1, 2. (α) Σαρ νιωθίνελας ο Ιησούς για το Νόμος ι Ντεβλέσκο; (β) Σαρ ο γραμματείς ντα ο Φαρισαίοι κερένας με λάθος τρόπος ο πράγματα σο βακερέλας ο Νόμος;

Ο ΙΗΣΟΥΣ μανγκέλας ο Μωσαϊκός Νόμος. Ανταβά να κερέλα αμένγκε εντύπωση, επειδή ο Νόμος ντιντιλόας λέσκε Νταντέσταρ, κατά Ιεχωβά, ντα ι Ιησούσκε ο Ιεχωβά ισινέ ο πιο σημαντικός σαριλένταρ. Κο εδάφιος Ψαλμός 40:8, η Γραφή βακερντάας ότι ο Ιησούς κα μανγκέλας μπουτ ο Νόμος ι Ντεβλέσκο: «Χαιρίναβα μπουτ, Ντέβλα μου, τι κεράβ οντουβά σο μανγκέσα, ντα το νόμος ισί ντιπ αντρέ μι γκίστε». Ο Ιησούς, οντουλέντζαρ σο βακερέλας ντα κερέλας, σικαντάς ότι ο Νόμος ι Ντεβλέσκο ισινέ τέλειος, ότι βοηθίνελας οντουλέν σο κερένας-λες πουμαρέ ζωγιάτε ντα ότι σίγουρα κα νικιόλας μπαγιά.​—Ματθαίος 5:​17-19.

² Ο Ιησούς πρέπει τι στεναχωρισάλο όταν ντικχλάς ότι ο γραμματείς ντα ο Φαρισαίοι κερένας με λάθος τρόπος ο πράγματα σο βακερέλας ο Νόμος λέσκε Νταντέσκο ντα αντικάς ντικχίντιβελας ότι ο Νόμος να βακερέλας λογικά πράγματα. Βοβ βακερντάς λένγκε: «Ντένα ο δέκατος κατά δυόσμος ντα κατά άνηθος ντα κατά κύμινος». Ανταλέ λαφίντζαρ μανγκέλας τι βακερέλ ότι προσοχίνενας μπουτ τι ντεν καν κο πιο χουρντέ πράγματα σο ισινέ κο Νόμος. Άρα, καβά ισινέ ο πρόβλημας; Ο Ιησούς εξηγιντάς: «Αλλά να χάλα-τουμέν ανάγκη ι πιο σημαντικέ πραγματένγκε σο ισί κο  Νόμος, δηλαδή για τη δικαιοσύνη, για το έλεος ντα για την πίστη». (Ματθαίος 23:​23) Ο Φαρισαίοι να ντικχένας ο νόημας σο τθερέλας ο Νόμος ντα αμντίνενας ότι ισινέ πιο λατσσέ κατά γιαβερά. Αλλά ο Ιησούς αγαβέλας σόσκε βακερέλας κάποια πράγματα ο Νόμος, ντα σο σικλιαρέλας ι Ιεχωβάσκε η κάθε εντολή.

3. Σο κα ντικχάς ανταλέ μαθημάστε;

³ Αμέν, σαρ Χριστιανοί, να ισινάμ υποχρεωμέ τι ντας καν κο Μωσαϊκός Νόμος. (Ρωμαίους 7:6) Άρα, σόσκε ο Ιεχωβά τσσουντάς ο Νόμος, αντρέ πι Λαφίστε, κι Αγία Γραφή; Μανγκέλα τι αγαβάς ντα τι κεράς αμαρέ ζωγιάτε ο πιο “σημαντικά πράγματα” σο ισί κο Νόμος, δηλαδή ο νόημας σο τθερέλα ο Νόμος. Για παράδειγμας, σο σικλιάσα κατά πόλεις ι αρακχαϊμάσκε; Κο γιαβέρ μάθημας, λιντάμ μαθήματα οντουλέ πραγματένταρ σο έπρεπε τι κερέλ ο τζενό σο μουνταρντάς κατά λάθος. Ανταλέ μαθημάστε, κα σικλιάς σο σικλιαρένα-αμέν ι Ιεχωβάσκε ο πόλεις ι αρακχαϊμάσκε ντα σαρ μπορίνασα τι τθεράς ο ιδιότητες λέσκε. Κα απαντίνας τρινέ ερωτησιέντε: Σαρ σικαβένα ο πόλεις ι αρακχαϊμάσκε ο έλεος ι Ιεχωβάσκο; Σο σικλιαρένα-αμέν για την άποψη σο τθερέλα ο Ντεβέλ ι ζωγιάκε; Ντα σαρ σικαβένα ι τέλεια δικαιοσύνη λέσκι; Κι κάθε περίπτωση, προσπαθίνεν τι αρακχέν σαρ μπορίνενα τι μοιάζεν τουμαρέ Νταντέστε σο ισί κο ουρανός.​—Διαβάνεν Εφεσίους 5:1.

