1, 2. Σο σικλιάσα καζόμ κεράσα πρόοδος; Βακερέν εκ παράδειγμας.

ΣΚΕΦΤΙΝΕΝ ότι εκ τζενό ντέλα εκ δώρος εκχέ χουρντέ τσσαβέστε. Λέσκο ντατ ντα λέσκι ντάι βακερένα λέσκε: «Βάκερ ευχαριστώ». Ο τσσαβό ντέλα καν, πιο μπουτ επειδή βακερντέ-λες λέσκε. Αλλά καζόμ μπαριόλα, αρχίνελα τι αγαβέλ σόσκε λέσκο ντατ ντα λέσκι ντάι πακιάνα ότι ισί σημαντικός τι σικαβέλ εκτίμηση κάνα ο γιαβερά κερένα λατσσέ πράγματα. Ακανά νικιόλα λέσταρ τι βακερέλ ευχαριστώ επειδή σικλιλό τι σικαβέλ εκτίμηση.

² Κάτι ασακό αβιλό-πες αμέντζαρ-ντα. Κάνα αρχισάλαμ τι σικλιάς ι αλήθεια, σικλιλάμ ότι ισί σημαντικός τι ντας καν κο βασικούς κανόνες κι Ιεχωβάσκε. Όμως, καζόμ κεράσα πρόοδος, σικλιάσα πιο μπουτ σαρ σκεφτίνελα, δηλαδή σο μπεϊντίνελα, σο να μπεϊντίνελα ντα σαρ ντικχέλα ο πράγματα. Κάνα μουκχάσα ο τρόπος σκέψης ι Ιεχωβάσκο τι επηρεάνελ οντουλά σο τραμπίνασα ντα κεράσα, σικαβάσα ότι κεράσα λέσκε σκέψεις αμαρέ.

3. Σόσκε μπορεί τι αβέλ δύσκολος τι σκεφτίνας σαρ ο Ιεχωβά;

³ Παρόλο σο μπεϊντίνασα τι σικλιάς τι σκεφτίνας σαρ ο Ιεχωβά, μερικές φορές ισί δύσκολος τι κεράς-λες ανταβά επειδή ισινάμ ατελείς. Για παράδειγμας, τζανάσα σαρ ντικχέλα ο Ιεχωβά  ο λουμνιπέ, ι αγάπη για το υλικά πράγματα, ο έργος, ο ρατ ντα γιαβερά πράγματα. Όμως, μπορεί τι αβέλ αμένγκε δύσκολος τι αγαβάς σόσκε ντικχέλα-λεν αντικάς. Άρα, σαρ μπορίνασα τι σικλιάς τι σκεφτίνας πιο μπουτ σαρ ο Ιεχωβά; Ντα σαρ κα βοηθίνελ-αμέν ανταβά τι κεράς ο σωστός ακανά ντα κο μέλλον;

4. Σο μανγκέλα τι βακερέλ τι τσσουβάς νεβέ πράγματα αμαρέ γκοντιάτε;

⁴ Διαβάνεν Ρωμαίους 12:2. Ανταλέ εδαφιόστε, ο απόστολος Παύλος σικαντάς σο χρειαζίντιβελα τι κεράς για τι σικλιάς τι σκεφτίνας σαρ ο Ιεχωβά. Βακερντάς ότι δεν πρέπει “τι επηρεάντιβας ανταλέ ντουνιάσταρ”. Σαρ σικλιλάμ κο γιαβέρ μάθημας, ανταβά μανγκέλα τι βακερέλ ότι δεν πρέπει τι δεχτίνας ι ντουνιάσκε απόψεις. Αλλά ο Παύλος βακερντάς επίσης ότι πρέπει τι τσσουβάς νεβέ πράγματα αμαρέ γκοντιάτε. Ανταβά μανγκέλα τι βακερέλ ότι πρέπει τι κεράς προσωπική μελέτη κατά Λάφι ι Ντεβλέσκο, τι αγαβάς λέσκε σκέψεις, τι σκεφτίνας-λεν ντα τι προσπαθίνας μπουτ τι τθεράς ι Ντεβλέσκο τρόπος σκέψης.

5. Εξηγίνεν σο διαφορά τθερέλα ο διάβασμας κατά προσωπική μελέτη.

