1-3. (α) Σαρ πρέπει τι νιωθίνας ι αληθειάκε σο ισί κι Γραφή; Βακερέν εκ παράδειγμας. (Ντικχ ο φωτογραφίες σο ισί κι αρχή) (β) Σο κα συζητίνας ανταλέ μαθημάστε;

ΑΝΤΙΒΕΣ, μπουτ τζενέ κινένα εκ πράγμας ντα σοράν ντένα-λες παλάλ. Ντα κερένα-λες πιο μπουτ ανταβά κάνα κινένα κάτι κατά Ίντερνετ. Μπορεί μα τι μπεϊντιντέ οντουβά σο κιντέ αζόμ μπουτ καζόμ μπεκλεντίνενας ή μπορεί τι αβέλας χαλαντό. Οτθάρ, ντένα-λες παλάλ ντα λένα κάτι γιαβέρ ή μανγκένα παλάλ πουμαρέ λοβέ.

² Ποτές να κα ντας παλάλ ι αλήθεια σο σικλιλάμ κατά Αγία Γραφή. Από τη στιγμή σο “κινάσα-λα”, ποτές να μανγκάσα τι “μπικινάς-λα”, δηλαδή από τη στιγμή σο σικλιάσα ι αλήθεια, ποτές να μανγκάσα τι μουκχάς-λα. (Διαβάνεν Παροιμίες 23:​23· 1 Τιμόθεο 2:4) Σαρ συζητιντάμ κο γιαβέρ μάθημας, ντινάμ μπουτ χρόνος για τι σικλιάς ι αλήθεια. Επίσης, μπορεί τι θυσιαντάμ εκ μπουτί σο νικαβάας λάταρ μπουτ λοβέ ή σο κα ανέλας αμένγκε επιτυχία ανταλέ ντουνιάστε. Ντα μπορεί τι αβιλέ αλλαγές κο σχέσεις σο τθεράας ι γιαβερέντζαρ, κο τρόπος σο σκεφτίναας ντα κεράας κάποια πράγματα ή τι τσσιναντάμ ο έθιμα ντα ο συνήθειες σο να μανγκέλα ο Ιεχωβά. Αλλά ισινάμ σίγουροι ότι τίποτα οντουλένταρ σο μουκχλάμ νανέ αζόμ σημαντικός καζόμ ισί ο ευλογίες σο λάσα επειδή σικλιλάμ ι αλήθεια.

 ³ Ο Ιησούς βακερντάς εκ παραβολή για εκ έμπορας σο ρόντελας τι αρακχέλ λατσσέ μαργαριτάρια. Κάνα αρακχλάς εκ τανό σο τθερέλας μπαρί αξία, μπικιντάς αμέσως σαρέ οντουλά σο τθερέλας για τι κινέλ-λες. Οντουβά μαργαριτάρι μανγκέλας τι σικαβέλ ι αλήθεια ι Ντεβλέσκε Βασιλειάκε. Ανταλέ τροπόσαρ, ο Ιησούς σικαντάς καζόμ σημαντική κα αβέλας η αλήθεια οντουλένγκε σο ρόντενα λάκε. (Ματθαίος 13:​45, 46) Κάνα σικλιλάμ ι αλήθεια, δηλαδή ι αλήθεια ι Ντεβλέσκε Βασιλειάκε ντα σαρέ ο γιαβερά σημαντικές αλήθειες ι Γραφιάκε, αμέν-ντα ισινάμας έτοιμοι τι θυσιάνας τα πάντα για τι τθεράς-λα. Άμα συνεχίνασα τι εκτιμίνας ι αλήθεια, να κα μουκχάς-λα ποτές. Δυστυχώς όμως κάποιοι κατά Ντεβλέσκο λαός τσσιναντέ τι ντικχέν λάκι αξία ντα ερεσλέ κο σημείος τι μουκχέν-λα. Να μανγκάσα τι αβέλ-πες ποτές ανταβά αμένγκε! Χρειαζίντιβελα τι ακολουθίνας ι Γραφιάκι συμβουλή σο βακερέλα τι “πφιράς κι αλήθεια”. (Διαβάνεν 3 Ιωάννη 2-4) Ανταβά μανγκέλα τι βακερέλ τι τσσουβάς-λα κι πρώτη θέση αμαρέ ζωγιάτε ντα τι σικαβάς-λες ανταβά με το τρόπος σο τζουβντιάσα. Όμως, σόσκε ντα σαρ μπορεί εκ τζενό τι “μπικινέλ” ι αλήθεια; Σαρ μπορίνασα τι αβάς σίγουροι ότι να κα κεράς-λες ποτές ανταβά; Ντα σαρ μπορίνασα τι αβάς πιο αποφασισμέ τι “πφιράς κι αλήθεια”;

