1. Καβά πράγμας κερέλα μπουτέ τζενέν σο αβένα πρώτη φαρ κι συνάθροιση τι σαστίνεν; (Ντικχέν ι φωτογραφία-ντα)

 ΣΚΕΦΤΙΝΕΝ εκ ζευγάρι σο τζάλα πρώτη φαρ κι συνάθροιση κι Αίθουσα Βασιλείας σο τθερένα ο Μάρτυρες ι Ιεχωβάσκε. Σαστίνενα κατά σουκάρ τρόπος σο χαιρετίνενα-λεν ο πφραλά κι κχανγκιρί ντα κατά μανγκιπέ σο σικαβένα ο εκ ι γιαβερέσκε. Καζόμ βουρτίνενα πουμαρέ κχερέστε σοράν κατά συνάθροιση, η ρομνί βακερέλα πι ρομέσκε: “Ο Μάρτυρες ι Ιεχωβάσκε τθερένα κάτι διαφορετικός​—κάτι σο μπεϊντίναβα”.

2. Σόσκε μερικοί τσσιναντέ τι υπηρετίνεν ι Ιεχωβάς;

² Ο μανγκιπέ σο ισί αντρέ κι Χριστιανική κχανγκιρί ισί μπαγιά εντυπωσιακός. Σίγουρα, ο Μάρτυρες ι Ιεχωβάσκε νανέ τέλειοι. (1 Ιωάν. 1:8) Οτθάρ, καζόμ πο λατσσές σικλιάσα ι γιαβερέν κι κχανγκιρί, αζόμ πο μπουτ κα ντικχάς κάποια κατά λάθη σο κερένα. (Ρωμ. 3:​23) Δυστυχώς, μερικοί μουκχλέ ο λάθη ι γιαβερένγκε τι κερέν-λεν τι τσσιναβέν τι υπηρετίνεν ι Ιεχωβάς.

3. Καλέ πραγμάσταρ αγαβάσα καλά ισί ο αληθινοί Χριστιανοί; (Ιωάννης 13:​34, 35)

³ Ντικχέν πάλι ο εδάφιος ανταλέ μαθημάσκο. (Διαβάνεν Ιωάννης 13:​34, 35) Σαρ μπορίνενα ο τζενέ τι αγαβέν καλά ισί ο αληθινοί Χριστιανοί; Κατά μανγκιπέ σο κα σικαβένας ο εκ κο γιαβέρ. Η Γραφή να βακερέλα ότι κα αβένας τέλειοι. Τσσουβέν σημασία επίσης ότι ο Ιησούς να βακερντάς: “Ανταλέσταρ κα αγαβέν τουμέν ότι ισινέν μο μαθητές”. Βακερντάς: «Ανταλέσταρ κα αγαβέν σαρέ ότι ισινέν μο μαθητές». Ανταλέ λαφίντζαρ, ο Ιησούς σικαντάς ότι, όχι σάντε λέσκε μαθητές, αλλά εμ ο τζενέ σο να ισινέ κι Χριστιανική κχανγκιρί κα αγαβένας ι αληθινέ μαθητέν κατά αληθινός μανγκιπέ σο σικαβένα ο εκ κο γιαβέρ.

4. Σο μπορεί τι σκεφτίνεν μερικοί ι αληθινέ Χριστιανόνγκε;

 ⁴ Μερικοί σο νανέ Μάρτυρες ι Ιεχωβάσκε μπέκιμ σκεφτίνενα: “Σαρ βοηθίνελα-αμέν ο μανγκιπέ τι αγαβάς καλά ισί ο αληθινοί Χριστιανοί; Σαρ σικαβέλας ο Ιησούς μανγκιπέ πι μαθητένγκε; Ντα σαρ αβέλα-πες τι κερέλ εκ τζενό αντιβές οντουβά σο κερέλας ο Ιησούς;” Σαρέ αμέν σο ισινάμ Μάρτυρες κα αβέλας λατσσό τι κεράς σκέψεις οπράλ ανταλέ ερωτησιέντε. Μπέκιμ ανταβά τι βοηθίνελ-αμέν τι σικαβάς πο μπουτ μανγκιπέ, ειδικά κάνα νταϊντίνασα ο ατέλειες ο εκ ι γιαβερέσκε.​—Εφεσ. 5:2.

