1. Καβά πράγμας μπέκιμ πουτσένα-πες μερικοί πιστοί υπηρέτες ι Ιεχωβάσκε;

 ΤΖΑΝΑΣΑ ότι ο λαός ι Ιεχωβάσκο σαρ ομάδα κερέλα λέσκο γκι. Καζόμ μπουτ ηρεμίνελα-αμέν ανταβά! Η Αγία Γραφή βακερέλα: «Ο Ιεχωβά χαιρίνελα πι λαόσαρ». (Ψαλμ. 149:4) Μπάζιμα όμως μερικοί χασαρένα αζόμ μπουτ πουμαρί ζορ σο μπέκιμ πουτσένα-πες: “Κεράβα με προσωπικά ι Ιεχωβάσκο γκι;” Μπουτ πιστοί υπηρέτες ι Ιεχωβάσκε κο πουρανέ μπρεσά δυσκολίντιβενας τι πακιάν ότι κερένας ι Ιεχωβάσκο γκι.—1 Σαμ. 1:6-10· Ιώβ 29:2, 4· Ψαλμ. 51:11.

2. Καλά τζενέ κερένα ι Ιεχωβάσκο γκι;

² Η Αγία Γραφή σικαβέλα ξεκάθαρα ότι ατελείς τζενέ μπορίνενα τι κερέν ι Ιεχωβάσκο γκι. Σαρ; Πρέπει τι σικαβάς πίστη κο Ιησούς Χριστός ντα τι μπολντιάς. (Ιωάν. 3:16) Αντικάς, σικαβάσα ανγκλάλ σαριλέντε ότι μετανιωσάλαμ αμαρέ αμαρτιένγκε ντα ότι ντινάμ αμαρό λάφι κο Ντεβέλ τι κεράς λέσκο θέλημας. (Πράξ. 2:38· 3:19) Ο Ιεχωβά χαιρίνελα μπουτ κάνα κεράσα ανταλά βήματα για τι μπαριαράς εκ φιλία λέσαρ. Άμα συνεχίνασα τι κεράς ο πο λατσσό σο μπορίνασα για τι τζουβντιάς αντικάς σαρ ντινάμ αμαρό λάφι κάνα αφιερωσάλαμ, κα κεράς ο γκι ι Ιεχωβάσκο ντα κα τθεράς λατσσί φιλία λέσαρ.—Ψαλμ. 25:14.

3. Σο κα ντικχάς ακανά;

³ Αλλά σόσκε μπορεί τι νιωθίνεν μερικοί ότι να κερένα ι Ντεβλέσκο γκι; Σαρ σικαβέλα ο Ιεχωβά ότι κεράσα λέσκο γκι; Σαρ μπορίνελα εκ Χριστιανός τι αβέλ ατζέ πο σίγουρος ότι κερέλα ι Ντεβλέσκο γκι;

ΣΟΣΚΕ ΜΕΡΙΚΟΙ ΜΠΕΚΙΜ ΝΙΩΘΙΝΕΝΑ ΟΤΙ ΝΑ ΚΕΡΕΝΑ Ι ΙΕΧΩΒΑΣΚΟ ΓΚΙ

4, 5. Ατζέ-ντα άμα νιωθίνασα ότι να τθεράσα αξία, καλέ πραγμάσκε μπορίνασα τι αβάς σίγουροι;

⁴ Μπουτ αμένταρ μπέκιμ τι νιωθίνασα χουρντιαρέλα μπερί ότι να τθεράσα αξία. (Ψαλμ. 88:15) Εκ πφραλ, ο Αντριάν, βακερέλα:  «Πάντα νιωθίναβας άχρηστος. Εκ κατά πρώτα πράγματα σο ντάβα-μαν γκοντί χουρντιαρέλα μπερί ισί ότι προσευχίντιβαβας τι νακχέλ μι φαμιλί κο Παράδεισος, παρόλο σο ισινόμας σίγουρος ότι με να ισινόμας αζόμ λατσσό για τι αβάβ οτθέ». Ο Τόνι, σο λέσκι φαμιλί να ισινέ Μάρτυρες, βακερέλα: «Μο ντατ ντα μι ντάι ποτές να βακερένας μάνγκε ότι μανγκένας-μαν ή ότι ισινέ περήφανοι μάνγκε. Κερένας-μαν τι νιωθίναβ ότι σο-ντα τι κεράβας να κα ατσσόνας ευχαριστιμέ».