4. Κι Ιησούσκε μπρεσά, σόσκε κάποιοι τσσιναντέ τι πφιρέν κι αλήθεια;

⁴ Κι Ιησούσκε μπρεσά, κάποιοι σο δεχτιντέ κι αρχή ι αλήθεια τσσιναντέ τι πφιρέν λάτε. Για παράδειγμας, αφού ο Ιησούς κερντάς θαύμας ντα παρβαρντάς μπουτέ τζενέν, οντουλά τζενέ γκιλέ παλά-λέστε κι γιαβέρ μπάντα κατά Ντεριάβ της Γαλιλαίας. Οτθέ, ο Ιησούς βακερντάς κάτι σο κερντάς-λεν τι σαστίνεν: «Άμα να χαλέν ο σώμας ι τζενέσκε Τσσαβέσκο ντα να πιλέν λέσκο ρατ, να τθερένα ζωή αντρέ τουμέντε». Αντίς τι πουτσέν-λες σο μανγκέλας τι βακερέλ, βον βακερντέ: «Σο λάφια ισί ανταλά! Κον μπορίνελα τι ασουνέλ-λεν;» Οτθάρ, «μπουτ λέσκε μαθητένταρ βουρτισάλε κο πράγματα σο μουκχλέας παλά-πουμέντε ντα τσσιναντέ τι πφιρέν λέσαρ».​—Ιωάννης 6:​53-66.

5, 6. (α) Αμαρέ ντιβεσέντε, σόσκε κάποιοι τσσιντιντέ-πες ντουρ κατά αλήθεια; (β) Βακερέν εκ παράδειγμας σο σικαβέλα σαρ κα μπορίνελας εκ τζενό τι νασέλ σιγά σιγά κατά αλήθεια.

⁵ Δυστυχώς, αντιβές-ντα κάποιοι μουκχλέ ι αλήθεια. Σόσκε; Μερικοί χασαρντέ πουμαρί πίστη επειδή αβιλί εκ αλλαγή κο τρόπος σο αγαβάσα εκ εδάφιος ι Γραφιάκο ή επειδή βακερντάς ή κερντάς κάτι εκ μπουτ γνωστός πφραλ. Γιαβερά προσβαλισάλε κάνα κάποιος ντινάς-λεν εκ συμβουλή κατά Γραφή ή κάνα παρεξηγισάλε εκχέ πφραλέσαρ ή εκχέ πφενιάσαρ. Ντα γιαβερά μπορεί τι πακιαντέ ο ψέματα σο βακερένα ο αποστάτες ντα γιαβερά τζενέ. Ανταλά ισί χάνικ πράγματα σο κερντέ μερικέ πφραλέν τι τσσίντεν-πες ντουρ κατά Ιεχωβά ντα κατά κχανγκιρί. (Εβραίους 3:​12-14) Καζόμ πιο λατσσό κα αβέλας τι τθερένας εμπιστοσύνη κο Ιησούς, σαρ τθερέλας ο Πέτρος! Κάνα ο τζενέ σαστισάλε κατά λάφια ι Ιησούσκε, ο Ιησούς πουτσλάς πι αποστολόν αν μανγκένας τι νασέν βον-ντα. Ο Πέτρος απαντιντάς: «Κύριε, κάστε τι τζας; Τούι τθερέσα λάφια σο ντένα αιώνια ζωή».​—Ιωάννης 6:​67-69.

