1. Καλά ισί μερικές ευλογίες σο τθεράσα επειδή ισινάμ κι οργάνωση κι Ιεχωβάσκι;

 ΙΣΙ μπαγιά ευλογία τι αβάς αντρέ κι οργάνωση κι Ιεχωβάσκι ανταλέ δύσκολε τελευταίε ντιβεσέντε. Καζόμ ο πράγματα σαρό κο ντουνιάς αβένα χειρότερα, ο Ιεχωβά ντέλα-αμέν εκ ενωμέ, πνευματική φαμιλί πφραλέντζαρ ντα πφενίντζαρ. (Ψαλμ. 133:1) Βοηθίνελα-αμέν τι αβάς δεμέ αμαρέ φαμιλιάσαρ. (Εφεσ. 5:33–6:1) Ντα ντέλα-αμέν ι σοφία σο χρειαζίντιβασα για τι ντας πέρα ι ανησυχία ντα τι τθεράς αληθινή ειρήνη αντρ’ αμέντε.

2. Σο χρειαζίντιβελα τι κεράς, ντα σόσκε;

² Όμως, πρέπει τι μαράς-αμέν για τι συνεχίνας τι υπηρετίνας ι Ιεχωβάς πιστά. Σόσκε; Επειδή μερικές φορές μπέκιμ τι προσβαλίντιβασα οντουλένταρ σο βακερένα ή κερένα ο γιαβερά. Επίσης, μπορεί τι δυσκολίντιβασα τι νταϊντίνας αμαρέ ελαττώματα, ειδικά άμα κεράσα ο ίδια λάθη ξανά ντα ξανά. Μπορίνασα τι συνεχίνας τι υπηρετίνας ι Ιεχωβάς (1) κάνα εκ πφραλ προσβαλίνελα-αμέν, (2) κάνα αμαρό ρομ ή αμαρί ρομνί πφανγκέλα αμαρό γκι ντα (3) κάνα χασαράσα αμαρί ζορ επειδή κεράσα λάθη. Ανταλέ μαθημάστε, κα ντικχάς ι κάθε περίπτωση ξεχωριστά. Κα ντικχάς επίσης σο μπορίνασα τι σικλιάς από εκ πιστός τζενό σο ισί κι Γραφή.

ΑΤΣΣΟΝ ΠΙΣΤΟΙ ΚΟ ΙΕΧΩΒΑ ΚΑΝΑ ΕΚ ΠΦΡΑΛ ΠΡΟΣΒΑΛΙΝΕΛΑ-ΤΟΥΜΕΝ

3. Καβά πρόβλημας νακχένα ο υπηρέτες ι Ιεχωβάσκε;

³ Ο πρόβλημας. Μερικά πφραλά ντα πφενιά τθερένα κάποια πράγματα κο χαρακτήρας σο νευριάνενα-αμέν. Γιαβερά μπορεί τι πφανγκέν αμαρό γκι ή τι συμπεριφερίντιβεν αμένγκε χωρίς αγάπη. Ο πρεσβύτεροι μπορεί τι κερέν λάθη. Ανταλά καταστάσεις  κα μπορίνενας τι κερέν μερικέν μα τι αβέν σίγουροι ότι ανταγιά ισί η οργάνωση ι Ντεβλέσκι. Αντίς τι συνεχίνεν τι υπηρετίνεν ι Ντεβλές «σαρέ γιεκ» πουμαρέ πφραλέντζαρ ντα πφενίντζαρ, μπέκιμ τι σταματίνεν τι κερέν παρέα οντουλέντζαρ σο προσβαλιντέ-λεν ή μπέκιμ ατζέ-ντα τι τσσιναβέν τι τζαν κο συναθροίσεις. (Σοφ. 3:9) Ισί όμως ανταγιά εκ λατσσί απόφαση; Ντικχέν σο μπορίνασα τι σικλιάς εκχέ τζενέσταρ σο ισί κι Γραφή ντα νακχλάς ασακέ προβλήματα.