5. Εξηγίνεν ο λάφια ι Ιησούσκε σο ισί κο εδάφια Ιωάννης 15:​12, 13.

⁵ Ο Ιησούς σικαντάς ότι λέσκε μαθητές κα μανγκένας ο εκ ι γιαβερές εκχέ ξεχωριστέ τροπόσαρ. (Διαβάνεν Ιωάννης 15:​12, 13) Ντικχέν ότι ο Ιησούς ντινάς-λεν ακαγιά εντολή: «Μανγκέν ο εκ ι γιαβερές αντικάς σαρ μανγκλόμ-τουμέν με». Σο μανγκέλα τι βακερέλ ανταβά; Σαρ σικαντάς πο σοράν ο Ιησούς, μανγκέλα τι βακερέλ τι μανγκάς ι γιαβερέν πο μπουτ αμαρέ νεαυτόσταρ. Ανταβά μανγκιπέ τσσίντελα εκχέ Χριστιανός ατζέ-ντα τι μερέλ πι πφραλένγκε, άμα κα χρειαζίντιβελ. b

6. Σαρ σικαβέλα ο Λάφι ι Ντεβλέσκο καζόμ σημαντικός ισί ο μανγκιπέ;

⁶ Ο Λάφι ι Ντεβλέσκο σικλιαρέλα-αμέν ότι ο μανγκιπέ ισί μπουτ σημαντικός. Ακαλά εδάφια ισί ο αγαπημέ μπουτέ τζενένγκε: «Ο Ντεβέλ ισί μανγκιπέ». (1 Ιωάν. 4:8) «Πρέπει τι μανγκές ι τζενές σο ισί πασέ τούτε σαρ μανγκέσα το νεαυτός». (Ματθ. 22:​39) «Ο μανγκιπέ ιτσσαρέλα μπουτ αμαρτίες». (1 Πέτρ. 4:8) «Ο μανγκιπέ ποτές να χασάρντιβελα». (1 Κορ. 13:8) Ανταλά ντα γιαβερά εδάφια σικαβένα καζόμ σημαντικός ισί τι μπαριαράς ντα τι σικαβάς ανταγιά μπουτ σουκάρ ιδιότητα.

7. Σόσκε ο Μπενγκ να μπορίνελα τι κερέλ ι τζενέν τι μανγκέν ο εκ ι γιαβερές ντα τι αβέν γιεκ;

 ⁷ Μπουτ τζενέ πουτσένα: “Σαρ μπορίναβα τι αγαβάβ καγιά ισί η αληθινή θρησκεία; Σαρέ ο θρησκείες βακερένα ότι σικλιαρένα ι αλήθεια, αλλά η κάθε εκ σικλιαρέλα διαφορετικά πράγματα ι Ντεβλέσκε”. Ο Μπενγκ κερντάς μπουτ ψεύτικες θρησκείες, ντα ανταβά δυσκολίνελα μπουτέ τζενέν τι αγαβέν καγιά ισί η αληθινή θρησκεία. Αλλά ο Μπενγκ να μπορίνελα τι κερέλ εκ ομάδα τζενένγκι σαρί κατά πφουβ τι αβέν γιεκ σαρ πφραλά ντα τι μανγκέν ο εκ ι γιαβερές μπαγιά. Σάντε ο Ιεχωβά μπορίνελα τι κερέλ κάτι ασακό. Ανταβά ισί λογικός, επειδή ο αληθινός μανγκιπέ αβέλα κατά Ιεχωβά. Σάντε άμα εκ θρησκεία τθερέλα ο πνεύμας ντα ι ευλογία ι Ιεχωβάσκι μπορίνελα τι τθερέλ μπαγιά μανγκιπέ. (1 Ιωάν. 4:7) Άκ’ σόσκε ο Ιησούς βακερντάς ότι σάντε ο αληθινοί Χριστιανοί κα σικαβένας μπαγιά μανγκιπέ ο εκ ι γιαβερέσκε.