4, 5. (α) Σο κανονισάλο για τι μπορίνελ εκ τζενό σο μουνταρντάς κατά λάθος τι τζαλ εύκολα σε εκ κατά πόλεις ι αρακχαϊμάσκε, ντα σόσκε; (β) Σο σικλιαρέλα-αμέν ανταβά ι Ιεχωβάσκε;

⁴ Ο Ιεχωβά κανονιντάς τι αβέν ο σιοβ πόλεις ι αρακχαϊμάσκε τθανέντε σο κα μπορίνενας εύκολα τι τζαν ο τζενέ. Βακερντάς κο Ισραηλίτες τι τραμπίνεν τριν πόλεις κι εκ μεριά κατά Λεν Ιορδάνης ντα τριν κι γιαβέρ μεριά. Σόσκε; Για τι μπορίνελ ο τζενό σο μουνταρντάς κατά λάθος τι τζαλ σε εκ πόλη ανταλένταρ σουγκό ντα εύκολα. (Αριθμοί 35:​11-14) Ο ντρομά σο γκερένας κο πόλεις κι αρακχαϊμάσκε ισινέ σε λατσσί κατάσταση. (Δευτερονόμιο 19:3) Σαρ βακερένα μερικά βιβλία ι Ιουδαιόνγκε, κο ντρομά ισινέ ταμπέλες για τι βοηθίνεν ι τζενέν σο μουνταρντέ κατά λάθος τι αρακχέν ανταλά πόλεις. Επειδή ισινέ πόλεις αρακχαϊμάσκε κο Ισραήλ, εκ Ισραηλίτης σο μουνταρντάς κατά λάθος να χρειαζίντιβελας τι τζαλ τι αρακχαβέλ-πες εκχέ ξένε τθεμέστε ντα αντικάς τι περέλ κο πειρασμός τι ντελ λατρεία ψεύτικε ντεβλέντε.

⁵ Σκεφτίνεν: Ο Ιεχωβά ντινάας εντολή ότι έπρεπε τι μουνταρέν ι δολοφονόν. Αλλά επίσης κανονιντάς ι τζενένγκε σο μουνταρντέ κατά λάθος τι αρακχέν έλεος, συμπόνια ντα τι αρακχαβέν-πες. Εκ σπουδαγμέ τζενό σο ασχολίντιβελα ι Γραφιάσαρ, βακερντάς:  «Ο κάθε πράγμας ισινέ καζόμ αβέλας-πες πιο ξεκάθαρος, απλός ντα εύκολος». Ο Ιεχωβά νανέ εκ σκληρός κριτής σο ρόντελα τρόπους τι τιμωρίνελ πι υπηρετόν. Αλλά «σικαβέλα μπουτ έλεος».​—Εφεσίους 2:4.

6. Σικαβένας ο Φαρισαίοι έλεος σαρ ο Ιεχωβά; Εξηγίνεν.

⁶ Ο Φαρισαίοι, όμως, να μανγκένας τι σικαβέν έλεος ι γιαβερένγκε. Για παράδειγμας, μερικά βιβλία ι Ιουδαιόνγκε βακερένα ότι ο Φαρισαίοι να συγχωρίνενας εκχέ τζενές σο κερντάας ο ίδιος λάθος πιο μπουτ από τριν φαρ. Ο Ιησούς, για τι σικαβέλ καζόμ λάθος ισινέ οντουλά σο κερένας, βακερντάς εκ παραβολή για εκ Φαρισαίος σο κερέλας προσευχή πασέ εκχέ τζενέστε σο γκίντελας ο φόροι. Ο Φαρισαίος βακερντάς: «Ντέβλα, σε ευχαριστώ σο να ισινόμ σαρ ο γιαβερά τζενέ, σο ισί τσορά, άδικοι, τζάνα γιαβερέντζαρ ή ατζέ-ντα σαρ ακαβά τζενό σο γκίντελα ο φόροι». Σο μανγκέλας τι βακερέλ ο Ιησούς; Ο Φαρισαίοι «πακιάνας ότι ο γιαβερά να αξίνενας τίποτα» ντα ότι να χρειαζίντιβελας τι σικαβέν έλεος.​—Λουκάς 18:​9-14.