4. Καλά προβλήματα νακχλάς ο απόστολος Παύλος;

⁴ Ο παράδειγμας κατά Γραφή. Ο απόστολος Παύλος τζανέλας ότι λέσκε πφραλά ντα λέσκε πφενιά ισινέ ατελείς. Για παράδειγμας, χάνικ πο σοράν αφού αρχισάλο τι κερέλ παρέα ι κχανγκιριάσαρ, κριντέ-λες άδικα. (Πράξ. 9:26) Σοράν, μερικοί βακερένας παλά-λέσταρ μπέτι πράγματα λέσκε για τι κερέν ι γιαβερέν τι χασαρέν πουμαρί εμπιστοσύνη λέστε. (2 Κορ. 10:10) Ο Παύλος ντικχλάς εκχέ υπεύθυνε πφραλές τι λελ εκ λάθος απόφαση σο κα μπορίνελας τι κερέλ ι γιαβερέν τι χασαρέν πουμαρί πίστη. (Γαλ. 2:11, 12) Ντα εκ κατά λατσσέ συνεργάτες λέσκε, ο Μάρκος, πφανγκλάς μπουτ λέσκο γκι. (Πράξ. 15:37, 38) Ο Παύλος κα μπορίνελας τι σκεφτίνελ ότι κα αβέλας δικαιολογημέ μα τι κερέλ παρέα ανταλέ τζενέντζαρ. Όμως, ο πφραλά ντα ο πφενιά συνεχίνενας τι αβέν πολύτιμοι λέσκε ντα να τσσιναντάς τι κερέλ μπερεκέτι πράγματα ι Ιεχωβάσκε. Σο βοηθιντάς-λες τι συνεχίνελ τι υπηρετίνελ ι Ιεχωβάς πιστά;

5. Σο βοηθιντάς ι Παυλός μα τι κερέλ πέρα πι πφραλέν; (Κολοσσαείς 3:13, 14) (Ντικχέν ι φωτογραφία-ντα)

⁵ Ο Παύλος μανγκέλας πι πφραλέν ντα πι πφενίν. Η αγάπη σο τθερέλας ι γιαβερένγκε βοηθιντάς-λες τι τθερέλ πο γιακχά, όχι κο ατέλειες λένγκε, αλλά κο σουκάρ ιδιότητες λένγκε. Η αγάπη επίσης βοηθιντάς ι Παυλός τι κερέλ οντουβά σο βοβ γραφιντάς, σαρ ντικχίντιβελα κο εδάφια Κολοσσαείς 3:​13, 14. (Διαβάνεν) Ντικχέν σαρ σικαντάς-λες ανταβά ο Παύλος ι Μαρκόσαρ. Παρόλο σο ο Μάρκος μουκχλάς ι Παυλός κάνα ισινέ κο πρώτος ιεραποστολικός ταξίδι, ο Παύλος να ατσσιλό χολιαμέ. Πο σοράν, κάνα γραφιντάς εκ επιστολή με μπουτ αγάπη κι κχανγκιρί κο Κολοσσές, ισαρντάς ι Μαρκός επειδή ισινέ εκ πολύτιμος συνεργάτης, ντα βακερντάς ότι “λοκχιαρντάς μπουτ λέσκο γκι”. (Κολ. 4:10, 11) Καζόμ ισινέ φυλακισμέ κι Ρώμη, ο Παύλος μανγκλάς τι αβέλ ο Μάρκος τι βοηθίνελ-λες. (2 Τιμ. 4:11) Ντικχίντιβελα ξεκάθαρα ότι να σιγκιαρέλας τι κερέλ πέρα πι πφραλέν. Σο σικλιάσα κατά Παύλος;

6, 7. Σαρ μπορίνασα τι συνεχίνας τι σικαβάς αγάπη κο πφραλά παρόλο σο ισί ατελείς; (1 Ιωάννη 4:7)

⁶ Σο σικλιάσα. Ο Ιεχωβά μανγκέλα τι συνεχίνας τι σικαβάς αγάπη αμαρέ πφραλένγκε ντα αμαρέ πφενίνγκε. (Διαβάνεν 1 Ιωάννη 4:7) Άμα σε εκ περίπτωση εκ τζενό να σικαβέλα εκ  Χριστιανική ιδιότητα, τι σκεφτίνας ότι μανγκέλα τι ακολουθίνελ ο αρχές ι Γραφιάκε ντα ότι απλώς κερντάς-λες χωρίς τι σκεφτίνελ-λες λατσσές. (Παρ. 12:18) Ο Ντεβέλ μανγκέλα πι πιστέ υπηρετόν παρόλο σο τθερένα ελαττώματα. Να κερέλα-αμέν πέρα κάνα κεράσα λάθη, ούτε ατσσόλα χολιαμέ αμέντζαρ. (Ψαλμ. 103:9) Καζόμ σημαντικός ισί τι μοιάζας αμαρέ Νταντέστε σο συγχωρίνελα!—Εφεσ. 4:32–5:1.