8, 9. Σαρ επηρεασάλε μπουτ τζενέ κατά μανγκιπέ σο ντικχλέ αντρέ κο Μάρτυρες κι Ιεχωβάσκε;

⁸ Σαρ βακερντάας ο Ιησούς, μπουτ τζενέ αγαντέ κον ισί ο αληθινοί Χριστιανοί κατά αληθινός μανγκιπέ σο σικαβένα ο εκ κο γιαβέρ. Για παράδειγμας, εκ πφραλ, ο Ίαν, ντέλα-πες γκοντί ι πρώτη συνέλευση σο γκιλό, σο αβιλί-πες σε εκ στάδιος σο ισί πασέ λέσκε κχερέστε. Ο Ίαν γκιλόας οντουλέ σταδιόστε χάνικ μασεκά πο τζανγκλέ τι ντικχέλ εκ αγώνας. Βοβ βακερέλα: «Η διαφορά σο τθερένας ο τζενέ κο αγώνας ι τζενέντζαρ κι συνέλευση ισινέ μπουτ μπαρί. Ο Μάρτυρες ισινέ ευγενικοί, ιριαντέ λατσσές ντα λένγκε τσσαβέ μπεσένας ήσυχα». Σοράν βακερντάς: «Οντουλά τζενέ ντικχάβας ότι ισινέ ευτυχισμέ ντα ειρηνικοί. Ανταβά μανγκάβας με-ντα μι ζωγιάτε. Αν-ντα να ντάβα-μαν γκοντί τίποτα κατά ομιλίες οντουλέ ντιβεσέσκε, οντουβά σο ατσσιλό μάνγκε ισινέ η συμπεριφορά ι Μαρτυρένγκι». c Σίγουρα, ανταγιά συμπεριφορά αβέλα επειδή τθεράσα αληθινός μανγκιπέ ο εκ ι γιαβερέσκε. Μανγκάσα αμαρέ πφραλέν ντα πφενίν, οτθάρ σικαβάσα λένγκε λατσσιπέ ντα σεβασμός.

⁹ Εκ γιαβέρ-ντα πφραλ, ο Τζον, νιωσάλο αντικάς κάνα αρχισάλο τι τζαλ κο συναθροίσεις: «Κερντάς μάνγκε εντύπωση σο σαρέ οτθέ ισινέ μπουτ λατσσέ . . . ισινέ σαρ άγιοι. Λένγκο αληθινός μανγκιπέ κερντάς-μαν τι αβάβ σίγουρος ότι αρακχλόμ ι αληθινή θρησκεία». d Ισί γιαβερά-ντα μπουτ ασακέ εμπειρίες σο σικαβένα ότι ο υπηρέτες ι Ιεχωβάσκε ισί αληθινοί Χριστιανοί.

10. Κάνα μπορίνασα τι σικαβάς ότι μανγκάσα μπαγιά ι πφραλέν; (Ντικχέν ι υποσημείωση-ντα)

¹⁰ Σαρ ντικχλάμ κι αρχή, καέκ αμαρέ πφραλένταρ νανέ τέλειος. Ισί φαρ σο βακερένα ή κερένα κάτι σο νευριάνελα-αμέν. e (Ιακ. 3:2) Κάνα αβέλα-πες κάτι ασακό, τθεράσα εκ ξεχωριστή ευκαιρία​—τι σικαβάς ότι μανγκάσα-λεν μπαγιά οντουλέντζαρ σο βακεράσα ντα κεράσα. Σο σικλιάσα ανταλέσκε κατά παράδειγμας ι Ιησούσκο;​—Ιωάν. 13:15.

