τρόπους τι ισαρέλ πι πφραλέν ντα τι ντελ-λεν ζορ. Σαρ ο Παύλος, ο πρεσβύτεροι-ντα ισί λατσσό τι σικαβέν μανγκιπέ ντα λατσσιπέ ι Ιεχωβάσκε λαόσκε. (Διαβάνεν 1 Θεσσαλονικείς 2:7) Ο Παύλος βακερέλας ι πφραλένγκε ντα ι πφενίνγκε ότι μανγκέλας-λεν εμ βοβ αλλά εμ ο Ιεχωβά. (2 Κορ. 2:4· Εφεσ. 2:4, 5) Ο Παύλος ντικχέλας ι γιαβερέν κι κχανγκιρί σαρ αμαλά ντα νακχέλας σαάτι λέντζαρ. Σικαβέλας ότι ντέλας λένγκε μπέσα κάνα βακερέλας λένγκε σο νταραβέλας-λες ντα κατέ ισινέ μπίζουρανο. (2 Κορ. 7:5· 1 Τιμ. 1:​15) Όμως, ο Παύλος να τθερέλας πι γκοντιάτε σάντε πο προβλήματα. Μανγκέλας τι βοηθίνελ ι πφραλέν.

11. Σόσκε ντέλας συμβουλή ο Παύλος κο πφραλά ντα κο πφενιά;

¹¹ Ισινέ φαρ σο ο Παύλος χρειαζίντιβελας τι ντελ συμβουλή κο πφραλά ντα κο πφενιά. Αλλά ποτές να κερέλας-λες ανταβά για τι νικαβέλ οπρά-λέντε πο νεύρα. Ντέλας-λεν συμβουλή  σόσκε πφαμπόλας λένγκε ντα μανγκέλας τι αρακχαβέλ-λεν. Κερέλας ο πο λατσσό για τι αγαβέν εύκολα ο γιαβερά λέσκι συμβουλή ντα χάλας-λες ανάγκη σαρ κα λένας-λα. Για παράδειγμας, εκχέ επιστολιάτε σο μπουτσσαντάς κο Κορίνθιοι, ο Παύλος ντινάς-λεν πφαρί συμβουλή. Γραφιντάς οντιά επιστολή, ντα σοράν μπουτσσαντάς ι Τιτός κι Κόρινθος. Ο Παύλος μανγκέλας μπουτ τι σικλιόλ σαρ λιντέ ο Κορίνθιοι λέσκι συμβουλή. Καζόμ μπουτ αβιλό λέσκο γκι κάνα σικλιλό ότι ντινέας-λα καν!​—2 Κορ. 7:6, 7.

12. Σαρ μπορίνενα ο πρεσβύτεροι τι ντεν ζορ ι πφραλέν ντα ι πφενίν;

¹² Σικλιαριπέ. Ο πρεσβύτεροι μοιάζενα κο Παύλος κάνα νακχένα σαάτι ι πφραλέντζαρ ντα ι πφενίντζαρ. Εκ τρόπος για τι κερέν-λες ανταβά ισί τι τζαν νωρίς κο συναθροίσεις για τι κερέν λάφι ι πφραλέντζαρ ντα τι ντεν-λεν ζορ. Μπουτ φαρ, σάντε χάνικ σαάτι ερεσέλα για τι ντιντιόλ εκχέ πφραλέστε ή εκχέ πφενιάτε η ζορ σο τθερέλα ανάγκη. (Ρωμ. 1:​12· Εφεσ. 5:​16) Εκ πρεσβύτερος σο μοιάζελα κο Παύλος, κα χρησιμοποιήνελ ι Γραφή-ντα για τι ντελ ζορ ι πφραλέν ντα ι πφενίν ντα τι βακερέλ λένγκε ότι ο Ντεβέλ μανγκέλα-λεν. Επίσης, εκ πρεσβύτερος σικαβέλα λένγκε καζόμ μπουτ μανγκέλα-λεν. Κερέλα λέντζαρ λάφι μπουτ φαρ ντα ρόντελα ευκαιρίες για τι ισαρέλ-λεν. Κάνα πρέπει τι ντελ εκ συμβουλή, κερέλα-λες ανταβά κατά Λάφι ι Ντεβλέσκο. Κερέλα λάφι ξεκάθαρα αλλά λατσσιμάσαρ σόσκε χάλα-λες ανάγκη σαρ κα λεν ο γιαβερά λέσκε λάφια.​—Γαλ. 6:1.

13. Σο μπέκιμ κερέλα εκ πρεσβύτερος κάνα ντικχέλα πο ατέλειες;

¹³ Σόσκε ισί δύσκολος. Ο πρεσβύτεροι νανέ τέλειοι. Κερένα λάθη, σαρ κερένα σαρέ ο γιαβερά. (Ρωμ. 3:​23) Μπέκιμ μαρένα-πες τι ντικχέν πουμαρέ ατέλειες σαρ μανγκέλα ο Ιεχωβά. Μερικοί ντικχένα αζόμ μπουτ πουμαρέ ατέλειες σο χασαρένα πουμαρί ζορ. Γιαβερά μπέκιμ αμντίνενα ότι λένγκε ατέλειες νανέ αζόμ μπαρέ, ντα αντικάς να κερένα ο αλλαγές σο χρειαζίντιβελα.

