1, 2. (α) Σαρ ισινέ ο πράγματα κι ζωή κι Παυλόσκι κάνα γραφιντάς ι Επιστολή κο Εφεσίους; (β) Καλά ερωτήσεις κα ντικχάς;

 ΚΑΝΑ ο απόστολος Παύλος ισινέ πφαντό πι κχερέστε κι Ρώμη, μανγκέλας τι ντελ ζορ πι πφραλέν. Να μπορίνελας τι τζαλ τι ντικχέλ-λεν, οτθάρ γραφιντάς κάποιες επιστολές. Εκ ανταλένταρ ισινέ η επιστολή σο γραφιντάς κο Εφεσίους περίπου κο 60 με 61 Κ.Χ.—Εφεσ. 1:1· 4:1.

² Σχεδόν ντες μπρεσά πο τζανγκλέ, ο Παύλος μπεσλόας μπουτ βακίτι κι Έφεσος καζόμ βακερέλας ντα σικλιαρέλας ο λατσσέ αμπέρια. (Πράξ. 19:1, 8-10· 20:20, 21) Μανγκέλας πι πφραλέν μπουτ ντα μανγκέλας τι βοηθίνελ-λεν τι ατσσόν πιστοί κο Ιεχωβά. Αλλά σόσκε γραφιντάς κο χρισμέ Χριστιανοί για το καρανίκι ντα για το φως; Σο μπορίνενα τι σικλιόν σαρέ ο Χριστιανοί κατά συμβουλή ανταγιά; Για τι ντικχάς ο απαντήσεις ανταλέ ερωτησιέντε.

ΚΑΤΑ ΚΑΡΑΝΙΚΙ ΚΟ ΦΩΣ

3. Καλά λάφια χρησιμοποιηντάς ο Παύλος κι επιστολή σο γραφιντάς κο Εφεσίους;

³ Ο Παύλος γραφιντάς κο Χριστιανοί κι Έφεσος: «Κάποτε ισινένας καρανίκι, αλλά ακανά ισινέν φως». (Εφεσ. 5:8) Ατθέ, ο Παύλος χρησιμοποιηντάς ο λάφια «καρανίκι» ντα «φως» για τι σικαβέλ καζόμ μπουτ αλλαξάλεας ο Χριστιανοί κι Έφεσος. Για τι ντικχάς σόσκε ο Παύλος βακερντάς ότι βον “κάποτε ισινέ καρανίκι”.

4. Σόσκε ισινέ ο Εφέσιοι κο καρανίκι κο πράγματα σο τθερένας τι κερέν με τη θρησκεία;

⁴ Κο καρανίκι επειδή ισινέ κι ψεύτικη θρησκεία. Πριν τι γνωρίνεν ι αλήθεια ντα τι αβέν Χριστιανοί, ο Εφέσιοι πακιάνας εμ κο λάφια σο σικλιαρέλας η ψεύτικη θρησκεία εμ κι μαγεία. Κι Έφεσος υπαρχίντιβελας ο φημισμέ ναός της Αρτέμιδος. Ο τζενέ αζομάν ντικχένας-λες εκ κατά πο εντυπωσιακά κτίρια σο κερντιλέ ποτές, ντα τζάνας οτθέ για τι ντεν λατρεία κο είδωλα.  Γιαβερά τζενέ νικαβένας μπουτ λοβέ επειδή κερένας χουρντέ αγαλματάκια κατά θεά Άρτεμις ντα χουρντέ ναούς της Αρτέμιδος ντα μπικινένας-λεν. (Πράξ. 19:23-27) Επίσης, η Έφεσος τθερέλας νάμι ότι μπουτ τζενέ ασχολίντιβενας με τη μαγεία.—Πράξ. 19:19.