⁵ Η προσωπική μελέτη νανέ σάντε τι διαβάνας σουγκό πληροφορίες ή τι αρακχάς ο απαντήσεις κο ερωτήσεις σο τθερέλα εκ έντυπος. Κάνα κεράσα προσωπική μελέτη, σκεφτίνασα σο σικλιαρένα-αμέν οντουλά σο διαβάνασα ι Ιεχωβάσκε, ι πραγματένγκε σο κερέλα ντα για το τρόπος σο σκεφτίνελα. Προσπαθίνασα τι αγαβάς σόσκε ο Ιεχωβά βακερέλα αμένγκε τι κεράς κάτι ντα μα τι κεράς κάτι γιαβέρ. Επίσης, σκεφτίνασα καλά αλλαγές χρειαζίντιβελα τι κεράς αμαρέ ζωγιάτε ντα κο τρόπος σο σκεφτίνασα. Μπορεί μα τι σκεφτίνας-λεν σαρέ ανταλά κάθε φαρ σο κεράσα προσωπική μελέτη. Αλλά ισί λατσσό τι αρακχάς χρόνος για τι σκεφτίνας οντουλά σο διαβαντάμ, ίσως ο επκάς χρόνος κατά προσωπική μελέτη τι διαβάνας ντα ο γιαβέρ τι σκεφτίνας.​—Ψαλμός 119:​97· 1 Τιμόθεο 4:15.

6. Σο αβέλα-πες κάνα σκεφτίνασα προσεκτικά οντουλά σο σικλιάσα κατά Ντεβλέσκο Λάφι;

⁶ Κάνα σκεφτίνασα προσεκτικά οντουλά σο σικλιάσα κατά Ντεβλέσκο Λάφι, αβέλα-πες κάτι μπουτ σουκάρ. “Σικαβάσα αμαρέ νεαυτόσκε”, ή γιαβέρτουλους αβάσα σίγουροι, ότι ο τρόπος σο σκεφτίνελα ο Ιεχωβά ισί τέλειος. Αρχίνασα τι αγαβάς σαρ ντικχέλα βοβ ο πράγματα ντα δεχτίνασα λέσκι άποψη. Αντικάς, τσσουβάσα νεβέ πράγματα αμαρέ γκοντιάτε ντα αρχίνασα τι σκεφτίνας με εκ νεβό τρόπος. Σιγά σιγά, κεράσα ο σκέψεις ι Ιεχωβάσκε αμαρέ.

7, 8. (α) Σαρ ντικχέλα ο Ιεχωβά ο υλικά πράγματα; (Ντικχ ο φωτογραφίες σο ισί κι αρχή) (β) Αν ντικχάσα ο υλικά πράγματα σαρ ο Ιεχωβά, καβά κα αβέλ πάντα ο πιο σημαντικός πράγμας αμένγκε;

⁷ Αμαρέ σκέψεις επηρεάνενα οντουλά σο κεράσα. (Μάρκος 7:​21-23· Ιακώβου 2:​17) Για τι ντικχάς μερικά παραδείγματα σο σικαβένα-λες ξεκάθαρα ανταβά. Η ιστορία για το μπιανιπέ ι Ιησούσκο σικαβέλα ξεκάθαρα σαρ ντικχέλα ο Ιεχωβά ο υλικά πράγματα. Ο Ντεβέλ τραμπιντάς τι μπαριαρέν λέσκε Τσσαβές ο Ιωσήφ ντα η Μαρία παρόλο σο να τθερένας μπουτ λοβέ. (Λευιτικό 12:8· Λουκάς 2:​24) Κάνα μπιάντιλο ο Ιησούς, η Μαρία «τσσουντάς-λες οτθέ σο χάνας ο ζώα, σόσκε να ισινέ γιαβερτθέ τθαν τι μπεσέν». (Λουκάς 2:7) Άμα μανγκέλας ο Ιεχωβά, κα μπορίνελας τι ντελ εκ μπουτ πιο λατσσό τθαν για τι μπιάντιβελας λέσκο Τσσαβό. Αλλά βοβ μανγκέλας τι μπαριόλ  ο Ιησούς εκχέ φαμιλιάτε σο τσσουβέλας κι πρώτη θέση ι λατρεία ι Ντεβλέσκι. Ανταβά ισινέ ο πιο σημαντικός πράγμας ι Ιεχωβάσκε.

