1, 2. (α) Καβά βραβείος μπεκλεντίνενα τι κερδίνεν ο υπηρέτες ι Ντεβλέσκε; (β) Σο βοηθίνελα-αμέν τι συνεχίνας τι τθεράς αμαρέ γιακχά κο βραβείος; (Ντικχ ι φωτογραφία σο ισί κι αρχή)

Ο ΧΡΙΣΜΕ Χριστιανοί τθερένα εκ μπουτ σουκάρ ελπίδα. Μπεκλεντίνενα τι τζουβντιόν κο ουρανός. Ο απόστολος Παύλος βακερντάς ότι ανταγιά ελπίδα ισί “ο βραβείος, δηλαδή η ζωή κο ουρανός, σο κα ντελ ο Ντεβέλ”. (Φιλιππησίους 3:​14) Κο ουρανός, κα κυβερνίνεν γιεκ ι Ιησού Χριστόσαρ λέσκε Βασιλειάτε ντα λέσαρ κα βοηθίνεν ι τζενέν τι αβέν τέλειοι. (Αποκάλυψη 20:6) Σο σουκάρ ελπίδα ισί ανταγιά! Ο γιαβερά μπρακέ μπεκλεντίνενα τι λεν εκ γιαβέρ βραβείος. Τθερένα ι ελπίδα τι τζουβντιόν για πάντα κο Παράδεισος κι πφουβ, ντα ανταγιά ελπίδα κερέλα-λεν μπαγιά ευτυχισμέ!​—2 Πέτρου 3:13.

² Ο Παύλος μανγκέλας τι βοηθίνελ ι χρισμέ Χριστιανόν τι ατσσόν πιστοί ντα τι κερδίνεν ο βραβείος. Βακερντάς λένγκε: «Τι τθερέν τουμαρέ γκοντιάτε οντουλά σο ισί οπρέ». (Κολοσσαείς 3:2) Έπρεπε τι τθερέν συνέχεια πουμαρέ γκοντιάτε ι μπουτ σουκάρ ελπίδα σο τθερένας τι τζουβντιόν κο ουρανός. (Κολοσσαείς 1:4, 5) Σαρέ ο υπηρέτες ι Ντεβλέσκε βοηθίντιβενα τι συνεχίνεν  τι τθερέν πουμαρέ γιακχά κο βραβείος όταν σκεφτίνενα ο ευλογίες σο κα ντελ-λεν ο Ιεχωβά. Ανταβά ισί μπαγιά, είτε τθερένα ι ελπίδα τι τζουβντιόν κο ουρανός είτε κι πφουβ.​—1 Κορινθίους 9:24.

3. Καλέ πραγματένγκε προειδοποιηντάς ο Παύλος ι Χριστιανόν;

³ Επίσης, ο Παύλος προειδοποιηντάς ι Χριστιανόν για το κίνδυνοι σο κα μπορίνενας τι κερέν-λεν τι χασαρέν ο βραβείος. Για παράδειγμας, γραφιντάς κο Κολοσσαείς ι ψεύτικε Χριστιανόνγκε σο να τθερένας πίστη κο Χριστός ντα αμντίνενας ότι κα ευχαριστίνενας ι Ντεβλές άμα κερένας ο Μωσαϊκός Νόμος. (Κολοσσαείς 2:​16-18) Ο Παύλος βακερντάς επίσης για το κίνδυνοι σο υπαρχίντιβενα μέχρι αντιβές ντα μπορίνενα τι κερέν αμέν-ντα τι χασαράς ο βραβείος. Εξηγιντάς σαρ τι τζας κόντρα κο μπέτι πράγματα σο μανγκάσα ντα σο τι κεράς όταν τθεράσα προβλήματα αμαρέ φαμιλιάτε ή αμαρέ πφραλέντζαρ κι εκκλησία. Ο πολύτιμες συμβουλές ι Παυλόσκε μπορίνενα τι βοηθίνεν-αμέν αντιβές. Οτθάρ, για τι ντικχάς μερικές προειδοποιήσεις σο ντινάς με αγάπη αντράλ κατά επιστολή σο μπουτσσαντάς κο Κολοσσαείς.