⁵ Άμα μπάζιμα νιωθίνασα ότι να τθεράσα αξία, μπορίνασα τι ντας-αμέν γκοντί ότι ο ίδιος ο Ιεχωβά ταρτιντάς-αμέν πασέ πέστε. (Ιωάν. 6:44) Βοβ ντικχέλα αμέντε ο λατσσιπέ σο μπέκιμ να ντικχάσα αμέν αμαρέ νεαυτόστε ντα τζανέλα αμαρό γκι. (1 Σαμ. 16:7· 2 Χρον. 6:30) Άρα, μπορίνασα τι πακιάς-Λες κάνα βακερέλα ότι ισινάμ πολύτιμοι.—1 Ιωάν. 3:19, 20.

6. Σαρ νιωθίνελας ο απόστολος Παύλος πι αμαρτιένγκε σο κερντάας ανγκλέ;

⁶ Πριν τι σικλιάς ι αλήθεια, μερικοί αμένταρ κεράας πράγματα σο μπορεί ατζέκ ατζέκ τι πφερένα-αμέν τύψεις. (1 Πέτρ. 4:3) Ατζέ-ντα πιστοί Χριστιανοί ουσαρένα με το αδυναμίες σο τθερένα. Μήπως τουμαρό γκι καταδικάνελα-τουμέν; Άμα βα, κα ντελ-τουμέν κουράγιος τι τζανέν ότι ατζέ-ντα πιστοί υπηρέτες ι Ιεχωβάσκε νιωθίνενας τύψεις. Για παράδειγμας, ο απόστολος Παύλος νιωθίνελας δυστυχισμέ κάνα σκεφτίνελας πο ατέλειες. (Ρωμ. 7:24) Βέβαια, ο Παύλος μετανιωσάλοας πι αμαρτιένγκε ντα μπολντιλόας. Αλλά βακερέλας ότι ισινέ «ο πο χουρντό κατά απόστολοι» ντα «ο πο μπαρό» αμαρτωλός.—1 Κορ. 15:9· 1 Τιμ. 1:15.

7. Σο πρέπει τι τθεράς αμαρέ γκοντιάτε ι αμαρτιένγκε σο κερντάμ ανγκλέ;

⁷ Αμαρό Ντατ σο ισί κο ουρανός ντέλα πο λάφι τι συγχωρίνελ-αμέν άμα κα μετανιώνας. (Ψαλμ. 86:5) Άρα, άμα στεναχωρίντιβασα μπαγιά ι αμαρτιένγκε σο κερντάμ, μπορίνασα τι πακιάς οντουβά σο βακερέλα αμένγκε ο Ιεχωβά, ότι συγχωριντάς-αμέν.—Κολ. 2:13.

8, 9. Σαρ μπορίνασα τι τσσιναβάς τι νιωθίνας ότι σο-ντα τι κεράς να ερεσέλα για τι κεράς ι Ιεχωβάσκο γκι;

⁸ Σαρέ μανγκάσα τι υπηρετίνας ι Ιεχωβάς καζόμ πο μπουτ μπορίνασα. Όμως, μερικοί νιωθίνενα ότι οντουλά σο κερένα ποτές να ερεσένα για τι κερέν λέσκο γκι. Εκ πφεν, η Αμάντα, βακερέλα: «Μπουτ φαρ σκεφτίναβα ότι, για τι νταβ κο Ιεχωβά ο πο λατσσό, πρέπει συνέχεια τι κεράβ ατζέ πο μπουτ πράγματα. Οτθάρ, προσπαθίναβα τι κεράβ πο μπουτ οντουλένταρ σο μπορίναβα. Κάνα να καταφερίναβα-λεν, αμντίναβα ότι ο Ιεχωβά ισί μπουτ απογοητευμέ μάντζαρ—σαρ ισινόμ με-ντα μι νεαυτόσαρ».

