1, 2. Άμα να ισινέν ατζέκ έτοιμοι ι μπολντιμάσκε, σόσκε δεν πρέπει τι χασαρέν τουμαρί ζορ; (Ντικχέν ι φωτογραφία κι ανγκλαϊνί σελίδα)

 ΑΜΑ σκεφτίνενα τι μπολντιόν, τσσουντέν εκ μπουτ σουκάρ στόχος. Ισινέν έτοιμοι τι κερέν ανταβά βήμας ακανά; Άμα πακιάνα ότι ισινέν, ντα ο πρεσβύτεροι συμφωνίνενα, μα σακιντίνεν τι κερέν-λες καζόμ πο σουγκό αβέλα-πες. Ισί ανγκλά-τουμέντε εκ ζωή πφερντί ευλογίες κι υπηρεσία κι Ιεχωβάσκι.

² Οκιά μπάνταρ, μήπως βακερντέ τουμένγκε ότι χρειαζίντιβελα τι τζαν πο λατσσές κι αλήθεια πριν τι μπολντιόν; Μήπως τουμέν-ντα αγαβένα-λες ανταβά; Άμα βα, μα χασαρέν τουμαρί ζορ. Μπορίνενα τι τζαν πο λατσσές κι αλήθεια για τι κερέν ανταβά σημαντικός βήμας, καζόμ μπρεσένγκε-ντα τι αβέν.

3. Σο πουτσλάς εκ Αιθίοπας αξιωματικός ι Φιλιππός, ντα καγιά ερώτηση μπορεί τι νακχέλ αμαρέ γκοντιάταρ; (Πράξεις 8:​36, 38)

³ Διαβάνεν Πράξεις 8:​36, 38. Εκ Αιθίοπας αξιωματικός πουτσλάς ι Φιλιππός σο ισινέ ευαγγελιστής: «Σο τσσιναβέλα-μαν τι μπολντιάβ;» Ο Αιθίοπας μανγκέλας τι μπολντιόλ, αλλά ισινέ μπαγιά έτοιμος ανταλέσκε;

4. Σαρ σικαντάς ο Αιθίοπας ότι ισινέ αποφασισμέ τι σικλιόλ ατζέ πο μπουτ;

⁴ Ο Αιθίοπας «γκιλόας κι Ιερουσαλήμ τι ντελ λατρεία». (Πράξ. 8:​27) Οτθάρ, μάλλον δεχτιντάας ι Ιουδαιόνγκι θρησκεία. Σίγουρα σικλιλόας ι Ιεχωβάσκε κατά άγια λάφια σο ισινέ κο Εβραϊκές Γραφές. Όμως μανγκέλας μπαγιά τι σικλιόλ πο μπουτ. Ντα κάνα αρακχλάς-λες ο Φίλιππος κο ντρομ, σο κερέλας οντουβά τζενό; Διαβάνελας εκ ρόλος κατά προφήτης Ησαΐας. (Πράξ. 8:​28) Οντουλά σο διαβάνελας ισινέ αχόρτ αλήθειες ι Γραφιάκε. Οντουλέ τζενές, να ερεσένας-λες ο βασικά πράγματα σο σικλιαρέλα η Γραφή. Μανγκέλας τι σικλιόλ ατζέ πο μπουτ.

5. Σο κερντάς ο Αιθίοπας οντουλέντζαρ σο σικλιόλας;

⁵ Οντουβά τζενό τθερέλας μπαρί θέση ντα ντέλας καν κι βασίλισσα Κανδάκη κι Αιθιοπία. «Αρακχαβέλας σαρό λάκο χουλανιπέ».  (Πράξ. 8:​27) Άρα αγαβάσα ότι τθερέλας μπερεκέτι μπουτιά ντα ευθύνες. Όμως, αρακχέλας σαάτι για τι ντελ λατρεία ι Ιεχωβάς. Να ερεσέλας-λες σάντε τι σικλιόλ ι αλήθεια. Κερέλας οντουλά σο σικλιόλας. Οτθάρ, κερντάς αζόμ μπουτ ντρομ κατά Αιθιοπία μέχρι κι Ιερουσαλήμ για τι ντελ λατρεία ι Ιεχωβάς κο ναός οτθέ. Σίγουρα ντινάς μπουτ λοβέ ντα σαάτι. Αλλά λέσκε, η λατρεία ι Ιεχωβάσκι αξίνελας σαρέ ο προσπάθειες.