4. Σόσκε μπορίνενα ο μπέτι πράγματα σο μανγκάσα τι κερέν-αμέν τι χασαράς ο βραβείος;

⁴ Αφού ο Παύλος αντάς κι πφραλένγκι γκοντί ι μπουτ σουκάρ ελπίδα σο τθερένας, γραφιντάς: «Οτθάρ, τουμαρό σώμας τι αβέλ σαρ μουλό, για μα τι κερέν λουμνιπέ ή μαγαριπέ, μα τι μανγκέν μπουτ τι σοβέν γιαβερέντζαρ, μα τι μανγκέν γκεραλέ πράγματα ντα ούτε τι μανγκέν σαρέ ο πράγματα τουμαρέ νεαυτόσκε». (Κολοσσαείς 3:5) Ο μπέτι πράγματα σο μανγκάσα μπορεί τι επηρεάνεν-αμέν μπουτ ντα τι κερέν-αμέν τι χασαράς αμαρί φιλία ι Ιεχωβάσαρ ντα ι ελπίδα σο τθεράσα για το μέλλον. Εκ πφραλ σο αμαρτιντάς επειδή να γκιλό κόντρα κο μπέτι πράγματα σο μανγκέλας, αλλά πιο σοράν βουρτισάλο κι εκκλησία βακερέλα ότι ανταλά πράγματα επηρεαντέ-λες αζόμ μπουτ σο “ισινέ μπουτ αργά όταν αγαντάς σο κερντάς”.

5. Σαρ μπορίνασα τι αρακχαβάς-αμέν όταν ισινάμ σε επικίνδυνες καταστάσεις;

⁵ Πρέπει τι αβάς μπουτ προσεκτικοί ειδικά άμα ισινάμ σε εκ κατάσταση σο κα μπορίνελας τι κερέλ-αμέν τι τζας κόντρα κο κανόνες κι Ιεχωβάσκε. Για παράδειγμας, εκ μουρς ντα εκ τζουβέλ σο κερένα στενή γνωριμία ισί σωστός τι σκεφτίνεν από την αρχή τι τσσουβέν όρια πραγματέντε σαρ ισί άμα πρέπει τι αγγίνεν ο εκ ι γιαβερές, τι τσσουμίντεν-πες ή τι ατσσόν κορκορέ. (Παροιμίες 22:3) Γιαβερά επικίνδυνες καταστάσεις κα μπορίνενας τι αβέν όταν νασάσα μπουτιάκε ντουρ αμαρέ κχερέσταρ ή όταν εκ Χριστιανός ισί κι μπουτί εκχέ τζουβλιάσαρ ντα εκ Χριστιανή εκχέ μουρσέσαρ. (Παροιμίες 2:​10-12, 16) Σαρ μπορίνενα τι αρακχαβέν-τουμέν; Τι βακερέν ότι ισινέν Μάρτυρες του Ιεχωβά. Τι συμπεριφερίντιβεν σωστά ντα ποτές μα τι μπιστρέν ότι ο φλερτ μπορίνελα τι οδηγίνελ κι καταστροφή. Επίσης, πρέπει τι προσοχίνας όταν ισινάμ στεναχωριμέ ή κορκορέ. Μπορεί τι τθεράσα ανάγκη εκχέ τζενές σο κα κερέλ-αμέν τι νιωθίνας ότι αξίνασα. Μπορεί τι νιωθίνας αζόμ απελπισμέ σο κα δεχτίνας τι σικαβέλ αμένγκε ενδιαφέρον κον τι αβέλ. Ανταβά ισί επικίνδυνος. Άμα κα νιωθίνεν ποτές αντικάς, μα κερέν κάτι σο κα κερέλ-τουμέν τι χασαρέν ο βραβείος. Μανγκέν βοήθεια κατά Ιεχωβά, κατά πφραλά ντα κατά πφενιά.​—Διαβάνεν Ψαλμός 34:​18· Παροιμίες 13:20.

6. Σο πρέπει τι ντας-αμέν γκοντί όταν τραμπίνασα διασκέδαση;