⁹ Σαρ μπορίνασα τι τσσιναβάς τι νιωθίνας ότι σο-ντα τι κεράς να ερεσέλα για τι κεράς ι Ιεχωβάσκο γκι; Ντεν-τουμέν γκοντί ότι ο Ιεχωβά ισί λογικός. Ποτές να μπεκλεντίνελα αμένταρ πο μπουτ οντουλένταρ σο μπορίνασα τι κεράς. Εκτιμίνελα σο-ντα κεράσα λέσκε άμα ανταβά ισί ο πο λατσσό σο μπορίνασα. Επίσης, σκεφτίνεν παραδείγματα τζενένγκε κατά Γραφή σο υπηρετίνενας ι Ιεχωβάς σαρέ πουμαρέ γκίσαρ. Σκεφτίνεν ι Παυλός. Κερντάς ο πο λατσσό για μπουτ μπρεσά σαρέ πι γκίσαρ. Πφιρντάς χιλιάδες χιλιόμετρα ντα κερντάς μπουτ νεβέ κχανγκιριά. Κάνα όμως ο πράγματα λέσκε ζωγιάτε αλλαξάλε ντα ναστί κερέλας αζόμ μπουτ κο έργος, μήπως τσσιναντάς τι κερέλ ι Ντεβλέσκο γκι; Νάα. Συνεχιντάς τι κερέλ ο πο λατσσό σο μπορίνελας ντα ο Ιεχωβά ευλογίνελας-λες. (Πράξ. 28:30, 31) Αμέν-ντα να μπορίνασα πάντα τι ντας ο ίδια πράγματα κο Ιεχωβά. Αλλά ανταβά σο τθερέλα σημασία λέσκε ισί ο λόγος σο υπηρετίνασα-λες. Για τι ντικχάς ακανά μερικούς τρόπους σο ο Ιεχωβά σικαβέλα αμένγκε ότι κεράσα λέσκο γκι.

 ΣΑΡ ΣΙΚΑΒΕΛΑ ΑΜΕΝΓΚΕ Ο ΙΕΧΩΒΑ ΟΤΙ ΚΕΡΑΣΑ ΛΕΣΚΟ ΓΚΙ;

10. Σαρ μπορίνασα τι ασουνάς ι Ιεχωβάς τι βακερέλ αμένγκε ότι κεράσα λέσκο γκι; (Ιωάννης 16:27)

¹⁰ Ντέλα-αμέν ι Αγία Γραφή. Ο Ιεχωβά ρόντελα τρόπους για τι σικαβέλ πι λαόστε ότι μανγκέλα-λες ντα ότι κερέλα λέσκο γκι. Η Γραφή βακερέλα ντούι περιπτώσεις σο ο Ιεχωβά βακερντάς κο Ιησούς ότι μανγκέλα-λες ντα ότι κερέλα λέσκο γκι. (Ματθ. 3:17· 17:5) Κα μανγκένας τι ασουνέν ι Ιεχωβάς τι βακερέλ τουμένγκε ότι κερένα λέσκο γκι; Ο Ιεχωβά να κερέλα αμέντζαρ λάφι κατά ουρανός, αλλά κερέλα αμέντζαρ λάφι αντράλ κατά σελίδες λέσκε Λαφίσκε. Κάνα διαβάνασα ο λάφια σο βακερντάς ο Ιησούς μανγκιμάσαρ πι μαθητέντε, ισί σαρ τι μπορίναας τι ασουνάς ι Ιεχωβάς τι βακερέλ-λεν ανταλά αμένγκε. (Διαβάνεν Ιωάννης 16:27) Ο Ιησούς μοιάζελας πι Νταντέστε. Οτθάρ, κάνα διαβάνασα ότι ο Ιησούς βακερντάς πι πιστέ μαθητένγκε ότι μανγκέλα-λεν, παρόλο σο ισινέ ατελείς, μπορίνασα τι σκεφτίνας ι Ιεχωβάς τι βακερέλ ανταλά λάφια αμένγκε.—Ιωάν. 15:9, 15.