11. Καλά μπέτι χούγια σικαντέ ο Ιάκωβος ντα ο Ιωάννης; (Ντικχέν ι φωτογραφία-ντα)

¹¹ Ο Ιησούς να μπεσέλας οντουλένταρ σο τζάνας παλά-λέστε τι αβέν τέλειοι. Κατά γιαβέρ μπάντα, βοηθίνελας-λεν μανγκιμάσαρ τι διορθώνεν πουμαρέ μπέτι χούγια για τι ντεν χαρά ι Ιεχωβάς. Εκ φαρ, ντούι απόστολοι, ο Ιάκωβος ντα ο Ιωάννης, τσσουντέ πουμαρέ  νταγιά τι μανγκέλ κατά Ιησούς τι ντελ-λεν μπαρέ θέσεις κι Βασιλεία. (Ματθ. 20:​20, 21) Ανταλέσαρ σο κερντέ, ο Ιάκωβος ντα ο Ιωάννης σικαντέ μπαρικανιπέ ντα ότι μανγκένας τι αβέν πο σημαντικοί κατά γιαβερά.​—Παρ. 16:18.

12. Ισινέ σάντε ο Ιάκωβος ντα ο Ιωάννης σο σικαντέ μπέτι χούγια; Εξηγίνεν.

¹² Να ισινέ σάντε ο Ιάκωβος ντα ο Ιωάννης σο σικαντέ μπέτι χούγια αζομάν. Ντικχέν σο κερντέ ο γιαβερά απόστολοι: «Κάνα ασουντέ-λες ανταβά ο γιαβερά 10, νευριασάλε ι ντουέ πφραλέντζαρ». (Ματθ. 20:​24) Μπορίνασα τι ανάς αμαρέ γκοντιάτε ι Ιακωβός, ι Ιωαννής ντα γιαβερέ αποστολόν τι βακερέν πφαρέ λάφια ο εκ κο γιαβέρ. Μπέκιμ ο γιαβερά απόστολοι τι βακερντέ κάτι ασακό: “Κον αμντίνενα ότι ισινέν ντα μανγκένα μπαρέ θέσεις κι Βασιλεία; Να ισινέν σάντε τουμέν σο κερντέν μπουτ μπουτί γιεκ ι Ιησούσαρ. Σαρ αξίνενα τουμέν μπαρέ προνόμια, αντικάς αξίνασα αμέν-ντα!” Σαρ-ντα τι αβένας ο πράγματα, ο απόστολοι μουκχλέ για χάνικ ανταβά πρόβλημας τι χαλαβέλ ο λατσσέ σχέσεις σο τθερένας ο εκ ι γιαβερέσαρ.

13. Σο κερέλας ο Ιησούς κάνα ντικχέλας ο λάθη πι αποστολόνγκε; (Ματθαίος 20:​25-28)

¹³ Σο κερντάς ο Ιησούς ανταλέσκε; Να νευριασάλο. Να βακερντάς ότι κα ρόντελ τι αρακχέλ πο λατσσέ αποστολόν, σο κα τθερένας πο μπαρί ταπεινότητα ντα κα συμπεριφερίντιβενας πάντα ο εκ κο γιαβέρ μανγκιμάσαρ. Οκιά μπάνταρ, ο Ιησούς κερντάς λέντζαρ λάφι με υπομονή επειδή τζανέλας ότι  μανγκένας τι κερέν ο σωστός. (Διαβάνεν Ματθαίος 20:​25-28) Συνεχιντάς τι σικαβέλ λένγκε μανγκιπέ, παρόλο σο ανταγιά να ισινέ ούτε η πρώτη ούτε η τελευταία φαρ σο ο απόστολοι χαλέ-πες για τι σικαβέν κον λένταρ ισί ο πο μπαρό.​—Μάρκ. 9:​34· Λουκ. 22:24.