7, 8. (α) Σαρ μπορίνενα τι σικαβέν έλεος σαρ σικαβέλα ο Ιεχωβά; (β) Σόσκε πρέπει τι αβάς ταπεινοί για τι συγχωρίνας ι γιαβερέν;

⁷ Τι μοιάζεν κο Ιεχωβά, όχι κο Φαρισαίοι. Τι σικαβέν έλεος ντα συμπόνια. (Διαβάνεν Κολοσσαείς 3:​13) Κερέν ι γιαβερέν τι νιωθίνεν άνετα τι μανγκέν τουμένταρ συγχώρηση. (Λουκάς 17:3, 4) Πουτσέν τουμαρό νεαυτός: “Συγχωρίναβα με ι γιαβερέν σουγκό ντα εύκολα, ατζέ-ντα όταν προσβαλίνενα-μαν μπουτ φαρ; Μανγκάβα σαρέ μι γκίσαρ τι κεράβ ειρήνη εκχέ τζενέσαρ σο προσβαλιντάς-μαν ή πληγωντάς-μαν;”

⁸ Για τι συγχωρίνας, πρέπει τι αβάς ταπεινοί. Ο Φαρισαίοι αμντίνενας ότι ισινέ πιο λατσσέ σαρέ κατά γιαβερά, οτθάρ να μανγκένας τι συγχωρίνεν. Αμέν όμως σαρ Χριστιανοί, με ταπεινότητα “νιωθίνασα ότι ο γιαβερά ισί πιο σημαντικοί” αμένταρ ντα συγχωρίνασα-λεν αντράλ αμαρέ γκίσταρ. (Φιλιππησίους 2:3) Μπορίνασα τι πουτσάς αμαρό νεαυτός: “Μοιάζαβα με κο Ιεχωβά ντα ισινόμ ταπεινός;” Αν ισινάμ ταπεινοί, κα αβέλ πιο εύκολος ι γιαβερένγκε τι μανγκέν αμένταρ συγχώρηση ντα αμένγκε τι συγχωρίνας-λεν. Τι σικαβέν σουγκό έλεος ντα μα τι σιγκιαρέν τι χολιάνεν.​—Εκκλησιαστής 7:8, 9.

9. Σαρ βοηθιντάς ο Ιεχωβά ι Ισραηλιτέν τι αγαβέν ότι η ζωή ισί ιερή;

⁹ Εκ μπουτ σημαντικός λόγος σο υπαρχίντιβενας ο πόλεις ι αρακχαϊμάσκε ισινέ τι αρακχαβέν ι Ισραηλιτέν για μα τι τθερέν καεκχέσκο ρατ οπρά-πουμέντε, δηλαδή μα τι μουνταρέν αθώε τζενέν. (Δευτερονόμιο 19:​10) Ο Ιεχωβά μανγκέλα ι ζωή, ντα μισίνελα ο μουνταριπέ. (Παροιμίες 6:​16, 17) Σαρ δίκαιος ντα άγιος Ντεβέλ, να κα μπορίνελας τι πφάντελ πο γιακχά ούτε όταν εκ μουνταριπέ αβέλα-πες κατά λάθος. Ισί μπαγιά ότι κάποιος σο μουνταρντάς εκχέ γιαβερές κατά λάθος κα μπορίνελας τι αρακχέλ έλεος. Αλλά πρώτα έπρεπε τι εξηγίνελ οντουβά σο αβιλό-πες κο πρεσβύτεροι. Αν ο  πρεσβύτεροι αποφασίνενας ότι ο μουνταριπέ αβιλό κατά λάθος, αζομάν ο τζενό έπρεπε τι μπεσέλ κι πόλη κι αρακχαϊμάσκι μέχρι τι μερέλας ο αρχιερέας. Ανταβά μανγκέλα τι βακερέλ ότι ο τζενό σο μουνταρντάς κατά λάθος μπορεί τι χρειαζίντιβελας τι μπεσέλ σαρέ πο μπρεσά κι πόλη κι αρακχαϊμάσκι ντα σικαβέλας σαρέ ι Ισραηλιτένγκε ότι η ζωή ισί ιερή. Για τι ντεν δόξα Οντουλέστε σο ντέλα ζωή, έπρεπε τι κερέν σο νακχέλας λένγκε βαστένταρ για μα τι τσσουβέν ι γιαβερένγκι ζωή σε κίνδυνος.