11. Σόσκε ο ταλαιπωρίες να μανγκένα τι βακερέν ότι τσσιναντάμ τι κεράς ι Ιεχωβάσκο γκι; (Ιακώβου 1:12)

¹¹ Ντέλα-αμέν οντουλά σο χρειαζίντιβασα. Ο Ιεχωβά μανγκέλα τι βοηθίνελ-αμέν, για παράδειγμας ντέλα-αμέν οντουλά σο τθεράσα ανάγκη. Μπάζιμα, ο Ιεχωβά μπέκιμ μουκχέλα τι τσσίντας ταλαιπωρίες, σαρ κερντάς με το δίκαιος Ιώβ-ντα. (Ιώβ 1:8-11) Ο δοκιμασίες να μανγκένα τι βακερέν ότι τσσιναντάμ τι κεράς ι Ντεβλέσκο γκι. Οκιά μπάνταρ, ντένα-αμέν ευκαιρίες τι σικαβάς καζόμ μπουτ μανγκάσα ι Ντεβλές ντα καζόμ μπαρί μπέσα ντάσα λέστε. (Διαβάνεν Ιακώβου 1:12) Καζόμ κα νακχάς δοκιμασίες, κα ντικχάς καμπόρ μανγκέλα-αμέν ντα καμπόρ βοηθίνελα-αμέν τι νταϊντίνας.

12. Σο σικλιάσα κατά εμπειρία του Ντμίτρι;

¹² Σκεφτίνεν σο αβιλό-πες εκχέ πφραλέστε κι Ασία, κο Ντμίτρι. Χασαρντάς πι μπουτί ντα ναστί αρακχέλας γιαβέρ μπουτί για μπουτ μασεκά. Οτθάρ, αποφασιντάς τι νικιόλ πο μπουτ κο έργος, ντα αντικάς τι σικαβέλ πι εμπιστοσύνη κο Ιεχωβά. Ο μασεκά νακχένας, ντα ναστί αρακχέλας μπουτί. Σοράν, νασφάλιλο αζόμ μπουτ σο ναστί ιστίλας ούτε κατά κρεβάτι. Αρχισάλο τι τθερέλ αμφιβολίες άμα ισινέ λατσσό ρομ ντα ντατ ντα σκεφτίνελας μήπως ο Ιεχωβά να ισινέ ευχαριστιμέ λέσαρ. Εκ ιράτ, λέσκι τσσάι ντινάς-λες εκ χαρτίς σο τθερέλας ο λάφια ι εδαφιόσκε Ησαΐας 30:15: «Ατσσόν ήρεμοι ντα σικαβέν εμπιστοσύνη —ανταβά κα αβέλ τουμαρί ζορ». Ντινάς-λες λέστε ντα βακερντάς: «Ντάντε, κάνα νιωθίνεσα μπέτι, ντε-τουτ γκοντί ανταβά εδάφιος». Ο Ντμίτρι αγαντάς ότι, χάρη κο Ιεχωβά, λέσκι φαμιλί συνεχίνελας τι τθερέλ χαμπέ, σέα ντα κχερ. «Οντουβά σο χρειαζίντιβελας τι κεράβ», βακερέλα, «ισινέ τι ατσσάβ ήρεμος ντα τι συνεχίναβ τι τθεράβ εμπιστοσύνη μι Ντεβλέστε». Άμα νακχένα εκ ασακί δοκιμασία, μπορίνενα τι αβέν σίγουροι ότι ο Ιεχωβά πφαμπόλα τουμένγκε ντα κα βοηθίνελ-τουμέν τι νταϊντίνεν.