⁶ Γιαβερά νασλέ κατά αλήθεια σιγά σιγά, ντα ανταβά μπορεί τι αβιλό-πες χωρίς τι αγαβέν-λες. Εκ τζενό σο νασέλα κατά  αλήθεια σιγά σιγά μοιάζελα εκχέ βαρκάσαρ σο τζάλα σιγά σιγά ντιπ αντρέ κι ντεριάβ. Η Γραφή βακερέλα αμένγκε τι προσοχίνας «για μα τι νασάς ποτές κατά πίστη». (Εβραίους 2:1) Μπουτ φαρ, εκ τζενό σο νασέλα κατά αλήθεια να κερέλα-λες επειδή μανγκέλα-λες. Αλλά να αρακχαβέλα πι φιλία ι Ιεχωβάσαρ, ντα μπορεί ατζέ-ντα τι χασαρέλ-λα. Σαρ μπορίνασα τι αβάς σίγουροι ότι ανταβά να κα αβέλ-πες ποτές αμένγκε;

7. Σο κα βοηθίνελ-αμέν μα τι μπικινάς ποτές ι αλήθεια;

⁷ Για τι συνεχίνας τι πφιράς κι αλήθεια, πρέπει τι δεχτίνας ντα τι κεράς σαρέ οντουλά σο βακερέλα ο Ιεχωβά. Πρέπει τι αβέλ η αλήθεια ο πιο σημαντικός πράγμας αμαρέ ζωγιάτε ντα τι ακολουθίνας ο αρχές ι Γραφιάκε σαρέ κο πράγματα. Ο βασιλιάς Δαβίδ ντινάς πο λάφι κο Ιεχωβά κάνα προσευχίντιλο λέστε: «Κα πφιράβ τι αληθειάτε». (Ψαλμός 86:​11) Ο Δαβίδ ισινέ αποφασισμέ τι συνεχίνελ τι πφιρέλ κι αλήθεια, ντα ο ίδιος πρέπει τι κεράς αμέν-ντα. Άμα να κα κεράς-λες ανταβά, μπορεί τι αρχίνας τι σκεφτίνας πάλι ο πράγματα σο μουκχλάμ ι αληθειάκε ντα μπορεί ατζέ-ντα τι μανγκάς τι λας παλάλ μερικά λένταρ. Αλλά να μπορίνασα τι τραμπίνας καλά αλήθειες κα δεχτίνας ντα καλά κα κεράς πέρα. Πρέπει τι πφιράς «σαρί κι αλήθεια». (Ιωάννης 16:​13) Κο γιαβέρ μάθημας, ντικχλάμ παντς πράγματα σο μπορεί τι θυσιαντάμ για τι σικλιάς ντα τι ακολουθίνας ι αλήθεια. Ακανά κα ντικχάς σαρ μπορίνασα τι αβάς σίγουροι ότι να κα βουρτίνας ποτές οντουλέ πραγματέντε σο μουκχλάμ παλάλ.​—Ματθαίος 6:19.

8. Σαρ κα μπορίνελας ο τρόπος σο χρησιμοποιήνελα εκ Χριστιανός πο χρόνος τι κερέλ-λες τι νασέλ κατά αλήθεια χωρίς τι αγαβέλ-λες; Βακερέν εκ παράδειγμας.