10. Σαρ βακερντάς ο Ιησούς, σαρ σικαβένας ο γραμματείς ντα ο Φαρισαίοι ότι να σεβάνενας ι ζωή ι γιαβερένγκι;

¹⁰ Ο γραμματείς ντα ο Φαρισαίοι σικαβένας ότι να σεβάνενας ι ζωή ι γιαβερένγκι σαρ ο Ιεχωβά. Ο Ιησούς βακερντάς λένγκε: «Να ντινέν ο κλειδίς ι σικλιαριμάσκο κο τζενέ· τουμέν ο ίδιοι να τσσουντέν-τουμέν, ντα τσσιναβένα οντουλέν σο τζάνα τι τσσουβέν-πες!» (Λουκάς 11:​52) Σο μανγκέλας τι βακερέλ ο Ιησούς; Ο γραμματείς ντα ο Φαρισαίοι έπρεπε τι εξηγίνεν ο Λάφι ι Ντεβλέσκο κο τζενέ ντα τι βοηθίνεν-λεν τι λεν αιώνια ζωή. Αντί τι κερέν-λες ανταβά, προσπαθίνενας τι τσσιναβέν ι τζενέν για μα τι ακολουθίνεν ι Ιησούς, «Οντουλές σο οδηγίνελα ι τζενέν κι ζωή». (Πράξεις 3:​15) Ανταλέ τροπόσαρ, οδηγίνενας ι τζενέν κι καταστροφή. Ο γραμματείς ντα ο Φαρισαίοι ισινέ μπαρικανέ ντα εγωιστές, ντα να χαλάς-λεν ανάγκη ι τζενένγκι ζωή. Ισινέ μπουτ σκληροί ντα να τθερένας ιτς αγάπη!

11. (α) Σαρ σικαντάς ο απόστολος Παύλος ότι ντικχέλας ι ζωή σαρ ντικχέλα-λα ο Ιεχωβά; (β) Σο κα βοηθίνελ-αμέν τι κεράς ο έργος αντράλ αμαρέ γκίσταρ σαρ ο Παύλος;

¹¹ Σαρ μπορίνασα τι μοιάζας κο Ιεχωβά ντα μα τι αβάς σαρ ο γραμματείς ντα ο Φαρισαίοι; Κεράσα-λες ανταβά όταν σεβάνασα ντα εκτιμίνασα ι ζωή. Ο απόστολος Παύλος κερέλας-λες ανταβά ντα οτθάρ βακερέλας ο λατσσέ αμπέρια ι Βασιλειάκε καζόμ πιο μπουτ τζενέντε αβέλας-πες. Οτθάρ, μπορίνελας τι βακερέλ: «Να τθεράβα οπρά-μάντε καεκχέσκο ρατ». (Διαβάνεν Πράξεις 20:​26, 27) Μήπως όμως ο Παύλος βακερέλας ο λατσσέ αμπέρια απλά επειδή να μανγκέλας τι τθερέλ τύψεις ή επειδή ο Ιεχωβά βακερντάς λέσκε ότι έπρεπε τι κερέλ-λες ανταβά; Όχι. Ο Παύλος μανγκέλας ι τζενέν. Πακιάλας ότι λένγκι ζωή ισινέ πολύτιμη, ντα μανγκέλας τι λεν αιώνια ζωή. (1 Κορινθίους 9:​19-23) Αμέν-ντα πρέπει τι ντικχάς ι ζωή σαρ ντικχέλα-λα ο Ιεχωβά, σο μανγκέλα σαρέ τι μετανιώνεν για τι μπορίνεν τι τζουβντιόν. (2 Πέτρου 3:9) Για τι μοιάζας κο Ιεχωβά, πρέπει τι μανγκάς ι τζενέν. Άμα σικαβάσα έλεος, ανταβά κα κερέλ-αμέν τι βακεράς ο λατσσέ αμπέρια αντράλ αμαρέ γκίσταρ ντα τι πφερντιάς χαρά καζόμ κεράσα-λες ανταβά.