⁸ Η ιστορία για το μπιανιπέ ι Ιησούσκο σικλιαρέλα-αμέν σαρ ντικχέλα ο Ιεχωβά ο υλικά πράγματα. Μερικά νταντά ντα νταγιά μανγκένα τι τθερέν λένγκε τσσαβέ ο πιο λατσσέ πράγματα, ατζέ-ντα αν ανταβά κα ανέλ προβλήματα κι φιλία σο τθερένα ο τσσαβέ ι Ιεχωβάσαρ. Όμως αγαβάσα ξεκάθαρα ότι, ι Ιεχωβάσκε, ο πιο σημαντικός πράγμας σο μπορίνασα τι τθεράς ισί αμαρί φιλία λέσαρ. Ντικχένα-λες τουμέν ανταβά σαρ ντικχέλα-λες ο Ιεχωβά; Σο σικαβένα οντουλά σο κερένα;​—Διαβάνεν Εβραίους 13:5.

9, 10. Σαρ μπορίνασα τι σικαβάς ότι τθεράσα ι άποψη ι Ιεχωβάσκι οντουλένγκε σο κερένα ι γιαβερέν τι χασαρέν πουμαρί πίστη;

⁹ Εκ γιαβέρ παράδειγμας ισί η άποψη ι Ιεχωβάσκι οντουλέ τζενένγκε σο κερένα ι γιαβερέν τι χασαρέν πουμαρί πίστη, δηλαδή οντουλένγκε σο κερένα ι γιαβερέν τι αμαρτίνεν ή τι τσσιναβέν τι υπηρετίνεν ι Ιεχωβάς. Ο Ιησούς βακερντάς: «Κον κα κερέλ εκχές ακαλέ τζενένταρ σο ισί χουρντέ τι χασαρέλ πι πίστη, κα αβέλας πιο λατσσές τι τσσουβέν λέσκε ντονταλάι κι κορί εκ μπαρό μπαρ σο βουρτίνελα-λες ο χχερ ντα τι φουρτίνεν-λες κι ντεριάβ». (Μάρκος 9:​42) Ανταλά λάφια ισί μπουτ ζουρανέ! Ντα τζανάσα ότι ο Ιησούς ισί σαρ πο Ντατ. Οτθάρ, μπορίνασα τι αβάς σίγουροι ότι ο Ιεχωβά νανέ ιτς ευχαριστιμέ κάνα εκ τζενό κερέλα εκχέ γιαβερέ τζενές σο ακολουθίνελα ι Ιησούς τι χασαρέλ πι πίστη.​—Ιωάννης 14:9.

¹⁰ Αμέν, ντικχάσα ανταβά πράγμας σαρ ντικχέλα-λες ο Ιεχωβά ντα ο Ιησούς; Σο σικαβένα οντουλά σο κεράσα; Για παράδειγμας, μπορεί τι μπεϊντίνασα τι ιριαβάς-αμέν ντα τι ζουζίνας-αμέν με εκ συγκεκριμέ τρόπος. Όμως, σο κα κεράς άμα ανταβά μπορεί τι ενοχλίνελ μερικέ πφραλέν κι κχανγκιρί ή τι κερέλ γιαβερέν τι σκεφτίνεν μπέτι πράγματα; Κα κερέλ-αμέν η αγάπη αμαρέ πφραλένγκε μα τι κεράς σο μπεϊντίνασα αμέν;​—1 Τιμόθεο 2:9, 10.

11, 12. Σαρ κα αρακχαβάς-αμέν αν κα σικλιάς τι μισίνας σο μισίνελα ο Ιεχωβά ντα τι ατσσικιαράς αμαρό νεαυτός;

¹¹ Εκ γιαβέρ παράδειγμας ισί ότι ο Ιεχωβά μισίνελα ι αδικία. (Ησαΐας 61:8) Σίγουρα, τζανέλα ότι μερικές φορές ισί δύσκολος αμένγκε τι κεράς ο σωστός, επειδή ισινάμ ατελείς. Όμως, μανγκέλα τι μισίνας ο γκεραλιπέ σαρ μισίνελα-λες βοβ. (Διαβάνεν Ψαλμός 97:​10) Άμα σκεφτίνασα προσεκτικά σόσκε μισίνελα ο Ιεχωβά ο γκεραλέ πράγματα, ανταβά κα βοηθίνελ-αμέν τι κεράς λέσκι άποψη αμαρί ντα κα ντελ-αμέν ι ζορ μα τι κεράς-λεν.