⁷ Τι ντεν-τουμέν γκοντί επίσης ότι, καζόμ ο τέλος ερεσέλα, χρειαζίντιβελα τι ατσσάς πασέ αμαρέ πφραλέντε ντα πφενίντε. Ο διωγμός κα αβέλ πο μπαρό. Μπορεί ατζέ-ντα τι τζας φυλακή οντουλένγκε σο πακιάσα. Άμα κα αβέλ-πες ανταβά, κα χρειαζίντιβας αμαρέ πφραλέν ντα αμαρέ πφενίν πο μπουτ από ποτές. (Παρ. 17:17) Ντικχέν σο αβιλό-πες κο Χοσέπ, a εκχέ πρεσβυτερόστε κι Ισπανία. Βοβ ντα γιαβερά πφραλά ισινέ κι φυλακή επειδή ατσσιλέας ουδέτεροι. Ο Χοσέπ βακερέλα: «Κι φυλακή, ισινέ πο εύκολος τι νευριάνας εκχέ πφραλέσαρ επειδή να τθεράας εκ τθαν τι ατσσάς κορκορέ. Έπρεπε τι νταϊντίνας ο εκ ι γιαβερές ντα τι συγχωρίνας ο εκ ι γιαβερές συνέχεια. Ανταβά βοηθίνελας-αμέν τι ατσσάς ενωμέ ντα αρακχαντέ. Τθεράας ντονταλάι αμένταρ φυλακισμέ τζενέν σο να υπηρετίνενας ι Ιεχωβάς. Σε εκ περίπτωση, ντινόμ-μαν ντα μο βας ισινέ κο γύψος, οπότε ναστί κεράβας κάποια πράγματα κορκορό. Αλλά εκ πφραλ τθοβέλας μο σέα ντα φροντίνελας-μαν. Νιωσάλομ ι αληθινή αγάπη κάνα χρειαζίντιβαβας-λα πο μπουτ από ποτές». Τθεράσα σημαντικούς λόγους τι λύνας ακανά ο παρεξηγήσεις αμαρέ πφραλέντζαρ!

ΤΙ ΣΥΝΕΧΙΝΕΝ ΤΙ ΥΠΗΡΕΤΙΝΕΝ Ι ΙΕΧΩΒΑΣ ΚΑΝΑ ΤΟΥΜΑΡΟ ΡΟΜ Ή ΤΟΥΜΑΡΙ ΡΟΜΝΙ ΠΦΑΝΓΚΕΛΑ ΤΟΥΜΑΡΟ ΓΚΙ

8. Καβά πρόβλημας νακχένα ο αντρόγυνα;

⁸ Ο πρόβλημας. Κάθε μπιαβ τθερέλα δυσκολίες. Η Αγία Γραφή βακερέλα αμένγκε ακαβά πράγμας σο ισί μπαγιά: Ο παντριμέ κα τθερέν «στεναχώρια πουμαρέ σωμάστε». (1 Κορ. 7:28) Σόσκε; Επειδή ο μπιαβ ανέλα πασέ ντουέ τζενέν σο ισί ατελείς, ντα ο κάθε εκ λένταρ τθερέλα διαφορετικός χαρακτήρας ντα μανγκέλα διαφορετικά πράγματα. Ο ρομ ή η ρομνί μπορεί τι τθερέν εκ γιαβέρ κουλτούρα ή τι μπαριλέ γιαβέρτουλους. Καζόμ νακχέλα ο βακίτι, μπέκιμ τι σικάντιβεν χούγια σο να ντικχίντιβενας πριν κατά μπιαβ. Σαρέ ανταλά πράγματα μπορεί τι κερέν-λεν τι νευριάνεν. Αντίς τι αγαβέν ότι ο ντούι-ντα φταίνενα για το πρόβλημας ντα τι προσπαθίνεν τι λύνεν-λες, μπέκιμ τι αρχίνεν τι κατηγορίνεν ο εκ ι γιαβερές. Μπέκιμ ατζέ-ντα τι αρχίνεν τι σκεφτίνεν ότι κα μπορίνενας τι τζουβντιόν χωριστά ή τι λεν διαζύγιος. Αλλά μήπως ανταβά κα λύνελ λένγκε προβλήματα; b Για τι ντικχάς σο μπορίνασα τι σικλιάς εκχέ τζουβλιάταρ κατά Γραφή σο ατσσιλί πιστή κο Ιεχωβά παρόλο σο τθερέλας εκ μπουτ δύσκολος μπιαβ.