13. Καλέ τζενέν μπορεί τι χρησιμοποιήνελ ο Ιεχωβά για τι σικαβέλ αμένγκε ότι κεράσα λέσκο γκι, ντα σαρ;

¹³ Ντέλα-αμέν αμαρέ πφραλέν ντα πφενίν. Ο Ιεχωβά χρησιμοποιήνελα αμαρέ πφραλέν ντα πφενίν για τι σικαβέλ αμένγκε ότι κεράσα λέσκο γκι. Για παράδειγμας, μπορεί τι τσσίντελ γιαβερέν τι βακερέν αμένγκε λάφια σο κα ντεν-αμέν ζορ κο σωστός σαάτι. Εκ πφεν κι Ασία νιωσάλι-λες ανταβά εκχέ βακιτίστε σο ισινέ μπουτ πιεσμέ. Χασαρντάας πι μπουτί ντα νασφάλιλιας πφαρές. Σοράν, λάκο ρομ κερντάς εκ μπαρί αμαρτία ντα τσσιναντάς τι αβέλ πρεσβύτερος. «Ναστί αγαβάβας σόσκε αβένας-πες σαρέ ανταλά», βακερντάς. «Σκεφτίναβας ότι μπέκιμ κερντόμας κάτι κακός ντα τσσιναντόμας τι κεράβ ι Ιεχωβάσκο γκι». Αμαρί πφεν μολιντάς ι Ιεχωβάς τι σικαβέλ λάκε ότι κερέλα λέσκο γκι. Σαρ κερντάς-λες ανταβά ο Ιεχωβά; Βόι βακερέλα: «Ο πρεσβύτεροι κερντέ λάφι μάντζαρ ντα αντέ μι γκοντιάτε ότι ο Ιεχωβά μανγκέλα-μαν». Πο σοράν, μανγκλάς πάλι βοήθεια κατά Ιεχωβά. «Οντουβά ντιβές, λιντόμ εκ γράμμας σο γραφιντέας μάνγκε ο πφραλά ντα ο πφενιά κι κχανγκιρί», βακερέλα βόι. «Καζόμ διαβάναβας λένγκε λάφια σο λοκχιαρένας μο γκι, νιωσάλομ ότι ο Ιεχωβά ασουντάας-μαν». Βα, ο Ιεχωβά μπουτ φαρ σικαβέλα αμένγκε ότι κεράσα λέσκο γκι αντράλ κατά λατσσέ λάφια ι γιαβερένγκε.—Ψαλμ. 10:17.

14. Καβά ισί εκ γιαβέρ τρόπος σο ο Ιεχωβά σικαβέλα αμένγκε ότι κεράσα λέσκο γκι;

 ¹⁴ Εκ γιαβέρ τρόπος σο ο Ιεχωβά σικαβέλα αμένγκε ότι κεράσα λέσκο γκι ισί κάνα χρησιμοποιήνελα αμαρέ πφραλέν για τι ντεν-αμέν συμβουλή κάνα χρειαζίντιβασα-λα. Φιρειπείν, κο πρώτος αιώνας, ο Ιεχωβά χρησιμοποιηντάς ι απόστολε Παυλός τι γραφίνελ 14 επιστολές πι πφραλέντε. Κο επιστολές οντουλά ντινάς σταθερές συμβουλές αλλά μανγκιμάσαρ. Σόσκε κερντάς ο Ιεχωβά ι Παυλός τι ντελ ασακέ συμβουλές; Ο Ιεχωβά ισί λατσσό Ντατ ντα διορθώνελα πι τσσαβέν “σο κερένα λέσκο γκι”. (Παρ. 3:11, 12) Οτθάρ, άμα κα λας εκ συμβουλή σο ισί βασισμέ κι Γραφή, ανταβά να μανγκέλα τι βακερέλ ότι πφανγκλάμ ι Ντεβλέσκο γκι. Οκιά μπάνταρ σικαβέλα ότι κεράσα λέσκο γκι. (Εβρ. 12:6) Καλά γιαβερά αποδείξεις σικαβένα ότι κεράσα ι Ιεχωβάσκο γκι;