6, 7. Σαρ συνεχιντάς ο Αιθίοπας τι μπαριαρέλ πο μανγκιπέ ι Ιεχωβάσκε;

⁶ Ο Αιθίοπας σικλιλό κατά Φίλιππος μερικές μπουτ σημαντικές ντα νεβέ αλήθειες ντα εκ ανταλένταρ ισινέ ότι ο Ιησούς ισινέ ο Μεσσίας. (Πράξ. 8:​34, 35) Σίγουρα συγκινισάλο κάνα σικλιλό σο κερντάας ο Ιησούς λέσκε. Σο κα κερέλας βοβ ανταλέσκε; Κα μπορίνελας τι ατσσόλ σαρ ισινέ, δηλαδή εκ πιστός Ιουδαίος σο σεβάνενας-λες ο γιαβερά. Αλλά λέσκο μανγκιπέ ι Ιεχωβάσκε ντα λέσκε Τσσαβέσκε μπαριλό. Τελικά λιντάς εκ απόφαση σο κα αλλάνελας λέσκι ζωή: τι μπολντιόλ ντα τι τζαλ παλάλ κο Ιησούς Χριστός. Κάνα ο Φίλιππος ντικχλάς ότι οντουβά τζενό ισινέ έτοιμος, μπολντάς-λες.

⁷ Άμα κα ακολουθίνεν ο παράδειγμας σο ντινάς-αμέν ο Αιθίοπας, μπορίνενα τουμέν-ντα τι προετοιμάντιβεν ι μπολντιμάσκε. Κα μπορίνεν τουμέν-ντα τι βακερέν με μπαρί σιγουριά: «Σο τσσιναβέλα-μαν τι μπολντιάβ;» Ακανά, για τι ντικχάς σαρ μπορίνενα τι κερέν ο βήματα σο κερντάς βοβ-ντα: Συνεχίνελας τι σικλιόλ, κερέλας οντουλά σο σικλιόλας ντα συνεχίνελας τι μπαριαρέλ πο μανγκιπέ ι Ντεβλέσκε.

8. Σο βακερέλα τουμένγκε ο εδάφιος Ιωάννης 17:3 ότι πρέπει τι κερέν;

⁸ Διαβάνεν Ιωάννης 17:3. Μήπως ανταλά λάφια ι Ιησούσκε βοηθιντέ-τουμέν τι αποφασίνεν τι κερέν μελέτη κατά Γραφή; Μπουτ αμένταρ κα βακεράας βα. Αλλά μήπως ανταλά ίδια λάφια σικαβένα αμένγκε επίσης τι συνεχίνας τι σικλιάς; Βα. Να κα τσσιναβάς ποτές “τι σικλιάς ι αληθινέ Ντεβλέσκε”. (Εκκλ. 3:​11) Καζόμ μπρεσά-ντα τι νακχέν, κα συνεχίνας τι σικλιάς λέσκε. Καζόμ πο μπουτ κα σικλιάς, αζόμ πο πασέ κα τζας κο Ιεχωβά.​—Ψαλμ. 73:28.