14. Σαρ βοηθίνελας ι Παυλός η ταπεινότητα τι ντελ-λεν πέρα πι ατελειέντζαρ σαρ βακερέλα ο εδάφιος Φιλιππησίους 4:13;

¹⁴ Ο παράδειγμας ι Παυλόσκο. Ο Παύλος ισινέ ταπεινός, οτθάρ αγαβέλας ότι ναστί ντέλας-λεν πέρα πι ατελειέντζαρ κορκορό. Χρειαζίντιβελας ζορ κατά Ντεβέλ. Ανγκλέ, ο Παύλος τθερέλας σορό ντα τζάλας μπαρί κόντρα κο Χριστιανοί. Σοράν, όμως, αγαντάς ότι κερντάς λάθη ντα μανγκλάς τι αλλάνελ. (1 Τιμ. 1:​12-16) Ι Ιεχωβάσκε βοηθειάσαρ, ο Παύλος αβιλό εκ ταπεινός τσομπάνης σο μανγκέλας ι γιαβερέν ντα πφαμπόλας λένγκε. Ο ατέλειες σο τθερέλας ανένας ντουκχ λέσκε γκίστε. Αλλά τραμπιντάς τι ντελ μπέσα κι συγχώρηση κι Ιεχωβάσκι ντα μα τι τθερέλ πι γκοντιάτε πο ατέλειες.  (Ρωμ. 7:​21-25) Να μπεκλεντίνελας τι αβέλ τέλειος. Αλλά μαρέλας-πες τι αβέλ πο λατσσό Χριστιανός, ισινέ ταπεινός ντα ντέλας μπέσα κο Ιεχωβά ότι κα βοηθίνελας-λες τι κερέλ πο έργος.​—1 Κορ. 9:​27· διαβάνεν Φιλιππησίους 4:13.

15. Σαρ πρέπει τι ντικχέν ο πρεσβύτεροι πουμαρέ ατέλειες;

¹⁵ Σικλιαριπέ. Ο πρεσβύτεροι να τθερένα ανταβά προνόμιος επειδή ισί τέλειοι. Όμως, ο Ιεχωβά μπεκλεντίνελα λένταρ τι αγαβέν πουμαρέ λάθη ντα τι αβέν πο λατσσέ Χριστιανοί. (Εφεσ. 4:​23, 24) Εκ πρεσβύτερος πρέπει τι ντικχέλ πο νεαυτός αντράλ κατά σικλιαριπέ ι Γραφιάκο ντα τι κερέλ σο-ντα αλλαγές χρειαζίντιβελα. Αζομάν, ο Ιεχωβά κα βοηθίνελ-λες τι αβέλ ευτυχισμέ ντα τι τζαλ-λεν λατσσές πι διορισμόστε.​—Ιακ. 1:25.

16. Σο μπέκιμ τι αβέλ-πες άμα εκ πρεσβύτερος ντικχέλα ο ατέλειες ι γιαβερένγκε;

¹⁶ Σόσκε ισί δύσκολος. Ο πρεσβύτεροι μπέκιμ ντικχένα ο ατέλειες ι γιαβερένγκε κι κχανγκιρί σόσκε νακχένα μπουτ σαάτι λέντζαρ. Άμα όμως να τθερένα πουμαρί γκοντί, μπέκιμ κα τσσουβέν πουμαρέ γκίστε, να κα σικαβέν λατσσιπέ ι γιαβερένγκε ή κα κρίνεν-λεν. Ο Παύλος βακερντάας ι Χριστιανόνγκε ότι ο Μπενγκ κα μανγκέλας τι αβέλ-πες ανταβά.​—2 Κορ. 2:​10, 11.

17. Σαρ ντικχέλας ο Παύλος ι πφραλέν ντα ι πφενίν;

¹⁷ Ο παράδειγμας ι Παυλόσκο. Ο Παύλος ντικχέλας ι πφραλέν ντα ι πφενίν σαρ μανγκέλα ο Ιεχωβά. Τζανέλας μπουτ λατσσές λένγκε λάθη σόσκε μπάζιμα οντουλά σο κερένας πφανγκένας λέσκο γκι. Ο Παύλος τζανέλας ότι γιαβέρ ισί τι κερέλ εκ γκεραλό πράγμας εκ τζενό ντα γιαβέρ ισί τι αβέλ γκεραλό τζενό. Μανγκέλας ι πφραλέν ντα ντικχέλας λένγκε λατσσέ ιδιότητες. Άμα ο πφραλά ντα ο πφενιά δυσκολίντιβενας τι κερέν ο σωστός, βοβ πακιάλας ότι μανγκένας τι κερέν-λες αλλά χρειαζίντιβενας βοήθεια.