⁶ Για τι νασκιαράς αμένταρ ο μπέτι πράγματα σο μανγκάσα, δεν πρέπει τι τραμπίνας διασκέδαση σο τθερέλα τι κερέλ μπέτι πραγματέντζαρ. Αμαρέ ντιβεσέντε, μπουτ πράγματα σο κερένα ο τζενέ για τι διασκεδάνεν  ανένα αμαρέ γκοντιάτε οντουλά σο αβένας-πες κο Σόδομα ντα κο Γόμορρα. (Ιούδα 7) Οντουλά σο νικαβένα έργα, γκιλιά ντα γιαβερά πράγματα σο διασκεδάνενα λέντζαρ ο τζενέ, κερένα τι ντικχίντιβελ ότι ο μπέτι πράγματα νανέ επικίνδυνα, αλλά φυσιολογικά. Οτθάρ, πρέπει πάντα τι αβάς τζανγκαντέ. Να μπορίνασα τι δεχτίνας τι διασκεδάνας ι κάθε πραγμάσαρ σο διασκεδάνελα ο ντουνιάς. Αλλά πρέπει τι τραμπίνας διασκέδαση σο να κα κερέλ-αμέν τι χασαράς ο βραβείος ι ζωγιάκο.​—Παροιμίες 4:23.

7. Σο προβλήματα μπορεί τι αβέν αντρέ κι Χριστιανική εκκλησία;

⁷ Χαιρίνασα σο ισινάμ αντρέ κι Χριστιανική εκκλησία. Διαβάνασα ο Λάφι ι Ντεβλέσκο κο συναθροίσεις ντα υποστηρίνασα ο εκ ι γιαβερές με αγάπη. Ανταβά βοηθίνελα-αμέν τι συνεχίνας τι τθεράς αμαρέ γιακχά κο βραβείος. Όμως, μπάζιμα, αβένα-πες παρεξηγήσεις σο μπορίνενα τι ανέν προβλήματα κο πφραλά ντα κο πφενιά. Άμα να κα λύνας ανταλά προβλήματα, μπορεί εύκολα τι αρχίνας τι ατσσικιαράς χολί αντρέ αμαρέ γκίστε.​—Διαβάνεν 1 Πέτρου 3:8, 9.

8, 9. (α) Καλά ιδιότητες κα βοηθίνεν-αμέν τι κερδίνας ο βραβείος; (β) Σο κα βοηθίνελ-αμέν τι ατσσικιαράς ι ειρήνη άμα εκ πφραλ ή εκ πφεν κα στεναχωρίνελ-αμέν;

⁸ Δεν πρέπει τι μουκχάς ι χολί σο μπορεί τι ατσσικιαράς αμαρέ γκίστε τι κερέλ-αμέν τι χασαράς ο βραβείος. Ο Παύλος εξηγιντάς σο χρειαζίντιβελα τι κερέν ο Χριστιανοί: «Επειδή τραμπιντάς-τουμέν ο Ντεβέλ ντα ισινέν άγιοι ντα αγαπημέ, ιρίν ι συμπόνια ντα τουμαρέ σουκάρ αισθήματα, ο λατσσιπέ, ι ταπεινότητα, ι ηρεμία ντα ι υπομονή. Τι νταϊντίνεν ο εκ ι γιαβερές ντα τι συγχωρίνεν ο εκ ι γιαβερές αντράλ τουμαρέ γκίσταρ, άμα κάποιος τθερέλα παράπονος εκχέ τζενέσταρ. Σαρ ο Ιεχωβά συγχωριντάς-τουμέν αντράλ πι γκίσταρ, αντικάς τι συγχωρίνεν τουμέν-ντα. Ντα εκτός σαρέ ανταλένταρ ιρίν ι αγάπη, επειδή ενώνελα τέλεια ι τζενέν».​—Κολοσσαείς 3:​12-14.

⁹ Η αγάπη ντα ο λατσσιπέ βοηθίνενα-αμέν τι συγχωρίνας ι γιαβερέν. Άμα πληγωσάλαμ οντουλένταρ σο βακερντάς ή κερντάς εκ τζενό, μπορίνασα τι σκεφτίνας κάνα βακερντάμ ή κερντάμ αμέν κάτι σο πληγωντάς ι γιαβερέν αλλά συγχωριντέ-αμέν. Καζόμ εκτιμιντάμ ι αγάπη ντα ο λατσσιπέ σο σικαντέ! (Διαβάνεν Εκκλησιαστής 7:​21, 22) Τθεράσα εκτίμηση αμαρέ γκίστε σο ο Χριστός σικαβέλα λατσσιπέ ντα ενώνελα ι αληθινέ Χριστιανόν. (Κολοσσαείς 3:​15) Σαρέ μανγκάσα ι ίδιε Ντεβλές, βακεράσα κο τζενέ ο ίδια αμπέρια ντα μπουτ αμαρέ προβληματένταρ ισί ίδια. Άμα σικαβάσα λατσσιπέ ντα αγάπη, ντα συγχωρίνασα ο εκ ι γιαβερές, η εκκλησία κα αβέλ πιο ενωμέ ντα αμέν κα συνεχίνας τι τθεράς αμαρέ γιακχά κο βραβείος.