9. Σο χρειαζίντιβελα τι κεράς αφού σικλιλάμ ο βασικές αλήθειες ι Γραφιάκε;

⁹ Ισί λογικός ότι κάνα αρχίνασα τι σικλιάς ι Ιεχωβάσκε, σικλιάσα σάντε ο βασικές αλήθειες ι Γραφιάκε. Κι επιστολή σο γραφιντάς κο Εβραίοι, ο απόστολος Παύλος βακερντάς ότι ανταλά αλήθειες ισί «ο βασικά πράγματα». Ανταλέ λαφίντζαρ, να ντινάς πο χάνικ αξία κο «πρώτα πράγματα σο σικλιλάμ». Βακερντάς ότι ισινέ σαρ ο τθουτ σο βοηθίνελα ι μαξιμίς τι μπαριόλ. (Εβρ. 5:​12· 6:1) Αλλά βακερντάς επίσης σαρέ κο Χριστιανοί μα τι ατσσόν σάντε κο βασικά πράγματα, αλλά τι σικλιόν ο πο αχόρτ  αλήθειες ι Ντεβλέσκε Λαφίσκε. Κερένα τουμέν σαρ σαρ για τι σικλιόν ο πο αχόρτ αλήθειες ι Γραφιάκε; Μανγκένα τι συνεχίνεν τι μπαριόν ντα τι συνεχίνεν τι σικλιόν ι Ιεχωβάσκε ντα λέσκε σκοπόσκε;

10. Σόσκε μερικέ τζενένγκε ισί δύσκολος ο διάβασμας;

¹⁰ Όμως, μπουτ αμένταρ δυσκολίντιβασα τι μπεσάς τι διαβάνας. Σαρ ντικχένα τουμέν ο διάβασμας; Κο σχολείος, σικλιλέν τι διαβάνεν ντα τι σικλιαρέν-τουμέν λατσσές; Μπεϊντίνενας ο διάβασμας; Βοηθίντιβενας ανταλέσταρ; Ή μήπως νικαντέν ο συμπέρασμας ότι ο διάβασμας νανέ τουμένγκε; Άμα αβέλα-πες ανταβά, να ισινέν σάντε τουμέν αντικάς. Ο Ιεχωβά όμως μπορίνελα τι βοηθίνελ-τουμέν. Βοβ ισί τέλειος ντα ο πο λατσσό Δάσκαλος σο υπαρχίντιβελα.

11. Σαρ σικαβέλα ο Ιεχωβά ότι ισί ο «Μπαρό Εκπαιδευτής»;

¹¹ Ο Ιεχωβά βακερέλα ότι ισί αμαρό «Μπαρό Εκπαιδευτής». (Ησ. 30:​20, 21) Ισί Δάσκαλος σο σικαβέλα υπομονή, λατσσιπέ ντα αγαβέλα-αμέν. Ρόντελα ο λατσσίματα πι μαθητένγκε. (Ψαλμ. 130:3) Ντα ποτές να μπεκλεντίνελα αμένταρ πο μπουτ οντουλένταρ σο μπορίνασα τι κεράς. Ντεν-τουμέν γκοντί ότι βοβ κερντάς τουμαρί γκοντί, ανταβά σουκάρ δώρος. (Ψαλμ. 139:​14) Ισινάμ κερντέ για τι μανγκάς τι σικλιάς πράγματα. Αμαρό Δημιουργός μανγκέλα τι συνεχίνας τι σικλιάς για πάντα ντα τι μπεϊντίνας-λες ανταβά. Οτθάρ, ισί γκοντιαβέρ τι σικλιάς τι “μανγκάς σαρέ αμαρέ γκίσαρ” ο αλήθειες ι Γραφιάκε από ακανά. (1 Πέτρ. 2:2) Τι τσσουβέν στόχους σο μπορίνενα τι κερέν-λεν. Σκεφτίνεν εκ πρόγραμμας για τι διαβάνεν ντα τι σικλιαρέν-τουμέν κατά Γραφή, ντα κερέν-λες. (Ιησ. Ναυή 1:8) Ι Ιεχωβάσκε ευλογιάσαρ, κα μπεϊντίνεν ατζέ πο μπουτ τι διαβάνεν ντα τι σικλιόν λέσκε.

