Σόσκε βακερντάς ο «Τάδε» ότι κα “καταστραφίνελας” πιρί κληρονομιά άμα κα παντρίνελας ι Ρουθιάσαρ; (Ρουθ 4:1, 6)

Άμα εκ παντριμέ τζενό κο πουρανέ μπρεσά κα μερέλας χωρίς τι κερέλ τσσαβέν, κάποια τζενέ μπορεί τι πουτσένας: Σο κα αβέλας-πες ι τθανέσαρ σο τθερέλας; Κα χασάρντιβελας για πάντα ο ναβ λέσκε φαμιλιάκο; Ο Μωσαϊκός Νόμος κανονίνελας ανταλά πράγματα.

Σο κα αβέλας-πες ι τθανέσαρ σο τθερέλας εκ τζενό άμα κα μερέλας ή κα τσορόλιβελας ντα κα μπικινέλας πο τθαν; Εκ πφραλ λέσκο ή εκ λέσκε τζενένταρ κα μπορίνελας τι κερέλ εξαγορά οντουβά τθαν. Αντικάς ο τθαν κα ατσσόλας κι φαμιλί.​—Λευιτ. 25:​23-28· Αριθ. 27:​8-11.

Σαρ η εξαγορά κα κερέλας μα τι χασάρντιβελ ο ναβ σο τθερέλας η φαμιλί ι μουλέσκι; Εκ μουρς κα παντρίνελας πι πφραλέσκε ρομνιάσαρ για τι κερέλ εκχέ τσσαβές αλλά ο τσσαβό κα λέλας ο ναβ ι μουλέσκο ντα λέσκι κληρονομιά. Ανταβά αρακχαβέλας ι χηρά-ντα.​—Δευτ. 25:​5-7· Ματθ. 22:​23-28.

Σκεφτίνεν σο αβιλό-πες κι Ναομί. Ισινέ παντριμέ εκχέ τζενέσαρ σο βακέρντιβελας Ελιμέλεχ. Κάνα βοβ ντα λέσκε ντούι τσσαβέ μουλέ, να υπαρχίντιβελας καέκ μουρς για τι αρακχαβέλ-λα. (Ρουθ 1:​1-5) Κάνα βουρτισάλι κο Ιούδας, η Ναομί ντινάς συμβουλή πι μποριάτε, κι Ρουθ, τι μανγκέλ κατά Βοόζ, τι κερέλ εξαγορά οντουβά τθαν. Ο Βοόζ ισινέ εκ στενός συγγενής σο τθερέλας ο Ελιμέλεχ. (Ρουθ 2:1, 19, 20· 3:​1-4) Αλλά ο Βοόζ τζανέλας ότι εκ γιαβέρ τζενό ι μουλέσκο, σο βακέρντιβελα κι Γραφή «Τάδε», ισινέ πο στενός συγγενής. Οτθάρ, ο «Τάδε» ισινέ ο πρώτος σο μπορίνελας τι τραμπίνελ τι αβέλ εξαγοραστής.​—Ρουθ 3:9, 12, 13.

Κι αρχή, ο «Τάδε» μανγκέλας τι βοηθίνελ. (Ρουθ 4:​1-4) Τζανέλας ότι έπρεπε τι χαλαβέλ λοβέ για τι κινέλ ο τθαν, ντα ότι η Ναομί ισινέ μπουτ μπαρί για τι κερέλ εκχέ τσσαβές σο κα λέλας σαρ κληρονομιά ο τθαν σο τθερέλας ο Ελιμέλεχ. Κι πραγματικότητα, ο τθαν σο κα λέλας ο Τάδε κα αβέλας αντρέ κι κληρονομιά σο τθερέλας, άρα ανταγιά απόφαση ντικχίντιβελας γκοντιαβέρ.

Αλλά ο Τάδε αλλαντάς γνώμη κάνα αγαντάς ότι έπρεπε τι παντρίνελ ι Ρουθιάσαρ, ντα βακερντάς: «Ναστί κεράβα-λες εξαγορά, σόσκε μπέκιμ τι καταστραφίναβ μιρί κληρονομιά». (Ρουθ 4:5, 6) Σόσκε αλλαντάς γνώμη;

Αν ο Τάδε ή κάποιος γιαβέρ κα παντρίνελας ι Ρουθιάσαρ ντα βόι μπιανέλας τσσαβές, οντουβά τσσαβό κα λέλας ο τθαν σο τθερέλας ο Ελιμέλεχ. Σαρ κα “καταστραφίνελας” ανταβά ι «κληρονομιά» σο τθερέλας ο Τάδε; Η Γραφή να βακερέλα, αλλά μερικοί λόγοι μπέκιμ ισί ακαλά:

• Πρώτον, κα χασαρέλας ο λοβέ σο κα ντέλας, σόσκε τελικά να κα αβέλας λέσκο ο τθαν σο τθερέλας ο Ελιμέλεχ. Κα λέλας-λες ο τσσαβό ι Ρουθιάκο.

• Δεύτερον, κα τθερέλας ι ευθύνη τι παρβαρέλ ντα τι αρακχαβέλ ι Ναομιά ντα ι Ρουθιά.

• Τρίτον, άμα η Ρουθ κα κερέλας γιαβερέ-ντα τσσαβέν ι Ταδίσαρ, η κληρονομιά κα ιλιάντιβελας ι τσσαβέντζαρ σο μπέκιμ τι τθερέλας ήδη ο Τάδε.

• Τέταρτον, άμα ο Τάδε να τθερέλας τσσαβέν, ο τσσαβό σο κα μπιανέλας η Ρουθ κα τθερέλας δικαιώματα εμ κο τθαν σο τθερέλας ο Ελιμέλεχ εμ κο τθαν σο τθερέλας ο Τάδε. Αντικάς, κάνα κα μερέλας, λέσκο τθαν κα τζάλας εκχέ τσσαβέστε σο να κα τθερέλας λέσκο ναβ, αλλά ο ναβ σο τθερέλας ο Ελιμέλεχ. Ο Τάδε να μανγκέλας τι τσσουβέλ σε κίνδυνος πι κληρονομιά για τι βοηθίνελ ι Ναομιά. Λέσκε, ισινέ πο λατσσές τι μουκχέλ ι γιαβερέ εξαγοραστής, ι Βοοζίς, τι λελ ανταγιά ευθύνη. Ο Βοόζ κερντάς-λες ανταβά σόσκε μανγκέλας τι “ανέλ παλάλ ο ναβ ι μουλέσκο λέσκε κληρονομιάτε”.​—Ρουθ 4:10.

Μάλλον ι Ταδίς χάλας-λες πο μπουτ ανάγκη μα τι χασάρντιβελ λέσκο ναβ ντα λέσκι κληρονομιά. Ντικχέλας σάντε πο νεαυτός. Όμως όχι σάντε χασάρντιλο λέσκο ναβ αλλά ούτε σο τζανάσα-λες αντιβές. Βοβ χασαρντάς επίσης ο μπαρό προνόμιος σο λιντάς ο Βοόζ, δηλαδή τι γραφίντιβελ λέσκο ναβ γιεκ ι τζενένγκε ναβέντζαρ σο λένταρ κα αστάρντιβελας ο Μεσσίας, ο Ιησούς Χριστός. Σο μπέτι αποτέλεσμας τθερέλας ο Τάδε σο ντικχλάς σάντε πο νεαυτός ντα να μανγκλάς τι βοηθίνελ κάποιον σο τθερέλας ανάγκη!​—Ματθ. 1:5· Λουκ. 3:​23, 32.