⁸ Χρόνος. Για μα τι νασάς ποτές κατά αλήθεια χωρίς τι αγαβάς-λες, πρέπει τι χρησιμοποιήνας γκοντιάσαρ αμαρό χρόνος. Άμα να προσοχίνασα, μπορεί τι αρχίνας τι ντας μπουτ χρόνος κι διασκέδαση, κο πράγματα σο μπεϊντίνασα τι κεράς, κο Ίντερνετ ή κι τηλεόραση. Παρόλο σο ανταλά πράγματα μπορεί μα τι αβέν λάθος, κα μπορίνενας τι λεν αμένταρ χρόνος σο ανγκλέ χρησιμοποιήναας-λες για τι κεράς προσωπική μελέτη ντα έργος. Κάτι ασακό αβιλό-πες κι Έμα. * (Ντικχ ι υποσημείωση) Χουρντιαρέλα μπερί, η Έμα μανγκέλας μπουτ ο γκραστά ντα κάνα μπορίνελας τζάλας για ιππασία. Αλλά αρχισάλι τι τθερέλ τύψεις σο ντέλας αζόμ χρόνος οντουλέ πραγμάστε, οτθάρ αποφασιντάς τι κερέλ αλλαγές. Η Έμα επίσης σικλιλί μερικά πράγματα κατά εμπειρία σο τθερέλας η Κόρι Γουέλς, σο βόι-ντα ασχολίντιβελας ι γκραστέντζαρ. * (Ντικχ ι υποσημείωση) Ακανά η Έμα ντέλα πιο μπουτ χρόνος κι υπηρεσία κι Ιεχωβάσκι, ντα τθερέλα πιο μπουτ χρόνος πι φαμιλιάκε ντα πι αμαλένγκε σο βον-ντα υπηρετίνενα ι Ιεχωβάς. Νιωθίνελα πιο πασέ κο Ντεβέλ ντα ισί χαρούμενη επειδή  τζανέλα ότι χρησιμοποιήνελα πο χρόνος γκοντιάσαρ.

9. Σαρ κα μπορίνενας ο υλικά πράγματα τι αβέν μπουτ σημαντικά αμένγκε;

⁹ Υλικά πράγματα. Για τι συνεχίνας τι πφιράς κι αλήθεια, δεν πρέπει τι μουκχάς ο υλικά πράγματα τι αβέν μπουτ σημαντικά αμένγκε. Κάνα σικλιλάμ ι αλήθεια, αγαντάμ ότι η υπηρεσία ι Ιεχωβάσκι ισί μπουτ πιο σημαντική κατά υλικά πράγματα, ντα ισινάμας χαρούμενοι σο μουκχλάμ σαρέ ανταλά πράγματα ι αληθειάκε. Αλλά καζόμ νακχέλα ο καιρός, μπορεί τι ντικχάς γιαβερέν τι κινέν ο πιο νεβέ ηλεκτρονικές συσκευές ή τι απολαμβάνεν γιαβερά πράγματα σο κινένα ι λοβέντζαρ. Μπορεί τι αρχίνας τι νιωθίνας ότι χασαράσα κάτι. Μπορεί μα τι ερεσένα-αμέν οντουλά σο τθεράσα, ντα αντικάς πιο μπουτ τι μανγκάς τι γκίντας υλικά πράγματα ντα όχι τι υπηρετίνας ι Ιεχωβάς. Ανταβά ανέλα αμαρέ γκοντιάτε οντουβά σο αβιλό-πες κο Δημάς. Μανγκλάς «ανταλέ ντουνιάς» αζόμ μπουτ σο μουκχλάς ο διορισμός σο τθερέλας ι Παυλόσαρ. (2 Τιμόθεο 4:​10) Ο Δημάς μπορεί τι μανγκλάς ο υλικά πράγματα πιο μπουτ κατά υπηρεσία ι Ντεβλέσκι. Ή μπορεί μα τι μανγκέλας τι κερέλ θυσίες για τι υπηρετίνελ ι Παυλόσαρ. Καβά μάθημας λάσα αμέν; Μπορεί ανγκλέ τι μανγκάας μπουτ ο υλικά πράγματα. Άμα να προσοχίνασα, οντιά αγάπη μπορεί τι μπαριόλ πάλι αντρ’ αμέντε ντα τι αβέλ αζόμ ζουρανί σο κα κερέλ-αμέν τι χασαράς αμαρί αγάπη ι αληθειάκε.