12. Κάνα σικλιαράσα-αμέν κατά Γραφή, σόσκε πρέπει τι σκεφτίνας λατσσές ι ζωή ντα ο έργος ι Ιησούσκο;

¹² Τι ντεν μπουτ φαρ τουμαρέ σαατίσταρ για τι σκεφτίνεν λατσσές ι ζωή ντα ο έργος ι Ιησούσκο. Για τι μπορίνας τι υπηρετίνας ι Ιεχωβάς, ισί μπουτ σημαντικός τι ακολουθίνας πιστά ο βήματα ι Ιησούσκε, ντα ατζέ πο μπουτ ανταλέ δύσκολε βακιτίντε. (1 Πέτρ. 2:​21) Ο Ιησούς να γκεραντάς πι μαθητένταρ ότι κα νακχένας δυσκολίες. (Λουκ. 14:​27, 28) Όμως, ισινέ σίγουρος ότι λέσκε μαθητές κα ντένας-λεν πέρα, σαρ κερντάς βοβ-ντα. (Ιωάν. 16:​33) Τι σικλιαρέν-τουμέν ατζέ-ντα κατά χουρντέ πράγματα σο αβιλέ-πες κι ζωή κι Ιησούσκι, ντα τσσουβέν στόχους για τι μοιάζεν λέστε μπουτέ τροπόντζαρ τουμαρέ ζωγιάτε.

13. Σο πρέπει τι συνεχίνεν τι μανγκέν κατά Ιεχωβά, ντα σόσκε;

¹³ Να ερεσέλα σάντε τι τζανέν πράγματα. Ο λόγος σο χρειαζίντιβενα τι τζανέν πράγματα ισί τι σικλιόν πο μπουτ ι Ιεχωβάσκε ντα τι μπαριαρέν ιδιότητες σαρ ισί ο μανγκιπέ ντα η πίστη λέστε. (1 Κορ. 8:​1-3) Καζόμ συνεχίνενα τι σικλιόν, μανγκέν κατά Ιεχωβά τι βοηθίνελ-τουμέν τι τθερέν πο μπουτ πίστη. (Λουκ. 17:5) Βοβ απαντίνελα ασακέ προσευχιέντε σαρέ πι γκίσαρ. Η αληθινή πίστη σο αβέλα κατά πράγματα σο σικλιλέν αμαρέ Ντεβλέσκε κα βοηθίνελ-τουμέν τι τζαν ανγκλάλ.​—Ιακ. 2:26.

14. Σαρ σικαντάς ο απόστολος Πέτρος καζόμ σημαντικός ισί τι συνεχίνας τι κεράς οντουλά σο σικλιάσα; (Ντικχέν ι φωτογραφία-ντα)

¹⁴ Ο απόστολος Πέτρος βακερντάς καζόμ σημαντικός ισί τι συνεχίνεν οντουλά σο τζάνα παλάλ κο Χριστός τι κερέν ο πράγματα σο σικλιόνα. Κερντάς λάφι ι Νωέσκε, σο βακέρντιβελα κι Γραφή. Ο Ιεχωβά βακερντάς κο Νώε ότι κα ανέλας εκ κατακλυσμός για τι καταστραφίνελ ι πφιρνέ τζενέν σο τζουβντιόνας αζομάν. Για τι σώνελ ο Νώε πο νεαυτός ντα πι φαμιλί, να ερεσέλας σάντε τι τζανέλ ότι κα αβέλας εκ κατακλυσμός. Τσσουβέν σημασία ότι ο Πέτρος κερντάς λάφι ι μπρεσένγκε πριν κατά Κατακλυσμός  σόσκε βακερντάς «καζόμ κερντιόλας η κιβωτός». (1 Πέτρ. 3:​20) Βα, ο Νώε ντα λέσκι φαμιλί κερντέ οντουλά σο σικλιλέ κατά Ντεβέλ ντα λατσσαρντέ εκ κιβωτός, εκ μπαρό καράβι. (Εβρ. 11:7) Σοράν, ο Πέτρος μοιασκιαρντάς ι μπουτί σο κερντάς ο Νώε ι μπολντιμάσαρ, κάνα γραφιντάς: «Ο μπολντιπέ, σο ταιριάνελα ανταλέσαρ, σώνελα τουμέν-ντα ακανά». (1 Πέτρ. 3:​21) Οτθάρ, κα μπορίναας τι μοιασκιαράς ι προσπάθεια σο κερένα ακανά για τι προετοιμάντιβεν ι μπολντιμάσκε ι μπουτιάσαρ σο κερέλας ο Νώε ντα λέσκι φαμιλί μπουτ μπρεσά για τι κερέν ι κιβωτός. Καγιά προσπάθεια χρειαζίντιβελα τι κερέν τουμέν για τι προετοιμάντιβεν ι μπολντιμάσκε;