18. Σο σικλιάσα οντουλένταρ σο κερντάς ο Παύλος ι Ευοδιάσαρ ντα ι Συντυχιάσαρ; (Φιλιππησίους 4:​1-3)

¹⁸ Για παράδειγμας, ανέν τουμαρέ γκοντιάτε σο κερντάς ο Παύλος ντουέ πφενίντζαρ κι κχανγκιρί κο Φίλιπποι. (Διαβάνεν Φιλιππησίους 4:​1-3) Ντικχίντιβελα ότι η Ευοδία ντα η Συντύχη να τζάνας-λεν λατσσές. Ο Παύλος σικαντάς λένγκε λατσσιπέ ντα να κριντάς-λεν. Ντικχέλας λένγκε λατσσέ ιδιότητες. Ισινέ πιστά πφενιά σο κερντέας λατσσό ναβ. Ο Παύλος τζανέλας ότι ο Ιεχωβά μανγκέλας-λεν. Ντικχέλας ανταλέ πφενίν σαρ ντικχέλας-λεν ο Ιεχωβά, οτθάρ βακερντάς λένγκε τι αρακχέν-λεν. Ντα επειδή ντικχέλας ο λατσσέ ιδιότητες ι γιαβερένγκε, να χασαρντάς πι χαρά ούτε πι λατσσέ αμαλέν οντουλέ κχανγκιριάτε.

19. (α) Σαρ μπορίνενα ο πρεσβύτεροι τι ντικχέν ι πφραλέν ντα ι πφενίν σαρ μανγκέλα ο Ιεχωβά; (β) Σο σικλιάσα κατά φωτογραφία ι πρεσβυτερόσαρ σο καθαρίνελα ι Αίθουσα Βασιλείας;

¹⁹ Σικλιαριπέ. Πρεσβύτεροι, ρόντεν ο λατσσέ ιδιότητες ι πφραλένγκε ντα ι πφενίνγκε. Σαρέ  ισί ατελείς. Αλλά ο κάθε εκ λένταρ τθερέλα ιδιότητες σο ισί μπουτ σουκάρ. (Φιλιπ. 2:3) Ισί μπαγιά ότι ο πρεσβύτεροι χρειαζίντιβελα καέκ φαρ τι διορθώνεν ι πφραλέν ντα ι πφενίν. Αλλά σαρ ο Παύλος, πρέπει τι μαρέν-πες μα τι ντικχέν σάντε σο πφαριαρέλα-λεν λένγκε λαφίνταρ ντα οντουλένταρ σο κερένα. Ισί πο λατσσό τι ντικχέν ο μανγκιπέ σο τθερέλα οντουβά τζενό ι Ιεχωβάσκε, ι υπομονή σο κερντάς κι υπηρεσία κι Ντεβλέσκι ντα ο λατσσιπέ σο μπορίνελα τι κερέλ. Ο πρεσβύτεροι σο ντικχένα ι γιαβερέν σαρ μανγκέλα ο Ιεχωβά βοηθίνενα ι πφραλέν ντα ι πφενίν κι κχανγκιρί τι μανγκέν ντα τι ντεν ζορ ο εκ ι γιαβερές.

20. Σαρ μπορίνενα ο πρεσβύτεροι μα τι τσσιναβέν τι ντικχέν λατσσιπέ κατά παράδειγμας ι Παυλόσκο;

²⁰ Πρεσβύτεροι, κα ντικχέν λατσσιπέ άμα να τσσιναβένα τι σικλιαρέν-τουμέν κατά παράδειγμας ι Παυλόσκο. Για παράδειγμας, κο Ευρετήριο Εκδόσεων Σκοπιάς, τζαν οτθέ σο βακερέλα «Παύλος» ντα σοράν οτθέ σο βακερέλα «παράδειγμα για τους πρεσβυτέρους». Καζόμ διαβάνενα οντουλά σο κα αρακχέν οτθέ, πουτσέν-τουμέν: “Σαρ κα βοηθίνελ-μαν ο παράδειγμας ι Παυλόσκο τι ατσσικιαράβ μι χαρά καζόμ υπηρετίναβα σαρ πρεσβύτερος;”

21. Καλέ πραγμάσκε μπορίνενα τι αβέν σίγουροι ο πρεσβύτεροι;

²¹ Πρεσβύτεροι, τι ντεν-τουμέν γκοντί ότι ο Ιεχωβά να μανγκέλα τουμένταρ τι αβέν τέλειοι. Μανγκέλα τι αβέν πιστοί. (1 Κορ. 4:2) Ο Ιεχωβά εκτιμίνελας σαρέ οντουλά σο κερντάας ο Παυλός ντα λέσκι πίστη. Μπορίνενα τι αβέν σίγουροι ότι αβέλα λέσκο γκι σαρέ οντουλένταρ σο κερένα τουμέν-ντα για τι υπηρετίνεν-λες. Ο Ιεχωβά ποτές να κα «μπιστρέλ οντουλά σο κερντέν ντα ο μανγκιπέ σο σικαντέν λέσκε ναβέσκε, αφού υπηρετιντέν ντα συνεχίνενα τι υπηρετίνεν ι αγιόν».​—Εβρ. 6:10.