9. Καβά πρόβλημας νακχέλας η Αβιγαία;

⁹ Ο παράδειγμας κατά Γραφή. Η Αβιγαία ισινέ παντριμέ με τον Νάβαλ. Η Γραφή βακερέλα ότι ισινέ γκεραλό ντα τθερέλας μπέτι συμπεριφορά. (1 Σαμ. 25:3) Πρέπει τι αβέλας δύσκολος για την Αβιγαία τι τζουβντιόλ εκχέ ασακέ τζενέσαρ. Κα μπορίνελας άραγες τι αρακχέλ εκ εύκολος τρόπος για τι γλιτώνελ ανταλέ μπιαβέσταρ; Ντιντιλί-λα ανταγιά ευκαιρία κάνα ο Δαβίδ, σο κα αβέλας βασιλιάς κο Ισραήλ, αβιλό τι μουνταρέλ λάκε ρομές επειδή προσβαλιντάας εμ λες εμ λέσκε μουρσέν. (1 Σαμ. 25:9-13) Η Αβιγαία κα μπορίνελας τι νασέλ για τι γλιτώνελ, ντα τι μουκχέλ ι Δαβιδίς τι κερέλ οντουβά σο τθερέλας πι γκοντιάτε. Όμως, να κερντάς-λες ανταβά. Οκιά μπάνταρ, μολιντάς ι Δαβιδίς μα τι  μουνταρέλ τον Νάβαλ. (1 Σαμ. 25:23-27) Σο τσσιντιντάς-λα τι κερέλ-λες ανταβά;

10. Σόσκε μπέκιμ η Αβιγαία κερέλας υπομονή εκχέ δύσκολε μπιαβέστε;

¹⁰ Η Αβιγαία μανγκέλας ι Ιεχωβάς ντα σεβάνελας ο κανόνες σο τσσουντάας ι μπιαβέσκε. Σίγουρα τζανέλας σο βακερντάας ο Ντεβέλ κο Αδάμ ντα κι Εύα κάνα κερντάς ο πρώτος μπιαβ. (Γέν. 2:24) Η Αβιγαία τζανέλας ότι ο μπιαβ ισινέ ιερός κι Ιεχωβάσκε γιακχά. Μανγκέλας τι κερέλ ι Ντεβλέσκο γκι, ντα ανταβά τσσιντιντάς-λα τι κερέλ σο-ντα μπορίνελας για τι σώνελ ι τζενέν σο ισινέ λάκε κχερέστε, εμ πι ρομές. Κερντάς κάτι σουγκό για μα τι μουκχέλ ι Δαβιδίς τι μουνταρέλ τον Νάβαλ. Επίσης, μανγκλάς συγνώμη για εκ λάθος σο να κερντάας. Σίγουρα, ο Ιεχωβά μανγκέλας ανταλέ τζουβλιά σο τθερέλας θάρρος ντα να ντικχέλας πο νεαυτός. Σο σικλιόνα ο ρομά ντα ο ρομνιά κατά Αβιγαία;

11. (α) Σο μανγκέλα ο Ιεχωβά τι κερέν ο παντριμέ; (Εφεσίους 5:33) (β) Σο σικλιλέν οντουλένταρ σο κερντάς η Κάρμεν για τι σώνελ πο μπιαβ; (Ντικχέν ι φωτογραφία-ντα)