5. Σόσκε ο τρόπος σο τζουβντιόνας ο Εφέσιοι σικαβέλα ότι ισινέ κο καρανίκι;

⁵ Κο καρανίκι επειδή κερένας λουμνικανέ πράγματα. Μπουτ τζενέ κι Έφεσος κερένας εμ λουμνικανέ πράγματα σο ισινέ τζουνγκαλέ εμ μπίλατζανε πράγματα. Ο παραστάσεις κο θέατρα οντουλέ τθεμέσκε, ατζέ-ντα ο γιορτές σο κερέλας η θρησκεία, τθερένας τι κερέν με το σεξ. (Εφεσ. 5:3) Μπουτ τζενέ οτθέ “νασλέας κατά όρια”. Ανταβά λάφι μανγκέλα τι βακερέλ ότι «να νιωθίνενας ιτς ντουκχ» αντρέ πουμαρέ γκίστε κάνα κερένας εκ μπέτι πράγμας. (Εφεσ. 4:17-19) Πριν τι σικλιόν ο Εφέσιοι ο κανόνες ι Ιεχωβάσκε σο βακερένας καβά πράγμας ισινέ σωστός ντα καβά ισινέ λάθος, να ενοχλίνελας-λεν λένγκι συνείδηση. Ούτε πακιάνας ότι έπρεπε τι ντεν λογαριασμός κο Ιεχωβά. Άκ’ σόσκε ο Παύλος μπορίνελας τι βακερέλ ότι, αζομάν, “λένγκι γκοντί ισινέ κο καρανίκι, ντα βον ισινέ ντουρ κατά ζωή σο αβέλα κατά Ντεβέλ”.

6. Σόσκε μπορίνελας ο Παύλος τι βακερέλ κο Εφέσιοι: «Ακανά ισινέν φως»;

⁶ Μερικοί Εφέσιοι όμως να ατσσιλέ κο καρανίκι. Ο Παύλος γραφιντάς: «Ακανά ισινέν φως κο πράγματα σο τθερένα τι κερέν ι Κυριόσαρ». (Εφεσ. 5:8) Βον τραμπιντέ τι ακολουθίνεν ο φως της αλήθειας σο ισί κι Γραφή. (Ψαλμ. 119:105) Οντουλά Εφέσιοι τσσιναντέας τι πακιάν κι ψεύτικη θρησκεία ντα τι κερέν λουμνικανέ πράγματα. Αρχισάλε «τι μοιάζεν κο Ντεβέλ» ντα τι κερέν ο πο λατσσό σο μπορίνενας για τι ντεν λατρεία κο Ιεχωβά ντα τι κερέν λέσκο γκι.—Εφεσ. 5:1.

7. Σόσκε αμαρί ζωή μοιάζελα με τη ζωή σο τθερένας μπουτ Χριστιανοί κι Έφεσος;

⁷ Αντικάς αμέν-ντα, πριν τι γνωρίνας ι αλήθεια ισινάμας κο καρανίκι κο πράγματα σο τθερένα τι κερέν με τη θρησκεία ντα κο τρόπος σο τζουβντιάας. Μερικοί αμένταρ κερένας ο γιορτές ι ψεύτικε θρησκειάκε. Γιαβερά κερένας μπίλατζανε πράγματα. Αλλά κάνα  σικλιλάμ ο κανόνες ι Ιεχωβάσκε σο βακερένα καβά πράγμας ισί σωστός ντα καβά ισί λάθος, κερντάμ αλλαγές. Αρχισάλαμ τι τζουβντιάς ι τροπόσαρ σο μανγκέλα Βοβ. Οτθάρ, λιντάμ μπουτ ευλογίες. (Ησ. 48:17) Ακανά όμως νακχάσα μπουτ δυσκολίες. Χρειαζίντιβελα τι ατσσάς ντουρ κατά καρανίκι σο μουκχλάμ παλ’ αμέντε ντα “τι πφιράς σαρ τσσαβέ σο ισί κο φως”. Σαρ μπορίνασα τι κεράς-λες ανταβά;

ΤΙ ΝΑΣΕΝ ΚΑΤΑ ΚΑΡΑΝΙΚΙ

8. Καλέ πραγματένταρ έπρεπε τι νασέν ο Εφέσιοι, σαρ βακερένα ο εδάφια Εφεσίους 5:3-5;