12. Σόσκε η ασφάλεια ισί σημαντική ι Ντεβλέσκε λαόσκε;

¹² Για τι ντικχάς ι ζωή σαρ ντικχέλα-λα ο Ιεχωβά, χρειαζίντιβελα επίσης τι τθεράς ι σωστή άποψη για την ασφάλεια. Πρέπει τι οδηγίνας ντα τι κεράς μπουτί με ασφάλεια, ατζέ-ντα όταν χτίνασα ή περιποιήνασα ο τθανά σο ντάσα λατρεία ή όταν τζάσα ανταλέ τθανέντε. Ο τζενέ, η ασφάλεια ντα η υγεία ισί πάντα πιο σημαντικά κατά χρόνος ντα κατά λοβέ. Αμαρό Ντεβέλ κερέλα πάντα οντουβά σο ισί σωστός ντα μανγκάσα τι μοιάζας λέστε. Ειδικά ο πρεσβύτεροι πρέπει τι σκεφτίνεν σαρ κα τθερέν ασφάλεια εμ βον εμ ο γιαβερά. (Παροιμίες 22:3) Άμα εκ πρεσβύτερος κα ανέλ τουμαρέ γκοντιάτε ο κανόνες για την ασφάλεια, ασουνέν-λες. (Γαλάτες 6:1) Τι ντικχέν ι ζωή σαρ ντικχέλα-λα ο Ιεχωβά, ντα “να κα τθερέν ο ρατ καεκχέ τζενέσκο οπρά-τουμέντε”.

13, 14. Σαρ μπορίνενας ο πρεσβύτεροι σο ισινέ κο Ισραήλ τι σικαβέν δικαιοσύνη σαρ σικαβέλα ο Ιεχωβά;

¹³ Ο Ιεχωβά ντινάς εντολή κο πρεσβύτεροι σο ισινέ κο Ισραήλ τι σικαβέν δικαιοσύνη  σαρ σικαβέλα βοβ. Πρώτα, ο πρεσβύτεροι έπρεπε τι σικλιόν ακριβώς σο αβιλό-πες. Σοράν, για τι αποφασίνεν άμα κα σικαβένας έλεος κο τζενό σο μουνταρντάς, έπρεπε τι σκεφτίνεν με μπουτ προσοχή σόσκε κερντάς οντουβά σο κερντάς, σαρ νιωθίνελας οντουλέσκε ντα σο πράγματα κερντάας πιο τζανγκλέ. Ο πρεσβύτεροι έπρεπε τι αγαβέν άμα ο τζενό μισίνελας οντουλές σο μουνταρντάς ντα άμα τθερέλας σκοπός τι μουνταρέλ-λες. (Διαβάνεν Αριθμοί 35:​20-24) Άμα υπαρχίντιβενας μάρτυρες, έπρεπε τι αβέν τουλάχιστον ντούι ντανέ για τι λιντιόλ ι απόφαση τι μουνταρέν ι δολοφονός.​—Αριθμοί 35:30.

¹⁴ Όταν κα αβένας σίγουροι οντουλέσκε σο αβιλό-πες, ο πρεσβύτεροι έπρεπε τι σκεφτίνεν ι τζενές, όχι σάντε οντουβά σο κερντάας. Ο πρεσβύτεροι έπρεπε τι ντικχέν σο γκεράντιβελας παλάλ κατά πράγματα σο ντικχίντιβενας ντα τι αγαβέν σόσκε αβιλέ ο πράγματα αντικάς. Πιο μπουτ σαρέ κατά γιαβερά πράγματα, χρειαζίντιβενας ο άγιος πνεύμας ι Ιεχωβάσκο για τι μπορίνεν, σαρ ο Ιεχωβά, τι αγαβέν ο πράγματα ντα τι σικαβέν έλεος ντα δικαιοσύνη.​—Έξοδος 34:6, 7.