10, 11. (α) Σόσκε ισί επικίνδυνη η ζήλια; (β) Σαρ μπορίνασα τι αβάς σίγουροι ότι η ζήλια να κα κερέλ-αμέν τι χασαράς ο βραβείος;

¹⁰ Η ζήλια μπορεί τι κερέλ-αμέν τι χασαράς ο βραβείος. Η Γραφή τθερέλα παραδείγματα σο σικαβένα καζόμ επικίνδυνος ισί τι ζηλίνας. Για παράδειγμας, ο Κάιν αρχισάλο τι ζηλίνελ τον Άβελ ντα μουνταρντάς-λες. Ο Κορέ, ο Δαθάν ντα ο Αβιρών αρχισάλε τι ζηλίνεν ι Μωυσής ντα γκιλέ λέσαρ κόντρα. Ο βασιλιάς Σαούλ αρχισάλο τι ζηλίνελ τον Δαβίδ ντα προσπαθιντάς τι μουνταρέλ-λες. Ακαβά σο βακερέλα ο Λάφι ι Ντεβλέσκο ισί μπαγιά: «Οτθέ σο ζηλίνενα ντα μερένα καβγκάσκε, υπαρχίντιβελα επίσης αναστάτωση ντα κάθε μπέτι πράγμας».​—Ιακώβου 3:16.

¹¹ Άμα προσπαθίνασα μπουτ τι σικαβάς αγάπη ντα λατσσιπέ, να κα ζηλίνας εύκολα. Ο Λάφι ι Ντεβλέσκο βακερέλα: «Η αγάπη κερέλα υπομονή ντα σικαβέλα λατσσιπέ. Η αγάπη να ζηλίνελα». (1 Κορινθίους 13:4) Για τι αβάς σίγουροι ότι να κα αβάς ζηλιάρηδες,  πρέπει τι προσπαθίνας τι ντικχάς ο πράγματα σαρ ντικχέλα-λεν ο Ιεχωβά. Πρέπει τι ντικχάς αμαρέ πφραλέν ντα πφενίν σαρ τι αβάας μέρη κο ίδιος σώμας, σο ισί η εκκλησία. Η Γραφή βακερέλα: «Άμα εκ μέρος δοξάντιβελα, σαρέ ο γιαβερά μέρη χαιρίνενα λέσαρ». (1 Κορινθίους 12:​16-18, 26) Άμα κα αβέλ-πες κάτι λατσσό εκχέ πφραλέσκε, κα χαιρίνας λέσκε, αντί τι ζηλίνας-λες. Σκεφτίνεν ο λατσσό παράδειγμας σο ντινάς ο Ιωνάθαν, σο λέσκο ντατ ισινέ ο βασιλιάς Σαούλ. Ο Ιωνάθαν να ζηλισάλο όταν ο Ντεβέλ τραμπιντάς τον Δαβίδ τι αβέλ βασιλιάς, αντί τι τραμπίνελ λες. Μάλιστα ενθαρρυντάς ντα υποστηριντάς τον Δαβίδ. (1 Σαμουήλ 23:​16-18) Μπορίνασα αμέν-ντα τι σικαβάς ασακό λατσσιπέ ντα αγάπη σαρ σικαντάς ο Ιωνάθαν;

12. Καγιά συμβουλή κατά Γραφή κα βοηθίνελ αμαρί φαμιλί τι κερδίνελ ο βραβείος;

¹² Όταν ο κάθε τζενό αντρέ αμαρέ φαμιλιάτε κερέλα ο συμβουλές ι Γραφιάκε, αμαρί φαμιλί κα τθερέλ ειρήνη, ευτυχία ντα κα κερδίνελ ο βραβείος. Ο Παύλος ντινάς κο φαμιλιά ακαγιά λατσσί συμβουλή: «Τουμέν, τζουβλιάλεν, τι ντεν καν τουμαρέ ρομές, σόσκε ανταβά ισί σωστός κο γιακχά κι Κυριόσκε. Τουμέν, μουρσάλεν, τι μανγκέν τουμαρέ ρομνίν ντα μα τι χολιάνεν λένγκε. Τουμέν, τσσαβάλεν ντα τσσαγιάλεν, τι ασουνέν τουμαρέ νταντές ντα τουμαρέ νταγιά σαρέ κο πράγματα, σόσκε ανταβά μανγκέλα ο Κύριος. Τουμέν, νταντάλεν, μα νευριάνεν τουμαρέ τσσαβέν, για μα τι πφανγκιόλ λένγκο γκι». (Κολοσσαείς 3:​18-21) Αγαβένα σαρ μπορίνελα ανταγιά συμβουλή τι βοηθίνελ τουμαρί φαμιλί;