10. Σο δεν πρέπει τι μουκχάς τι επηρεάνελ-αμέν;

¹⁰ Σχέσεις ι γιαβερέντζαρ. Για τι συνεχίνας τι πφιράς κι αλήθεια, δεν πρέπει τι μουκχάς τι επηρεάνεν-αμέν ο τζενέ σο να υπηρετίνενα ι Ιεχωβάς. Κάνα σικλιλάμ ι αλήθεια, η σχέση σο τθεράας αμαρέ αμαλέντζαρ σο νανέ Μάρτυρες ντα αμαρέ τζενέντζαρ αλλαξάλι. Μπορεί κάποιοι τι σεβάνενας ο νεβέ πράγματα σο πακιάας αλλά γιαβερά μπορεί τι γκιλέας αμέντζαρ κόντρα. (1 Πέτρου 4:4) Σίγουρα, προσπαθίνασα τι κεράς ο πιο λατσσό σο μπορίνασα για τι τζας-λεν λατσσές αμαρέ τζενέντζαρ ντα τι συμπεριφερίντιβας λένγκε λατσσιμάσαρ. Αλλά να μπορίνασα τι κεράς πέρα ο κανόνες ι Ιεχωβάσκε για τι κεράς λένγκο γκι. Ντα σαρ σικλιάσα κατά εδάφιος 1 Κορινθίους 15:​33, αμαρέ λατσσέ αμαλά πρέπει τι μανγκέν ι Ιεχωβάς.

11. Σαρ μπορίνασα μα τι σκεφτίνας ντα μα τι κεράς μαγαριμέ πράγματα;

¹¹ Μαγαριμέ σκέψεις ντα πράγματα. Για τι πφιράς κι αλήθεια, πρέπει τι αβάς άγιοι, ή γιαβέρτουλους πάκι, κι Ιεχωβάσκε γιακχά. (Ησαΐας 35:8· διαβάνεν 1 Πέτρου 1:​14-16) Κάνα σικλιλάμ ι αλήθεια, κερντάμ αλλαγές αμαρέ ζωγιάτε για τι ακολουθίνας ο κανόνες ι Γραφιάκε. Μερικοί κερντέ μπουτ μπαρέ αλλαγές. Όμως, πρέπει τι προσοχίνας μα τι αλλάνας ποτές αμαρί πάκι ζωή εκχέ μαγαριμέ ζωγιάσαρ. Σο μπορίνελα τι βοηθίνελ-αμέν τι τζας κόντρα κο πειρασμός τι κεράς λουμνικανέ πράγματα; Σκεφτίνεν σο ντινάς ο Ιεχωβά για τι μπορίνας αμέν τι αβάς άγιοι. Ντινάς πι αγαπημέ Τσσαβές, ι Ιησού Χριστός! (1 Πέτρου 1:​18, 19) Για τι ατσσάς πάκι κι Ιεχωβάσκε γιακχά, πρέπει πάντα τι ντας-αμέν γκοντί καζόμ σημαντική ισί η θυσία ι Ιησούσκι.

12, 13. (α) Σόσκε πρέπει τι ντικχάς ο γιορτές σαρ ντικχέλα-λεν ο Ιεχωβά; (β) Σο κα ντικχάς πιο τελέ;