14. Καλέ κουλτουράσαρ μπαριλέ ι Ιησούσκε απόστολοι;

¹⁴ Ο Ιησούς τθερέλας πι γκοντιάτε ι κουλτούρα σο υπαρχίντιβελας αζομάν σο μπαριόνας ο απόστολοι. (Ιωάν. 2:​24, 25) Αζομάν ο παπάζια σικλιαρένας ότι ο τζενέ κα αβένας σημαντικοί σάντε άμα κα τθερένας μπαρέ θέσεις. (Ματθ. 23:6· ντικχέν ο θέμας «Η Συναγωγή​—Εκεί Όπου Κήρυξαν ο Ιησούς και οι Μαθητές Του», κι Σκοπιά 1 Απριλίου 2010, σελ. 16-18) Ο Ιουδαίοι αρχηγοί-ντα ι θρησκειάκε πακιάνας ότι βον ισινέ πο λατσσέ κατά γιαβερά. f (Λουκ. 18:​9-12) Ο Ιησούς αγαβέλας ότι ο τρόπος σο σκεφτίνενας οντουλά τζενέ κα μπορίνελας τι επηρεάνελ ο τρόπος σο ντικχένας ο απόστολοι πουμαρό νεαυτός ντα ι γιαβερέν. (Παρ. 19:​11) Να μπεσέλας πι μαθητένταρ μα τι κερέν ιτς λάθη ντα να χάλας-πες λέντζαρ. Τζανέλας ότι τθερένας λατσσό γκι. Οντουλέσκε βοηθίνελας-λεν με υπομονή μα τι αβέν μπαρικανέ ντα μα τι αμντίνεν-πες πο οπρέ κατά γιαβερά αλλά τι τθερέν μανγκιπέ.

15. Σο μπορίνασα τι σικλιάς οντουλέσταρ σο αβιλό-πες ι Ιακωβόσαρ ντα ι Ιωαννίσαρ;

¹⁵ Μπορίνασα τι σικλιάς μπουτ πράγματα οντουλέσταρ σο αβιλό-πες ι Ιακωβόσαρ ντα ι Ιωαννίσαρ. Ισινέ λάθος σο μανγκλέ μπαρέ θέσεις κι Βασιλεία. Αλλά ισινέ λάθος εμ η αντίδραση ι γιαβερέ αποστολόνγκι, επειδή μουκχλέ οντουβά σο αβιλό-πες τι χαλαβέλ λένγκι ενότητα. Όμως ο Ιησούς σικαντάς κο 12-ντα απόστολοι λατσσιπέ ντα μανγκιπέ. Σο σικλιάσα αμέν ανταλέσταρ; Τθερέλα σημασία όχι σάντε σο κερένα ο γιαβερά, αλλά εμ σο κεράσα αμέν κο λάθη ντα κο ατέλειες λένγκε. Σο μπορίνελα τι βοηθίνελ-αμέν; Κάνα νευριάνασα εκχέ πφραλέσαρ ή εκχέ πφενιάσαρ, μπορίνασα τι σκεφτίνας: “Σόσκε πειράνελα-μαν αζόμ μπουτ οντουβά σο κερντάς; Μήπως μι αντίδραση σικαβέλα κάτι σο πρέπει τι λατσσαράβ; Μήπως ο τζενό σο νευριαντάς-μαν νακχέλα εκ πρόβλημας ανταλά ντιβεσά; Ατζέ-ντα άμα πακιάβα ότι τθεράβα δίκιος σο νευριασάλομ, μήπως κα μπορίναβας τι σικαβάβ μανγκιπέ αντράλ μι γκίσταρ ντα τι νακχαβάβ οντουβά σο αβιλό-πες;” Καζόμ πο μπουτ σικαβάσα μανγκιπέ κο γιαβερά, αζόμ πο μπουτ κα ντικχίντιβελ ότι ισινάμ αληθινοί Χριστιανοί.

16. Σο γιαβέρ σικλιάσα κατά παράδειγμας ι Ιησούσκο;

¹⁶ Κάτι ατζέ σο σικλιάσα κατά παράδειγμας ι Ιησούσκο ισί τι προσπαθίνας τι αγαβάς αμαρέ πφραλέν ντα πφενίν. (Παρ. 20:5) Ισί μπαγιά ότι ο Ιησούς μπορίνελας τι ντικχέλ ο γκιά. Αμέν να μπορίνασα. Μπορίνασα όμως τι κεράς υπομονή αμαρέ πφραλέντζαρ ντα πφενίντζαρ κάνα κερένα λάθη. (Εφεσ. 4:1, 2· 1 Πέτρ. 3:8) Ισί πο εύκολος τι κεράς-λες ανταβά άμα προσπαθίνασα τι σικλιάς πο μπουτ πράγματα λένγκε. Ντικχέν εκ παράδειγμας.