ΓΙΑΒΕΡΑ ΑΠΟΔΕΙΞΕΙΣ ΣΟ ΣΙΚΑΒΕΝΑ ΟΤΙ ΚΕΡΑΣΑ Ι ΙΕΧΩΒΑΣΚΟ ΓΚΙ

15. Καλέ τζενέντε ντέλα ο Ιεχωβά πο άγιος πνεύμας, ντα σόσκε ντέλα-αμέν σιγουριά ανταβά;

¹⁵ Ο Ιεχωβά ντέλα πο άγιος πνεύμας οντουλέντε σο κερένα λέσκο γκι. (Ματθ. 12:18) Κα μπορίναας τι πουτσάς-αμέν: “Μπορισάλομ τι σικαβάβ εκ ιδιότητα κατά καρπός ι Ντεβλέσκε πνευμάσκο μι ζωγιάτε;” Για παράδειγμας, μήπως ντικχένα ότι ακανά κερένα πο μπουτ υπομονή ι γιαβερέντζαρ από ό,τι κερένας πριν τι σικλιόν ι Ιεχωβάς; Ισί μπαγιά ότι, καζόμ πο μπουτ σικλιόνα τι σικαβέν ο καρπός ι Ντεβλέσκε πνευμάσκο, αζόμ πο μπουτ κα σικάντιβελ ξεκάθαρα ότι κερένα ι Ιεχωβάσκο γκι!—Ντικχέν ο πλαίσιος « Ο Καρπός ι Πνευμάσκο Ισί . . .»

16. Καλέ τζενέν χρησιμοποιήνελα ο Ιεχωβά για τι μουτθαβέν ο λατσσέ αμπέρια, ντα σαρ νιωθίνενα τουμέν ανταλέσκε; (1 Θεσσαλονικείς 2:4)

¹⁶ Κάνα εκ τζενό κερέλα ι Ντεβλέσκο γκι, ο Ιεχωβά χαιρίνελα τι ντελ-λες ο διορισμός τι βακερέλ ο λατσσέ αμπέρια. (Διαβάνεν 1 Θεσσαλονικείς 2:4) Ντικχέν σαρ βοηθίντιλι εκ πφεν, η Τζόσλιν, επειδή μουτθαβέλα ο λατσσέ αμπέρια κο γιαβερά. Εκ πρωί, η Τζόσλιν ιστίντιλι ντα νιωθίνελας μπουτ πεσμέ ψυχολογικά. «Να τθεράβας ιτς ζορ ντα νιωθίναβας άχρηστη», βακερέλα βόι. «Αλλά κεράβας σκαπανικός, ντα ισινέ ο ντιβές σο νικιάβας κο έργος. Οντουλέσκε, κερντόμ προσευχή ντα γκιλόμ κο έργος». Οντουβά πρωί, η Τζόσλιν αρακχλάς τη Μαίρη, εκχέ λατσσέ τζουβλιά σο δεχτιντάς τι κερέλ μελέτη. Χάνικ μασεκά πο σοράν, η Μαίρη βακερντάς ότι προσευχίντιβελας  κο Ντεβέλ για τι βοηθίνελ-λα κάνα η Τζόσλιν μπασκιαρντάς λάκι πόρτα. Καζόμ σκεφτίνελα ανταγιά εμπειρία, η Τζόσλιν βακερέλα: «Νιωσάλομ σαρ τι βακερέλας μάνγκε ο Ιεχωβά: “Κερέσα μο γκι”». Βέβαια, να κα μπεϊντίνεν σαρέ ο τζενέ οντουλά σο βακεράσα λένγκε. Αλλά μπορίνασα τι αβάς σίγουροι ότι ο Ιεχωβά χαιρίνελα κάνα προσπαθίνασα τι κεράς ο πο λατσσό σο μπορίνασα για τι μουτθαβάς ο λατσσέ αμπέρια κο γιαβερά.