15. Σαρ σικαβάσα άμα μετανιωσάλαμ μπαγιά;

¹⁵ Εκ κατά πρώτα πράγματα σο πρέπει τι κεράς ισί τι μετανιώνας μπαγιά αμαρέ αμαρτιένγκε. (Πράξ. 2:​37, 38) Άμα μετανιωσάλαμ μπαγιά, κα κεράς σο-ντα αλλαγή χρειαζίντιβελα. Τουμέν, τσσιναντέν τι κερέν πράγματα σο πφανγκένα ι Ιεχωβάσκο γκι, σαρ ισί τι τζουβντιόν μπίλατζανε τροπόσαρ, τι πιν τσιγάρα, τι βακερέν λουμνικανέ λάφια ή τι κουσέν; (1 Κορ. 6:9, 10· 2 Κορ. 7:1· Εφεσ. 4:​29) Άμα να τσσιναντέν-λεν ατζέκ, συνεχίνεν τι μαρέν-τουμέν τι κερέν αλλαγές. Κερέν λάφι ι τζενέσαρ σο κερέλα-τουμέν μελέτη ή μανγκέν κατά πρεσβύτεροι τι βοηθίνεν-τουμέν ντα τι ντεν-τουμέν συμβουλές. Άμα ισινέν τερνέ ντα τζουβντιόνα τουμαρέ νταντέσαρ ντα τουμαρέ νταγιάσαρ, μανγκέν λένταρ τι βοηθίνεν-τουμέν τι τσσιναβέν ο μπέτι χούγια σο μπέκιμ να μουκχένα-τουμέν τι μπολντιόν.

16. Καλά πράγματα τθερέλα εκ λατσσό πνευματικός πρόγραμμας;

¹⁶ Ισί επίσης σημαντικός τι τθεράς εκ λατσσό πνευματικός πρόγραμμας, σαρ ισί τι τζας κο συναθροίσεις ντα τι ντας απαντήσεις. (Εβρ. 10:​24, 25) Επίσης, κάνα ο πρεσβύτεροι κα βακερέν τουμένγκε ότι ισινέν έτοιμοι τι νικιόν κο έργος, τι τσσουβέν-λες ανταβά-ντα τουμαρέ προγραμμάστε. Καζόμ πο μπουτ νικιόνα ανταλέ εργόστε σο σώνελα ζωές, αζόμ πο μπουτ κα μπεϊντίνεν-λες. (2 Τιμ. 4:5) Άμα ισινέν τερνέ ντα τζουβντιόνα τουμαρέ νταντέσαρ ντα τουμαρέ νταγιάσαρ, πουτσέν-τουμέν: “Μήπως χρειαζίντιβελα τι βακερέν μάνγκε βον τι τζαβ κο συναθροίσεις ή κο έργος; Ή μανγκάβα με τι κεράβ-λεν;” Άμα κερένα ανταλά πράγματα χωρίς τι βακερέν τουμένγκε ο γιαβερά, σικαβένα καζόμ μπαρί  πίστη τθερένα κο Ιεχωβά Ντεβέλ, καζόμ μπουτ μανγκένα-λες ντα εκτιμίνενα ο πράγματα σο ντέλα-τουμέν. Ανταλά ισί «πράγματα σο σικαβένα αφοσίωση κο Ντεβέλ», δώρα σο ντένα κο Ιεχωβά. (2 Πέτρ. 3:​11· Εβρ. 13:​15) Σαρέ ο δώρα σο ντάσα αμαρέ γκίσαρ ντα όχι ζορίσαρ κερένα ι Ντεβλέσκο γκι. (Ντικχέν 2 Κορινθίους 9:7) Κεράσα ανταλά πράγματα σόσκε χαιρίνασα τι ντας ο πο λατσσό σο μπορίνασα κο Ιεχωβά.