⁸ Διαβάνεν Εφεσίους 5:3-5. Ο Χριστιανοί κι Έφεσος μανγκένας τι σικαβέν πουμαρέ ζωγιάσαρ ότι να ισινέ κο καρανίκι. Οντουλέσκε, έπρεπε τι νασέν συνέχεια κατά πράγματα ντα κατά συνήθειες σο πφανγκένας ι Ιεχωβάσκο γκι. Ανταβά μανγκέλας τι βακερέλ ότι, εκτός κατά λουμνικανέ πράγματα, δεν έπρεπε ούτε τι χρησιμοποιήνεν λουμνικανέ λάφια. Ο Παύλος αντάς κι γκοντί κι Χριστιανόνγκι κι Έφεσος ότι έπρεπε τι νασέν οντουλέ πραγματένταρ για τι “νακχέν κι Βασιλεία κι Χριστόσκι ντα κι Ντεβλέσκι”.

9. Σόσκε πρέπει τι αβάς μπουτ προσεκτικοί για μα τι κεράς τίποτα σο κα γκερέλας-αμέν κο λουμνιπέ;

⁹ Αμέν-ντα πρέπει τι μαράς-αμέν συνέχεια για μα τι κεράς «ο άχρηστα πράγματα σο ισί κο καρανίκι». (Εφεσ. 5:11) Ισί μπαγιά ότι κάνα εκ τζενό ντικχέλα ή ασουνέλα μπίλατζανε πράγματα, ή κερέλα λάφι λένγκε, ισί πο εύκολος λέσκε τι κερέλ εκ αμαρτία. (Γέν. 3:6· Ιακ. 1:14, 15) Εκχέ τθεμέστε, μπουτ πφραλά τσσουντέ-πες σε εκ ομάδα σε εκ κοινωνικός δίκτυος ντα αρχισάλε τι κερέν λάφι. Κι αρχή, μπουτ λένταρ κερένας λάφι για πνευματικά πράγματα. Καζόμ νακχέλας ο βακίτι όμως, κερένας λάφι πραγματένγκε σο να ισινέ λατσσέ. Αρχισάλε τι κερέν λάφι για το σεξ. Σοράν, μπουτ ανταλέ τζενένταρ βακερντέ ότι, επειδή κερένας λάφι λουμνικανέ πραγματένγκε, ανταβά γκερντάς-λεν τι κερέν λουμνιπέ.

10. Σαρ προσπαθίνελα ο Μπενγκ τι χουχαβέλ-αμέν; (Εφεσίους 5:6)

¹⁰ Ο ντουνιάς ι Μπενγκέσκο προσπαθίνελα τι χουχαβέλ-αμέν, τι κερέλ-αμέν τι πακιάς ότι ο πράγματα σο ο Ιεχωβά βακερέλα ότι ισί μπίλατζανε ντα μαγαριμέ νανέ ιτς μπέτι. (2 Πέτρ. 2:19) Ανταβά να κερέλα αμένγκε εντύπωση! Ο Μπενγκ πάντα προσπαθίνελας τι μπερδίνελ ι τζενέν για μα τι μπορίνεν τι αγαβέν καβά ισί ο σωστός ντα καβά ισί ο λάθος. (Ησ. 5:20· 2 Κορ. 4:4) Άκ’ σόσκε μπουτ ταινίες, μπουτ πράγματα σο σικαβέλα η τηλεόραση ντα μπουτ ιστότοποι σικαβένα ιδέες σο τζάνα κόντρα κο δίκαιοι κανόνες κι Ιεχωβάσκε! Ο Μπενγκ προσπαθίνελα τι χουχαβέλ-αμέν για τι πακιάς ότι ο μπίλατζανε πράγματα ντα ο λουμνιπέ νανέ λάθος, αλλά ισί πράγματα σο κα ανέν αμένγκε χαρά ντα νανέ επικίνδυνα.—Διαβάνεν Εφεσίους 5:6.