13. Σαρ κα μπορίνελας εκ πφεν τι βοηθίνελ πι ρομές, σο νανέ κι αλήθεια, τι μανγκέλ τι υπηρετίνελ ι Ιεχωβάς;

¹³ Μπορεί τι ισινάν εκ πφεν σο να υπηρετίνελα το ρομ ι Ιεχωβάς. Σο κα κερές άμα νιωθίνεσα ότι το ρομ να συμπεριφερίντελα τούκε λατσσές; Μπορεί τι νευριάνες ντα τι  χας-τουτ λέσαρ, αλλά κα κερέλας ανταβά πιο λατσσέ ο πράγματα; Ατζέ-ντα άμα κα αρακχές το δίκιος, κα κερές-λες τι μανγκέλ τι υπηρετίνελ ι Ιεχωβάς; Μάλλον όχι. Αλλά αν σεβάνεσα ο ρόλος σο τθερέλα τι αβέλ ο σορό ι φαμιλιάκο, κα βοηθίνες τι φαμιλί τι τθερέλ πιο μπουτ ειρήνη ντα κα ντες δόξα κο Ιεχωβά. Το λατσσό παράδειγμας μπορεί ατζέ-ντα τι κερέλ τι ρομές τι μανγκέλ τι υπηρετίνελ ι Ιεχωβάς, ντα αντικάς μπορεί τι κερδίνεν ο ντούι-ντα ο βραβείος.​—Διαβάνεν 1 Πέτρου 3:1, 2.

14. Σο πρέπει τι κερέλ εκ Χριστιανός μουρς άμα λέσκι ρομνί, σο νανέ κι αλήθεια, να σεβάνελα-λες;

¹⁴ Μπορεί τι ισινάν εκ πφραλ σο να υπηρετίνελα τι ρομνί ι Ιεχωβάς. Σο μπορίνεσα τι κερές άμα νιωθίνεσα ότι τι ρομνί να σεβάνελα-τουτ; Άμα κα ντέας βίκος οπρά-λάτε για τι σικαβές λάκε ότι τούι κερέσα κουμάντος, κα σεβάνελας-τουτ; Σίγουρα όχι! Ο Ντεβέλ μπεσέλα τούταρ τι μανγκές τι ρομνιά ντα τι προσπαθίνες τι μοιάζες κο Ιησούς. (Εφεσίους 5:​23) Ο Ιησούς, ο σορό ι εκκλησιάκο, σικαβέλα πάντα υπομονή ντα αγάπη. (Λουκάς 9:​46-48) Άμα προσπαθίνεσα τι μοιάζες κο Ιησούς, μπορεί τι αβέλ ο καιρός σο τι ρομνί-ντα κα μανγκέλ τι υπηρετίνελ ι Ιεχωβάς.

15. Σαρ σικαβέλα εκ Χριστιανός πι ρομνιάκε ότι μανγκέλα-λα;

¹⁵ Ο Ιεχωβά βακερέλα κο μουρσά: «Τι μανγκέν τουμαρέ ρομνίν ντα μα τι χολιάνεν λένγκε». (Κολοσσαείς 3:​19) Ο μουρς σο σικαβέλα αγάπη σεβάνελα πι ρομνιά. Σαρ; Ασουνέλα λάκε απόψεις ντα σικαβέλα λάκε ότι οντουλά σο βακερέλα ισί σημαντικά λέσκε. (1 Πέτρου 3:7) Ατζέ-ντα άμα ναστί κερέλα πάντα οντουλά σο μανγκέλα λέσταρ, όταν ασουνέλα-λα, βοηθίντιβελα τι λελ πιο λατσσέ αποφάσεις. (Παροιμίες 15:​22) Εκ μουρς σο σικαβέλα αγάπη να μανγκέλα λέσκι ρομνί τι σεβάνελ-λες ζορίσαρ. Αλλά προσπαθίνελα τι κερδίνελ λάκο σεβασμός. Άμα εκ μουρς μανγκέλα πι ρομνιά ντα πι τσσαβέν, κα μπορίνελ πιο εύκολα τι τθερέλ εκ φαμιλί σο κα υπηρετίνελ ι Ιεχωβάς  χαράσαρ ντα κα κερδίνελ ο βραβείος ι ζωγιάκο.