17. Σο σικλιόνα για το λύτρος οντουλένταρ σο βακερντάς η Βίκι; (Ψαλμός 5:12)

¹⁷ Αντράλ κατά λύτρος, o Ιεχωβά συγχωρίνελα ο αμαρτίες οντουλένγκε σο κερένα λέσκο γκι. (1 Τιμ. 2:5, 6) Αλλά σο αβέλα-πες άμα πάλι να νιωθίνασα ότι κεράσα ι Ιεχωβάσκο γκι, παρόλο σο τθεράσα πίστη κο λύτρος ντα μπολντιλάμ; Ντεν-τουμέν γκοντί ότι ναστί ντάσα μπέσα πάντα οντουλέντε σο νιωθίνασα αμέν, αλλά μπορίνασα τι ντας μπέσα κο Ιεχωβά. Λέσκε γιακχίντε οντουλά σο τθερένα πίστη κο λύτρος ισί δίκαιοι ντα ντέλα πο λάφι τι ευλογίνελ-λεν. (Διαβάνεν Ψαλμός 5:12· Ρωμ. 3:26) Η Βίκι βοηθίντιλι μπουτ επειδή σκεφτίνελας λατσσές ο λύτρος. Εκ ντιβές, αφού κερντάς αχόρτ σκέψεις ι λυτρόσκε, αγαντάς ακαβά: «Ο Ιεχωβά προσπαθίνελας για μπουτ καιρός τι σικαβέλ μάνγκε ότι μανγκέλα-μαν. . . . Όμως, με κι πραγματικότητα βακεράβας λέσκε: “Ναστί αβέλα-πες τι μανγκές εκχέ τζενές σαρ μάντε. Η θυσία τι Τσσαβέσκι να ερεσέλα για τι ιτσσαρέλ μο αμαρτίες”». Επειδή σκεφτιντάς λατσσές ο λύτρος, η Βίκι αρχισάλι τι νιωθίνελ ότι ο Ιεχωβά μανγκέλα-λα. Αμέν-ντα κα νιωθίνας ότι ο Ιεχωβά μανγκέλα-αμέν ντα κα αγαβάς ότι κεράσα λέσκο γκι άμα σκεφτίνασα ο λύτρος.

18. Καλέ πραγμάσκε μπορίνασα τι αβάς σίγουροι άμα μανγκάσα αμαρέ Νταντές σο ισί κο ουρανός;

¹⁸ Παρόλο σο μπορεί τι προσπαθίνας μπουτ για τι κεράς ανταλά συμβουλές, μπάζιμα μπορεί τι χασαράς αμαρί ζορ ντα μα τι αβάς σίγουροι ότι κεράσα ι Ιεχωβάσκο γκι. Άμα κα αβέλ-πες ανταβά, τι ντεν-τουμέν γκοντί ότι “οντουλά σο μανγκένα-Λες” κερένα λέσκο γκι. (Ιακ. 1:12) Οτθάρ, συνεχίνεν τι τζαν πο πασέ κο Ιεχωβά ντα τι ντικχέν σαρ σικαβέλα τουμένγκε ότι κερένα λέσκο γκι. Πάντα τι ντεν-τουμέν γκοντί ότι ο Ιεχωβά «νανέ ντουρ αμένταρ».—Πράξ. 17:27.