¹² Αν κα σικλιάς τι μισίνας ο γκεραλιπέ, ανταβά κα βοηθίνελ-αμέν επίσης τι αγαβάς ότι κάποια πράγματα ισί λάθος, ατζέ-ντα άμα η Γραφή να κερέλα λάφι συγκεκριμέ λένγκε. Για παράδειγμας, ο λαπ ντάνσινγκ (κχελιπέ οπράλ κο κοτσά εκχέ τζενέσκε) σο ισί εκ λουμνικανό κχελιπέ, καζόμ τζάλα αβέλα πιο συνηθισμέ κο ντουνιάς. Κάποιοι αμντίνενα ότι γιαβέρ ισί ανταβά κχελιπέ ντα γιαβέρ ισί τι τζαν  γιαβερέσαρ, οτθάρ-ντα πακιάνα ότι νανέ γκεραλό πράγμας. * (Ντικχ ι υποσημείωση) Αλλά σο άποψη τθερέλα ο Ιεχωβά ανταλέσκε; Ντεν-τουμέν γκοντί ότι ο Ιεχωβά μισίνελα σο-ντα γκεραλιπέ υπαρχίντιβελα. Οτθάρ, τι ατσσάς ντουρ κατά γκεραλέ πράγματα ντα τι σικλιάς τι ατσσικιαράς αμαρό νεαυτός ντα τι μισίνας σο μισίνελα ο Ιεχωβά.​—Ρωμαίους 12:9.

13. Σόσκε πρέπει τι σκεφτίνας από ακανά σαρ ντικχέλα ο Ιεχωβά ο πράγματα για τι λας σωστές αποφάσεις κο μέλλον;

¹³ Όταν κεράσα προσωπική μελέτη, ισί λατσσό τι σκεφτίνας σαρ ντικχέλα ο Ιεχωβά ο πράγματα επειδή ανταβά κα βοηθίνελ-αμέν τι λας σωστές αποφάσεις. Αντικάς, αν κα αβέλ-πες κάτι σο κα χρειαζίντιβελ τι αποφασίνας σουγκό, να κα σαστίνας. (Παροιμίες 22:3) Για τι ντικχάς μερικά παραδείγματα κατά Γραφή.

14. Σο σικλιάσα κατά απάντηση σο ντινάς ο Ιωσήφ κι ρομνί κι Πετεφρίσκι;

¹⁴ Ο Ιωσήφ βακερντάς σουγκό «όχι» κάνα ι Πετεφρίσκι ρομνί προσπαθίνελας τι περαβέλ-λες. Σίγουρα, ο Ιωσήφ σκεφτιντάας προσεκτικά σαρ ντικχέλα ο Ιεχωβά ο μπιαβ. (Διαβάνεν Γένεση 39:8, 9) Ο Ιωσήφ βακερντάς κι ρομνί κι Πετεφρίσκι: «Σαρ κα μπορίναβας τι κεράβ ανταβά μπουτ μπέτι πράγμας ντα τι αμαρτίναβ κο γιακχά κι Ντεβλέσκε;» Ανταβά σικαντάς ότι κερντάας ι άποψη ι Ιεχωβάσκι πιρί. Αμέν σο κα κεράας; Σο κα κερένας άμα κάποιος τουμαρέ μπουτιάτε προσπαθίνελα τι περαβέλ-τουμέν; Ή σο κα κερένας άμα κάποιος μπουτσσαβέλα τουμένγκε κο κινητός εκ μήνυμας ή φωτογραφία σο βακερέλα ή σικαβέλα λουμνικανέ πράγματα; * (Ντικχ ι υποσημείωση) Ισί μπουτ πιο εύκολος τι ατσσάς αφοσιωμέ κο Ιεχωβά άμα από ακανά σικλιλάμ ντα δεχτιντάμ ι άποψη ι Ιεχωβάσκι ασακέ πραγματένγκε ντα αποφασιντάμ σο κα κεράς.