¹¹ Σο σικλιάσα. Ο Ιεχωβά ντέλα κο παντριμέ ι οδηγία τι σεβάνεν ο μπιαβ, ατζέ-ντα άμα ισί λένγκε δύσκολος τι τζουβντιόν πουμαρέ ρομέσαρ ή πουμαρέ ρομνιάσαρ. Ο Ντεβέλ πρέπει τι χαιρίνελα μπουτ κάνα ντικχέλα ι παντριμέ τζενέν τι μαρέν-πες για τι λύνεν πουμαρέ προβλήματα ντα τι σεβάνεν ντα τι μανγκέν ο εκ ι γιαβερές χωρίς τι ντικχέν πουμαρό νεαυτός! (Διαβάνεν Εφεσίους 5:33) Σκεφτίνεν ο παράδειγμας της Κάρμεν. Περίπου σιοβ μπρεσά σοράν πι μπιαβέσταρ, η Κάρμεν αρχισάλι μελέτη ι Ιεχωβάσκε Μαρτυρέντζαρ ντα σοράν μπολντιλί. «Μο ρομ να μπεϊντιντάς ανταβά σο κερντόμ», βακερέλα η Κάρμεν. «Αρχισάλο τι ζηλίνελ ι Ιεχωβάς. Προσβαλίνελας-μαν ντα απειλίνελας-μαν ότι κα μουκχέλ-μαν». Όμως, η Κάρμεν συνεχίνελας τι προσπαθίνελ πι μπιαβέσκε. Για 50 μπρεσά, μαρέλας-πες τι μανγκέλ ντα τι σεβάνελ πι ρομές. «Καζόμ νακχένας ο μπρεσά, σικλιλόμ τι αγαβάβ μι ρομές ντα τι κεράβ λέσαρ λάφι λατσσιμάσαρ. Επειδή τζανάβας ότι ο μπιαβ ισί ιερός κι Ιεχωβάσκε γιακχά, κεράβας σο νακχέλας μι βαστέσταρ για τι ατσσικιαράβ-λες. Επειδή μανγκάβα ι Ιεχωβάς, ποτές να προσπαθιντόμ τι χαλαβάβ μο μπιαβ». c Άμα κα τθερέν δυσκολίες τουμαρέ μπιαβέστε, τι αβέν σίγουροι ότι ο Ιεχωβά κα στηρίνελ-τουμέν ντα κα βοηθίνελ-τουμέν τι νταϊντίνεν.

ΤΙ ΣΥΝΕΧΙΝΕΝ ΤΙ ΥΠΗΡΕΤΙΝΕΝ Ι ΙΕΧΩΒΑΣ ΑΜΑ ΚΑ ΚΕΡΕΝ ΕΚ ΣΟΒΑΡΗ ΑΜΑΡΤΙΑ

12. Καβά πρόβλημας μπέκιμ τι τθεράς άμα κα κεράς εκ σοβαρή αμαρτία;

¹² Ο πρόβλημας. Άμα κα κεράς εκ σοβαρή αμαρτία, μπέκιμ νιωθίνασα ότι σαρέ ο πράγματα ισί τελειωμέ αμένγκε. Η Γραφή βακερέλα ότι  αμαρέ αμαρτίες μπορίνενα τι πφανγκέν αμαρό γκι ντα τι κερέν-αμέν τι λατζάς. (Ψαλμ. 51:17) Εκ πφραλ, ο Ρόμπερτ, μαρντάς-πες για μπουτ μπρεσά τι αβέλ διακονικός υπηρέτης. Όμως, κερντάς εκ σοβαρή αμαρτία ντα αγαντάς ότι προδοντάας ι Ιεχωβάς. «Κάνα αγαντόμ σο κερντόμ, μι συνείδηση να μουκχέλας-μαν σε ησυχία», βακερέλα βοβ. «Νιωθίναβας μπουτ μπέτι. Αρχισάλομ τι ροβάβ γκίσαρ ντα προσευχισάλομ κο Ιεχωβά. Ντάβα-μαν γκοντί ότι σκεφτίναβας ότι ο Ντεβέλ ποτές να κα ασουνέλας-μαν πάλι. Σόσκε τι ασουνέλ-μαν; Πφανγκλόμας λέσκο γκι». Άμα κα κεράς εκ σοβαρή αμαρτία, μπορεί τι νιωθίνας ότι σαρέ ο πράγματα ισί τελειωμέ αμένγκε επειδή πφανγκιλό αμαρό γκι ντα πακιάσα ότι ο Ιεχωβά κερντάς-αμέν πέρα. (Ψαλμ. 38:4) Άμα νιωσάλεν ποτές αντικάς, σκεφτίνεν εκχέ πιστέ τζενές κατά Γραφή σο συνεχιντάς τι υπηρετίνελ ι Ιεχωβάς παρόλο σο κερντάς εκ σοβαρή αμαρτία.