¹² Έθιμα ντα συνήθειες σο να μανγκέλα ο Ντεβέλ. Αμαρέ τζενέ, οντουλά σο κεράσα λέντζαρ μπουτί ντα αμαρέ συμμαθητές μπορεί τι προσπαθίνεν τι κερέν-αμέν τι συμμετεχίνας λένγκε γιορτέντε. Σαρ κα  αντιμετωπίνας ι πίεση τι κεράς έθιμα ντα γιορτές σο να μανγκέλα ο Ιεχωβά; Πρέπει τι τθεράς ξεκάθαρα αμαρέ γκοντιάτε σόσκε ο Ιεχωβά να μπεϊντίνελα ασακέ γιορτές. Μπορίνασα τι ρόντας κο έντυπα σο τθεράσα για τι ντας-αμέν γκοντί σαρ αρχισάλε ασακέ γιορτές. Κάνα σκεφτίνασα προσεκτικά σόσκε βακερέλα η Γραφή μα τι κεράς ανταλά γιορτές, αβάσα σίγουροι ότι πφιράσα τροπόσαρ σο ισί “σωστός κι Κυριόσκε γιακχά”. (Εφεσίους 5:​10) Άμα τθεράσα εμπιστοσύνη κο Ιεχωβά ντα λέσκε Λαφίστε, να κα “νταράς τζενένταρ”.​—Παροιμίες 29:25.

¹³ Μανγκάσα τι πφιράς κι αλήθεια για πάντα. Σο κα βοηθίνελ-αμέν τι αβάς ατζέ πιο αποφασισμέ τι πφιράς κι αλήθεια; Κα ντικχάς τριν πράγματα σο μπορίνασα τι κεράς.

14. (α) Σαρ κα βοηθίνελ-αμέν η προσωπική μελέτη τι αβάς αποφασισμέ μα τι μουκχάς ποτές ι αλήθεια; (β) Σόσκε χρειαζίντιβασα ι σοφία, ι διόρθωση ντα ι ικανότητα τι αγαβάς;

¹⁴ Πρώτον, συνεχίνεν τι κερέν προσωπική μελέτη κατά Γραφή ντα σκεφτίνεν προσεκτικά οντουλά σο σικλιόνα. Τι τθερέν εκ λατσσό πρόγραμμας για τι κερέν-λες ανταβά. Καζόμ πιο μπουτ διαβάνενα ντα σκεφτίνενα, αζόμ πιο μπουτ κα μανγκέν ι αλήθεια ντα κα αβέν αποφασισμέ μα τι μουκχέν-λα ποτές. Ο εδάφιος Παροιμίες 23:​23 βακερέλα αμένγκε τι “κινάς ι αλήθεια” ντα επίσης τι κινάς “ι σοφία, ι διόρθωση ντα ι ικανότητα τι αγαβάς”. Να ερεσέλα σάντε τι τζανάς ι αλήθεια ι Γραφιάκι. Πρέπει τι ακολουθίνας-λα αμαρέ ζωγιάτε. Η ικανότητα τι αγαβάς βοηθίνελα-αμέν τι ντικχάς σο σχέση τθερένα ο πράγματα σο σικλιάσα ι πραγματέντζαρ σο σικλιλάμ πιο τζανγκλέ. Η σοφία τσσίντελα-αμέν τι κεράς ο πράγματα σο τζανάσα. Ισί φαρ σο η αλήθεια σικαβέλα αμένγκε σο αλλαγές πρέπει τι κεράς, ντα αντικάς διορθώνελα-αμέν. Πρέπει τι δεχτίνας σουγκό ανταγιά διόρθωση σο ισί πιο πολύτιμη κατά ασήμι.​—Παροιμίες 8:10.