15. Σαρ μπορίνασα τι ατσσάς πιστοί κο Ιεχωβά σαρ κερντέ ο τριν Εβραίοι;

¹⁵ Σκεφτίνεν επίσης ο παράδειγμας ι τρινέ Εβραιόνγκο σο βακερένας λένγκε Σεδράχ, Μισάχ ντα Αβδενεγώ. Όταν ο βασιλιάς Ναβουχοδονόσορ ντινάς εντολή τι ντεν λατρεία κο χρυσός άγαλμας σο κερντάας, βον να ντινέ καν. Η ξεκάθαρη απάντηση σο ντινέ κο βασιλιάς σικαντάς ότι σκεφτιντέας σο κα αβέλας-πες άμα κα ατσσόνας πιστοί κο Ιεχωβά. (Έξοδος 20:4, 5· Δανιήλ 3:​4-6, 12, 16-18) Βακερέν ότι τουμαρό αφεντικός μανγκέλα τουμένταρ-ντα τι ντεν λοβέ για τι αβέλ-πες κάτι σο τθερέλα τι κερέλ ι ψεύτικε θρησκειάσαρ. Σο κα κερένας; Αντίς τι μπεσάς τι αβέλ-πες κάτι ασακό, κα αβέλας λατσσό τι σκεφτίνας από ακανά σαρ ντικχέλα ο Ιεχωβά ασακέ πράγματα. Αντικάς, άμα κα αβάς ποτές εκχέ ασακέ περιπτωσιάτε, κα αβέλ αμένγκε πιο εύκολος τι κεράς ντα τι βακεράς οντουβά σο ισί σωστός, σαρ κερντέ ο τριν Εβραίοι.

16. Αν αγαβάσα λατσσές σαρ σκεφτίνελα ο Ιεχωβά, σαρ βοηθίντιβασα τι αβάς προετοιμασμέ άμα κα παθίνας ξαφνικά κάτι σο κα τσσουβέλ αμαρί ζωή σε κίνδυνος;

 ¹⁶ Κάνα σκεφτίνασα προσεκτικά για τι αγαβάς σαρ σκεφτίνελα ο Ιεχωβά, μπορίνασα τι ατσσάς αφοσιωμέ λέστε άμα ξαφνικά παθισάλαμ κάτι σο κα τσσουβέλ αμαρί ζωή σε κίνδυνος. Σίγουρα, ισινάμ αποφασισμέ μα τι τσσουβάς ρατ ή εκ κατά σταρ πιο σημαντικά πράγματα σο τθερέλα ο ρατ. (Πράξεις 15:​28, 29) Αλλά μερικέ πραγματένγκε σο τθερένα τι κερέν ι ρατέσαρ ο κάθε Χριστιανός πρέπει τι ρόντελ ο αρχές ι Γραφιάκε ντα τι αποφασίνελ κορκορό. Κάνα ισί πιο λατσσές τι αποφασίνας σο κα κεράς; Μήπως κάνα κα αβάς κο νοσοκομείος, σο μπορεί τι ντουκχάσα ντα τι μανγκέν αμένταρ τι λας σουγκό εκ απόφαση; Σίγουρα όχι. Ακανά ισί ο καιρός τι ρόντας, τι κεράς εκ νομικός ιατρικός έγγραφος, σαρ η κάρτα ι ρατέσκε σο ντέλα η οργάνωση, ντα τι κεράς λάφι αμαρέ γιατρόσαρ. * (Ντικχ ι υποσημείωση)

17-19. Σόσκε ισί σημαντικός τι σικλιάς από ακανά σαρ ντικχέλα ο Ιεχωβά ο πράγματα; Βακερέν εκ παράδειγμας.

¹⁷ Τελικά, σκεφτίνεν καζόμ σουγκό απαντιντάς ο Ιησούς κάνα ο Πέτρος βακερντάς λέσκε: «Τζίτζινε τούκε, Κύριε». Ο Ιησούς σκεφτιντάας μπουτ λατσσές σο μανγκέλας ο Ντεβέλ λέσταρ ντα ο προφητείες σο τθερένας τι κερέν λέσκε ζωγιάσαρ κι πφουβ ντα λέσκε μεριμάσαρ. Οντουλά σο τζανέλας ντινέ-λες ι ζορ τι ατσσόλ πιστός κο Ιεχωβά ντα τι ντελ πι ζωή σαρ θυσία σαρέ αμένγκε.​—Διαβάνεν Ματθαίος 16:​21-23.