11. Σαρ σικαβέλα η εμπειρία της Άντζελας καζόμ σημαντικός ισί τι κεράς ι γκοντιαβέρ συμβουλή σο ισί κο εδάφιος Εφεσίους 5:7; (Ντικχέν ι φωτογραφία-ντα)

¹¹ Ο Μπενγκ μανγκέλα τι κεράς παρέα τζενέντζαρ σο κα κερέν αμένγκε πο δύσκολος τι ακολουθίνας ο κανόνες ι Ιεχωβάσκε. Οτθάρ, ο Παύλος βακερντάς κο τζενέ κι Έφεσος: «Μα κερέν ο πράγματα σο κερένα βον», δηλαδή ο τζενέ σο κερένα ο πράγματα σο ισί μπέτι κι Ντεβλέσκε γιακχά. (Εφεσ. 5:7) Όμως αμέν χρειαζίντιβελα τι αβάς πο προσεκτικοί κατά τζενέ κι πουρανί Έφεσος, σόσκε αντιβές μπορίνασα τι νακχάς σαάτι τζενέντζαρ, όχι σάντε πασάλ, αλλά εμ κατά κοινωνικά δίκτυα-ντα. Η Άντζελα, a σο τζουβντιόλα κι Ασία, αγαντάς καζόμ επικίνδυνα μπορίνενα τι αβέν ο κοινωνικά δίκτυα. Βόι βακερέλα: «Μπορίνενα τι αβέν παγίδα, επειδή χάνικ χάνικ αλλάνενα ο τρόπος σο σκεφτίνεσα. Ερεσλόμ κο σημείος  σο να πειράνελας-μαν τι τθεράβ “φιλόν” σο να σεβάνενας ο αρχές ι Γραφιάκε. Τελικά, αρχισάλομ τι πακιάβ ότι νανέ κακός τι τζουβντιόλ εκ τζενό εκχέ τροπόσαρ σο στεναχωρίνελα ι Ιεχωβάς». Ευτυχώς, κάποιοι πρεσβύτεροι βοηθιντέ λατσσιμάσαρ την Άντζελα τι κερέλ αλλαγές. Βόι βακερέλα: «Ακανά πφεράβα μι γκοντί πνευματικέ πραγματέντζαρ ντα όχι με το κοινωνικά δίκτυα».

12. Σο κα βοηθίνελ-αμέν τι κεράς ο δίκαιοι κανόνες ι Ιεχωβάσκε;

¹² Πρέπει τι τζας κόντρα κο ντουνιάς σο βακερέλα ότι ο μπίλατζανε πράγματα ισί κάτι σωστός. Τζανάσα ότι ανταβά νανέ μπαγιά. (Εφεσ. 4:19, 20) Ισί λατσσό τι πουτσάς-αμέν: “Ισινόμ αποφασισμέ μα τι κεράβ παρέα τζενέντζαρ κατά μπουτί, κατά σχολείος ή γιαβερέντζαρ σο να σεβάνενα ο δίκαιοι κανόνες ι Ιεχωβάσκε; Κεράβα μπίνταρανες ο κανόνες ι Ιεχωβάσκε, παρόλο σο μερικοί μπορεί τι βακερέν ότι ισινόμ κολλημέ;” Σαρ σικαβένα ο εδάφια 2 Τιμόθεο 2:20-22, μπέκιμ χρειαζίντιβελα επίσης τι αβάς προσεκτικοί κάνα τραμπίνασα καλά τζενέ κα αβέν αμαρέ λατσσέ αμαλά αντρέ κι κχανγκιρί. Τθεράσα αμαρέ γκοντιάτε ότι μερικοί μπέκιμ να κα βοηθίνεν-αμέν τι ατσσάς πιστοί κι υπηρεσία κι Ιεχωβάσκι.

ΤΙ ΠΦΙΡΕΝ «ΣΑΡ ΤΣΣΑΒΕ ΣΟ ΙΣΙ ΚΟ ΦΩΣ»

13. Σο μανγκέλα τι βακερέλ τι “πφιράς σαρ τσσαβέ σο ισί κο φως;” (Εφεσίους 5:7-9)

¹³ Ο Παύλος βακερντάς κο Χριστιανοί κι Έφεσος, όχι σάντε τι συνεχίνεν τι νασέν ντουρ κατά καρανίκι, αλλά τι «πφιρέν σαρ τσσαβέ σο ισί κο φως». (Διαβάνεν Εφεσίους 5:7-9) Σο μανγκέλα τι βακερέλ ανταβά; Για τι βακεράς-λες απλά, μανγκέλα τι βακερέλ τι συμπεριφερίντιβας πάντα σαρ αληθινοί Χριστιανοί. Εκ τρόπος για τι πετυχίνας ανταβά στόχος ισί τι διαβάνας ντα τι σικλιαράς-αμέν πάντα κατά Αγία Γραφή ντα κατά έντυπα αμαρέ. Ισί μπουτ σημαντικός τι ντας μπαρί προσοχή κο παράδειγμας κι Ιησού Χριστόσκο ντα κο σικλιαριπέ σο ντέλας, σόσκε βοβ ισί «ο φως ι ντουνιάσκο».—Ιωάν. 8:12· Παρ. 6:23.