17, 18. Καγιά σημαντική ιδιότητα κα βοηθίνελ-τουμέν τι ερεσέν κο μπολντιπέ, ντα σόσκε; (Παροιμίες 3:​3-6)

¹⁷ Καζόμ συνεχίνενα τι κερέν ο βήματα για τι ερεσέν κο μπολντιπέ, κα νακχέν δυσκολίες. Μερικοί μπορεί τι πρασάν-τουμέν ι νεβέ πραγματένγκε σο πακιάνα. Μπορεί ατζέ-ντα τι τζαν τουμέντζαρ κόντρα. (2 Τιμ. 3:​12) Καζόμ μαρένα-τουμέν για τι τσσιναβέν εκ μπέτι συνήθεια, μπορεί μπάζιμα μα τι τζαν-λεν αζόμ λατσσές. Ή μπέκιμ να τθερένα υπομονή ή χασαρένα τουμαρί ζορ σόσκε ντικχίντιβελα ότι ναστί ερεσένα τουμαρό στόχος. Σο κα βοηθίνελ-τουμέν τι νταϊντίνεν; Εκ μπουτ σημαντική ιδιότητα​—ο μανγκιπέ ι Ιεχωβάσκε.

¹⁸ Τουμαρό μανγκιπέ ι Ιεχωβάσκε ισί εκ κουμάσι ιδιότητα, η πο λατσσί σο τθερένα. (Διαβάνεν Παροιμίες 3:​3-6) Τουμαρό ζουρανό μανγκιπέ ι Ντεβλέσκε μπορίνελα τι βοηθίνελ-τουμέν τι ντεν πέρα ο δυσκολίες ι ζωγιάκε. Μπουτ φαρ, η Γραφή κερέλα λάφι ι αφοσιωμέ μανγκιμάσκε σο τθερέλα ο Ιεχωβά πι υπηρετόνγκε. Αφοσιωμέ μανγκιπέ μανγκέλα τι βακερέλ ότι ποτές να κα μουκχέλ πι υπηρετόν ούτε κα τσσιναβέλ τι μανγκέλ-λεν. (Ψαλμ. 100:5) Ισινέν κερντέ τι μοιάζεν κο Ντεβέλ. (Γέν. 1:​26) Σαρ μπορίνενα τουμέν-ντα τι σικαβέν ασακό μανγκιπέ;

19. Σαρ μπορίνενα τι μπαριαρέν τουμαρί εκτίμηση σαρέ οντουλένγκε σο κερντάς ο Ιεχωβά τουμένγκε; (Γαλάτες 2:20)

¹⁹ Πρώτα, σικαβέν εκτίμηση. (1 Θεσ. 5:​18) Κάθε ντιβές, τι πουτσέν-τουμέν: “Σαρ σικαντάς ο Ιεχωβά ότι μανγκέλα-μαν;” Σοράν, τι βακερέν λέσκε ευχαριστώ τουμαρέ προσευχιέντε ντα τι βακερέν συγκεκριμέ πράγματα σο κερντάς τουμένγκε. Τι αγαβέν ότι ο Ιεχωβά κερέλα λατσσέ πράγματα τουμένγκε προσωπικά σόσκε μανγκέλα-τουμέν. Ο απόστολος Παύλος-ντα αγαντάς-λες ανταβά ι Ιεχωβάσκε. (Διαβάνεν Γαλάτες 2:​20) Πουτσέν-τουμέν: “Μανγκάβα με-ντα τι σικαβάβ ότι μανγκάβα-λες;” Ο μανγκιπέ ι Ιεχωβάσκε κα βοηθίνελ-τουμέν τι τζαν κόντρα κο πειρασμοί ντα τι νακχαβέν ο δυσκολίες. Κα τσσίντελ-τουμέν τι ατσσικιαρέν τουμαρό πνευματικός πρόγραμμας, ντα αντικάς  κα σικαβέν καζόμ μανγκένα τουμαρέ Νταντές κάθε ντιβές.