15. Σαρ αρακχαβέλα-αμέν η αλήθεια σαρ εκ ζώνη;

¹⁵ Δεύτερον, τι αβέν αποφασισμέ τι ακολουθίνεν ι αλήθεια τουμαρέ ζωγιάτε κάθε ντιβές. Η Γραφή μοιασκιαρέλα ι αλήθεια ι ζωνιάσαρ σο ιρίνας ο στρατιώτες. (Εφεσίους 6:​14) Κο πουρανέ μπρεσά, η ζώνη ι στρατιωτίσκι αρακχαβέλας-λες κο τζένγκι καζόμ ισινέ πφαντί σικίς. Άμα ισινέ μπόσι, να κα βοηθίνελας-λες. Σαρ αρακχαβέλα-αμέν η αλήθεια σαρ εκ ζώνη; Άμα ατσσικιαράσα ι Γραφιάκι αλήθεια πασ’ αμέντε συνέχεια, κα αρακχαβέλ-αμέν για μα τι σκεφτίνας με λάθος τρόπος ντα κα βοηθίνελ-αμέν τι λας λατσσέ αποφάσεις. Κάνα τθεράσα εκ μπαρό πρόβλημας ή αβέλα αμένγκε ο πειρασμός τι κεράς κάτι λάθος, η αλήθεια ι Γραφιάκι κα κερέλ-αμέν ατζέ πιο αποφασισμέ τι κεράς ο σωστός. Σαρ εκ στρατιώτης να κα τζάλας  ποτές κο τζένγκι μπι ζωνιάκο, αντικάς αμέν-ντα να κα μουκχάς ποτές ι αλήθεια. Μανγκάσα τι αβάς σίγουροι ότι ακολουθίνασα ι αλήθεια σαρέ κο πράγματα αμαρέ ζωγιάτε. Ο στρατιώτης επίσης ιμπλαβέλας πο σπαθίς πι ζωνιάτε. Κα ντικχάς σαρ μπορίνασα τι κεράς αμέν-ντα κάτι ασακό.

16. Σαρ αβάσα ατζέ πιο αποφασισμέ τι πφιράς κι αλήθεια κάνα σικλιαράσα-λα κο γιαβερά;

¹⁶ Τρίτον, τι σικλιαρέν ι αλήθεια ι Γραφιάκι κο γιαβερά καζόμ πιο λατσσές μπορίνενα. Η Γραφή ισί σαρ σπαθίς. Σαρ εκ λατσσό στρατιώτης ασταρέλας σικίς πο σπαθίς, πρέπει αμέν-ντα τι ασταράς σικίς ο Λάφι ι Ντεβλέσκο. (Εφεσίους 6:​17) Σαρέ μπορίνασα τι αβάς πιο λατσσέ δάσκαλοι, “σο χρησιμοποιήνενα σωστά ο λάφι ι αληθειάκο”. (2 Τιμόθεο 2:​15) Κάνα χρησιμοποιήνασα ι Γραφή για τι σικλιαράς γιαβερέν, σικλιάσα ντα μανγκάσα ι αλήθεια ατζέ πιο μπουτ. Ντα αβάσα ατζέ πιο αποφασισμέ τι πφιράς κι αλήθεια.

17. Σόσκε ισί πολύτιμη η αλήθεια τουμένγκε;

¹⁷ Η αλήθεια ισί εκ πολύτιμος δώρος κατά Ιεχωβά. Επειδή ντιντιλό-αμέν ανταβά δώρος, μπορίνασα τι τθεράς εκ λατσσί φιλία αμαρέ Νταντέσαρ σο ισί κο ουρανός. Ανταβά ισί ο πιο σημαντικός πράγμας σο κα μπορίναας τι τθεράς. Ο Ιεχωβά ήδη σικλιαρντάς-αμέν μπουτ πράγματα, αλλά ανταβά ισί σάντε η αρχή! Ντέλα-αμέν πο λάφι ότι κα συνεχίνελ τι σικλιαρέλ-αμέν για πάντα. Οτθάρ, τι ντικχέν ι αλήθεια σαρ εκ λατσσό μαργαριτάρι. Συνεχίνεν τι “κινέν ι αλήθεια ντα μα τι μπικινέν-λα ποτές”. Αντικάς, σαρ ο Δαβίδ, κα ατσσικιαρέν ο λάφι σο ντινέν κο Ιεχωβά: «Κα πφιράβ τι αληθειάτε».​—Ψαλμός 86:11.