14. Σαρ βοηθίνελα-αμέν ο άγιος πνεύμας;

¹⁴ Επίσης, χρειαζίντιβασα ι βοήθεια σο ντέλα-αμέν ο άγιος πνεύμας ι Ντεβλέσκο για τι συνεχίνας τι συμπεριφερίντιβας «σαρ τσσαβέ σο ισί κο φως». Σόσκε; Επειδή νανέ  εύκολος τι ατσσάς πάκι ανταλέ ντουνιάστε σο ισί αντρέ κο λουμνιπέ. (1 Θεσ. 4:3-5, 7, 8) Ο άγιος πνεύμας μπορίνελα τι βοηθίνελ-αμέν μα τι σκεφτίνας σαρ σκεφτίνενα ο τζενέ κο ντουνιάς, σο να ντικχένα ο πράγματα ι τροπόσαρ σο ντικχέλα-λεν ο Ιεχωβά. Ο άγιος πνεύμας κα βοηθίνελ-αμέν επίσης τι κεράς “σο-ντα πράγμας ισί λατσσό ντα δίκαιος”.—Εφεσ. 5:9.

15. Καλέ τροπόντζαρ μπορίνασα τι λας άγιος πνεύμας; (Εφεσίους 5:19, 20)

¹⁵ Εκ τρόπος σο μπορίνασα τι λας άγιος πνεύμας ισί τι μανγκάς-λες αντράλ κατά προσευχή. Ο Ιησούς βακερντάς ότι ο Ιεχωβά «κα ντελ άγιος πνεύμας οντουλέντε σο μανγκένα-λες λέσταρ». (Λουκ. 11:13) Λάσα άγιος πνεύμας εμ κάνα ντάσα λατρεία κο Ιεχωβά γιεκ αμαρέ πφραλέντζαρ κο συναθροίσεις. (Διαβάνεν Εφεσίους 5:19, 20) Ο άγιος πνεύμας ι Ντεβλέσκο κα επηρεάνελ-αμέν λατσσέ τροπόσαρ, ντα ανταβά κα βοηθίνελ-αμέν τι τζουβντιάς με τρόπος σο κερέλα ι Ντεβλέσκο γκι.

16. Σο κα βοηθίνελ-αμέν τι λας γκοντιαβέρ αποφάσεις; (Εφεσίους 5:10, 17)

¹⁶ Κάνα ισί τι λας σημαντικές αποφάσεις, χρειαζίντιβελα τι αγαβάς «σο ισί οντουβά σο μανγκέλα ο Ιεχωβά» ντα σοράν τι κεράς-λες. (Διαβάνεν Εφεσίους 5:10, 17) Κάνα ρόντασα για τι αρακχάς ο αρχές ι Γραφιάκε σο ταιριάνενα αμαρέ περιπτωσιάτε, προσπαθίνασα τι αγαβάς ο τρόπος σο σκεφτίνελα ο Ντεβέλ κι περίπτωση ανταγιά. Σοράν, καζόμ κα κεράς ο αρχές λέσκε, κα μπορίνας τι λας λατσσέ αποφάσεις.