15. Σαρ ισινέ διαφορετικός ο τρόπος σο ντικχέλας ο Ιησούς ι αμαρτωλόν κατά τρόπος σο ντικχένας-λεν ο Φαρισαίοι;

¹⁵ Ο Φαρισαίοι να κρίνενας με έλεος. Ντικχένας πιο μπουτ σο κερντάας ο αμαρτωλός ντα όχι σο τζενό ισινέ. Όταν μερικοί Φαρισαίοι ντικχλέ ι Ιησούς τι χαλ κο κχερ κι Ματθαιόσκο, πουτσλέ ι μαθητέν: «Σόσκε τουμαρό δάσκαλος χάλα τζενέντζαρ σο γκίντενα ο φόροι ντα οντουλέντζαρ σο ισί αμαρτωλοί;» Ο Ιησούς απαντιντάς λένγκε: «Να χρειαζίντιβενα γιατρός οντουλά σο ισί ζουρανέ, αλλά οντουλά σο ισί νασφαλέ. Οτθάρ, τζαν ντα σικλιόν σο μανγκέλα τι βακερέλ: “Έλεος μανγκάβα ντα όχι θυσία”. Επειδή αβιλόμ τι καλίναβ, όχι δίκαιε τζενέν, αλλά αμαρτωλόν». (Ματθαίος 9:​9-13) Μήπως ο Ιησούς δικαιολογίνελας ι αμαρτωλόν; Σίγουρα όχι. Μανγκέλας τι μετανιώνεν. Ανταβά ισινέ εκ κατά πιο σημαντικά πράγματα σο βακερέλας κάνα κερέλας λάφι ι Ντεβλέσκε. (Ματθαίος 4:​17) Ο Ιησούς αγαβέλας ότι μερικά τζενέ οντουλένταρ “σο γκίντενας ο φόροι ντα κατά αμαρτωλοί” μανγκένας τι αλλάνεν. Βον να γκιλέας κο κχερ κι Ματθαιόσκο σάντε χαμάσκε. Γκιλέας οτθέ επειδή ακολουθίνενας ι Ιησούς. (Μάρκος 2:​15) Δυστυχώς, ο πιο μπουτ Φαρισαίοι να ντικχένας ι τζενέν σαρ ντικχέλας-λεν ο Ιησούς. Να πακιάνας ότι ο τζενέ μπορίνενας τι αλλάνεν, ντα βακερένας ότι ισινέ αμαρτωλοί σο να τθερένας καέκ ελπίδα. Καζόμ διαφορετικοί ισινέ κατά Ιεχωβά, σο ισί δίκαιος ντα σικαβέλα έλεος!

16. Σο πρέπει τι προσπαθίνελ τι αγαβέλ εκ δικαστική επιτροπή;

¹⁶ Ο πρεσβύτεροι αντιβές πρέπει τι μοιάζεν κο Ιεχωβά, σο «μανγκέλα ι δικαιοσύνη». (Ψαλμός 37:​28) Πρώτα, χρειαζίντιβελα τι “ρόντεν ο πράγματα προσεκτικά” για τι αβέν σίγουροι αν αβιλί-πες εκ αμαρτία. Αν πράγματι αβιλί-πες, κα ακολουθίνεν ο οδηγίες ι Γραφιάκε για τι αποφασίνεν σο κα κερέν. (Δευτερονόμιο 13:​12-14) Όταν ο πρεσβύτεροι υπηρετίνενα σε εκ δικαστική επιτροπή, πρέπει τι αβέν μπουτ προσεκτικοί για τι αγαβέν αν ο τζενό σο κερντάς εκ μπαρί αμαρτία μετανιωσάλο ή όχι. Ανταβά νανέ πάντα εύκολος. Για τι αγαβέν άμα μετανιωσάλο μπαγιά ο τζενό σο αμαρτιντάς, πρέπει τι σικλιόν σαρ ντικχέλα οντουβά σο κερντάς ντα σο τθερέλα αντρέ πι γκίστε. (Αποκάλυψη 3:3) Εκ αμαρτωλός πρέπει τι μετανιώνελ για τι σικάντιβελ λέσκε έλεος. *​—Ντικχ ι υποσημείωση.