¹⁸ Αντιβές, ο Ντεβέλ μανγκέλα τι αβάς λέσκε αμαλά ντα τι κεράς ο πιο λατσσό σο μπορίνασα για τι βακεράς ο λατσσέ αμπέρια. (Ματθαίος 6:​33· 28:​19, 20· Ιακώβου 4:8) Όμως, μερικά τζενέ σο μανγκένα αμαρό λατσσιπέ μπορεί τι προσπαθίνεν τι τσσιναβέν-αμέν, σαρ κερντάς ο Πέτρος κο Ιησούς. Για παράδειγμας, τουμαρό αφεντικός μπορεί τι ντελ-τουμέν πιο μπουτ λοβέ αλλά τουμέν τζανένα ότι κα χρειαζίντιβελ τι κερέν μπουτί πιο μπουτ σαάτια ντα ότι να κα τθερέν αζόμ μπουτ χρόνος για τι τζαν κο συναθροίσεις ή κο έργος. Ή άμα τζάνα σχολείος,  βακερέν ότι ντένα-τουμέν ι ευκαιρία τι νασέν ντουρ τουμαρέ κχερέσταρ για τι λεν πιο μπουτ εκπαίδευση γιαβερτθέ. Αν κα αβέλ-πες ανταβά, κα αβέλας λατσσό τι κερέν προσευχή, τι ρόντεν ντα τι κερέν λάφι τουμαρέ φαμιλιάσαρ ή ι πρεσβυτερόντζαρ χάνικ πριν τι λεν ι απόφαση; Ισί πιο λατσσές τι σικλιόν από ακανά σαρ ντικχέλα ο Ιεχωβά ανταλά πράγματα ντα τι κερέν λέσκε σκέψεις τουμαρέ. Αντικάς, άμα κο μέλλον κα βακερέν τουμένγκε τι κερέν ανταλά πράγματα, μπορεί τι αγαβέν ότι να πφερένα μπαγιά τουμαρί γιακχ. Τζανένα ακριβώς σο τι κερέν επειδή αποφασιντέν πιο τζανγκλέ τι ατσσόν αφοσιωμέ κι υπηρεσία κι Ιεχωβάσκι.

¹⁹ Ίσως μπορίνενα τι σκεφτίνεν γιαβερά-ντα περιπτώσεις σο μπορεί ξαφνικά τι δοκιμάνεν τουμαρί αφοσίωση κο Ιεχωβά. Σίγουρα, ναστί προετοιμάνασα-αμέν σαρέ οντουλένγκε σο μπορεί τι αβέν-πες. Αλλά άμα σκεφτίνασα προσεκτικά κάνα κεράσα προσωπική μελέτη για τι αγαβάς σαρ σκεφτίνελα ο Ιεχωβά, κα αβέλ πιο σίγουρος ότι κα ντας-αμέν γκοντί οντουλά σο σικλιλάμ ντα ότι κα τζανάς σαρ τι χρησιμοποιήνας-λεν σε κάθε περίπτωση. Άρα, κάνα κεράσα προσωπική μελέτη, τι ντας σημασία σαρ σκεφτίνελα ο Ιεχωβά, τι κεράς λέσκο τρόπος σκέψης αμαρό ντα τι σκεφτίνας σαρ κα βοηθίνελ-αμέν τι λας σωστές αποφάσεις ακανά ντα κο μέλλον.

20, 21. (α) Σόσκε κα χαιρίνας αμαρί ελευθερία κο νεβό ντουνιάς; (β) Σαρ μπορίνασα τι χαιρίνας ι ζωή ακανά;

²⁰ Σαρέ μπεσάσα σαρ σαρ ι νεβέ ντουνιάσκε. Ο πιο μπουτ αμένταρ τθεράσα ελπίδα τι τζουβντιάς για πάντα κο Παράδεισος κι πφουβ. Κάνα κα κυβερνίνελ η Βασιλεία ι Ντεβλέσκι, κα ελευθερώντιβας σαρέ κατά προβλήματα ντα κατά ντουκχ σο τθεράσα ανταλέ ντουνιάστε. Ντα σίγουρα κα συνεχίνας τι τθεράς ι ελευθερία τι τραμπίνας ο πράγματα σο μπεϊντίνασα ντα μανγκάσα.

²¹ Αλλά ανταβά να μανγκέλα τι βακερέλ ότι κα τθεράς ελευθερία χωρίς όρια. Ο τζενέ σο ισί ήρεμοι κα λεν αποφάσεις σο κα βασίντιβεν κο νόμοι ντα κο σκέψεις κι Ιεχωβάσκε. Ντα ανταβά κα ανέλ μπαρί χαρά ντα μπουτ ειρήνη. (Ψαλμός 37:​11) Μέχρι τι αβέλ-πες ανταβά, μπορίνασα τι χαιρίνας αμαρί ζωή καζόμ κεράσα ο σκέψεις ι Ιεχωβάσκε αμαρέ.