17. Σαρ βοηθίντιλο εκ επίσκοπος περιοχής κάνα σικλιλό πο λατσσές εκχέ πφραλές;

¹⁷ Εκ επίσκοπος περιοχής σο υπηρετίνελα κι Ανατολική Αφρική ντέλα-πες γκοντί εκχέ πφραλές σο ντικχίντιβελας ότι τθερέλας απότομος χαρακτήρας. Σο κερντάς ο επίσκοπος  περιοχής; Βοβ βακερέλα: «Αντίς τι τσσίνταβ-μαν ντουρ κατά πφραλ, τραμπιντόμ τι σικλιάβ-λες πο λατσσές». Κάνα κερντάς-λες ανταβά, σικλιλό σαρ μπαριλόας ο πφραλ ντα σαρ ανταβά επηρεαντάας ο χαρακτήρας λέσκο. Ο επίσκοπος περιοχής βακερέλα κάτι ατζέκ: «Κάνα αγαντόμ καζόμ μπουτ μαρντάας-πες ο πφραλ για τι μουκχέλ παλά-πέστε ο παρελθόν ντα καζόμ αλλαγές κερντάας ήδη, αρχισάλομ τι καμαρώναβ-λες. Αβιλάμ λατσσέ αμαλά». Βα, κάνα προσπαθίνασα τι αγαβάς αμαρέ πφραλέν ντα πφενίν, ο πο μπουτ φαρ ισί αμένγκε πο εύκολος τι σικαβάς μανγκιπέ.

18. Σο μπορίνασα τι πουτσάς-αμέν άμα προσβαλιντάς-αμέν εκ αμαρέ πφραλένταρ; (Παροιμίες 26:20)

¹⁸ Μπάζιμα, μπορεί τι μανγκάς τι τζας εκχέ πφραλέστε σο προσβαλιντάς-αμέν ντα τι κεράς λέσαρ λάφι. Πρώτα όμως ισί λατσσό τι πουτσάς-αμέν: “Τζανάβα λατσσές σαρ ισί ο πράγματα;” (Παρ. 18:​13) “Μήπως να προσβαλιντάς-μαν επίτηδες;” (Εκκλ. 7:​20) “Τθεράβα κερντό με εκ ασακό λάθος;” (Εκκλ. 7:​21, 22) “Άμα κα κεράβ λέσαρ λάφι, μήπως ο πρόβλημας κα αβέλ χειρότερος;” (Διαβάνεν Παροιμίες 26:​20) Άμα κα μπεσάς χάνικ τι σκεφτίνας ανταλά ερωτήσεις, μπέκιμ τι αγαβάς ότι αμαρό μανγκιπέ αμαρέ πφραλέσκε μπορεί τι κερέλ-αμέν τι νακχαβάς οντουβά σο αβιλό-πες.

19. Σο μανγκένα σαρέ τουμαρέ γκίσαρ τι κερέν;

¹⁹ Ο Μάρτυρες ι Ιεχωβάσκε σικαβένα ότι ισί αληθινοί μαθητές ι Ιησούσκε. Ο κάθε εκ αμένταρ σικαβέλα ότι ισί αληθινός Χριστιανός κάνα μανγκέλα μπαγιά ι πφραλέν ντα ι πφενίν ατζέ-ντα κάνα κερένα λάθη. Καζόμ κα κεράς-λες ανταβά, μπέκιμ τι βοηθίνας γιαβερέν-ντα τι αγαβέν καγιά ισί η αληθινή θρησκεία ντα τι ντεν βον-ντα γιεκ αμέντζαρ λατρεία κο Ιεχωβά, κο Ντεβέλ σο ισί μανγκιπέ. Μανγκάσα σαρέ αμαρέ γκίσαρ τι συνεχίνας τι σικαβάς μανγκιπέ σόσκε αντικάς κα αγαντίντιβελ ότι ισινάμ αληθινοί Χριστιανοί.