17. Σαρ μπορίνασα τι χρησιμοποιήνας αμαρό χρόνος γκοντιάσαρ; (Εφεσίους 5:15, 16) (Ντικχέν ι φωτογραφία-ντα)

¹⁷ Ο Παύλος ντινάς επίσης κο Χριστιανοί κι Έφεσος ι συμβουλή τι χρησιμοποιήνεν πουμαρό χρόνος γκοντιάσαρ. (Διαβάνεν Εφεσίους 5:15, 16) «Ο πφιρνό», αμαρό ντουσμάνι ο Μπενγκ, κα μανγκέλας τι ατσσικιαρέλ-αμέν αζόμ απασχολημέ με το πράγματα ανταλέ ντουνιάσκε σο να κα τθεράς χρόνος τι υπηρετίνας ι Ντεβλές. (1 Ιωάν. 5:19) Κα αβέλας  μπουτ εύκολος για εκ Χριστιανός τι τσσουβέλ ο υλικά πράγματα, ο σπουδές ή πι μπουτί πο οπρέ κατά υπηρεσία ι Ιεχωβάσκι. Άμα κα κερέλας-λες ανταβά, κα σικαβέλας ότι αρχίνελα τι σκεφτίνελ σαρ ο τζενέ κο ντουνιάς. Σίγουρα, ανταλά πράγματα νανέ λάθος, αλλά δεν πρέπει ποτές τι αβέν κι πρώτη θέση αμαρέ ζωγιάτε. Για τι πφιράς «σαρ τσσαβέ σο ισί κο φως», χρειαζίντιβελα “τι χρησιμοποιήνας αμαρό χρόνος καζόμ πο λατσσές αβέλα-πες”. Ανταβά μανγκέλα τι βακερέλ τι τθεράς αμαρέ γιακχά κο πο σημαντικά πράγματα.

18. Καλά βήματα κερντάς ο Ντόναλντ για τι χρησιμοποιήνελ πο λατσσές πο χρόνος;

¹⁸ Τι αβέν τζανγκαντέ για τι αρακχέν ευκαιρίες τι υπηρετίνεν πο μπουτ ι Ιεχωβάς. Ανταβά ισί κάτι σο κερντάς ο Ντόναλντ, σο τζουβντιόλα κι Νότια Αφρική. Βοβ βακερέλα: «Σκεφτιντόμ σαρ ισινέ ο πράγματα μι ζωγιάτε ντα μολιντόμ ι Ιεχωβάς τι βοηθίνελ-μαν τι κεράβ πο μπουτ πράγματα κο έργος. Κερντόμ προσευχή για τι αρακχάβ εκ μπουτί σο κα μουκχέλας-μαν τι τθεράβ πο μπουτ χρόνος ι εργόσκε. Ι Ιεχωβάσκε βοηθειάσαρ, αρακχλόμ εκ ασακί μπουτί. Αζομάν, αρχισάλαμ γιεκ μι ρομνιάσαρ ι ολοχρόνια υπηρεσία».

19. Σαρ μπορίνασα τι συνεχίνας τι πφιράς «σαρ τσσαβέ σο ισί κο φως»;

¹⁹ Η επιστολή σο γραφιντάς ο Παύλος κο Εφεσίους πρέπει τι βοηθιντάς-λεν μπουτ τι ατσσόν πιστοί κο Ιεχωβά. Ανταγιά συμβουλή κατά Ιεχωβά μπορίνελα τι βοηθίνελ αμέν-ντα. Σαρ ντικχλάμ, μπορίνελα τι βοηθίνελ-αμέν τι τραμπίνας γκοντιάσαρ αμαρί διασκέδαση ντα αμαρέ παρέες. Μπορίνελα τι τσσίντελ-αμέν τι τθεράς εκ σταθερός πρόγραμμας για τι σικλιαράς-αμέν κατά Γραφή, ντα αντικάς τι οδηγίνελ-αμέν συνέχεια ο φως ι αληθειάκο. Ανταγιά συμβουλή σικαβέλα επίσης καζόμ σημαντικός ισί ο άγιος πνεύμας, σο μπορίνελα τι μπαριαρέλ αντρ’ αμέντε σουκάρ ιδιότητες. Κάνα κεράσα οντουλά σο γραφιντάς ο Παύλος, ανταβά μπορίνελα τι βοηθίνελ-αμέν τι λας γκοντιαβέρ αποφάσεις, σο κα συμφωνίνεν ι τροπόσαρ σο σκεφτίνελα ο Ιεχωβά. Άμα κα κεράς ανταλά πράγματα, κα μπορίνας τι νασάς κατά καρανίκι ντα τι ατσσάς κο φως!