13. Καγιά σοβαρή αμαρτία κερντάς ο απόστολος Πέτρος, ντα σο γκερντάς-λες ανταλέ αμαρτιάτε;

¹³ Ο παράδειγμας κατά Γραφή. Ι ιράτ πριν τι μουνταρέν ι Ιησούς, ο απόστολος Πέτρος κερντάς κάποια λάθη παλάλ γιαβερέστε, ντα ανταλά λάθη γκερντέ-λες τι κερέλ εκ μπουτ μπαρί αμαρτία. Κι αρχή, σικαντάς ότι ντέλας μπουτ μπέσα πι νεαυτόστε κάνα βακερντάς ότι βοβ κα ατσσόλας πιστός ατζέ-ντα άμα ο γιαβερά απόστολοι κα μουκχένας ι Ιησούς. (Μάρκ. 14:27-29) Σοράν, κο κήπος της Γεθσημανή, ο Πέτρος μπουτ φαρ να καταφεριντάς τι ατσσόλ τζανγκαντό. (Μάρκ. 14:32, 37-41) Κι συνέχεια, μουκχλάς ι Ιησούς κο βαστά μπουτέ τζενένγκε. (Μάρκ. 14:50) Τελικά, βακερντάς τριν φαρ ότι να τζανέλας ι Ιησούς, ντα ερεσλό κο σημείος τι χαλ σοβέλ για τι κερέλ ι γιαβερέν τι πακιάν λέσκο ψέμας. (Μάρκ. 14:66-71) Σο κερντάς ο Πέτρος κάνα αγαντάς καζόμ σοβαρή ισινέ λέσκι αμαρτία; Χασαρντάς ντιπ σαρί πι ζορ ντα ροβέλας γκίσαρ, μάλλον επειδή χάνας-λες ο τύψεις. (Μάρκ. 14:72) Ανέν τουμαρέ γκοντιάτε ι ντουκχ ι Πετρόσκι κάνα, σοράν από χάνικ σαάτια, μουνταρντέ λέσκε αμαλές, ι Ιησούς. Ο Πέτρος πρέπει τι νιωσάλο ότι να τθερέλας ιτς αξία!

14. Σο βοηθιντάς ι Πετρός τι συνεχίνελ τι υπηρετίνελ ι Ιεχωβάς; (Ντικχέν ι φωτογραφία)

¹⁴ Ο Πέτρος μπορισάλο τι συνεχίνελ τι υπηρετίνελ ι Ιεχωβάς για μπουτ λόγους. Να πφαντάς-πες πι νεαυτόστε. Γκιλό πι πνευματικέ πφραλέντε ντα πφενίντε, σο σίγουρα ντινέ-λες κουράγιος. (Λουκ. 24:33) Επίσης, ο αναστημέ Ιησούς σικαντάς-πες κο Πέτρος, μάλλον για τι ντελ-λες ζορ. (Λουκ. 24:34· 1 Κορ. 15:5) Σοράν, αντίς τι διορθώνελ ι Πετρός για το λάθη σο κερντάας, ο Ιησούς βακερντάς πι αμαλέσκε ότι κα λέλας πο μπαρέ ευθύνες. (Ιωάν. 21:15-17) Ο Πέτρος τζανέλας ότι κερντάας εκ σοβαρή αμαρτία, αλλά να νιωθίνελας ότι σαρέ ο πράγματα ισινέ τελειωμέ λέσκε. Σόσκε; Επειδή αβιλό σίγουρος  ότι ο Κύριος λέσκο, ο Ιησούς, συνεχίνελας τι μανγκέλ-λες. Ο πνευματικά πφραλά ι Πετρόσκε συνεχίνενας τι στηρίνεν-λες. Σο σικλιάσα λέσκε παραδειγμάσταρ;