16, 17. Άμα ισινάν τερνό, σο μπορίνεσα τι κερές για μα τι νευριάνες μπουτ τι νταντέσαρ ντα τι νταγιάσαρ;

¹⁶ Μπορεί τι ισινάν τερνό ντα τι νιωθίνες ότι το ντατ ντα τι ντάι να αγαβένα-τουτ ή ότι ισί μπουτ αυστηροί. Ανταβά μπορεί τι νευριάνελ-τουτ αζόμ μπουτ σο μπορεί μα τι αβές σίγουρος άμα μανγκέσα τι υπηρετίνες ι Ιεχωβάς. Αλλά άμα κα μουκχές ι Ιεχωβάς, κα αγαβές ότι καέκ τζενό κο ντουνιάς να μανγκέλα-τουτ αζόμ μπουτ καζόμ μανγκέλα-τουτ το ντατ ντα τι ντάι σο ισί Χριστιανοί, ντα το αμαλά κι εκκλησία.

¹⁷ Σκέφτινε: Άμα το ντατ ντα τι ντάι να διορθώνενας-τουτ ποτές, σαρ κα τζανέας ότι πφαμπόνα τούκε μπαγιά; (Εβραίους 12:8) Βέβαια, νανέ τέλειοι, οτθάρ ο τρόπος σο διορθώνενα-τουτ μπορεί τι νευριάνελ-τουτ. Αλλά μα ντε προσοχή σάντε ανταλέστε. Προσπάθινε τι αγαβές σόσκε κερένα ντα βακερένα κάποια πράγματα. Άτσσουβ ήρεμος ντα προσπάθινε μα τι αντιδράνες υπερβολικά. Ο Λάφι ι Ντεβλέσκο βακερέλα: «Ο τζενό σο ισί γκοντιαβέρ προσοχίνελα σο βακερέλα, ντα ο τζενό σο μπορίνελα τι αγαβέλ ατσσόλα ήρεμος». (Παροιμίες 17:​27) Τσσουβ στόχος τι αβές πνευματικός τζενό σο δεχτίνελα συμβουλές ντα σικλιόλα λένταρ ατζέ-ντα άμα να ντιντιόνα με σουκάρ τρόπος. (Παροιμίες 1:8) Ποτές μα τι μπιστρές ότι ισί πολύτιμος δώρος τι τθερές νταντές ντα νταγιά σο μανγκένα ι Ιεχωβάς. Βον μανγκένα τι βοηθίνεν-τουτ τι τζουβντιός για πάντα.

18. Σόσκε ισινέν αποφασισμέ τι συνεχίνεν τι τθερέν τουμαρέ γιακχά κο βραβείος;

¹⁸ Είτε τθεράσα ι ελπίδα τι τζουβντιάς για πάντα κο ουρανός είτε κο παράδεισος κι πφουβ, ο κάθε εκ αμένταρ μπορίνελα τι μπεκλεντίνελ εκ μπουτ σουκάρ μέλλον. Αμαρί ελπίδα ισί πραγματική. Βασίντιβελα κι υπόσχεση σο ντινάς Οντουβά σο κερντάς ο σύμπαν. Βοβ βακερέλα: «Η πφουβ κα πφερντιόλ κατά σικλιαριπέ ι Ιεχωβάσκο». (Ησαΐας 11:9) Ατζεχάνικ, σαρέ οντουλά σο κα τζουβντιόν κι πφουβ κα σικλιόν κατά Ντεβέλ. Ανταβά ισί εκ βραβείος σο αξίνελα τι προσπαθίνας τι κερδίνας-λες. Οτθάρ, πάντα τι ντεν-τουμέν γκοντί οντουλά σο βακερντάς ο Ιεχωβά ότι κα ντελ-τουμέν, ντα μα μουκχέν τίποτα τι κερέλ-τουμέν τι χασαρέν ο βραβείος!