20. Σο πρέπει τι κερέν για τι αφιερώνεν-τουμέν κο Ιεχωβά, ντα καζόμ σημαντική ισί ανταγιά απόφαση;

²⁰ Καζόμ νακχέλα ο βακίτι, τουμαρό μανγκιπέ ι Ιεχωβάσκε κα τσσίντελ-τουμέν τι κερέν εκ ξεχωριστή προσευχή. Ανταλέ προσευχιάσαρ κα αφιερώνεν-τουμέν κο Ντεβέλ. Τι ντεν-τουμέν γκοντί ότι κάνα κα αφιερώνεν-τουμέν κο Ιεχωβά, κα τθερέν ανγκλά-τουμέντε εκ μπουτ σουκάρ ελπίδα: Τι αβέν λέσκε αμαλά για πάντα. Κάνα αφιερώνενα τουμαρί ζωή κο Ιεχωβά, ντένα τουμαρό λάφι τι υπηρετίνεν-λες εμ λατσσέ εμ μπέτι ντιβεσέντε. Ποτές να κα χρειαζίντιβελ πάλι τι κερέν αφιέρωση κο Ντεβέλ. Ισί μπαγιά ότι κάνα αφιερώντιβασα, κεράσα εκ σοβαρός βήμας, αλλά σκεφτίνεν ακαβά: Τουμαρέ ζωγιάτε κα λεν μπουτ αποφάσεις. Μερικές κα αβέν μπουτ λατσσέ, αλλά ποτές να κα λεν εκ απόφαση σο ισί πο λατσσί κατά απόφαση τι αφιερώνεν τουμαρί ζωή κο Ιεχωβά. (Ψαλμ. 50:​14) Ο Μπενγκ κα προσπαθίνελ τι χουρντιαρέλ ο μανγκιπέ σο τθερένα τουμαρέ Νταντέσκε, ντα μπεκλεντίνελα ότι να κα ατσσικιαρέν σαστό τουμαρό γκι κο Ντεβέλ. Ποτές μα μουκχέν ι Μπενγκές τι νικίνελ! (Ιώβ 27:5) Τουμαρό ζουρανό μανγκιπέ ι Ιεχωβάσκε κα βοηθίνελ-τουμέν τι ατσσικιαρέν τουμαρό λάφι τι υπηρετίνεν-λες για πάντα, ντα τι τζαν ατζέ πο πασέ τουμαρέ Νταντέστε.

21. Σόσκε βακεράσα ότι ο μπολντιπέ νανέ ο τέλος αλλά η αρχή;

²¹ Σοράν κατά αφιέρωση σο κα κερέν κο Ιεχωβά, κερέν λάφι ι πρεσβυτερόντζαρ σο ισί τουμαρέ κχανγκιριάτε για τι κερέν ο γιαβέρ σημαντικός βήμας. Όμως, τι ντεν-τουμέν γκοντί πάντα ότι ο μπολντιπέ νανέ ο τέλος, αλλά η αρχή​—η αρχή εκχέ ζωγιάκι σο να κα μπιτίνελ ποτές κι υπηρεσία κι Ιεχωβάσκι. Οτθάρ, τι μπαριαρέν ο μανγκιπέ σο τθερένα τουμαρέ Νταντέσκε ακανά. Τι τσσουβέν στόχους σο κα μπαριαρέν τουμαρό μανγκιπέ κάθε ντιβές. Ανταλά πράγματα κα γκερέν-τουμέν κο μπολντιπέ. Οντουβά ντιβές κα αβέλ μπουτ σουκάρ. Αλλά ανταβά ισί σάντε η αρχή. Μακάρι τουμαρό μανγκιπέ ι Ιεχωβάσκε ντα λέσκε Τσσαβέσκε τι συνεχίνελ τι μπαριόλ για πάντα!