15. Καλέ πραγμάσκε μανγκέλα ο Ιεχωβά τι αβάς σίγουροι; (Ψαλμός 86:5· Ρωμαίους 8:38, 39) (Ντικχέν ι φωτογραφία-ντα)

¹⁵ Σο σικλιάσα. Ο Ιεχωβά μανγκέλα τι αβάς σίγουροι ότι μανγκέλα-αμέν ντα ότι συγχωρίνελα-αμέν. (Διαβάνεν Ψαλμός 86:5· Ρωμαίους 8:38, 39) Κάνα αμαρτίνασα, νιωθίνασα τύψεις. Ανταβά ισί φυσιολογικός ντα σωστός. Όμως δεν πρέπει τι αμντίνας ότι να αβέλα-πες με τίποτα τι μανγκέλ-αμέν ή τι συγχωρίνελ-αμέν ο Ιεχωβά. Οκιά μπάνταρ, πρέπει αμέσως τι μανγκάς βοήθεια. Ο Ρόμπερτ βακερέλα: «Κερντόμ αμαρτία επειδή ντινόμ μπέσα μι νεαυτόστε για μα τι περάβ κο πειρασμός». Ο Ρόμπερτ αγαντάς ότι έπρεπε τι κερέλ λάφι κο πρεσβύτεροι. Βοβ βακερέλα: «Κάνα κερντόμ ανταβά βήμας, νιωσάλομ αμέσως ι αγάπη ι Ιεχωβάσκι αντράλ ανταλέ πρεσβυτερόνταρ. Βον να πακιάνας ότι σαρέ ο πράγματα ισινέ τελειωμέ μάνγκε. Βοηθιντέ-μαν τι πακιάβ ότι ο Ιεχωβά να μουκχλάας-μαν». Αμέν-ντα μπορίνασα τι αβάς σίγουροι ότι ο Ιεχωβά μανγκέλα-αμέν μπουτ ντα συγχωρίνελα-αμέν άμα μετανιώνασα αμαρέ αμαρτιένγκε, μανγκάσα βοήθεια ντα προσπαθίνασα μπαγιά μα τι κεράς πάλι ο ίδια λάθη. (1 Ιωάν. 1:8, 9) Άμα ισινάμ σίγουροι ανταλέσκε, ανταβά βοηθίνελα-αμέν μα τι τσσιναβάς αμαρό αγώνας κάνα κεράσα εκ λάθος.

16. Σόσκε ισινέν αποφασισμέ τι συνεχίνεν τι υπηρετίνεν ι Ιεχωβάς;

¹⁶ Ο Ιεχωβά εκτιμίνελα μπουτ ο προσπάθειες σο κεράσα τι υπηρετίνας-λες κο δύσκολα τελευταία ντιβεσά. Λέσκε βοηθειάσαρ, μπορίνασα τι συνεχίνας τι υπηρετίνας-λες πιστά κάνα πφανγκιόλα αμαρό γκι κατά λάθη αμαρέ ή ι γιαβερένγκε. Μπορίνασα τι μπαριαράς αμαρί αγάπη ι πφραλένγκε ντα ι πφενίνγκε ντα τι συγχωρίνας-λεν ατζέ-ντα άμα προσβαλίνενα-αμέν. Μπορίνασα τι σικαβάς καζόμ μπουτ μανγκάσα ι Ντεβλές ντα καζόμ μπουτ σεβάνασα ο μπιαβ κάνα κεράσα σο νακχέλα αμαρέ βαστέσταρ για τι λύνας ο προβλήματα σο μπέκιμ τι τθεράς αμαρέ μπιαβέστε. Ντα άμα κα κεράς εκ αμαρτία, μπορίνασα τι μανγκάς ι βοήθεια ι Ιεχωβάσκι, τι δεχτίνας λέσκι αγάπη ντα λέσκι συγχώρηση, ντα τι συνεχίνας τι υπηρετίνας-λες σαρέ αμαρέ γκίσαρ. Μπορίνασα τι αβάς σίγουροι ότι κα λας μπουτ ευλογίες άμα να κα «τσσιναβάς τι κεράς ο σωστός».—Γαλ. 6:9.