17, 18. Σαρ μπορίνενα ο πρεσβύτεροι τι αγαβέν άμα κάποιος μετανιωσάλο μπαγιά; (Ντικχ ι φωτογραφία σο ισί κι αρχή)

¹⁷ Ο Ιεχωβά ντα ο Ιησούς τζανένα ακριβώς σο σκεφτίνελα ντα σο νιωθίνελα εκ τζενό επειδή μπορίνενα τι ντικχέν σο ισί αντρέ  λέσκε γκίστε. Όμως, ο πρεσβύτεροι ναστί ντικχένα σο ισί κι τζενέσκο γκι. Άρα, αν ισινέν πρεσβύτεροι, σαρ μπορίνενα τι τζανέν άμα κάποιος μετανιωσάλο μπαγιά; Πρώτον, προσευχίντιβεν για τι τθερέν σοφία ντα για τι αγαβέν λατσσές ο πράγματα. (1 Βασιλέων 3:9) Δεύτερον, ρόντεν κι Ντεβλέσκο Λάφι ντα κο έντυπα σο ντέλα-αμέν ο πιστός δούλος για τι βοηθίντιβεν τι ξεχωρίνεν ι «στεναχώρια ι ντουνιάσκι» κατά «στεναχώρια σο αβέλα με το τρόπος σο μανγκέλα ο Ντεβέλ», δηλαδή τι ξεχωρίνεν σο ισί η αληθινή μετάνοια. (2 Κορινθίους 7:​10, 11) Ντικχέν σο βακερέλα η Γραφή οντουλένγκε σο μετανιωσάλεας ντα οντουλένγκε σο να μετανιωσάλεας, ντα σκεφτίνεν προσεκτικά σαρ νιωσάλε, σαρ σκεφτιντέ ντα σο κερντέ.

¹⁸ Τρίτον, σκεφτίνεν ι τζενές, όχι σάντε οντουλά σο κερντάς. Σόσκε ισί αντικάς; Σόσκε λιντάς συγκεκριμέ αποφάσεις; Καλά ισί λέσκε δυσκολίες ντα λέσκι κατάσταση; Η Γραφή βακερντάς ότι ο Ιησούς, ο σορό κι Χριστιανική εκκλησία, «για τι κρίνελ, να κα βασίντιβελ οντουλέστε σο ντικχένα λέσκε γιακχά ούτε κα ντελ συμβουλές σάντε οντουλέσταρ σο ασουνένα λέσκε κανά. Αλλά κα κρίνελ οντουλέν σο νανέ σημαντικοί με δικαιοσύνη, ντα κα ντελ σωστές συμβουλές για τι βοηθίνελ ι ήρεμε τζενέν ι πφουβιάκε». (Ησαΐας 11:3, 4) Πρεσβύτεροι, ο Ιησούς διοριντάς-τουμέν τι αρακχαβέν λέσκι εκκλησία ντα βοβ κα βοηθίνελ-τουμέν τι κρίνεν με δικαιοσύνη ντα έλεος. (Ματθαίος 18:​18-20) Ισινάμ πφερντέ εκτίμηση σο τθεράσα πρεσβυτερόν σο πφαμπόνα αμένγκε! Βοηθίνενα-αμέν επίσης τι σικαβάς δικαιοσύνη ντα έλεος ο εκ κο γιαβέρ.

19. Καβά μάθημας σο σικλιλέν κατά πόλεις ι αρακχαϊμάσκε μανγκένα τι κερέν τουμαρέ ζωγιάτε;

¹⁹ Ο Μωσαϊκός Νόμος τθερέλα «ο βασικά πράγματα ι σικλιαριμάσκε ντα ι αληθειάκε». Σικλιαρέλα-αμέν ι Ιεχωβάσκε ντα για το νόημας σο τθερένα λέσκε λάφια. (Ρωμαίους 2:​20) Ο πόλεις ι αρακχαϊμάσκε σο ισί κο Νόμος σικλιαρένα ι πρεσβυτερόν σαρ τι «κρίνεν με αληθινή δικαιοσύνη» ντα σικλιαρένα σαριλέν αμέν σαρ τι σικαβάς ο εκ κο γιαβέρ «αφοσιωμέ αγάπη ντα έλεος». (Ζαχαρίας 7:9) Παρόλο σο να ισινάμ υποχρεωμέ τι ντας καν κο Νόμος, ο Ιεχωβά να αλλαξάλο. Λέσκε, η δικαιοσύνη ντα ο έλεος συνεχίνενα τι αβέν σημαντικές ιδιότητες. Ισί προνόμιος τι ντας λατρεία εκχέ ασακέ Ντεβλές. Μακάρι τι προσπαθίνας τι τθεράς ο σουκάρ ιδιότητες λέσκε ντα τι αρακχάς ασφάλεια ντα αρακχαϊπέ λέστε!